Jɛrɛmiya
9 Otondonga ɔtɛ ami ashi mbewɔ,
Washo ami ɛtɛkɔ ka asɔyi lee!+
Tshike lotolelaka otsho la yanyi
Nɛ dia anto wa lo wodja ami wambodiakema.
2 Otomongaka la dihole diatohangaka ambetshetshi lo oswe lee!
Tshike lototshika anto ami ndo lotangana la wɔ etale,
Nɛ dia vɔ tshɛ wekɔ akanga wa loseka,+
Olui w’akanga wa lokeso.
3 Vɔ minɛka nemi yawɔ oko ota;
Lokeso lambololanɛ lo wodja, aha kɔlamelo.+
“Vɔ wekɔ lo taleke mpama tsho lo kɔlɔ,
Ndo vɔ hawombidje yimba,”+ mbata Jehowa.
4 “Onto tshɛ eewɔ osekande,
Ndo tanyoyaɛkɛke kaanga le ɔnangɛnyu.
5 Onto l’onto kesaka osekande,
Ndo ndooko lata mɛtɛ.
Vɔ wambetsha nemi yawɔ dia mbutaka kashi.+
Vɔ ndjalɛndjaka lo nsala kɛnɛ kele kɔlɔ.
6 Nyu nyekɔ lo nsɛna l’atei wa lokeso.
Lo lokeso lawɔ, vɔ wakatone mbeyami,” mbata Jehowa.
7 Ɔnkɔnɛ, Jehowa kanga lolembelembe kata ate:
“Dimi layowalɛlɔla ndo layowahemba,+
Nɛ dia kakɔna kakokami nsala nto la ɔna womoto la wodja ami?
8 Lolemi lawɔ lekɔ lohito ladiakana, lata kashi.
La onyɔ ande, onto mbutɛka osekande awui wa wɔladi,
Koko l’etei, nde mambaka djonga.”
9 Jehowa kata ate: “Onde dimi haahombe mbikoya la wɔ l’ɔtɛ w’awui asɔ?
Onde dimi* haahombe nsɔmbɔya wodja ngasɔ?+
10 Dimi layolela ndo layonyanga lo dikambo di’akona
Ndo layemba lembo l’otanda* lo ahole waleshawɔ dongalonga lo oswe,
Nɛ dia vɔ wakatshumbama woho wahakoke onto mbeta lɛkɔ,
Ndo londjo la dongalonga halokɛma.
Tofudu ta l’olongo ndo nyama yambolawɔ; yɔ yambotshɔ.+
11 Dimi layetɛ Jɛrusalɛma tota dia ave,+ edjaselo ka waa mbolo,+
Ndo layetɛ esomba wa Juda tɔngɔ to, aha la onto ladjasɛ lɛkɔ.+
12 Akɔna ele la lomba lakoka nshihodia dui nɛ?
Jehowa onto akɔna akandatɛ, kele nde adiewoya?
Lande na kambolanyema wodja?
Lande na kambowotshumbama oko oswe,
Woho wele ndooko onto leta lɔkɔ?”
13 Jehowa akakadimola ate: “Nɛ dia vɔ tonaka ɛlɛmbɛ* ami wakamakitsha la ntondo kawɔ ndo nɛ dia vɔ kombayela ndo kokitanyiya dui diami. 14 Koko la ɛtɛ wolo tshɛ, vɔ wakayele etema awɔ hita+ ndo vɔ wakayele dikishi dia Baala oko wakawaetsha washɛwɔ dia nsala.+ 15 Ɔnkɔnɛ, Jehowa kanga lolembelembe, Nzambi ka Isariyɛlɛ kata ate: ‘Dimi layanga nsala dia wodja ɔnɛ ndɛ osongo w’ololo ndo layowanɔsha ashi wa lɔlɛngɔ.+ 16 Dimi layowahandjola l’atei wa wedja wakiwɔ vɔ la washɛwɔ kombeya+ ndo dimi layowatomɛ lokuwa la ta polo ndo lambaashila oshiki.’+
17 Jehowa kanga lolembelembe kata ate:
‘Nyosale akambo la yimba.
Nyeele wamato watembaka nkembo y’ɔkɛyi,*+
Ndo nyotome anto dia telɛ wamato wele la diewo,
18 Dia vɔ nsamanya kele wayolele delo dia kandji lo dikambo diaso,
Dia washo aso nkɛdia asɔyi
Ndo ntɔki yaso nkɛdia ashi.+
19 Nɛ dia londjo la delo dia kandji lambokɛ oma la Siɔna ɔnɛ:+
“Ande woho wambotolanyema!
Ande efula ka nsɔnyi kaso!
Nɛ dia sho tambotshika wodja ndo vɔ wambonyukola mvudu yaso.”+
20 Nyu wamato, nyohokame ɔtɛkɛta wa Jehowa.
Atoyi anyu walongole ɔtɛkɛta w’oma l’onyɔ ande.
21 Nɛ dia nyɔi kambɔtɔ lo adidishi aso;
Tɔ kambɔtɔ lo totshoto taso todingami la mpele
Dia mbɔsa ana oma lo toshinga
Ndo ɛlɔngɔ w’apami oma lo ahole wa lo sɛkɛ.’+
22 Ta wate: ‘Jehowa kata ate:
“Edo w’anto wayokalema oko tumi lo ekambɔ,
Oko ɔnɔngɔ wa ntɔngɔ yekewɔ kamina l’ɔkɔngɔ w’omunyi,
Aha la onto lawatshumanya.”’”+
23 Jehowa kata ate:
“Kanga lomba atoyasɛmake dia lomba lande;+
Kanga wolo atoyasɛmake dia wolo ande;
Ndo kanga ɔngɔnyi atoyasɛmake dia ɔngɔnyi ande.”+
24 “Koko ɔnɛ layasɛma ayasɛmɛ dia dikambo nɛ:
Dia nde ekɔ la shɛnɔdi ndo la ewo kami,+
Dia dimi kele Jehowa, Ɔnɛ lɛnya ngandji ka kɔlamelo, losembwe ndo sambo k’ɔlɔlɔ la nkɛtɛ,+
Nɛ dia lo akambo asɔ mbangɛnangɛnami,”+ mbata Jehowa.
25 Jehowa kata ate: “Eenda, nshi yekɔ lo ndjaye, ndo dimi layokoya l’onto tshɛ lakanyɛma mpota koko atanyɛma mpota,+ 26 la Edjibito,+ la Juda,+ la Ɛdɔmɛ,+ l’ase Amɔna,+ la Mɔaba+ ndo la wanɛ tshɛ wakanya avo lo mpakatoyi wadjasɛ l’oswe wa shɛnga;+ nɛ dia wedja tshɛ watanya mpota ndo nkumbo k’otondo k’Isariyɛlɛ katanya mpota l’otema.”+