Luka
5 Lushi lɔmɔtshi, lam’aki olui w’anto suke suke la nde ndo lam’akawahokamɛka ɔtɛkɛta wa Nzambi, Yeso akemala l’omamu w’oduwa wa Ngɛnɛzarɛta.*+ 2 Nde akɛnyi waato 2 wokelekami l’omamu w’oduwa, amundji wa nse wakatombe oma lɔkɔ ndo wakasolaka ɛtɛyi+ awɔ. 3 Nde akɔtɔ lo waato waki Simɔna ndo nde akɔɔlɔmbɛ dia ntɔla waato yema otsha l’atei. Oma laasɔ, nde akadjasɛ ndo akatatɛ mbetsha elui w’anto oma lo waato. 4 Lam’akandashidiya la ntɛkɛta, nde akatɛ Simɔna ate: “Nyomɔtɔla waato otsha lo dingunda kele nyoke ɛtɛyi anyu l’ashi.” 5 Koko Simɔna akate ate: “Ombetsha, takadiɛnɛ otsho w’otondo ko hatondji ndooko ɛngɔ,+ koko lam’ele wɛ kambota, layanga mboka ɛtɛyi l’ashi.” 6 Lam’akawasale dui sɔ, vɔ wakande* nse efula ka mamba. Ndo ɛtɛyi awɔ wakatatɛ mbatɛ.+ 7 Ɔnkɔnɛ, vɔ wakelɛ asekawɔ waki lo waato okina dia ndjaakimanyiya, ko vɔ wakaye ndo wakalodia waato akɔ 2 la nse lo yɛdikɔ yele waato wakatatɛ dinda. 8 Etena kakandɛnyi dikambo sɔ, Simɔna Petero akakusama l’adwe wa Yeso ndo akate ate: “Nkumadiɔndjɔ, mɔ oma lalemi, nɛ dia dimi lekɔ otshi wa pɛkato.” 9 Nɛ dia nde la wanɛ tshɛ waki kaamɛ la nde wakaambe woho w’anyanya lo menda nse yakawande, 10 ndo Jakɔba la Joani, ana wa Zebede+ wakakambaka kaamɛ la Simɔna vɔ lawɔ wakaambe. Koko Yeso akatɛ Simɔna ate: “Takoka wɔma. Oma ko kakianɛ, wɛ ayondaka anto wasɛna.”+ 11 Ko vɔ wakela waato l’okongo, wakatshike diangɔ tshɛ ndo wakooyele.+
12 Mbala kɛmɔtshi, lam’akinde l’osomba ɔmɔtshi, nyolonge, pami kɛmɔtshi aki la sudi k’efula. Lam’akandɛnyi Yeso, nde akayakɔsha la ntondo kande ndo akɔɔsɛngasɛnga ate: “Nkumadiɔndjɔ, ɔnkɔnɔlɛ+ naka wɛ alanga.” 13 Ko nde akasembola lonya, akawonanda ndo akawotɛ ate: “Dimi nangaka, ɔkɔnɔ.” Ko mbala kakɔ ɔtɔi, sudi kande kakashile.+ 14 Oma laasɔ, nde akakɔkɔmiya pami kakɔ diaha nde mbutɛ ndooko onto, awotɛ ate: “Tshɔka toyaɛnya le ɔlɔmbɛdi ndo tokimɔ woshasha wakate+ Mɔsɛ dia vɔ+ nshikikɛ ɔnɛ wɛ ambɔkɔnɔ.” 15 Koko lokumu lendana la nde lakaleke diangana ndo elui a weke w’anto wakatshumanaka dia ndjoohokamɛ ndo dia ndjɔkɔnɔ oma lo hemɔ+ yawɔ. 16 Ko nde akatshɔka mbala la mbala l’ahole waha anto dia tɔlɔmba.
17 Lushi lɔmɔtshi lam’akandetshaka, Afarisɛ ndo embetsha w’Ɛlɛmbɛ wakaye oma lo tongelongelo tshɛ ta la Ngalileya, ta la Judeya ndo oma la Jɛrusalɛma wakadjasɛ laawɔ, ko Jehowa* akawosha wolo wa nkɔnɔla anto.+ 18 Nyolonge, anto amɔtshi wakayɛmbaka pami kɛmɔtshi kaki ekuse lo mbeto kɛmbawɔ ɛkɔnyi ndo vɔ wakayangaka dia mbɔɔtshiya le Yeso ndo mbokitsha la ntondo kande.+ 19 Lam’ele vɔ kotana woho wa mbɔtɔ la nde nɛ dia anto waki efula, vɔ wakadɛ lo nsambe ka luudu, wakakiate ndo wakooholoya la mbeto kɛmbawɔ ɛkɔnyi l’atei w’anto waki la ntondo ka Yeso. 20 Lam’akandɛnyi mbetawɔ kawɔ, Yeso akate ate: “Ɔlɔngɔ, pɛkato yayɛ yambodimanyiyama.”+ 21 Ko afundji l’Afarisɛ wakatatɛ nkana yimba, wata vate: “Onto akɔna ɔnɛ latɛnga Nzambi? Akoka dimanyiya onto pɛkato naka aha Nzambi ndamɛ?”+ 22 Lam’ele Yeso akeye tokanyi tawɔ, nde akawatɛ ate: “Lande na kenyu la tokanyi ta ngasɔ l’etema anyu? 23 Kakɔna koleki wɔdu mbuta? Onde ɔnɛ: ‘Pɛkato yayɛ yambodimanyiyama’ kana ɔnɛ: ‘Emala ndo kɛndakɛnda’? 24 Koko dia nyu mbeya dia Ɔna onto ekɔ la wolo la nkɛtɛ wa dimanyiya pɛkato, . . .” nde akatɛ kanga ekuse ate: “Lambokotɛ nte: Emala, ɔsa mbeto kayɛ, tshɔka lakayɛ.”+ 25 Ko mbala kakɔ ɔtɔi, nde akemala la ntondo kawɔ, akɔshi mbeto kande ko akatshu otsha lakande atatombola Nzambi. 26 Ɔnkɔnɛ, anto tshɛ waki l’ɔngɛnɔngɛnɔ w’efula ndo wakatatɛ ntombola Nzambi ndo wakandama la wɔma, wata vate: “Ɛlɔ tambɛna dikambo dia diambo!”
27 L’ɔkɔngɔ wa laasɔ, nde akatshu ndo akɛnyi ofutshanyi w’elambo welɛwɔ Lɛwi odjashi lo biro wakawafutshanyaka elambo, ko nde akawotɛ ate: “Ondjele.”+ 28 Ko nde akatshike diangɔ tshɛ, akemala ndo akooyele. 29 Oma laasɔ, Lɛwi akɔɔlɔngɔsɔlɛ difɛstɔ dia woke lo luudu lande. Olui a woke w’afutshanyi w’elambo kaamɛ l’anto akina wakalɛka* la wɔ.+ 30 Ko Afarisɛ la afundji awɔ wakatatɛ ngunɛngunɛ ambeki ande, wata vate: “Lande na kalɛnyu ndo kanɔnyu kaamɛ l’afutshanyi w’elambo ndo l’atshi wa pɛkato?”+ 31 Yeso akaakadimola ate: “Anto wele alemba ki hawotoyangaka onganga, paka anto wele la hemɔ.+ 32 Dimi lakaye dia ndjoyanga, aha anto w’ɛlɔlɔ, koko atshi wa pɛkato dia vɔ ndjatshumoya.”+
33 Vɔ wakawotɛ vate: “Ambeki wa Joani kilaka mbo ya ndɛ mbala la mbala ndo salaka alɔmbɛlɔ w’ɛsɛngɔsɛngɔ. Ngasɔ mbasala ndo ambeki w’Afarisɛ, koko ambeki ayɛ ndɛka ndo nɔka.”+ 34 Yeso akawatɛ ate: “Hawokoke nkidia angɛnyi w’otshuki a wadi mbo ya ndɛ etena kekewɔ kaamɛ l’otshuki a wadi, shi mɛtɛ? 35 Koko, nshi yayoya yele otshuki a wadi+ ayonyɛma oma l’atei awɔ, lo nshi shɔ+ mbayowokila mbo ya ndɛ.”
36 Ndo nto, nde akawaoke wɛɛla, ata ate: “Ndooko onto latodjaka daka la ɛtshi ka dihɔndɔ di’oyoyo lo dihɔndɔ di’omusu dia laadiko. Naka onto nsala ngasɔ, kete ɛtshi ka dihɔndɔ di’oyoyo kayokotola dihɔndɔ di’omusu+ wolo, ko wosho wayoleka monga woke. 37 Ndo nto, hawotodjaka wanu w’eyoyo lo atapa w’emusu wa dikoho dia nyama. Naka onto nsala ngasɔ, kete wanu wayata atapa akɔ wa dikoho dia nyama, ko wanu wayotshulɔ ndo atapa akɔ wayolana. 38 Koko vɔ todjaka wanu w’eyoyo lo atapa w’eyoyo wa dikoho dia nyama. 39 Ndooko onto lele l’ɔkɔngɔ wa nde nnɔ wanu w’edjedja ko nde nanga wanu w’eyoyo, nɛ dia nde ayota ate: ‘Wanu w’edjedja mbele amɛna.’”