1 Nkumi ya dikanga

10 Nkumekanga ka womoto ka Shɛba akoke lokumu l’akambo waki Sɔlɔmɔna wendana la lokombo la Jehowa,+ ko nde akaye dia ndjoohemba la ambola w’okandokando.*+ 2 Nde akakome la Jɛrusalɛma la olui wa woke efula w’anto+ kaamɛ la kamɛlɔ yakayɛmbaka esɔ ka balasama+ ndo lokema la paonyi la mbɔkɔ y’oshinga wolo. Nde akɔtɔ le Sɔlɔmɔna ko akasawola la nde akambo tshɛ waki lo otema ande. 3 Ko Sɔlɔmɔna akakadimola ambola ande tshɛ. Ndooko dui diaki wolo le* nkumekanga dia nde mbolembetshiya.

4 Lam’akɛnyi nkumekanga ka womoto ka Shɛba lomba tshɛ laki la Sɔlɔmɔna+ ndo luudu lakandake,+ 5 mbo ya ndɛ yaki lo mɛsa+ ande, edjaselo k’ekambi ande, woho wakakitshaka ekambi ande diangɔ lo mɛsa ndo ɛlɔtɔ awɔ, wanɛ wakawodjɛka wanu lo dikɔhɔ ndo elambo wa lotshumba wakandalambolaka mbala la mbala lo luudu la Jehowa, nde akakome ewo.* 6 Ɔnkɔnɛ nde akatɛ nkumekanga ate: “Kɛnɛ kakamoke oma lo wodja ami lo dikambo dia kɛnɛ kasalayɛ* ndo lo dikambo dia lomba layɛ kekɔ mɛtɛ. 7 Koko dimi kombetawɔ kɛnɛ kakamoke polo lam’oyemi ndo lam’amomɛna la washo ami hita. Eenda, vɔ kombutɛmi kaanga k’ahende ɔtɔi. Lomba layɛ ndo ɔngɔnyi ayɛ ndeka kɛnɛ kakamoke la fwa. 8 Diɛsɛ le anto ayɛ ndo diɛsɛ le ekambi ayɛ wemala la ntondo kayɛ wonya tshɛ dia pokamɛka lomba+ layɛ! 9 Jehowa Nzambi kayɛ atombɔme,+ nde lambokɔngɛnangɛna lo kokitsha lo kiti ka lowandji k’Isariyɛlɛ. L’ɔtɛ wa ngandji ka pondjo ka Jehowa le Isariyɛlɛ, nde ambokɔsɔna nkumekanga dia nsala akambo la losembwe ndo la sambo k’ɔlɔlɔ.”

10 Oma laasɔ, nde akasha nkumekanga talata* 120 ya paonyi ndo esɔ ka balasama+ efula ka mamba kaamɛ la mbɔkɔ y’oshinga wolo.+ Ndooko lushi lakɔtɔ esɔ ka balasama efula ka ngasɔ nto oko kɛnɛ kakasha nkumekanga ka womoto ka Shɛba nkumekanga Sɔlɔmɔna.

11 Olui wa masuwa waki Hirama wakelaka paonyi oma la Ɔfira,+ wakela ndo esongo w’okolongo+ efula ka mamba ndo mbɔkɔ y’oshinga wolo+ oma la Ɔfira. 12 Nkumekanga akasale esukɔ wa luudu la Jehowa la luudu la nkumekanga* la esongo w’okolongo, kaamɛ la nsɛsɛ ndo dihomahoma di’eshinga dikambo dia amembi.+ Ndooko lushi lakɔtɔ esongo w’okolongo ngasɔ nto kana mɛnama ngasɔ polo ndo ɛlɔ.

13 Nkumekanga Sɔlɔmɔna nde lawɔ akasha nkumekanga ka womoto ka Shɛba kɛnɛ tshɛ kakandakombola ndo kakandalɔmbɛ laadiko dia kɛnɛ kakandawosha oma lo lokaho lande.* L’ɔkɔngɔ wa laasɔ, nde akonɛɛ ko akakalola lo wodja ande kaamɛ l’ekambi ande.+

14 Paonyi yakawelaka Sɔlɔmɔna lo ɔnɔnyi yaki la wotsho wa talata 666 ya paonyi,+ 15 laadiko dia nyɛ yakayaka oma le amundji w’okanda ndo wahɔ w’oma le wanɛ wakasondjaka, oma le nkumi ya dikanga tshɛ y’ase Arabiya ndo oma le nguvɛrnɛrɛ ya lo wodja.

16 Nkumekanga Sɔlɔmɔna akasale dingawo dia weke 200 la paonyi ka losanganya+ (tɔshɛkɛlɛ* 600 ta paonyi takikɔ lo engawo la engawo)+ 17 ndo dingawo dia totshitshɛ* 300 la paonyi ka losanganya (mina* 3 ya paonyi yakikɔ lo engawo la engawo). Oma laasɔ, nkumekanga akadidje lo luudu lelamɛ ɔnɛ Luudu l’Okonda wa Lɛbanɔna.+

18 Ndo nto, nkumekanga akasale kiti ka lowandji ka woke la ewanga+ ko akakikite paonyi kambɛdiama.+ 19 Wadelo 6 wakikɔ otsha lo kiti kakɔ ndo kiti kakɔ kaki la dɛfu di’otshimbedi l’ɔkɔngɔ atɔ ndo tɔ kaki la ahole wa nkitsha anya lo wedi akɔ 2 ndo difanelo 2 dia ntambwɛ+ yemadi diaki lo emamu w’ahole wa nkitsha anya. 20 Difanelo dia ntambwɛ 12 yemadi diakikɔ lo wadelo akɔ 6, ntambwɛ 1 lo koma ya edelo tshɛ lo wadelo akɔ 6. Ndooko diolelo dikina diakasale ɛngɔ ka ngasɔ.

21 Diangɔ tshɛ dia nkumekanga Sɔlɔmɔna diakawadjaka dinɔnɔ diakasalema la paonyi ndo diangɔ tshɛ dia lo luudu lelamɛ ɔnɛ Luudu l’Okonda wa Lɛbanɔna+ diakasalema la paonyi ka pudipudi. Ndooko ɛngɔ kakasalema la mfɛsa, nɛ dia mfɛsa akɔsamaka oko ɛngɔ k’anyanya lo nshi ya Sɔlɔmɔna.+ 22 Nɛ dia nkumekanga aki la olui wa masuwa wa Tarashishi+ lo ndjale kaamɛ la olui wa masuwa wa Hirama. Mbala 1 lo ɛnɔnyi 3 tshɛ, olui wa masuwa wa Tarashishi wakayaka wayɛmbɛ paonyi, mfɛsa, ewanga,+ nkema ndo ntshumba y’ɛtɛnga.

23 Ɔnkɔnɛ, nkumekanga Sɔlɔmɔna akaleke nkumi ya dikanga tshɛ ya la nkɛtɛ ɔngɔnyi+ ndo lomba.+ 24 Ndo anto wa lo nkɛtɛ k’otondo wakayangaka dia nsawola la* Sɔlɔmɔna dia mpokamɛ lomba lakadje Nzambi l’otema ande.+ 25 Vɔ tshɛ, onto l’onto akayaka la woshasha, mbuta ate diangɔ dia mfɛsa, diangɔ dia paonyi, ahɔndɔ, dihomɔ dia ta, esɔ ka balasama, mfalasa ndo mfalo. Ngasɔ mbakadiasalemaka ɔnɔnyi l’ɔnɔnyi.

26 Sɔlɔmɔna akatetemala mɔtshanya pusupusu ndo mfalasa.* Nde aki la pusupusu kinunu la nkama nyɛi (1 400) ndo mfalasa*+ nunu dikumi la pende (12 000), ko nde akayilame lo esomba wa pusupusu ndo la Jɛrusalɛma+ suke la nkumekanga.

27 Nkumekanga akakonya mfɛsa efula oko mbɔkɔ la Jɛrusalɛma ndo abaya w’olondo efula oko esongo wa lokumu wele la Shɛfɛla.*+

28 Wakatoya la mfalasa yaki Sɔlɔmɔna oma l’Edjibito ndo olui w’amundji w’okanda waki nkumekanga wakakondjaka nyemba ya mfalasa* lo oshinga 1.+ 29 Pusupusu tshɛ kakawela oma l’Edjibito kaki la oshinga wa ekenga 600 wa mfɛsa, ndo mfalasa 1 kaki la oshinga wa 150. Ko vɔ wakayitomaka le nkumi ya dikanga tshɛ y’ase Hiti+ ndo nkumi ya dikanga ya Suriya.