Ondaki
7 Lokombo l’ɔlɔlɔ* ndeka esɔ+ ka dimɛna ndo lushi la nyɔi ndeka lushi la mbotɔ. 2 Ndeka dimɛna ntshɔ lo luudu l’otanda lo dihole dia ntshɔ lo luudu la fɛtɛ,+ nɛ dia ɔsɔ kele ekomelo k’onto tshɛ ndo onto lasɛna pombaka nama dui sɔ l’otema. 3 Otshutshumalo ndeka tɔɔla+ dimɛna, nɛ dia elungi k’ɔkɛtshi mbetɛka otema dimɛna.+ 4 Otema wa akanga wa lomba wekɔ lo luudu l’otanda, koko otema wa akanga wa dinginya wekɔ lo luudu l’ɔngɛnɔngɛnɔ.*+
5 Ndeka dimɛna mpokamɛ lohango+ la kanga lomba lo dihole dia mpokamɛ osambo wa akanga wa dinginya. 6 Nɛ dia oko watotondɔtondɔka atɛndɛ walongola l’ɛse ka mpoke, ngasɔ mbele tɔɔla ta kanga enginya;+ dui sɔ nto diekɔ anyanya. 7 Koko dihɛnyɔki koka nsala dia kanga lomba nsala akambo w’enginya ndo etshimba ndanyaka otema.+
8 Ekomelo ka dui dimɔtshi ndeka etatelo kadiɔ dimɛna. Ndeka dimɛna monga la solo dia lotutsha lo dihole dia monga la yimba ya lotamanya.+ 9 Tongake suke* dia mboka nkɛlɛ,+ nɛ dia wokelo wa nkɛlɛ mbidjasɛka lo ntolo ka akanga wa dinginya.*+
10 Totake wate: “Lande na kele nshi y’edjedja ndeka nshi nyɛ amɛna?” nɛ dia aha oma lo lomba mbambolayɛ ngasɔ.+
11 Lomba kaamɛ la etenyi k’okitɔ ekɔ ɛngɔ k’ɔlɔlɔ ndo ekɔ la wahɔ le wanɛ wɛna osase wa yanyi.* 12 Nɛ dia lomba kokɛka+ oko wakokɛ falanga,+ koko wahɔ wele la ewo vɔ ɔnɛ: Lomba namaka lɔsɛnɔ la ɔnɛ lele la lɔ.+
13 Kana yimba l’olimu wa Nzambi ka mɛtɛ, nɛ dia akɔna akoka nsembola kɛnɛ kakandɛnganya?+ 14 Lushi l’ɔlɔlɔ, kana yimba lo ɔlɔlɔ+ akɔ, koko lushi la mpokoso, kana yimba dia Nzambi mbakasale lɔmɔtshi ndo lokina,+ diaha anto monga la eshikikelo lo* dikambo tshɛ diayowakomɛ lo nshi yayaye.+
15 Lo lɔsɛnɔ lami l’anyanya+ dimi lakɛnyi oseka dikambo tshɛ: Oma lo onto ɔlɔlɔ lavɔ lo ɔlɔlɔ+ ande polo ndo kanga kɔlɔ lasɛna edja kaanga mbasalande kɔlɔ.+
16 Toyalake kanga losembwe+ lamboleka kana ndjaɛnya wɛmɛ kanga lomba lamboleka.+ Lande na kahombayɛ ndjaela elanyelo?+ 17 Tongake kanga kɔlɔ kamboleka, kana monga kanga enginya.+ Lande na kahombayɛ mvɔ la ntondo k’etena kayɛ?+ 18 Ekɔ dimɛna nkukutɛ ɔhɛmwɛlɔ ɔmɔtshi aha la nkimɔ okina;+ nɛ dia onto loka Nzambi wɔma ayowakitanyiya vɔ akɔ 2.
19 Lomba konyaka kanga lomba onto la wolo ndeka apami wa nkudu 10 wa l’osomba.+ 20 Nɛ dia ndooko onto ɔlɔlɔ la nkɛtɛ latosalaka nshi tshɛ ɔlɔlɔ ndo lahasale pondjo pɛkato.+
21 Ndo nto, todjake yimba lo tshɛkɛta tshɛ yata anto,+ wɛ mbeyaka ndjoka okambi ayɛ atɛkɛta kɔlɔ lo* dikambo diayɛ; 22 nɛ dia wɛ mbeyaka dimɛna l’otema ayɛ dia mbala efula wɛmɛ akatɛkɛta kɔlɔ lo dikambo dia anto akina.+
23 Lo akambo asɔ tshɛ, dimi lakahembe lomba ko lakate nte: “Dimi layoyala kanga lomba.” Koko lɔ laki etale mangana la mi. 24 Kɛnɛ kakatombe kekɔ etale ndo ɔhɔngɔ efula. Akɔna akoka kishihodia?+ 25 Dimi lakɛdiya otema ami dia mbeya, dia nsɛdingola ndo dia nyanga lomba ndo ɔkɔkɔ wele ledia ka akambo ndo dia nshihodia kɔlɔ k’awui w’enginya ndo awui w’ɛpɔka w’onto lasala awui oko kanga dadi.+ 26 Ko dimi lakashola dui nɛ: Womoto lele oko ɔtɛyi wa mengenga, ɔnɛ lele otema ande wekɔ oko ɛtɛyi ndo anya ande wekɔ oko mɔlɔla wa lokanu ndeka nyɔi ololo. Onto langɛnyangɛnya Nzambi ka mɛtɛ ayohandɔ oma le nde,+ koko otshi wa pɛkato ayondama oma le nde.+
27 Otshumanyishi+ kata ate: “Eenda, kɛnɛ kakamatane: Dimi lakasale eyangelo wa dikambo la dikambo dia dimi nshihodia, 28 koko kɛnɛ kakamatetemala* nyanga, dimi kokitana. Dimi lakatane pami 1 kaki la losembwe lo apami kinunu (1 000), koko ndooko kaanga womoto 1 lo wamato kinunu (1 000). 29 Dui nɛ nto kakamatane: Nzambi ka mɛtɛ akasale anto esembɔki,+ koko vɔ wakayange dikongelo efula.”+