Ruta
1 Lo nshi yakasambolaka toshushi+ akambo,* ndjala kakayala lo wodja, ko pami kɛmɔtshi akonɛɛ oma la Bɛtɛlɛhɛma+ ka la Juda dia todjasɛ oko ɔngɛndangɛnda l’ɛtshi ka nkɛtɛ k’ase Mɔaba+ nde la wadɛnde l’anande 2 w’apami. 2 Pami kakɔ lokombo lande Elimɛlɛkɛ,* wadɛnde lokombo lande Naɔmi* ndo anande 2 w’apami nkombo yawɔ yɔ nyɛ: Mahilɔna* la Kiliyɔna.* Vɔ waki ase Efarata w’oma la Bɛtɛlɛhɛma ka la Juda. Vɔ wakatshu lo ɛtshi ka nkɛtɛ k’ase Mɔaba ndo wakatodjasɛ lɛkɔ.
3 L’ɔkɔngɔ w’etena kɛmɔtshi, Elimɛlɛkɛ omi aki Naɔmi akavu, ko Naɔmi akatshikala nde l’anande 2 w’apami ato. 4 L’ɔkɔngɔ diko, ana akɔ wakatshuke wamato w’ase Mɔaba, ɔmɔtshi lokombo lande Ɔrɔpa ndo okina lokombo lande Ruta.+ Vɔ wakatshikala lɛkɔ l’edja k’ɛnɔnyi oko 10. 5 Oma laasɔ, ana akɔ 2, mbuta ate Mahilɔna nde la Kiliyɔna vɔ lawɔ wakavu, ko womoto akɔ akashisha anande 2 ndo omɛnde. 6 Ɔnkɔnɛ, nde akatatɛ nkalola nde la wadi w’anande oma lo bɛtshi dia nkɛtɛ dia Mɔaba, nɛ dia nde akoke lam’akinde la Mɔaba dia Jehowa ambodja anto ande yimba lo mbasha mbo ya ndɛ.*
7 Nde akonɛɛ nde la wadi w’anande akɔ 2 oma lo dihole diakawadjasɛka. Lam’akawatatshɔka lo mboka, watakalola otsha l’ɛtshi ka nkɛtɛ ka Juda, 8 Naɔmi akatɛ wadi w’anande ate: “Nyotshu, onto l’onto akalole otsha lo luudu la nyango. Jehowa anyɛnya+ ngandji kande ka kɔlamelo oko wakinyu la tɔ otsha le waomɛnyu wambovɔ ndo oya le mi. 9 Jehowa anyokimanyiya* dia onto l’onto tonga la lotui tshitshi* lo luudu l’omɛnde.”+ Ko nde akashana la wɔ bizɛ ndo vɔ wakatondɔ la alelo. 10 Vɔ wakawotɛka vate: “Keema, sho tayotshɔ kaamɛ la yɛ otsha lakanyu.” 11 Koko Naɔmi akate ate: “Anami, nyokalole. Lande na katonyotshɔ kaamɛ la mi? Onde dimi laakakoke mbota ana w’apami wakoka ndjonga waomɛnyu?+ 12 Anami, nyokalole. Nyotshu, nɛ dia dimi laya osombe, handjokoka ntshukama. Kaanga dimi kokondjaka omi l’otsho w’ɛlɔ ko mbota ana w’apami, 13 onde nyayotetemala mbakonga polo lam’ayowola? Onde nyayotshikala aha la ntshukama l’ɔtɛ awɔ? Keema, anami. Jehowa ambomboka ɔkɔngɔ ndo lam’akanyiyami shɛngiya yambonga la dui sɔ le nyu, dikambo sɔ mbishakami+ paa efula l’asolo.”
14 Ko vɔ wakatondɔ la alelo nto. L’ɔkɔngɔ wa laasɔ, Ɔrɔpa akashana la nyango omɛnde bizɛ, ko nde akakalola. Koko Ruta kombotshika. 15 Ko Naɔmi akate ate: “Eenda osekayɛ wadi aki odo ambokalola otsha lakawɔ ndo le tozambizambi tawɔ. Kalola kaamɛ la osekayɛ.”
16 Koko Ruta akate ate: “Tontshutshuyake dia dimi kotshika ndo mimɔ oma laleyɛ, nɛ dia lɛnɛ ayoyotshɔ kayomotshɔ ndo lɛnɛ ayoyolala kayomolala. Wodja ayɛ wayonga wodja ami ndo Nzambi kayɛ ayonga Nzambi kami.+ 17 Lɛnɛ ayoyovɔ kayomovɔ ndo lɛkɔ kayowonkundɛ. Nyɔi kayotokakitola dimi la yɛ ndo naka aha ngasɔ, Jehowa ambisha dilanya dia wolo.”
18 Lam’akɛnyi Naɔmi dia Ruta ekɔ lo ntɛtɛ dia ntshɔ kaamɛ la nde, nde akatshike mbeetawoya. 19 Ko vɔ akɔ 2 wakatetemala la lɔkɛndɔ lawɔ polo lam’akawakome la Bɛtɛlɛhɛma.+ Kam’akawakome la Bɛtɛlɛhɛma, osomba w’otondo wakasukasuka l’ɔtɛ awɔ ndo wamato wakataka vate: “Ɔnɛ Naɔmi?” 20 Nde akatɛka wamato akɔ ate: “Takonyombelɛ Naɔmi.* Nyombelɛke Mara,* nɛ dia Kanga-Wolo-Tshɛ ambetɛ lɔsɛnɔ lami ololo bɛ.+ 21 Dimi laki la efula lam’akamatshu, koko Jehowa ambonkaloya anyanya. Lande na kambelɛnyu Naɔmi lam’ele Jehowa kandɔsha ndo Kanga-Wolo-Tshɛ kambombela mpokoso?”+
22 Ngasɔ mbakakalola Naɔmi oma l’ɛtshi ka nkɛtɛ k’ase Mɔaba nde la Ruta ose Mɔaba+ laki wadi aki ɔnande. Vɔ wakakome la Bɛtɛlɛhɛma l’etatelo ka dinela+ di’asami.