Ɛnyɛlɔ
13 Ko diɔ* diakemala lo lɔsɛnga la lo ndjale.
Ko dimi lakɛnyi nyama ka ngala+ kayatombe oma lo ndjale.+ Tɔ kaki la nseke 10 ndo la ɛtɛ 7 ndo lo nseke yakɔ mbaki diadɛmɛ* 10, koko nkombo ya lɔtɛngɔ yaki l’ɛtɛ atɔ. 2 Nyama ka ngala kakamɛnyi kaki oko nkɔi, ekolo atɔ waki oko ekolo wa laondo, onyɔ atɔ waki oko onyɔ wa ntambwɛ. Ko dragɔ+ diakasha nyama kakɔ wolo atɔ ndo kiti katɔ ka lowandji ndo lowandji l’efula.+
3 Ko dimi lakɛnyi dia ɔtɛ atɔ ɔmɔtshi waki oko wambɔkɔtama mpota ka nyɔi, koko mpota katɔ ka nyɔi kambɔkɔnɔ,+ ko anto tshɛ wa la nkɛtɛ wakayele nyama ka ngala kɛsɔ, wele la diambo. 4 Ko anto wakatɛmɔla dragɔ, nɛ dia diɔ diakasha nyama ka ngala lowandji ndo vɔ wakatɛmɔlaka nyama ka ngala, wata vate: “Onto akɔna ɛdimi la nyama ka ngala kɛnɛ ndo akɔna akoka ndɔ la tɔ?” 5 Wakakisha onyɔ wata akambo wa weke ndo wa lɔtɛngɔ ndo wakakisha wolo wa nsala akambo l’edja ka ngɔndɔ 42.+ 6 Ko tɔ kakadihola onyɔ atɔ dia ntɛnga+ Nzambi, dia ntɛnga lokombo lande la dihole diadjasɛnde ndo wanɛ wele l’olongo.+ 7 Wakakisha lotshungɔ la ndɔsha ekilami ndo mbalɛndja,+ ndo wakakisha wolo wa mbahemɛ waoho tshɛ, weho w’anto tshɛ, ɛtɛkɛta tshɛ ndo wedja tshɛ. 8 Ndo wanɛ tshɛ wodjashi la nkɛtɛ wayokitɛmɔla. Wanɛ wele oma k’etongelo k’andja, nkombo yawɔ kofundama lo dibuku dia lɔsɛnɔ+ diaki Ɔna Ɔkɔkɔ lakadiakema.+
9 Ɔnɛ lele l’atoyi wa mboka, ooke.+ 10 Naka onto ɔmɔtshi pombaka ntshɔ lo lɔhɔmbɔ, kete nde ayotshɔ lo lɔhɔmbɔ. Naka onto ɔmɔtshi ndjakaka la lokuwa la ta,* kete nde pombaka ndjakema la lokuwa la ta.+ Dui sɔ nɔmbaka dia ekilami+ monga la ekikelo+ ndo la mbetawɔ.+
11 Ko dimi lakɛnyi nyama ka ngala kekina kayatombe oma lo nkɛtɛ. Tɔ kaki la nseke 2 yele oko ya ɔna ɔkɔkɔ, koko tɔ kakatatɛ ntɛkɛta oko dragɔ.+ 12 Tɔ kaki la wolo tshɛ waki la nyama ka ngala+ ka ntondo lo washo atɔ. Ndo tɔ salaka dia nkɛtɛ l’anto wodjashi lɔkɔ ntɛmɔla nyama ka ngala ka ntondo kele mpota katɔ ka nyɔi kakakɔnɔ.+ 13 Ndo tɔ salaka tolembetelo ta weke polo ndo lo tɔ nsala dia dja mpolɔ oma l’olongo oya la nkɛtɛ lo washo w’anto.
14 Tɔ minganyiyaka wanɛ wodjashi la nkɛtɛ l’ɔtɛ wa tolembetelo tele nyama kakɔ kakalongola lotshungɔ la tisala lo washo wa nyama ka ngala, etena katɛtɔ wanɛ wodjashi la nkɛtɛ dia vɔ nsala efanelo+ ka nyama kakɔ ka ngala kakahomɔ lokuwa, koko kakonge la lɔsɛnɔ nto.+ 15 Ko wakakisha lotshungɔ la mbisha efanelo ka nyama ka ngala lomu* dia efanelo ka nyama ka ngala kɛsɔ ntɛkɛta ndo nsala dia wanɛ tshɛ watona ntɛmɔla efanelo ka nyama ka ngala ndjakema.
16 Tɔ kakatshutshuya anto tshɛ dia vɔ mbidjama djembetelo lo lonya l’omi kana lo mfumu yawɔ,+ oyadi anto wa totshitshɛ kana wa weke, akanga w’ɛngɔnyi kana ase wola, wanɛ wele la lotshungɔ kana mfumbe, 17 ndo diaha ndooko onto nsomba kana nsondja, onyake paka onto lele la djembetelo, lokombo+ la nyama ka ngala kana numɛlɔ ka lokombo latɔ.+ 18 Lo dikambo nɛ, ekɔ ohomba monga la lomba: Onto lele la yimba, akambe akumi wa numɛlɔ ka nyama ka ngala, nɛ dia tɔ kekɔ numɛlɔ k’onto ndo numɛlɔ kakɔ ko 666.+