Ɛnyɛlɔ
17 Ondjelo ɔmɔtshi l’atei w’andjelo 7 waki la alɔnga+ 7 akaye, ko akambutɛ ate: “Yaka ndjokɛnya kilombo ka womoto la numba ka lokolokolo lodjashi laadiko di’ashi efula,+ 2 lele nkumi ya dikanga ya la nkɛtɛ yakasale awui wa mindo wa dieyanelo*+ la nde ndo anto wa la nkɛtɛ wakadjɔ wanu ande w’awui wa mindo wa dieyanelo.”*+
3 Ko nde akamɛmbɛ lo wolo wa nyuma otsha l’oswe. Ko dimi lakɛnyi womoto ɔmɔtshi odjashi laadiko dia nyama ka ngala ka beela kaki tɔɔ la nkombo ya lɔtɛngɔ ndo kaki la ɛtɛ 7 la nseke 10. 4 Womoto akɔ akalɔtɛ dihɔndɔ di’ebelabela+ ndo dia beela ndo nde akayalɛngɛ la paonyi ndo la mbɔkɔ y’oshinga wolo ndo l’adidi.+ Ndo lo lonya lande, nde aki la dikɔhɔ dia paonyi diakalole tɔɔ l’akambo wa wɔnɔnyi ndo awui ande wa mindo wa dieyanelo.* 5 Wakafunde lo mfumu kande lokombo lɔmɔtshi la ehekesa ɔnɛ: “Babilɔna ka Woke, nyango waa numba+ ndo akambo wa wɔnɔnyi wa la nkɛtɛ.”+ 6 Ko dimi lakɛnyi womoto akɔ anɔ dikila dia ekilami ndo dikila di’ɛmɛnyi wa Yeso.+
Dimi lakaambe efula lam’akamawɛnyi. 7 Ko ondjelo akambutɛ ate: “Lande na kakayambi? Dimi layanga kotɛ dikambo dia ehekesa diendana la womoto+ ndo la nyama ka ngala kayawɛmbɛ kele la ɛtɛ 7 ndo la nseke 10:+ 8 Nyama ka ngala kakayɛnyi kakikɔ, ko kaya bu, koko tɔ kekɔ suke la ntomba oma lo difuku diaha l’ekomelo,+ ko oma laasɔ tɔ ndjolanyema. Ndo anto wa la nkɛtɛ wele nkombo yawɔ kofundama lo dibuku dia lɔsɛnɔ+ ntatɛ oma k’etongelo k’andja wayamba efula lam’ayowɛna woho wele nyama ka ngala kakikɔ, ko kaya bu, koko kayonga nto.
9 “Dikambo nɛ nɔmbaka dia monga la yimba ndo la lomba: Ɛtɛ+ 7 wekɔ didjidji di’akona 7 wodjashi womoto la shɔdi. 10 Ndo ekɔ nkumi ya dikanga esambele: 5 yambɔkɔka, 1 ekɔ, okina atakome, koko lam’ayondokoma, nde ayotshikala lo tshanda ya tshitshɛ tsho. 11 Nyama ka ngala kakikɔ, ko kaya bu,+ tɔ lawɔ kekɔ nkumekanga ka 8, koko tɔ ntomba oma lo nkumi ya dikanga 7 ndo tɔ kayotshɔ otsha l’elanyelo.
12 “Nseke 10 yakayɛnyi yekɔ didjidji dia nkumi ya dikanga 10 yahatalongola diolelo, koko yekɔ lo nongola lowandji oko nkumi ya dikanga l’edja ka wonya ɔtɔi wa ntango kaamɛ la nyama ka ngala. 13 Vɔ wekɔ la kanyi yaamɛ ndo vɔ mbishaka nyama ka ngala wolo awɔ ndo lowandji lawɔ. 14 Vɔ wayɔlɔsha Ɔna Ɔkɔkɔ,+ koko lam’ele nde ekɔ Nkumi ka waa nkumi ndo Nkumekanga ka nkumi ya dikanga,+ Ɔna Ɔkɔkɔ ayowalɛndja.+ Ndo nto, wanɛ wele kaamɛ la nde wakelamɛ ndo wakasɔnama ndo wele la kɔlamelo wayowalɛndja.”+
15 Nde akambutɛ nto ate: “Ashi wakayɛnyi, wele womoto la numba mbidjasɛ lɔkɔ wekɔ didjidji di’anto ndo elui w’anto ndo wedja ndo ɛtɛkɛta.+ 16 Nseke+ 10 yakayɛnyi ndo nyama ka ngala+ wayohetsha womoto la numba,+ wayowohandjola vwa ndo wayowotshika otakataka, vɔ wayɔlɛ emunyi ande ndo wayowotshumba oshiki lo dja.+ 17 Nɛ dia Nzambi akadje lo etema awɔ dia vɔ nkotsha kanyi yande,+ ɛɛ, dia vɔ nkotsha kanyi yawɔ yaamɛ lo mbisha nyama ka ngala+ diolelo diawɔ polo ndo lam’ayokotshama ɛtɛkɛta wa Nzambi. 18 Womoto+ lakayɛnyi ekɔ didjidji di’osomba wa woke wele la diolelo laadiko dia nkumi ya dikanga ya la nkɛtɛ.”