2 Ɛkɔndɔ
22 Oma laasɔ, ase Jɛrusalɛma waketɛ Ahaziya ɔnande la pami la kose nkumekanga lo dihole diande, nɛ dia olui wa dengalenga diakaye oma le ase Arabiya oya lo mpango wakadiake nondo diande tshɛ.+ Ɔnkɔnɛ, Ahaziya ɔna Jɛhɔrama akatatɛ mbolɛ oko nkumekanga la Juda.+ 2 Ahaziya aki l’ɛnɔnyi 22 lam’akandayala nkumekanga, ndo nde akolɛ ɔnɔnyi 1 la Jɛrusalɛma. Nyango lokombo lande Ataliya,+ okana* wa Omiri.+
3 Nde lawɔ akakɛndakɛndaka lo mboka y’ase luudu la Ahaba,+ nɛ dia nyango akoolakaka dia nsala akambo lo yoho ya kɔlɔ. 4 Nde akasalaka kɛnɛ kaki kɔlɔ lo washo wa Jehowa, oko ase luudu la Ahaba, nɛ dia vɔ mbakayala andaki ande l’ɔkɔngɔ wa nyɔi ka she dia mboyangɛ elanyelo. 5 Nde akayele dako diawɔ ndo akatshu kaamɛ la Jɛhɔrama ɔna Ahaba dia tɔlɔsha Hazaɛlɛ+ nkumekanga ka Suriya la Ramɔta-Ngiliyadɛ,+ lɛnɛ akahomuya amboki w’eta Jɛhɔrama. 6 Nde akakalola la Jezɛrɛlɛ+ dia tɔkɔnɔ mpota kakawoohomuya la Rama etena kakandalɔka la Hazaɛlɛ nkumekanga ka Suriya.+
Ahaziya* ɔna Jɛhɔrama+ nkumekanga ka Juda akaholɔ otsha la Jezɛrɛlɛ dia tenda Jɛhɔrama+ ɔna Ahaba, nɛ dia nde akahomɔ mpota.*+ 7 Koko Nzambi akela ɛkwɛlɔ ka Ahaziya lo oyelo ande le Jɛhɔrama; ndo lam’akandaye, nde akatshu kaamɛ la Jɛhɔrama dia tohomana la Jehu+ okana* wa Nimishi, ɔnɛ lele Jehowa akookite esɔ dia ndanya* ase luudu la Ahaba.+ 8 Lam’akatatɛ Jehu mbela elombwelo le ase luudu la Ahaba, nde akatane ewandji w’ase Juda ndo ana w’apami w’anango Ahaziya, ekambi w’Ahaziya, ko nde akaadiake.+ 9 Oma laasɔ, nde akayange Ahaziya. Wakatowonda la Samariya lɛnɛ akandatoyashɛ, ko wakaye la nde le Jehu. L’ɔkɔngɔ diko, vɔ wakoodiake ndo wakookundɛ,+ nɛ dia vɔ wakate vate: “Nde ekɔ okana wa Jɛhɔshafata ɔnɛ lakayange Jehowa la otema ande tshɛ.”+ Ndooko ose luudu la Ahaziya laki la wolo wa mbolɛ lo diolelo.
10 Lam’akɛnyi Ataliya nyango Ahaziya+ dia ɔnande ambovɔ, nde akonɛɛ, ko akalanya ɔlɔndji w’otondo wa nkumekanga* wa lo luudu la Juda.+ 11 Koko Jɛhɔshabeatɛ ɔna nkumekanga la womoto akɔshi Jɛhɔashi+ ɔna Ahaziya, akawonya oma l’atei w’ana wa nkumekanga wakahombe ndjakema, ko akoolame nde la ɔndɛdi ande lo luudu lɔmɔtshi la ndala la l’etei. Jɛhɔshabeatɛ ɔna womoto laki nkumekanga Jɛhɔrama+ (nde aki wadi aki ɔlɔmbɛdi Jɛhɔyada+ ndo kadiyɔ aki Ahaziya) akakongɛ dia mboshɛ diaha Ataliya mbɛɛna, ko nde kombodiaka.+ 12 Nde akatshikala la wɔ l’edja k’ɛnɔnyi 6, oshɛmi lo luudu la Nzambi ka mɛtɛ etena kakolɛka Ataliya lo wodja.