2 Ɛkɔndɔ

17 Ɔnande Jɛhɔshafata+ akayala nkumekanga lo dihole diande, ndo nde akakeketsha lowandji lande lo Isariyɛlɛ. 2 Nde akakitsha asɔlayi lo esomba tshɛ wa la Juda wodingami la mpele ndo akakitsha elui w’asɔlayi lo ɛtshi ka nkɛtɛ ka Juda ndo lo esomba w’Efrayimɛ wakɔshi+ Asa ka she. 3 Jehowa akatetemala monga kaamɛ la Jɛhɔshafata, nɛ dia nde akakɛndakɛndaka lo mboka y’edjedja ya Davidɛ+ dia tshɛnde ndo nde konyanga waa Baala. 4 Nɛ dia nde akayange Nzambi ka she+ ndo akayele* didjango diande, koko aha ditshelo dia Isariyɛlɛ.+ 5 Jehowa akatetemala nshikikadia diolelo nge lo anya ande+ ndo ase Juda tshɛ wakatetemalaka mbisha Jɛhɔshafata weshasha, ko nde akayala la ɛngɔnyi ndo la lotombo lo yɛdikɔ y’efula.+ 6 Otema ande wakayala la dihonga lo mboka ya Jehowa ndo nde akanya ahole wa la diko+ ndo dimɛta*+ dia l’esongo oma la Juda.

7 L’ɔnɔnyi wa 3 w’ɛlɔmbwɛlɔ kande, nde akatome dui dia mbelɛ ewandji ande, Bɛnɛ-Hayili, Obadiya, Zɛkariya, Netanɛlɛ ndo Mikaya dia tetsha anto lo esomba wa la Juda. 8 Ase Lɛwi anɛ waki kaamɛ la wɔ: Shemaya, Netaniya, Zebadiya, Asahɛlɛ, Shemiramɔta, Jɛhɔnatana, Adɔnidja, Tobidja ndo Tobɛ-Adɔnidja, ndo Elishama nde la Jɛhɔrama wanɛ waki ɛlɔmbɛdi+ waki kaamɛ la wɔ. 9 Vɔ wakatatɛ mbetsha anto la Juda, wakɔshi dibuku dia Ɛlɛmbɛ+ wa Jehowa, ko wakakindola lo esomba tshɛ wa la Juda watetsha anto.

10 Waolelo tshɛ wa lo wedja wakadinge Juda wakandama la wɔma wa Jehowa ndo vɔ kɔndɔsha Jɛhɔshafata. 11 Ase Filistiya wakelaka Jɛhɔshafata weshasha ndo falanga oko olambo. Ase Arabiya wakawela ɛkɔkɔ wa waomi nunu esambele la nkama esambele (7 700) ndo weombe wa mbudi nunu esambele la nkama esambele (7 700) oma lo dongalonga diawɔ.

12 Jɛhɔshafata akatahamaka tsho+ ndo nde akatetemala mbika ahole wodingami la mpele+ ndo esomba wa waombelo+ la Juda. 13 Nde akasale awui wa weke lo esomba wa la Juda ndo nde aki la asɔlayi, andɔshi wa ta wa wolo la Jɛrusalɛma. 14 Nganɛ mbakawatshumanyema lo elui lo ndjela mvudu ya washɛwɔ: Oma le aseka Juda, ewandji w’anto nunu nunu, owandji Adɛna ndo andɔshi wa ta wa wolo+ nunu nkama shato (300 000) waki kaamɛ la nde. 15 Owandji Jɛhɔhanana aki l’ɛse k’ɛlɔmbwɛlɔ kande, ndo anto nunu nkama hiende l’akumi enanɛi (280 000) waki kaamɛ la nde. 16 Ndo Amasiya ɔna Zikiri ɔnɛ lakayakimɔ la lolango dikambo di’olimu wa Jehowa aki nde lawɔ l’ɛse k’ɛlɔmbwɛlɔ kande, ndo andɔshi wa ta wa wolo nunu nkama hiende (200 000) waki kaamɛ la nde. 17 Ndo oma le aseka Bɛnjamina,+ Eliyada, ɔndɔshi wa ta wa wolo, ndo apami nunu nkama hiende (200 000) waki la eta ndo la dingawo+ waki kaamɛ la nde. 18 Jɛhɔzabada aki l’ɛse k’ɛlɔmbwɛlɔ kande, ndo apami nunu lokama l’akumi enanɛi (180 000) waki la dihomɔ dia ta waki kaamɛ la nde. 19 Wasɔ mbakakambɛka nkumekanga laadiko dia wanɛ wakakitsha nkumekanga lo esomba wakadingama la mpele lo Juda y’otondo.+