Isaya
44 “Kakianɛ ohokame, wɛ Jakɔbɔ okambi ami,
Ndo wɛ Isariyɛlɛ, lakamasɔnɛ.+
Dimi layohongola nyuma kami le anayɛ+
Ndo ɛtshɔkɔ ami le tokanula tayɛ.
4 Ko vɔ wayotomba oko l’atei w’adiyo w’ashi wa djɛsɛ,+
Oko eduwola l’omamu w’ɛkɛdi w’ashi.
5 Ɔmɔtshi ayota ate: “Dimi lekɔ laki Jehowa.”+
Okina ayoyaelɛ lo lokombo la Jakɔbɔ,
Ndo okina nto ayofunda lo lonya lande ɔnɛ: “Laki Jehowa.”
Ndo nde ayɔsa lokombo la Isariyɛlɛ.’
‘Dimi kele la ntondo ndo la ekomelo.+
Ndooko Nzambi kekina laadiko diami.+
7 Akɔna ele oko dimi?+
Nde awele ndo ate dui sɔ ndo amɛnyadiɔ!+
Oma ko etena kakamashikikɛ anto wa lo nshi y’edjedja,
Vɔ wate akambo wayaye
Ndo kɛnɛ kahatasalema.
8 Tanyondamake la sase,
Ndo tanyodidimake la wɔma+
Shi dimi lakatɛ ɔmɔmɔ la l’atei anyu la ntondo ndo lakanyewoyadiɔ?
Nyu nyekɔ ɛmɛnyi ami.+
Onde ekɔ Nzambi kekina laadiko diami?
Keema, ndooko Dive dikina;+ dimi handeye ndooko ɔtɔi.’”
9 Wanɛ tshɛ wasala dikishi wekɔ anyanya,
Ndo diangɔ diawɔ diɔsawɔ la nɛmɔ hadiotonga ndooko la wahɔ.+
Oko wele ɛmɛnyi adiɔ, diɔ* hadiɛnyi ndooko ɛngɔ ndo hadieye ndooko dui,+
Ɔnkɔnɛ, wanɛ wadisala wayoshama nsɔnyi.+
10 Akɔna atosalaka jambizambi kana ekishi ka lowolo
Kahakoke monga ndooko la wahɔ?+
11 Nyende, wanɛ tshɛ wekesanɛ la nde wayoshama nsɔnyi!+
Etshudi wekɔ tsho anto k’anto.
Vɔ tshɛ wasangane ndo wemale.
Vɔ wayotshama wɔma ndo wayoshama nsɔnyi kaamɛ.
12 Otshudi wa yaandjo mbidjaka lowolo lo akalanga ndo litshulaka la ehomɔ kande.
Nde lilɔngɔsɔlaka la maditɔ,
Litshulaka la lonya lande la wolo.+
Oma laasɔ, nde mbokaka ndjala ndo wolo ande shilaka;
Nde hanɔ ashi ko nɛmbaka.
13 Otshudi w’abaya sembolaka ɔkɔdi wa yɛdikɔ, sangaka sango la mpɛmbɛ ka beela.
Nde kitshulaka la ɔhɛlɔ w’abaya ndo kisangaka la ehomɔ kadjawɔ tolembetelo lo abaya.
14 Onto ɔmɔtshi ekɔ lele olimu ande ele wa nkɔta elondo.
Nde sɔnaka woho ɔmɔtshi w’osongo, ɔakɛ,
Ndo nde mbotshikaka dia vɔ mbola l’atei w’esongo wa l’okonda.+
Nde monɛka osongo wa kalafulu ndo mvula mbotondjaka.
15 Oma laasɔ, vɔ mongaka nkunyi y’onto mɔnganya dja.
Nde mbɔsaka etenyi kawɔ dia nde mboka dja;
Nde mɔnganyaka dja ndo katɛka diangɔ.
Koko nde salaka ndo jambizambi ko ndjitɛmɔlaka.
Nde mbosalaka ekishi ko nde kusamaka la ntondo katɔ.+
16 Nde mongaka etenyi kɛmɔtshi lo dja;
La etenyi kakɔ mbafumbande nyama yalɛnde ko nde ndota.
Ndo nto, nde mbokaka dja ndo mbutaka ate:
“Aah! Lamboka dja, lambosalanganya demba.”
17 Koko etenyi kekina nde kisalaka jambizambi, ekishi kande.
Nde kikusamɛka ndo kitɛmɔlaka.
Nde kilɔmbaka ndo mbutaka ate:
“Onshimbee, nɛ dia wɛ kele nzambi kami.”+
18 Vɔ haweye ndooko dui, vɔ hawoke ndooko dui,+
Nɛ dia washo awɔ ndjihama ku ndo hawokoke mɛna,
Ndo etema awɔ bu la yimba.
19 Ndooko onto lakanyiya l’otema ande
Kana lele la ewo kana yimba lata ate:
“Dimi lakatshumbe etenyi kawɔ kɛmɔtshi lo dja,
Ndo l’akalanga awɔ mbakamakatɛ diangɔ ndo mbakamafumbe onatshi dia ndɛ.
Onde dimi pombaka nsala ɛngɔ ka wɔnɔnyi la etenyi kotshikadi?+
Onde dimi pombaka ntɛmɔla etenyi k’osongo?”
20 Nde ndɛka otoko.
Otema ande hita wa lokeso wambowonganyiya.
Nde hakoke ndjashimbɛ,* ndo nde hate ate:
“Shi kashi kekɔ lo lonya lami l’omi?”
21 “Ohɔ akambo asɔ, wɛ Jakɔbɔ ndo wɛ Isariyɛlɛ,
Nɛ dia wɛ ekɔ okambi ami.
Dimi lakakokenge ndo wɛ ekɔ okambi ami.+
Isariyɛlɛ le, dimi hantokohɛ.+
22 Dimi layokomba kɔlɔ yayɛ oko la dinge+
Ndo pɛkato yayɛ oko la dinge di’odima.
Kalola le mi, nɛ dia dimi layokotshungola.+
23 Nyode ekoko w’ɔngɛnɔngɛnɔ, nyu olongo,
Nɛ dia Jehowa ambosala dikambo!
Nyode ekoko w’otshumba, nyu ɛhɔngɔ wa nkɛtɛ!
Nyode ekoko w’ɔngɛnɔngɛnɔ nyu akona,+
Nyu ekonda ndo esongo anyu tshɛ!
Nɛ dia Jehowa ambotshungola Jakɔbɔ,
Ndo nde ambɛnya lɔnɛnɛ lande lo Isariyɛlɛ.”+
24 Nganɛ mbata Jehowa, Otshungodi ayɛ,+
Lakakokenge ntatɛ lam’akiyɛ l’otema:
“Dimi kele Jehowa lakasale ɛngɔ tshɛ.
Akɔna aki kaamɛ la mi?
25 Dimi fukutanyaka tolembetelo ta atɛkɛtshi w’anyanya,*
Ndo dimi kasala dia wanɛ wasala diendja nsala akambo oko dinginya;+
Ɔnɛ ladja akanga wa lomba l’okandokando
Ndo lakadimola ewo kawɔ awui w’enginya;+
26 Ɔnɛ lasala dia ɔtɛkɛta wa okambi ande kotshama
Ndo lakotsha tshɛ lo tshɛ kɛnɛ kakate akɛndji ande;+
Ɔnɛ lata dikambo dia Jɛrusalɛma ate: ‘Anto wayodjasɛ lɔkɔ nto,’+
Ndo dia esomba wa la Juda ate: ‘Vɔ wayohikama nto,+
Ndo dimi layɔlɔngɔsɔla ahole ayɔ wakalana;’+
27 Ɔnɛ latɛ ashi wa dingunda ate: ‘Oma,
Ndo dimi layoonya ɛkɛdi ayɛ tshɛ;’+
28 Ɔnɛ latɛ Kurɔ+ ate: ‘Nde ekɔ olami ami w’ɛkɔkɔ,
Ndo nde ayokotsha lolango lami tshɛ lo tshɛ;’+
Ɔnɛ lata dikambo dia Jɛrusalɛma ate: ‘Yɔ yayohikama nto,’
Ndo dikambo dia tɛmpɛlɔ ate: ‘Etshina kayɛ kayosalema.’”+