Ruta
2 Naɔmi aki la owotɔ ɔmɔtshi w’omɛnde waki la ɔngɔnyi efula, lokombo lande Bɔaza+ ndo nde aki ose nkumbo kaki Elimɛlɛkɛ.
2 Ruta ose Mɔaba akatɛ Naɔmi ate: “Lam’alangayɛ, ontshike ntshu yema lo dikambɔ kele tɔkɔdiakɔdia+ yema ya diangɔ l’atei wa washa watawatshike l’ɔkɔngɔ laka onto tshɛ layomboka kɛtshi.” Ko Naɔmi akawotɛ ate: “Tshɔka, ɔnami.” 3 Ko nde akatshu ndo akatotatɛ nkɔdiakɔdia lo ekambɔ kɛmɔtshi l’ɔkɔngɔ w’amunyi. Diɛsɛ ko nde akatokoma lo ekambɔ ka Bɔaza+ laki ose nkumbo ka Elimɛlɛkɛ.+ 4 L’etena kakɔ kaamɛ, Bɔaza akakome oma la Bɛtɛlɛhɛma, ko nde akatɛ amunyi ate: “Jehowa ayale la nyu!” Ko vɔ wakakadimola vate: “Jehowa akɔtshɔkɔlɛ!”
5 Oma laasɔ, Bɔaza akambola ɔlɔngɔ a pami waki kapita k’amunyi ate: “Akanga ɔna womoto ɔnɛ?” 6 Ɔlɔngɔ a pami waki kapita k’amunyi akakadimola ate: “Ongo ɔna womoto l’ose Mɔaba+ lambotokalola kaamɛ la Naɔmi oma l’ɛtshi ka nkɛtɛ ka Mɔaba.+ 7 Nde akalɔmbi ate: ‘Lam’alanganyu, onde dimi koka ndjakɔdiakɔdiaka+ ndo ndjatɔngɔnaka washa* wayatshikala l’ɔkɔngɔ w’amunyi?’ Ntatɛ laakandaye oma ko pindju, nde ekɔ paka wemema oto polo ndo kakiye kamondodjasɛ yema dia momuya lo hiombo.”
8 Ko Bɔaza akatɛ Ruta ate: “Ompokame yema, ɔnami. Totshɔke dia tɔkɔdiakɔdia lo ekambɔ kekina ndo totshɔke ndooko dihole dikina. Tshikala suke l’ekambi ami wa wamato.+ 9 Tendaka ekambɔ katawane kele tatshɔka kaamɛ la wɔ. Dimi lambodjangɛ ɛlɔngɔ w’apami ɛnɛ diaha vɔ kosakanya.* Naka wɛ amboka mposa k’ashi, ko wɛ ntshɔ lɛnɛ ele mbaka y’ashi ko wɛ nnɔ ashi wakatahodi ɛlɔngɔ w’apami.”
10 Ko nde akayakɔsha ekukumadi ndo akakusama la nkɛtɛ, awotɛ ate: “Ngande wamomohomɔ lokolo l’ɔlɔ lo washo ayɛ ndo lande na kamboyombidja yimba, dimi ɔngɛndangɛnda?”+ 11 Bɔaza akookadimola ate: “Wakambutɛ kɛnɛ tshɛ kakayasalɛ okilo ayɛ wa womoto l’ɔkɔngɔ wa nyɔi k’omɛyɛ ndo woho wakayatshike shɔ la nyɔ kaamɛ ndo wodja anyu dia ndja lo wodja wakiyɛ kombeyaka.+ 12 Jehowa akɔtshɔkɔlɛ l’ɔtɛ wa kɛnɛ kakayasale+ ndo Jehowa Nzambi k’Isariyɛlɛ ɔnɛ lamboyoya dia ndjoyanga eshamelo+ lo ahafu ande akofute difuto dia woke.”* 13 Ko nde akate ate: “Nkumɛmi, etawɔ dia dimi mpomɔ lokolo l’ɔlɔ lo washo ayɛ, nɛ dia wɛ ambonsamba ndo ambokitshakitsha* okambi ayɛ asolo kaanga mbemi bu kaanga okambi ayɛ.”
14 Bɔaza akawotɛ wonya w’oleelo ate: “Yaka lanɛ yole yema ya mapa ndo tshuha ɛtshi kayɛ ka mapa lo wanu w’okayi.” Ko nde akadjasɛ suke la amunyi. Oma laasɔ, Bɔaza akawosha nanula ya lofumba, ko nde akale, akalote ndo nde aki la mɔtshi yakatshikala. 15 Lam’akandonɛɛ dia nkɔdiakɔdia,+ Bɔaza akadjangɛ ɛlɔngɔ ande w’apami ate: “Nyootshike akɔdiakɔdia ndo washa* watakɔ ndo tanyɔɔhɛnyahɛnyake.+ 16 Nyosale tshɛ dia takɔshaka washa amɔtshi dikambo diande ndo kanyotawotshikɛkawɔ l’ɔkɔngɔ dia nde ndjawakɔdiakɔdiaka ndo tanyotake ndooko dui dia mboshimba.”
17 Ko nde akatetemala nkɔdiakɔdia lo ekambɔ kakɔ polo la dikɔlɔ.+ Lam’akandasusola kɛnɛ kakandakɔdiakɔdia, aki suke la efa* w’otondo w’asami. 18 Oma laasɔ, nde akawaɔshi ko akatshu otsha l’osomba, ko okilo ande akɛnyi kɛnɛ kakandatɔkɔdiakɔdia. Ruta akatondja ndo mbo ya ndɛ yakatshikala+ l’ɔkɔngɔ wa nde ndɛ ko ndota, ko akawosha.
19 Okilo ande wa womoto akawotɛ ate: “Lende akayatɔkɔdiakɔdia ɛlɔ? Lende akayatokamba? Ɔnɛ lakakodji yimba atshɔkwame.”+ Ko nde akatɛ okilo ande wa womoto awui wendana l’onto lakandatokamba lakande ate: “Onto lakamatokamba lakande ɛlɔ lokombo lande Bɔaza.” 20 Ko Naɔmi akatɛ wadi aki ɔnande ate: “Jehowa lahashisha ngandji kande ka kɔlamelo le wanɛ wasɛna ndo wanɛ wakavu+ awɔtshɔkɔlɛ.” Naɔmi akate nto ate: “Pami kakɔ ekɔ owotɔ aso.+ Nde ekɔ l’atei wa atshungodi*+ aso.” 21 Ko Ruta ose Mɔaba akate ate: “Ndo nde akambute ate: ‘Tshikala suke l’ekambi ami polo ndo lam’ayowoshidiya dinela diami tshɛ.’”+ 22 Naɔmi akatɛ Ruta wa wadi aki ɔnande ate: “Ɔnami, ndeka dimɛna wɛ tshɔɔka kaamɛ l’ekambi ande wa wamato lo dihole dia wɛ tɛna paa lo ekambɔ kekina.”
23 Ko nde akatshikala suke la ekambi wa wamato wa Bɔaza ndo nde akakɔdiakɔdiaka polo lam’akashile dinela+ di’asami ndo dinela di’eponga. Nde akadjasɛka kaamɛ l’okilo ande wa womoto.+