2 Samuɛlɛ

4 Lam’akoke Ishi-Bɔshɛtɛ+ ɔna Saolo dia Abinɛrɛ ambovɔ la Hɛbɛrɔna,+ nde komonga la dihonga* nto ndo ase Isariyɛlɛ tshɛ wakahandjɔ wɔɔngɔ. 2 Apami 2 mbakalɔmbɔlaka elui wa dengalenga diaki ɔna Saolo: Ɔmɔtshi lokombo lande Baanahɛ ndo okina lokombo lande Rɛkabɛ. Vɔ waki ana waki Rimɔna ose Berɔtɛ lo dioho dia Bɛnjamina. (Nɛ dia ndo Berɔtɛ+ mbakɔsamaka oko etenyi kɛmɔtshi ka Bɛnjamina. 3 Ase Berɔtɛ wakalawɔ la Ngitayima+ ko wakatodjasɛ oko angɛndangɛnda lɛkɔ polo ndo ɛlɔ.)

4 Jɔnatana+ ɔna Saolo aki la ɔna pami lakɔkɔ ekolo.*+ Nde aki la ɛnɔnyi 5 lam’akaye losango la nyɔi ka Saolo nde la Jɔnatana oma la Jezɛrɛlɛ+ ndo ɔndɛdi ande akawɔshi ko akalawɔ, koko lam’akandatalawɔka la sase dia wɔma, ɔnakɔ akakɔ ko akɔkɔ ekolo. Lokombo lande Mefibɔshɛtɛ.+

5 Rɛkabɛ nde la Baanahɛ, ana waki Rimɔna ose Berɔtɛ wakatshu lo luudu laki Ishi-Bɔshɛtɛ wonya waki yanyi wolo etena kakandomuyaka la midi. 6 Vɔ wakɔtɔ lo luudu lakɔ oko anto watayange eponga, ko vɔ wakɔɔkɔmɔla lo dikundju, ko Rɛkabɛ nde la Baanahɛ+ k’ɔnango wakalawɔ. 7 Etena kakawɔtɔ lo luudu, vɔ wakootane oladi lo mbeto kande lo luudu lande la ndala, ko vɔ wakɔɔkɔmɔla, wakoodiake ndo l’ɔkɔngɔ wa laasɔ, vɔ wakoohembola ɔtɛ. Oma laasɔ, vɔ wakɔshi ɔtɛ ande, ko wakakɛndakɛnda otsho w’otondo l’otadimbo wa Araba. 8 Vɔ wakatɔlɛ ɔtɛ wa Ishi-Bɔshɛtɛ+ le Davidɛ la Hɛbɛrɔna ndo wakatɛ nkumekanga vate: “Ɔtɛ wa Ishi-Bɔshɛtɛ ɔna Saolo otunyi ayɛ+ lakayangaka lɔsɛnɔ*+ layɛ vɔ ɔnɛ. Ɛlɔ Jehowa ambokɔsɔmbɔyɛ Saolo la tokanula tande, wɛ nkumɛmi nkumekanga.”

9 Koko Davidɛ akakadimola Rɛkabɛ nde la Baanahɛ k’ɔnango, ana waki Rimɔna ose Berɔtɛ ate: “Lo mɛtɛ oko wele Jehowa lakambitsha* oma lo asui tshɛ la lɔsɛnɔ,+ 10 etena kakaye onto ɔmɔtshi ndjombutɛ ate: ‘Saolo ambovɔ,’+ ndo kakandafɔnya dia nde ekɔ lo ndjambela losango l’ɔlɔlɔ, dimi lakookimɛ ko lakoodiake+ la Zikilangɛ. Ɔsɔ kele difuto diakalongola ɔkɛndji ɔsɔ oma le mi! 11 Kete hoke anto wa kɔlɔ wambodiaka onto ɔlɔlɔ lo luudu lande hita, lo mbeto kande! Shi dimi layohomba nɔmba dikila diande oma l’anya anyu+ lo nyonya oma la nkɛtɛ?” 12 Ko Davidɛ akatɛ ɛlɔngɔ w’apami dia mbadiaka.+ Vɔ wakaahembola anya la ekolo ko wakaahanɛ+ suke la difuku di’ashi dia la Hɛbɛrɔna. Koko vɔ wakɔshi ɔtɛ wa Ishi-Bɔshɛtɛ ko wakakundɛ lo waombo wa Abinɛrɛ wele la Hɛbɛrɔna.