EMBADI
1 L’ɔkɔngɔ wa nyɔi ka Jashua,+ ase Isariyɛlɛ* wakambola Jehowa vate:+ “Akɔna l’atei aso ayeta la ntondo dia tɔlɔsha ase Kanana?” 2 Jehowa akakadimola ate: “Juda kayeta la ntondo.+ Nyolonge, dimi layokimɔ* bɛtshi diakɔ dia nkɛtɛ l’anya ande.” 3 Oma laasɔ, Juda akatɛ ɔnango Simɛyɔna ate: “Yete totshu lo ɛtshi ka nkɛtɛ kakawambisha*+ dia tɔlɔsha ase Kanana, ko dimi layoyotshɔ la yɛ lo ɛtshi ka nkɛtɛ kakawakosha.” Ko Simɛyɔna akatshu la nde.
4 Lam’akatshu Juda, Jehowa akakimɔ ase Kanana ndo ase Perizi l’anya ande,+ ko nde akalɛndja apami nunu dikumi (10 000) la Bezɛkɛ. 5 Vɔ wakatane Adɔni-Bezɛkɛ la Bezɛkɛ ndo wakɔɔlɔsha lɛkɔ ko wakalɛndja ase Kanana+ ndo ase Perizi.+ 6 Lam’akalawɔ Adɔni-Bezɛkɛ, vɔ wakawotshanya ko wakatowonda ko wakoohembola mpita ya weke ya l’anya ndo ya lo ekolo. 7 Ko Adɔni-Bezɛkɛ akate ate: “Nkumi ya dikanga 70 yekɔ yakahembɔma mpita ya weke ya l’anya ndo ya lo ekolo yatɔngɔna mbo ya ndɛ l’ɛse ka mɛsa ami. Oko wakamasale kambomfuta Nzambi.” L’ɔkɔngɔ wa laasɔ, vɔ wakatshu la nde la Jɛrusalɛma,+ ko nde akatovɔ lɛkɔ.
8 Ndo nto, apami w’aseka Juda wakalɔsha Jɛrusalɛma+ ko wakayiɔshi. Vɔ wakayilanya la lokuwa la ta ndo wakatshumbe osomba la dja. 9 L’ɔkɔngɔ diko, apami w’aseka Juda wakayotshɔ tɔlɔsha ase Kanana wakadjasɛka lo lɛkɛ l’akona, Nɛngɛbɛ ndo Shɛfɛla.+ 10 Ɔnkɔnɛ, Juda akalɔsha ase Kanana wakadjasɛka la Hɛbɛrɔna (Hɛbɛrɔna akelamɛka ntondo ɔnɛ Kiriatɛ-Arba), ko vɔ wakadiake Sheshai, Ahimana ndo Talamai.+
11 Oma lɛkɔ, vɔ wakatshu tɔlɔsha ase Debirɛ.+ (Debirɛ akelamɛka ntondo ɔnɛ Kiriatɛ-Sɛfɛrɛ.)+ 12 Ko Kalɛba+ akate ate: “Onto layɔlɔsha Kiriatɛ-Sɛfɛrɛ ndo layokiɔsa, dimi layowosha ɔnami Akisa wadi.”+ 13 Ko Otinyɛlɛ+ ɔna Kenazɛ,+ kose aki Kalɛba akakiɔshi. Ɔnkɔnɛ nde akawosha ɔnande Akisa wadi. 14 Lam’akatatshɔka Akisa otsha lakande, nde akɔɔsɛngasɛnga dia tɔlɔmba she ɛtshi ka nkɛtɛ. Oma laasɔ, nde akaholɔ oma lo mponda kande.* Kalɛba akawombola ate: “Alangayɛ?” 15 Nde akate ate: “Lam’alangayɛ, ɔntshɔkɔlɛ nɛ dia wɛ ambombisha ɛtshi ka nkɛtɛ lo sidɛ.* Ombisha ndo Ngulɔtɛ-Mayimɛ.”* Ko nde akawosha Ngulɔtɛ ka la Diko ndo Ngulɔtɛ ka l’Ɛse.
16 Tokanula ta okilo+ wa Mɔsɛ ose Kenɛ+ wakaye oma lo osomba w’atoko+ kaamɛ l’aseka Juda polo l’oswe wa Juda lo sidɛ ka Arada.+ Vɔ wakatshu lɛkɔ ndo wakatodjasɛ l’atei w’anto.+ 17 Koko Juda akatshu nde la ɔnango Simɛyɔna ko wakatɔlɔsha ase Kanana wakadjasɛka la Zefata ko wakakilanya.+ Ɔnkɔnɛ vɔ wakɔlɛ osomba akɔ ɔnɛ Horima.*+ 18 Oma laasɔ, Juda akɔshi Ngaza+ la ɛtshi katɔ ka nkɛtɛ, Ashikɛlɔna+ la ɛtshi katɔ ka nkɛtɛ ndo Ɛkɛrɔna+ la ɛtshi kawɔ ka nkɛtɛ. 19 Jehowa aki kaamɛ la Juda ko vɔ wakɔshi lɛkɛ l’akona, koko vɔ kokoka mbitshanya anto wakadjasɛka lo ɛtshi ka nkɛtɛ k’ebamubamu, nɛ dia vɔ waki la pusupusu ya ta yaki la mbolo ya mpɛmɔ.*+ 20 Vɔ wakasha Kalɛba Hɛbɛrɔna, oko wakalake Mɔsɛ,+ ko vɔ wakatshanya ana 3 wa Anaka+ oma lɛkɔ.
21 Koko aseka Bɛnjamina kombitshanya ase Jɛbusɛ wakadjasɛka la Jɛrusalɛma, ɔnkɔnɛ ase Jɛbusɛ wekɔ lo ntetemala mbidjasɛ l’aseka Bɛnjamina la Jɛrusalɛma polo ndo ɛlɔ.+
22 L’etena kɛsɔ, ase luudu la Yɔsɛfu+ wakatshu tɔlɔsha Bɛtɛlɛ, ko Jehowa aki kaamɛ la wɔ.+ 23 Lam’akakembaka ase luudu la Yɔsɛfu Bɛtɛlɛ (osomba ɔsɔ wakelamɛka ntondo ɔnɛ Luza),+ 24 atɔpi wakɛnyi pami kɛmɔtshi ayatombe oma l’osomba. Ko vɔ wakawotɛ vate: “Lam’alangayɛ, otɛnya mboka ka mbɔtɔ l’osomba ko sho tayokosalɛ ɔlɔlɔ.”* 25 Ko pami kakɔ akawaɛnya mboka ka mbɔtɔ lo osomba, ko vɔ wakalanya osomba la lokuwa la ta, koko wakatshike pami kakɔ la nkumbo kande k’otondo dia vɔ ntshɔ.+ 26 Pami kakɔ akatshu lo ɛtshi ka nkɛtɛ k’ase Hiti, akatoka osomba, ko akawɔlɛ ɔnɛ Luza ndo ɔsɔ kele lokombo lawɔ polo ndo ɛlɔ.
27 Manase kɔmbɔsa Bɛtɛ-Sheana la tosombasomba tendɛ le tɔ, Tanaka+ la tosombasomba tendɛ le tɔ,* ase Dɔra la tosombasomba tendɛ le diɔ, ase Ibɛlɛamɛ la tosombasomba tendɛ le tɔ ndo ase Mengido la tosombasomba tendɛ le wɔ.+ Ase Kanana wakatshininala dia mbidjasɛ lo wodja ɔsɔ. 28 Lam’akayoyala ase Isariyɛlɛ la wolo, vɔ wakatshike ase Kanana dia mbakandjaka elimu la wolo,+ koko vɔ kombatshanya tshɛ lo tshɛ.+
29 Ndo Efrayimɛ kombitshanya ase Kanana wakadjasɛka la Ngezɛrɛ. Ase Kanana wakatetemala mbidjasɛ l’atei awɔ la Ngezɛrɛ.+
30 Zebuluna kombitshanya aseka Kitirɔna ndo aseka Nahalɔla.+ Ase Kanana wakatetemala mbidjasɛ l’atei awɔ ndo vɔ wakaatshike dia mbakandjaka elimu la wolo.+
31 Ashɛrɛ kombitshanya aseka Ako ndo ase Sidɔna,+ Alaba, Akizibɛ,+ Hɛlɛba, Afiki+ ndo Rɛhɔba.+ 32 Ɔnkɔnɛ, aseka Ashɛrɛ wakatetemala mbidjasɛ l’atei w’ase Kanana wakadjasɛka lo wodja, nɛ dia vɔ kombatshanya.
33 Nafɛtali kombitshanya ase Bɛtɛ-Shɛmɛshɛ ndo ase Bɛtɛ-Anata,+ koko vɔ wakatetemala mbidjasɛ l’atei w’ase Kanana wakadjasɛka lo wodja.+ Aseka Bɛtɛ-Shɛmɛshɛ ndo aseka Bɛtɛ-Anata wakayala anto wa kandjaka elimu la wolo.
34 Ase Amɔra wakatshindjiya aseka Danɛ otsha lo lɛkɛ l’akona, nɛ dia vɔ kombetawɔka dia vɔ mpolɔ oya lo nkɛtɛ y’ebamubamu.+ 35 Ɔnkɔnɛ, ase Amɔra wakatshininala dia mbidjasɛ lo Dikona dia Hɛrɛsɛ, Aidjalɔna+ ndo Shalabima.+ Koko lam’akayofula* wolo* w’ase luudu la Yɔsɛfu, vɔ wakaatshike dia mbakandjaka elimu la wolo. 36 Ɛtshi ka nkɛtɛ k’ase Amɔra kaki oma lo wodelo wa Akarabima,+ oma la Sɛla polo la diko.
2 Oma laasɔ, ondjelo wa Jehowa+ akonɛɛ oma la Ngilingalɛ+ otsha la Bɔkima ndo akate ate: “Dimi lakanyotondja oma l’Edjibito oya lo wodja wakamatshibɛ watshɛnyu.+ Ndo nto, lakate nte: ‘Dimi hambitolaki pondjo sheke yakamadje la nyu.+ 2 Nyu lo wedi anyu, hanyohombe mbidja sheke l’ase wodja ɔnɛ+ ndo nyu pombaka ndanya dilambwelo diawɔ.’+ Koko nyu hanyokitanyiyisha dui diami.+ Lande na kamonyosala nganɛ? 3 Diakɔ diakamate nto nte: ‘Dimi hatowatshanya oma la ntondo kanyu+ ndo vɔ wayonga tshondo ya djonga le nyu+ ndo tozambizambi tawɔ tayonyanganya etale.’”+
4 Lam’akatɛ ondjelo wa Jehowa ase Isariyɛlɛ awui asɔ tshɛ, anto wakatatɛ ndela la dui dia wolo. 5 Ko vɔ wakɔlɛ dihole sɔ ɔnɛ Bɔkima* ndo wakalambola Jehowa olambo laawɔ.
6 Lam’akakɛndja Jashua anto, ose Isariyɛlɛ tshɛ akatshu otsha lo etenyi kande k’okitɔ dia tɔsa ɛtshi ka nkɛtɛ.+ 7 Anto wakatetemala kambɛ Jehowa lo nshi tshɛ ya Jashua ndo nshi tshɛ ya dikumanyi diakatetemala nsɛna l’ɔkɔngɔ wa Jashua ndo diakɛnyi akambo wa weke tshɛ wakasale Jehowa lo wahɔ w’ase Isariyɛlɛ.+ 8 Oma laasɔ Jashua ɔna Nuna, okambi wa Jehowa akavu ele la ɛnɔnyi 110.+ 9 Ko vɔ wakookundɛ lo ɛtshi ka nkɛtɛ k’etenyi kande k’okitɔ la Timinatɛ-Hɛrɛsɛ+ lo lɛkɛ l’akona la Efrayimɛ, lo nɔrdɛ ka Dikona dia Ngashɛ.+ 10 Lɔlɔnga lɔsɔ l’otondo lakayele watshɛwɔ,* ko lɔlɔnga lokina lakayala l’ɔkɔngɔ awɔ laki kombeya Jehowa ndo kɛnɛ kakandasalɛ ase Isariyɛlɛ.
11 Ko ase Isariyɛlɛ wakasale kɛnɛ kaki kɔlɔ lo washo wa Jehowa ndo wakakambɛ* waa Baala.+ 12 Ɔnkɔnɛ, vɔ wakasɛkɛ Jehowa Nzambi ka washɛwɔ, ɔnɛ lakaatondja oma lo wodja w’Edjibito.+ Vɔ wakayele tozambizambi tokina, tozambizambi t’anto wakaadinge+ ndo wakatikusamɛ ko wakokiya Jehowa nkɛlɛ.+ 13 Vɔ wakasɛkɛ Jehowa ko wakakambɛ Baala ndo dikishi dia Ashitɔrɛtɛ.+ 14 Ko nkɛlɛ ka Jehowa kadɔdɔ kakaye le Isariyɛlɛ, ko nde akaakimɔ le amumbi wakawambe.+ Nde akaakimɔ* lo anya w’atunyi wakaadinge,+ ko vɔ komonga nto la akoka wa nshika ekolo la ntondo k’atunyi awɔ.+ 15 Dihole tshɛ diakawatshɔka, lonya la Jehowa lakikɔ le wɔ dia mbaela mpokoso+ oko wakate Jehowa ndo oko wakaatshibɛ Jehowa,+ ko vɔ wakayala lo shɔkɔ ya wolo.+ 16 Ɔnkɔnɛ, Jehowa akawasha toshushi takahombe mbashimbɛ oma lo anya w’amumbi awɔ.+
17 Koko vɔ kombetawɔ mpokamɛ kaanga toshushi takɔ ko vɔ wakatɛmɔla* tozambizambi tokina ndo wakatikusamɛka. Vɔ wakatshike esadi eto mboka kakayelaka watshɛwɔ wanɛ wakakitanyiyaka wadjango wa Jehowa.+ Vɔ kosala dui sɔ. 18 Etena tshɛ kakaatondjɛka Jehowa toshushi,+ Jehowa akongaka kaamɛ la shushi tshɛ ndo akaashimbɛka oma lo anya w’atunyi awɔ lo nshi tshɛ yaki shushi yakɔ, nɛ dia Jehowa akawaoke kɛtshi*+ lam’akandoke akumu wakawakumaka l’ɔtɛ wakawaahɛnyahɛnyaka+ ndo wakawaasɔkishaka.
19 Koko lam’akavɔka shushi, vɔ wakasalaka akambo nto lo yoho ya kɔlɔ efula oleki washɛwɔ lo ndjela tozambizambi tokina, lo tikambɛ ndo lo tikusamɛ.+ Vɔ kotshika mbekelo yawɔ ndo dionga diawɔ dia ɔtɛ wolo. 20 L’edjedja ka wonya, nkɛlɛ ka Jehowa kadɔdɔ kakaye le Isariyɛlɛ,+ ko nde akate ate: “Lam’ele wodja ɔnɛ wambɔnyɔla sheke yami+ yakamadjangɛ watshɛwɔ ndo vɔ bu la okitanyiya le mi,+ 21 dimi lawɔ hantotshanya kaanga wodja 1 oma la ntondo kawɔ, l’atei wa wedja wakatshike Jashua lam’akandavu.+ 22 Kɛsɔ kayokimanyiya dia menda kana ase Isariyɛlɛ wayotetemala nkɛndakɛnda lo mboka ka Jehowa+ oko wakasale washɛwɔ.” 23 Ko Jehowa aketawɔ dia wedja ɛsɔ ntshikala. Nde kombatshanya esadi esadi ndo nde kombakimɔ lo anya wa Jashua.
3 Ɔnɛ ele wedja waketawɔ Jehowa dia vɔ ntshikala la oyango wa mpemba ase Isariyɛlɛ tshɛ waki kɔndɔ ata wa la Kanana,+ 2 (dui sɔ diakasalema la oyango wa nɔnga yakahombe ndjoya y’ase Isariyɛlɛ ndjɔlɔ ta, wanɛ waki kosala dui sɔ ntondo): 3 Nkumi 5 y’ase Filistiya+ ndo ase Kanana tshɛ, ase Sidɔna+ ndo ase Hivi+ wakadjasɛka lo Dikona dia Lɛbanɔna+ oma lo Dikona dia Baala-Hɛrɛmɔna polo la Lɛbɔ-Hamatɛ.*+ 4 Vɔ waki oko ehomɔ ka mpemba ase Isariyɛlɛ dia nshikikɛ kana ase Isariyɛlɛ wayokitanyiya wadjango wa Jehowa wakandasha washɛwɔ lo tshimbo ya Mɔsɛ.+ 5 Ɔnkɔnɛ, ase Isariyɛlɛ wakadjasɛ l’atei w’ase Kanana,+ ase Hiti, ase Amɔra, ase Perizi, ase Hivi ndo ase Jɛbusɛ. 6 Ase Isariyɛlɛ wakatshukaka anawɔ wa wamato ndo wakatshukanyaka anawɔ wa wamato le anawɔ w’apami ndo vɔ wakatatɛ kambɛ tozambizambi tawɔ.+
7 Ɔnkɔnɛ, ase Isariyɛlɛ wakasale kɛnɛ kaki kɔlɔ lo washo wa Jehowa ndo vɔ wakohɛ Jehowa Nzambi kawɔ, ko wakakambɛ waa Baala+ ndo dimɛta diawɔ dia l’esongo.*+ 8 Ko nkɛlɛ ka Jehowa kadɔdɔ kakaye le ase Isariyɛlɛ ndo nde akaakimɔ lo anya wa Kushana-Rishatayima nkumekanga ka Mezɔpɔtamiya.* Ase Isariyɛlɛ wakakambɛ Kushana-Rishatayima l’edja k’ɛnɔnyi 8. 9 Lam’akalɔmbɛ ase Isariyɛlɛ Jehowa ekimanyielo,+ Jehowa akawasha oshimbedi dia ntshungola ase Isariyɛlɛ,+ mbuta ate Otinyɛlɛ+ ɔna Kenazɛ, kose aki Kalɛba. 10 Nyuma ka Jehowa kakaye le nde,+ ko nde akayala shushi lo Isariyɛlɛ. Lam’akandatshu lo ta, Jehowa akakimɔ Kushana-Rishatayima nkumekanga ka Mezɔpɔtamiya* lo anya ande, ko nde akalɛndja Kushana-Rishatayima. 11 L’ɔkɔngɔ wa laasɔ, wodja wakayala la momuya* l’edja k’ɛnɔnyi 40. Oma laasɔ, Otinyɛlɛ ɔna Kenazɛ akavu.
12 Mbala kekina nto, ase Isariyɛlɛ wakayotatɛ nsala kɛnɛ kaki kɔlɔ lo washo wa Jehowa.+ Ko Jehowa akatshike dia Ɛngɛlɔna nkumekanga ka Mɔaba+ mbahemɛ Isariyɛlɛ, nɛ dia vɔ wakasale kɛnɛ kaki kɔlɔ lo washo wa Jehowa. 13 Ndo nto, nde akawaela ase Amɔna+ ndo ase Amalɛka dia mbalɔsha.+ Vɔ wakalɔsha Isariyɛlɛ ko wakɔshi osomba w’atoko.+ 14 Ase Isariyɛlɛ wakakambɛ Ɛngɛlɔna nkumekanga ka Mɔaba l’edja k’ɛnɔnyi 18.+ 15 Oma laasɔ, ase Isariyɛlɛ wakalɔmbɛ Jehowa ekimanyielo,+ ko Jehowa akawasha oshimbedi,+ mbuta ate Ehudɛ+ ɔna Ngɛra, oseka Bɛnjamina+ laki ɛmɔsɔ.+ L’ɔkɔngɔ diko, ase Isariyɛlɛ wakatomɛ Ɛngɛlɔna nkumekanga ka Mɔaba olambo wakandahikaka lo tshimbo yande. 16 L’etena kɛsɔ, Ehudɛ akayasalɛ lokuwa la ta la mpɛmɔ wedi 2 laki la otale wa kubita* 1, ko nde akalisɔsɔmiya l’etei k’ahɔndɔ ande lo ɛhɛlɔhɛlɔ ka lokolo lande l’omi. 17 Oma laasɔ, nde akasha Ɛngɛlɔna nkumekanga ka Mɔaba olambo akɔ wakandahikaka. Ɛngɛlɔna aki pami ka woke efula.
18 Lam’akashidiya Ehudɛ mbosha olambo wakandahikaka, nde akakɛndja wanɛ wakayɛmbaka olambo akɔ. 19 Koko l’ɔkɔngɔ wa nde nkoma lɛnɛ aki dikishi dia la Ngilingalɛ,+ nde akakalola ndo akate ate: “Nkumekanga le, lekɔ la losango la kotɛ lo sheke.” Ko nkumekanga akate ate: “Nyonya londjo!” Ko ekambi ande tshɛ wakamɔ lalende. 20 Ko Ehudɛ akatshu otsha le nde lɛnɛ akandadjasɛ ndamɛ lo luudu la ndala la tshitshi la la diko. Oma laasɔ, Ehudɛ akate ate: “Lekɔ la losango l’oma le Nzambi la kotɛ.” Ko nde akemala oma lo kiti kande ka lowandji.* 21 Oma laasɔ, Ehudɛ akasɔmɔla lokuwa lande la ta la lonya lande la lɔmɔsɔ oma lo ɛhɛlɔhɛlɔ ka lokolo lande l’omi, ko akawokelɔ lo dikundju. 22 Lokuwa lakɔtɔ tshɛ ndo wenyi alɔ, ko wata wakalifɛ, nɛ dia nde kombikola lokuwa lakɔ oma lo dikundju ko tumi takatombe. 23 Ehudɛ akatombe l’andja oma lo soko* ko akadihe nkuke ya luudu la ndala la la diko ndo akakange nsapi. 24 L’ɔkɔngɔ wa nde ntomba, ekambi wa nkumekanga wakakalola ko wakatane nkuke ya luudu la ndala la la diko yakakangemi nsapi. Ko vɔ wakate vate: “Ondo nde ambɔtɔ lo nkomba* ka lo luudu la tshitshi la l’etei.” 25 Vɔ wakatetemala nkonga, wakayala lo okandokando w’efula, koko lam’akawɛnyi dia ambeta edja ko nde hadihola nkuke ya luudu la ndala la la diko, vɔ wakɔshi nsapi, ko wakadihola, wɛnyi ko nkumɛwɔ okalemi l’odihe* akavwe!
26 Ehudɛ akalawɔ etena kakawakongaka ndo nde akalekana dikishi,+ ko akatoyashɛ la Seira. 27 Lam’akandakome, nde akade dimama+ lo lɛkɛ l’akona la Efrayimɛ,+ ko ase Isariyɛlɛ wakaholɔ oma lo lɛkɛ l’akona ndo nde akete la ntondo kawɔ. 28 Ko nde akawatɛ ate: “Nyondjele, nɛ dia Jehowa ambokimɔ atunyi anyu, ase Mɔaba lo anya anyu.” Ko vɔ wakooyele ndo wakɔshi ateho wa Jɔrdana wɛlane l’ase Mɔaba ndo vɔ kombetawɔ dia kaanga onto 1 ntehɔ. 29 L’etena kɛsɔ, vɔ wakadiake ase Mɔaba+ oko nunu dikumi (10 000), apami wa wolo ndo w’akongote. Ndooko kaanga 1 lakahande.+ 30 Ɔnkɔnɛ ase Isariyɛlɛ wakalɛndja Mɔaba, ko wodja wakayala la momuya* l’edja k’ɛnɔnyi 80.+
31 L’ɔkɔngɔ ande, Shamɛngarɛ+ ɔna Anata akadiake apami w’ase Filistiya+ 600 la dikɔnga.+ Nde lawɔ akashimbɛ ase Isariyɛlɛ.
4 Koko l’ɔkɔngɔ wa nyɔi k’Ehudɛ, ase Isariyɛlɛ wakasale kɛnɛ kaki kɔlɔ lo washo wa Jehowa nto.+ 2 Ko Jehowa akaakimɔ* lo anya wa Jabina nkumekanga ka Kanana+ kakolɛka la Hazɔra.+ Sisɛra lakadjasɛka la Harɔshɛta wa wedja* kaki owandji w’asɔlayi ande. 3 Ase Isariyɛlɛ wakalelɛ Jehowa,+ nɛ dia Jabina* aki la pusupusu ya ta 900 yaki la mbolo ya mpɛmɔ*+ ndo nde akahɛnyahɛnya ase Isariyɛlɛ+ wolo l’edja k’ɛnɔnyi 20.
4 L’etena kɛsɔ, Dɛbɔra omvutshi wa womoto,+ wadi aki Lapidɔtɛ aki shushi lo Isariyɛlɛ. 5 Nde akadjasɛka l’ɛse ka toko dia Dɛbɔra diaki lam’asa Rama+ la Bɛtɛlɛ+ lo lɛkɛ l’akona la Efrayimɛ. Ase Isariyɛlɛ wakatshɔka le nde la dombo diawɔ. 6 Nde akatomɛ Baraka+ ɔna Abinɔama dui la Kɛdɛshɛ-Nafɛtali+ dia towotɛ ɔnɛ: “Shi Jehowa Nzambi k’Isariyɛlɛ akakodjangɛ? ‘Tshɔka* otsha lo Dikona dia Tabɔra ndo ɔsa apami nunu dikumi (10 000) oma l’atei w’aseka Nafɛtali la aseka Zebuluna kele tshɔka kaamɛ la wɔ. 7 Dimi layokela Sisɛra owandji w’asɔlayi waki Jabina kaamɛ la pusupusu yande ya ta ndo asɔlayi ande l’okidi w’ashi wa la Kishɔna+ ko dimi layowokimɔ lo anya ayɛ.’”+
8 Ko Baraka akawotɛ ate: “Naka wɛ ayotshɔ kaamɛ la mi, kete dimi layotshɔ. Ko naka wɛ hatshwe kaamɛ la mi, kete dimi hantotshɔ.” 9 Ko nde akate ate: “Ndooko onyake dimi layotshɔ kaamɛ la yɛ. Koko kɛnɛ kayangayɛ tosala hatokosha lotombo, nɛ dia Jehowa ayokimɔ Sisɛra+ lo anya wa womoto ɔmɔtshi.” Ko Dɛbɔra akonɛɛ ndo akatshu kaamɛ la Baraka otsha la Kɛdɛshɛ.+ 10 Baraka akelɛ Zebuluna nde la Nafɛtali+ la Kɛdɛshɛ ko apami nunu dikumi (10 000) wakooyele. Ndo Dɛbɔra akatshu kaamɛ la nde.
11 Hebɛrɛ ose Kenɛ+ akakakitɔna l’ase Kenɛ, tokanula ta Hɔbaba, okilo wa Mɔsɛ+ ko nde akake luudu lande la dipɛma suke la osongo wa woke wa la Zananima kele la Kɛdɛshɛ.
12 Wakatotɛ Sisɛra dia Baraka ɔna Abinɔama ambodɛ lo Dikona dia Tabɔra.+ 13 Mbala kakɔ ɔtɔi, Sisɛra akasanganya pusupusu yande ya ta 900 yakɔ tshɛ yaki la mbolo ya mpɛmɔ* ndo asɔlayi ande tshɛ waki kaamɛ la nde oma la Harɔshɛta wa wedja dia vɔ ntshɔ otsha l’okidi w’ashi wa la Kishɔna.+ 14 Ko Dɛbɔra akatɛ Baraka ate: “Onɛɛ, nɛ dia ɛlɔ kayokimɔ Jehowa Sisɛra lo anya ayɛ. Shi Jehowa ekɔ lo tatshu la ntondo kayɛ?” Ko Baraka akaholɔ oma lo Dikona dia Tabɔra ndo apami nunu dikumi (10 000) wakooyele. 15 Oma laasɔ, Jehowa akadje Sisɛra la pusupusu yande ya ta tshɛ ndo asɔlayi ande tshɛ lo lofunge+ la ntondo ka lokuwa la ta la Baraka. L’edjedja ka wonya, Sisɛra akaholɔ oma lo pusupusu kande ko akalawɔ l’ekolo. 16 Baraka akatshana la pusupusu ya ta ndo l’asɔlayi akɔ polo la Harɔshɛta wa wedja. Ko asɔlayi waki Sisɛra tshɛ wakadiakema la lokuwa la ta. Ndooko kaanga 1 lakatshikala.+
17 Koko Sisɛra akalawɔ l’ekolo otsha lo luudu la dipɛma laki Jaɛlɛ,+ wadi aki Hebɛrɛ+ ose Kenɛ, nɛ dia wɔladi waki lam’asa Jabina+ nkumekanga ka Hazɔra la luudu la Hebɛrɛ ose Kenɛ. 18 Oma laasɔ, Jaɛlɛ akatombe dia ndjohomana la Sisɛra ko akawotɛ ate: “Ɔtɔ nkumɛmi, ɔtɔ lanɛ. Tokake wɔma.” Ko nde akɔtɔ lo luudu lande la dipɛma ndo Jaɛlɛ akawofɛ olangitshi. 19 Oma laasɔ, nde akawotɛ ate: “Lam’alangayɛ, ombisha yema y’ashi wa nnɔ, nɛ dia wodi wamboma la mposa k’ashi.” Ko nde akafola ɔlɔndɔ wa dikoho waki la abɛlɛ, ko akawosha dia nde nnɔ.+ L’ɔkɔngɔ wa laasɔ, nde akawofɛ nto. 20 Nde akatɛ womoto akɔ ate: “Emala la soko dia luudu la dipɛma kele naka onto ɔmɔtshi amboya ndo ambokombola ate: ‘Onde pami kɛmɔtshi ekɔ lanɛ?’ ko wɛ mbotɛ wate: ‘Keema!’”
21 Koko Jaɛlɛ, wadi aki Hebɛrɛ akɔshi wokɔ la maditɔ lo lonya lande. Oma laasɔ, lam’aki Sisɛra ambɔlɛmba ndo ambolala, womoto akɔ akasukana lalende ɔkɔkɛ ɔkɔkɛ ndo akawoke wokɔ lo mpakatoyi ndo akɔɔkɔkɔmɛwɔ ko vɔ wakete polo lo nkɛtɛ, ko nde akavu.+
22 Baraka akatshu lɛkɔ atatshanya Sisɛra, ko Jaɛlɛ akatombe dia tohomana la nde ndo akawotɛ ate: “Yaka ndjokɛnya pami katayayange.” Ko nde akɔtɔ la nde ndo akatane Sisɛra akavwe semba, okami wokɔ lo mpakatoyi.
23 Ɔnkɔnɛ lushi lɔsɔ, Nzambi akalɛndja Jabina nkumekanga ka Kanana la ntondo k’ase Isariyɛlɛ.+ 24 Lonya l’ase Isariyɛlɛ lakatalekaka monga wolo otsha le Jabina nkumekanga ka Kanana+ polo lam’akawalanya Jabina nkumekanga ka Kanana.+
5 Lushi lɔsɔ, Dɛbɔra+ nde la Baraka+ ɔna Abinɔama wakembe osambo ɔnɛ:+
2 “L’ɔtɛ wa divo di’esakalaka* diele lo Isariyɛlɛ,
Lam’ele anto wakayakimɔ la lolango,+
Nyotombole Jehowa!
3 Nkumi ya dikanga le, nyohokame! Emboledi le, nyombisha lotui!
Dimi layembɛka Jehowa.
Layembɛka* Jehowa+ Nzambi k’Isariyɛlɛ+ esambo wa lotombo.
4 Jehowa le, lam’akayatshu oma la Seirɛ,+
Lam’akayatshu oma lo ɛtshi ka nkɛtɛ ka Ɛdɔmɛ,
Nkɛtɛ yakasukasuka ndo olongo wakahongola ashi,
Wange wakahongola ashi.
5 Akona wakalɛlɔ* la ntondo k’elungi ka Jehowa,+
Kaanga Sinayi la ntondo k’elungi ka Jehowa+ Nzambi k’Isariyɛlɛ.+
6 Lo nshi ya Shamɛngarɛ+ ɔna Anata,
Lo nshi ya Jaɛlɛ,+ mboka yaki paka hwe;
Ambetshetshi waketaka paka lo abala.
7 Ase ngelo w’ase Isariyɛlɛ komonga nto;*
Vɔ komonga nto polo lam’akamemala, dimi Dɛbɔra,+
Polo lam’akamemala oko mama lo Isariyɛlɛ.+
8 Vɔ wakasɔnɛ tozambizambi t’eyoyo;+
Ko ta diakayala lo asoko w’osomba.+
Engawo kana dikɔnga kokoka mɛnama,
L’atei wa nunu akumi anɛi (40 000) lo Isariyɛlɛ.
9 Otema ami wekɔ kaamɛ la kɔmanda ya lo Isariyɛlɛ,+
Wanɛ wakatshu la lolango lawɔ kaamɛ l’anto.+
Nyotombole Jehowa!
10 Nyu ambahemi wa mponda ya dikɛsɛkɛsɛ,
Nyu wanɛ wodjashi laadiko dia tapi y’amɛna,
Ndo nyu wanɛ wakɛndakɛnda lo otadimbo,
Nyokane yimba!
11 Awui wa wanɛ wakahanya ashi wakokɛma lo ahole wataholawɔ ashi;
Vɔ wakadiaka akambo w’ɛlɔlɔ waki Jehowa lɛkɔ,
Akambo w’ɛlɔlɔ w’anto ande wele lo ngelo ya lo Isariyɛlɛ.
Ko anto wa Jehowa wakaholɔ otsha l’asoko w’osomba.
12 Dɛbɔra le,+ emɔ, emɔ!
Emɔ, emɔ, emba osambo!+
Baraka le,+ onɛɛ! Lɔmbɔla mfumbe yayɛ, wɛ ɔna Abinɔama!
13 Ko wanɛ wakatshikala wakaholɔ otsha le ɛnɛnɛ;
Anto wa Jehowa wakaholɔ oya le mi dia ndɔsha ase wolo.
14 Wanɛ wele l’okidi,* oma le Efrayimɛ mbakawaye;
Vɔ wekɔ lo takoyele, wɛ Bɛnjamina, l’atei w’anto ayɛ.
Kɔmanda yakaholɔ oma laka Makiri,+
Ndo wanɛ wɛmba dihomɔ dia wanɛ wafundja anto nkombo* oma laka Zebuluna.
15 Ewandji wa laka Isakara waki kaamɛ la Dɛbɔra,
Oko waki Isakara mbaki Baraka.+
Nde akatomama otsha l’okidi w’ebamubamu l’ekolo.+
L’atei w’elui w’aseka Rubɛna, anto efula kɔmbɔsa yɛdikɔ.
16 Lande na kakayadjasɛ l’atei w’atapa 2 wele laadiko dia mponda,
Awahokamɛ lam’akawadɛka ɛkɔkɔ mpolo?+
Le elui w’aseka Rubɛna, anto efula kɔmbɔsa yɛdikɔ.
17 Ngiliyadɛ akatshikala la wedi wa Jɔrdana;+
Danɛ le, lande na kakandatshikala la masuwa?+
Ashɛrɛ akadjasɛ wodjasɛdjasɛ l’omamu wa ndjale,
Ndo suke la abongo* ande kakandatshikala.+
18 Aseka Zebuluna waki anto wakadje nsɛnɔ yawɔ lo waale* la ntondo ka nyɔi;
Nafɛtali nde lawɔ,+ lo ahole wa la diko wa hwe.+
19 Nkumi ya dikanga yakaye, yakalɔsha;
Ko nkumi ya dikanga ya la Kanana yakalɔsha+
La Tanaka, l’omamu w’ashi wa Mengido.+
Vɔ kɔmbɔsa ndooko mfɛsa oko ɛngɔ ka dimbo.+
20 Tɔɔtɔ takalɔsha oma l’olongo;
Tɔ takalɔsha Sisɛra oma lɛnɛ atshimbatɔ.
21 Ɔkɛdi* wa Kishɔna wakaakɛdia,+
Ɔkɛdi* w’edjedja, ɔkɛdi* wa Kishɔna.
Anima* ami le, wɛ akahɔtshahɔtsha kanga wolo.
22 Ko nsabɔ ya mfalasa yakahɔtshahɔtsha
Etena kakakungusɔ mfalasa yande la nkɛlɛ.+
23 Ondjelo wa Jehowa akate ate: ‘Nyodje Merɔzɛ mananu,
Ɛɛ, nyodje anto wa lɔkɔ mananu,
Nɛ dia vɔ kondja dia ndjokimanyiya Jehowa,
Dia ndjokimanyiya Jehowa l’ase wolo.’
24 Jaɛlɛ+ ekɔ womoto loleki tshɔkwama
Wadi aki Hebɛrɛ+ ose Kenɛ;
Nde kele womoto loleki tshɔkwama l’atei wa wamato wadjasɛ lo mvudu y’apɛma.
25 Nde akalɔmbɛ ashi wa nnɔ, ko nde akawosha abɛlɛ.
Lo dikɔhɔ dia nɛmɔ di’ɛnɛnɛ kakandawosha abɛlɛ w’otamu.+
26 La lonya lande kakandɔshi wokɔ,
La lonya lande l’omi kakandɔshi maditɔ.
Ko nde akakɔkɔmɛ Sisɛra la maditɔ, nde akole ɔtɛ ande,
Nde akawole ndo akootondola mpakatoyi.+
27 L’atei w’ekolo ande kakandasembemala; nde akakɔ ndo akatshikala etami;
L’atei w’ekolo ande kakandasembemala ndo kakandakɔ;
Lam’akandasembemala, laawɔ kakandakɔ ndo kakandalɛndjama.
28 Womoto ɔmɔtshi akalengɛ oma lo didishi,
Nyango Sisɛra akalengɛka lo wosho wa lo didishi:
‘Lande na kamboviya pusupusu kande?
Lande na kamboviya nkindo ya pusupusu yande dia mbokɛma?’+
29 Ɔnɛ loleki lomba l’atei wa wamato ande wa lokumu ayowokadimola;
Ɛɛ, nde lawɔ ayoyatɛkɛtɛ ndamɛ ate:
30 ‘Vɔ wekɔ lo nkahana diangɔ dia dimbo diakawakondja,
Osekaseka* 1, esekaseka* 2 le ɔndɔshi wa ta tshɛ,
Dihɔndɔ dia awadi awadi dia dimbo dikambo dia Sisɛra, dihɔndɔ dia awadi awadi dia dimbo,
Dihɔndɔ dia asango asango, dihɔndɔ dia awadi awadi, ahɔndɔ 2 w’asango asango
Dikambo dia nkingo y’amumbi wa diangɔ.’
31 Ɔnkɔnɛ, Jehowa le, atunyi ayɛ tshɛ walanyeme,+
Koko wanɛ wakolanga wayale oko wonya lam’ahotɔwɔ la lotombo lawɔ.”
Ko wodja wakayala la momuya* l’edja k’ɛnɔnyi 40.+
6 Ase Isariyɛlɛ wakasale nto kɛnɛ kaki kɔlɔ lo washo wa Jehowa,+ ko Jehowa akaakimɔ lo anya w’ase Midiyana l’edja k’ɛnɔnyi 7.+ 2 Ase Midiyana wakolɛ ase Isariyɛlɛ.+ L’ɔtɛ w’ase Midiyana, ase Isariyɛlɛ wakayasalɛ ahole wa mbishɛka diangɔ* lo akona, lo weoko ndo l’ahole wele wolo onto nkoma.+ 3 Etena kakonɛka ase Isariyɛlɛ diangɔ, ase Midiyana, ase Amalɛka+ ndo ase lɛkɛ l’ehotwelo ka wonya+ wakaalɔshaka. 4 Vɔ wakahangaka suke la wɔ dia mbalɔsha ndo ndanya diangɔ dia lo dikambɔ diawɔ lo mboka k’otondo k’otsha la Ngaza ndo vɔ kotshikɛka ase Isariyɛlɛ ndooko ɛngɔ ka ndɛ ndo ndooko ɔkɔkɔ kana ngɔmbɛ kana mponda.+ 5 Nɛ dia vɔ wakayaka la dongalonga diawɔ ndo la mvudu yawɔ y’apɛma efula ka mamba oko akata w’ɛndjɔ,+ ko vɔ la kamɛlɔ yawɔ waki efula kaheyama mbadia+ ndo wakɔtɔka lo dikambɔ dia dilanya. 6 Ɔnkɔnɛ, ase Isariyɛlɛ wakayala la wola wa mamba l’ɔtɛ w’ase Midiyana. Ko ase Isariyɛlɛ wakalɔmbɛ Jehowa ekimanyielo.+
7 Lam’akalɔmbɛ ase Isariyɛlɛ Jehowa ekimanyielo l’ɔtɛ w’ase Midiyana,+ 8 Jehowa akatomɛ ase Isariyɛlɛ omvutshi wakawatɛ ate: “Jehowa Nzambi k’Isariyɛlɛ kata ate: ‘Dimi lakanyotondja oma l’Edjibito ndo lakanyotondja oma lo luudu la lɔhɔmbɔ.+ 9 Ɔnkɔnɛ, dimi lakanyotshungola oma lo anya w’ase Edjibito ndo oma le wanɛ tshɛ wakanyɔhɛnyahɛnyaka ndo lakawatshanya oma la ntondo kanyu, ko lakanyosha wodja awɔ.+ 10 Ndo lakanyotɛ nte: “Dimi kele Jehowa Nzambi kanyu.+ Tanyokake tozambizambi t’ase Amɔra tele lo wodja wodjashinyu wɔma.”+ Koko nyu kokitanyiyami.’”*+
11 L’ɔkɔngɔ wa laasɔ, ondjelo wa Jehowa akaye+ ko akayodjasɛ l’ɛse k’osongo wa woke waki la Ofara, osongo waki Jɔashi ose Abiɛzɛrɛ.+ Ɔnande Ngidiyɔna+ akasusolaka eponga lo dihole diamulawɔ vinyɔ dia nde mbashɛ diaha ase Midiyana mɛna. 12 Ondjelo wa Jehowa akɛnama le nde, ko akate ate: “Jehowa ekɔ kaamɛ la yɛ,+ wɛ ɔndɔshi wa ta wa wolo.” 13 Ko Ngidiyɔna akawotɛ ate: “Onkimwe yema nkumɛmi. Naka Jehowa ekɔ kaamɛ la so, lande na kambotokomɛ akambo anɛ tshɛ?+ Lende ele akambo ande tshɛ wa diambo wakatɔkɔndɔlɛ washɛso,+ wata vate: ‘Shi Jehowa akatotondja oma l’Edjibito?’+ Wonya ɔnɛ, Jehowa ambotokalɛ+ ndo ambotokimɔ lo anya w’ase Midiyana.” 14 Jehowa akakadimɔ otsha le nde, ko akate ate: “Tshɔka la wolo wele la yɛ, ko wɛ ayoshimbɛ ase Isariyɛlɛ oma lo anya w’ase Midiyana.+ Shi dimi kakotoma?” 15 Ngidiyɔna akookadimola ate: “Jehowa le, onkimwe. Ngande wakokami nshimbɛ Isariyɛlɛ? Ohenda! Nkumbo* kami koleki tshitshɛ laka aseka Manase ndo dimi koleki onto l’anyanya lo luudu la papa.” 16 Koko Jehowa akawotɛ ate: “Lam’ele dimi layonga kaamɛ la yɛ,+ wɛ ayodiaka ase Midiyana wate kana oko vɔ wekɔ onto 1.”
17 Ko nde akawotɛ ate: “Naka lambohomɔ lokolo l’ɔlɔ lo washo ayɛ, ɔmɛnya djembetelo mɔtshi yɛnya dia wɛ kasawola la mi. 18 Lam’alangayɛ, tomɔke oma lanɛ polo lam’ayomokalola la woshasha ami kele ndjowokitsha la ntondo kayɛ.”+ Ko nde akate ate: “Dimi layotshikala lanɛ polo lam’ayoyokalola.” 19 Ko Ngidiyɔna akatshu ndo akatokatɛ ɔsɔngɔ wa mbudi ndo akasale mapa waha la wodoya la efa* 1 w’ofushi.+ Nde akadje nyama yakɔ lo saka ndo oshi lo mpoke. Oma laasɔ, nde akawela diangɔ diakɔ ko akookitshɛdiɔ l’ɛse k’osongo wa woke.
20 Ko ondjelo wa Nzambi ka mɛtɛ akawotɛ ate: “Ɔsa nyama la mapa waha la wodoya kele kitsha lo dive dia woke diele lengo ndo tɛ oshi.” Ko nde akasale ngasɔ. 21 Oma laasɔ, ondjelo wa Jehowa akasembola shɔdi ya danga diaki lo lonya lande, ko akasakanya nyama la mapa akɔ waha la wodoya, ko dja yakatowɔ oma lo ave ndo yakatshumbe nyama la mapa akɔ waha la wodoya.+ Oma laasɔ, ondjelo wa Jehowa akashishɔ oma lo washo ande. 22 Ko Ngidiyɔna akashikikɛ dia ɔsɔ aki ondjelo wa Jehowa.+
Ngidiyɔna akate ate: “Hayii, Nkum’Olongo Nkumadiɔndjɔ Jehowa, dimi lambɛnana la ondjelo wa Jehowa elungi l’elungi!”+ 23 Koko Jehowa akawotɛ ate: “Wɔladi wayale la yɛ. Tokake wɔma,+ wɛ hatovɔ.” 24 Ko Ngidiyɔna akasale elambwelo laawɔ dikambo dia Jehowa ndo tɔ mbelamɛka ɔnɛ Jehowa-Shalɔma*+ polo ndo ɛlɔ. Tɔ kekɔ la Ofara w’ase Abiɛzɛrɛ.
25 L’otsho ɔsɔ, Jehowa akawotɛ ate: “Ɔsa ɔsɔngɔ wa ngɔmbɛ waki shɔ, ɔsɔngɔ wa ngɔmbɛ wa 2 wele l’ɛnɔnyi 7 ndo handjola elambwelo ka Baala kaki shɔ ndo hendjahendja kimɛta ka l’osongo* kele suke la tɔ.+ 26 L’ɔkɔngɔ wa wɛ nsala elambwelo dikambo dia Jehowa Nzambi kayɛ lo shɔdi ya longele lɔnɛ la ave wa lɔlɔnga, kɔshi ɔsɔngɔ wa ngɔmbɛ wa 2, ko wɛ mbolambola olambo wa lotshumba laadiko dia nkunyi y’oma lo kimɛta ka l’osongo* kayoyohendjahendja.” 27 Ko Ngidiyɔna akɔshi apami 10 l’atei w’ekambi ande ndo akasale oko wakawotɛ Jehowa. Koko nde akokaka ase luudu la she ndo apami wa l’osomba wɔma efula, diakɔ diele nde kosala dui sɔ la yanyi, koko akayodisala l’otsho.
28 Lam’akemɔ apami wa l’osomba akɔ la pindju ka pɛɛ, vɔ wakɛnyi dia elambwelo ka Baala kakahandjwe vwa ndo kimɛta ka l’osongo* kaki suke latɔ kakahendjahendjami ndo ɔsɔngɔ wa ngɔmbɛ wa 2 wakalambɔmi lo elambwelo kakawasadi. 29 Vɔ wakambɔna vate: “Akɔna akasadi nganɛ?” L’ɔkɔngɔ wa vɔ nsala eyangelo, vɔ wakate vate: “Ngidiyɔna ɔna Jɔashi kakasadi dikambo nɛ.” 30 Ɔnkɔnɛ, apami wa l’osomba wakatɛ Jɔashi vate: “Tondja ɔnayɛ dia nde mvɔ, nɛ dia nde akahandjodi elambwelo ka Baala ndo akahembodi kimɛta ka l’osongo* kaki suke la tɔ.” 31 Ko Jɔashi+ akatɛ wanɛ tshɛ waki la ntondo kande ate: “Onde nyu nangaka tɛkɛtɛ Baala? Onde nyolanga mboshimbɛ? Onto tshɛ lɔɔtɛkɛtɛ pombaka ndjakema la pindju kɛnɛ.+ Naka nde ekɔ nzambi, ayatɛkɛtɛ ndamɛ,+ nɛ dia onto ɔmɔtshi akahandjodi elambwelo kande.” 32 Ko lushi lɔsɔ nde akɔlɛ Ngidiyɔna ɔnɛ Jerubala,* ata ate: “Baala ayatɛkɛtɛ ndamɛ, nɛ dia onto ɔmɔtshi akahandjodi elambwelo kande.”
33 Ase Midiyana tshɛ,+ ase Amalɛka+ tshɛ ndo ase lɛkɛ l’ehotwelo ka wonya tshɛ wakasanganya asɔlayi awɔ,+ wakatehɔ* otsha l’Okidi* wa Jezɛrɛlɛ ko wakake mpango kawɔ. 34 Oma laasɔ, nyuma ka Jehowa kakaye le* Ngidiyɔna+ ko nde akade dimama,+ ko aseka Abiɛzɛrɛ+ wakete lo wedi ande. 35 Nde akatomɛ aseka Manase tshɛ akɛndji, ko vɔ lawɔ wakete lo wedi ande. Nde akatome ndo akɛndji otsha le aseka Ashɛrɛ, aseka Zebuluna ndo aseka Nafɛtali, ko vɔ wakaye dia ndjohomana la nde.
36 Oma laasɔ, Ngidiyɔna akatɛ Nzambi ka mɛtɛ ate: “Naka wɛ ayanga nshimbɛ Isariyɛlɛ lo tshimbo yami oko wakayalake,+ 37 dimi layanga mbala wɛɔsa lanɛ lo dihole di’esuswelo. Naka lɔpɔpɔ lambonga lo wɛɔsa akɔ eto ko nkɛtɛ tshɛ yodingi laawɔ monga ofumbo, kete layeya dia wɛ ayoshimbɛ Isariyɛlɛ lo tshimbo yami, oko wakayalake.” 38 Ko kɛsɔ mbakasalema. Lam’akandetɔ la yosose la wedi a pindju ndo lam’akandamula wɛɔsa, nde akatondja ashi wa lɔpɔpɔ oma lo wɛɔsa akɔ wakalole dɔnga dia woke tɔɔ. 39 Ko Ngidiyɔna akatɛ Nzambi ka mɛtɛ ate: “Tombokake yɛnyi, koko etawɔ dimi mimbola kaanga mbala ɔtɔi nto. Lam’alangayɛ, etawɔ dia dimi mpemba nto la wɛɔsa. Lam’alangayɛ, etawɔ dia wɛɔsa eto monga womu, ko lɔpɔpɔ ndɔya nkɛtɛ tshɛ yele laawɔ.” 40 Ko l’otsho ɔsɔ, Nzambi akasale ngasɔ. Paka wɛɔsa eto mbaki womu, koko nkɛtɛ tshɛ yakalɔwɛ la lɔpɔpɔ.
7 Oma laasɔ Jerubala, mbuta ate Ngidiyɔna+ ndo anto tshɛ waki kaamɛ la nde waketɔ la yosose, ko wakatoka mpango kawɔ suke la kiɔkɔ ya Harɔdɛ etena kele mpango k’ase Midiyana kaki lo nɔrdɛ oma lam’akinde, lo kionakona ya Mɔrɛ l’okidi w’ebamubamu. 2 Ko Jehowa akatɛ Ngidiyɔna ate: “Anto wele la yɛ wamboleka efula dia dimi nkimɔ ase Midiyana lo anya awɔ.+ Naka aha ngasɔ, ase Isariyɛlɛ mbeyaka ndjɔnsɛmɛ vate: ‘La anya aso hita mbambotoyashimbɛ.’+ 3 Ɔnkɔnɛ lam’alangayɛ, ta la ntondo k’anto wate: ‘Onto tshɛ loka wɔma ndo lasaka lokomba akalole otsha lakande.’”+ Ngidiyɔna akawadje l’ohemba, ko anto nunu akumi ahende la pende (22 000) wakakalola la ngelo ndo wakatshikala anto nunu dikumi (10 000).
4 Jehowa akatɛ Ngidiyɔna nto ate: “Anto weke efula. Tɔlawɔ otsha l’ashi dia dimi tokohembɛwɔ lɛkɔ. Naka lambokotɛ nte: ‘Onto ɔnɛ ayotshɔ kaamɛ la yɛ,’ kete nde ayotshɔ kaamɛ la yɛ. Ko naka lambokotɛ nte: ‘Onto ɔnɛ hatotshɔ kaamɛ la yɛ,’ kete nde hatotshɔ.” 5 Ko nde akaholɔ l’anto akɔ otsha l’ashi.
Oma laasɔ, Jehowa akatɛ Ngidiyɔna ate: “Onto tshɛ lanɔ ashi oko mfɔ, kakitolande la wanɛ waka adwe dia nnɔ ashi.” 6 Lofulo l’anto wakɛmbaka ashi la anya awɔ otsha l’onyɔ laki apami 300. Anto akina tshɛ wakake adwe dia nnɔ ashi.
7 Oma laasɔ, Jehowa akatɛ Ngidiyɔna ate: “Dimi layokoshimbɛ wɛ l’apami 300 wakanwɛ ashi la anya ndo layokimɔ ase Midiyana lo anya ayɛ.+ Tshika anto akina tshɛ wakalole la ngelo.” 8 Ɔnkɔnɛ, l’ɔkɔngɔ wa vɔ mbɔsa mpamba la amama oma le anto, nde akakimɔ apami akina tshɛ w’ase Isariyɛlɛ dia vɔ nkalola la ngelo, ko nde akatshikala l’apami 300 tsho. Mpango k’ase Midiyana kaki l’ɛse kande l’okidi w’ebamubamu.+
9 L’otsho ɔsɔ, Jehowa akawotɛ ate: “Etɔ, lɔsha mpango, nɛ dia dimi lambokikimɔ lo anya ayɛ.+ 10 Ko naka wɛ ekɔ lo mboka wɔma dia kilɔsha, holɔ otsha lo mpango wɛ la okambi ayɛ Pura. 11 Tohokame kɛnɛ katawɔ, ko oma laasɔ, wɛ ayonga la dihonga* dia ndɔsha mpango.” Ko nde la okambi ande Pura wakaholɔ otsha l’omamu wa mpango k’asɔlayi.
12 Ase Midiyana, ase Amalɛka ndo ase lɛkɛ l’ehotwelo ka wonya+ tshɛ wakalole l’okidi w’ebamubamu wele emete emete wate kana oko akata w’ɛndjɔ ndo kamɛlɔ yawɔ yaki efula kaheyama mbadia,+ efula oko nsɛkɛ ya lɔkɔngɔ la l’omamu wa ndjale. 13 Lam’akakome Ngidiyɔna, pami kɛmɔtshi akakɔndɔlɛka osekande dɔ diakandɛnyi ate: “Dɔ diakamɛnyi diɔ nɛ: Lakɛnaki mapa w’obolonga wosalemi la shima k’asami wambodinga mpango k’ase Midiyana. Vɔ wakaye lo luudu la dipɛma ndo wakalikɔmɔdi la wolo efula, ko lɔ lakanyukwe,+ ɛɛ, lɔ lakakadimwe etshuletshule ndo lakamatatadi mataa.” 14 Ko osekande akate ate: “Ɔsɔ ekɔ la dia monga paka lokuwa la ta laki Ngidiyɔna+ ɔna Jɔashi, pami k’ose Isariyɛlɛ. Nzambi ambokimɔ ase Midiyana la mpango k’otondo lo anya ande.”+
15 Kam’akoke Ngidiyɔna woho wakandakɔndɔla dɔ diande la kitshimudi ya diɔ,+ nde akakusama dia ntɛmɔla. L’ɔkɔngɔ wa laasɔ, nde akakalola otsha lo mpango k’ase Isariyɛlɛ ko akate ate: “Nyetɔ, nɛ dia Jehowa ambokimɔ mpango k’ase Midiyana lo anya anyu.” 16 Oma laasɔ, nde akakahanya apami akɔ 300 lo elui 3 ndo akawasha vɔ tshɛ amama+ la mbaka ya hwe kaamɛ la ewa wakawadje l’etei ka mbaka yakɔ. 17 Ko nde akawatɛ ate: “Kanyomendake ndo kanyosale paka kɛnɛ kayomosala. Lam’ayonyokoma l’omamu wa mpango, nyu pombaka nsala paka woho wayomosala. 18 Lam’ayomoda dimama dimi la wanɛ tshɛ wele kaamɛ la mi, nyu lawɔ kanyode amama lo otshimbedi w’otondo wa mpango ndo kanyode okoko nyate: ‘Laki Jehowa ndo laki Ngidiyɔna!’”
19 Ngidiyɔna nde l’apami 100 waki kaamɛ la nde wakakome l’omamu wa mpango l’etatelo ka l’asa deke,* yema tshitshɛ l’ɔkɔngɔ wa vɔ nkitsha todjamu. Vɔ wakade amama+ ndo wakole mbaka ya weke yaki lo anya awɔ.+ 20 Ko elui akɔ 3 wakade amama ndo wakole mbaka yakɔ ya weke. Vɔ wakakimɛ ewa onto l’onto lo lonya lande la lɔmɔsɔ ndo wakadaka amama onto l’onto lo lonya lande l’omi, ko wakawelɛ vate: “Lokuwa la ta laki Jehowa ndo laki Ngidiyɔna!” 21 L’etena kɛsɔ tshɛ, onto l’onto akemala lo dihole diande l’otshimbedi w’otondo wa mpango, ko asɔlayi tshɛ wakalawɔ watade ekoko lam’akawatalawɔka.+ 22 Apami akɔ 300 wakatetemala mbida amama ndo Jehowa akakadimola lokuwa la ta laki onto l’onto laki lo mpango k’otondo+ dia vɔamɛ kɔtana lam’asawɔ. Ko asɔlayi akɔ wakalawɔ polo la Bɛtɛ-Shita, otsha la Zɛrɛra polo l’omamu wa Abɛlɛ-Mehola+ suke la Tabata.
23 Ko apami w’ase Isariyɛlɛ wakelamɛ dia nsangana kaamɛ, mbidja ndo wanɛ w’oma laka aseka Nafɛtali, aseka Ashɛrɛ ndo aseka Manase tshɛ,+ ko vɔ wakatshanya ase Midiyana. 24 Ngidiyɔna akatome akɛndji otsha lo lɛkɛ l’akona l’otondo la Efrayimɛ dia towatɛ ɔnɛ: “Nyoholɔ dia tɔlɔsha ase Midiyana ndo nyamamale la ashi polo la Bɛtɛ-Bara ndo lo Jɔrdana.” Ko apami tshɛ w’aseka Efrayimɛ wakasangana kaamɛ ndo vɔ wakaamamala la ashi polo la Bɛtɛ-Bara ndo lo Jɔrdana. 25 Vɔ wakande ndo ewandji 2 w’ase Midiyana, Ɔrɛbɛ nde la Zɛbɛ. Vɔ wakadiake Ɔrɛbɛ+ lo dive dia Ɔrɛbɛ ko wakadiake Zɛbɛ lo diamula dia Zɛbɛ. Vɔ wakatetemala ndjelana l’ase Midiyana+ ndo wakela ɔtɛ wa Ɔrɛbɛ la ɔtɛ wa Zɛbɛ le Ngidiyɔna lo ɛtshi ka nkɛtɛ ka Jɔrdana.
8 Oma laasɔ, apami w’aseka Efrayimɛ wakawombola vate: “Kakɔna kamboyotosalɛ kɛnɛ? Lande na kakiyɛ kotelɛ lam’akayatshu dia tɔlɔsha ase Midiyana?”+ Ko wakawane la nde wolo.+ 2 Koko nde akawatɛ ate: “Amomosala lo mbɛdika la nyu? Onde olimu wa ɛkɔnɔdi wa Efrayimɛ+ hawoleki dinela di’elowa dia Abiɛzɛrɛ dimɛna?+ 3 Shi Nzambi lo anya anyu kakandakimɔ Ɔrɛbɛ nde la Zɛbɛ,+ ewandji w’ase Midiyana? Ko amomosala lo mbɛdika la nyu?” Lam’akandate ngasɔ,* vɔ wakɔlama.*
4 Oma laasɔ, Ngidiyɔna akaye lo Jɔrdana ko akayitehɔ. Nde l’apami 300 waki kaamɛ la nde wakalɛmbɛ, koko vɔ wakatetemala mbayela. 5 Ko nde akatɛ ase Sukɔta ate: “Lam’alanganyu, nyosha anto wayaye la mi mbo ya ndɛ, nɛ dia vɔ wambɔlɛmba ndo dimi lekɔ lo tatshanya Zeba nde la Zalamuna, nkumi ya dikanga ya Midiyana.” 6 Koko ewandji wa la Sukɔta wakate vate: “Onde wɛ amboshila minda Zeba nde la Zalamuna lo anya ayɛ mbatotosha asɔlayi ayɛ mbo ya ndɛ?” 7 Ko Ngidiyɔna akate ate: “Lo dikambo sɔ, lam’ayokimɔ Jehowa Zeba nde la Zalamuna lo anya ami, dimi layonyosha dilanya la atɛndɛ ndo la ahangola nkɔi wa l’oswe.”+ 8 Nde akonɛɛ oma laawɔ, ko akatshu otsha la Penuɛlɛ ndo akatowatɛ woho akɔ waamɛ, koko ase Penuɛlɛ wakookadimola woho wakookadimola ase Sukɔta. 9 Ko nde akatɛ ndo ase Penuɛlɛ ate: “Lam’ayomokalola la ki, layotola tshoto nyɛ.”+
10 Zeba nde la Zalamuna waki la Karakɔrɔ vɔ la asɔlayi awɔ, apami oko nunu dikumi la tanu (15 000). Wasɔ mbele wanɛ tshɛ wakatshikala lo asɔlayi tshɛ w’ase lɛkɛ l’ehotwelo ka wonya,+ nɛ dia apami nunu lokama l’akumi ahende (120 000) waki la tokuwa ta ta wakadiakema. 11 Ngidiyɔna akatetemala la lɔkɛndɔ lo mboka k’otsha le wanɛ wakadjasɛka lo mvudu y’apɛma lo ɛstɛ ka Nɔba ndo Jɔngɛbɛha,+ ko nde akatɔlɔsha mpango etena kakitɔ komonga la todjamu. 12 Lam’akalawɔ Zeba nde la Zalamuna, nde akawatshanya ko akatonda Zeba nde la Zalamuna, nkumi ya dikanga 2 y’ase Midiyana, ko mpango k’otondo kakandama la sase dia wɔma.
13 Oma laasɔ, Ngidiyɔna ɔna Jɔashi akakalola oma lo ta lo mbeta lo mboka kadɛ otsha la Herɛsɛ. 14 Lam’akandatatshɔka, nde akande ɔlɔngɔ ɔmɔtshi w’ose Sukɔta ko akawoke ambola. Ko ɔlɔngɔ akɔ akoofundɛ nkombo y’ewandji la dikumanyi dia la Sukɔta, apami 77. 15 Ko nde akatshu otsha le ase Sukɔta ko akate ate: “Zeba nde la Zalamuna vɔ anɛ, wanɛ wakanyansɔkɛ nyate: ‘Onde wɛ amboshila minda Zeba nde la Zalamuna lo anya ayɛ mbatotosha anto ayɛ wambɔlɛmba mbo ya ndɛ?’”+ 16 Oma laasɔ, nde akɔshi dikumanyi dia l’osomba ko akasha ase Sukɔta wetshelo lo nkamba la atɛndɛ ndo la ahangola nkɔi wa l’oswe.+ 17 Nde akatola tshoto ya la Penuɛlɛ+ ndo akadiake apami wa l’osomba akɔ.
18 Nde akambola Zeba nde la Zalamuna ate: “Anto wakanyadiake la Tabɔra ngande wakiwɔ?” Ko vɔ wakate vate: “Vɔ waki oko wɛ, onto l’onto aki oko ɔna nkumekanga.” 19 Ko nde akate ate: “Vɔ waki analengo, ana wa mama. Lo mɛtɛ oko wele Jehowa la lɔsɛnɔ, otondonga nyakaatshike la lɔsɛnɔ, tshike totomonyodiaka.” 20 Oma laasɔ, nde akatɛ Jɛtɛrɛ, ɔnande l’enondo ate: “Onɛɛ, diakawɔ.” Koko ɔnakɔ kɔsɔmɔla lokuwa lande la ta; nde akoke wɔma, nɛ dia nde aki eke dikɛnda. 21 Ko Zeba nde la Zalamuna wakate vate: “Emala wɛmɛ kele otodiake, nɛ dia pami mbeyamaka oma lo wolo ande.”* Ko Ngidiyɔna akemala ndo akadiake Zeba nde la Zalamuna,+ ko nde akɔshi dɛngalɛnga diele oko ngɔndɔ keke ɛtshi diaki lo nkingo ya kamɛlɔ yawɔ.
22 L’ɔkɔngɔ diko, ase Isariyɛlɛ wakatɛ Ngidiyɔna vate: “Onga owandji aso wɛ la ɔnayɛ la okana ayɛ, nɛ dia wɛ ambotoshimbɛ oma lo anya w’ase Midiyana.”+ 23 Koko Ngidiyɔna akawatɛ ate: “Dimi hantonga owandji anyu ndo ɔnami hatonga owandji anyu. Jehowa kayonga owandji anyu.”+ 24 Ngidiyɔna akatetemala mbuta ate: “Dimi nangaka nyɔlɔmba ɛngɔ kɛmɔtshi: Onto tshɛ l’atei anyu ambisha zama dia l’ɔhɛmbɛ oma lo diangɔ diande dia dimbo.” (Nɛ dia vɔ waki la azama wa paonyi wa l’ɛhɛmbɛ dikambo vɔ waki aseka Ishimaɛlɛ.)+ 25 Vɔ wakakadimola vate: “Ndooko onyake tayokoshawɔ.” Ko vɔ wakasandjola okutu ɔmɔtshi, ko pami tshɛ akadje zama dimɔtshi dia l’ɔhɛmbɛ oma lo diangɔ diande dia dimbo. 26 Azama wa paonyi wa l’ɛhɛmbɛ wakandalɔmbɛ waki la wotsho wa tɔshɛkɛlɛ* ta paonyi kinunu la nkama esambele (1 700), aha la mbidja dɛngalɛnga diele oko ngɔndɔ keke ɛtshi, azama wa lɔlɛndalɛnda, ahɔndɔ w’ebelabela wakalɔtaka nkumi ya dikanga ya Midiyana ndo tɔshɛnɛtɛ t’oma lo nkingo ya kamɛlɔ.+
27 Ngidiyɔna akasale la wɔ efodɛ*+ ko akookitsha lo sɛkɛ lo osomba ande wa Ofara.+ Ase Isariyɛlɛ tshɛ wakasale kinumba ka lo nyuma*+ la wɔ laawɔ ndo vɔ wakayala tshondo ya djonga le Ngidiyɔna ndo le ase luudu lande.+
28 Ɔnkɔnɛ, ase Midiyana+ wakalɛndjama la ntondo k’ase Isariyɛlɛ ndo vɔ kɔsɛmanɛ la wɔ* nto, ko wodja wakayala la momuya* l’edja k’ɛnɔnyi 40 lo nshi ya Ngidiyɔna.+
29 Ko Jerubala*+ ɔna Jɔashi akakalola otsha lakande ndo akatodjasɛ lɛkɔ.
30 Ngidiyɔna akote ana w’apami 70,* nɛ dia nde aki la wadi efula. 31 Oseka ande waki la Shɛkɛmɛ nde la wɔ akote la nde ɔna pami, ko nde akawɔlɛ Abimɛlɛkɛ.+ 32 Ngidiyɔna ɔna Jɔashi akavu ambondoya andja, ko wakookundɛ lo diombo dia Jɔashi ya she la Ofara w’aseka Abiɛzɛrɛ.+
33 Kam’akavu Ngidiyɔna, ase Isariyɛlɛ wakasale kinumba ka lo nyuma* nto vɔ la waa Baala+ ndo waketɛ Baala-Bɛrita nzambi kawɔ.+ 34 Ase Isariyɛlɛ kombohɔ Jehowa Nzambi+ kawɔ lakaatshungola oma lo anya w’atunyi awɔ wakaadinge,+ 35 ndo vɔ kɔmɛnya ngandji kawɔ ka kɔlamelo otsha le ase luudu la Jerubala, mbuta ate Ngidiyɔna l’ɔtɛ w’ɛlɔlɔ tshɛ wakandasalɛ ase Isariyɛlɛ.+
9 L’ɔkɔngɔ wa laasɔ, Abimɛlɛkɛ+ ɔna Jerubala akatshu le waa nyango pami la Shɛkɛmɛ ko akatowatɛ vɔ la nkumbo k’otondo ka tshɛnde* ate: 2 “Lam’alanganyu, nyombole ewandji* wa la Shɛkɛmɛ nyate: ‘Alanganyu? Onde ana 70 akɔ tshɛ wa Jerubala+ wonge ewandji anyu, kana onto 1 onge owandji anyu? Ndo nto, tanyohɛke dia dimi lekɔ weka anyu ndo emunyi anyu.’”*
3 Ko waa nyango pami wakatɛ ewandji tshɛ wa la Shɛkɛmɛ ngasɔ lo wahɔ ande ndo etema awɔ wakɛlɛ dia ndjela Abimɛlɛkɛ, nɛ dia vɔ wakate vate: “Nde kele ɔnangɛso.” 4 Oma laasɔ, vɔ wakawosha ekenga 70 wa mfɛsa oma lo luudu* la Baala-Bɛrita,+ ko Abimɛlɛkɛ akakambe la wɔ dia mɔnga akanga wa dinginya ndo anto w’anyanya dia vɔ mboyela. 5 L’ɔkɔngɔ wa laasɔ, nde akatshu otsha lo luudu la she la Ofara,+ ko akatodiaka anango,+ ana w’apami wa Jerubala apami 70 lo dive 1. Onyake Jɔtama ɔna Jerubala la kose mbakake, nɛ dia nde akayashɛ.
6 Oma laasɔ, ewandji tshɛ wa la Shɛkɛmɛ ndo wa la Bɛtɛ-Milo wakasangana, ko waketɛ Abimɛlɛkɛ nkumekanga+ suke la osongo wa woke, l’omamu w’ekundji kaki la Shɛkɛmɛ.
7 Lam’akawatotɛ Jɔtama dikambo sɔ, mbala kakɔ ɔtɔi nde akatshu, ko akatemala lo shɔdi ya Dikona dia Ngɛrizimɛ+ ndo akaawelɛ la dui dia wolo ate: “Ewandji wa la Shɛkɛmɛ le, nyompokame, ko Nzambi ayonyohokamɛ.
8 “Lushi lɔmɔtshi, esongo wakatshu tɔsɔna nkumekanga kawɔ. Ko vɔ wakatɛ osongo w’ɔlivɛ vate: ‘Onga owandji aso.’+ 9 Koko osongo w’ɔlivɛ akawatɛ ate: ‘Onde dimi pombaka ntshika esɔ* kami kakambawɔ la tɔ dia ntombola Nzambi la anto ko dimi ntshɔ dia tonyinganyingaka laadiko di’esongo ekina?’ 10 Oma laasɔ, esongo akɔ wakatɛ osongo wa fingo vate: ‘Yaka yonge owandji aso.’ 11 Koko osongo wa fingo akawatɛ ate: ‘Onde dimi pombaka ntshika elowa ami wa mpɛ ndo w’amɛna ko dimi ntshɔ dia tonyinganyingaka laadiko di’esongo ekina?’ 12 Oma laasɔ, esongo akɔ wakatɛ ɔkɔdi wa vinyɔ vate: ‘Yaka yonge owandji aso.’ 13 Ɔkɔdi wa vinyɔ akaakadimola ate: ‘Onde dimi pombaka ntshika vinyɔ yami y’eyoyo yangɛnyangɛnya Nzambi la anto ko dimi ntshɔ dia tonyinganyingaka laadiko di’esongo ekina?’ 14 L’ekomelo, esongo ekina tshɛ wakatɛ osongo w’atɛndɛ vate: ‘Yaka yonge owandji aso.’+ 15 Ko osongo w’atɛndɛ akatɛ esongo akɔ ate: ‘Naka mɛtɛ kalanganyu sɔnami dia monga nkumekanga kanyu, kete nyoye nyoyoyange eshamelo lo dɛdi diami. Ko naka hanyosadi ngasɔ, kete dja yatombe oma l’osongo w’atɛndɛ ndo yatshumbe elondo wa la Lɛbanɔna.’
16 “Laasɔ lo mɛtɛ ndo lo yoho ya dimɛna mbambonyetɛ Abimɛlɛkɛ nkumekanga?+ Onde nyambosalɛ Jerubala l’ase luudu lande ɔlɔlɔ? Ndo onde nyamboosalɛ akambo lo yoho yahombanyu mbosalɛ? 17 Lam’akanyɔlwɛ papa ta,+ nde akadje lɔsɛnɔ* lande lo waale dia nyotsha oma lo anya w’ase Midiyana.+ 18 Koko ɛlɔ kɛnɛ, nyu nyɔlɔsha ase luudu la papa ndo nyambodiaka anande, apami 70 lo dive 1.+ Oma laasɔ, nyambetɛ Abimɛlɛkɛ ɔna ose olimu ande wa womoto+ nkumekanga k’ewandji wa la Shɛkɛmɛ paka l’ɔtɛ wende ɔnangɛnyu. 19 Naka lo mɛtɛ ndo lo yoho ya dimɛna mbambonyosalɛ Jerubala l’ase luudu lande akambo nganɛ ɛlɔ, kete nyɔngɛnɛngɛnɛ l’ɔtɛ wa Abimɛlɛkɛ ndo nde angɛnɛngɛnɛ l’ɔtɛ anyu. 20 Ko naka aha ngasɔ, kete dja yatombe oma le Abimɛlɛkɛ ndo yatshumbe ewandji wa la Shɛkɛmɛ ndo wa la Bɛtɛ-Milo,+ ndo dja yatombe oma le ewandji wa la Shɛkɛmɛ ndo wa la Bɛtɛ-Milo kele yatshumbe Abimɛlɛkɛ.”+
21 Oma laasɔ Jɔtama+ akalawɔ, ko akatoyashɛ la Bɛrɛ ndo nde akatodjasɛ lɛkɔ l’ɔtɛ wa Abimɛlɛkɛ w’ɔnango.
22 Abimɛlɛkɛ akolɛ* lo Isariyɛlɛ l’edja k’ɛnɔnyi 3. 23 Oma laasɔ, Nzambi akatshike dia lohetsho mpama* lam’asa Abimɛlɛkɛ la ewandji wa la Shɛkɛmɛ, ko vɔ wakashisha kɔlamelo le Abimɛlɛkɛ. 24 Dui sɔ diakasalema dia nsɔmbɔya nyɔi ka kɔlɔ kakawadiake ana w’apami 70 waki Jerubala, dia mɛndja ɔnangɛwɔ Abimɛlɛkɛ onongo wa dikila diawɔ l’ɔtɛ wakandaadiake,+ kaamɛ ndo ewandji wa la Shɛkɛmɛ l’ɔtɛ wakawokimanyiya dia ndjaka anango. 25 Ko ewandji wa la Shɛkɛmɛ wakatome anto dia tooholamɛ lo tɔsɔdi t’akona ndo vɔ wakakɔsɔlaka onto tshɛ laketaka lo mboka diangɔ. L’edjedja ka wonya, wakatotɛka Abimɛlɛkɛ dui sɔ.
26 Oma laasɔ, Ngala ɔna Ɛbɛdɛ nde la anango wakatenyanya otsha la Shɛkɛmɛ,+ ko ewandji wa la Shɛkɛmɛ wakayaɛkɛ le nde. 27 Vɔ wakatshu otsha lo dikambɔ, ko wakatomba elowa lo dikambɔ diawɔ dia vinyɔ, wakamula ndo wakasale difɛstɔ. L’ɔkɔngɔ wa laasɔ, vɔ wakɔtɔ lo luudu la jambizambi yawɔ,+ ko wakale, wakanɔ ndo wakadje Abimɛlɛkɛ mananu. 28 Oma laasɔ, Ngala ɔna Ɛbɛdɛ akate ate: “Ele Abimɛlɛkɛ ndo ele Shɛkɛmɛ katotohomba mbokambɛ? Shi ɔna Jerubala+ kende ndo Zebulu kele ɔlɔhɛ ande? Nyokambee aseka Hamɔra she Shɛkɛmɛ! Ko lande na kahombaso mbokambɛ? 29 Otondonga dimi kalɔmbɔla anto anɛ, tshike lotonya Abimɛlɛkɛ.” Oma laasɔ, nde akatɛ Abimɛlɛkɛ ate: “Fudia asɔlayi ayɛ kele tomba toyɔlɔ.”
30 Lam’akoke Zebulu owandji w’osomba akɔ kɛnɛ kakate Ngala ɔna Ɛbɛdɛ, nde akadunganɛ la nkɛlɛ. 31 Ɔnkɔnɛ, nde akatomɛ Abimɛlɛkɛ akɛndji lo woshɛshɛ* dia towotɛ ɔnɛ: “He Ngala ɔna Ɛbɛdɛ nde la anango wamboya la Shɛkɛmɛ ndo vɔ wekɔ lo ntshutshuya ase osomba lanɛ dia kɔlɔsha! 32 Laasɔ yaka l’otsho wɛ l’anto ayɛ kele nyoyoholame l’oswe. 33 Kam’ayowalɛ yanyi la pindju, ko nyu ntomba ndo ndɔsha osomba, ndo lam’ayondotomba nde l’anto ande dia ndjɔlɔ la yɛ, kosale kɛnɛ tshɛ kakokayɛ nsala dia mbɔlɛndja.”*
34 Ko Abimɛlɛkɛ l’anto tshɛ waki kaamɛ la nde wakonɛɛ l’otsho ndo wakaholama lo elui 4 dia ndɔsha Shɛkɛmɛ. 35 Lam’akatombe Ngala ɔna Ɛbɛdɛ ndo lam’akandemala la soko dia osomba, Abimɛlɛkɛ nde l’anto waki kaamɛ la nde wakatombe oma lɛnɛ akawaholama. 36 Kam’akɛnyi Ngala anto akɔ, nde akatɛ Zebulu ate: “Ohenda, anto wekɔ lo ndjaholɔ oma lo tɔsɔdi t’akona.” Koko Zebulu akawotɛ ate: “Ongo alɛdi w’akona mbɛnayɛ oko anto.”
37 L’ɔkɔngɔ diko, Ngala akate ate: “Ohenda, anto wekɔ lo ndjaye oma l’atei wa wodja ndo olui ɔmɔtshi wekɔ lo ndjaye lo mboka k’osongo wa woke wa Meyɔnenima.”* 38 Zebulu akookadimola ate: “Lende aya dihonga diayɛ, wɛ lakataka wate: ‘Ele Abimɛlɛkɛ kahombaso mbokambɛ?’+ Shi anto wakayadjaka tɔfwɛfwɛ vɔ ango? Otshɔka wonya ɔnɛ tɔlɔ la wɔ!”
39 Ko Ngala akete la ntondo k’ewandji wa la Shɛkɛmɛ ndo akalɔ la Abimɛlɛkɛ. 40 Abimɛlɛkɛ akawotshanya, ko Ngala akoolawɔ ndo anto efula wakadiakema polo la soko dia osomba.
41 Abimɛlɛkɛ akatetemala mbidjasɛ la Aruma ndo Zebulu+ akatshanya Ngala nde la anango oma la Shɛkɛmɛ. 42 La wedi a pindju, anto wakatshu l’oswe, ko wakayotɛ Abimɛlɛkɛ dikambo diakɔ. 43 Ɔnkɔnɛ nde akɔshi anto ande, ko akaakahanya lo elui 3 ndo wakaholama l’oswe. Lam’akandɛnyi anto wayatombe oma l’osomba, nde akaalɔsha ndo akaadiake. 44 Abimɛlɛkɛ la asɔlayi waki kaamɛ la nde wakakungusɔ la lowango, ko wakaamamala la soko dia osomba ndo elui ekina 2 w’asɔlayi wakalɔshaka wanɛ tshɛ waki l’oswe, ko vɔ wakaadiake. 45 Abimɛlɛkɛ akalɔsha osomba lushi lɔsɔ l’otondo, ko nde akawɔshi. Nde akadiake anto wa lɔkɔ, ko oma laasɔ, nde akahandjola osomba akɔ+ ndo akakundɛ lɛɛhɔ lɔkɔ.
46 Lam’akoke ewandji wa lo tshoto ya la Shɛkɛmɛ ngasɔ, aha la ntshimbatshimba, vɔ wakatshu otsha lo dihole di’eshamelo* dia lo luudu* la Ɛlɛ-Bɛrita.+ 47 Kam’akawatɛ Abimɛlɛkɛ ɔnɛ ewandji tshɛ wa lo tshoto ya la Shɛkɛmɛ wambotshumana, 48 Abimɛlɛkɛ nde l’apami tshɛ waki kaamɛ la nde wakadɛ otsha lo Dikona dia Zalamɔna. Abimɛlɛkɛ akakimɛ shɔka lo lonya lande, ko akakɔtɛ lotahe la osongo, akaliahɛ lo dihɛka ndo akatɛ anto waki kaamɛ la nde ate: “Kɛnɛ kamɛnanyu lasala, nyokisale esadi!” 49 Ko anto tshɛ waki kaamɛ la nde wakakɔtɛ ntahe vɔ lawɔ, ko wakayele Abimɛlɛkɛ. Oma laasɔ, vɔ wakatokitsha ntahe yakɔ suke la dihole diakɔ di’eshamelo, ko wakadje dja lo dihole diakɔ di’eshamelo. Ɔnkɔnɛ, anto tshɛ waki lo tshoto ya la Shɛkɛmɛ wakavu, anto oko kinunu (1 000), apami la wamato.
50 L’ɔkɔngɔ wa laasɔ, Abimɛlɛkɛ akatshu otsha la Tɛbɛzɛ. Nde akatoka mpango kande dia ndɔsha Tɛbɛzɛ ndo akakiɔshi. 51 Tshoto mɔtshi ya wolo yaki l’atei w’osomba, ko apami la wamato tshɛ ndo ewandji w’osomba akɔ tshɛ wakalawɔ lɛkɔ. Vɔ wakayadihe l’etei, ko wakadɛ lo shɔdi ya tshoto yakɔ. 52 Abimɛlɛkɛ akatshu otsha lo tshoto yakɔ ko akayilɔsha. Nde akasukana oya la soko dia tshoto yakɔ dia nde ndjitshumba. 53 Ko womoto ɔmɔtshi akahondja Abimɛlɛkɛ dive di’ɔhɛlɔ dia la diko l’ɔtɛ, ko diakawole lowako.+ 54 Ko nde akelɛ okambi ande wakayawɛmbɛka dihomɔ dia ta esadi ndo akawotɛ ate: “Sɔmɔla lokuwa layɛ la ta kele ondjake, diaha vɔ ndjota lo dikambo diami vate: ‘Womoto kakoodiake.’” Ko okambi ande akawoke lokuwa, ko nde akavu.
55 Lam’akɛnyi ase Isariyɛlɛ dia Abimɛlɛkɛ ambovɔ, vɔ tshɛ wakakalola la ngelo. 56 Ngasɔ mbakasɔmbɔya Nzambi Abimɛlɛkɛ l’ɔtɛ wa kɔlɔ kakandasalɛ she lo ndjaka anango 70.+ 57 Ndo nto, Nzambi akakaloya kɔlɔ tshɛ y’aseka Shɛkɛmɛ lo ɛtɛ awɔ. Ɔnkɔnɛ, mananu kaki Jɔtama+ ɔna Jerubala+ kakaye le wɔ.
10 L’ɔkɔngɔ wa Abimɛlɛkɛ, Tola ɔna Pua ɔna Dodo, oseka Isakara akatombe dia nshimbɛ ase Isariyɛlɛ.+ Nde akadjasɛka la Shamira lo lɛkɛ l’akona la Efrayimɛ. 2 Nde aki shushi lo Isariyɛlɛ l’edja k’ɛnɔnyi 23. Oma laasɔ, nde akavu ko wakookundɛ la Shamira.
3 L’ɔkɔngɔ ande, Jayira ose Ngiliyadɛ akatombe ndo nde aki shushi lo Isariyɛlɛ l’edja k’ɛnɔnyi 22. 4 Nde aki la ana w’apami 30 wakahemaka mponda 30 ndo vɔ waki la esomba 30 welamɛ polo ndo ɛlɔ ɔnɛ Havotɛ-Jayira.*+ Vɔ wekɔ lo ɛtshi ka nkɛtɛ ka Ngiliyadɛ. 5 L’ɔkɔngɔ wa laasɔ, Jayira akavu ko wakookundɛ la Kamɔna.
6 Ase Isariyɛlɛ wakasale kɛnɛ kaki kɔlɔ nto lo washo wa Jehowa+ ndo wakatatɛ kambɛ waa Baala,+ dikishi dia Ashitɔrɛtɛ, tozambizambi t’ase Arama,* tozambizambi t’ase Sidɔna, tozambizambi t’ase Mɔaba,+ tozambizambi t’ase Amɔna+ ndo tozambizambi t’ase Filistiya.+ Vɔ wakoke Jehowa ɔkɔngɔ ndo kombokambɛ. 7 Ko nkɛlɛ ka Jehowa kadɔdɔ kakaye le ase Isariyɛlɛ, ko nde akaakimɔ lo anya w’ase Filistiya ndo w’ase Amɔna.+ 8 Ko vɔ wakasɔkisha ndo wakasoya ase Isariyɛlɛ lo yɛdikɔ y’efula ɔnɔnyi ɔsɔ. Vɔ wakasoya ase Isariyɛlɛ tshɛ wa lo wedi wa Jɔrdana waki lo ɛtshi ka nkɛtɛ k’ase Amɔra la Ngiliyadɛ l’edja k’ɛnɔnyi 18. 9 Ase Amɔna wakatehɔ ndo Jɔrdana dia tɔlɔsha dioho dia Juda, dia Bɛnjamina ndo dia Efrayimɛ, ko ase Isariyɛlɛ waki lo shɔkɔ y’efula. 10 Ko ase Isariyɛlɛ wakalɔmbɛ Jehowa ekimanyielo+ vate: “Sho takakosalɛ pɛkato, nɛ dia takakoke wɛ Nzambi kaso ɔkɔngɔ, ko takakambɛ waa Baala.”+
11 Ko Jehowa akatɛ ase Isariyɛlɛ ate: “Onde dimi konyoshimbɛ oma l’Edjibito+ ndo oma le ase Amɔra,+ ase Amɔna, ase Filistiya,+ 12 ase Sidɔna, ase Amalɛka ndo ase Midiyana etena kakawanyɔhɛnyahɛnyaka? Lam’akanyandelɛ, dimi lakanyoshimbɛ oma lo anya awɔ. 13 Koko nyu nyakamboke ɔkɔngɔ, ko nyakakambɛ tozambizambi tokina.+ Diakɔ diele dimi hantonyoshimbɛ nto.+ 14 Nyotshu le tozambizambi takanyasɔnɛ kele tɔ tanyokimanyiya.+ Tɔ tanyoshimbe lo etena kɛnɛ kenyu lo lɔkɔnyɔ.”+ 15 Ko ase Isariyɛlɛ wakatɛ Jehowa vate: “Sho takasale pɛkato. Otosale kɛnɛ tshɛ kalangayɛ. Dikambo ɔtɔi ele, lam’alangayɛ, otoshimbe ɛlɔ.” 16 Ko vɔ wakanya tozambizambi t’ase wedja oma l’atei awɔ ndo wakakambɛ Jehowa,+ ko nde kokoka nto mbetawɔ* dia mɛna ase Isariyɛlɛ wasowa.+
17 L’etena kɛsɔ, ase Amɔna+ wakasangana kaamɛ ko wakake mpango kawɔ la Ngiliyadɛ. Ɔnkɔnɛ, ase Isariyɛlɛ wakasangana kaamɛ ko wakake mpango kawɔ la Mizipa. 18 Anto ndo ewandji waki la Ngiliyadɛ wakatanɛ vate: “Ayeta la ntondo dia ndɔsha ase Amɔna?+ Nde ayale owandji w’anto tshɛ wadjasɛ la Ngiliyadɛ.”
11 L’etena kɛsɔ, Jafɛta+ ose Ngiliyadɛ aki ɔndɔshi wa ta wa wolo. Nde aki ɔna aki numba kɛmɔtshi ndo Ngiliyadɛ mbaki she Jafɛta. 2 Koko wadi aki Ngiliyadɛ nde lawɔ akote la nde ana w’apami. Lam’akole ana waki wadɛnde, vɔ wakatshanya Jafɛta ndo wakawotɛ vate: “Wɛ hatokondja ndooko ɛngɔ oma lo luudu la shɛso oko etenyi k’okitɔ, nɛ dia wɛ ekɔ ɔna aki womoto okina.” 3 Ko Jafɛta akalawɔ anango ndo akatodjasɛ lo ɛtshi ka nkɛtɛ ka Tɔbɛ. Akanga wa dinginya wakɔtɔ l’ɔnɔngɔ wa Jafɛta ndo wakooyele.
4 L’ɔkɔngɔ w’etena kɛmɔtshi, ase Amɔna wakalɔsha ase Isariyɛlɛ.+ 5 Lam’akalɔsha ase Amɔna ase Isariyɛlɛ, aha la ntshimbatshimba, dikumanyi diaki la Ngiliyadɛ wakatshu dia tokaloya Jafɛta oma lo ɛtshi ka nkɛtɛ ka Tɔbɛ. 6 Vɔ wakatɛ Jafɛta vate: “Yaka yonge kɔmanda kaso kele tɔlɔsha ase Amɔna.” 7 Koko Jafɛta akatɛ dikumanyi dia la Ngiliyadɛ ate: “Shi nyu nyakampetshaka woho w’anyanya mbakanyambitshanya oma lo luudu la papa?+ Ko onyoyaye wonya ɔnɛ le mi lam’ayanyu lo shɔkɔ?” 8 Ko dikumanyi dia la Ngiliyadɛ wakatɛ Jafɛta vate: “Diakɔ diambotokalola wonya ɔnɛ le yɛ. Naka wɛ ntshɔ kaamɛ la so dia tɔlɔsha ase Amɔna, kete wɛ ayonga owandji aso ndo wɛ ayolɛ anto tshɛ wodjashi la Ngiliyadɛ.”+ 9 Ko Jafɛta akatɛ dikumanyi dia la Ngiliyadɛ ate: “Naka nyu kaloyami dia tɔlɔ l’ase Amɔna ko Jehowa ambɔnɛndjɛwɔ, kete mɛtɛ dimi layonga owandji anyu!” 10 Dikumanyi dia la Ngiliyadɛ wakatɛ Jafɛta vate: “Jehowa onge ɔmɛnyi* lam’asaso la yɛ naka sho hatosadi oko watayɛ.” 11 Ɔnkɔnɛ, Jafɛta akatshu nde la dikumanyi dia la Ngiliyadɛ, ko anto wakawetɛ owandji ndo kɔmanda. Jafɛta akate ɛtɛkɛta ande tshɛ nto la ntondo ka Jehowa la Mizipa.+
12 Oma laasɔ, Jafɛta akatomɛ nkumekanga k’ase Amɔna+ akɛndji dia towotɛ ɔnɛ: “Kakɔna kayangayɛ le mi* kamboyoya dia ndjɔlɔsha ɛtshi kami ka nkɛtɛ?” 13 Ko nkumekanga k’ase Amɔna akatɛ akɛndji waki Jafɛta ate: “Nɛ dia ase Isariyɛlɛ wakɔshi ɛtshi kami ka nkɛtɛ lam’akawatombe oma l’Edjibito,+ oma la Aranɔna+ polo la Jabɔka polo ndo lo Jɔrdana.+ Ɔnkɔnɛ, onkaloyatɔ lo ki.” 14 Koko Jafɛta akakaloya akɛndji akɔ nto otsha le nkumekanga k’ase Amɔna 15 dia towotɛ ɔnɛ:
“Jafɛta kata ate: ‘Ase Isariyɛlɛ kɔmbɔsa ndooko ɛtshi ka nkɛtɛ k’ase Mɔaba+ kana ɛtshi ka nkɛtɛ k’ase Amɔna,+ 16 nɛ dia lam’akawatombe oma l’Edjibito, ase Isariyɛlɛ wakete l’oswe wa shɛnga polo lo Ndjale ka Beela,+ ko wakayokoma la Kadɛshɛ.+ 17 Oma laasɔ, ase Isariyɛlɛ wakatomɛ nkumekanga ka Ɛdɔmɛ+ akɛndji dia towotɛ ɔnɛ: “Lam’alangayɛ, ototshike tete lo ɛtshi kayɛ ka nkɛtɛ,” koko nkumekanga ka Ɛdɔmɛ komboka. Ndo nto, vɔ wakatomɛ nkumekanga ka Mɔaba+ dui, koko nde kombetawɔ. Ɔnkɔnɛ, ase Isariyɛlɛ wakatetemala mbidjasɛ la Kadɛshɛ.+ 18 Lam’akawatetaka l’oswe wa shɛnga, vɔ wakakome suke la ɛtshi ka nkɛtɛ ka Ɛdɔmɛ+ ndo ka Mɔaba. Vɔ wakete lo ɛstɛ lo ɛtshi ka nkɛtɛ ka Mɔaba+ ndo wakahange lo ɛtshi ka nkɛtɛ ka Aranɔna. Vɔ kondekana olelo wa Mɔaba+ kaanga yema tshitshɛ, nɛ dia Aranɔna mbaki olelo w’ase Mɔaba.
19 “‘L’ɔkɔngɔ wa laasɔ, ase Isariyɛlɛ wakatomɛ Sihɔna nkumekanga k’ase Amɔra, nkumekanga ka Hɛshibɔna akɛndji ko ase Isariyɛlɛ wakawotɛ vate: “Lam’alangayɛ, ototshike tete lo ɛtshi kayɛ ka nkɛtɛ otsha lakaso.”+ 20 Koko Sihɔna kondjaɛkɛ le ase Isariyɛlɛ ndo kombasha diaaso dia mbeta lo ɛtshi kande ka nkɛtɛ. Ɔnkɔnɛ, Sihɔna akasanganya anto ande tshɛ, ndo wakake mpango kawɔ la Jahaza, ko wakalɔsha ase Isariyɛlɛ.+ 21 Ko Jehowa Nzambi k’Isariyɛlɛ akakimɔ Sihɔna nde l’anto ande tshɛ lo anya w’ase Isariyɛlɛ, ko vɔ wakaalɛndja ndo ase Isariyɛlɛ wakɔshi ɛtshi ka nkɛtɛ k’otondo k’ase Amɔra, wanɛ wakadjasɛka lo ɛtshi ka nkɛtɛ kɛsɔ.+ 22 Ngasɔ mbakawɔshi ɛtshi ka nkɛtɛ k’otondo k’ase Amɔra oma la Aranɔna polo la Jabɔka ndo oma l’oswe wa shɛnga polo lo Jɔrdana.+
23 “‘Jehowa Nzambi k’Isariyɛlɛ kakatshanya ase Amɔra oma la ntondo k’ase Isariyɛlɛ,+ ko wonya ɔnɛ nyolanga mbatshanya? 24 Shi wɛ ekɔ la ɛngɔ tshɛ kakosha Kɛmɔshɛ,+ nzambi kayɛ? Ɔnkɔnɛ, onto tshɛ lele Jehowa Nzambi kaso akawotshanya oma la ntondo kaso, sho lawɔ tayowotshanya.+ 25 Onde nyu ndeka Balaka+ ɔna Zipɔrɛ, nkumekanga ka Mɔaba? Onde nde ambowanaka l’ase Isariyɛlɛ lushi lɔmɔtshi kana mbalɔsha? 26 Lam’akadjasɛka ase Isariyɛlɛ la Hɛshibɔna la tosombasomba tendɛ le wɔ*+ ndo la Aroɛrɛ la tosombasomba tendɛ le wɔ ndo lo esomba tshɛ wele l’omamu wa Aranɔna l’edja k’ɛnɔnyi 300, lande na kakinyu konyanga dia mbakɔsɔlawɔ l’edja kɛsɔ tshɛ?+ 27 Dimi hanyosale kɔlɔ, koko nyu mbambondja lo ndɔshami. Jehowa lele Shushi+ asambole ɛlɔ lam’asa ase Isariyɛlɛ l’ase Amɔna.’”
28 Koko nkumekanga k’ase Amɔna kononga awui wakootomɛ Jafɛta.
29 Nyuma ka Jehowa kakaye le Jafɛta,+ ko nde akalekana Ngiliyadɛ la Manase ndo akatshu otsha la Mizipɛ ka la Ngiliyadɛ,+ ndo oma la Mizipɛ ka la Ngiliyadɛ, nde akatetemala otsha laka ase Amɔna.
30 Oma laasɔ, Jafɛta akatshike dɔkɔlɔkɔ+ la ntondo ka Jehowa ate: “Naka wɛ nkimɔ ase Amɔna lo anya ami, 31 kete onto tshɛ layotomba oma lo soko dia luudu lami dia ndjohomana la mi lam’ayomokalola la ki oma le ase Amɔna ayonga laki Jehowa+ ndo dimi layowolambola oko olambo wa lotshumba.”+
32 Ko Jafɛta akatshu dia tɔlɔsha ase Amɔna ndo Jehowa akaakimɔ lo anya ande. 33 Nde akaadiake lo yɛdikɔ y’efula oma la Aroɛrɛ lo mboka k’otondo k’otsha la Minita, esomba 20 polo la Abɛlɛ-Keramima. Ngasɔ mbakalɛndjama ase Amɔna la ntondo k’ase Isariyɛlɛ.
34 L’ekomelo, Jafɛta akakalola oya lakande la Mizipa+ ndo nyolonge, ɔnande la womoto akayatombaka dia ndjohomana la nde, ayahome ngɔmɔ ndo ayanɔ lokombe! Ɔna womoto akɔ mbaki tshɔi yande y’ɔna. Nde komonga la ɔna okina la pami kana la womoto laadiko diande. 35 Lam’akandawɛnyi, nde akaatshatsha ahɔndɔ ande ko akate ate: Hayii ɔnami! Wɛ ambombata asolo,* nɛ dia wɛ aya ɔnɛ lamomokimɔ. Dimi lakatshike dɔkɔlɔkɔ le Jehowa ndo wonya ɔnɛ dimi halakoke nkalola ɛkɔngɔkɔngɔ.”+
36 Koko nde akate ate: “Papa, naka wɛ akatshike dɔkɔlɔkɔ le Jehowa, kete onsale kɛnɛ kakayalake,+ nɛ dia Jehowa ambokɔsɔmbɔyɛ atunyi ayɛ, ase Amɔna.” 37 Ko nde akatɛ she ate: “Nyonsale nganɛ: Nyontshike dimɛ ngɔndɔ 2 kele ntshu lo akona dia dimi tolela emuma kami lɛkɔ dimi l’asekami wa wamato.”*
38 Ko she akate ate: “Tshɔka!” Ɔnkɔnɛ, nde akookimɔ l’edja ka ngɔndɔ 2 ndo ɔnakɔ akatshu lo akona nde l’asekande dia tolela emuma kande. 39 L’ekomelo ka ngɔndɔ 2, nde akakalola le she, ko she akakotsha dɔkɔlɔkɔ diakandatshike lo dikambo dia ɔnande.+ Nde kombeyana la pami ndooko lushi. Ko ase Isariyɛlɛ wakayonga la mbekelo* kɛnɛ: 40 Ɔnɔnyi l’ɔnɔnyi, esekaseka wa l’Isariyɛlɛ wakatshɔka dia tandola ɔna womoto la Jafɛta ose Ngiliyadɛ nshi 4 lo ɔnɔnyi.
12 Oma laasɔ, aseka Efrayimɛ wakasangana, ko wakatehɔ otsha la Zafɔna* ko wakatotɛ Jafɛta vate: “Lande na kakiyɛ kotelɛ dia sho ntshɔ la yɛ lam’akayatehɔ dia tɔlɔsha ase Amɔna?+ Tayanga kotshumba l’etei ka luudu layɛ.” 2 Koko Jafɛta akawatɛ ate: “Dimi l’anto ami takawane efula l’ase Amɔna. Dimi lakanyelɛ dia nyu ndjonkimanyiya, koko nyu kombitshami oma lo anya awɔ. 3 Lam’akamɛnyi dia hanyotoya ndjombitsha, dimi lakɔshi yɛdikɔ ya mbidja lɔsɛnɔ lami lo waale,* ko lakatshu dia tɔlɔsha ase Amɔna,+ ko Jehowa akaakimɔ lo anya ami. Laasɔ, lande na kamonyoya ɛlɔ dia ndjɔndɔsha?”
4 Ko Jafɛta akasanganya apami tshɛ wa la Ngiliyadɛ,+ ko wakalɔsha Efrayimɛ. Apami wa la Ngiliyadɛ wakalɛndja aseka Efrayimɛ wanɛ wakataka ɔnɛ: “Nyu ase Ngiliyadɛ wadjasɛ l’atei wa Efrayimɛ la Manase le, toko oma laka aseka Efrayimɛ mbakanyalawɔ.” 5 Ngiliyadɛ akaamamala la ateho wa Jɔrdana+ wa l’ekolo la ntondo k’aseka Efrayimɛ. Lam’akayangaka aseka Efrayimɛ ndawɔ, vɔ wakataka vate: “Ombetsha ntehɔ.” Ko ase Ngiliyadɛ wakambolaka onto l’onto ɔnɛ: “Onde wɛ ekɔ oseka Efrayimɛ?” Naka nde ambokadimola ate: “Keema!” 6 vɔ wakawotɛka vate: “Lam’alangayɛ, ta wate Shibɔlɛtɛ.” Koko nde akataka ate: “Sibɔlɛtɛ,” nɛ dia nde kokokaka mbuta tshɛkɛta shɔ dimɛna. Oma laasɔ ko vɔ mbonda ndo mbodiaka lo ateho wa Jɔrdana. Ɔnkɔnɛ, aseka Efrayimɛ nunu akumi anɛi la pende (42 000) wakadiakema l’etena kɛsɔ.
7 Jafɛta aki shushi lo Isariyɛlɛ l’edja k’ɛnɔnyi 6 ndo l’ɔkɔngɔ wa laasɔ, Jafɛta ose Ngiliyadɛ akavu, ko wakookundɛ l’osomba ande la Ngiliyadɛ.
8 Ibizana w’oma la Bɛtɛlɛhɛma akayonga shushi lo Isariyɛlɛ l’ɔkɔngɔ ande.+ 9 Nde aki la ana w’apami 30 ndo ana wa wamato 30. Nde akatome anande wa wamato dia vɔ totshukama le apami wa lo dioho dikina ndo nde akela ana wa wamato 30 dia vɔ ndjotshukama le anande w’apami. Nde aki shushi lo Isariyɛlɛ l’edja k’ɛnɔnyi 7. 10 Oma laasɔ, Ibizana akavu, ko wakookundɛ la Bɛtɛlɛhɛma.
11 L’ɔkɔngɔ ande, Elɔna w’oseka Zebuluna akayala shushi lo Isariyɛlɛ. Nde akayala shushi lo Isariyɛlɛ l’edja k’ɛnɔnyi 10. 12 Oma laasɔ, Elɔna w’oseka Zebuluna akavu, ko wakookundɛ la Aidjalɔna lo ɛtshi ka nkɛtɛ ka Zebuluna.
13 L’ɔkɔngɔ ande, Abidɔna ɔna Hilɛlɛ ose Piratɔna akayala shushi lo Isariyɛlɛ. 14 Nde aki la ana w’apami 40 ndo ekana 30 wakahemaka lo mponda 70. Nde aki shushi lo Isariyɛlɛ l’edja k’ɛnɔnyi 8. 15 Oma laasɔ, Abidɔna ɔna Hilɛlɛ ose Piratɔna akavu, ko wakookundɛ la Piratɔna lo ɛtshi ka nkɛtɛ ka Efrayimɛ lo dikona di’ase Amalɛka.+
13 Ase Isariyɛlɛ wakasale nto kɛnɛ kaki kɔlɔ lo washo wa Jehowa,+ ko Jehowa akaakimɔ lo anya w’ase Filistiya+ l’edja k’ɛnɔnyi 40.
2 L’etena kɛsɔ, pami kɛmɔtshi aki la Zɔra+ lo nkumbo k’aseka Danɛ,+ lokombo lande Manɔa.+ Wadɛnde aki ekomba ndo komonga ndooko la ɔna.+ 3 L’ɔkɔngɔ diko, ondjelo wa Jehowa akɛnama le womoto akɔ ndo akawotɛ ate: “Kaanga mbeyɛ ekomba ndo bu ndooko la ɔna, wɛ ayotshɔ diemi ndo ayota ɔna pami.+ 4 Ɔnkɔnɛ, sala tshɛ diaha wɛ nnɔ vinyɔ kana wanu akina tshɛ wadjoya+ ndo tɔlɛke ndooko ɛngɔ ka mindo.+ 5 Eenda, wɛ ayotshɔ diemi ndo ayota ɔna pami, koko ɛrɛswara hawohombe mbeta l’ɔtɛ ande,+ nɛ dia ɔnakɔ ayonga Okidiami waki Nzambi oma ko eotwelo* kande ndo nde kayotatɛ nshimbɛ ase Isariyɛlɛ oma lo anya w’ase Filistiya.”+
6 Ko womoto akɔ akatshu ndo akatotɛ omɛnde ate: “Okambi wa Nzambi ka mɛtɛ akaye le mi ndo ɛnamelo kande kaki ka diambo efula oko ka ondjelo wa Nzambi ka mɛtɛ. Dimi hambombodi oma lɛnɛ akandaye ndo nde hambute lokombo lande.+ 7 Koko nde akambute ate: ‘Eenda, wɛ ayotshɔ diemi ndo ayota ɔna pami. Ɔnkɔnɛ, tɔnɔke vinyɔ kana wanu akina tshɛ wadjoya ndo tɔlɛke ndooko ɛngɔ ka mindo, nɛ dia ɔnakɔ ayonga Okidiami waki Nzambi oma ko eotwelo* kande polo lushi layondovɔ.’”
8 Ko Manɔa akasɛngasɛnga Jehowa ate: “Jehowa le, onkimwe. Lam’alangayɛ, etawɔ dia okambi wa Nzambi ka mɛtɛ wakayatome ndja nto dia ndjototɛ kɛnɛ kahombaso salɛ ɔna layotɔ.” 9 Ko Nzambi ka mɛtɛ akokɛ Manɔa ndo ondjelo wa Nzambi ka mɛtɛ akaye nto le womoto akɔ etena kakandadjasɛ l’andja. Omɛnde Manɔa komonga lalende. 10 Womoto akɔ akalawɔ esadi ko akatotɛ omɛnde ate: “Eenda, pami kakaye le mi lushi longo ambɛnama le mi nto!”+
11 Ko Manɔa akonɛɛ ndo akatshu kaamɛ la wadɛnde. Nde akakome le pami kakɔ ko akawotɛ ate: “Onde wɛ kele pami kakasawola la wadɛmi?” Nde akate ate: “Eelo dimi.” 12 Ko Manɔa akate ate: “Ɛtɛkɛta ayɛ wakotshame! Ngande wayonga lɔsɛnɔ la ɔnakɔ ndo olimu akɔna wayondokamba?”+ 13 Ko ondjelo wa Jehowa akatɛ Manɔa ate: “Wadɛyɛ pombaka nsala tshɛ dia nkitanyiya kɛnɛ tshɛ kakamawotɛ.+ 14 Nde hahombe ndɛ ɛngɔ tshɛ k’oma l’ɔkɔdi wa vinyɔ ndo nde hahombe nnɔ vinyɔ kana wanu akina tshɛ wadjoya,+ ndo nde hahombe ndɛ ndooko ɛngɔ ka mindo.+ Nde pombaka nkitanyiya kɛnɛ tshɛ kakamawodjangɛ.”
15 Ko Manɔa akatɛ ondjelo wa Jehowa ate: “Lam’alangayɛ, konga yema kele tokokate ɔsɔngɔ wa mbudi.”+ 16 Koko ondjelo wa Jehowa akatɛ Manɔa ate: “Kaanga mbankongiyayɛ, dimi hantɔlɛ diangɔ diayɛ. Ko naka wɛ nangaka nambola Jehowa olambo wa lotshumba, wɛ mbeyaka mbolambola.” Manɔa kombeya dia nde ekɔ ondjelo wa Jehowa. 17 Ko Manɔa akambola ondjelo wa Jehowa ate: “Lokombo layɛ,+ kele katoyokɔlɛmiya lam’ayokotshama ɛtɛkɛta ayɛ?” 18 Koko ondjelo wa Jehowa akawotɛ ate: “Lande na kamimbolayɛ lokombo la mi lam’ele lɔ lekɔ lokombo la diambo?”
19 Oma laasɔ, Manɔa akɔshi ɔsɔngɔ wa mbudi la olambo wa ntɔngɔ, ko akalambola Jehowa laadiko dia dive. Ko Nde akasale dikambo dimɔtshi dia diambo etena kakendaka Manɔa nde la wadɛnde. 20 Lam’akadɛka loombe la dja oma lo elambwelo otsha l’olongo, ondjelo wa Jehowa akadɛ lo loombe lakɔ la dja oma lo elambwelo etena kakendaka Manɔa nde la wadɛnde. Ko mbala kakɔ ɔtɔi, vɔ wakayakɔsha ekukumadi. 21 Ondjelo wa Jehowa kɔmɛnama le Manɔa la wadɛnde nto. Oma laasɔ, Manɔa akashihodia dia nde aki ondjelo wa Jehowa.+ 22 Ko Manɔa akatɛ wadɛnde ate: “Ndooko onyake tayanga mvɔ, nɛ dia tambɛna Nzambi.”+ 23 Koko wadɛnde akawotɛ ate: “Otonga Jehowa akalangi todiaka, tshike totondetawɔ olambo wa lotshumba+ la olambo wa ntɔngɔ w’oma lo anya aso ndo totondotɛnya akambo anɛ tshɛ ndo totondototɛ akambo asɔ kaanga yema tshitshɛ.”
24 L’ɔkɔngɔ diko, womoto akɔ akote ɔna pami, ko akawɔlɛ Samisɔna.+ Ndo etena kakatolaka ɔnakɔ, Jehowa akatawɔtshɔkɔlaka. 25 Oma laasɔ, nyuma ka Jehowa kakatatɛ nkamba olimu le nde+ lam’akinde la Mahanɛ-Danɛ,+ lam’asa Zɔra la Eshitaɔlɛ.+
14 Oma laasɔ, Samisɔna akatshu la Timina ndo lam’akinde la Timina, nde akɛnyi womoto ɔmɔtshi l’ose Filistiya.* 2 Ko nde akakalola ndo akatotɛ she la nyango ate: “Lam’akimi la Timina, washo ami wakakotɔmi le ɔna womoto ɔmɔtshi l’ose Filistiya ndo dimi nangaka nyu mbɔsɛminde wadi.” 3 Koko she la nyango wakawombola vate: “Wɛ hakoki ntana ɔna womoto ɔmɔtshi l’atei w’ewotɔ ayɛ ndo l’atei w’anto aso?+ Laasɔ wate ntshu totshuke wadi l’atei w’ase Filistiya wahanyɛma mpota?” Ko Samisɔna akatɛ she ate: “Ɔmbɔsɛnde, nɛ dia nde ekɔ dimɛna le mi.”* 4 She la nyango kombeya dia dui sɔ diakaye oma le Jehowa, nɛ dia Nde akayangaka diaaso dia ndɔsha ase Filistiya, dikambo ase Filistiya wakahemɛka ase Isariyɛlɛ l’etena kɛsɔ.+
5 Ko Samisɔna akaholɔ kaamɛ la she la nyango otsha la Timina. Lam’akandakome lo dikambɔ dia vinyɔ dia la Timina, ntambwɛ* kakayadikitaka oya le nde. 6 Ko nyuma ka Jehowa kakawosha wolo,+ ko nde akakiate lo 2 la anya ande, oko onto lata ɔsɔngɔ wa mbudi. Koko nde kombutɛ she la nyango kɛnɛ kakandasale kɛsɔ. 7 Oma laasɔ, nde akaholɔ ndo akatosawola la womoto akɔ, ko womoto akɔ akatetemala monga dimɛna lo washo wa Samisɔna.+
8 L’ɔkɔngɔ diko, lam’akandatakalolaka dia towɔsa otsha lakande,+ nde akɛwɔ dia menda odo wa ntambwɛ kakɔ, ɛnyinde ko olui wa ndjwe ndo osanga lo dikandja dia ntambwɛ kakɔ. 9 Ko nde akɔshi osanga lo anya ande, ko akatalɛka lo mboka. Lam’akandande she la nyango, nde akawasha yema dia vɔ ndɛ. Koko nde kombatɛ dia nde akɔshi osanga akɔ oma lo dikandja dia ntambwɛ.
10 She akaholɔ otsha le womoto akɔ, ko Samisɔna akasale dambo lɛkɔ, nɛ dia ngasɔ mbakasalaka ɛlɔngɔ w’apami. 11 Lam’akawawɛnyi, vɔ wakela ɛlɔngɔ w’apami 30 oko angɛnyi wa lo diwala dia vɔ ndjonga kaamɛ la nde. 12 Ko Samisɔna akawatɛ ate: “Lam’alanganyu, dimi nte nyoke dɔ dimɔtshi. Naka l’edja ka nshi 7 ya dambo nyu sakolɛmidiɔ ndo kadimolami, dimi layonyosha ahɔndɔ wa linɛnɛ 30 ndo ahɔndɔ akina 30. 13 Ko naka hanyokoki kadimolami, kete nyayombisha ahɔndɔ wa linɛnɛ 30 ndo ahɔndɔ akina 30.” Vɔ wakate vate: “Otoke dɔ diakɔ tohokame.” 14 Ko nde akawaokediɔ ate:
“Oma le ondeshi kakatombe ɛngɔ ka ndɛ,
Ndo oma lo wolo kakatombe ɛngɔ ka mpɛ.”+
Vɔ komonga l’akoka wa nsakola dɔ diakɔ l’edja ka nshi 3. 15 Ɔnkɔnɛ lushi la 4, vɔ wakatɛ wadi aki Samisɔna vate: “Ɔnga omɛyɛ+ kele nde atote osakwelo wa dɔ diande. Naka aha ngasɔ, kete tayokotshumba wɛ l’ase luudu la shɔ lo dja. Onde wɛ akatelɛ lanɛ dia ndjotɔhɔtɔla diangɔ diaso?” 16 Ko wadi aki Samisɔna akoolelɛ ate: “Wɛ petshakami, wɛ hanange.+ Wɛ akoke anto ami dɔ, koko wɛ hambutɛ olembetshielo adiɔ.” Ko nde akawotɛ ate: “Dimi kombutɛ oyadi papa kana mama, ko lande na katomokotɛ?” 17 Ko nde akatetemala mbolelɛ nshi tshɛ yakatshikala lo nshi 7 ya dambo. L’edjedja ka wonya, nde akayowotɛ lushi la 7, nɛ dia nde amboleka mbembiya. Ko womoto akɔ akatotɛ anto ande okadimwelo wa dɔ diakɔ.+ 18 Ɔnkɔnɛ lushi la 7 la ntondo ka wonya mbidja,* apami wa l’osomba wakawotɛ vate:
“Ele mpɛ ko ndeka osanga,
Ndo ele la wolo ko ndeka ntambwɛ?”+
Nde akaakadimola ate:
“Otondonga hanyokambi la ɔsɔngɔ ami wa ngɔmbɛ,+
Tshike totonyosakola dɔ diami.”
19 Oma laasɔ, nyuma ka Jehowa kakawosha wolo,+ ko nde akaholɔ otsha la Ashikɛlɔna,+ ko akatodiaka apami 30 lɛkɔ ndo akɔshi ahɔndɔ awɔ, ko akayosha wanɛ wakalembetshiya dɔ diande.+ Nde akoke nkɛlɛ, ko akakalola lo luudu la she.
20 Oma laasɔ, wakɔshi wadi aki Samisɔna,+ ko wakawosha ɔlɔngɔ ɔmɔtshi waki ɔngɛnyi ande wa lo diwala.+
15 L’ɔkɔngɔ diko, lo nshi ya dinela di’eponga, Samisɔna akatshu tenda wadɛnde ndo akatshu la ɔsɔngɔ wa mbudi. Nde akate ate: “Dimi nangaka mbɔtɔ le wadɛmi lo luudu la ndala.”* Koko she womoto kombetawɔ dia nde mbɔtɔ. 2 She womoto akate ate: “Dimi lakafɔnya nte: ‘Wɛ mɛtɛ mbohetshaka.’+ Ɔnkɔnɛ, dimi lakawosha ɔngɛnyi ayɛ ɔmɔtshi wa lo diwala.+ Shi kosɛnde mboleka dimɛna? Lam’alangayɛ, ɔsa kosɛnde lo dihole diande.” 3 Koko Samisɔna akawatɛ ate: “Mbala kɛnɛ, dimi hantokoka monga la onongo l’ɔtɛ w’ase Filistiya oyadi dimi kaasalɛka kɔlɔ.”
4 Ko Samisɔna akatshu ndo akatonda ɛkɛngɛ 300. Oma laasɔ nde akɔshi ewa, akakeleka wela wa ɛkɛngɛ ehende ehende, ko nde mbidja owa lo wela akɔ ehende ehende. 5 Oma laasɔ, nde akahɛtsha ewa akɔ ko akakimɔ ɛkɛngɛ akɔ otsha lo dikambɔ di’ase Filistiya diakiwɔ watane. Nde akatshumbe diangɔ tshɛ diaki lo dikambɔ, oyadi lo dikambɔ dia vinyɔ kana lo dikambɔ dia ɔlivɛ.
6 Ase Filistiya wakambola vate: “Akasadi nganɛ?” Wakawatɛ vate: “Samisɔna, okilo waki ose Timina, nɛ dia nde akɔshi wadɛnde ko akawosha ɔlɔngɔ ɔmɔtshi waki ɔngɛnyi ande wa lo diwala.”+ Ko ase Filistiya wakatshu, ko wakatotshumba womoto akɔ nde la she lo dja.+ 7 Ko Samisɔna akawatɛ ate: “Naka nganɛ mbamonyosala, dimi hantotshika paka lambonyɔsɔmbɔya.”+ 8 Ko nde akaadiake efula ka mamba ɔtɔi ɔtɔi.* Oma laasɔ nde akaholɔ, ko akatodjasɛ lo wooko wa dive dia la Etamɛ.
9 L’ɔkɔngɔ diko, ase Filistiya wakaye ko wakayoka mpango kawɔ la Juda ndo waketetaka la Lehi.+ 10 Oma laasɔ, apami w’ase Juda wakambola vate: “Lande na kamonyoya dia ndjotɔlɔsha?” Ko vɔ wakakadimola vate: “Tamboya ndjonda* Samisɔna dia sho mbosalɛ oko wakandatosalɛ.” 11 Ko apami w’ase Juda nunu sato (3 000) wakaholɔ otsha lo wooko wa dive dia la Etamɛ ko wakatotɛ Samisɔna vate: “Onde wɛ heye dia ase Filistiya mbotaheme?+ Ko lande na kamboyotosalɛ nganɛ?” Nde akawatɛ ate: “Oko wakawansalɛ mbakamaasalɛ ndo vɔ.” 12 Koko vɔ wakawotɛ vate: “Tamboya ndjokonda* dia kokimɔ le ase Filistiya.” Ko Samisɔna akate ate: “Nyontshibe dia nyuamɛ hanyotonsalɛ kɔlɔ.” 13 Vɔ wakawotɛ vate: “Keema, sho hatotokodiaka, tayokokeleka tsho ko kokimɔ le wɔ.”
Ko vɔ wakookeleka ɛkɔdi 2 w’eyoyo ndo wakootondja oma lo wooko. 14 Lam’akandakome la Lehi, ase Filistiya wakade kioko y’ɔngɛnɔngɛnɔ lam’akawawɛnyi. Oma laasɔ, nyuma ka Jehowa kakawosha wolo+ ndo ɛkɔdi wakawookeleka lo anya wakayala oko eshinga wa linɛnɛ wambolongola la dja ko wakahembɔhembɔ lo anya ande.+ 15 Ko nde akɛnyi lowanga la mponda k’omi leke oyoyo, akatshu laawɔ, akaliɔshi ko akadiake apami kinunu (1 000) la lɔ.+ 16 Oma laasɔ, Samisɔna akate ate:
“La lowanga la mponda, tota 1, atota 2!
La lowanga la mponda kamomodiaka apami kinunu (1 000).”+
17 Lam’akandashidiya ntɛkɛta, nde akakasha lowanga lakɔ ndo akɔlɛ dihole diakɔ ɔnɛ Ramata-Lehi.*+ 18 Oma laasɔ, nde akoke mposa k’ashi efula ko nde akalɔmbɛ Jehowa ate: “Wɛ kambosha okambi ayɛ panda ka woke kɛnɛ. Ko onde wonya ɔnɛ dimi pombaka mvɔ la mposa k’ashi ndo nkɔ lo anya w’anto waki kominyɛma mpota?” 19 Ko Nzambi akaate difuku diaki la Lehi ko ashi wakatatɛ nkɛla oma lɔkɔ.+ Kam’akandanɔ ashi, wolo ande wakakalola ndo nde akakeketala. Diakɔ diakandɔlɛ dihole sɔ ɔnɛ Ɛnɛ-Hakɔrɛ* kele la Lehi polo ndo ɛlɔ.
20 Nde akayala shushi lo Isariyɛlɛ lo nshi yaki ase Filistiya l’edja k’ɛnɔnyi 20.+
16 Lushi lɔmɔtshi, Samisɔna akatshu la Ngaza ko akatɛna numba kɛmɔtshi lɛkɔ, ko nde akɔtɔ le nde. 2 Wakatɛ ase Ngaza ɔnɛ: “He Samisɔna amboya lanɛ.” Ko vɔ wakoodinge ndo wakooholamɛ otsho w’otondo wookongɛ la soko dia osomba. Vɔ wakatshikala otsho w’otondo, wata vate: “Lam’ayohotɔ wonya, tayowodiaka.”
3 Koko Samisɔna akatetemala ndala lɛkɔ polo la midi k’otsho. Oma laasɔ, nde aketɔ la midi k’otsho, akakimɛ nkuke ya soko dia osomba kaamɛ la dikundji dia l’emamu akɔ 2, ko nde akayiongola kaamɛ la kɔkɔmɔ yayɔ. Nde akayiahɛ lo ahɛka ndo akayiɛmbɛ polo lo shɔdi ya dikona diɛlane la Hɛbɛrɔna.
4 L’ɔkɔngɔ wa laasɔ, nde akatolanga womoto ɔmɔtshi l’Okidi wa Sɔrɛka, lokombo lande Delila.+ 5 Ko nkumi y’ase Filistiya wakatshu le womoto akɔ ko wakatowotɛ vate: “Ɔngande*+ kele shola kɛnɛ kawosha wolo w’efula nganɛ ndo woho wakokaso mboleka wolo ko mbokeleka ndo mbɔlɛndja. Naka wɛ nsala ngasɔ, tayokosha onto l’onto ekenga kinunu la lokama (1 100) wa mfɛsa.”
6 L’ɔkɔngɔ wa laasɔ, Delila akatɛ Samisɔna ate: “Lam’alangayɛ, ombute oma lɛnɛ aya wolo w’efula ɔnɛ ndo ɛngɔ kakokawɔ kokeleka ko kɔlɛndja.” 7 Samisɔna akawotɛ ate: “Naka vɔ kelekami ɛkɔdi 7 w’eyoyo wahatome, kete layonga ɔhɔdu oko onto k’onto.” 8 Ko nkumi ya la Filistiya wakela womoto akɔ ɛkɔdi 7 w’eyoyo wahatome, ko nde akookeleka. 9 L’etena kɛsɔ, vɔ wakɔlama lo luudu la l’etei, ko womoto akɔ akoowelɛ ate: “Samisɔna he ase Filistiya wambokɔtwɛ!” Ko nde akahendjahendja ɛkɔdi akɔ oko watohembɔka eshinga wa linɛnɛ wambolongola lo dja.+ Sheke ya wolo ande kombeyama.
10 Ko Delila akatɛ Samisɔna ate: “Wɛ ambɔmɛna enginya* ndo ambombutɛ kashi. Wonya ɔnɛ lam’alangayɛ, ombutɛ, ɛngɔ kakɔna kakokawɔ kokeleka?” 11 Nde akawotɛ ate: “Naka vɔ kelekami la nkɔdi y’eyoyo yewɔ watakambaka olimu la yɔ, kete dimi layonga ɔhɔdu oko onto k’onto.” 12 Ko Delila akɔshi nkɔdi y’eyoyo, akookeleka ko akoowelɛ ate: “Samisɔna he ase Filistiya wambokɔtwɛ!” (L’etena kɛsɔ tshɛ, anto wakɔlama lo luudu la l’etei.) Ko nde akahembola nkɔdi yaki lo anya ande oko eshinga wa dihɔndɔ.+
13 Oma laasɔ, Delila akatɛ Samisɔna ate: “Polo wonya ɔnɛ wɛ ekɔ lo mɛnami enginya keto ndo ekɔ lo mbutɛmi kashi.+ Ombutɛ, ɛngɔ kakɔna kakokawɔ kokeleka?” Ko nde akatɛ womoto akɔ ate: “Naka wɛ mbɛla apoto 7 wa l’ɔtɛ ami osambala.” 14 Ko nde akakeleka apoto akɔ lo wokɔ ndo akoowelɛ ate: “Samisɔna he ase Filistiya wambokɔtwɛ!” Ko nde akakashimɔ oma lo djɔ, akɔmɔla wokɔ w’ɔmbɛdi ndo akɛlɔla osambala akɔ.
15 Ko nde akawotɛ ate: “Ngande wakokayɛ mbuta wate: ‘Dimi kolangaka,’+ etena kele otema ayɛ bu le mi? Mbala nyɛ 3 wɛ ambɔmɛna enginya ndo wɛ hambute oma lɛnɛ aya wolo ayɛ w’efula.”+ 16 Lam’ele nde akawembiyaka lushi la lushi ndo akawodjaka pɛpɔ, nde* akalɛmbɛ otema.+ 17 Ko nde akayoodiholɛka otema ande ate: “Ndooko lushi lakete ɛrɛswara l’ɔtɛ ami, nɛ dia dimi lekɔ Okidiami wa Nzambi oma ko eotwelo kami.*+ Naka divo diami mimɔ, kete wolo ami wayoshila ko dimi layonga ɔhɔdu ndo layonga oko apami akina tshɛ.”
18 Lam’akɛnyi Delila dia nde amboodihwɛ otema, mbala kakɔ ɔtɔi nde akelɛ nkumi y’ase Filistiya+ ate: “Nyoye mbala kɛnɛ, nɛ dia nde ambondjihwɛ otema.” Ko nkumi y’ase Filistiya wakaye le nde kaamɛ la falanga. 19 Womoto akɔ akooladia lo dihɛlɔ diande, ko nde akelɛ pami kɛmɔtshi ko akoohembola apoto akɔ 7 wa l’ɔtɛ ande. Oma laasɔ, womoto akɔ akatatɛ mbowahemɛ, nɛ dia wolo ande wakashile. 20 Ko nde akoowelɛ ate: “Samisɔna he ase Filistiya wambokɔtwɛ!” Nde akakashimɔ oma lo djɔ ko akate ate: “Layosala oko mbala nkina+ ndo layoyatshungola.” Koko nde kombeya dia Jehowa ambowoka ɔkɔngɔ. 21 Ɔnkɔnɛ, ase Filistiya wakawonde ko wakawole washo. Oma laasɔ, vɔ wakootondja ko wakatshu la nde la Ngaza ndo wakookeleka mɔlɔla 2 wa nkonga, ko nde akayala ɔtɔshi wa ntɔngɔ lo lokanu. 22 Koko divo dia l’ɔtɛ ande diakatatɛ ntomba nto l’ɔkɔngɔ wa vɔ mbonya.+
23 Nkumi y’ase Filistiya wakasangana dia nambola Dangɔna+ nzambi kawɔ olambo wa woke ndo dia nsala fɛtɛ, nɛ dia vɔ wakataka vate: “Nzambi kaso ambokimɔ Samisɔna k’otunyi aso lo anya aso!” 24 Lam’akawɛnyi anto, vɔ wakatombola jambizambi yawɔ, wata vate: “Jambizambi yaso ambokimɔ otunyi aso lo anya aso, ɔnɛ lakalanya wodja aso+ ndo lakadiake efula l’atei aso.”+
25 Lam’ele etema awɔ waki la ɔngɛnɔngɛnɔ, vɔ wakate vate: “Nyete Samisɔna kele ayotɔdia yema.” Ko vɔ wakatondja Samisɔna oma lo lokanu dia nde ndjowangɛnyangɛnya. Vɔ wakawemadia lam’asa dikundji. 26 Ko Samisɔna akatɛ ɔna pami lakokimɛ lo lonya ate: “Ontshike kime dikundji diasukɛ luudu kele mbɛkame lɔkɔ.” 27 (Luudu lakɔ lakalole tɔɔ l’apami ndo la wamato. Nkumi tshɛ y’ase Filistiya yaki lɔkɔ ndo apami la wamato oko nunu sato (3 000) waki lo etenyi ka la diko ka luudu lakɔ, wenda woho wakawaɔdiaka Samisɔna.)
28 Ko Samisɔna+ akalɔmbɛ Jehowa ate: “Nkum’Olongo Nkumadiɔndjɔ Jehowa le, ombohɔ lam’alangayɛ ndo ombisha wolo+ lam’alangayɛ kaanga mbala kɛnɛ keto. Nzambi le, etawɔ dia dimi nsɔmbɔya ase Filistiya kaanga l’ɔtɛ wa sso diami 1 to.”+
29 Oma laasɔ, Samisɔna akashike tomamba lam’asa dikundji 2 dia l’atei diakasukɛka luudu lakɔ ko akadikimɛ kɛnɛ lonya l’omi ndo kekina lonya la lɔmɔsɔ. 30 Samisɔna akate la dui dia wolo ate: “Dimi* layanga mvɔ l’ase Filistiya!” Oma laasɔ, nde akaditshindjiya la wolo ande tshɛ, ko luudu lakanyukwɛ waa nkumi ndo anto tshɛ waki lɔkɔ.+ Ɔnkɔnɛ, nde akadiake anto efula lo nyɔi kande oleki wanɛ wakandadiake lam’akinde la lɔsɛnɔ.+
31 L’ɔkɔngɔ diko, anango ndo ase nkumbo ka she tshɛ wakaye dia ndjowɔsa. Vɔ wakatshu la nde, ko wakatookundɛ lam’asa Zɔra+ la Eshitaɔlɛ lo diombo dia Manɔa+ ka she. Nde aki shushi lo Isariyɛlɛ l’edja k’ɛnɔnyi 20.+
17 Pami kɛmɔtshi aki lo lɛkɛ l’akona la Efrayimɛ,+ lokombo lande Mika. 2 Nde akatɛ nyango ate: “Ekenga kinunu la lokama (1 100) wa mfɛsa wakayashisha ndo wakamoke wɛ adja onto lakɔshi mananu wekɔ le mi. Dimi kakɔshi.” Ko nyango akate ate: “Jehowa atshɔkɔlɛ ɔnami.” 3 Ko nde akakaloya nyango ekenga akɔ wa mfɛsa kinunu la lokama (1 100), koko nyango akate ate: “Ndooko onyake dimi layokidia mfɛsa nyɛ y’oma lo anya ami dikambo dia Jehowa le ɔnami dia nde nsala ekishi ndo lohingu la lowolo.+ Ɔnkɔnɛ, dimi lambokokaloyɛyɔ.”
4 L’ɔkɔngɔ wa nde kaloyɛ nyango mfɛsa yakɔ, nyango akɔshi ekenga 200 wa mfɛsa, ko akasha otshudi wa yaandjo. Otshudi akɔ akasale ekishi ndo lohingu la lowolo ko wakadje lo luudu laki Mika. 5 Mika kakɔ aki la luudu la tozambizambi ndo nde akasale efodɛ+ ndo mpingu ya terafimɛ,*+ ko nde akakitsha ɔnande ɔmɔtshi la pami dia nde kambaka oko ɔlɔmbɛdi ande.+ 6 Lo nshi shɔ, Isariyɛlɛ+ komonga la nkumekanga. Onto l’onto akasalaka kɛnɛ kaki ɔlɔlɔ lo washo ande.*+
7 L’etena kɛsɔ, ɔlɔngɔ a pami ɔmɔtshi wa la Bɛtɛlɛhɛma+ ka la Juda aki lo nkumbo ka Juda. Nde aki ose Lɛwi+ lakadjasɛ laawɔ lo tshanda mɔtshi. 8 Pami kakɔ akatshike osomba wa Bɛtɛlɛhɛma ka la Juda ko akatshu toyanga dihole dia nde mbidjasɛ. Lam’akandatatshɔka, nde akatokoma lo luudu laki Mika+ lo lɛkɛ l’akona la Efrayimɛ. 9 Ko Mika akawombola ate: “Wɛ oma lende?” Nde akakadimola ate: “Dimi lekɔ ose Lɛwi oma la Bɛtɛlɛhɛma ka la Juda ndo lekɔ lo tete dia tayangaka dihole dia mbidjasɛ.” 10 Mika akawotɛ ate: “Djasɛ kaamɛ la mi kele onga oko papa* ndo ɔlɔmbɛdi ami. Dimi layokoshaka ekenga 10 wa mfɛsa lo ɔnɔnyi kaamɛ ndo ahɔndɔ la mbo ya ndɛ.” Ko ose Lɛwi akɔtɔ. 11 Ɔnkɔnɛ, ose Lɛwi akɔ aketawɔ mbidjasɛ kaamɛ la pami kakɔ ndo ɔlɔngɔ a pami akɔ akayala oko ɔnande. 12 Ndo nto, Mika akakitsha* ose Lɛwi akɔ dia nde kambaka oko ɔlɔmbɛdi ande+ ndo nde akadjasɛka lo luudu laki Mika. 13 Oma laasɔ, Mika akate ate: “Kakianɛ lambeya dia Jehowa ayompomuya lokolo l’ɔlɔ, nɛ dia ose Lɛwi kaya ɔlɔmbɛdi ami.”
18 Lo nshi shɔ, Isariyɛlɛ+ komonga la nkumekanga. Lo nshi yakɔ, ase dioho di’aseka Danɛ+ wakayangaka etenyi k’okitɔ ka mbidjasɛ, nɛ dia polo l’etena kɛsɔ ko vɔ watalongola etenyi k’okitɔ l’atei wa waoho w’ase Isariyɛlɛ.+
2 Aseka Danɛ wakatome apami 5 oma lo nkumbo yawɔ, apami wele la akoka oma la Zɔra ndo Eshitaɔlɛ+ dia vɔ tokemba ɛtshi ka nkɛtɛ ndo tokienda. Vɔ wakawatɛ vate: “Nyotshu nyotokembe ɛtshi ka nkɛtɛ.” Lam’akawakome lo luudu laki Mika+ lo lɛkɛ l’akona la Efrayimɛ, vɔ wakalale laawɔ. 3 Lam’akiwɔ suke la luudu laki Mika, vɔ wakoke dui* di’ɔlɔngɔ a pami w’ose Lɛwi, ko vɔ wakatshu otsha le nde ko wakawombola vate: “Akakela lanɛ? Asalayɛ lanɛ? Kakɔna kokokime lanɛ?” 4 Nde akaakadimola ate: “Mika akansalɛ nganɛ nganɛ ndo nde akambɔshi dia dimi mbokambɛ oko ɔlɔmbɛdi ande.”+ 5 Ko vɔ wakawotɛ vate: “Lam’alangayɛ, mbola Nzambi kana lɔkɛndɔ laso layeta dimɛna.” 6 Ɔlɔmbɛdi akɔ akawatɛ ate: “Nyotshu la ki. Jehowa ekɔ kaamɛ la nyu lo lɔkɛndɔ lanyu.”
7 Ko apami akɔ 5 wakatshu ndo wakatokoma la Laishi.+ Vɔ wakatɛna woho woyadjase anto wa lɛkɔ oko ase Sidɔna. Vɔ waki ki ndo komonga la yambalo+ ndo ndooko ɔndɔshi wa ta wa wolo waki lo ɛtshi kakɔ ka nkɛtɛ wakakoke mbafutanya. Vɔ wakangana etale efula l’ase Sidɔna ndo vɔ komonga la losambi kaanga l’onto 1.
8 Lam’akawakalola le anangɛwɔ la Zɔra ndo la Eshitaɔlɛ,+ anangɛwɔ wakawambola vate: “Lɛnɛ akanyatshu ngande?” 9 Vɔ wakakadimola vate: “Nyɛsɔ totshu totaalɔsha, nɛ dia tambotɛna dia ɛtshi ka nkɛtɛ kakɔ kekɔ dimɛna efula. Lande na kengenganyu? Tanyotshimbatshimbake dia ntshɔ tɔsa ɛtshi ka nkɛtɛ kakɔ. 10 Lam’ayonyokoma, nyayotana anto+ wele bu la yambalo ndo ɛtshi ka nkɛtɛ kakɔ kekɔ woke. Nzambi ambokikimɔ lo anya aso, dihole diele ndooko ɛngɔ ka la nkɛtɛ+ kahombama.”
11 Ko apami 600 waki la dihomɔ dia ta oma lo nkumbo k’aseka Danɛ wakonɛɛ oma la Zɔra ndo oma la Eshitaɔlɛ.+ 12 Vɔ wakatshu ndo wakatoka mpango kawɔ la Kiriatɛ-Jarima+ ka la Juda. Diakɔ dielamɛ dihole sɔ diele lo owɛstɛ wa Kiriatɛ-Jarima ɔnɛ Mahanɛ-Danɛ*+ polo ndo ɛlɔ. 13 Vɔ wakonɛɛ oma laawɔ otsha lo lɛkɛ l’akona la Efrayimɛ ko wakatokoma lo luudu laki Mika.+
14 Ko apami 5 wakatshu tokemba ɛtshi ka nkɛtɛ ka Laishi+ wakatɛ anangɛwɔ vate: “Onde nyu mbeyaka dia diangɔ nɛ diekɔ lo mvudu nyɛ: Efodɛ, mpingu ya terafimɛ,* ekishi ndo lohingu la lowolo?+ Nyokanyiya kɛnɛ kahombanyu nsala.” 15 Ɔnkɔnɛ vɔ wakemala laawɔ, ko wakɔtɔ lo luudu l’ɔlɔngɔ a pami w’ose Lɛwi,+ lo luudu laki Mika ndo wakawombola kana nde ekɔ ki. 16 L’etena kɛsɔ tshɛ, apami 600 w’aseka Danɛ+ waki la dihomɔ dia ta wakemala la soko. 17 Apami 5 wakatshu tokemba ɛtshi ka nkɛtɛ kakɔ+ wakɔtɔ l’etei dia mbɔsa ekishi, efodɛ,+ mpingu ya terafimɛ*+ ndo ekishi ka lowolo.+ (Ɔlɔmbɛdi+ akemala la soko nde l’apami akɔ 600 waki la dihomɔ dia ta.) 18 Vɔ wakɔtɔ lo luudu laki Mika, ko wakɔshi ekishi, efodɛ, mpingu ya terafimɛ* ndo ekishi ka lowolo. Ɔlɔmbɛdi akawambola ate: “Kakɔna kasalanyu kɛnɛ?” 19 Koko vɔ wakawotɛ vate: “Ɔlama ki. Diha onyɔ ayɛ ndo yete kaamɛ la so dia wɛ monga papa* ndo ɔlɔmbɛdi aso. Oleki dimɛna le yɛ, onde monga ɔlɔmbɛdi lo luudu l’onto 1+ kana monga ɔlɔmbɛdi wa dioho ndo wa nkumbo ka lo Isariyɛlɛ?”+ 20 Ko ɔlɔmbɛdi akɔ akangɛnangɛna, akɔshi efodɛ, mpingu ya terafimɛ* ndo ekishi,+ ko akatshu kaamɛ la anto akɔ.
21 Oma laasɔ vɔ wakakadimɔ, ko wakatshu ndo waketsha ana, dongalonga la diangɔ dia nɛmɔ la ntondo kawɔ. 22 Lam’akawangana yema tshalola la luudu laki Mika, apami wakadjasɛka lo mvudu yaki suke la luudu laki Mika wakatshumana, ko wakayele aseka Danɛ. 23 Lam’akawawelɛ aseka Danɛ, aseka Danɛ wakakadimɔ otsha le wɔ ko wakambola Mika vate: “Ambotomba? Lande na kambonyosangana?” 24 Ko nde akate ate: “Nyambotɔshi nzambi yami yakamasale ko nyambotshɔ ndo la ɔlɔmbɛdi. Kakɔna kambotshikala la mi? Ko ngande wamimbolanyu ɔnɛ: ‘Ambotomba?’” 25 Aseka Danɛ wakakadimola vate: “Totohangwɛke, apami wele la nkɛlɛ* watokoyokɔlɔsha ko wɛ ndjoshisha lɔsɛnɔ* layɛ ndo nsɛnɔ* y’ase luudu layɛ.” 26 Ko aseka Danɛ wakatetemala la lɔkɛndɔ lawɔ ndo lam’akɛnyi Mika dia vɔ wambooleka wolo, nde akakadimɔ ko akakalola lo luudu lande.
27 L’ɔkɔngɔ wa vɔ mbɔsa diangɔ diakasale Mika kaamɛ ndo ɔlɔmbɛdi ande, vɔ wakatshu otsha la Laishi+ le anto wa ki ndo waki komonga la yambalo.+ Vɔ wakaadiake la lokuwa la ta ndo wakatshumbe osomba la dja. 28 Ndooko onto lakakoke ntshungola osomba akɔ, nɛ dia vɔ wakangana etale la Sidɔna ndo vɔ komonga la losambi kaanga l’onto 1, ndo vɔ waki lo okidi w’ebamubamu wa la Bɛtɛ-Rɛhɔba.+ Oma laasɔ, vɔ wakake osomba akɔ nto, ko wakadjasɛ lɔkɔ. 29 Ndo nto, vɔ wakɔlɛ osomba akɔ ɔnɛ Danɛ,+ lokombo la shɛwɔ Danɛ ɔna Isariyɛlɛ.+ Koko osomba akɔ wakelamɛka ntondo ɔnɛ Laishi.+ 30 L’ɔkɔngɔ wa laasɔ, aseka Danɛ wakayaemɛ ekishi+ ndo Jɔnatana+ ɔna Ngɛrɛshɔmɛ+ ɔna Mɔsɛ kaamɛ la anande w’apami wakayala ɛlɔmbɛdi lo dioho di’aseka Danɛ polo lushi lakayɔtɔlama anto wa l’ɛtshi ka nkɛtɛ kɛsɔ lo lɔhɔmbɔ. 31 Vɔ wakemɛ ndo ekishi kakasale Mika, ko tɔ kakatshikala laawɔ nshi tshɛ yaki luudu la Nzambi ka mɛtɛ la Shilo.+
19 Lo nshi shɔ, lam’aki Isariyɛlɛ+ komonga la nkumekanga, ose Lɛwi ɔmɔtshi lakadjasɛka l’etena kɛsɔ lo dihole dimɔtshi dianganyi la lɛkɛ l’akona la Efrayimɛ+ akatshuke wadi l’oseka oma la Bɛtɛlɛhɛma+ ka la Juda. 2 Koko wadɛnde l’oseka komonga la kɔlamelo le nde ndo womoto akɔ akootshike ko akatshu lo luudu la she la Bɛtɛlɛhɛma ka la Juda. Nde akatotshikala lɛkɔ l’edja ka ngɔndɔ 4. 3 Oma laasɔ, omɛnde akooyele dia towɔsa. Nde akatshu la okambi ande wa pami la mponda 2. Ko womoto akɔ akawɔtshiya lo luudu la she. Lam’akawɛnyi she, nde aki l’ɔngɛnɔngɛnɔ dia mbɛɛna. 4 Ɔnkɔnɛ okilo ande, mbuta ate she ɔna womoto akɔ akawetawoya dia nde tokotshikala kaamɛ la nde nshi 3, ko vɔ wakalɛka, wakanɔka ndo nde akalalaka laawɔ.
5 Lushi la 4, lam’akawetɔ la pindju ka pɛɛ dia ntshɔ, she osekaseka akɔ akatɛ okilo ande ate: “Tokotale yangɔ dia wɛ nkondja wolo* kele nyoyotshu.” 6 Ko vɔ wakadjasɛ ndo vɔ akɔ 2 wakale ndo wakanɔ kaamɛ. L’ɔkɔngɔ wa laasɔ, she osekaseka akɔ akatɛ pami kakɔ ate: “Lam’alangayɛ, lala nto kele tokɔngɛnangɛna.”* 7 Lam’akemala pami kakɔ dia ntshɔ, okilo ande akatetemala mbɔsɛngasɛnga, ko nde akayolala otsho ɔsɔ nto.
8 Lam’akandetɔ la pindju ka pɛɛ lushi la 5 dia ntshɔ, she osekaseka akɔ akate ate: “Lam’alangayɛ, tokotale yangɔ dia wɛ nkondja wolo.”* Ko vɔ wakatshimbatshimba polo ndo wonya ambeta ndo vɔ akɔ 2 wakalɛka. 9 Lam’akemala pami kakɔ dia ntshɔ nde la wadɛnde l’oseka ndo la okambi ande, okilo ande, mbuta ate she osekaseka akɔ akawotɛ ate: “Ohenda, wonya aya otsha lo dikɔlɔ. Lam’alangayɛ, nyolale. Wonya aya suke la mbidja. Ɔnkɔnɛ nyolale ndo nyotokɔngɛnangɛna, kele kanyetɔ la yosose loyi ko nyu monɛɛ ndo ntshɔ otsha lakanyu.”* 10 Koko pami kakɔ konanga ndala otsho okina nto. Ɔnkɔnɛ nde akonɛɛ ndo akatshu polo la Jɛbusɛ, mbuta ate Jɛrusalɛma.+ Nde aki la mponda 2 yaki la dee, wadɛnde l’oseka kaamɛ la okambi ande.
11 Lam’akiwɔ suke la Jɛbusɛ, wonya aki suke la mbidja, ko okambi akatɛ nkumɛnde ate: “Onde tayemala l’osomba ɔnɛ w’ase Jɛbusɛ dia ndala lanɛ?” 12 Koko nkumɛnde akawotɛ ate: “Hatohombe memala l’osomba w’ase wedja ekina wele bu ase Isariyɛlɛ. Tayotshɔ polo la Ngibɛa.”+ 13 Nde akatɛ okambi ande ate: “Ɛsɔ tosale tshɛ dia sho nkoma lo dihole dimɔtshi l’atei w’ahole anɛ: Tayolala la Ngibɛa kana la Rama.”+ 14 Ko vɔ wakatetemala la lɔkɛndɔ lawɔ ndo wonya akatotatɛ mbidja lam’akiwɔ suke la Ngibɛa k’aseka Bɛnjamina.
15 Ɔnkɔnɛ vɔ wakemala laawɔ ndo wakɔtɔ lɔkɔ dia ndala la Ngibɛa. Lam’akawɔtɔ l’osomba, vɔ wakadjasɛ lo sɛkɛ dia osomba, koko ndooko onto lakawaɔshi otsha lo luudu lande dia vɔ tolala.+ 16 L’edjedja ka wonya la dikɔlɔ sɔ, pami kɛmɔtshi k’osombe akayayaka oma lo ekambɔ. Nde aki ose lɛkɛ l’akona la Efrayimɛ+ ndo akadjasɛ la Ngibɛa lo tshanda mɔtshi, koko aseka Bɛnjamina+ mbakadjasɛka l’osomba akɔ. 17 Lam’akandedia washo ndo akandɛnyi ombetshetshi lo sɛkɛ dia osomba, pami kakɔ k’osombe akate ate: “Otsha lende atayatshu ndo oma lende ayaaye?” 18 Nde akakadimola ate: “Sho tekɔ lo lɔkɛndɔ oma la Bɛtɛlɛhɛma ka la Juda otsha lo dihole dimɔtshi dianganyi la lɛkɛ l’akona la Efrayimɛ lɛnɛ ele ngelo kami. Dimi lakatshu la Bɛtɛlɛhɛma ka la Juda+ ndo lekɔ lo tatshu lo luudu la Jehowa,* koko ndooko onto lambɔsa otsha lo luudu lande. 19 Tekɔ la diangɔ efula dia ndesha mponda yaso+ ndo tekɔ la mapa+ ndo vinyɔ dikambo diami, dia womoto ɔnɛ ndo dikambo dia okambi aso. Sho ndooko la ohomba w’ɛngɔ.” 20 Koko pami kakɔ k’osombe akate ate: “Wɔladi wayale la yɛ! Dimi layanga kokimanyiya la kɛnɛ tshɛ keyɛ la ohomba. Dikambo ɔtɔi ele, tolalake lanɛ lo sɛkɛ.” 21 Ko nde akɔɔtɔlɛ otsha lo luudu lande ndo akasha mponda yande mbo ya ndɛ. Oma laasɔ, vɔ wakasole ekolo awɔ, ko wakale ndo wakanɔ.
22 Etena kakawangɛnangɛnaka, apami amɔtshi w’anyanya wa l’osomba wakadinge luudu lakɔ ko wakakɔkɔlaka la soko, watɛ pami k’osombe kakanga luudu lakɔ vate: “Tondja pami kakɔtwɛ lo luudu layɛ kele teyane la nde.”+ 23 Ko kanga luudu lakɔ akatombe ndo akawatɛ ate: “Keema, analengo, tanyosalake dui dia kɔlɔ sɔ. Lam’alanganyu, pami kɛnɛ ekɔ ɔngɛndangɛnda ami. Tanyosalake dikambo dia nsɔnyi sɔ. 24 Ɔnami la womoto la emuma ndo wadi l’oseka la pami kakɔ vɔ anɛ. Layanga nyotondjɛwɔ kele nyowasha nsɔnyi woho walanganyu.*+ Koko tanyosalɛke pami kɛnɛ dikambo dia nsɔnyi sɔ.”
25 Koko apami akɔ konanga mbohokamɛ, ko pami kakɔ akɔshi wadɛnde l’oseka+ ndo akootondjɛwɔ l’andja. Vɔ wakeyana la nde la wolo ndo wakoolanya otsho w’otondo polo la pindju. Oma laasɔ, la yosose, vɔ wakookimɔ. 26 Womoto akɔ akaye la pindju ka pɛɛ ko akayɔkɔ la soko dia luudu laki pami kakɔ lɛnɛ aki nkumɛnde ndo akatshikala laawɔ polo lam’akahotɔ wonya. 27 Lam’aketɔ nkumɛnde la pindju ndo lam’akandadihola nkuke ya luudu dia nde ntomba ko ntetemala la lɔkɛndɔ lande, nde akɛnyi womoto akɔ, mbuta ate wadɛnde l’oseka etami la soko dia luudu ndo anya ande l’ɛse ka lokuke. 28 Ko pami kakɔ akawotɛ ate: “Etɔ totshu.” Koko nde aki paka ki. Oma laasɔ, pami kakɔ akawahɛ laadiko dia mponda, ko akatshu otsha lakande.
29 Lam’akandakome lo luudu lande, nde akɔshi lokuwa lasɛsawɔ nyama, ko akɔshi wadɛnde l’oseka, akɔɔsɛsɛ elemba lo elemba lo bɛtshi 12, ko akatomɛ ɛtshi ka nkɛtɛ tshɛ ka Isariyɛlɛ etenyi kɛmɔtshi. 30 Wanɛ tshɛ wakakiɛnyi wakate vate: “Dui dia nganɛ diatatshamaka ndo tatɛnaka dui dia nganɛ ntatɛ lushi lakatombe ase Isariyɛlɛ oma lo wodja w’Edjibito polo ndo ɛlɔ. Nyɔsɛdingole,* nyokane yimba,+ kele nyotote kɛnɛ ka nsala.”
20 Ko ase Isariyɛlɛ tshɛ wakatombe oma la Danɛ+ polo la Bɛrɛ-Shɛba ndo oma l’ɛtshi ka nkɛtɛ ka Ngiliyadɛ,+ ko olui w’otondo wakasangana kaamɛ* la ntondo ka Jehowa la Mizipa.+ 2 Ko ewandji w’anto ndo waoho tshɛ wa Isariyɛlɛ wakemala lo ahole awɔ lo etshumanelo k’anto waki Nzambi, asɔlayi nunu nkama nyɛi (400000) wakakɛndakɛndaka lo ekolo ndo waki la tokuwa ta ta.+
3 Aseka Bɛnjamina wakoke dia apami w’ase Isariyɛlɛ wambotshɔ otsha la Mizipa.
Ko apami w’ase Isariyɛlɛ wakate vate: “Nyototɛ, ngande wakasalema dikambo dia kɔlɔ efula nɛ?”+ 4 Ko pami k’ose Lɛwi,+ omi aki womoto lakadiakema akaakadimola ate: “Dimi lakakome la Ngibɛa+ k’aseka Bɛnjamina dimi la wadɛmi l’oseka dia ndala laawɔ. 5 Ko ase* Ngibɛa wakaye ko wakadinge luudu lakimi l’otsho. Vɔ wakayange ndjakami, koko lo dihole dia ndjakami, vɔ wakeyana la wadɛmi l’oseka la wolo, ko nde akavu.+ 6 Ko dimi lakɔshi odo wa wadɛmi l’oseka, lakɔɔsɛsɛ ndo lakatomɛ ɛtshi ka nkɛtɛ tshɛ kele etenyi k’okitɔ+ k’ase Isariyɛlɛ yema, nɛ dia vɔ wakasale dikambo dia nsɔnyi ndo dia wɔnɔnyi lo Isariyɛlɛ. 7 Ɔnkɔnɛ nyu ase Isariyɛlɛ tshɛ, nyosha kanyi ndo alako+ lanɛ.”
8 Ko anto tshɛ wakemala kaamɛ* ndo wakate vate: “Ndooko onto l’atei aso layotshɔ lo luudu lande la dipɛma kana nkalola lakande. 9 Tayosalɛ ase Ngibɛa nganɛ: Tayoka owale dia mbeya wanɛ wayotshɔ dia taalɔsha.+ 10 Lo apami 100 wa lo waoho tshɛ wa Isariyɛlɛ, tayɔsa apami 10; lo apami kinunu (1 000), tayɔsa apami 100; ndo lo apami nunu dikumi (10 000), tayɔsa apami kinunu (1 000) dia vɔ nkɔngɔla diangɔ dikambo dia asɔlayi l’oyango wa vɔ ndɔsha ase Ngibɛa w’aseka Bɛnjamina l’ɔtɛ wa dikambo dia wɔnɔnyi diakawasale lo Isariyɛlɛ.” 11 Ɔnkɔnɛ apami tshɛ w’Isariyɛlɛ wakatshumana kaamɛ* dia ndɔsha osomba.
12 Oma laasɔ, waoho w’Isariyɛlɛ wakatome apami amɔtshi otsha le apami tshɛ wa lo dioho dia Bɛnjamina dia towatɛ ɔnɛ: “Naa dui dia kɔlɔ efula nɛ diakasalema l’atei anyu? 13 Kakianɛ, nyotondja apami w’anyanya wa la Ngibɛa+ dia sho mbadiaka ndo minya kɛnɛ kele kɔlɔ lo Isariyɛlɛ.”+ Koko aseka Bɛnjamina wakatone mpokamɛ kɛnɛ kakawatɛ anangɛwɔ w’ase Isariyɛlɛ.
14 Ko aseka Bɛnjamina w’oma lo esomba wakasangana la Ngibɛa dia tɔlɔsha apami w’ase Isariyɛlɛ. 15 Lushi lɔsɔ, aseka Bɛnjamina wakɔshi apami nunu akumi ahende la samalo (26 000) waki la tokuwa ta ta oma lo esomba awɔ, aha la mbadia apami 700 wakasɔnama la Ngibɛa. 16 L’atei w’asɔlayi asɔ mbaki apami 700 wakasɔnama waki akanga w’ɛmɔsɔ. Onto tshɛ l’atei w’apami asɔ aki la shaba ya mboka lɔwɔkɔ aha la mpandja kaanga wɔɔngi wa divo.
17 Aha la mbadia aseka Bɛnjamina, apami w’ase Isariyɛlɛ waki la tokuwa ta ta+ waki nunu nkama nyɛi (400 000) ndo vɔ tshɛ waki andɔshi wa ta wa tomanamana. 18 Vɔ wakonɛɛ, ko wakatshu otsha la Bɛtɛlɛ dia tombola Nzambi kanyi.+ Ko ase Isariyɛlɛ wakate vate: “Akɔna l’atei aso ahomba mbeta la ntondo dia tɔlɔsha aseka Bɛnjamina?” Jehowa akakadimola ate: “Juda kahomba mbeta la ntondo.”
19 L’ɔkɔngɔ wa laasɔ, ase Isariyɛlɛ wakonɛɛ la pindju ko wakatoka mpango dia ndɔsha Ngibɛa.
20 Ko apami w’ase Isariyɛlɛ wakatshu tɔlɔsha aseka Bɛnjamina. Vɔ wakalɔngama dia mbalɔsha la Ngibɛa. 21 Ɔnkɔnɛ aseka Bɛnjamina wakatombe oma la Ngibɛa, ko wakadiake apami w’ase Isariyɛlɛ nunu akumi ahende la pende (22 000) lushi lɔsɔ. 22 Koko asɔlayi w’ase Isariyɛlɛ wakɛnya dihonga diawɔ ndo wakalɔngama nto dia ndɔ ta lo dihole diakɔ diamɛ oko lushi la ntondo. 23 Oma laasɔ, ase Isariyɛlɛ wakatshu ko wakatolela la ntondo ka Jehowa polo la dikɔlɔ ndo wakambola Jehowa vate: “Onde sho pombaka ntshɔ nto dia tɔlɔsha anangɛso aseka Bɛnjamina?”+ Ko Jehowa akate ate: “Nyotshu nyotaalɔsha.”
24 Ko ase Isariyɛlɛ wakasukana l’aseka Bɛnjamina lushi la 2. 25 Aseka Bɛnjamina vɔ lawɔ wakaye oma la Ngibɛa dia ndjohomana la wɔ lushi la 2 ndo wakadiake ase Isariyɛlɛ+ akina nunu dikumi l’enanɛi (18 000), vɔ tshɛ waki la tokuwa ta ta. 26 Ko apami tshɛ w’ase Isariyɛlɛ wakatshu otsha la Bɛtɛlɛ. Vɔ wakalele ndo wakadjasɛ lɛkɔ la ntondo ka Jehowa+ ko wakakile mbo ya ndɛ+ lushi lɔsɔ polo la dikɔlɔ ndo wakalambola elambo wa lotshumba+ ndo elambo w’osanga+ la ntondo ka Jehowa. 27 L’ɔkɔngɔ wa laasɔ, apami w’ase Isariyɛlɛ wakambola Jehowa kanyi,+ nɛ dia ɔshɛtɛ wa sheke wa Nzambi ka mɛtɛ waki lɛkɔ lo nshi shɔ. 28 L’etena kɛsɔ, Finehasi+ ɔna Eleazara ɔna Arɔna akakambaka* la ntondo k’ɔshɛtɛ akɔ. Vɔ wakambola vate: “Onde sho pombaka ntshɔ nto dia tɔlɔsha anangɛso, apami w’aseka Bɛnjamina kana totshike?”+ Jehowa akakadimola ate: “Nyotshu, nɛ dia loyi dimi layowakimɔ lo anya anyu.” 29 Oma laasɔ, ase Isariyɛlɛ wakatome apami dia toholama+ l’otshimbedi w’otondo wa Ngibɛa.
30 Ase Isariyɛlɛ wakatshu dia tɔlɔsha aseka Bɛnjamina lushi la 3 ndo wakalɔngama dia ndɔsha Ngibɛa oko mbala nkina.+ 31 Lam’akatombe aseka Bɛnjamina dia ndjohomana l’asɔlayi akɔ, vɔ wakangana etale la osomba.+ Oma laasɔ, oko mbala nkina tshɛ, vɔ wakatatɛ mbalɔsha ndo ndjaka apami amɔtshi lo mboka ya weke, kɛmɔtshi katshɔ otsha la Bɛtɛlɛ ndo kekina katshɔ otsha la Ngibɛa, ko vɔ wakatshike edo w’apami w’ase Isariyɛlɛ oko 30 l’oswe.+ 32 Ko aseka Bɛnjamina wakate vate: “Tayanga mbalɛndja woho wakataalɛndja ntondo.”+ Koko ase Isariyɛlɛ wakate vate: “Sho tayokalola ɛkɔngɔkɔngɔ dia mbakotola etale oma l’osomba lo mboka ya weke.” 33 Ɔnkɔnɛ, apami tshɛ w’ase Isariyɛlɛ wakatombe oma l’ahole awɔ ndo wakalɔngama dia ndɔ ta la Baala-Tamara. L’etena kakɔ kaamɛ, ase Isariyɛlɛ wakaholama l’omamu wa Ngibɛa wakatombe oma lo ahole awɔ. 34 Ko apami nunu dikumi (10 000) wakasɔnama l’atei w’ase Isariyɛlɛ tshɛ wakatombe mbɛlanɛ la Ngibɛa, ko ta diaki wolo. Koko aseka Bɛnjamina kombeya dia mpokoso kaki suke la mbakomɛ.
35 Jehowa akalɛndja aseka Bɛnjamina+ la ntondo k’ase Isariyɛlɛ ndo lushi lɔsɔ, ase Isariyɛlɛ wakadiake apami w’aseka Bɛnjamina nunu akumi ahende la tanu la lokama (25 100), vɔ tshɛ waki la tokuwa ta ta.+
36 Aseka Bɛnjamina wakafɔnyaka dia apami w’ase Isariyɛlɛ wayɔlɛndjama lam’ele vɔ wakatakalolaka ɛkɔngɔkɔngɔ la ntondo k’aseka Bɛnjamina,+ koko vɔ wakatakalolaka ɛkɔngɔkɔngɔ, nɛ dia vɔ wakayaɛkɛka le wanɛ wakaholama l’omamu wa Ngibɛa.+ 37 Wanɛ wakaholama wakasale akambo esadi esadi ko wakɛlɛ otsha la Ngibɛa. Oma laasɔ, wanɛ wakaholama wakatombe ndo wakadiake wanɛ tshɛ waki l’osomba la tokuwa ta ta.
38 Apami w’ase Isariyɛlɛ wakokana dia apami wakaholama suke l’osomba wakahombe ntutola edinga oma lɛkɔ dia asekawɔ mbeya.
39 Lam’akakadimɔ ase Isariyɛlɛ oko anto watalawɔ ta, apami w’aseka Bɛnjamina wakatatɛ mbalɔsha ndo wakadiake apami w’ase Isariyɛlɛ oko 30,+ ko vɔ wakate vate: “Mɛnamaka hwe dia tayanga mbalɛndja oko wakataalɛndja ntondo.”+ 40 Koko djembetelo yakawokana yakatatɛ mɛnama oma l’osomba oko olui w’edinga wadɛ. Lam’akɛwɔ apami w’aseka Bɛnjamina, vɔ wakɛnyi loombe la dja ladɛ otsha l’olongo l’osomba w’otondo. 41 Ko apami w’ase Isariyɛlɛ wakake ekolo ndo apami w’aseka Bɛnjamina wakandama la sase, nɛ dia vɔ wakɛnyi dia mpokoso kambaakomɛ. 42 Ɔnkɔnɛ, vɔ wakatatɛ nkalola ɛkɔngɔkɔngɔ la ntondo k’ase Isariyɛlɛ ko wakatshu otsha l’oswe, koko ta diakaayele. Apami wakatombe oma l’esomba wakasangana l’akina dia mbadiaka. 43 Vɔ wakadinge aseka Bɛnjamina ndo wakatetemala ndjelana la wɔ aha la mpekɔ. Vɔ wakaahɔtshahɔtsha mbɛlanɛ la Ngibɛa otsha lo ɛstɛ. 44 L’ekomelo, apami nunu dikumi l’enanɛi (18 000) w’aseka Bɛnjamina wakadiakema, vɔ tshɛ waki andɔshi wa ta wa wolo.+
45 Apami w’aseka Bɛnjamina wakakadimɔ, ko wakalawɔ l’oswe otsha lo dive dia Rimɔna,+ ko ase Isariyɛlɛ wakadiake* apami nunu tanu (5 000) l’atei awɔ lo mboka ya weke ndo vɔ wakatetemala ndjelana la wɔ polo la Ngidɔma. Ko wakadiake apami akina nunu pende (2 000). 46 Aseka Bɛnjamina tshɛ wakavu lushi lɔsɔ waki tshɛ tshɛ apami nunu akumi ahende la tanu (25 000) waki la tokuwa ta ta+ ndo vɔ tshɛ waki andɔshi wa ta wa wolo. 47 Koko apami 600 wakalawɔ l’oswe otsha lo dive dia Rimɔna ko vɔ wakatodjasɛ lo dive dia Rimɔna l’edja ka ngɔndɔ 4.
48 Ko apami w’ase Isariyɛlɛ wakakadimwɛ aseka Bɛnjamina ndo wakadiake wanɛ waki l’osomba la tokuwa ta ta, oyadi anto kana dongalonga, mbuta ate kɛnɛ tshɛ kakatshikala. Ndo nto, vɔ wakatshumbe esomba akɔ tshɛ la dja.
21 L’etena kɛsɔ, apami w’ase Isariyɛlɛ wakatshibe etshibelo kɛnɛ la Mizipa+ vate: “Ndooko onto l’atei aso layotshukanya+ ɔnande la womoto le oseka Bɛnjamina.” 2 Ko ase Isariyɛlɛ wakatshu la Bɛtɛlɛ+ ndo wakatodjasɛ la ntondo ka Nzambi ka mɛtɛ polo la dikɔlɔ, wada ekoko ndo walela woho w’anyanya. 3 Vɔ wakataka vate: “Jehowa Nzambi k’Isariyɛlɛ le, lande na kambokomɛ Isariyɛlɛ dui dia nganɛ? Lande na kahomba dioho dimɔtshi nshishɔ ɛlɔ oma lo Isariyɛlɛ?” 4 La wedi a pindju, vɔ waketɔ la yosose ndo wakasale elambwelo laawɔ dia nambola elambo wa lotshumba ndo elambo w’osanga.+
5 Ko ase Isariyɛlɛ wakambola vate: “L’atei wa waoho tshɛ w’ase Isariyɛlɛ, akɔna aki kondja dia ndjosangana la ntondo ka Jehowa?” nɛ dia vɔ wakatshibe etshibelo ka wolo dia onto tshɛ laki kondja le Jehowa la Mizipa akahombe ndjakema ndooko onyake. 6 Ɔnkɔnɛ, ase Isariyɛlɛ wakoke kandji l’ɔtɛ wa kɛnɛ kakakomɛ anangɛwɔ w’aseka Bɛnjamina. Vɔ wakate vate: “Ɛlɔ, dioho dimɔtshi diambonyɛma oma lo Isariyɛlɛ. 7 Akokaso nsala dia mbisha wanɛ wambotshikala wadi lam’ele tambotshiba lo lokombo la Jehowa+ diaha mbasha kaanga ɔnaso 1 la womoto wadi?”+
8 Vɔ wakambola vate: “L’atei wa waoho w’Isariyɛlɛ, akɔna aki kondja le Jehowa la Mizipa?”+ Akɛnama dia ndooko onto lakaye oma la Jabɛshɛ-Ngiliyadɛ oya lo mpango ka lɛnɛ aki etshumanelo. 9 Lam’akawadia anto, vɔ wakɛnyi dia ndooko ose Jabɛshɛ-Ngiliyadɛ laki laawɔ. 10 Ko olui w’ase Isariyɛlɛ wakatome apami woleki wolo nunu dikumi la pende (12 000) otsha lɛkɔ. Vɔ wakawadjangɛ vate: “Nyotshu nyotodiake ase Jabɛshɛ-Ngiliyadɛ la lokuwa la ta, oyadi wamato kana ana.+ 11 Kanyosale nganɛ: Kanyodiake pami tshɛ ndo womoto tshɛ lambeyanaka la pami.” 12 Vɔ wakatane ana wa wamato 400 wa dimuma wahateyanaka la pami l’atei w’ase Jabɛshɛ-Ngiliyadɛ. Ɔnkɔnɛ, vɔ wakawaela lo mpango ka la Shilo+ kele lo wodja wa Kanana.
13 Ko olui w’otondo wakatomɛ aseka Bɛnjamina waki lo dive dia woke dia la Rimɔna+ dui ndo wakaalɔmbɛ dia mbidja ki. 14 Ɔnkɔnɛ l’etena kɛsɔ, aseka Bɛnjamina wakakalola. Vɔ wakawasha wamato wakawatonda oma la Jabɛshɛ-Ngiliyadɛ,+ koko vɔ kokoka la wɔ. 15 Ko ase Isariyɛlɛ wakanyange l’ɔtɛ wa kɛnɛ kakakomɛ aseka Bɛnjamina,+ nɛ dia Jehowa akadje diatɔnelo l’atei wa waoho wa Isariyɛlɛ. 16 Dikumanyi dia l’olui w’anto wakate vate: “Ahombaso nsala dia mbisha apami wambotshikala wadi lam’ele wamato tshɛ w’aseka Bɛnjamina wakashilama oshiki?” 17 Vɔ wakakadimola vate: “Ehandɔ w’aseka Bɛnjamina pombaka monga la etenyi k’okitɔ diaha dioho dimɔtshi nshishɔ lo Isariyɛlɛ. 18 Koko sho bu la lotshungɔ la mbasha anaso wa wamato wadi, nɛ dia ase Isariyɛlɛ wakatshibe vate: ‘Mananu le ɔnɛ lasha aseka Bɛnjamina wadi.’”+
19 Oma laasɔ, vɔ wakate vate: “Difɛstɔ dia Jehowa salemaka ɔnɔnyi l’ɔnɔnyi la Shilo+ yele lo nɔrdɛ ka Bɛtɛlɛ ndo lo ɛstɛ ka mboka ka woke keta oma la Bɛtɛlɛ otsha la Shɛkɛmɛ ndo lo sidɛ ka Lɛbɔna.” 20 Ko vɔ wakadjangɛ aseka Bɛnjamina vate: “Nyotshu kele nyotoholame lo dikambɔ dia vinyɔ. 21 Lam’ayonyɛna esekaseka* wa la Shilo wambotomba dia ndjɔnɔ lokombe l’otshimbedi, onto l’onto l’atei anyu katombe oma lo dikambɔ dia vinyɔ, ko nde minda ɔmɔtshi l’atei w’esekaseka wa la Shilo, ko nyu nkalola l’ɛtshi ka nkɛtɛ ka Bɛnjamina. 22 Ndo naka washɛwɔ kana anangɛwɔ wamboya ndjotɛnya lonyangu lawɔ, tayowatɛ shate: ‘Nyotosale ɔlɔlɔ lo dikambo diawɔ, nɛ dia sho kokoka mbaɔsɛ vɔ tshɛ wadi lo ndɔsha+ ndo nyu koka mbasha wadi aha la monga la onongo.’”+
23 Ko apami w’aseka Bɛnjamina wakasale ngasɔ ndo onto l’onto akatoya la wadi oma l’atei wa wamato wakanɔka lokombe. L’ɔkɔngɔ wa laasɔ, vɔ wakakalola otsha l’etenyi kawɔ k’okitɔ ndo wakatoka osomba awɔ nto,+ ko wakadjasɛ lɔkɔ.
24 L’etena kɛsɔ, ase Isariyɛlɛ wakakalola oma lɛkɔ, onto l’onto akatshu otsha lo dioho diande ndo nkumbo kande ndo vɔ wakahandjɔ oma laawɔ, onto l’onto otsha l’etenyi kande k’okitɔ.
25 Lo nshi shɔ, Isariyɛlɛ komonga la nkumekanga.+ Onto l’onto akasalaka kɛnɛ kaki ɔlɔlɔ lo washo ande.*
Tshɛk., “ana w’Isariyɛlɛ.”
Kana “lambokimɔ.”
Tshɛk., “owale ami.”
Kana ondo “nde akade losaka etena kakinde eke laadiko dia mponda.”
Kana “Nɛngɛbɛ.”
Kitshimudi ate: “Dɔnga dia ashi.”
Kitshimudi ate: “Kimɔma dia Ndanyema.”
Tshɛk., “pusupusu ya mbolo.”
Tshɛk., “tayokɛnya ngandji ka kɔlamelo.”
Kana “tosukanyi la tɔ.”
Tshɛk., “monga wotsho.”
Tshɛk., “lonya.”
Kitshimudi ate: “Wanɛ walela.”
Ɔsɔ ekɔ ɛtɛkɛta wa lɔlɛnga wendana la nyɔi.
Kana “wakatɛmɔla.”
Tshɛk., “akaasondja.”
Kana “wakasale kinumba la.”
Kana “akanyange.”
Kana “mbɔtwɛlɔ ka Hamatɛ.”
Enda Elembetshielo.
Tshɛk., “Arama-Naharayima.”
Tshɛk., “Arama.”
Kana “waki lo wɔladi.”
Ondo kubita ka mondo kele la otale wa satimɛtrɛ oko 38. Enda Ap. B14.
Kana “nkɔsa.”
Kana “wosho wɔtshiya lɔpɛpɛ.”
Tshɛk., “ambokomba ekolo ande.”
Tshɛk., “nkɛtɛ.”
Kana “waki lo wɔladi.”
Tshɛk., “akaasondja.”
Kana “Harɔshɛta-Ha-Ngɔyima.”
Tshɛk., “nde.”
Tshɛk., “pusupusu ya mbolo.”
Kana “toma apami ayɛ.”
Tshɛk., “pusupusu ya mbolo.”
Kana “andɔshi wa ta wele la avo w’esakalaka.”
Kana “layodjaka mishiki.”
Kana ondo “wakadidima.”
Kana “wakakomɛ.”
Kana “okidi w’ebamubamu.”
Kana ondo “wanɛ wɛmba dihomɔ di’ofundji.”
Kana “ahole wa womu.”
Kana “wakahetsha anima awɔ.”
Kana “ɔkɛdi w’ashi.”
Kana “ɔkɛdi w’ashi.”
Kana “ɔkɛdi w’ashi.”
Enda Elembetshielo.
Tshɛk., “dikundju.”
Tshɛk., “akundju.”
Kana “waki lo wɔladi.”
Kana ondo “ahole wa la tshina dia nkɛtɛ wa mombaka diangɔ.”
Tshɛk., “kopokamɛ dui diami.”
Tshɛk., “kinunu.”
Litrɛ oko 22. Enda Ap. B14.
Kitshimudi ate: “Jehowa ekɔ Wɔladi.”
Enda Elembetshielo.
Enda Elembetshielo.
Enda Elembetshielo.
Enda Elembetshielo.
Kitshimudi ate: “Baala ayatɛkɛtɛ lo kilombo.”
Kana “wakatehɔ ɔkɛdi.”
Kana “Okidi w’Ebamubamu.”
Tshɛk., “kakalɔtɛ.”
Tshɛk., “anya ayɛ wayoleka nkeketala.”
Oma lo eshidi 10 w’otsho polo oya lo eshidi 2 w’otsho.
Tshɛk., “tshɛkɛta.”
Tshɛk., “yimba yawɔ yakatutala lo dikambo diande.”
Kana “oko wele pami, mbele wolo ande.”
Shɛkɛlɛ 1 ekɔ la gramɛ 11,4. Enda Ap. B14.
Enda nɔtɛ kele lo Eto 25:7.
Kana “wakashisha kɔlamelo lo ntɛmɔla.”
Tshɛk., “kombedia ɛtɛ awɔ.”
Kana “waki lo wɔladi.”
Mbuta ate Ngidiyɔna. Enda Emb 6:32.
Tshɛk., “aki l’ana w’apami 70 wakatombe oma lo pɛlɔhɛlɔ diande.”
Kana “wakashisha kɔlamelo lo ntɛmɔla.”
Tshɛk., “nkumbo k’ase luudu la she nyango.”
Kana ondo “akanga wa ngelo.”
Kana “owotɔ anyu wa lo dikila.”
Kana “tɛmpɛlɔ.”
Kana “ɛtɛtɔ.”
Kana “anima.”
Kana “aki owandji.”
Tshɛk., “akatome nyuma ka kɔlɔ.”
Kana “lo mayɛlɛ.”
Kana “kowosale kɛnɛ tshɛ kayonga lonya layɛ l’akoka wa nsala.”
Kitshimudi ate: “Ase maji.” Enda Eoh 18:14.
Kana “longele.”
Kana “tɛmpɛlɔ.”
Kitshimudi ate: “Ngelo yaki Jayira yele la mvudu y’apɛma.”
Kana “Suriya.”
Kana “anima ande wakashisha solo dia lotutsha lo.”
Tshɛk., “ɔnɛ loka.”
Tshɛk., “Kakɔna kasami la yɛ?”
Kana “tosukanyi la wɔ.”
Tshɛk., “wɛ ambompoloya l’ɛse efula.”
Kana “ntolele dimi l’angɛnyi ami, nɛ dia dimi hantshukamaki.”
Kana “etshelo.”
Kana ondo “wakatehɔ otsha lo nɔrdɛ.”
Kana “lakakitsha anima ami lo lonya lami.”
Tshɛk., “oma ko dikundju.”
Tshɛk., “oma ko dikundju.”
Tshɛk., “womoto ɔmɔtshi l’atei w’ana wa wamato w’ase Filistiya.”
Tshɛk., “nde ekɔ dimɛna lo washo ami.”
Kana “ɔsɔngɔ wa ntambwɛ wele l’alɛfulɛfu.”
Kana ondo “la ntondo ka nde mbɔtɔ lo luudu la l’etei.”
Kana “luudu la l’etei.”
Tshɛk., “akaakɔmɔla lokolo lo ɛhɛlɔhɛlɔ.”
Kana “ndjokeleka.”
Kana “ndjokokeleka.”
Kitshimudi ate: “Okundjikundji wa lowanga.”
Kitshimudi ate: “Ɛtɛkɔ ka ɔnɛ lakalɔmbɛ.”
Kana “etawoyande.”
Kana “ambɔmbɔsa ɛngɔ k’anyanya.”
Kana “anima ande.”
Tshɛk., “oma ko otema wa mama.”
Kana “anima ami.”
Kana “dikishi; nzambi ya lo nkumbo.”
Kana “kɛnɛ kafɔnyande ate kekɔ ɔlɔlɔ.”
Kana “ondaki.”
Tshɛk., “akalodia lonya laki.”
Kana “yoho ya ntɛkɛta.”
Kitshimudi ate: “Mpango ka Danɛ.”
Kana “dikishi; nzambi ya lo nkumbo.”
Kana “dikishi; nzambi ya lo nkumbo.”
Kana “dikishi; nzambi ya lo nkumbo.”
Kana “ondaki.”
Kana “dikishi; nzambi ya lo nkumbo.”
Kana “apami wele l’anima w’ololo.”
Kana “anima.”
Kana “anima.”
Kana “dia nsukɛ otema ayɛ.”
Kana “sala dia otema ayɛ ndjaoka dimɛna.”
Kana “dia nsukɛ otema ayɛ.”
Tshɛk., “lo luudu la dipɛma.”
Kana ondo, “ndo dimi kambaka lo luudu la Jehowa.”
Kana “nyaalanya ndo nyosale kɛnɛ kele ɔlɔlɔ lo washo anyu.”
Kana “Nyodje etema anyu lɔkɔ.”
Tshɛk., “oko onto ɔtɔi.”
Kana ondo “akanga wa ngelo.”
Tshɛk., “oko onto ɔtɔi.”
Tshɛk., “oko onto ɔtɔi.”
Tshɛk., “akemalaka.”
Tshɛk., “wakakɔdiakɔdia.”
Tshɛk., “ana wa wamato.”
Kana “kɛnɛ kafɔnyande ate kekɔ ɔlɔlɔ.”