JASHUA

1 L’ɔkɔngɔ wa nyɔi ka Mɔsɛ okambi wa Jehowa, Jehowa akatɛ Jashua*+ ɔna Nuna okambi+ wa Mɔsɛ ate: 2 “Okambi ami Mɔsɛ ambovɔ.+ Emala, kele tehɔ Jɔrdana wɛ l’anto anɛ tshɛ ndo nyotshu otsha lo wodja wayangami mbasha, vɔ ase Isariyɛlɛ.+ 3 Dimi layonyosha dihole tshɛ diayonyodja ekolo anyu, oko wakamalake Mɔsɛ.+ 4 Olelo anyu wayonga oma l’oswe wa shɛnga polo la Lɛbanɔna ndo polo l’ɔkɛdi wa woke, ɔkɛdi w’Efaratɛ, mbuta ate ɛtshi ka nkɛtɛ k’otondo k’ase Hiti+ polo lo Ndjale ka woke* lo owɛstɛ.*+ 5 Ndooko onto layokoka nshika ekolo la ntondo kayɛ l’edja tshɛ ka lɔsɛnɔ layɛ.+ Oko wakimi kaamɛ la Mɔsɛ kayomonga kaamɛ la yɛ.+ Dimi hantokɔsɛka ndo hantokotshika.+ 6 Onga la dihonga ndo keketala,+ nɛ dia wɛ kayokimanyiya anto anɛ dia vɔ nkita wodja wakamatshibɛ watshɛwɔ dia mbasha.+

7 “Onga paka la dihonga ndo keketala efula ndo kitanyiya dimɛna dimɛna Ɛlɛmbɛ tshɛ wakakodjangɛ okambi ami Mɔsɛ. Towatakɔke ko wɛ mbɛtɔla lo lonya l’omi kana la lɔmɔsɔ+ dia wɛ salaka akambo la lomba dihole tshɛ diayoyotshɔ.+ 8 Dibuku di’Ɛlɛmbɛ nɛ diatomɔke oma l’onyɔ ayɛ,+ ndo kodiadiake la dui di’ɔkɔkɛ* la yanyi ndo l’otsho, dia wɛ nkitanyiya dimɛna dimɛna awui tshɛ wofundami lɔkɔ,+ nɛ dia lo nsala ngasɔ kayoyotondoya mboka kayɛ ndo kayoyosala akambo la lomba.+ 9 Onde dimi kokodjangɛ? Onga la dihonga ndo keketala. Tosakake lokomba ndo tokake wɔma, nɛ dia Jehowa Nzambi kayɛ ekɔ kaamɛ la yɛ lo dihole tshɛ diayoyotshɔ.”+

10 Oma laasɔ, Jashua akadjangɛ topita ta wodja ate: 11 “Nyetete lo mpango k’otondo kele nyote anto nyate: ‘Nyɔlɔngɔsɔlɛ mpamba, nɛ dia l’ɔkɔngɔ wa nshi 3 nyayotehɔ Jɔrdana dia ntshɔ ko tɔsa wodja wayanga nyosha+ Jehowa Nzambi kanyu.’”

12 Jashua akatɛ aseka Rubɛna, aseka Ngada ndo k’ahende ɔtɔi ka dioho dia Manase ate: 13 “Nyohɔ kɛnɛ kakanyodjangɛ+ Mɔsɛ okambi wa Jehowa ate: ‘Jehowa Nzambi kanyu ayanga nyosha momuya ndo nde ambonyosha ɛtshi ka nkɛtɛ kɛnɛ. 14 Wadiɛnyu, ananyu ndo dongalonga dianyu diayodjasɛ lo ɛtshi ka nkɛtɛ kakanyosha Mɔsɛ lo wedi ɔnɛ* wa Jɔrdana,+ koko andɔshi+ anyu wa ta tshɛ wa wolo pombaka ntehɔ dia tolowanyema dikambo dia ta la ntondo k’anangɛnyu.+ Nyu pombaka mbakimanyiya 15 polo lam’ayosha Jehowa anangɛnyu momuya oko wamondonyosha, ndo vɔ lawɔ wambɔsa wodja wayanga mbasha Jehowa Nzambi kanyu. Oma laasɔ mbayonyoyokalola lo ɛtshi ka nkɛtɛ kakawanyosha dia nyu mbidjasɛ ndo kiɔsa, ɛtshi ka nkɛtɛ kakanyosha Mɔsɛ okambi wa Jehowa lo ɛstɛ ka Jɔrdana.’”+

16 Vɔ wakakadimola Jashua vate: “Tayosala kɛnɛ tshɛ kamboyotodjangɛ ndo tayotshɔ dihole tshɛ diayoyototoma.+ 17 Oko wakatahokamɛka kɛnɛ tshɛ kakatotɛka Mɔsɛ mbayotokohokamɛka. Dikambo ɔtɔi ko, Jehowa Nzambi kayɛ onge la yɛ oko wakinde la Mɔsɛ.+ 18 Onto tshɛ layɔtɔmbɔkwɛ didjango diayɛ ndo lahatokitanyiya kɛnɛ tshɛ kawodjangɛyɛ ayodiakema.+ Dikambo ɔtɔi ko, onga la dihonga ndo keketala.”+

2 Oma laasɔ, Jashua ɔna Nuna akatome apami 2 lo woshɛshɛ oma la Shitimɛ+ oko atɔpi. Nde akawatɛ ate: “Nyotshu nyotokembe wodja, djekoleko Jeriko.” Ko vɔ wakatshu ndo wakatokoma lo luudu laki womoto ɔmɔtshi la numba, lokombo lande Rahaba,+ ko vɔ wakahange laawɔ. 2 Wakayotɛ nkumekanga ka Jeriko vate: “He apami w’ase Isariyɛlɛ wakaye lanɛ l’otsho w’ɛlɔ dia ndjokemba wodja aso!” 3 Ko nkumekanga ka Jeriko akatome dui le Rahaba dia towotɛ ɔnɛ: “Tondja apami wakaye ndo wohangi lo luudu layɛ, nɛ dia vɔ woye ndjokemba wodja w’otondo.”

4 Koko womoto akɔ akɔshi apami akɔ 2 ko akawashɛ. Oma laasɔ, nde akate ate: “Mɛtɛ apami akɔ wakaye le mi, koko hambeyi oma lɛnɛ akawaye. 5 L’otsho, lam’akiwɔ suke la ndjiha lokuke l’osomba, apami akɔ wakatombi. Haleye lɛnɛ akatshwe apami akɔ, ko naka nyu mbayela esadi, nyayotowanda.” 6 (Koko nde akawaɔshi, ko akawadiya lo ɔtɛ wa luudu ndo akawashɛ lo dikanda dia nɛngɛsɛ ya linɛnɛ yakalɔngama lo nsambe.) 7 Ɔnkɔnɛ, anto akɔ wakatshu taayanga lo lɛkɛ l’otsha lo Jɔrdana lo ateho,+ ko wakadihe lokuke la osomba kam’akatombe wanɛ wakatawayangaka.

8 La ntondo k’apami akɔ ndala, womoto akɔ akadɛ le wɔ lo ɔtɛ wa luudu. 9 Nde akatɛ apami akɔ ate: “Dimi mbeyaka dia Jehowa ayonyosha wodja+ ɔnɛ ndo dia sho tekɔ lo nyoka wɔma.+ Ase wodja tshɛ wekɔ lo nyatɛ asolo,+ 10 nɛ dia takoke woho wakonya Jehowa ashi wa Ndjale ka Beela la ntondo kanyu lam’akanyatombe oma l’Edjibito+ ndo kɛnɛ kakanyasalɛ nkumi ya dikanga 2 y’ase Amɔra, Sihɔna+ nde la Onga,+ wanɛ wakanyalanya lo wedi okina* wa Jɔrdana. 11 Lam’akatoke akambo asɔ, takakɔmɔ etema* ndo anto tshɛ waya bu la dihonga l’ɔtɛ anyu, nɛ dia Jehowa Nzambi kanyu ekɔ Nzambi ka l’olongo la diko ndo ka la nkɛtɛ l’ɛse.+ 12 Ɔnkɔnɛ lam’alanganyu, nyontshibee lo lokombo la Jehowa dia, lam’ele dimi lambonyɛnya ngandji ka kɔlamelo, nyu lawɔ nyayɛnya ase luudu la papa ngandji kanyu ka kɔlamelo. Ndo nyu pombaka mbishami djembetelo yayombetawoya.* 13 Nyu pombaka nshimbɛ lɔsɛnɔ la papa, mama, analengo, akadiyɛmi ndo anto awɔ tshɛ ndo nyu pombaka totsha* oma lo nyɔi.”+

14 Ko apami akɔ wakawotɛ vate: “Tayokimɔ nsɛnɔ yaso l’ɔtɛ wa nsɛnɔ yanyu!* Naka wɛ hasanyisha awui wendana la lɔkɛndɔ laso, kete tayokɛnya ngandji ka kɔlamelo ndo tayonga la kɔlamelo le yɛ lam’ayotosha Jehowa wodja.” 15 L’ɔkɔngɔ wa laasɔ, womoto akɔ akaaholoya la ɔkɔdi lo didishi, nɛ dia luudu lande laki l’omamu w’ehele ka lokombo la osomba. Lo mɛtɛ, nde akadjasɛka ko ehele.+ 16 Ko nde akawatɛ ate: “Nyotshu lo lɛkɛ l’akona ndo nyotoyashɛ lɛkɔ nshi 3 diaha wanɛ watanyoyange nyɛna. Oma laasɔ, l’ɔkɔngɔ wa wanɛ watanyoyange nkalola mbakokanyu ndjotetemala la lɔkɛndɔ lanyu.”

17 Apami akɔ wakawotɛ vate: “Sho hatotonga la onongo w’etshibelo kamboyototshibia+ 18 naka lam’ayotɔtɔ lo wodja, wɛ ayokeleka ɔkɔdi wele la eshinga wa beela lo didishi diotoholoyishayɛ. Kotshumanya shɔ, nyɔ, ananyɔ ndo ase luudu la shɔ tshɛ kaamɛ la yɛ lo luudu lɔnɛ.+ 19 Ko naka onto ɔmɔtshi ambotomba l’andja oma lo luudu, dikila diande diayonga l’ɔtɛ ande ndamɛ ndo sho hatotonga la onongo. Ko naka mpokoso kɛmɔtshi kambokomɛ* onto ɔmɔtshi layotshikala la yɛ lo luudu lɔnɛ, dikila diande diayonga l’ɛtɛ aso. 20 Ko naka wɛ nsanya awui wendana la lɔkɛndɔ laso,+ sho hatotonga la onongo lo kɛnɛ kendana la etshibelo kamboyototshibia.” 21 Womoto akɔ akakadimola ate: “Diatshame oko watanyu.”

Ko nde akaakɛndja ndo vɔ wakatshu. L’ɔkɔngɔ wa laasɔ, womoto akɔ akakeleka ɔkɔdi wa beela lo didishi. 22 Ɔnkɔnɛ, vɔ wakonɛɛ ko wakatshu lo lɛkɛ l’akona ndo wakatotshikala lɛkɔ nshi 3, polo lam’akakalola wanɛ wakatawayangaka. Wanɛ wakatawayangaka wakaayange lo oseka mboka tshɛ, koko vɔ kombaɛna. 23 Ko apami akɔ 2 wakaholɔ oma lo lɛkɛ l’akona ndo wakatehɔ ɔkɛdi, ko wakatokoma le Jashua ɔna Nuna. Vɔ wakɔɔkɔndɔlɛ akambo tshɛ wakataakomɛ lɛkɔ. 24 Oma laasɔ, vɔ wakatɛ Jashua vate: “Jehowa ambokimɔ wodja w’otondo le so.+ Lo mɛtɛ, ase wodja w’otondo wekɔ lo taatɛ asolo.”+

3 Oma laasɔ, Jashua aketɔ la pindju ka pɛɛ, ko nde l’ase Isariyɛlɛ* tshɛ wakonɛɛ oma la Shitimɛ+ ko wakatokoma lo Jɔrdana. Vɔ wakalale laawɔ la ntondo ka vɔ ntehɔ.

2 L’ɔkɔngɔ wa nshi 3, topita+ waketeta lo mpango 3 ko wakadjangɛ anto vate: “Kam’ayonyɛna ɛlɔmbɛdi w’ase Lɛwi+ wambɛmba ɔshɛtɛ wa sheke wa Jehowa Nzambi kanyu, nyu pombaka monɛɛ oma lɛnɛ enyu ndo mboyela. 4 Koko kanyangane la wɔ kubita oko nunu pende (2 000).* Tanyolekake nsukana la wɔ, dia nyu mbeya lɛnɛ ahombanyu ntshɔ, nɛ dia nyu nyatandaka lɔkɛndɔ lo mboka kɛnɛ.”

5 Ko Jashua akatɛ wodja ate: “Nyoyakidia,+ nɛ dia loyi Jehowa ayosala akambo wa diambo l’atei anyu.”+

6 Oma laasɔ, Jashua akatɛ ɛlɔmbɛdi ate: “Nyɛmbɛ ɔshɛtɛ+ wa sheke kele nyete la ntondo k’anto.” Ko vɔ wakɛmbɛ ɔshɛtɛ wa sheke ko wakete la ntondo k’anto.

7 Ko Jehowa akatɛ Jashua ate: “Ɛlɔ, dimi layanga ntatɛ kodiya lo washo w’ase Isariyɛlɛ tshɛ,+ dia vɔ mbeya dia dimi layonga kaamɛ la yɛ+ woho wakimi kaamɛ la Mɔsɛ.+ 8 Kodjange ɛlɔmbɛdi watɛmbɛ ɔshɛtɛ wa sheke wate: ‘Lam’ayonyokoma l’omamu w’ashi wa Jɔrdana, kanyemale lo Jɔrdana.’”+

9 Ko Jashua akatɛ ase Isariyɛlɛ ate: “Nyoye lanɛ kele nyohokame ɛtɛkɛta wa Jehowa Nzambi kanyu.” 10 Oma laasɔ Jashua akate ate: “Oma lo dikambo nɛ mbayonyeya dia Nzambi kasɛna ekɔ l’atei anyu+ ndo ndooko onyake nde ayotshanya ase Kanana, ase Hiti, ase Hivi, ase Perizi, ase Ngiringashɛ, ase Amɔra ndo ase Jɛbusɛ+ oma la ntondo kanyu. 11 Nyende, ɔshɛtɛ wa sheke wa Nkumadiɔndjɔ ka nkɛtɛ k’otondo wayanga mbeta la ntondo kanyu otsha lo Jɔrdana. 12 Ɔnkɔnɛ, nyɔshi apami 12 oma lo waoho w’Isariyɛlɛ, pami 1 oma lo dioho la dioho,+ 13 ndo kam’ayɔtɔ ekolo w’ɛlɔmbɛdi watɛmbɛ Ɔshɛtɛ wa Jehowa Nkumadiɔndjɔ ka nkɛtɛ k’otondo lo ashi wa Jɔrdana, ashi wa Jɔrdana wakɛla oma la diko hawotɔkɛla nto ndo wayemala oko nkonge.”*+

14 Ɔnkɔnɛ, lam’akonɛɛ anto oma lo mvudu yawɔ y’apɛma la ntondo ka ntehɔ Jɔrdana, ɛlɔmbɛdi wakatɛmbaka ɔshɛtɛ+ wa sheke wakete la ntondo k’anto. 15 Kam’akakome wanɛ wakatɛmbaka Ɔshɛtɛ lo Jɔrdana ndo kam’akatambiya ɛlɔmbɛdi wakatɛmbaka Ɔshɛtɛ ekolo awɔ l’ashi wa l’omamu+ (laasɔ ko Jɔrdana yambɔmbɔ la elola nshi tshɛ ya dinela), 16 ashi wakakɛlaka oma la diko wakemala. Vɔ wakemala oko nkonge,* etale efula mangana la Adama, osomba waki suke la Zarɛtana etena kakome ashi wakaholɔka otsha lo Ndjale ka Araba, Ndjale ka Lɛɛhɔ.* Vɔ wakemala, ko anto wakatehɔ lo wedi okina wa Jeriko. 17 Etena kakemala ɛlɔmbɛdi wakatɛmbaka ɔshɛtɛ wa sheke wa Jehowa lo nkɛtɛ y’ofumbo+ l’atei wa Jɔrdana, ase Isariyɛlɛ tshɛ wakatehɔ lo nkɛtɛ y’ofumbo+ polo lam’akashile wodja w’otondo ntehɔ Jɔrdana.

4 Kam’akashile wodja w’otondo ntehɔ Jɔrdana, Jehowa akatɛ Jashua ate: 2 “Ɔsa apami 12 l’atei w’anto, pami 1 oma lo dioho la dioho,+ 3 kele djangɛwɔ wate: ‘Nyɔshi ave 12 oma l’atei wa Jɔrdana, oma lo dihole diemadi ekolo w’ɛlɔmbɛdi,+ kele nyowaɛmbɛ ndo kanyotowaemɛ lo dihole diayonyotolala.’”+

4 Ɔnkɔnɛ Jashua akelɛ apami 12 wakandasɔnɛ oma l’atei w’ase Isariyɛlɛ, pami 1 oma lo dioho la dioho, 5 ko Jashua akawatɛ ate: “Nyete la ntondo k’Ɔshɛtɛ wa Jehowa Nzambi kanyu l’atei wa Jɔrdana kele onto l’onto ɛmbɛ dive dimɔtshi lo ahɛka ande, lo ndjela lofulo la waoho w’ase Isariyɛlɛ, 6 dia monga oko djembetelo l’atei anyu. Naka ananyu* wamboyonyombola l’ɔkɔngɔ vate: ‘Lande na kenyu la ave anɛ?’+ 7 Kanyowatɛke nyate: ‘Nɛ dia ashi wa Jɔrdana wakemala la ntondo k’ɔshɛtɛ+ wa sheke wa Jehowa. Lam’akawatehɔ Jɔrdana, ashi wa Jɔrdana wakemala. Ave anɛ wayonga oko eohwelo* ka pondjo le ase Isariyɛlɛ.’”+

8 Ɔnkɔnɛ, ase Isariyɛlɛ wakasale paka oko wakadjanga Jashua. Vɔ wakɔshi ave 12 oma l’atei wa Jɔrdana, oko wakatɛ Jehowa Jashua dia mbɔtɔnganyiya la lofulo la waoho w’ase Isariyɛlɛ. Vɔ wakawaɔshi dia ntshɔ la wɔ lo dihole diakawahombe tolala ndo wakatowaemɛ laawɔ.

9 Jashua akemɛ nto ave 12 l’atei wa Jɔrdana lo dihole diakemala ekolo w’ɛlɔmbɛdi wakatɛmbaka ɔshɛtɛ wa sheke+ ndo ave akɔ wekɔ laawɔ polo ndo ɛlɔ.

10 Ɛlɔmbɛdi wakatɛmbaka Ɔshɛtɛ wakemala l’atei wa Jɔrdana polo lam’akashile kɛnɛ tshɛ kakadjangɛ Jehowa Jashua dia mbutɛ anto dia vɔ nsala lo yoho yɔtɔnɛ la kɛnɛ tshɛ kakadjangɛ Mɔsɛ Jashua. L’etena kɛsɔ tshɛ, anto wakatehɔka esadi esadi. 11 Kam’akashidiya anto tshɛ ntehɔ, Ɔshɛtɛ wa Jehowa ndo ɛlɔmbɛdi wakatehɔ lo washo w’anto.+ 12 Ndo aseka Rubɛna, aseka Ngada la k’ahende ɔtɔi ka dioho dia Manase wakatehɔ dia tolowanyema dikambo dia ta+ la ntondo k’ase Isariyɛlɛ akina, oko wakawatɛ+ Mɔsɛ. 13 Asɔlayi oko nunu akumi anɛi (40000) waki la dihomɔ dia ta wakatehɔ la ntondo ka Jehowa otsha lo laandja l’oswe wa Jeriko.

14 Lushi lɔsɔ, Jehowa akadiya Jashua lo washo w’ase Isariyɛlɛ tshɛ,+ ndo vɔ wakɔɔlɛnyaka* lo yɛdikɔ y’efula nshi tshɛ ya lɔsɛnɔ lande, oko wakawalɛnyaka Mɔsɛ+ lo yɛdikɔ y’efula.

15 Ko Jehowa akatɛ Jashua ate: 16 “Djangɛ ɛlɔmbɛdi watɛmbɛ ɔshɛtɛ w’Ɔmɛnyi+ dia vɔ ntomba oma lo Jɔrdana.” 17 Ko Jashua akadjangɛ ɛlɔmbɛdi ate: “Nyotombe oma lo Jɔrdana.” 18 Lam’akatombe ɛlɔmbɛdi wakayɛmbaka ɔshɛtɛ+ wa sheke wa Jehowa oma l’atei wa Jɔrdana ndo kam’akakitsha ɛlɔmbɛdi akaka awɔ lo nkɛtɛ y’ofumbo, ashi wa Jɔrdana wakakalola woho wakiwɔ ndo wakambɔmbɔ polo l’emamu,+ oko wakiwɔ ntondo.

19 Anto wakatombe oma lo Jɔrdana lo ngɔndɔ ka ntondo nshi 10, ko wakatohanga la Ngilingalɛ,+ lo olelo wa lo ɛstɛ ka Jeriko.

20 Lo dikambo di’ave 12 wakawɔshi oma lo Jɔrdana, Jashua akawaemɛ la Ngilingalɛ.+ 21 Oma laasɔ, nde akatɛ ase Isariyɛlɛ ate: “Lo nshi yayaye, lam’ayombola ananyu washɛwɔ vate: ‘Ave anɛ alembetshiyawɔ?’+ 22 Kanyolembetshiyake ananyu nyate: ‘Isariyɛlɛ akatehɔ Jɔrdana lo nkɛtɛ y’ofumbo+ 23 lam’akonya Jehowa Nzambi kanyu ashi wa Jɔrdana la ntondo kawɔ edja ndo wambotehɔ, oko wakasale Jehowa Nzambi kanyu lo Ndjale ka Beela etena kakandakionya la ntondo kaso polo ndo lam’akatakitehɔ.+ 24 Nde akasale dui sɔ dia anto tshɛ wa la nkɛtɛ mbeya wolo wele+ la lonya la Jehowa ndo dia nyu mbokaka Jehowa Nzambi kanyu wɔma nshi tshɛ.’”

5 Kam’akoke nkumi ya dikanga tshɛ y’ase Amɔra+ yaki lo owɛstɛ* wa Jɔrdana ndo nkumi ya dikanga tshɛ y’ase Kanana+ yaki l’omamu wa ndjale dia Jehowa amboonya ashi wa Jɔrdana la ntondo k’ase Isariyɛlɛ polo ndo vɔ ntehɔ, vɔ wakakɔmɔ etema*+ ndo wakashisha dihonga l’ɔtɛ w’ase Isariyɛlɛ.+

2 L’etena kɛsɔ, Jehowa akatɛ Jashua ate: “Sala tokuwa la ave wa silɛksɛ kele nya apami w’ase Isariyɛlɛ mpota nto,+ mbala ka 2.” 3 Ko Jashua akasale tokuwa la ave wa silɛksɛ, ko akanya apami w’ase Isariyɛlɛ mpota la Ngibeata-Haralɔtɛ.*+ 4 L’ɔtɛ w’ɔkɔkɔ ɔnɛ kakanya Jashua apami asɔ mpota: Apami tshɛ wakatombe oma l’Edjibito, apami tshɛ wakakokaka ndɔ ta* wakavu l’oswe wa shɛnga etena kakiwɔ lo lɔkɛndɔ l’ɔkɔngɔ wa vɔ ntomba oma l’Edjibito.+ 5 Wanɛ tshɛ wakatombe oma l’Edjibito wakanyɛma mpota, koko wanɛ tshɛ wakayotɔ l’oswe wa shɛnga etena kakiwɔ lo lɔkɛndɔ l’ɔkɔngɔ wa vɔ ntomba oma l’Edjibito kominyɛma mpota. 6 Ase Isariyɛlɛ wakande lɔkɛndɔ l’edja k’ɛnɔnyi 40+ l’oswe wa shɛnga polo lam’akavu wodja w’otondo, mbuta ate apami wakakokaka ndɔ ta wakatombe oma l’Edjibito waki kokitanyiya dui dia Jehowa.+ Jehowa akaatshibɛ dia nde hetawɔki pondjo dia vɔ mɛna wodja+ wakatshibɛ Jehowa watshɛwɔ dia tosha,+ wodja wakɛlanɛ abɛlɛ la osanga.+ 7 Ko nde akahɛnya anawɔ lo dihole diawɔ.+ Vɔ mbakanyɛma mpota oma le Jashua. Vɔ waki watanyɛma mpota nɛ dia vɔ kominyɛma mpota etena kakiwɔ lo lɔkɛndɔ.

8 Lam’akawashidiya minya wodja w’otondo mpota, vɔ wakatshikala lo dihole diakawahange polo lam’akakɔnɔ mpota.

9 Oma laasɔ, Jehowa akatɛ Jashua ate: “Ɛlɔ, dimi lambonya nsɔnyi k’ase Edjibito oma le nyu.” Ɔnkɔnɛ dihole sɔ mbelamɛka ɔnɛ Ngilingalɛ*+ polo ndo ɛlɔ.

10 Ase Isariyɛlɛ wakatetemala mpanga la Ngilingalɛ ndo vɔ wakasale fɛtɛ k’Elekanelo lo ngɔndɔ+ nshi 14 la dikɔlɔ lo laandja l’oswe wa Jeriko. 11 Ko wakatatɛ ndɛ diangɔ di’oma lo wodja akɔ lushi 1 l’ɔkɔngɔ wa fɛtɛ k’Elekanelo, mapa+ waha la wodoya ndo ntɔngɔ ya lofumba ko lushi lakɔ. 12 Ndo mana yakakomɛ la wedi a pindju lam’akawale diangɔ dimɔtshi di’oma lo wodja akɔ. Ase Isariyɛlɛ+ komonga la mana nto, vɔ wakatatɛ ndɛ diangɔ dia lo wodja wa Kanana ɔnɔnyi ɔsɔ.+

13 Lam’aki Jashua suke la Jeriko, nde akende la ntondo, ko akɛnyi pami kɛmɔtshi+ emadi la ntondo kande, okime lokuwa la ta lakandasɔmɔdi lo lonya lande.+ Jashua akasukana otsha le nde ko akawombola ate: “Onde wɛ ekɔ lo wedi aso, kana lo wedi w’andɔshi aso?” 14 Nde akate ate: “Keema, koko oko owandji w’alembe+ waki Jehowa koyemi.” Ko Jashua akayakɔsha ekukumadi ndo akakusama, ko akawotɛ ate: “Nkumɛmi alangande mbutɛ okambi ande?” 15 Owandji w’alembe waki Jehowa akakadimola Jashua ate: “Kolola sabata oma l’ekolo ayɛ, nɛ dia dihole diemadiyɛ diekɔ ekila.” Ko Jashua akasale ngasɔ.+

6 L’etena kɛsɔ Jeriko yakadihama ngwe l’ɔtɛ w’ase Isariyɛlɛ. Ndooko onto lakatombaka ndo ndooko onto lakɔtɔka.+

2 Ko Jehowa akatɛ Jashua ate: “Eenda, dimi lambokimɔ Jeriko ndo nkumekanga kayɔ la andɔshi ayɔ wa ta+ wa wolo l’anya ayɛ. 3 Nyu andɔshi wa ta tshɛ pombaka mbeteta l’otshimbedi w’osomba ndo ntshimba osomba mbala 1. Kɛsɔ mbayonyosala l’edja ka nshi 6. 4 Ɛlɔmbɛdi 7 wete la amama 7 wa nseke y’ɛkɔkɔ wa waomi la ntondo k’Ɔshɛtɛ. Koko lushi la 7, nyu pombaka ntshimba osomba mbala 7 ndo ɛlɔmbɛdi kawode amama.+ 5 Lam’ayodama amama, kam’ayonyoka wendjo w’amama, anto tshɛ kawode kioko ya ta ya wolo. Oma laasɔ, ehele ka lokombo l’osomba kayonyukɔ,+ kele anto kawɔtɔ lɔkɔ, onto l’onto nsembɔ otsha la ntondo.”

6 Ko Jashua ɔna Nuna akasanganya ɛlɔmbɛdi ndo akawatɛ ate: “Nyɛmbɛ ɔshɛtɛ wa sheke ndo ɛlɔmbɛdi 7 wete la amama 7 wa nseke y’ɛkɔkɔ wa waomi la ntondo k’Ɔshɛtɛ wa Jehowa.”+ 7 Oma laasɔ, nde akatɛ wodja ate: “Nyɛsɔ, nyotshimbe osomba ndo wanɛ wele la dihomɔ dia ta+ wete la ntondo k’Ɔshɛtɛ wa Jehowa.” 8 Oko wakatɛ Jashua wodja, ɛlɔmbɛdi 7 wakɔshi amama 7 wa nseke y’ɛkɔkɔ wa waomi ndo wakete la ntondo ka Jehowa, wakatshu otsha la ntondo ndo wakade amama, ko ɔshɛtɛ wa sheke wa Jehowa wakayawayelaka. 9 Ɛlɔmbɛdi wakatadaka amama, wanɛ waki la dihomɔ dia ta wakatatshɔka la ntondo kawɔ, ndo andɔshi wa ta wa l’ɔkɔngɔ wakayayelaka Ɔshɛtɛ etena kakatetemalaka amama mbidama.

10 Oma laasɔ, Jashua akadjangɛ wodja ate: “Tanyodake ekoko ndo aha awui anyu mbokɛma. Ndooko dui diahomba ntomba oma l’enyɔ anyu polo ndo lushi layomonyotɛ nte: ‘Nyode ekoko!’ Ko nyu mbida.” 11 Nde akasale dia Ɔshɛtɛ wa Jehowa mbeteta l’otshimbedi w’osomba ndo mbotshimba mbala 1. L’ɔkɔngɔ wa laasɔ, vɔ wakakalola lo mpango ko wakatolala lɛkɔ.

12 La wedi a pindju, Jashua aketɔ la yosose ndo ɛlɔmbɛdi wakɛmbɛ Ɔshɛtɛ+ wa Jehowa, 13 ndo ɛlɔmbɛdi 7 waki la amama 7 wa nseke y’ɛkɔkɔ wa waomi wakatatshɔka la ntondo k’Ɔshɛtɛ wa Jehowa ndo wakatetemalaka mbida amama. Wanɛ waki la dihomɔ dia ta wakatatshɔka la ntondo kawɔ ndo andɔshi wa ta wa l’ɔkɔngɔ wakayayelaka Ɔshɛtɛ wa Jehowa etena kakatetemalaka amama mbidama. 14 Vɔ wakatshimbe osomba mbala 1 lushi la 2. L’ɔkɔngɔ wa laasɔ, wakakalola lo mpango. Vɔ wakasale ngasɔ l’edja ka nshi 6.+

15 Lushi la 7, vɔ waketɔ la yosose kam’akahotɔ wonya ko wakatshimbe osomba woho akɔ waamɛ mbala 7. Paka lushi lɔsɔ loto mbakawatshimbe osomba mbala 7.+ 16 Mbala ka 7, ɛlɔmbɛdi wakade amama, ko Jashua akatɛ wodja ate: “Nyode ekoko,+ nɛ dia Jehowa ambonyosha osomba! 17 Osomba la kɛnɛ tshɛ kele lɔkɔ pombaka ndanyema.+ Vɔ tshɛ wekɔ waki Jehowa. Onyake Rahaba,+ womoto la numba kakoka ntshikala la lɔsɛnɔ nde la anto tshɛ wele la nde lo luudu, nɛ dia nde akashɛ akɛndji wakatatome.+ 18 Koko nyoyalame diaha mbɔsa kɛnɛ kahomba ndanyema,+ diaha nyu nkombola ɛngɔ kɛmɔtshi kahomba ndanyema ndo nyu ndjokiɔsa+ ko nyu ndjokonya mpango k’ase Isariyɛlɛ ɛngɔ kahomba ndanyema lo mbela mpokoso lɔkɔ.+ 19 Koko mfɛsa tshɛ ndo paonyi tshɛ la diangɔ tshɛ dia nkonga ndo dia mbolo diekɔ ekila le Jehowa.+ Diɔ pombaka tɔlama lo eombelo ka Jehowa.”+

20 Oma laasɔ, anto wakade ekoko lam’akadama amama.+ Kam’akoke anto wendjo w’amama ndo lam’akawade kioko ya ta ya wolo, ehele ka lokombo kakanyukɔ.+ L’ɔkɔngɔ wa laasɔ, anto wakɔtɔ l’osomba, onto l’onto nsembɔ otsha la ntondo, ko vɔ wakɔshi osomba. 21 Vɔ wakalanya kɛnɛ tshɛ kaki l’osomba la lokuwa la ta: Apami la wamato, akɛnda la esombe, ngɔmbɛ, ɛkɔkɔ ndo mponda.+

22 Jashua akatɛ apami 2 wakatokemba wodja ate: “Nyɔtɔ lo luudu la womoto la numba kele nyotondja womoto akɔ ndo wanɛ tshɛ wele kaamɛ la nde, oko wakanyootshibɛ.”+ 23 Ko ɛlɔngɔlɔngɔ wakatokemba wodja wakɔtɔ ndo wakatondja Rahaba kaamɛ la she, nyango, anango ndo wanɛ tshɛ waki kaamɛ la nde. Vɔ mɛtɛ wakatondja nkumbo kande k’otondo,+ ko wakaatondja vɔ tshɛ ki otsha lo dihole dimɔtshi l’andja wa mpango k’Isariyɛlɛ.

24 Oma laasɔ, vɔ wakatshumbe osomba la diangɔ tshɛ diaki lɔkɔ la dja. Koko vɔ wakatɔlɛ mfɛsa, paonyi ndo diangɔ dia nkonga la dia mbolo lo eombelo ka lo luudu la Jehowa.+ 25 Paka Rahaba, womoto la numba nde la nkumbo ka she la wanɛ tshɛ waki kaamɛ la nde mbele Jashua+ kondanya. Nde mbidjasɛ lo Isariyɛlɛ polo ndo ɛlɔ,+ nɛ dia nde akashɛ akɛndji wakatome Jashua dia tokemba Jeriko.+

26 L’etena kɛsɔ, Jashua akatshibe* ate: “Mananu kayale la ntondo ka Jehowa le onto layoyanga dia mbika osomba ɔnɛ wa Jeriko nto. Ɔnande l’enondo ayovɔ lam’ayondotatɛ mbika etshina kawɔ ndo ɔnande la kose ayovɔ lam’ayondosala nkuke yawɔ.”+

27 Ɔnkɔnɛ, Jehowa aki kaamɛ la Jashua+ ndo lokumu lande lakadiangana lo nkɛtɛ+ k’otondo.

7 Koko ase Isariyɛlɛ komonga la kɔlamelo lo dikambo dia kɛnɛ kakahombe ndanyema, nɛ dia Akana+ ɔna Karami, ɔna Zabidi, ɔna Zera ka lo dioho dia Juda akɔshi diangɔ dimɔtshi l’atei wa kɛnɛ kakahombe ndanyema.+ Diakɔ diele nkɛlɛ ka Jehowa kadɔdɔ kakaye le ase Isariyɛlɛ.+

2 Oma laasɔ, Jashua akatome apami oma la Jeriko otsha la Ai+ wosukanyi la Bɛtɛ-Avɛna lo ɛstɛ ka Bɛtɛlɛ,+ awatɛ ate: “Nyotshu nyotokembe wodja.” Ko apami akɔ wakatshu ndo wakatokemba Ai. 3 Lam’akawakalola le Jashua, vɔ wakawotɛ vate: “Aha anto tshɛ mbahomba ntshɔ. Anto oko nunu pende (2 000) kana nunu sato (3 000) wayokoka nɛndja Ai. Tɛnyake anto tshɛ paa lo mbatoma, nɛ dia vɔ wekɔ yema tshitshɛ tsho.”

4 Ko apami oko nunu sato (3 000) wakatshu lɛkɔ, koko vɔ wakatolawɔ apami w’ase Ai.+ 5 Ase Ai wakadiake apami 36 ko wakayelana la wɔ oma l’asoko w’osomba polo la Shebarima ndo wakatetemala mbadiaka l’oholola. Ɔnkɔnɛ dihonga* di’anto diakalɛlɔ ndo diakakɛlɛ oko ashi.

6 Ko Jashua akaatshatsha ahɔndɔ ande ndo akayakɔsha ekukumadi la ntondo k’Ɔshɛtɛ wa Jehowa polo la dikɔlɔ, nde la dikumanyi dia lo Isariyɛlɛ ndo wakayatɛka ditshu l’ɛtɛ awɔ. 7 Jashua akate ate: “Hayii, Nkum’Olongo Nkumadiɔndjɔ Jehowa! Lande na kakayetawɔ dia anto anɛ tshɛ ntehɔ Jɔrdana paka dia ndjotokimɔ l’anya w’ase Amɔra dia vɔ todiaka? Ototɔngɛnangɛna kaanga ntshikala lo wedi okina* wa Jɔrdana lee! 8 Jehowa le, okimwe. Akokami mbuta wonya ɔnɛ wele Isariyɛlɛ ambolawɔ* oma la ntondo k’atunyi ande? 9 Lam’ayoka ase Kanana ndo anto tshɛ wodjashi lo wodja ɔnɛ dikambo sɔ, vɔ wayotodinga ndo wayonya lokombo laso oma la nkɛtɛ. Ko ayoyosala dikambo dia lokombo layɛ la woke?”+

10 Jehowa akakadimola Jashua ate: “Emala! Lande na ketamiyɛ ekukumadi? 11 Ase Isariyɛlɛ wambosala pɛkato. Vɔ wambɔnyɔla sheke+ yakamawadjangɛ dia vɔ nama. Vɔ wakɔshi diangɔ dimɔtshi oma lo diangɔ diakahombe ndanyema,+ wakadive+ ndo wakadishɛ l’atei wa diangɔ diawɔ hita.+ 12 Ɔnkɔnɛ, ase Isariyɛlɛ hawotonga la akoka wa nshika ekolo la ntondo k’atunyi awɔ. Vɔ wayokadimɔ ndo wayolawɔ atunyi awɔ, nɛ dia vɔ waya ɛngɔ kahomba ndanyema. Dimi hantonga kaamɛ la nyu nto paka naka nyambolanya kɛnɛ kahomba ndanyema+ kele l’atei anyu. 13 Emala ndo kidia anto!+ Tɛwɔ wate: ‘Kanyoyakidia dia loyi, nɛ dia Jehowa Nzambi k’Isariyɛlɛ kata ate: “Isariyɛlɛ le, kɛnɛ kahomba ndanyema kekɔ l’atei anyu. Hanyotokoka nshika ekolo la ntondo k’atunyi anyu polo lam’ayonyonya kɛnɛ kahomba ndanyema oma l’atei anyu. 14 La pindju, kanyemale lo ndjela dioho la dioho, ko dioho diayɔsɔna+ Jehowa diayosukana, nkumbo la nkumbo, ko nkumbo kayɔsɔna Jehowa kayosukana, luudu la luudu ko luudu layɔsɔna Jehowa layosukana, onto l’onto. 15 Onto layotanema diangɔ diahomba ndanyema le nde ayotshumbama lo dja+ nde la kɛnɛ tshɛ kele la nde, nɛ dia nde ambɔnyɔla sheke+ ya Jehowa ndo nɛ dia nde ambosala dui dia nsɔnyi lo Isariyɛlɛ.”’”

16 Ko la wedi a pindju, Jashua aketɔ la yosose ndo ase Isariyɛlɛ wakasukana lo ndjela dioho la dioho, ko dioho dia Juda diakasɔnama. 17 Nde akasukanya nkumbo ya Juda, ko nkumbo k’aseka Zera+ kakasɔnama. L’ɔkɔngɔ diko, nde akasukanya nkumbo k’aseka Zera l’onto ndo l’onto, ko Zabidi akasɔnama. 18 L’ekomelo nde akasukanya ase luudu la Zabidi l’onto ndo l’onto, ko Akana ɔna Karami, ɔna Zabidi, ɔna Zera ka lo dioho dia Juda akasɔnama.+ 19 Ko Jashua akatɛ Akana ate: “Ɔnami, lam’alangayɛ, sha Jehowa Nzambi k’Isariyɛlɛ kɛnɛmɔ ndo sholɛnde kɛnɛ kakayasale. Lam’alangayɛ, ombute kɛnɛ kakayasale. Tombishɛke.”

20 Akana akakadimola Jashua ate: “Lo mɛtɛ, dimi lakasalɛ Jehowa Nzambi k’Isariyɛlɛ pɛkato ndo kɛnɛ kakamasale tɔ kɛnɛ: 21 Lam’akamɛnyi dihɔndɔ dia dimɛna dia lowandji di’oma la Shinara+ l’atei wa diangɔ dia dimbo ndo tɔshɛkɛlɛ* 200 ta mfɛsa kaamɛ la etenyi ka paonyi kele la wotsho wa tɔshɛkɛlɛ 50, dimi lakakombola diangɔ sɔ ko lakadiɔshi. Diɔ kundɛma l’etei ka luudu lami la dipɛma la falanga l’ɛse.”

22 Mbala kakɔ ɔtɔi, Jashua akatome akɛndji ko vɔ wakalawɔ otsha lo luudu la dipɛma ko wakatotana dihɔndɔ diakɔ diokundɛmi lo luudu lande la dipɛma ndo falanga l’ɛse kadiɔ. 23 Ko vɔ wakɔshi diangɔ sɔ oma lo luudu la dipɛma ndo wakaditɔlɛ le Jashua nde la ase Isariyɛlɛ tshɛ, ko wakadikitsha la ntondo ka Jehowa. 24 Ko Jashua ndo ase Isariyɛlɛ tshɛ kaamɛ la nde wakɔshi Akana+ ɔna Zera, mfɛsa, dihɔndɔ dia lowandji, etenyi ka paonyi+ kaamɛ la anande w’apami, anande wa wamato, ngɔmbɛ yande, mponda yande, ɛkɔkɔ ande, luudu lande la dipɛma ndo ɛngɔ kande tshɛ, ko vɔ wakatshu la wɔ l’Okidi* wa Akɔra.+ 25 Jashua akate ate: “Lande na kamboyotela mpokoso?+ Lushi l’ɛlɔ, Jehowa ayokela mpokoso.” Ko ase Isariyɛlɛ tshɛ wakawoke ave,+ l’ɔkɔngɔ diko wakaatshumbe lo dja.+ Ngasɔ mbakawawaoke ave vɔ tshɛ. 26 Ko vɔ wakemɛ tota di’ave laadiko diande diekekɔ polo ndo ɛlɔ. Ko nkɛlɛ ka Jehowa kakakitakita.+ Diakɔ dielamɛ dihole sɔ ɔnɛ Okidi w’Akɔra polo ndo ɛlɔ.

8 Oma laasɔ, Jehowa akatɛ Jashua ate: “Tokake wɔma ndo tatɛke asolo.+ Ɔsa andɔshi wa ta tshɛ kele nyotshu nyotɔlɔsha Ai. Eenda, dimi lambokimɔ nkumekanga ka Ai, anto ande, osomba ande ndo wodja ande lo anya ayɛ.+ 2 Salɛ Ai la nkumekanga kawɔ oko wakayasalɛ Jeriko la nkumekanga kayɔ,+ koko nyu mbeyaka mbɔsa diangɔ dia dimbo la dongalonga dia lɔkɔ dikambo dianyu. Anto amɔtshi watoholame l’ɔkɔngɔ w’osomba.”

3 Ko Jashua la andɔshi wa ta tshɛ wakatshu dia tɔlɔsha Ai. Jashua akasɔnɛ andɔshi wa ta wa wolo nunu akumi asato (30 000), ko nde akaatome l’otsho. 4 Nde akawadjangɛ ate: “Nyohokame, nyotoholame l’ɔkɔngɔ w’osomba. Tanyanganake etale efula la osomba ndo nyu tshɛ kanyonge suke. 5 Dimi l’anto tshɛ wele kaamɛ la mi tayosukana la osomba ndo lam’ayowotomba dia ndjotɔlɔsha oko mbala ka ntondo,+ sho tayowalawɔ. 6 Lam’ayowototshanya, tayowakotola etale mangana la osomba, nɛ dia vɔ wayota vate: ‘Vɔ wambotolawɔ woho wakawalawɔ ntondo.’+ Ko sho tayowalawɔ. 7 Oma laasɔ, kanyotombe oma lɛnɛ ayonyoholama kele kanyɔshi osomba. Jehowa Nzambi kanyu ayowokimɔ lo anya anyu. 8 Kam’ayonyɔsa osomba, kanyootshumbe la dja.+ Kanyosale oko wakate Jehowa. Nyolonge, kɛsɔ kamomonyodjangɛ.”

9 Ko Jashua akaakɛndja ko vɔ wakatshu otsha lo dihole diakawahombe toholama. Vɔ wakatemala lam’asa Bɛtɛlɛ la Ai, lo owɛstɛ wa Ai, koko l’otsho ɔsɔ Jashua aki kaamɛ la wodja.

10 L’ɔkɔngɔ wa laasɔ, Jashua aketɔ la pindju ka pɛɛ ko akasanganya andɔshi wa ta, ko nde la dikumanyi dia l’Isariyɛlɛ wakaalɔmbɔla otsha la Ai. 11 Andɔshi wa ta tshɛ+ waki kaamɛ la nde wakatshu ndo wakasukana mbɛlanɛ la osomba. Vɔ wakake mpango lo nɔrdɛ ka Ai ndo okidi waki lam’asawɔ la Ai. 12 L’etena kɛsɔ, nde akɔshi apami oko nunu tanu (5 000) ko akaatome dia vɔ toholama+ lam’asa Bɛtɛlɛ+ la Ai, lo owɛstɛ k’osomba. 13 Vɔ wakake mpango kawɔ kakaleke woke lo nɔrdɛ k’osomba+ ndo andɔshi wa ta wa l’ɔkɔngɔ waki lo owɛstɛ k’osomba,+ ko Jashua akatshu l’otsho akɔ otsha l’atei w’okidi.*

14 Kam’akɛnyi nkumekanga ka Ai dui sɔ, nde l’apami wa l’osomba wakatombe esadi esadi la pindju ka pɛɛ dia ndjohomana l’ase Isariyɛlɛ dia mbalɔsha lo dihole dimɔtshi diɛlane la laandja l’oswe. Koko nde kombeya dia amɔtshi wakaholami l’ɔkɔngɔ w’osomba. 15 Lam’akaalɔsha apami w’ase Ai, Jashua l’ase Isariyɛlɛ tshɛ wakalawɔ lo mboka k’otsha l’oswe.+ 16 Ko wakelɛ anto tshɛ waki lo osomba dia mbatshanya. Lam’akawatatshanyaka Jashua, vɔ wakatanganaka etale la osomba. 17 Ndooko kaanga pami 1 kakatshikala la Ai ndo la Bɛtɛlɛ kaki kontshɔ dia totshanya ase Isariyɛlɛ. Vɔ wakatshike osomba hwe ko wakatshanya ase Isariyɛlɛ.

18 Ko Jehowa akatɛ Jashua ate: “Tshuma dikɔnga diele lo lonya layɛ otsha la Ai,+ nɛ dia dimi layanga mbokimɔ lo anya ayɛ.”+ Ko Jashua akatshume dikɔnga diaki lo lonya lande otsha l’osomba. 19 Lam’akandasembola lonya lande, wanɛ wakaholama wakatombe esadi oma lo dihole diakiwɔ ko wakalawɔ otsha l’osomba ndo wakawɔshi. Aha la ntshimbatshimba, vɔ wakatshumbe osomba akɔ la dja.+

20 Lam’akɛwɔ ase Ai, vɔ wakɛnyi edinga w’osomba wadɛ otsha l’olongo, ko vɔ komonga nto la wolo wa ndawɔ otsha lo dihole dimɔtshi. Ko anto wakatalawɔka otsha l’oswe wakakadimwɛ wanɛ wakayawatshanyaka. 21 Lam’akɛnyi Jashua nde l’ase Isariyɛlɛ tshɛ dia wanɛ wakaholami wambɔsa osomba ndo lam’akawɛnyi edinga w’osomba wadɛ, vɔ wakakadimɔ ko wakalɔsha apami w’ase Ai. 22 Ko akina wakatombe oma l’osomba dia ndjohomana la wɔ ko apami w’ase Ai wakandama lo djonga l’atei atei, ase Isariyɛlɛ amɔtshi lo wedi ɔnɛ ndo akina lo wedi okina. Vɔ wakaadiake polo ndo ndooko lakatshikala la lɔsɛnɔ ndo ndooko lakahandɔ.+ 23 Vɔ wakande nkumekanga ka Ai+ la lɔsɛnɔ ko wakɔɔtɔlɛ le Jashua.

24 L’ɔkɔngɔ w’ase Isariyɛlɛ nshidiya la ndjaka ase Ai tshɛ l’oswe, oswe wakawatawatshanyaka ndo l’ɔkɔngɔ w’onto awɔ l’ekomelo ndjakema la lokuwa la ta, ase Isariyɛlɛ tshɛ wakakadimɔ otsha la Ai ko wakoolanya la lokuwa la ta. 25 Wanɛ tshɛ wakavu lushi lɔsɔ, ndo apami ndo wamato waki tshɛ tshɛ anto nunu dikumi la pende (12000), vɔ tshɛ ase Ai. 26 Jashua kominɛ lonya lande lakandasembola dia ntshuma dikɔnga+ polo ndo lam’akandalanya+ ase Ai tshɛ. 27 Koko ase Isariyɛlɛ wakɔshi dongalonga la diangɔ dia dimbo dia l’osomba akɔ dikambo diawɔ lo ndjela didjango diakasha Jehowa Jashua.+

28 Oma laasɔ, Jashua akatshumbe Ai ndo akakietɛ tota dia elanyelo ka pondjo,+ oko wetɔ polo ndo ɛlɔ. 29 Nde akahanɛ nkumekanga ka Ai lo otamba* polo la dikɔlɔ ndo lam’aki wonya suke la mbidja, Jashua akadjanga dia vɔ mpoloya odo ande oma lo otamba.+ Ko vɔ wakawokasha la soko dia osomba ndo wakemɛ tota dia woke di’ave laadiko diande, oko wediɔ polo ndo ɛlɔ.

30 L’etena kɛsɔ, Jashua akasalɛ Jehowa Nzambi k’Isariyɛlɛ elambwelo lo Dikona dia Ebala,+ 31 oko wakadjangɛ Mɔsɛ, okambi wa Jehowa ase Isariyɛlɛ ndo oko wofundamidiɔ lo dibuku di’Ɛlɛmbɛ+ wa Mɔsɛ ɔnɛ: “Elambwelo ka l’ave w’etondo wahawakɔlɔngi la ehomɔ ka lowolo.”+ Lɔkɔ mbakawalambolaka Jehowa elambo wa lotshumba ndo elambo w’osanga.+

32 Oma laasɔ, nde akasangola Ɛlɛmbɛ+ wakafunde Mɔsɛ lo ave akɔ la ntondo k’ase Isariyɛlɛ.+ 33 Ase Isariyɛlɛ tshɛ, dikumanyi diawɔ, topita ndo toshushi wakemala lo wedi akɔ 2 w’Ɔshɛtɛ la ntondo k’ɛlɔmbɛdi w’ase Lɛwi wakatɛmbaka ɔshɛtɛ wa sheke wa Jehowa. Angɛndangɛnda ndo akanga wa ngelo+ waki laawɔ. K’ahende ɔtɔi ka l’atei awɔ wakemala mbɛlanɛ la Dikona dia Ngɛrizimɛ ndo k’ahende ɔtɔi kekina mbɛlanɛ la Dikona dia Ebala+ (oko wakatadjangi+ Mɔsɛ okambi wa Jehowa ntondo), dia ntshɔkɔla ase Isariyɛlɛ. 34 L’ɔkɔngɔ wa laasɔ, nde akadia la dui dia wolo awui tshɛ w’Ɛlɛmbɛ,+ ɛtshɔkɔ+ ndo mananu+ lo ndjela kɛnɛ tshɛ kofundami lo dibuku di’Ɛlɛmbɛ. 35 Ndooko dui 1 lo kɛnɛ tshɛ kakadjanga Mɔsɛ diaki Jashua kombadia la dui dia wolo la ntondo k’etshumanelo k’otondo k’ase Isariyɛlɛ,+ mbidja ndo wamato la ana ndo angɛndangɛnda+ waki l’atei awɔ.+

9 Lam’akoke nkumi ya dikanga tshɛ yaki lo owɛstɛ wa Jɔrdana,+ wanɛ waki lo lɛkɛ l’akona, la Shɛfɛla, l’omamu w’otondo wa Ndjale ka woke*+ ndo wanɛ wakɛlanɛ la Lɛbanɔna, ase Hiti, ase Amɔra, ase Kanana, ase Perizi, ase Hivi ndo ase Jɛbusɛ+ kɛnɛ kakatombe, 2 vɔ wakadje sheke dia ndɔsha Jashua nde l’ase Isariyɛlɛ.+

3 Ase Ngibiyɔna+ vɔ lawɔ wakoke kɛnɛ kakasalɛ Jashua Jeriko+ ndo Ai.+ 4 Ɔnkɔnɛ, vɔ wakasale akambo la mayɛlɛ ndo wakadje mpamba lo atapa w’emusu, ko wakahɛ laadiko dia mponda yawɔ, kaamɛ ndo atapa wa wanu wa dikoho dia nyama w’emusu ndo wakawalɔngɔsɔla. 5 Ndo nto, vɔ wakalɔtɛ sabata y’emusu ndo yambolana lo ekolo awɔ, ndo wakalɔtɛ ahɔndɔ w’emusu. Mapa tshɛ wakawɔshi oko mpamba waki mapa wamboma to ndo waya efushi eto. 6 Ko vɔ wakatshu otsha le Jashua lo mpango ka la Ngilingalɛ+ ko wakatowotɛ nde l’ase Isariyɛlɛ vate: “Sho tamboya oma lo wodja w’etale. Ɔnkɔnɛ lam’alanganyu, nyetawɔ dia mbidja la so sheke.” 7 Koko ase Isariyɛlɛ wakatɛ ase Hivi+ vate: “Ondo nyu mbidjasɛ suke la so lanɛ. Ngande watotokoka mbidja la nyu sheke?”+ 8 Vɔ wakakadimola Jashua vate: “Sho tekɔ ekambi* ayɛ.”

Ko Jashua akawatɛ ate: “Waa na wenyu ndo oma lende oyenyu?” 9 Ko vɔ wakawotɛ vate: “Ekambi ayɛ woye oma lo wodja+ w’etale efula l’ɔtɛ wa lokombo la Jehowa Nzambi kayɛ, nɛ dia takoke lokumu lande ndo kɛnɛ tshɛ kakandasale l’Edjibito+ 10 la kɛnɛ tshɛ kakandasalɛ nkumi ya dikanga 2 y’ase Amɔra yaki lo wedi okina* wa Jɔrdana, Sihɔna+ nkumekanga ka Hɛshibɔna ndo Onga+ nkumekanga ka Bashana, kaki la Ashitarɔta. 11 Ɔnkɔnɛ, dikumanyi diaso ndo ase wodja aso tshɛ wakatotɛ vate: ‘Nyɔshi mpamba ya lɔkɛndɔ kele nyotshu nyotosawole la wɔ. Nyotowate nyate: “Tayonga ekambi anyu.+ Ɔnkɔnɛ lam’alanganyu, nyetawɔ mbidja la so sheke.”’+ 12 Lushi lakatonɛɛ oma lo mvudu yaso dia ndja lanɛ le yɛ, mapa ɛnɛ takawaɔshi oma la dja dia ndjalɛka lo mboka. Ko ohenda wonya ɔnɛ woho wambowomanɛ to ndo waya efushi eto.+ 13 Ndo atapa wa dikoho dia nyama anɛ waki eyoyo etena kakatalodia wanu lɔkɔ, koko wonya ɔnɛ waya emusu+ eto. Kaanga ahɔndɔ aso la sabata yaso yaya emusu eto l’ɔtɛ wa lɔkɛndɔ l’otale.”

14 Ko apami w’ase Isariyɛlɛ wakɔshi* yema ya diangɔ diakɔ, koko vɔ komimbola Jehowa+ kanyi. 15 Ɔnkɔnɛ Jashua akadje ki la wɔ+ ndo akadje la wɔ sheke dia mbatshika la lɔsɛnɔ, ndo kɛsɔ mbakaatshibɛ+ ewandji w’olui w’anto.

16 L’ekomelo ka nshi 3, l’ɔkɔngɔ wa vɔ mbidja la wɔ sheke, wakayokaka dia vɔ mbidjasɛ ka suke, hawanganyi la wɔ etale. 17 Oma laasɔ, ase Isariyɛlɛ wakatshu ko wakatokoma lo esomba awɔ lushi la 3. Nkombo y’esomba awɔ yɔ nyɛ: Ngibiyɔna,+ Kɛfira, Berɔtɛ ndo Kiriatɛ-Jarima.+ 18 Koko ase Isariyɛlɛ kombalɔsha, nɛ dia ewandji w’olui w’anto wakaatshibɛ lo lokombo la Jehowa+ Nzambi k’Isariyɛlɛ. Ɔnkɔnɛ, olui w’otondo wakatatɛ ngunɛngunɛ ewandji. 19 Ko ewandji tshɛ wakatɛ olui w’otondo vate: Lam’ele takaatshibɛ lo lokombo la Jehowa Nzambi k’Isariyɛlɛ, sho bu la lotshungɔ la mbasalɛ kɔlɔ. 20 Tayosala nganɛ: Tayowatshika la lɔsɛnɔ diaha Nzambi ndjotomalɛ l’ɔtɛ wa etshibelo kakataatshibɛ.”+ 21 Ewandji wakakotsha vate: “Taatshike la lɔsɛnɔ, koko vɔ wayonga amunyi wa nkunyi ndo atahodi w’ashi dikambo di’olui w’otondo.” Kɛsɔ mbakaalake ewandji.

22 Oma laasɔ, Jashua akawaelɛ ko akawambola ate: “Lande na kakanyatokese lo totɛ ɔnɛ: ‘Oma lo dihole di’etale efula mangana la nyu mbayataye,’ ko tete le k’atei aso+ mbodjashinyu? 23 Oma ko kakianɛ, nyu nyambodjama mananu.+ Nyayongaka nshi tshɛ ɛhɔmbɔ, amunyi wa nkunyi ndo atahodi w’ashi dikambo dia luudu la Nzambi kami.” 24 Vɔ wakakadimola Jashua vate: “Nɛ dia ekambi ayɛ wakoke dimɛna dimɛna dia Jehowa Nzambi kayɛ akadjangɛ okambi ande Mɔsɛ dia nyosha wodja w’otondo ndo dia nshila anto tshɛ wodjashi lɔkɔ oshiki oma la ntondo kanyu.+ Ɔnkɔnɛ, takoke wɔma dia nyayoyotodiaka,+ diakɔ diakatasale ngango.+ 25 Wonya ɔnɛ sho tekɔ lo anya ayɛ. Otosale kɛnɛ tshɛ kalangayɛ ndo kɛnayɛ dimɛna.” 26 Ko nde akasale ngasɔ. Nde akawashimbɛ oma lo anya w’ase Isariyɛlɛ ndo vɔ kombadiaka. 27 Koko lushi lɔsɔ, Jashua akawaetɛ amunyi wa nkunyi ndo atahodi w’ashi dikambo di’olui+ ndo dikambo dia elambwelo ka Jehowa lo dihole diakandahombe nsɔna,+ ko vɔ wakatshikala ngasɔ polo ndo ɛlɔ.+

10 Kam’akoke Adɔni-Zɛdɛkɛ nkumekanga ka Jɛrusalɛma dia Jashua ambɔsa Ai ndo ambokilanya, ambosalɛ Ai la nkumekanga katɔ+ woho wakandasalɛ Jeriko la nkumekanga kayɔ,+ ndo woho wakadje ase Ngibiyɔna wɔladi vɔ l’ase Isariyɛlɛ,+ ko wambotshikala l’atei awɔ, 2 nde akayakiyanya+ efula, nɛ dia Ngibiyɔna aki osomba wa woke oko osomba ɔmɔtshi wa nkumekanga. Vɔ wakaleke Ai+ woke ndo apami wa lɛkɔ tshɛ waki andɔshi wa ta. 3 Ɔnkɔnɛ, Adɔni-Zɛdɛkɛ nkumekanga ka Jɛrusalɛma akatome dui le Hɔhamɛ nkumekanga ka Hɛbɛrɔna,+ Pirama nkumekanga ka Jaramuta, Jafia nkumekanga ka Lakishi ndo Debirɛ nkumekanga ka Ɛngɛlɔna+ ate: 4 “Nyoyonkimanyiya kele tɔlɔsha ase Ngibiyɔna, nɛ dia vɔ wambodja wɔladi vɔ la Jashua l’ase Isariyɛlɛ.”+ 5 Ko nkumi ya dikanga 5 y’ase Amɔra,+ mbuta ate nkumekanga ka Jɛrusalɛma, nkumekanga ka Hɛbɛrɔna, nkumekanga ka Jaramuta, nkumekanga ka Lakishi ndo nkumekanga ka Ɛngɛlɔna wakasangana kaamɛ la asɔlayi awɔ ko wakatshu, ko wakatoka mpango kawɔ suke la Ngibiyɔna dia kilɔsha.

6 Ko ase Ngibiyɔna wakatomɛ Jashua dui lo mpango ka la Ngilingalɛ+ vate: “Tonyake mfumbe+ yayɛ yimba. Yaka yema esadi! Yototsha ndo yotokimanyiya! Nkumi ya dikanga tshɛ y’ase Amɔra y’oma lo lɛkɛ l’akona wambosangana dia tɔlɔsha.” 7 Ko Jashua akonɛɛ oma la Ngilingalɛ nde l’apami tshɛ w’andɔshi wa ta ndo andɔshi wa ta+ wa wolo.

8 Ko Jehowa akatɛ Jashua ate: “Towaokake wɔma,+ nɛ dia dimi lambaakimɔ lo anya ayɛ.+ Ndooko kaanga onto 1 l’atei awɔ layokoka nshika ekolo la ntondo kayɛ.”+ 9 Jashua akawaɔtwɛ la shashimoya l’ɔkɔngɔ wa nkɛndakɛnda otsho w’otondo oma la Ngilingalɛ. 10 Jehowa akawadje lo lofunge la ntondo k’ase Isariyɛlɛ,+ ko vɔ wakaadiake efula la Ngibiyɔna ndo wakawatshanya lo mboka kadɛ otsha la Bɛtɛ-Hɔrɔna ndo wakaadiake polo la Azeka ndo la Makeda. 11 Etena kakawatalawɔka ase Isariyɛlɛ ndo lam’akawataholɔka oma la Bɛtɛ-Hɔrɔna, Jehowa akaakɔshɛ ave wa mbɔkɔ ya mvula oma l’olongo polo la Azeka, ko vɔ wakavu. Lo mɛtɛ, wanɛ wakadiakema la ave wakaleke wanɛ wakadiakema la lokuwa la ta oma le ase Isariyɛlɛ efula.

12 L’etena kɛsɔ, lushi lakatshanya Jehowa ase Amɔra oma la ntondo k’ase Isariyɛlɛ mbakatɛ Jashua Jehowa la ntondo k’ase Isariyɛlɛ ate:

13 Ko wonya wakemala ndo ngɔndɔ kɔkɛndakɛnda polo ndo wodja wambɔsɔmbɔya atunyi awɔ. Shi dui sɔ fundama lo dibuku dia Jashara?*+ Wonya wakemala l’atei w’olongo ndo vɔ kosamanya dia mbidja l’edja ka suke la lushi l’otondo. 14 Lushi lele oko lɔsɔ lakahokamɛ Jehowa dui di’onto+ latongaka oyadi la ntondo kana l’ɔkɔngɔ alɔ, nɛ dia Jehowa akalwɛka ase Isariyɛlɛ+ ta.

15 L’ɔkɔngɔ wa laasɔ, Jashua nde l’ase Isariyɛlɛ tshɛ wakakalola lo mpango ka la Ngilingalɛ.+

16 L’etena kɛsɔ, nkumi ya dikanga 5 shɔ wakalawɔ ndo wakatoyashɛ lo wooko ɔmɔtshi wa la Makeda.+ 17 Oma laasɔ, wakayotɛ Jashua vate: “Wambototana nkumi ya dikanga 5 woyashe lo wooko wa la Makeda.”+ 18 Ko Jashua akate ate: “Nyotongitole ave wa weke kele nyotodihe soko dia wooko akɔ ndo nyokitsha apami dia vɔ mbalamaka. 19 Koko nyu akina tshɛ tanyemalake. Nyotshanya atunyi anyu ndo nyaalɔsha oma l’ɔkɔngɔ.+ Tanyaatshikake dia vɔ mbɔtɔ lo esomba awɔ, nɛ dia Jehowa Nzambi kanyu ambaakimɔ lo anya anyu.”

20 L’ɔkɔngɔ wa Jashua nde l’ase Isariyɛlɛ nshidiya mbadiaka lo yɛdikɔ y’efula polo ndo lo mbashila oshiki, onyake anto angana wakahandɔ lo woho wakawalawɔ ndo wakawɔtɔ lo esomba wodingami la mpele, 21 anto tshɛ wakakalola alemba ki le Jashua lo mpango ka la Makeda. Ndooko onto lakasombɔ mfɛtɔla* dikambo di’ase Isariyɛlɛ. 22 Ko Jashua akate ate: “Nyotodihole soko dia wooko ndo nyototondja nkumi ya dikanga yakɔ 5 oma lo wooko kele nyombelawɔ.” 23 Ɔnkɔnɛ, vɔ wakatotondja ndo wakawela nkumi ya dikanga yakɔ 5 nyɛ yaki lo wooko: Nkumekanga ka Jɛrusalɛma, nkumekanga ka Hɛbɛrɔna, nkumekanga ka Jaramuta, nkumekanga ka Lakishi ndo nkumekanga ka Ɛngɛlɔna.+ 24 Lam’akawatɔlɛ nkumi ya dikanga shɔ le Jashua, nde akelɛ apami tshɛ wa l’Isariyɛlɛ ko akatɛ kɔmanda y’apami w’andɔshi wa ta wakatshu kaamɛ la nde ate: “Nyosukane. Nyahɛ ekolo anyu lo nkingo ya nkumi ya dikanga nyɛ oma la nkɔtshi.” Ko vɔ wakasukana ndo wakahɛ ekolo awɔ lo nkingo yawɔ oma la nkɔtshi.+ 25 Oma laasɔ, Jashua akawatɛ ate: “Tanyokake wɔma ndo tanyatɛke asolo.+ Nyonge la dihonga ndo nyokeketale, nɛ dia nganɛ mbayanga salɛ Jehowa atunyi anyu tshɛ wayanganyu ndɔsha.”+

26 Ko Jashua akaakɔmɔla, akaadiake ndo akaahanɛ lo etamba* 5, ko vɔ wakatshikala lo etamba akɔ polo la dikɔlɔ. 27 Lam’aki wonya suke la mbidja, Jashua akadjanga dia vɔ mbaholoya oma lo etamba+ ndo mbakasha lo wooko lɛnɛ akawayashɛ. Oma laasɔ, wakadihe ave wa weke la soko dia wooko ndo vɔ wekɔ laawɔ polo ndo ɛlɔ.

28 Jashua akɔshi Makeda+ lushi lɔsɔ ndo akadiake anto wa lɔkɔ la lokuwa la ta. Nde akalanya nkumekanga kawɔ ndo anto* tshɛ wa lɔkɔ, aha la ntshika ndooko onto la lɔsɛnɔ.+ Nde akasalɛ nkumekanga ka Makeda+ woho wakandasalɛ nkumekanga ka Jeriko.

29 Oma laasɔ, Jashua nde l’ase Isariyɛlɛ tshɛ wakonɛɛ oma la Makeda otsha la Libina ndo wakatɔlɔsha Libina.+ 30 Jehowa akakimɔ Libina ndo nkumekanga kalɔ+ lo anya w’ase Isariyɛlɛ, ko vɔ wakalilanya ndo wakadiake anto* tshɛ wa lɔkɔ la lokuwa la ta, aha la ntshika ndooko onto la lɔsɛnɔ. Ɔnkɔnɛ, vɔ wakasalɛ nkumekanga ka Libina woho wakawasalɛ nkumekanga ka Jeriko.+

31 Oma laasɔ, Jashua nde l’ase Isariyɛlɛ tshɛ wakonɛɛ oma la Libina otsha la Lakishi+ ndo wakatoka mpango kawɔ lɛkɔ, ko wakalilɔsha. 32 Jehowa akakimɔ Lakishi lo anya w’ase Isariyɛlɛ, ko vɔ wakaliɔshi lushi la 2. Vɔ wakalilanya ndo wakadiake anto* tshɛ wa lɔkɔ la lokuwa la ta+ woho wakawasalɛ Libina.

33 Oma laasɔ, Hɔrama nkumekanga ka Ngezɛrɛ+ akatshu dia tokimanyiya Lakishi, koko Jashua akoodiake nde l’anto ande polo ndo ndooko onto lakatshikala la lɔsɛnɔ.

34 Ko Jashua nde l’ase Isariyɛlɛ tshɛ wakonɛɛ oma la Lakishi otsha la Ɛngɛlɔna+ ndo wakatoka mpango kawɔ lɛkɔ, ko wakakilɔsha. 35 Vɔ wakakiɔshi lushi lakɔ ndo wakadiake anto wa lɔkɔ la lokuwa la ta. Vɔ wakalanya anto* tshɛ wa lɔkɔ lushi lakɔ woho wakawasalɛ Lakishi.+

36 Oma laasɔ, Jashua nde l’ase Isariyɛlɛ tshɛ wakonɛɛ oma la Ɛngɛlɔna otsha la Hɛbɛrɔna+ ndo wakakilɔsha. 37 Vɔ wakakiɔshi, ko wakakilanya, wakalanya nkumekanga katɔ, tosombasomba tatɔ ndo anto* tshɛ wa lɔkɔ la lokuwa la ta, aha la ntshika ndooko onto la lɔsɛnɔ. Oko wakandasalɛ Ɛngɛlɔna mbakandakilanya ndo mbakandalanya anto* tshɛ wa lɔkɔ.

38 L’ekomelo, Jashua nde l’ase Isariyɛlɛ tshɛ wakakadimɔ otsha la Debirɛ+ ndo wakatodilɔsha. 39 Vɔ wakadiɔshi, wakɔshi tosombasomba tadiɔ tshɛ ndo wakande nkumekanga kadiɔ, wakoodiake la lokuwa la ta, ko wakalanya+ anto* tshɛ wa lɔkɔ, aha la ntshika ndooko onto la lɔsɛnɔ+. Nde akasalɛ Debirɛ la nkumekanga kadiɔ woho wakandasalɛ Hɛbɛrɔna ndo Libina la nkumekanga kalɔ.

40 Jashua akɔshi ɛtshi ka nkɛtɛ k’otondo ka lo lɛkɛ l’akona: Nɛngɛbɛ, Shɛfɛla+ ndo eholola kaamɛ la nkumi ya dikanga yawɔ tshɛ, aha la ntshika ndooko onto la lɔsɛnɔ. Nde akalanya+ ɛngɔ tshɛ kakahɛngaka, oko wakadjanga+ Jehowa Nzambi k’Isariyɛlɛ. 41 Jashua akɔshi oma la Kadɛshɛ-Baranea+ polo la Ngaza+ ndo ɛtshi ka nkɛtɛ ka Ngɔshɛnɛ+ k’otondo polo la Ngibiyɔna.+ 42 Jashua akande nkumi ya dikanga shɔ tshɛ ndo akɔshi nkɛtɛ yawɔ tshɛ mbala kakɔ ɔtɔi, nɛ dia Jehowa Nzambi k’Isariyɛlɛ kakalwɛka Isariyɛlɛ ta.+ 43 Oma laasɔ, Jashua nde l’ase Isariyɛlɛ tshɛ wakakalola lo mpango ka la Ngilingalɛ.+

11 Lam’akoke Jabina nkumekanga ka Hazɔra dui sɔ, nde akatome dui le Jɔbaba nkumekanga ka Madɔna+ ndo le nkumekanga ka Shimirɔna, nkumekanga ka Akishafu,+ 2 nkumi ya dikanga yaki otsha lo nɔrdɛ ka lɛkɛ l’akona, wanɛ waki lo nkɛtɛ y’ebamubamu* ya lo sidɛ ka Kinɛrɛtɛ, wanɛ waki la Shɛfɛla ndo lo ekidi wa Dɔra+ otsha lo owɛstɛ, 3 ase Kanana+ lo ɛstɛ ndo lo owɛstɛ, ase Amɔra,+ ase Hiti, ase Perizi, ase Jɛbusɛ lo lɛkɛ l’akona ndo ase Hivi+ l’ɛse ka Hɛrɛmɔna+ lo nkɛtɛ ya Mizipa. 4 Ko vɔ wakatombe kaamɛ la asɔlayi awɔ tshɛ, leemba la woke efula oko nsɛkɛ ya lɔkɔngɔ la l’omamu wa ndjale, kaamɛ la mfalasa efula ka mamba ndo pusupusu ya ta. 5 Nkumi ya dikanga shɔ tshɛ wakokana dia mpomana, ko vɔ wakaye ndo wakayoka mpango kawɔ vɔ tshɛ kaamɛ suke la ashi wa Merɔmɛ dia ndɔsha ase Isariyɛlɛ.

6 Ko Jehowa akatɛ Jashua ate: “Towaokake wɔma,+ nɛ dia loyi lo wonya wa nganɛ, dimi layowakimɔ vɔ tshɛ edo eto le ase Isariyɛlɛ. Kohembole eshisha+ wa l’ekolo wa mfalasa yawɔ ndo kotshumbe pusupusu yawɔ lo dja.” 7 Ko Jashua nde la andɔshi wa ta tshɛ wakawaɔtwɛ la shashimoya dia mbalɔsha l’omamu w’ashi wa Merɔmɛ. 8 Jehowa akaakimɔ lo anya+ w’ase Isariyɛlɛ, ko vɔ wakaalɛndja ndo wakawatshanya polo la Sidɔna+ ka Woke ndo la Misirɛfɔtɛ-Mayima+ ndo l’Okidi wa Mizipɛ lo ɛstɛ, ko vɔ wakaadiake polo ndo ndooko onto lakatshikala la lɔsɛnɔ.+ 9 Ko Jashua akaasalɛ oko wakawotɛ Jehowa. Nde akahembola eshisha wa l’ekolo wa mfalasa yawɔ ndo akatshumbe pusupusu yawɔ lo dja.+

10 Ndo nto, Jashua akakadimɔ oma laasɔ ko akɔshi Hazɔra ndo akadiake nkumekanga kawɔ la lokuwa la ta,+ nɛ dia Hazɔra aki ntondo ɔtɛ wa waolelo asɔ tshɛ. 11 Vɔ wakadiake anto* tshɛ wa lɔkɔ la lokuwa la ta ndo wakaalanya.+ Ndooko kaanga ɛngɔ 1 kahɛnga kakatshikala.+ Oma laasɔ, nde akatshumbe Hazɔra la dja. 12 Jashua akɔshi esomba tshɛ wa nkumi ya dikanga shɔ ndo akalɛndja nkumi ya dikanga yakɔ tshɛ la lokuwa la ta.+ Nde akaalanya,+ oko wakadjanga Mɔsɛ okambi wa Jehowa. 13 Koko ase Isariyɛlɛ kotshumba ndooko osomba waki lo akona awɔ, onyake Hazɔra. Vɔ oto kakatshumbe Jashua. 14 Diangɔ tshɛ dia dimbo dia lo esomba ɛsɔ ndo dongalonga diaki lɔkɔ, ase Isariyɛlɛ wakadiɔshi dikambo diawɔ vɔamɛ.+ Koko vɔ wakadiake anto tshɛ la lokuwa la ta polo ndo lam’akawaashile vɔ tshɛ oshiki.+ Vɔ kotshika kaanga onto 1 ahɛnga.+ 15 Oko wakadjangɛ Jehowa Mɔsɛ k’okambi ande, mbakadjangɛ Mɔsɛ Jashua ndo kɛsɔ mbakasale Jashua.+ Nde kotshika kaanga dui 1 oma lo kɛnɛ tshɛ kakadjangɛ Jehowa Mɔsɛ.+

16 Jashua akɔshi wodja ɔsɔ w’otondo: Lɛkɛ l’akona, Nɛngɛbɛ+ k’otondo, ɛtshi ka nkɛtɛ k’otondo ka Ngɔshɛnɛ, Shɛfɛla,+ Araba+ ndo lɛkɛ l’akona laki ase Isariyɛlɛ kaamɛ la Shɛfɛla* yalɔ, 17 oma lo Dikona dia Halaka diadɛ otsha la Seirɛ polo la Baala-Ngada+ l’Okidi wa Lɛbanɔna l’ɛse ka Dikona dia Hɛrɛmɔna+ ndo nde akande nkumi ya dikanga yawɔ tshɛ ko akaalɛndja ndo akaadiake. 18 Jashua akalɔsha nkumi ya dikanga shɔ tshɛ lo etena k’otale. 19 Ndooko osomba wakadje wɔladi l’ase Isariyɛlɛ onyake ase Hivi wakadjasɛka la Ngibiyɔna.+ Vɔ wakalɛndja ekina tshɛ la ta.+ 20 Jehowa kakatshike dia etema awɔ ntshininala+ dia vɔ ndɔsha ase Isariyɛlɛ la oyango wa nde mbalanya aha la mbaoka kɛtshi.+ Vɔ wakahombe ndanyema, oko wakadjangɛ Jehowa Mɔsɛ.+

21 L’etena kɛsɔ, Jashua akashile ase Anakima+ oshiki oma lo lɛkɛ l’akona, oma la Hɛbɛrɔna, Debirɛ, Anaba ndo lɛkɛ l’akona l’otondo laki Juda kaamɛ la lɛkɛ l’akona l’otondo laki Isariyɛlɛ. Jashua akaalanya+ vɔ la esomba awɔ tshɛ. 22 Ndooko ose Anakima lakatshikala lo wodja w’ase Isariyɛlɛ. Vɔ wakatshikala+ paka la Ngaza,+ la Ngata+ ndo la Ashidɔdɛ.+ 23 Ɔnkɔnɛ Jashua akɔshi wodja w’otondo, oko wakalake Jehowa Mɔsɛ+ ndo oma laasɔ, Jashua akasha ase Isariyɛlɛ wodja akɔ dia vɔ monga etenyi kawɔ k’okitɔ ndo yema yawɔ, dia vɔ nkahana lo ndjela waoho+ awɔ. Ko ata+ wakashile lo wodja.

12 Nkumi ya dikanga ya l’ɛtshi ka nkɛtɛ kakalɛndja ase Isariyɛlɛ, ɛtshi ka nkɛtɛ kakawɔshi lo ɛstɛ ka Jɔrdana, oma l’Okidi wa Aranɔna+ polo lo Dikona dia Hɛrɛmɔna+ ndo Araba w’otondo otsha lo ɛstɛ+ yɔ nyɛ: 2 Sihɔna+ nkumekanga k’ase Amɔra kakadjasɛka la Hɛshibɔna ndo kakolɛka oma la Aroɛrɛ+ waki l’omamu w’Okidi wa Aranɔna,+ ndo oma l’atei atei w’okidi ndo k’ahende ɔtɔi ka Ngiliyadɛ polo l’Okidi wa Jabɔka, olelo w’ase Amɔna. 3 Nde akolɛka ndo Araba polo lo Ndjale ka Kinɛrɛtɛ*+ otsha lo ɛstɛ polo lo Ndjale ka Araba, Ndjale ka Lɛɛhɔ* lo ɛstɛ k’otsha la Bɛtɛ-Jeshimɔta ndo otsha lo sidɛ l’ɛse k’eholola wa Pisinga.+

4 Ndo nto, ɛtshi ka nkɛtɛ ka Onga+ nkumekanga ka Bashana laki ɔtɔi ɔmɔtshi w’atshikadi wa la Rɛfayima+ ndo lakadjasɛka la Ashitarɔta ndo la Ɛdɛrɛi 5 ndo lakolɛka lo Dikona dia Hɛrɛmɔna, lo Salɛka ndo Bashana+ k’otondo polo l’olelo w’aseka Ngeshurɛ la aseka Maakata+ ndo k’ahende ɔtɔi ka Ngiliyadɛ polo l’ɛtshi ka nkɛtɛ ka Sihɔna nkumekanga ka Hɛshibɔna.+

6 Mɔsɛ okambi wa Jehowa ndo ase Isariyɛlɛ wakaalɛndja,+ ko l’ɔkɔngɔ diko, Mɔsɛ okambi wa Jehowa akasha aseka Rubɛna, aseka Ngada ndo k’ahende ɔtɔi ka dioho dia Manase+ ɛtshi kawɔ ka nkɛtɛ dia tɔ monga kawɔ.

7 Wanɛ mbele nkumi ya dikanga ya lo wodja wakalɛndja Jashua nde l’ase Isariyɛlɛ lo owɛstɛ wa Jɔrdana, oma la Baala-Ngada+ l’Okidi wa Lɛbanɔna+ polo lo Dikona dia Halaka+ diadɛ polo la Seirɛ,+ ko l’ɔkɔngɔ diko Jashua mbisha waoho w’ase Isariyɛlɛ wodja awɔ dia vɔ mbokahana oko tema tawɔ,+ 8 lo lɛkɛ l’akona, lo Shɛfɛla, lo Araba, lo eholola, l’oswe, lo Nɛngɛbɛ,+ mbuta ate ɛtshi ka nkɛtɛ k’ase Hiti, k’ase Amɔra,+ k’ase Kanana, k’ase Perizi, k’ase Hivi ndo k’ase Jɛbusɛ:+

13 L’etena kɛsɔ ko Jashua ambotshunda ndo aya osombe wa lokosombe.+ Ɔnkɔnɛ Jehowa akawotɛ ate: “Wɛ ambotshunda ndo aya osombe wa lokosombe, koko bɛtshi dia nkɛtɛ diahomba mbɔsama* dieke efula. 2 Bɛtshi dia nkɛtɛ diambotshikala+ diɔ nɛ: Ɛtshi ka nkɛtɛ k’otondo k’ase Filistiya ndo k’aseka Ngeshurɛ+ 3 (oma l’ɔkɛdi wa Nilɛ* wele lo ɛstɛ* k’Edjibito polo lo olelo wa Ɛkɛrɔna lo nɔrdɛ wakɔsamaka oko ɛtshi ka nkɛtɛ k’ase Kanana)+ mbidja ndo ɛtshi ka nkɛtɛ ka nkumi 5 y’ase Filistiya,+ mbuta ate ase Ngaza, ase Ashidɔdɛ,+ ase Ashikɛlɔna,+ ase Ngiti+ ndo ase Ɛkɛrɔna;+ ɛtshi ka nkɛtɛ ka Avimɛ+ 4 lo sidɛ; ɛtshi ka nkɛtɛ k’otondo k’ase Kanana; Meara waki ase Sidɔna+ polo la Afɛkɛ, lo olelo w’ase Amɔra; 5 ɛtshi ka nkɛtɛ k’ase Ngɛbala+ ndo Lɛbanɔna l’otondo otsha lo ɛstɛ, oma la Baala-Ngada l’ɛse ka Dikona dia Hɛrɛmɔna polo la Lɛbɔ-Hamatɛ;*+ 6 wanɛ tshɛ wadjasɛ lo lɛkɛ l’akona oma la Lɛbanɔna+ polo la Misirɛfɔtɛ-Mayima,+ ndo Sidɔna+ k’otondo. Dimi layowatshanya* oma la ntondo k’ase Isariyɛlɛ.+ Wɛ ayodisha tsho ase Isariyɛlɛ oko etenyi k’okitɔ, oko wamomokodjangɛ.+ 7 Wonya ɔnɛ, wɛ pombaka nkahanya wodja ɔnɛ oko etenyi k’okitɔ le waoho 9 ndo k’ahende ɔtɔi ka dioho dia Manase.”+

8 Aseka Rubɛna, aseka Ngada kaamɛ la k’ahende ɔtɔi kekina ka dioho dia Manase wakɔshi etenyi kawɔ k’okitɔ kakawasha Mɔsɛ lo ɛstɛ ka Jɔrdana, oko wakawasha+ Mɔsɛ okambi wa Jehowa: 9 Oma la Aroɛrɛ+ wele l’omamu w’Okidi wa Aranɔna+ ndo osomba wele l’atei atei w’okidi ndo ebamubamu ka la diko dia Dikona dia Mɛdɛba polo la Dibɔna; 10 ndo esomba tshɛ wa Sihɔna nkumekanga k’ase Amɔra kakolɛka la Hɛshibɔna polo lo olelo w’ase Amɔna;+ 11 ndo Ngiliyadɛ la ɛtshi ka nkɛtɛ k’aseka Ngeshurɛ ndo k’aseka Maakata+ mbidja ndo Dikona dia Hɛrɛmɔna di’otondo la Bashana+ k’otondo polo la Salɛka;+ 12 diolelo di’otondo dia Onga ka la Bashana lakolɛka la Ashitarɔta ndo la Ɛdɛrɛi. (Nde aki ɔtɔi ɔmɔtshi w’atshikadi wa Rɛfayima.)+ Mɔsɛ akaalɛndja ndo akawatshanya.*+ 13 Koko ase Isariyɛlɛ kombitshanya*+ aseka Ngeshurɛ ndo aseka Maakata, nɛ dia aseka Ngeshurɛ l’aseka Maakata wekɔ lo mbidjasɛ l’atei w’Isariyɛlɛ polo ndo ɛlɔ.

14 Paka dioho di’ase Lɛwi to kakinde kombisha etenyi k’okitɔ.+ Elambo watshumbama lo dja dikambo dia Jehowa Nzambi k’Isariyɛlɛ mbele etenyi kawɔ k’okitɔ,+ oko wakandaalake.+

15 Oma laasɔ, Mɔsɛ akasha dioho di’aseka Rubɛna etenyi k’okitɔ lo ndjela nkumbo yawɔ, 16 ndo ɛtshi kawɔ ka nkɛtɛ kaki oma la Aroɛrɛ wele l’omamu w’Okidi wa Aranɔna ndo osomba wele l’atei atei w’okidi, mbidja ndo ebamubamu k’otondo ka la diko dia dikona diele suke la Mɛdɛba; 17 Hɛshibɔna la tosombasomba+ tawɔ tshɛ tele lo ebamubamu ka la diko dia dikona, Dibɔna, Bamɔta-Baala, Bɛtɛ-Baala-Meɔna,+ 18 Jahaza,+ Kɛdɛmɔtɛ,+ Mefatɛ,+ 19 Kiriatayima, Sibima+ ndo Zɛrɛtɛ-Shahara yele lo dikona diosukanyi la okidi, 20 Bɛtɛ-Pɛɔrɛ, eholola wa Pisinga,+ Bɛtɛ-Jeshimɔta,+ 21 esomba tshɛ wa lo ebamubamu ka la diko dia dikona ndo diolelo di’otondo dia Sihɔna nkumekanga k’ase Amɔra kakolɛka la Hɛshibɔna.+ Mɔsɛ akɔɔlɛndja+ nde la ewandji w’ase Midiyana ɛnɛ: Evi, Rɛkɛmɛ, Zura, Hura ndo Rɛba,+ ɛnɛnɛ* wa laka Sihɔna wakadjasɛka lo ɛtshi ka nkɛtɛ kɛsɔ. 22 Ase Isariyɛlɛ wakadiake Balama+ ɔna Beɔrɛ, osadi wa diendja+ kaamɛ l’anto akina la lokuwa la ta. 23 Olelo w’aseka Rubɛna waki lo Jɔrdana ndo ɛtshi ka nkɛtɛ kɛsɔ mbaki etenyi k’okitɔ k’aseka Rubɛna lo ndjela nkumbo yawɔ, kaamɛ la esomba ndo ngelo yawɔ.

24 Laadiko dia laasɔ, Mɔsɛ akasha dioho dia Ngada etenyi k’okitɔ, aseka Ngada lo ndjela nkumbo yawɔ, 25 ndo ɛtshi kawɔ ka nkɛtɛ kaki ndo Jazɛrɛ+ la esomba tshɛ wa la Ngiliyadɛ ndo k’ahende ɔtɔi k’ɛtshi ka nkɛtɛ k’ase Amɔna+ polo la Aroɛrɛ wɛlane la Raba;+ 26 oma la Hɛshibɔna+ polo la Ramata-Mizipɛ ndo Bɛtɔnima, oma la Mahanayima+ polo lo olelo wa Debirɛ; 27 ndo l’okidi, Bɛtɛ-Harama, Bɛtɛ-Nimira,+ Sukɔta+ ndo Zafɔna, etenyi katshikala ka diolelo dia Sihɔna nkumekanga ka Hɛshibɔna,+ ndo olelo wayonga lo Jɔrdana oma lo koma ya l’ɛse ka Ndjale ka Kinɛrɛtɛ*+ lo ɛstɛ ka Jɔrdana. 28 Ɔsɔ kaki etenyi k’okitɔ k’aseka Ngada lo ndjela nkumbo yawɔ kaamɛ la esomba ndo ngelo yawɔ.

29 Ndo nto, Mɔsɛ akasha k’ahende ɔtɔi ka dioho dia Manase etenyi kawɔ k’okitɔ, k’ahende ɔtɔi ka dioho dia Manase lo ndjela nkumbo yawɔ.+ 30 Ɛtshi kawɔ ka nkɛtɛ kaki oma la Mahanayima+ ndo kakɔsaka Bashana k’otondo, diolelo di’otondo dia Onga nkumekanga ka Bashana ndo tongelongelo tshɛ taki la mvudu y’apɛma ya Jayira+ lo Bashana, tosombasomba 60. 31 Ndo k’ahende ɔtɔi ka Ngiliyadɛ la Ashitarɔta ndo Ɛdɛrɛi,+ esomba wa lo diolelo dia Onga lo Bashana ndo wakatshu polo le ana wa Makiri+ ɔna Manase, lo k’ahende ɔtɔi k’ana wa Makiri lo ndjela nkumbo yawɔ.

32 Ɔsɔ mbele tenyi di’okitɔ diakawasha Mɔsɛ lo laandja l’oswe wa Mɔaba suke la Jɔrdana, lo ɛstɛ ka Jeriko.+

33 Koko dioho di’ase Lɛwi, Mɔsɛ kombasha ndooko etenyi k’okitɔ.+ Jehowa Nzambi k’Isariyɛlɛ kele etenyi kawɔ k’okitɔ, oko wakandaalake.+

14 Ɔnɛ mbele tenyi di’okitɔ diakɔshi ase Isariyɛlɛ lo wodja wa Kanana, diakawasha ɔlɔmbɛdi Eleazara nde la Jashua ɔna Nuna la ewandji wa mvudu ya washɛwɔ wa lo waoho w’Isariyɛlɛ dia vɔ nkita.+ 2 Vɔ wakalongola tenyi diawɔ di’okitɔ lo eokelo k’owale,+ oko wakadjanga Jehowa lo tshimbo ya Mɔsɛ dikambo dia waoho+ divwa l’etenyi. 3 Mɔsɛ akasha waoho akina ahende l’etenyi etenyi kawɔ k’okitɔ lo wedi okina* wa Jɔrdana+ ndo nde kombisha ase Lɛwi etenyi k’okitɔ l’atei awɔ.+ 4 Tokanula ta Yɔsɛfu wakɔsamaka oko waoho+ 2, Manase la Efrayimɛ,+ ndo vɔ kombisha ase Lɛwi yema yawɔ ya nkɛtɛ, onyake esomba+ wa mbidjasɛ la ahole wa ndesha dongalonga diawɔ ndo diangɔ+ diawɔ. 5 Ɔnkɔnɛ, ase Isariyɛlɛ wakakahana wodja oko wakadjangɛ Jehowa Mɔsɛ.

6 Oma laasɔ, aseka Juda wakatshu le Jashua la Ngilingalɛ,+ ko Kalɛba+ ɔna Jefune ose Kenizi akawotɛ ate: “Wɛ mbeyaka dimɛna kɛnɛ kakatɛ+ Jehowa Mɔsɛ okambi wa Nzambi+ ka mɛtɛ lo dikambo diayɛ ndo lo dikambo diami la Kadɛshɛ-Baranea.+ 7 Dimi laki l’ɛnɔnyi 40 lam’akantome Mɔsɛ okambi wa Jehowa oma la Kadɛshɛ-Baranea dia tokemba wodja,+ ko dimi lakayosha alapɔlɔ wa dimɛna.*+ 8 Kaanga mbele analengo wakatshu la mi wakayataka anto asolo,* dimi lakayele Jehowa Nzambi kami l’otema ɔtɔi.*+ 9 Mɔsɛ akatshibe lushi lɔsɔ ate: ‘Nkɛtɛ yakakamɛ ekolo ayɛ yayonga etenyi kayɛ k’okitɔ wɛ l’anayɛ pondjo, nɛ dia wɛ akayele Jehowa Nzambi kami l’otema ɔtɔi.’+ 10 Ɔnkɔnɛ, oko wakandalake,+ Jehowa ambontshika la lɔsɛnɔ+ lo ɛnɔnyi 45 ɛnɛ, nɛ dia kɛsɔ mbakalake Jehowa Mɔsɛ etena kakayayaka Isariyɛlɛ l’oswe wa shɛnga.+ Dimi ɔnɛ leke la lɔsɛnɔ ɛlɔ kɛnɛ ndo laya l’ɛnɔnyi 85. 11 Ndo ɛlɔ dimi leke la wolo oko lushi lakantome Mɔsɛ. Nkudu kami kekekɔ woho wakitɔ etena kɛsɔ dia ndɔ ata kana dia nsala elimu ekina. 12 Ɔnkɔnɛ, ombisha lɛkɛ l’akona lɔnɛ lakalake Jehowa lushi lɔsɔ. Kaanga kakayoke lushi lakɔ dia aseka Anakima+ wekɔ lɛkɔ ndo wekɔ la esomba wa weke wodingami la mpele,+ ndooko onyake* Jehowa ayonga kaamɛ la mi ndo layowatshanya,* oko wakalake+ Jehowa.”+

13 Ko Jashua akɔɔtshɔkɔla ndo akasha Kalɛba ɔna Jefune Hɛbɛrɔna oko etenyi kande k’okitɔ.+ 14 Diakɔ diele Hɛbɛrɔna ekɔ kaki Kalɛba ɔna Jefune ose Kenizi oko etenyi kande k’okitɔ polo ndo ɛlɔ, nɛ dia nde akayele Jehowa Nzambi k’Isariyɛlɛ l’otema ɔtɔi.+ 15 Hɛbɛrɔna akelamɛka ntondo ɔnɛ Kiriatɛ-Arba+ (Arba aki onto la woke l’atei w’aseka Anakima). Ko ata+ wakashile lo wodja.

15 Ɛtshi ka nkɛtɛ kakalongola*+ dioho dia Juda lo ndjela nkumbo yawɔ kakatshɔka polo lo olelo w’ase Ɛdɔmɛ,+ l’oswe wa Zinɛ polo la Nɛngɛbɛ lo koma yatɔ ya lo sidɛ. 2 Olelo awɔ wa lo sidɛ waketaka oma lo koma ya Ndjale ka Lɛɛhɔ*+ ndo oma lo dɛɛngɔ diɛlane la lɛkɛ la sidɛ. 3 Vɔ waketaka otsha lo sidɛ polo lo wodelo wa Akarabima,+ vɔ waketaka otsha la Zinɛ ndo oma laasɔ vɔ wakadɛka oma lo sidɛ otsha la Kadɛshɛ-Baranea,+ vɔ waketaka otsha la Hɛzɛrɔna, otsha la Adara ndo vɔ wakatshimbaka otsha la Karaka. 4 Oma laasɔ, vɔ waketaka otsha la Azimɔna+ ndo otsha l’Okidi w’ashi* wa l’Edjibito,+ ndo olelo akɔ wakakomɛka lo Ndjale.* Ɔsɔ mbaki olelo awɔ wa lo sidɛ.

5 Olelo wa lo ɛstɛ waki lo Ndjale ka Lɛɛhɔ* polo lɛnɛ atokomɛka Jɔrdana, ndo olelo wa lo tshuku dia la nɔrdɛ waki lo dɛɛngɔ dia ndjale, lɛnɛ atokomɛka Jɔrdana.+ 6 Olelo akɔ wakadɛka otsha la Bɛtɛ-Hɔngɛla+ ndo waketaka otsha lo nɔrdɛ ka Bɛtɛ-Araba,+ ko olelo akɔ waketaka otsha lo dive dia Bohana+ ɔna Rubɛna. 7 Olelo akɔ wakadɛka otsha la Debirɛ l’Okidi* wa Akɔra+ ndo wakakadimɔka otsha lo nɔrdɛ ka Ngilingalɛ,+ mbɛlanɛ la wodelo wa Adumima wele lo sidɛ k’okidi w’ashi, ndo olelo akɔ waketaka otsha lo ashi wa Ɛnɛ-Shɛmɛshɛ+ ko wakatokomɛ la Ɛnɛ-Rɔngɛlɛ.+ 8 Olelo akɔ waketaka otsha l’Okidi w’Ɔna Hinɔmɛ+ polo lo oholola w’ase Jɛbusɛ+ lo sidɛ, mbuta ate Jɛrusalɛma,+ ndo olelo akɔ wakadɛka otsha lo shɔdi ya dikona diɛlane l’Okidi wa Hinɔmɛ lo owɛstɛ wele lo koma y’Okidi* wa Rɛfayima lo nɔrdɛ. 9 Ndo olelo akɔ waketaka oma lo shɔdi ya dikona otsha l’ɛtɛkɔ k’ashi ka Nɛfɛtɔa+ ndo vɔ waketaka otsha lo esomba wa lo Dikona dia Efɛrɔna. Olelo akɔ waketaka otsha la Baalaha, mbuta ate Kiriatɛ-Jarima.+ 10 Olelo akɔ wakatshimbe oma la Baalaha kele otsha lo owɛstɛ otsha lo Dikona dia Seirɛ ndo wakete otsha lo oholola wa dikona dia Jerima lo nɔrdɛ, mbuta ate Kesalɔna, ndo wakaholɔ otsha la Bɛtɛ-Shɛmɛshɛ+ ko wakete otsha la Timina. + 11 Olelo akɔ wakete otsha l’oholola wa Ɛkɛrɔna+ lo nɔrdɛ ndo olelo akɔ waki la Shikɛrɔna ko wakete otsha lo Dikona dia Baalaha ndo wakatshɔka polo la Jabinɛlɛ ko olelo akɔ wakatokomɛ lo ndjale.

12 Olelo wa lo owɛstɛ waki lo Ndjale ka woke*+ la omamu atɔ. Ɔsɔ mbaki olelo wa tokanula ta Juda lo ndjela nkumbo yawɔ lo wedi akɔ tshɛ.

13 Nde akasha Kalɛba+ ɔna Jefune yema yande l’atei wa tokanula ta Juda lo ndjela kɛnɛ kakadjangɛ Jehowa Jashua, mbuta ate Kiriatɛ-Arba (Arba aki she Anaka), mbuta ate Hɛbɛrɔna.+ 14 Ko Kalɛba akatshanya ana 3 waki Anaka+ waki lɛkɔ: Sheshai, Ahimana ndo Talamai,+ tokanula taki Anaka. 15 Oma laasɔ, nde akonɛɛ oma lɛkɔ ko akatshu dia tɔlɔsha anto wakadjasɛka la Debirɛ.+ (Debirɛ akelamɛka ntondo ɔnɛ Kiriatɛ-Sɛfɛrɛ.) 16 Ko Kalɛba akate ate: “Onto layɔlɔsha Kiriatɛ-Sɛfɛrɛ ndo layokiɔsa, dimi layowosha ɔnami Akisa wadi.” 17 Ko Otinyɛlɛ+ ɔna Kenazɛ,+ ɔnango Kalɛba akakiɔshi. Ɔnkɔnɛ nde akawosha ɔnande Akisa+ wadi. 18 Lam’akatatshɔka Akisa otsha lakande, nde akɔɔsɛngasɛnga dia tɔlɔmba she ɛtshi ka nkɛtɛ. Oma laasɔ, nde akaholɔ oma lo mponda kande.* Kalɛba akawombola ate: “Alangayɛ?”+ 19 Nde akate ate: “Lam’alangayɛ, ɔntshɔkɔlɛ nɛ dia wɛ ambombisha ɛtshi ka nkɛtɛ lo sidɛ.* Ombisha ndo Ngulɔtɛ-Mayimɛ.”* Ko nde akawosha Ngulɔtɛ ka la Diko ndo Ngulɔtɛ ka l’Ɛse.

20 Ɔsɔ mbaki etenyi k’okitɔ ka dioho dia Juda lo ndjela nkumbo yawɔ.

21 Esomba wa l’omamu wa dioho dia Juda otsha lo olelo wa Ɛdɔmɛ+ lo sidɛ vɔ ɛnɛ: Kabizɛlɛ, Edɛrɛ, Jangura, 22 Kina, Dimona, Adada, 23 Kɛdɛshɛ, Hazɔra, Itinana, 24 Zifu, Tɛlɛmɛ, Bealɔta, 25 Hazɔra-Hadata, Keriɔtɛ-Hɛzɛrɔna, mbuta ate Hazɔra, 26 Amama, Shɛma, Mɔlada,+ 27 Hazara-Ngada, Hɛshimɔna, Bɛtɛ-Pɛlɛtɛ,+ 28 Hazara-Shuala, Bɛrɛ-Shɛba,+ Biziyɔtiya, 29 Baalaha, Imɛ, Ezɛmɛ, 30 Elɛtɔlada, Kesili, Horima,+ 31 Zikilangɛ,+ Madɛmana, Sasana, 32 Lɛbaɔta, Shilimɛ, Ainɛ ndo Rimɔna,+ tshɛ tshɛ esomba 29 kaamɛ la ngelo yawɔ.

33 Esomba wa lo Shɛfɛla+ vɔ ɛnɛ: Eshitaɔlɛ, Zɔra,+ Ashina, 34 Zanoa, Ɛnɛ-Nganima, Tapua, Enama, 35 Jaramuta, Adulama,+ Sɔko, Azeka,+ 36 Sharayima,+ Aditayima ndo Ngedɛra la Ngederɔtayima,* esomba 14 la ngelo yawɔ.

37 Zenana, Hadasha, Mingidala-Ngada, 38 Dileana, Mizipɛ, Jɔkɛtɛlɛ, 39 Lakishi,+ Bozɛkata, Ɛngɛlɔna, 40 Kabɔna, Lahamama, Kitilishi, 41 Ngederɔtɛ, Bɛtɛ-Dangɔna, Naama ndo Makeda,+ esomba 16 la ngelo yawɔ.

42 Libina,+ Etɛrɛ, Ashana,+ 43 Ifɛta, Ashina, Nezibɛ, 44 Keila, Akizibɛ ndo Maresha, esomba 9 la ngelo yawɔ.

45 Ɛkɛrɔna kaamɛ la tosombasomba ndo ngelo yendɛ le wɔ;* 46 oma lo owɛstɛ wa Ɛkɛrɔna, esomba tshɛ wele l’omamu wa Ashidɔdɛ la ngelo yawɔ.

47 Ashidɔdɛ+ kaamɛ la tosombasomba ndo ngelo yendɛ le wɔ;* Ngaza+ kaamɛ la tosombasomba ndo ngelo yendɛ le tɔ, polo l’okidi w’ashi wa l’Edjibito, lo Ndjale ka Woke* ndo ɛtshi ka nkɛtɛ+ ka l’olelo.

48 Esomba wa lo lɛkɛ l’akona vɔ ɛnɛ: Shamira, Jatira,+ Sɔko, 49 Dana, Kiriatɛ-Sana, mbuta ate Debirɛ, 50 Anaba, Eshitɛmɔ,+ Animɛ, 51 Ngɔshɛnɛ,+ Hɔlɔna ndo Ngilɔ,+ esomba 11 la ngelo yawɔ.

52 Arabiya, Duuma, Eshana, 53 Janima, Bɛtɛ-Tapua, Afɛka, 54 Humɛta, Kiriatɛ-Arba, mbuta ate Hɛbɛrɔna+ ndo Ziɔrɛ, esomba 9 la ngelo yawɔ.

55 Maɔna,+ Karamɛlɛ, Zifu,+ Juta, 56 Jezɛrɛlɛ, Jɔkɛdeamɛ, Zanoa, 57 Kaina, Ngibɛa ndo Timina,+ esomba 10 la ngelo yawɔ.

58 Halahulu, Bɛtɛ-Zurɛ, Ngɛdɔrɛ, 59 Maarata, Bɛtɛ-Anɔta ndo Elɛtɛkɔna, esomba 6 la ngelo yawɔ.

60 Kiriatɛ-Baala, mbuta ate Kiriatɛ-Jarima+ ndo Raba, esomba 2 la ngelo yawɔ.

61 Esomba wa l’oswe vɔ ɛnɛ: Bɛtɛ-Araba,+ Midina, Sekaka, 62 Nibushana, Osomba wa Lɛɛhɔ ndo Ɛnɛ-Ngɛdi,+ esomba 6 la ngelo yawɔ.

63 Lo dikambo di’ase Jɛbusɛ+ wakadjasɛka la Jɛrusalɛma,+ aseka Juda komonga la akoka wa mbatshanya.+ Ɔnkɔnɛ ase Jɛbusɛ wekɔ lo ntetemala mbidjasɛ kaamɛ l’aseka Juda la Jɛrusalɛma polo ndo ɛlɔ.

16 Ɛtshi ka nkɛtɛ kakakɔ lo eokelo k’owale*+ dikambo dia tokanula ta Yɔsɛfu+ kaki oma la Jɔrdana suke la Jeriko polo lo ashi wa lo ɛstɛ ka Jeriko, polo l’oswe wadɛ oma la Jeriko otsha lo lɛkɛ l’akona la Bɛtɛlɛ.+ 2 Tɔ kaki oma la Bɛtɛlɛ kosukanyi la Luza ndo kakatetemala polo l’olelo w’ase Araka lo Atarɔta, 3 tɔ kakaholɔ otsha lo owɛstɛ polo l’olelo w’aseka Jafɛlɛtɛ, mbeta polo lo olelo wa Bɛtɛ-Hɔrɔna+ ka l’Ɛse ndo Ngezɛrɛ,+ ko kakatokomɛ lo ndjale.

4 Ɔnkɔnɛ tokanula+ ta Yɔsɛfu, Manase nde la Efrayimɛ wakɔshi ɛtshi kawɔ ka nkɛtɛ.+ 5 Olelo wa tokanula ta Efrayimɛ lo ndjela nkumbo yawɔ waki nganɛ: Olelo w’etenyi kawɔ k’okitɔ lo ɛstɛ waki Atarɔta-Adara+ polo la Bɛtɛ-Hɔrɔna+ ka la Diko, 6 ndo olelo akɔ waketaka polo lo ndjale. Mikimɛtatɛ+ aki lo nɔrdɛ ndo olelo wakatshimbaka lo ɛstɛ polo la Tanata-Shilo ndo waketaka lo ɛstɛ polo la Janɔa. 7 Oma laasɔ, vɔ wakaholɔka oma la Janɔa otsha la Atarɔta ndo Nara ko wakakomaka polo la Jeriko,+ polo ndo lo Jɔrdana. 8 Olelo waketaka oma la Tapua+ otsha lo owɛstɛ k’okidi w’ashi wa la Kana ko wakakomɛka lo ndjale.+ Ɔsɔ mbele etenyi k’okitɔ ka dioho dia Efrayimɛ lo ndjela nkumbo yawɔ. 9 Tokanula ta Efrayimɛ waki ndo la esomba waki l’etei k’etenyi k’okitɔ ka Manase,+ esomba tshɛ la ngelo yawɔ.

10 Koko vɔ kombitshanya ase Kanana wakadjasɛka la Ngezɛrɛ+ ndo ase Kanana wekɔ lo ntetemala mbidjasɛ l’atei w’aseka Efrayimɛ polo ndo ɛlɔ+ ndo wakakitshama dia kambaka elimu la wolo.+

17 Oma laasɔ, owale+ wakakɔ le dioho dia Manase,+ nɛ dia nde aki ɔna Yɔsɛfu l’enondo.+ Lam’ele Makiri+ ɔna Manase l’enondo ndo she Ngiliyadɛ aki ɔndɔshi wa ta, nde akalongola Ngiliyadɛ ndo Bashana.+ 2 Ndo owale wakakɔ le tokanula ta Manase tokina lo ndjela nkumbo yawɔ, le ana wa Abiɛzɛrɛ,+ ana wa Helɛkɛ, ana wa Asiriyɛlɛ, ana wa Shɛkɛmɛ, ana wa Hefɛrɛ ndo ana wa Shemida. Wasɔ mbaki tokanula t’apami ta Manase ɔna Yɔsɛfu, lo ndjela nkumbo yawɔ.+ 3 Koko Zelɔfɛhadɛ+ ɔna Hefɛrɛ, ɔna Ngiliyadɛ, ɔna Makiri, ɔna Manase kombota ana w’apami, nde akote ana wa wamato ato ndo nkombo y’anande wa wamato yɔ nyɛ: Mahala, Nɔa, Hɔngɛla, Milika ndo Tiriza. 4 Ko vɔ wakaye le ɔlɔmbɛdi Eleazara,+ Jashua ɔna Nuna ndo ewandji, ko wakayota vate: “Jehowa kakadjangɛ Mɔsɛ dia nde tosha etenyi k’okitɔ l’atei w’anangɛso.”+ Ɔnkɔnɛ, lo ndjela kɛnɛ kakadjanga Jehowa, nde akawasha etenyi k’okitɔ l’atei w’anango shɛwɔ.+

5 Ndo nto, bɛtshi 10 dikina diakakɔ le Manase laadiko dia ɛtshi ka nkɛtɛ ka Ngiliyadɛ ndo Bashana kaki lo wedi okina* wa Jɔrdana,+ 6 nɛ dia ana wa wamato wa Manase wakalongola etenyi k’okitɔ l’atei w’anande w’apami ndo ɛtshi ka nkɛtɛ ka Ngiliyadɛ kakayala kaki tokanula tokina tshɛ ta Manase.

7 Olelo wa Manase waki oma la Ashɛrɛ polo la Mikimɛtatɛ+ wɛlane la Shɛkɛmɛ+ ndo olelo akɔ wakatetemala ntshɔ otsha lo sidɛ* l’ɛtshi ka nkɛtɛ k’ase Ɛnɛ-Tapua. 8 Ɛtshi ka nkɛtɛ ka Tapua+ kakayala kaki Manase, koko Tapua ka l’olelo waki Manase aki kaki tokanula ta Efrayimɛ. 9 Ndo olelo akɔ wakaholɔka otsha l’okidi w’ashi wa la Kana, otsha lo sidɛ k’otsha l’okidi w’ashi. Esomba wa Efrayimɛ wakikɔ l’atei w’esomba wa Manase+ ndo olelo wa Manase waki lo nɔrdɛ k’okidi w’ashi, ko wakatokomɛ lo ndjale.+ 10 Lo sidɛ, vɔ waki wa Efrayimɛ ndo lo nɔrdɛ vɔ waki wa Manase ndo ndjale mbaki olelo+ awɔ; ndo lo nɔrdɛ, vɔ* wakatshɔka polo laka Ashɛrɛ ndo lo ɛstɛ polo laka Isakara.

11 Lo bɛtshi dia nkɛtɛ dia Isakara nde la Ashɛrɛ, wakasha Manase Bɛtɛ-Sheana la tosombasomba tendɛ le tɔ,* Ibɛlɛamɛ+ la tosombasomba tendɛ le tɔ, ase Dɔra+ la tosombasomba tendɛ le diɔ, ase Ɛnɛ-Dɔra+ la tosombasomba tendɛ le diɔ, ase Tanaka+ la tosombasomba tendɛ le wɔ, ndo ase Mengido la tosombasomba tendɛ le wɔ, bɛtshi dia nkɛtɛ 3 diele la tokonakona.

12 Koko lam’ele tokanula ta Manase komonga la akoka wa mbɔsa esomba ɛsɔ, ase Kanana wakahetetala dia ntshikala lo ɛtshi ka nkɛtɛ+ kɛsɔ. 13 Lam’akayoyala ase Isariyɛlɛ la wolo, vɔ wakakitsha ase Kanana dia mbakandjaka elimu la wolo,+ koko vɔ kombatshanya* tshɛ tshɛ.+

14 Tokanula ta Yɔsɛfu wakatɛ Jashua vate: “Lande na kamboyotosha* etenyi+ 1 ndo yema yaamɛ oko etenyi k’okitɔ? Sho tekɔ anto efula, nɛ dia Jehowa ekɔ lo tɔtshɔkɔla polo wonya ɔnɛ.”+ 15 Jashua akaakadimola ate: “Naka nyekɔ anto efula, nyotshu lo okonda kele nyotoyalɔngɔsɔlɛ dihole lɛkɔ lo ɛtshi ka nkɛtɛ k’ase Perizi+ ndo k’aseka Rɛfayima,+ nɛ dia lɛkɛ l’akona la Efrayimɛ+ hakoke la nyu.” 16 Ko tokanula ta Yɔsɛfu wakate vate: “Lɛkɛ l’akona hakoke la so ndo ase Kanana tshɛ wadjasɛ lo ɛtshi ka nkɛtɛ ka l’okidi wekɔ la pusupusu ya ta+ yele la mbolo ya mpɛmɔ,* oyadi wanɛ wele la Bɛtɛ-Sheana+ la tosombasomba tendɛ le tɔ* kana wanɛ wele l’Okidi* wa Jezɛrɛlɛ.”+ 17 Ko Jashua akatɛ ase luudu la Yɔsɛfu, Efrayimɛ nde la Manase ate: “Nyu nyekɔ anto efula ndo nyekɔ la wolo efula. Hanyotolongola etenyi 1 keto k’oma l’owale,+ 18 koko ndo lɛkɛ l’akona layonga lanyu.+ Kaanga mbele ɛtshi kakɔ okonda, nyayokilɔngɔsɔla ko tɔ kayonga koma y’ɛtshi kanyu ka nkɛtɛ. Nɛ dia nyayotshanya ase Kanana kaanga mbewɔ la wolo ndo la pusupusu ya ta yele la mbolo ya mpɛmɔ.”*+

18 Oma laasɔ, olui w’otondo w’ase Isariyɛlɛ wakatshumana la Shilo+ ko vɔ wakemɛ luudu la dipɛma l’esanganelo laawɔ,+ nɛ dia l’etena kɛsɔ ko wodja wambɔlɛndjama la ntondo kawɔ.+ 2 Koko akatshikala waoho 7 w’ase Isariyɛlɛ waki watalongola etenyi kawɔ k’okitɔ. 3 Ko Jashua akatɛ ase Isariyɛlɛ ate: “Polo l’etena kakɔna kayonyotshimbatshimba dia ntshɔ tɔsa ɛtshi ka nkɛtɛ kambonyosha Jehowa Nzambi ka watshɛnyu?+ 4 Nyombisha apami 3 oma lo dioho la dioho kele mbatome. Vɔ wayotshɔ ndo wayeteta l’ɛtshi kakɔ ka nkɛtɛ k’otondo ko wayokisanga lo ndjela etenyi kawɔ k’okitɔ. Oma laasɔ, ko vɔ nkalola le mi. 5 Vɔ pombaka kikahanya dikambo diawɔ lo tenyi 7.+ Juda ayotshikala lo ɛtshi kande ka nkɛtɛ lo sidɛ+ ndo ase luudu la Yɔsɛfu wayotshikala l’ɛtshi kawɔ ka nkɛtɛ lo nɔrdɛ.+ 6 Nyu lo wedi anyu, nyotosange ɛtshi ka nkɛtɛ kakɔ lo tenyi 7, ko nyu mbelami lanɛ kele kandjoke owale+ lanɛ dikambo dianyu la ntondo ka Jehowa Nzambi kaso. 7 Koko ase Lɛwi hawotolongola yema yawɔ l’atei anyu,+ nɛ dia olimu wa Jehowa w’ɔlɔmbɛdi kele etenyi kawɔ k’okitɔ.+ Ngada, Rubɛna la k’ahende ɔtɔi kɛmɔtshi ka dioho dia Manase+ wamboshilaka nongola etenyi kawɔ k’okitɔ kakawasha Mɔsɛ okambi wa Jehowa lo ɛstɛ ka Jɔrdana.”

8 Ko apami akɔ wakayalɔngɔsɔla dia ntshɔ ndo Jashua akadjangɛ wanɛ wakahombe tosanga ɛtshi kakɔ ka nkɛtɛ ate: “Nyotshu ndo nyotetete l’ɛtshi kakɔ ka nkɛtɛ k’otondo kele nyotosange nsango diatɔ, ko nyu nkalola le mi kele kandjoke owale dikambo dianyu la ntondo ka Jehowa lanɛ la Shilo.”+ 9 Ko apami akɔ wakatshu, wakateteta lo ɛtshi kakɔ ka nkɛtɛ ndo wakakisange lo nkahanya esomba wa lɛkɔ lo 7, ko vɔ wakafunde lo dibuku. L’ɔkɔngɔ wa laasɔ, vɔ wakakalola le Jashua lo mpango ka la Shilo. 10 Jashua akoke owale dikambo diawɔ la Shilo la ntondo ka Jehowa.+ Jashua akakahanya ase Isariyɛlɛ ɛtshi ka nkɛtɛ kɛsɔ lo ndjela tema tawɔ.+

11 Owale wakakɔ le dioho dia Bɛnjamina lo ndjela nkumbo yawɔ, ndo ɛtshi ka nkɛtɛ kakakɔ owale awɔ kaki lam’asa aseka Juda+ l’aseka Yɔsɛfu.+ 12 Olelo awɔ wa lo nɔrdɛ wakatatɛ lo Jɔrdana ko wakete otsha l’oholola wa Jeriko+ lo nɔrdɛ ndo wakadɛ otsha lo dikona dia lo owɛstɛ, ko wakete polo l’oswe wa Bɛtɛ-Avɛna.+ 13 Olelo akɔ wakatetemala oma lɛkɔ otsha la Luza lo sidɛ k’oholola wa Luza, mbuta ate Bɛtɛlɛ.+ Olelo akɔ wakaholɔ otsha la Atarɔta-Adara+ lo dikona diele lo sidɛ ka Bɛtɛ-Hɔrɔna+ ka l’Ɛse. 14 Olelo akɔ wakete otsha lo owɛstɛ ndo wakatshimbe otsha lo sidɛ, oma lo dikona diɛlane la Bɛtɛ-Hɔrɔna lo sidɛ. Vɔ wakakomɛka la Kiriatɛ-Baala, mbuta ate Kiriatɛ-Jarima,+ osomba wa Juda. Ɔsɔ ekɔ lo owɛstɛ.

15 Lɛkɛ la sidɛ laki oma lo koma ya Kiriatɛ-Jarima ndo olelo wakatshɔka otsha lo owɛstɛ. Vɔ wakatshɔka otsha lo ɛtɛkɔ k’ashi ka Nɛfɛtɔa.+ 16 Olelo akɔ wakaholɔ otsha lo koma ya dikona diɛlane l’Okidi w’Ɔna Hinɔmɛ+ wele l’Okidi wa Rɛfayima+ lo nɔrdɛ, ndo vɔ wakaholɔ otsha l’Okidi wa Hinɔmɛ, otsha l’oholola w’ase Jɛbusɛ+ lo sidɛ polo la Ɛnɛ-Rɔngɛlɛ.+ 17 Vɔ waki lo nɔrdɛ ndo wakete otsha la Ɛnɛ-Shɛmɛshɛ, ndo oma laasɔ, vɔ wakatshu otsha la Ngelilɔtɛ kɛlane la wodelo wa Adumima,+ ko wakaholɔ otsha lo dive+ dia Bohana+ ɔna Rubɛna. 18 Vɔ wakatetemala otsha lo nɔrdɛ l’oholola wɛlane la Araba ndo wakaholɔ otsha lo Araba. 19 Olelo akɔ wakatetemala otsha lo oholola wa lo nɔrdɛ ka Bɛtɛ-Hɔngɛla,+ ko olelo akɔ wakatokomɛ lo nɔrdɛ lo dɛɛngɔ dia Ndjale ka Lɛɛhɔ*+ otsha lo sidɛ k’ekomelo ka Jɔrdana. Ɔsɔ mbaki olelo wa lo sidɛ. 20 Jɔrdana aki olelo wa lo ɛstɛ. Ɔsɔ mbaki etenyi k’okitɔ ka tokanula ta Bɛnjamina lo ndjela nkumbo yawɔ, lo ndjela elelo awɔ wa lo wedi akɔ tshɛ.

21 Esomba wa dioho dia Bɛnjamina lo ndjela nkumbo yawɔ vɔ ɛnɛ: Jeriko, Bɛtɛ-Hɔngɛla, Emɛkɛ-Kɛzizɛ, 22 Bɛtɛ-Araba,+ Zemarayima, Bɛtɛlɛ,+ 23 Avimɛ, Para, Ofara, 24 Kɛfara-Amɔni, Ɔfɛni ndo Ngɛba:+ Esomba 12 la ngelo yawɔ.

25 Ngibiyɔna,+ Rama, Berɔtɛ, 26 Mizipɛ, Kɛfira, Moza, 27 Rɛkɛmɛ, Irɛpɛlɛ, Tarala, 28 Zela,+ Ha-Ɛlɛfu, Jɛbusi, Jɛrusalɛma,+ Ngibɛa+ ndo Kiriatɛ: Esomba 14 la ngelo yawɔ.

Ɔsɔ mbaki etenyi k’okitɔ ka tokanula ta Bɛnjamina lo ndjela nkumbo yawɔ.

19 Ko owale+ wa 2 wakakɔ le Simɛyɔna dikambo dia dioho dia Simɛyɔna+ lo ndjela nkumbo yawɔ. Ndo etenyi kawɔ k’okitɔ kaki l’atei w’etenyi k’okitɔ k’aseka Juda.+ 2 Etenyi kawɔ k’okitɔ kaki Bɛrɛ-Shɛba+ kaamɛ la Shɛba, Mɔlada,+ 3 Hazara-Shuala,+ Balahɛ, Ezɛmɛ,+ 4 Elɛtɔlada,+ Bɛtulɛ, Horima, 5 Zikilangɛ,+ Bɛtɛ-Marakabɔtɛ, Hazara-Susa, 6 Bɛtɛ-Lɛbaɔta+ ndo Sharuhɛna: Esomba 13 la ngelo yawɔ. 7 Ainɛ, Rimɔna, Etɛrɛ ndo Ashana:+ Esomba 4 la ngelo yawɔ. 8 Ndo ngelo tshɛ yakadinge esomba ɛsɔ polo la Baalata-Bɛrɛ, Rama ka lo sidɛ. Ɔsɔ mbaki etenyi k’okitɔ ka dioho dia Simɛyɔna lo ndjela nkumbo yawɔ. 9 Etenyi k’okitɔ ka tokanula ta Simɛyɔna kakɔsama oma lo etenyi k’aseka Juda, nɛ dia ɛtshi k’aseka Juda kaki woke efula le wɔ. Ɔnkɔnɛ tokanula ta Simɛyɔna wakalongola yema mɔtshi l’atei wa etenyi kawɔ k’okitɔ.+

10 Oma laasɔ, owale+ wa 3 wakakɔ le tokanula ta Zebuluna+ lo ndjela nkumbo yawɔ ndo olelo w’etenyi kawɔ k’okitɔ wakatshɔka polo la Sarida. 11 Olelo awɔ wakadɛ otsha lo owɛstɛ wa Mareɛlɛ ndo wakakomaka polo la Dabɛshɛtɛ ndo oma laasɔ, vɔ wakete otsha l’okidi wɛlane la Jɔkɛneamɛ. 12 Vɔ wakete oma la Sarida lo ɛstɛ lɛnɛ atomba wonya ko wakete otsha lo olelo wa Kisilɔta-Tabɔra ndo wakete polo la Dabɛratɛ+ ndo oma laasɔ wakadɛ otsha la Jafia. 13 Oma lɛkɔ, vɔ wakatetemala ntshɔ otsha lo ɛstɛ otsha lɛnɛ atomba wonya, otsha la Ngata-Hɛfɛrɛ,+ otsha la Etɛ-Kazina polo la Rimɔna ko wakatokomɛ la Nea. 14 Olelo akɔ wakatshimbe lo nɔrdɛ otsha la Hanatɔna ko wakatokomɛ l’Okidi wa Ifita-Ɛlɛ, 15 ndo Katata, Nahalala, Shimirɔna,+ Idala ndo Bɛtɛlɛhɛma:+ Esomba 12 la ngelo yawɔ. 16 Ɔsɔ mbaki etenyi k’okitɔ ka tokanula ta Zebuluna lo ndjela nkumbo yawɔ.+ Ɔsɔ mbaki esomba la ngelo yawɔ.

17 Owale+ wa 4 wakakɔ le Isakara dikambo dia tokanula ta Isakara+ lo ndjela nkumbo yawɔ. 18 Olelo awɔ waki la Jezɛrɛlɛ,+ Kesulɔta, Shunɛma,+ 19 Hafarayima, Shiɔna, Anaharata, 20 Rabita, Kishiyɔna, Ebɛzɛ, 21 Rɛmɛtɛ, Ɛnɛ-Nganima,+ Ɛnɛ-Hada ndo Bɛtɛ-Pazɛzɛ. 22 Olelo awɔ wakakome polo la Tabɔra+ ndo la Shahazuma la Bɛtɛ-Shɛmɛshɛ, ko olelo awɔ wakakomɛ lo Jɔrdana: Esomba 16 la ngelo yawɔ. 23 Ɔsɔ mbaki etenyi k’okitɔ ka dioho dia Isakara lo ndjela nkumbo+ yawɔ, esomba awɔ ndo ngelo yawɔ.

24 Oma laasɔ, owale+ wa 5 wakakɔ le dioho dia Ashɛrɛ+ lo ndjela nkumbo yawɔ. 25 Olelo awɔ waki la Hɛlɛkatɛ,+ Hali, Betɛnɛ, Akishafu, 26 Alamɛlɛkɛ, Amada ndo Mishala. Vɔ wakakome lo owɛstɛ wa Karamɛlɛ+ polo la Shihɔrɛ-Libinata, 27 ndo vɔ wakakalola oya lo ɛstɛ ka Bɛtɛ-Dangɔna ndo wakakome polo la Zebuluna ndo l’Okidi wa Ifita-Ɛlɛ polo lo nɔrdɛ, polo la Bɛtɛ-Emɛkɛ ndo la Neyɛlɛ ko wakakomɛ la Kabulu lo lonya la lɔmɔsɔ, 28 ndo polo la Ɛbɛrɔna, Rɛhɔba, Hamɔna ndo Kana polo la Sidɔna ka Woke.+ 29 Olelo akɔ wakakadimɔ otsha la Rama polo l’osomba wa Tura+ wodingami la mpele. Oma laasɔ, olelo akɔ wakakalola la Hɔsa ko wakatokomɛ lo ndjale, lo ɛtshi ka nkɛtɛ ka Akizibɛ, 30 Uma, Afɛkɛ+ ndo Rɛhɔba:+ Esomba 22 la ngelo yawɔ. 31 Ɔsɔ mbaki etenyi k’okitɔ ka dioho dia Ashɛrɛ lo ndjela nkumbo+ yawɔ. Ɔsɔ mbaki esomba ndo ngelo yawɔ.

32 Owale+ wa 6 wakakɔ le tokanula ta Nafɛtali dikambo dia tokanula ta Nafɛtali lo ndjela nkumbo yawɔ. 33 Olelo awɔ waki oma la Hɛlɛfu, oma l’osongo wa woke wele la Zananima,+ ndo Adami-Nekɛbɛ kaamɛ la Jabinɛlɛ polo la Lakuma, ko vɔ wakatokomɛ lo Jɔrdana. 34 Olelo akɔ wakakalola oya lo owɛstɛ, oya la Azinɔta-Tabɔra ko wakete oma lɛkɔ otsha la Hukɔka ko wakakome polo la Zebuluna lo sidɛ, polo la Ashɛrɛ lo owɛstɛ ndo polo la Juda lo Jɔrdana otsha lo ɛstɛ. 35 Ndo esomba ɛnɛ mbakadingama la mpele: Zidima, Zɛrɛ, Hamata,+ Rakata, Kinɛrɛtɛ, 36 Adamaha, Rama, Hazɔra,+ 37 Kɛdɛshɛ,+ Ɛdɛrɛi, Ɛnɛ-Hazɔra, 38 Yirɔna, Mingidala-Ɛlɛ, Hɔrɛma, Bɛtɛ-Anata ndo Bɛtɛ-Shɛmɛshɛ:+ Esomba 19 la ngelo yawɔ. 39 Ɔsɔ mbaki etenyi k’okitɔ ka dioho dia Nafɛtali lo ndjela nkumbo yawɔ,+ esomba awɔ ndo ngelo yawɔ.

40 Owale+ wa 7 wakakɔ le dioho dia Danɛ+ lo ndjela nkumbo yawɔ. 41 Olelo w’etenyi kawɔ k’okitɔ waki la Zɔra,+ Eshitaɔlɛ, Irɛ-Shɛmɛshɛ, 42 Shalabina,+ Aidjalɔna,+ Itila, 43 Elɔna, Timina,+ Ɛkɛrɔna,+ 44 Elɛtɛkɛ, Ngibɛtɔna,+ Baalata, 45 Jehudɛ, Bɛnɛ-Bɛraka, Ngata-Rimɔna,+ 46 Mɛ-Jarakɔna ndo Rakɔna kaamɛ la olelo wɛlane la Jɔpa.+ 47 Koko ɛtshi ka nkɛtɛ ka Danɛ kaki tshitshɛ efula le wɔ.+ Ɔnkɔnɛ vɔ wakatshu ndo wakatɔlɔsha Lɛshɛmɛ+ ko wakaliɔshi ndo wakalilanya la lokuwa la ta. Oma laasɔ, vɔ wakaliɔshi ko wakadjasɛ lɔkɔ ndo wakatshikitanya lokombo Lɛshɛmɛ ko wakaliɔlɛ Danɛ, lokombo la Danɛ ka tshɛwɔ.+ 48 Ɔsɔ mbaki etenyi k’okitɔ ka dioho dia Danɛ lo ndjela nkumbo yawɔ. Ɔsɔ mbaki esomba awɔ ndo ngelo yawɔ.

49 Ngasɔ mbakawashidiya nkahanya wodja oko etenyi k’okitɔ lo bɛtshi diawɔ dia nkɛtɛ. Oma laasɔ, ase Isariyɛlɛ wakasha Jashua ɔna Nuna etenyi k’okitɔ l’atei awɔ. 50 Lo ndjela didjango dia Jehowa, vɔ wakawosha Timinatɛ-Sera,+ osomba wakandalɔmbɛ lo lɛkɛ l’akona la Efrayimɛ, ko nde akake osomba ndo akadjasɛ lɔkɔ.

51 Ɔsɔ mbaki tenyi di’okitɔ diakakahanya+ ɔlɔmbɛdi Eleazara, Jashua ɔna Nuna ndo ɛtɛ wa mvudu ya washɛwɔ wa waoho w’Isariyɛlɛ lo eokelo k’owale la Shilo+ la ntondo ka Jehowa, la soko dia luudu la dipɛma l’esanganelo.+ Ko vɔ wakashidiya nkahanya wodja.

20 Oma laasɔ, Jehowa akatɛ Jashua ate: 2 “Tɛ ase Isariyɛlɛ wate: ‘Nyoyasɔnɛ esomba w’eshamelo+ wakamanyotɛ lo tshimbo ya Mɔsɛ, 3 kele ɔnɛ layodiaka onto* ɔmɔtshi aha la lolango kana aha la okonda* kalawɔ otsha lɛkɔ. Vɔ wayonga eshamelo le nyu dia ndawɔka ɔsɔmbɔyishi wa dikila.+ 4 Nde pombaka ndawɔ otsha l’osomba ɔmɔtshi l’atei w’esomba+ akɔ ndo temala la soko+ di’osomba ko nde mbutɛ dikumanyi dia l’osomba diayohokamɛ dikambo diande. Oma laasɔ, vɔ pombaka mbolongola l’osomba ndo mbosha dihole, ko nde ayodjasɛ kaamɛ la wɔ. 5 Naka ɔsɔmbɔyishi wa dikila ambowotshanya, vɔ hawohombe nkimɔ ondjakanyi ɔsɔ lo anya ande, nɛ dia nde kondjaka osekande la okonda* ndo nde kombohetshaka+ ntondo. 6 Nde pombaka mbidjasɛ l’osomba akɔ polo ndo lam’ayondosamba lo kilombo la ntondo k’olui w’anto+ ndo nde ayotshikala lɛkɔ polo lam’ayovɔ ɔlɔmbɛdi a laadiko+ wakamba l’etena kakɔ. Oma laasɔ, ondjakanyi akɔ mbeyaka ndjokalola otsha l’osomba wakandalawɔ oma lɛkɔ ndo nde mbeyaka mbɔtɔ l’osomba awɔ ndo lo luudu lande.’”+

7 Ko vɔ wakakidia* esomba ɛnɛ: Kɛdɛshɛ+ ka la Ngalileya lo lɛkɛ l’akona la Nafɛtali, Shɛkɛmɛ+ lo lɛkɛ l’akona la Efrayimɛ ndo Kiriatɛ-Arba,+ mbuta ate Hɛbɛrɔna lo lɛkɛ l’akona la Juda. 8 Lo ɛtshi ka nkɛtɛ ka Jɔrdana, lo ɛstɛ ka Jeriko, vɔ wakasɔnɛ Bezɛrɛ+ kele l’oswe lo ebamubamu ka la diko dia dikona oma lo dioho dia Rubɛna, Ramɔta+ wa lo Ngiliyadɛ oma lo dioho dia Ngada ndo Ngɔlana+ ka la Bashana oma lo dioho dia Manase.+

9 Ɔsɔ mbakayala esomba wakasɔnama dikambo di’ase Isariyɛlɛ tshɛ ndo dikambo dia angɛndangɛnda wodjashi l’atei awɔ, kele onto tshɛ layodiaka onto* ɔmɔtshi aha la okonda kalawɔke otsha lɛkɔ+ diaha nde ndjakema lo anya w’ɔsɔmbɔyishi wa dikila la ntondo ka nde nsamba lo kilombo la ntondo k’olui w’anto.+

21 Oma laasɔ, ɛtɛ wa mvudu ya washɛwɔ w’ase Lɛwi wakaye le ɔlɔmbɛdi Eleazara,+ Jashua ɔna Nuna ndo ɛtɛ wa mvudu ya washɛwɔ wa waoho w’ase Isariyɛlɛ, 2 ko wakayowatɛ la Shilo+ lo wodja wa Kanana vate: “Jehowa akadjanga lo tshimbo ya Mɔsɛ dia sho nongola esomba wa mbidjasɛ kaamɛ la ahole awɔ wa ndeshaka dongalonga.”+ 3 Ɔnkɔnɛ lo ndjela didjango dia Jehowa, ase Isariyɛlɛ wakasha ase Lɛwi esomba+ akɔ kaamɛ la ahole awɔ wa ndeshaka dongalonga oma l’etenyi kawɔ k’okitɔ.+

4 Owale wakakɔ le nkumbo y’aseka Kɔhata,+ ko ase Lɛwi waki tokanula t’ɔlɔmbɛdi Arɔna wakalongola esomba 13 lo eokelo k’owale oma lo dioho dia Juda,+ dioho dia Simɛyɔna+ ndo dioho dia Bɛnjamina.+

5 Aseka Kɔhata akina tshɛ wakalongola esomba 10 lo eokelo k’owale oma le nkumbo ya lo dioho dia Efrayimɛ,+ dioho dia Danɛ ndo k’ahende ɔtɔi ka dioho dia Manase.+

6 Aseka Ngɛrɛshɔna+ wakalongola esomba 13 lo eokelo k’owale oma le nkumbo ya lo dioho dia Isakara, dioho dia Ashɛrɛ, dioho dia Nafɛtali ndo k’ahende ɔtɔi kekina ka dioho dia Manase lo Bashana.+

7 Aseka Merari+ lo ndjela nkumbo yawɔ wakalongola esomba 12 oma lo dioho dia Rubɛna, dioho dia Ngada ndo dioho dia Zebuluna.+

8 Ngasɔ mbakasha ase Isariyɛlɛ ase Lɛwi esomba ɛsɔ ndo ahole awɔ wa ndeshaka dongalonga lo eokelo k’owale, oko wakadjanga Jehowa lo tshimbo ya Mɔsɛ.+

9 Ɔnkɔnɛ, oma lo dioho dia Juda ndo dioho dia Simɛyɔna, vɔ wakakimɔ esomba wayanga shilama nkombo+ ɛnɛ, 10 ndo wakawasha ana w’Arɔna, ase Lɛwi wa lo nkumbo y’aseka Kɔhata, nɛ dia le wɔ kakakɔ owale ntondo. 11 Vɔ wakawasha Kiriatɛ-Arba+ (Arba aki she Anaka), mbuta ate Hɛbɛrɔna,+ lo lɛkɛ l’akona la Juda ndo ahole awɔ wa ndeshaka dongalonga. 12 Koko vɔ wakasha Kalɛba ɔna Jefune ɛtshi ka nkɛtɛ k’osomba akɔ ndo ngelo yosukanyi la wɔ dia monga yande.+

13 Vɔ wakasha ana w’ɔlɔmbɛdi Arɔna osomba w’eshamelo dikambo di’ondjakanyi,+ mbuta ate Hɛbɛrɔna+ la ahole awɔ wa ndeshaka dongalonga kaamɛ ndo Libina+ la ahole alɔ wa ndeshaka dongalonga, 14 Jatira+ la ahole ayɔ wa ndeshaka dongalonga, Eshitɛmɔa+ la ahole awɔ wa ndeshaka dongalonga, 15 Hɔlɔna+ la ahole awɔ wa ndeshaka dongalonga, Debirɛ+ la ahole adiɔ wa ndeshaka dongalonga, 16 Ainɛ+ la ahole atɔ wa ndeshaka dongalonga, Juta+ la ahole ayɔ wa ndeshaka dongalonga ndo Bɛtɛ-Shɛmɛshɛ la ahole atɔ wa ndeshaka dongalonga: Esomba 9 oma lo waoho asɔ 2.

17 Oma lo dioho dia Bɛnjamina: Ngibiyɔna+ la ahole atɔ wa ndeshaka dongalonga, Ngɛba la ahole atɔ wa ndeshaka dongalonga,+ 18 Anatɔta+ la ahole atɔ wa ndeshaka dongalonga ndo Alamɔna la ahole atɔ wa ndeshaka dongalonga: Esomba 4.

19 Esomba tshɛ wakawasha ɛlɔmbɛdi tokanula ta Arɔna waki esomba 13 kaamɛ la ahole awɔ wa ndeshaka dongalonga.+

20 Nkumbo nkina tshɛ y’aseka Kɔhata yele l’atei w’ase Lɛwi yakalongola esomba lo eokelo k’owale oma lo dioho dia Efrayimɛ. 21 Vɔ wakawasha osomba w’eshamelo dikambo di’ondjakanyi,+ mbuta ate Shɛkɛmɛ+ la ahole ayɔ wa ndeshaka dongalonga wele lo lɛkɛ l’akona la Efrayimɛ, Ngezɛrɛ+ la ahole atɔ wa ndeshaka dongalonga, 22 Kibizaima la ahole atɔ wa ndeshaka dongalonga ndo Bɛtɛ-Hɔrɔna+ la ahole atɔ wa ndeshaka dongalonga: Esomba 4.

23 Oma lo dioho dia Danɛ: Elɛtɛkɛ la ahole awɔ wa ndeshaka dongalonga, Ngibɛtɔna la ahole atɔ wa ndeshaka dongalonga, 24 Aidjalɔna+ la ahole atɔ wa ndeshaka dongalonga, Ngata-Rimɔna la ahole atɔ wa ndeshaka dongalonga: Esomba 4.

25 Oma lo k’ahende ɔtɔi ka dioho dia Manase: Tanaka+ la ahole atɔ wa ndeshaka dongalonga ndo Ngata-Rimɔna la ahole atɔ wa ndeshaka dongalonga: Esomba 2.

26 Esomba tshɛ kaamɛ la ahole awɔ wa ndeshaka dongalonga wakalongola nkumbo nkina tshɛ y’aseka Kɔhata waki 10.

27 Aseka Ngɛrɛshɔna+ wa lo nkumbo y’ase Lɛwi wakalongola osomba w’eshamelo oma le k’ahende ɔtɔi ka dioho dia Manase dikambo di’ondjakanyi, mbuta ate Ngɔlana+ ka la Bashana la ahole atɔ wa ndeshaka dongalonga ndo Beshɛtɛra la ahole atɔ wa ndeshaka dongalonga: Esomba 2.

28 Oma lo dioho dia Isakara:+ Kishiyɔna la ahole atɔ wa ndeshaka dongalonga, Dabɛratɛ+ la ahole adiɔ wa ndeshaka dongalonga, 29 Jaramuta la ahole ayɔ wa ndeshaka dongalonga ndo Ɛnɛ-Nganima la ahole awɔ wa ndeshaka dongalonga: Esomba 4.

30 Oma lo dioho dia Ashɛrɛ:+ Mishala la ahole atɔ wa ndeshaka dongalonga, Abidɔna la ahole atɔ wa ndeshaka dongalonga, 31 Hɛlɛkatɛ+ la ahole awɔ wa ndeshaka dongalonga ndo Rɛhɔba+ la ahole atɔ wa ndeshaka dongalonga: Esomba 4.

32 Oma lo dioho dia Nafɛtali: Osomba w’eshamelo+ dikambo di’ondjakanyi, mbuta ate Kɛdɛshɛ+ ka la Ngalileya la ahole atɔ wa ndeshaka dongalonga, Hamɔta-Dɔra la ahole awɔ wa ndeshaka dongalonga ndo Karatana la ahole atɔ wa ndeshaka dongalonga: Esomba 3.

33 Esomba tshɛ w’aseka Ngɛrɛshɔna lo ndjela nkumbo yawɔ waki 13 kaamɛ la ahole awɔ wa ndeshaka dongalonga.

34 Nkumbo y’aseka Merari,+ ase Lɛwi akina tshɛ wakalongola esomba ɛnɛ oma lo dioho dia Zebuluna:+ Jɔkɛneamɛ+ la ahole ayɔ wa ndeshaka dongalonga, Karata la ahole atɔ wa ndeshaka dongalonga, 35 Dimina la ahole adiɔ wa ndeshaka dongalonga ndo Nahalala+ la ahole atɔ wa ndeshaka dongalonga: Esomba 4.

36 Oma lo dioho dia Rubɛna: Bezɛrɛ+ la ahole atɔ wa ndeshaka dongalonga, Jahaza la ahole ayɔ wa ndeshaka dongalonga,+ 37 Kɛdɛmɔtɛ la ahole atɔ wa ndeshaka dongalonga ndo Mefatɛ la ahole atɔ wa ndeshaka dongalonga: Esomba 4.

38 Oma lo dioho dia Ngada:+ Osomba w’eshamelo dikambo di’ondjakanyi, mbuta ate Ramɔta wa la Ngiliyadɛ+ la ahole atɔ wa ndeshaka dongalonga, Mahanayima+ la ahole atɔ wa ndeshaka dongalonga, 39 Hɛshibɔna+ la ahole awɔ wa ndeshaka dongalonga ndo Jazɛrɛ+ la ahole ayɔ wa ndeshaka dongalonga: Tshɛ tshɛ esomba 4.

40 Esomba tshɛ wakalongola aseka Merari lo eokelo k’owale lo ndjela nkumbo yawɔ, nkumbo nkina tshɛ y’ase Lɛwi waki esomba 12.

41 Esomba tshɛ w’ase Lɛwi waki l’atei wa wɛnɛ w’ase Isariyɛlɛ waki esomba 48 kaamɛ la ahole awɔ wa ndeshaka dongalonga.+ 42 Osomba l’osomba waki la ahole awɔ wa ndeshaka dongalonga lo emamu awɔ tshɛ ndo ngasɔ mbakidiɔ lo esomba akɔ tshɛ.

43 Ɔnkɔnɛ, Jehowa akasha ase Isariyɛlɛ wodja w’otondo wakandatshibe dia mbisha watshɛwɔ,+ ko vɔ wakɔshi wodja akɔ ndo wakadjasɛ lɔkɔ.+ 44 Ndo nto, Jehowa akawasha momuya lo wedi akɔ tshɛ, oko wakandatshibɛ watshɛwɔ+ ndo ndooko kaanga otunyi awɔ 1 wakakoke mbalɔsha.+ Jehowa akakimɔ atunyi awɔ tshɛ lo anya awɔ.+ 45 Ndooko kaanga daka* 1 diakete pa lo alaka tshɛ w’amɛna wakalake Jehowa ase luudu l’Isariyɛlɛ. Vɔ tshɛ wakakotshama.+

22 Oma laasɔ, Jashua akasanganya aseka Rubɛna, aseka Ngada ndo k’ahende ɔtɔi ka dioho dia Manase 2 ko akawatɛ ate: “Nyu nyambosala kɛnɛ tshɛ kakanyodjangɛ+ Mɔsɛ okambi wa Jehowa ndo nyambokitanyiya dui diami lo kɛnɛ tshɛ kakamanyodjangɛ.+ 3 L’etena kɛnɛ tshɛ polo ndo ɛlɔ,+ nyu hanyohe anangɛnyu ndo nyambokotsha didjango dia Jehowa Nzambi+ kanyu. 4 Kakianɛ, Jehowa Nzambi kanyu ambosha anangɛnyu momuya oko wakandaalake.+ Ɔnkɔnɛ, nyu mbeyaka nkalola lo mvudu yanyu y’apɛma lo ɛtshi ka nkɛtɛ kakanyosha Mɔsɛ okambi wa Jehowa lo wedi okina* wa Jɔrdana.+ 5 Dikambo ɔtɔi ele, nyodje yimba dia nkitanyiya dimɛna dimɛna wadjango ndo Ɛlɛmbɛ wakanyosha+ Mɔsɛ okambi wa Jehowa lo nanga Jehowa Nzambi kanyu,+ lo nkɛndakɛnda lo mboka yande tshɛ,+ lo nkitanyiya wadjango+ ande, lo mbomamema+ ndo lo mbokambɛ+ la otema anyu tshɛ ndo la anima*+ anyu tshɛ.”

6 Oma laasɔ, Jashua akaatshɔkɔla ndo akaakɛndja, ko vɔ wakatshu lo mvudu yawɔ y’apɛma. 7 Mɔsɛ akasha k’ahende ɔtɔi kɛmɔtshi ka dioho dia Manase etenyi kawɔ k’okitɔ la Bashana,+ ndo Jashua akayosha k’ahende ɔtɔi kekina ka dioho dia Manase ɛtshi ka nkɛtɛ lo owɛstɛ wa Jɔrdana+ kaamɛ la anangɛwɔ. Ndo nto, lam’akaakɛndja Jashua otsha lo mvudu yawɔ y’apɛma, nde akaatshɔkɔla 8 ndo akawatɛ ate: “Nyokalole otsha lo mvudu yanyu y’apɛma la ɛngɔnyi efula, la dongalonga efula, la mfɛsa ndo la paonyi, la nkonga ndo la mbolo kaamɛ la ahɔndɔ efula ka mamba.+ Nyotokahane diangɔ dia dimbo+ di’atunyi anyu kaamɛ la anangɛnyu.”

9 L’ɔkɔngɔ wa laasɔ, aseka Rubɛna, aseka Ngada ndo k’ahende ɔtɔi ka dioho dia Manase wakakakitɔna l’ase Isariyɛlɛ akina oma la Shilo lo wodja wa Kanana, ko wakakalola lo ɛtshi ka nkɛtɛ ka Ngiliyadɛ,+ ɛtshi ka nkɛtɛ kakawawasha dia mbidjasɛ lo ndjela kɛnɛ kakadjanga Jehowa lo tshimbo ya Mɔsɛ.+ 10 Lam’akawakome lo ɛtshi ka nkɛtɛ ka Jɔrdana lo wodja wa Kanana, aseka Rubɛna, aseka Ngada ndo k’ahende ɔtɔi ka dioho dia Manase wakasale elambwelo ka woke ndo ka diambo lɛkɔ l’omamu wa Jɔrdana. 11 L’ɔkɔngɔ diko, ase Isariyɛlɛ akina wakayoka dikambo sɔ+ ndo wakate vate: “Ohonyenda, aseka Rubɛna, aseka Ngada ndo k’ahende ɔtɔi ka dioho dia Manase wambosala elambwelo lo olelo wa wodja wa Kanana lo ɛtshi ka nkɛtɛ ka Jɔrdana lo wedi w’ase Isariyɛlɛ.” 12 Lam’akoke ase Isariyɛlɛ dikambo sɔ, olui w’otondo w’ase Isariyɛlɛ wakasangana la Shilo+ dia taalɔsha.

13 Ko ase Isariyɛlɛ wakatome Finehasi+ ɔna ɔlɔmbɛdi Eleazara le aseka Rubɛna, aseka Ngada ndo k’ahende ɔtɔi ka dioho dia Manase lo ɛtshi ka nkɛtɛ ka Ngiliyadɛ, 14 ko nde akatshu la ewandji 10, owandji ɔtɔi ɔtɔi oma lo luudu tshɛ la washɛwɔ la lo waoho tshɛ w’Isariyɛlɛ, onto l’onto aki ɔtɛ wa luudu la she l’atei wa nunu di’ase Isariyɛlɛ.+ 15 Lam’akawakome le aseka Rubɛna, aseka Ngada ndo k’ahende ɔtɔi ka dioho dia Manase lo ɛtshi ka nkɛtɛ ka Ngiliyadɛ, vɔ wakawatɛ vate:

16 “Olui w’otondo wa Jehowa mbata vate: ‘Lande na kambonyoshisha kɔlamelo+ le Nzambi k’Isariyɛlɛ lo nsala nganɛ? Ɛlɔ, nyu nyambotshika ndjela Jehowa lo woho wambonyoyasalɛ elambwelo ndo wambonyɔtɔmbɔkwɛ Jehowa.+ 17 Onde munga ka la Pɛɔrɛ hakoki le so? Sho tatayaɛdia oma lɔkɔ polo ndo ɛlɔ kaanga mbele mpokoso kakakomɛ olui w’anto wa Jehowa.+ 18 Onde nyolanga ntshika dia ndjela Jehowa ɛlɔ? Naka ɛlɔ nyu tɔmbɔkwɛ Jehowa, kete loyi nde ayomalɛ olui w’otondo w’ase Isariyɛlɛ.+ 19 Ko naka l’ɔtɛ w’ɔnɛ ɛtshi ka nkɛtɛ kakawanyosha kekɔ mindo, kete nyotehɔ otsha lo wodja+ wa Jehowa lɛnɛ odjashi+ tabɛrnaklɛ ka Jehowa ndo nyoyodjasɛ l’atei aso, koko tanyɔtɔmbɔkwɛke Jehowa ndo tanyotokonyake atɔmbɔki lo nyu ndjasalɛ elambwelo kekina laadiko dia elambwelo ka Jehowa Nzambi+ kaso. 20 Etena kakashisha Akana+ ɔna Zera kɔlamelo lo kɛnɛ kendana la kɛnɛ kakahombe ndanyema, shi Nzambi akomalɛ olui w’otondo w’Isariyɛlɛ?+ Ndo nde komvɔ ndamɛ oto l’ɔtɛ wa munga kande.’”+

21 Ko aseka Rubɛna, aseka Ngada ndo k’ahende ɔtɔi ka dioho dia Manase wakakadimola ɛtɛ wa nunu di’ase Isariyɛlɛ+ vate: 22 “Jehowa Nzambi ka waa nzambi!* Jehowa+ Nzambi ka waa nzambi! Nde mbeyaka ndo Isariyɛlɛ ayeya. Naka tambɔtɔmbɔkɔ ndo tamboshisha kɔlamelo le Jehowa, kete tatoshimbamɛke lushi l’ɛlɔ. 23 Naka takasale elambwelo la oyango wa ntshika ndjela Jehowa ndo dia nambolaka elambo wa lotshumba, elambo wa ntɔngɔ ndo elambo w’osanga lɔkɔ, kete Jehowa katosha dilanya.+ 24 Keema, l’ɔtɛ w’ɔkɔkɔ okina mbosadiso dikambo nɛ, nɛ dia sho takɛnyi shate: ‘Lo nshi yayaye, ananyu wayoyotɛ anaso vate: “Kakɔna kasanyu la Jehowa Nzambi k’Isariyɛlɛ? 25 Jehowa akadje Jɔrdana olelo lam’asaso la nyu, nyu aseka Rubɛna ndo aseka Ngada. Ndooko kasanyu la Jehowa.” Ko ananyu wayoyoshimba anaso dia ntɛmɔla* Jehowa.’

26 “Ɔnkɔnɛ takate shate: ‘Nyɛsɔ tosale tshɛ dia nsala elambwelo, aha dikambo di’elambo wa lotshumba kana weshasha, 27 koko dia diɔ monga ɔmɛnyi lam’asanyu la so+ ndo lam’asa tokanula* ta l’ɔkɔngɔ aso dia tayokotshaka ɔkɛndɛ aso le Jehowa la ntondo kande la elambo+ aso wa lotshumba, la weshasha aso ndo la elambo aso w’osanga, diaha ananyu ndjotɛ anaso lo nshi yayaye ɔnɛ: “Ndooko kasanyu la Jehowa.”’ 28 Diakɔ diakatate shate: ‘Naka lo nshi yayaye vɔ totɛ sho la tokanula* taso ngasɔ, kete tayowatɛ shate: “Nyende efanelo ka elambwelo ka Jehowa kakasale watshɛso, aha dikambo di’elambo wa lotshumba kana dia weshasha, koko dia diɔ monga ɔmɛnyi lam’asanyu la so.”’ 29 Sho bu la kanyi ya tɔmbɔkwɛ Jehowa ndo ntshika ndjela Jehowa+ lo woho wambotosala elambwelo dikambo dia elambo wa lotshumba, elambo wa ntɔngɔ ndo weshasha, laadiko dia elambwelo ka Jehowa Nzambi kaso kele la ntondo ka tabɛrnaklɛ!”+

30 Lam’akoke ɔlɔmbɛdi Finehasi, ewandji w’olui w’anto ndo ɛtɛ wa nunu di’ase Isariyɛlɛ waki kaamɛ la nde kɛnɛ kakate tokanula ta Rubɛna, ta Ngada ndo k’ahende ɔtɔi ka dioho dia Manase, vɔ wakangɛnangɛna.+ 31 Ko Finehasi ɔna ɔlɔmbɛdi Eleazara akatɛ tokanula ta Rubɛna, ta Ngada ndo ta Manase ate: “Ɛlɔ, tambɛna dia Jehowa ekɔ l’atei aso, nɛ dia tambɛna dia nyu hanyoshishisha kɔlamelo le Jehowa lo nsala dui nɛ. Wonya ɔnɛ nyu nyamboshimbɛ Isariyɛlɛ oma lo lonya la Jehowa.”

32 Ko Finehasi ɔna ɔlɔmbɛdi Eleazara nde l’ewandji wakakalola oma le aseka Rubɛna la aseka Ngada lo ɛtshi ka nkɛtɛ ka Ngiliyadɛ otsha lo wodja wa Kanana, ndo vɔ wakatotɛ ase Isariyɛlɛ ɛtɛkɛta ɛsɔ. 33 Ko ase Isariyɛlɛ wakangɛnangɛna kɛnɛ kakawawatɛ. Oma laasɔ, ase Isariyɛlɛ wakatombola Nzambi ndo vɔ kombuta ndooko dui nto dia ntshɔ tɔlɔsha aseka Rubɛna ndo aseka Ngada dia tolanya ɛtshi ka nkɛtɛ kakawadjasɛ.

34 Ɔnkɔnɛ aseka Rubɛna la aseka Ngada wakɔlɛ elambwelo kakɔ lokombo,* nɛ dia “tɔ kekɔ ɔmɛnyi lam’asaso dia Jehowa kele Nzambi ka mɛtɛ.”

23 Nshi efula l’ɔkɔngɔ wa Jehowa mbisha ase Isariyɛlɛ momuya+ oma le atunyi awɔ tshɛ wakaadinge, lam’aki Jashua ambotshunda ndo aya osombe wa lokosombe,+ 2 Jashua akelɛ ase Isariyɛlɛ+ tshɛ, dikumanyi diawɔ, ɛtɛ awɔ, toshushi+ tawɔ ndo topita tawɔ, ko akawatɛ ate: “Dimi lambotshunda ndo laya osombe wa lokosombe. 3 Nyakɛnyi nyuamɛ kɛnɛ tshɛ kakasalɛ Jehowa Nzambi kanyu wedja ɛnɛ tshɛ lo dikambo dianyu, nɛ dia Jehowa Nzambi kanyu kakanyɔlwɛka ta.+ 4 Nyende, dimi lakanyokahanya* bɛtshi dia nkɛtɛ dia wedja wakatshikala lo eokelo k’owale+ oko etenyi k’okitɔ dikambo dia waoho+ anyu, mbidja ndo bɛtshi dia nkɛtɛ dia wedja tshɛ wakanyalanya,+ ntatɛ oma lo Jɔrdana polo lo Ndjale ka woke* lo owɛstɛ.* 5 Jehowa Nzambi kanyu kakayawatshanyaka oma la ntondo kanyu+ ndo nde akawaonola* dikambo dianyu, ko nyakɔshi wodja awɔ, oko wakanyolake+ Jehowa Nzambi kanyu.

6 “Wonya ɔnɛ, nyu pombaka monga la dihonga di’efula dia nkitanyiya ndo ndjela kɛnɛ tshɛ kofundami lo dibuku di’Ɛlɛmbɛ+ wa Mɔsɛ lo mbewɔ diaha ntakɔ awui akɔ lo mbɛtɔla lo lonya l’omi kana la lɔmɔsɔ,+ 7 lo mbewɔ dia ndjasɔhanya la wedja+ ɛnɛ wakatshikala l’atei anyu. Hanyohombe pondjo nimola kaanga nimola nkombo ya tozambizambi+ tawɔ kana ntshiba lo lokombo la tɔ, ndo hanyohombe pondjo tikambɛ kana tikusamɛ.+ 8 Koko nyu pombaka mamema Jehowa Nzambi+ kanyu oko wasalanyu polo ndo ɛlɔ. 9 Jehowa ayotshanya wedja wa weke ndo wa wolo oma la ntondo kanyu,+ nɛ dia ndooko onto lambonga la akoka wa nshika ekolo la ntondo kanyu polo ndo ɛlɔ.+ 10 Pami 1 keto l’atei anyu ayotshanya kinunu+ (1 000), nɛ dia Jehowa Nzambi kanyɔlwɛ ta,+ oko wakandanyolake.+ 11 Ɔnkɔnɛ, nyoyalamake tena tshɛ*+ lo nangaka Jehowa Nzambi+ kanyu.

12 “Ko naka nyu nkalola ɛkɔngɔkɔngɔ ndo mamema kɛnɛ kakatshikala+ oma lo wedja ɛsɔ wotshikadi l’atei anyu ndo nyu mbidja sheke+ ya tshukanaka la wɔ ndo mbɔtɔnɛka la wɔ, 13 nyu pombaka mbeya la eshikikelo tshɛ dia Jehowa Nzambi kanyu hatotetemala mbitshanya* wedja akɔ oma la ntondo kanyu.+ Vɔ wayonga tshondo y’ɔtɛyi ndo djonga le nyu ndo lofimbɔ lo mpandju yanyu+ ndo atɛndɛ lo washo anyu polo lam’ayonyoshila oshiki lo wodja wa dimɛna ɔnɛ wambonyosha Jehowa Nzambi kanyu.

14 “Nyende, dimi laya suke la mvɔ* ndo nyu mbeyaka dimɛna la otema anyu tshɛ ndo la anima* anyu tshɛ dia ndooko dui 1 lo alaka tshɛ w’amɛna wakanyolake Jehowa Nzambi kanyu diaki kokotshama. Vɔ tshɛ wakakotshama le nyu. Ndooko kaanga dui 1 diakete pa.+ 15 Koko oko wele alaka tshɛ w’amɛna wakanyolake Jehowa Nzambi kanyu wakakotshama, ngasɔ kayonyela+ Jehowa mpokoso tshɛ yakandalake* ndo ngasɔ kayondonyoshila oshiki lo wodja wa dimɛna ɔnɛ wambonyosha+ Jehowa Nzambi kanyu. 16 Naka nyu mɔnyɔla sheke ya Jehowa Nzambi kanyu yakandanyodjangɛ dia nyu nama ndo naka nyu ntshɔ dia tokambɛ tozambizambi tokina ndo tikusamɛ, kete nkɛlɛ ka Jehowa kadɔdɔ kayoya le nyu,+ ko nyayoshilama oshiki esadi eto lo wodja wa dimɛna wamondonyosha.”+

24 Oma laasɔ, Jashua akasanganya waoho tshɛ w’Isariyɛlɛ la Shɛkɛmɛ ndo akelɛ dikumanyi dia l’Isariyɛlɛ, ɛtɛ awɔ, toshushi tawɔ ndo topita+ tawɔ, ko vɔ wakemala la ntondo ka Nzambi ka mɛtɛ. 2 Jashua akatɛ wodja w’otondo ate: “Jehowa Nzambi k’Isariyɛlɛ kata ate: ‘Lo wedi okina w’Ɔkɛdi* mbakadjasɛka watshɛnyu+ ambeta edja efula,+ mbuta ate Tɛra, she Abrahama ndo she Nahɔra. Vɔ wakakambɛka tozambizambi+ tokina.

3 “‘L’ɔkɔngɔ diko, dimi lakɔshi tshɛnyu Abrahama+ oma lo wedi okina w’Ɔkɛdi,* ko lakawetshetsha lo wodja wa Kanana w’otondo ndo lakafudia tokanula*+ tande. Dimi lakawosha Isaka.+ 4 Oma laasɔ, dimi lakasha Isaka Jakɔbɔ nde la Esao.+ L’ɔkɔngɔ diko, dimi lakasha Esao Dikona dia Seirɛ dia diɔ monga diande,+ ko Jakɔbɔ l’anande wakaholɔ otsha l’Edjibito.+ 5 L’ɔkɔngɔ wa laasɔ, dimi lakayotoma Mɔsɛ nde l’Arɔna+ ndo lakasoya Edjibito la kɛnɛ kakamasale l’atei awɔ,+ ko dimi lakanyotondja. 6 Lam’akamayatondjaka washɛnyu oma l’Edjibito+ ndo lam’akanyakome lo ndjale, ase Edjibito wakayatshanyaka washɛnyu la pusupusu ya ta ndo la ambahemi wa mfalasa polo lo Ndjale ka Beela.+ 7 Ko vɔ wakatatɛ ndelɛ Jehowa,+ ɔnkɔnɛ nde akadje wodjima lam’asanyu l’ase Edjibito ndo akela ndjale dia tɔ mbakukumɛ,+ ndo washo anyu nyuamɛ wakɛnyi kɛnɛ kakamasale l’Edjibito.+ Oma laasɔ, nyakayodjasɛ l’oswe wa shɛnga ɛnɔnyi*+ efula.

8 “‘Dimi lakanyela lo ɛtshi ka nkɛtɛ k’ase Amɔra wakadjasɛka lo wedi okina* wa Jɔrdana, ko vɔ wakanyɔlɔsha. Koko dimi lakaakimɔ lo anya anyu,+ diakɔ diakanyɔshi wodja awɔ ndo dimi lakaashile oshiki oma la ntondo kanyu.+ 9 Ko Balaka ɔna Zipɔrɛ nkumekanga ka Mɔaba akaye dia ndjɔlɔsha Isariyɛlɛ. Ɔnkɔnɛ, nde akelɛ Balama ɔna Beɔrɛ dia ndjonyodja mananu.+ 10 Koko dimi kompokamɛ Balama.+ Ɔnkɔnɛ, nde akanyɔtshɔkɔla mbala ko mbala+ ndo dimi lakanyotshungola oma lo anya ande.+

11 “‘Oma laasɔ, nyakatehɔ Jɔrdana+ ko nyakaye la Jeriko. Ewandji* wa la Jeriko,+ ase Amɔra, ase Perizi, ase Kanana, ase Hiti, ase Ngiringashɛ, ase Hivi ndo ase Jɛbusɛ wakanyɔlɔsha, koko dimi lakaakimɔ lo anya anyu.+ 12 Ɔnkɔnɛ dimi lakatome ɔkɔmwɛlɔ la ntondo kanyu, ko vɔ wakaalawoya oma la ntondo kanyu,+ mbuta ate nkumi ya dikanga 2 y’ase Amɔra. Dui sɔ kosalema la lokuwa lanyu la ta kana la ota anyu.+ 13 Dimi lakanyosha wodja wakinyu kɔmɛna paa ndo esomba wakinyu kombika,+ ko nyakadjasɛ lɔkɔ. Nyekɔ lo ndɛ diangɔ di’oma lo dikambɔ dia vinyɔ ndo di’ɔlivɛ diakinyu komonɛ.’+

14 “Ɔnkɔnɛ, nyoke Jehowa wɔma ndo nyookambe la olowanyi* ndo la kɔlamelo,*+ ndo nyonya tozambizambi takakambɛka watshɛnyu lo wedi okina w’Ɔkɛdi* ndo l’Edjibito,+ kele nyokambe Jehowa. 15 Naka nyu mɛnaka kɔlɔ dia kambɛ Jehowa, nyɔsɔnɛ nyuamɛ ɛlɔ ɔnɛ layonyokambɛka,+ oyadi tozambizambi takakambɛka watshɛnyu lo wedi okina w’Ɔkɛdi*+ kana tozambizambi t’ase Amɔra tele lo wodja wodjashinyu.+ Koko dimi l’ase luudu lami tayokambɛka Jehowa.”

16 Ko wodja wakakadimola vate: “Sho bu la kanyi ya mboka Jehowa ɔkɔngɔ ko kambɛ tozambizambi tokina. 17 Jehowa Nzambi kaso kakatondja watshɛso oma lo wodja w’Edjibito,+ oma lo luudu la lɔhɔmbɔ+ ndo nde kakasale tolembetelo ta weke tɔsɔ lo washo aso+ ndo nde kakayatɔlɔmbɔlaka lo mboka k’otondo kakatayayaka ndo l’atei w’anto tshɛ wakatayetaka.+ 18 Jehowa akatshanya anto tshɛ, mbidja ndo ase Amɔra wakadjasɛka lo wodja ɔnɛ la ntondo kaso. Ɔnkɔnɛ, sho lawɔ tayokambɛka Jehowa, nɛ dia nde kele Nzambi kaso.”

19 Oma laasɔ, Jashua akatɛ wodja ate: “Nyu hanyokoke kambɛ Jehowa, nɛ dia nde ekɔ Nzambi k’ekila;+ nde ekɔ Nzambi kalɔmba dia mbomamema+ paka ndamɛ oto. Nde hatonyokimwɛ munga* yanyu ndo pɛkato yanyu.+ 20 Naka nyu mboka Jehowa ɔkɔngɔ ko kambɛ tozambizambi t’ase wedja ekina, kete nde lawɔ ayonyoka ɔkɔngɔ ndo ayonyoshila oshiki l’ɔkɔngɔ wa nyosalɛ+ ɔlɔlɔ.”

21 Koko wodja wakatɛ Jashua vate: “Keema, sho tayokambɛka Jehowa!”+ 22 Ɔnkɔnɛ Jashua akatɛ wodja ate: “Nyuamɛ nyekɔ ɛmɛnyi lo dikambo dianyu dia nyuamɛ mbambɔsɔna dia kambɛ Jehowa.”+ Ko vɔ wakate vate: “Sho tekɔ ɛmɛnyi.”

23 “Laasɔ nyonya tozambizambi t’ase wedja ekina tele l’atei anyu ndo nyɛdiya etema anyu otsha le Jehowa Nzambi k’Isariyɛlɛ.” 24 Ko wodja wakatɛ Jashua vate: “Sho tayokambɛka Jehowa Nzambi kaso ndo tayokitanyiyaka dui diande!”

25 Ko Jashua akadje sheke nde la wodja lushi lɔsɔ ndo akashikikɛ didjango ndo ɔlɛmbɛ lo dikambo diawɔ la Shɛkɛmɛ. 26 Oma laasɔ, Jashua akafunde awui anɛ lo dibuku di’Ɛlɛmbɛ wa Nzambi+ ndo akɔshi dive+ dia woke ko akadiemɛ l’ɛse k’osongo wa shaka wele suke la tɛmpɛlɔ k’ekila kaki Jehowa.

27 Jashua akatɛ anto tshɛ ate: “Nyende, dive nɛ diayonga ɔmɛnyi lo dikambo diaso,+ nɛ dia diɔ diamboka kɛnɛ tshɛ kakatotɛ Jehowa ndo diɔ diayonga ɔmɛnyi lo dikambo dianyu diaha nyu manguna Nzambi kanyu.” 28 Ko Jashua akahandjola anto, onto l’onto otsha lo etenyi kande k’okitɔ.+

29 L’ɔkɔngɔ w’akambo asɔ, Jashua ɔna Nuna, okambi wa Jehowa akavu ele la ɛnɔnyi 110.+ 30 Ko vɔ wakookundɛ lo ɛtshi ka nkɛtɛ ka etenyi kande k’okitɔ la Timinatɛ-Sera+ kele lo lɛkɛ l’akona la Efrayimɛ, lo nɔrdɛ ka Dikona dia Ngashɛ. 31 Ase Isariyɛlɛ wakatetemala kambɛ Jehowa lo nshi tshɛ ya Jashua ndo nshi tshɛ ya dikumanyi diakatetemala nsɛna l’ɔkɔngɔ wa Jashua ndo diakeye kɛnɛ tshɛ kakasale Jehowa lo wahɔ w’ase Isariyɛlɛ.+

32 Wakakundɛ weka wa Yɔsɛfu+ wakaye l’ase Isariyɛlɛ oma l’Edjibito la Shɛkɛmɛ lo ɛtshi ka nkɛtɛ kakasombe Jakɔbɔ oma le ana wa Hamɔra,+ she Shɛkɛmɛ la falanga+ y’ekenga 100, ko tɔ kakayala etenyi k’okitɔ k’ana wa Yɔsɛfu.+

33 Ndo nto, Eleazara ɔna Arɔna akavu.+ Vɔ wakookundɛ lo kio nakona ya ɔnande+ Finehasi yakandalongola lo lɛkɛ l’akona la Efrayimɛ.