Ɛnyɛlɔ
21 Dimi lakɛnyi olongo w’oyoyo la nkɛtɛ k’oyoyo,+ nɛ dia olongo w’edjedja la nkɛtɛ k’edjedja wakashishɔ+ ndo ndjale+ kotanema nto. 2 Dimi lakɛnyi osomba w’ekila, Jɛrusalɛma y’Oyoyo yayaholɔ oma l’olongo, oma le Nzambi,+ yɔlɔngɔswami oko otshukami wamboyalɛnga dikambo di’omɛnde.+ 3 Ko lakoke dui dia wolo oma lo kiti ka lowandji diata ɔnɛ: “Eenda! Luudu la dipɛma laki Nzambi laya kaamɛ la anto, ndo nde ayodjasɛ kaamɛ la wɔ, ko vɔ wayoyala anto ande. Nzambi ndamɛ ayoyala kaamɛ la wɔ.+ 4 Nde ayokitola asɔyi tshɛ oma lo washo awɔ,+ nyɔi hatoyala nto,+ otanda hatoyala nto, delo hatoyala nto, kaanga kandji hatoyala nto.+ Akambo wa ntondo wamboshila.”
5 Ko Ɔnɛ lakadjasɛ lo kiti ka lowandji+ akate ate: “Eenda! Dimi leetɛ diangɔ tshɛ eyoyo.”+ Nde akate nto ate: “Funda, nɛ dia ɛtɛkɛta ɛnɛ wekɔ wa kɔlamelo* ndo mɛtɛ.” 6 Ko nde akambutɛ ate: “Vɔ wambokotshama! Dimi kele Alfa la Omega,* etatelo la ekomelo.+ Onto tshɛ lele la mposa k’ashi, dimi layowosha ashi w’oma lo kiɔkɔ* y’ashi wa lɔsɛnɔ woshasha.*+ 7 Onto tshɛ layodja otshumba, ayolongola diangɔ sɔ ndo dimi layoyala Nzambi kande ko nde ayoyala ɔnami. 8 Koko akanga wa wɔma ndo wanɛ wele bu la mbetawɔ+ ndo wanɛ wele wɔnɔnyi lo mindo yawɔ ndo andjakanyi+ ndo atshi w’awui wa mindo wa dieyanelo*+ ndo wanɛ wele la diɔtɔnganelo la ɛdiɛngɛ ndo atɛmɔdi wa dikishi ndo akanga wa kashi+ tshɛ, vɔ tshɛ wayodjama l’oduwa wahɛta la dja la mbɔkɔ ya dja.+ Ɔsɔ ekɔ didjidji dia nyɔi+ ka 2.”
9 Ondjelo ɔmɔtshi l’atei w’andjelo 7 waki la alɔnga 7 wakalole tɔɔ la asui+ 7 w’ekomelo akaye ndo akambutɛ ate: “Yaka kele ndjokɛnya otshukami, mbuta ate wadi aki Ɔna Ɔkɔkɔ.”+ 10 Ko nde akamɛmbɛ lo wolo wa nyuma otsha lo dikona dimɔtshi dia woke ndo di’otale, ko akatɔmɛnya osomba w’ekila, Jɛrusalɛma yakayaholɔka oma l’olongo, oma le Nzambi+ 11 ndo yaki la lotombo la Nzambi.+ Yɔ yakahɛtaka ngaingai oko lɔwɔkɔ loleki oshinga wolo, oko lɔwɔkɔ la jaspɛ lahɛta oko lɔwɔkɔ la kristalɛ.+ 12 Osomba akɔ waki la ehele ka woke ndo k’otale, ndo tɔ kaki l’asoko 12. Andjelo 12 waki lo asoko akɔ, ndo lo asoko akɔ wakafunde nkombo ya waoho 12 w’ana w’Isariyɛlɛ. 13 Lo ɛstɛ asoko 3, lo nɔrdɛ asoko 3, lo sidɛ asoko 3 ndo lo owɛstɛ asoko+ 3. 14 Ehele ka lokombo l’osomba kaki la ave wa weke 12 oma l’ɛse ndo nkombo 12 ya apɔstɔlɔ+ 12 wa Ɔna Ɔkɔkɔ yaki lɔkɔ.
15 Ɔnɛ lakatɛkɛtaka la mi akakimɛ lɔsɔlɔ la paonyi oko yɛdikɔ dia mbɛdika osomba la asoko awɔ ndo ehele kawɔ.+ 16 Osomba akɔ waki la bɛkɛ 4 diɛdimi ndo otale awɔ mbɛdima la wekeke awɔ. Ko nde akɛdika osomba la lɔsɔlɔ ko vɔ waki la stadia* nunu dikumi la pende (12 000), otale, wekeke ndo wemema awɔ waki popo. 17 Ndo nto, nde akɛdika ehele kawɔ ko kaki la kubita 144,* lo ndjela wɛdikelo w’anto ndo l’etena kakɔ kaamɛ wɛdikelo w’andjelo. 18 Ehele kakɔ kakakama la ave wa jaspɛ,+ ndo osomba wakakama la paonyi ka pudipudi oko talatala ka pudipudi. 19 Atshina w’ehele k’osomba wakalɛngama la weho tshɛ w’ave w’oshinga wolo: Etshina ka ntondo kaki la ave wa jaspɛ, ka 2 la ave wa safirɛ, ka 3 la ave wa kalisɛdwanɛ, ka 4 la ave wa emɛrɔdɛ, 20 ka 5 la ave wa sardɔniksɛ, ka 6 la ave wa sardɔyinɛ, ka 7 la ave wa krizɔlitɛ, ka 8 la ave wa berilɛ, ka 9 la ave wa topazɛ, ka 10 la ave wa krizɔprazɛ, ka 11 la ave wa hiyasitɛ ndo ka 12 la ave wa ametistɛ. 21 Ndo nto, nkuke y’asoko 12 adidi 12 ndo lokuke la lokuke lakasalema la didi 1. Ndo shinga ya woke ya l’osomba yaki la paonyi ka pudipudi oko talatala kɛnama la wedi okina.
22 Dimi kɔmɛna tɛmpɛlɔ lɔkɔ, nɛ dia Jehowa* Nzambi Kanga-Wolo-Tshɛ+ ndo Ɔna Ɔkɔkɔ mbele tɛmpɛlɔ kawɔ. 23 Ndo osomba komonga l’ohomba w’osase wa wonya kana wa ngɔndɔ mpɛta lɔkɔ,+ nɛ dia lotombo la Nzambi lakɔɔhɛtshɛka osase ndo Ɔna Ɔkɔkɔ+ mbaki tala diawɔ. 24 Ko wedja wayɔkɛndakɛndaka l’ekimanyielo k’osase+ awɔ ndo nkumi ya dikanga ya la nkɛtɛ wayela lotombo lawɔ lɔkɔ. 25 Asoko awɔ hawotodihama kaanga yema la yanyi, nɛ dia otsho hawotoyala lɛkɔ.+ 26 Ndo vɔ wayela lotombo ndo kɛnɛmɔ ka wedja lɔkɔ.+ 27 Koko ɛngɔ tshɛ ka mindo ndo onto tshɛ lasala akambo wa wɔnɔnyi kana lakesana hatɔtɔ l’osomba akɔ,+ paka wanɛ wele nkombo yawɔ fundama lo wɔɔmbɔ wa lɔsɛnɔ wa Ɔna Ɔkɔkɔ mbayɔtɔ.+