Ɛzɛkiyɛlɛ

37 Lonya la Jehowa laki le mi ndo oma lo nyuma kande, Jehowa akambɔshi ndo akatokitsha l’atei w’okidi w’ebamubamu+ ndo vɔ wakalole tɔɔ la weka. 2 Nde akambetsha suke la wɔ vɔ tshɛ, ko dimi lakɛnyi dia lokema la weka lakakalema l’okidi w’ebamubamu ndo vɔ waki wamboma to.+ 3 Nde akamimbola ate: “Ɔna onto, onde weka ɛnɛ koka monga la lɔsɛnɔ?” Ko dimi lakookadimola nte: “Nkum’Olongo Nkumadiɔndjɔ Jehowa, wɛmɛ keya.”+ 4 Ko nde akambutɛ ate: “Ta prɔfɛsiya lo dikambo dia weka ɛnɛ ndo tɛwɔ wate: ‘Nyu weka wamboma, nyohokame ɔtɛkɛta wa Jehowa:

5 “‘Nkum’Olongo Nkumadiɔndjɔ Jehowa katɛ weka ɛnɛ ate: “Dimi layɔtshiya lomu le nyu, ko nyu nyayonga la lɔsɛnɔ.+ 6 Dimi layodja eshisha la emunyi le nyu, layonyokomba la lokoho ndo layodja lomu le nyu, ko nyu nyayonga la lɔsɛnɔ; ko nyayohomba mbeya dia dimi kele Jehowa.”’”

7 Oma laasɔ, dimi lakate prɔfɛsiya oko wakandambidjangɛ. Kam’akamate prɔfɛsiya, londjo, wondjo wakokɛma, ko weka wakatatɛ nsangana kaamɛ, weka la weka. 8 Ko lakɛnyi eshisha ndo emunyi wamboya le wɔ ndo lokoho lambaakomba. Koko lomu latɔtɔ le wɔ.

9 Ko nde akambutɛ ate: “Ta prɔfɛsiya le lɔpɛpɛ. Ɔna onto, ta prɔfɛsiya ndo tɛ lɔpɛpɛ wate: ‘Nkum’Olongo Nkumadiɔndjɔ Jehowa kata ate: “Lɔpɛpɛ* le, yaka oma lo mpɛpɛ 4 ndo pɛpa le anto anɛ wakadiakema dia vɔ monga la lɔsɛnɔ.”’”

10 Ko dimi lakate prɔfɛsiya oko wakandambidjangɛ, ko lomu* lakɔtɔ le wɔ ko vɔ wakatatɛ nsɛna ndo memala l’ekolo awɔ,+ vɔ waki leemba la woke efula la asɔlayi.

11 Oma laasɔ, nde akambutɛ ate: “Ɔna onto, weka ɛnɛ wekɔ luudu l’otondo la Isariyɛlɛ.+ Vɔ wekɔ lo mbuta vate: ‘Weka aso wamboma ndo elongamelo kaso kamboshila.+ Sho tambolanyema tshɛ lo tshɛ.’ 12 Ɔnkɔnɛ ta prɔfɛsiya ndo tɛwɔ wate: ‘Nkum’Olongo Nkumadiɔndjɔ Jehowa kata ate: “Dimi layodihola waombo anyu+ ko layonyotondja oma lo waombo anyu, nyu anto ami ndo layonyɔtɔla lo wodja wa Isariyɛlɛ.+ 13 Nyu nyayohomba mbeya dia dimi kele Jehowa lam’ayomodihola waombo anyu ndo lam’ayomonyotondja oma lo waombo anyu, nyu anto ami.”’+ 14 ‘Dimi layodja nyuma kami le nyu ndo nyu nyayonga la lɔsɛnɔ+ ndo dimi layonyokitsha lo wodja anyu; ko nyu nyayohomba mbeya dia dimi Jehowa dimɛ kakatɛkɛta ndo kakadisale,’ mbata Jehowa.”

15 Ɔtɛkɛta wa Jehowa wakaye le mi nto ɔnɛ: 16 “Wɛ ɔna onto, ɔsa tshenyi y’osongo ndo funda lɔkɔ wate: ‘Dikambo dia Juda ndo dikambo dia ase Isariyɛlɛ wele kaamɛ la nde.’*+ Oma laasɔ ko wɛ mbɔsa tshenyi kina y’osongo, ko wɛ mfunda lɔkɔ wate: ‘Dikambo dia Yɔsɛfu, tshenyi y’osongo ya Efrayimɛ ndo luudu la Isariyɛlɛ l’otondo wanɛ wele kaamɛ la nde.’*+ 17 Oma laasɔ, sukanyatɔ dia tɔ monga tshenyi y’osongo tshɔi lo lonya layɛ.+ 18 Lam’ayokombola anto ayɛ* vate: ‘Onde wɛ hatototɛ kitshimudi ya akambo anɛ?’ 19 Kowate wate: ‘Nkum’Olongo Nkumadiɔndjɔ Jehowa kata ate: “Dimi layɔsa tshenyi y’osongo ya Yɔsɛfu yele lo lonya la Efrayimɛ ndo waoho wa Isariyɛlɛ wele kaamɛ la nde, ko dimi layowasanganya la tshenyi y’osongo ya Juda; ndo dimi layowasala tshenyi tshɔi,+ ndo vɔ wayoyala ɔtɔi lo lonya lami.”’ 20 Totenyi t’esongo tayoyofunda lɔkɔ pombaka monga lo lonya layɛ dia vɔ tiɛna.

21 “Ko wɛ mbatɛ wate: ‘Nkum’Olongo Nkumadiɔndjɔ Jehowa kata ate: “Dimi layɔsa Isariyɛlɛ oma l’atei wa wedja wakawatɔlama ndo layowatshumanya kaamɛ oma lo bɛkɛ tshɛ ndo mbaela lo wodja awɔ.+ 22 Dimi layowaetɛ wodja ɔtɔi lo nkɛtɛ,+ lo akona wa Isariyɛlɛ ndo nkumekanga ɔtɔi ayowaolɛ vɔ tshɛ+ ndo vɔ hawotonga nto wedja 2; kana hawotokahanyema nto lo waolelo 2.+ 23 Vɔ hawotoyadja nto mindo la dikishi diawɔ dia nyɛtɛɛtɛ,* la ditshelo diawɔ dia wɔnɔnyi ndo la munga yawɔ tshɛ.+ Dimi layowatsha oma lo pɛkato tshɛ yakawasale lo woho wakiwɔ komonga la kɔlamelo, ndo dimi layowaɛdia. Vɔ wayonga anto ami, ko dimi dimɛ layonga Nzambi kawɔ.+

24 “‘Okambi ami Davidɛ ayoyala nkumekanga kawɔ+ ndo vɔ tshɛ wayonga la olami ɔtɔi.+ Vɔ wayɔkɛndakɛnda lo tɛdikɔ tami ta dombo ndo wayokitanyiya dimɛna dimɛna wadjango ami.+ 25 Vɔ wayodjasɛ lo wodja wakamasha okambi ami Jakɔbɔ, lɛnɛ akadjasɛka watshɛnyu+ ndo vɔ wayodjasɛka lɔkɔ pondjo,+ vɔ la anawɔ* ndo la ana wa anawɔ;+ ndo okambi ami Davidɛ ayonga owandji awɔ pondjo.+

26 “‘“Ko dimi layodja la wɔ sheke ya wɔladi;+ yɔ yayoyala sheke ya pondjo kaamɛ la wɔ. Dimi layowashikikɛ ndo layowafudia+ ndo layokitsha tɛmpɛlɔ kami k’ekila l’atei awɔ pondjo. 27 Luudu lami la dipɛma* layonga kaamɛ la* wɔ, ndo dimi layonga Nzambi kawɔ ndo vɔ wayonga anto ami.+ 28 Ko wedja wayohomba mbeya dia dimi Jehowa lekɔ lo nkidia Isariyɛlɛ etena kayongaka tɛmpɛlɔ kami k’ekila l’atei awɔ pondjo.”’”+