MIKA
1 Ɔtɛkɛta wa Jehowa wakaye le Mika*+ ose Mɔrɛshɛtɛ lo nshi ya Jɔtama,+ Ahaza+ ndo Hɛzɛkiya,+ nkumi ya dikanga ya Juda,+ wakandalongola lo ɛnɛlɔ kendana la Samariya ndo Jɛrusalɛma vɔ ɔnɛ:
2 “Nyu anto tshɛ, nyohokame!
Nkɛtɛ ndo kɛnɛ tshɛ kele lɔkɔ le, nyodje yimba,
Ndo Nkum’Olongo Nkumadiɔndjɔ Jehowa ayale ɔmɛnyi lo dikambo dianyu+
Jehowa oma lo tɛmpɛlɔ kande k’ekila.
3 Eenda, Jehowa oyatombe oma lo dihole diande;
Nde ayoholɔ ndo ayɔkɛndakɛnda lo ahole wa la diko wa la nkɛtɛ.
4 Akona wayɔlɛlɔ l’ɛse kande,+
Ndo ekidi* wayatatɛ
Oko wata la ntondo ka dja,
Oko ashi wambotshulɔ lo oholola.
5 Kɛsɔ tshɛ ekɔ l’ɔtɛ w’ɔtɔmbɔkwɛlɔ wa Jakɔbɔ,
L’ɔtɛ wa pɛkato ya luudu l’Isariyɛlɛ.+
Ele ɔtɔmbɔkwɛlɔ wa Jakɔbɔ?
Shi Samariya?+
Ndo ele ahole wa la diko wa Juda?+
Shi Jɛrusalɛma?
6 Dimi layetɛ Samariya tota di’elanyelo dia l’oswe,
Dihole dia kambaka dikambɔ dia vinyɔ;
Dimi layokasha* ave atɔ otsha l’okidi,
Ndo dimi layotshika atshina atɔ hwe.
7 Dikishi diatɔ tshɛ diayatshatshema,+
Ndo weshasha atɔ tshɛ wakatayakondjiyɛ* wayotshumbama lo dja.+
Dimi layolanya dikishi diatɔ tshɛ.
Nɛ dia tɔ kakadikondja oma lo afuto wa kinumba,
Ndo vɔ wayonyomonga afuto wa waa numba.”
Delo diami diayonga oko dia mbolo,
Ndo otanda ami wayonga oko wa teke.
Sui diambokokanɛ polo lo soko di’anto ami, polo la Jɛrusalɛma.+
10 Tanyewoyake dui sɔ la Ngata;
Hanyohombe ndela kaanga yema.
Ngitɔ lo ditshu la Bɛtɛ-Afara.*
11 Nyu wanɛ wadjasɛ* la Shafiri le, nyotshu etakataka ndo la nsɔnyi.
Wanɛ wadjasɛ* la Zanana kotomba.
Delo diayonga la Bɛtɛ-Ezɛlɛ, ndo tɔ kayonya esukɔ atɔ oma le nyu.
12 Nɛ dia wanɛ wadjasɛ* la Marɔta wakakongaka kɛnɛ kele ɔlɔlɔ,
Koko kɛnɛ kele kɔlɔ kakaye oma le Jehowa polo lo soko dia Jɛrusalɛma.
13 Nyu wanɛ wadjasɛ* la Lakishi+ le, nyokeleke pusupusu lo olui wa mfalasa.
Nyu nyaki etatelo ka pɛkato le ɔna womoto la Siɔna,
Nɛ dia le yɛ kakatanema ɛtɔmbɔkwɛlɔ w’Isariyɛlɛ.+
14 Ɔnkɔnɛ, wɛ ayosha Mɔrɛshɛtɛ-Ngata weshasha w’olakanelo.
Mvudu ya Akizibɛ+ yaki ɛngɔ ka lokeso le nkumi ya dikanga y’Isariyɛlɛ.
15 Nyu+ wanɛ wadjasɛ* la Maresha+ le, dimi layonyela ɔnɛ lalɛndja.*
Lotombo l’Isariyɛlɛ layokoma polo la Adulama.+
16 Nyoyaate awandji ndo nyonya avo anyu l’ɔtɛ w’ananyu walanganyu efula.
Nyoyaate awandji oko mpongo,
Nɛ dia vɔ wambɔsama oma le nyu otsha lo lɔhɔmbɔ.”+
2 “Mananu le wanɛ wakongɛ kɛnɛ kele kɔlɔ,
Wakanyiya kɛnɛ kele kɔlɔ lo mbeto yawɔ!
Etena katomba osase wa pindju, vɔ kisalaka,
Nɛ dia tɔ kekɔ lo wolo w’anya+ awɔ.
2 Vɔ kombolaka dikambɔ ndo vɔ diɔsaka;+
Ndo mvudu, ko vɔ ndjiɔsaka;
Vɔ kesaka onto dia mbɔsa luudu lande,+
Ndo onto dia mbɔsa etenyi kande k’okitɔ.
3 Ɔnkɔnɛ Jehowa kata ate:
‘Dimi lekɔ lo nkongɛ dia mbela nkumbo kɛnɛ mpokoso+ kahanyatohanda.*+
Nyu hanyotɔkɛndakɛnda la lotamanya+ nto, nɛ dia ɔsɔ ayonga etena ka mpokoso.+
4 Lushi lɔsɔ, anto wayonyookɛ yokedi,
Ndo vɔ wayonga la lonyangu l’efula lo dikambo dianyu.+
Vɔ wayota vate: “Sho tambolanyema+ tshɛ lo tshɛ!
Nde ambosala dia kɛnɛ kele k’anto ami ntshɔ le anto akina, ande woho wamondokinya oma le mi lee!+
Nde ambosha ɔnɛ lele bu la kɔlamelo dikambɔ diaso.”
5 Ɔnkɔnɛ, nyu hanyotonga ndooko l’onto lasembola ɔkɔdi wa yɛdikɔ,
Dia nkahanya wodja lo etshumanelo ka Jehowa.
6 “Nyotshike nsambisha!” ko vɔ sambishaka,
“Vɔ hawohombe nsambisha akambo asɔ;
Nsɔnyi hatomɔ le so!”
7 Luudu la Jakɔbɔ le, vɔ mbutaka ɔnɛ:
“Onde nyuma ka Jehowa kaya bu la solo dia lotutsha?
Onde ɔnɛ ekɔ etsha atɔ?”
Onde ɛtɛkɛta ami hita hawosalɛ wanɛ wakɛndakɛnda lo yoho yosembwe ɔlɔlɔ?
8 Koko atete edja, anto ami hita wakatombe oko otunyi.
Nyu nyakanya lo sɛkɛ ɛlɛngalɛnga ka diambo kaamɛ la* dihɔndɔ
Oma le wanɛ watete la eshikikelo tshɛ, oko wanɛ wayakalola oma lo ta.
9 Nyu mbitshanyaka wadi w’anto ami oma lo mvudu yawɔ y’amɛna;
Nyu minyaka lotombo lami pondjo oma le anawɔ.
10 Nyonee kele nyotshu, nɛ dia ɔnɛ bu dihole dia momuya.
L’ɔtɛ wa mindo,+ elanyelo kekɔ, elanyelo+ ka wolo.
11 Naka onto ndjelana la lɔpɛpɛ ndo lokeso, ko mbuta kashi kɛnɛ ate:
“Dimi layonyosambisha dikambo dia wanu ndo dia wanu tshɛ wadjoya,”
Kete nde ayonga mɛtɛ osambisha le anto anɛ!+
12 Jakɔbɔ le, dimi mɛtɛ layokosanganya otondo ayɛ tshɛ;
Ndooko onyake, dimi layotshumanya+ atshikadi w’Isariyɛlɛ.
Dimi layowakitsha kaamɛ, oko ɛkɔkɔ lo lokoto,
Oko dongalonga lo dihole dialeshawɔ dongalonga;+
Londjo l’anto+ layonga lɛkɔ.’
13 Ɔnɛ lahandjola ayotshɔ la ntondo kawɔ;
Vɔ wayohandjola, ko wayeta lo soko ndo wayeta laawɔ.+
3 Dimi lakate nte: “Nyu ɛtɛ wa Jakɔbɔ, nyohokame lam’alanganyu
Ndo nyu emboledi wa luudu l’Isariyɛlɛ.+
Onde nyu hanyohombe mbeya kɛnɛ kele ɔlɔlɔ?
2 Nyu petshaka kɛnɛ kele ɔlɔlɔ+ ndo nangaka kɛnɛ kele kɔlɔ;+
Nyu minyaka nkoho y’anto ami ndo emunyi oma lo weka+ awɔ.
3 Ndo nto, nyu ndɛka emunyi w’anto ami+
Ndo minyaka nkoho yawɔ,
Nyu mbɔkɔlaka weka awɔ, mbatɛtshatɛtshaka,+
Oko ɛngɔ kambokatema lo mpoke,* oko onatshi wele lo mpoke kakatɛwɔ.
4 L’etena kɛsɔ, vɔ wayolelɛ Jehowa dia nyanga ekimanyielo,
Koko nde hatowakadimola.
5 Jehowa kata nganɛ lo dikambo di’amvutshi watakoya anto ami mboka,+
Wanɛ wewoya ɔnɛ: ‘Wɔladi!’+ etena kele vɔ numataka* la wanyu+ awɔ
Koko mbewoyaka* ta dia ndɔsha ɔnɛ lahadje ndooko ɛngɔ lo enyɔ awɔ:
Wonya ayodjɛ amvutshi,
Ndo yanyi yayokadimɔ wodjima le wɔ.+
7 Amɛnyi wa waɛnɛlɔ wayoshama nsɔnyi,+
Ndo wanɛ wasala diendja wayɛmba ɛkɔndjɔ.
Vɔ tshɛ wayokomba ndɛdu yawɔ,*
Nɛ dia ndooko okadimwelo w’oma le Nzambi.’”
8 Lo wedi ami, dimi lambolodiama la nkudu ka nyuma ka Jehowa,
La losembwe ndo wolo,
Dia mbutɛ Jakɔbɔ ɔtɔmbɔkwɛlɔ ande ndo Isariyɛlɛ pɛkato kande.
9 Lam’alanganyu, nyohokame dui nɛ, nyu ɛtɛ wa luudu la Jakɔbɔ
Ndo nyu emboledi wa luudu l’Isariyɛlɛ,+
Wanɛ wahetsha losembwe ndo wɛnganya kɛnɛ tshɛ kosembwe,+
10 Wanɛ waka Siɔna la ɛkɛdiɛlɔ ka dikila ndo Jɛrusalɛma l’akambo wa kɔlɔ.+
11 Ɛnɔmbɔdi* ayɔ wekɔ lo nombosha dia nkondja etshimba,+
Ɛlɔmbɛdi ayɔ wekɔ lo mbetsha dia nkondja difuto,+
Ndo amvutshi ayɔ wekɔ lo nsala diendja dia nkondja falanga.*+
Koko vɔ wekɔ lo ndjaɛkɛ le Jehowa,* wata ɔnɛ:
“Onde Jehowa bu kaamɛ la so?+
Ndooko mpokoso kayotokomɛ.”+
12 Diakɔ diele l’ɔtɛ anyu,
Siɔna ayofusama oko ekambɔ,
Jɛrusalɛma ayoyala tota di’elanyelo,+
Ndo dikona dia Luudu* diayoyala oko ahole wa la diko wa lo okonda.*+
4 Lo etena k’ekomelo ka nshi,*
Dikona dia luudu la Jehowa+
Diayoshikimala nge laadiko dia tɔsɔdi t’akona,
Ndo diayodiyama laadiko dia tokonakona,
Wedja wayɔkɛlaka+ otsha lɛkɔ.
2 Ndo wedja efula wayotshɔ, ko wayota vate:
“Nyoye tode otsha lo dikona dia Jehowa
Ndo otsha lo luudu la Nzambi ka Jakɔbɔ.+
Nde ayototetsha mboka yande,
Ndo sho tayɔkɛndakɛnda lo ɛsɛsɛ ande.”
Nɛ dia ɔlɛmbɛ* wayotomba oma lo Siɔna,
Ndo ɔtɛkɛta wa Jehowa oma la Jɛrusalɛma.
3 Nde ayolombosha l’atei wa wedja efula+
Ndo ayodja akambo l’ɔnɔngɔ* dikambo wedja wa wolo wele etale.
Vɔ wayotshula tokuwa tawɔ ta ta nkongo
Ndo akɔnga awɔ tɔshɔlɔ takɔlɔngawɔ adiyo.+
Wodja ɔmɔtshi hawotɛmbɛ wodja okina lokuwa la ta,
Ndo vɔ hawoteka ta nto.+
4 Vɔ wayodjasɛ onto l’onto l’ɛse k’ɔkɔdi ande wa vinyɔ ndo l’ɛse k’osongo ande wa fingo,+
Ndo ndooko onto layowaotsha wɔma,+
Nɛ dia onyɔ wa Jehowa kanga lolembelembe kambota.
5 Dikambo wedja tshɛ wayɔkɛndakɛndaka, wodja la wodja lo lokombo la nzambi kawɔ,
Koko sho tayɔkɛndakɛndaka lo lokombo la Jehowa Nzambi+ kaso pondjo pondjo.
6 Jehowa kata ate: “Lushi lɔsɔ,
Dimi layosanganya ɔnɛ* latɛnguna,
Ndo layotshumanya ɔnɛ lakahandjɔma,+
Kaamɛ la wanɛ wakamasalɛ akambo la epetenge.
7 Dimi layetɛ ɔnɛ* latɛnguna otshikadi,+
Ndo ɔnɛ lakatshanyema etale wodja+ wa wolo;
Ko Jehowa ayonga nkumekanga lo Dikona dia Siɔna,
Oma ko kakianɛ ndo pondjo pondjo.
8 Koko wɛ tshoto ya dongalonga le,
Okundjikundji w’ɔna womoto la Siɔna,+
Tɔ kayoya le yɛ, ɛɛ, ɛlɔmbwɛlɔ ka ntondo* kayoya,+
Diolelo diaki ɔna womoto la Jɛrusalɛma.+
9 Ko lande na kadayɛ ekoko la wolo?
10 Ɔna womoto la Siɔna le, yakiyanya ndo kuma akumu,
Oko womoto lele la lɔɔnɔ,
Nɛ dia wonya ɔnɛ, wɛ ayomɔ oma l’osomba ko todjasɛ l’oswe.
Wɛ ayotshɔ etale polo la Babilɔna,+
Ndo wayotokotsha+ lɛkɔ;
Jehowa ayotokosomba lɛkɔ oma lo anya w’atunyi+ ayɛ.
11 Ko wedja efula wayosanganyema dia kɔlɔsha;
Vɔ wayota vate: ‘Nde adjame mindo,
Ndo washo aso wɛnyi dui diayanga komɛ Siɔna sɔ.’
12 Koko vɔ haweye tokanyi ta Jehowa,
Vɔ hawoshihodia sangwelo* diande;
Nɛ dia nde ayowatshumanya lo dihole di’esuswelo oko ɔnɔngɔ wa ntɔngɔ yambowona.
13 Ɔna womoto la Siɔna+ le, emala ndo susola;
Nɛ dia dimi layokadimola nseke yayɛ mbolo,
Ndo layokadimola nsabɔ yayɛ nkonga,
Ko wɛ ayɔtɛtshatɛtsha wedja efula.+
Wɛ ayokimɔ wahɔ awɔ wa la lokeso le Jehowa,
Ndo ekondjelo kawɔ le Nkumadiɔndjɔ ka mɛtɛ ka nkɛtɛ k’otondo.”+
Vɔ wambɔkɔmɔla shushi y’Isariyɛlɛ lo tama+ la okalemba.
2 Wɛ Bɛtɛlɛhɛma Efarata+ le,
Ɔnɛ lele tshitshɛ dia monga l’atei wa nunu* dia Juda,
Oma le yɛ kayotomba ɔnɛ layonga omboledi lo Isariyɛlɛ+ dikambo diami,
Ɔnɛ lakayala edja efula la ntondo, oma ko nshi y’edjedja.
3 Ɔnkɔnɛ nde ayowakalɛ
Polo lam’ayoota ɔnɛ lahomba mbota.
Ndo atshikadi w’anango wayokalola otsha le ase Isariyɛlɛ.
4 Nde ayemala ndo ayolama la wolo wa Jehowa,+
La lokombo laheme laki Jehowa Nzambi kande.
Ndo vɔ wayodjasɛ lo lotui tshitshi,+
Nɛ dia l’etena kɛsɔ, woke woke ande wayokoma lo tokoma ta nkɛtɛ.+
5 Ndo nde ayela wɔladi.+
Naka ose Asuriya pombaka mbɔtwɛ wodja aso ndo mbeteta lo totshoto taso todingami la mpele,+
Sho tayotondja alami 7 w’ɛkɔkɔ, ɛɛ, ewandji* 8 w’anto dia mbɔlɔsha.
Ndo nde ayototsha oma le ose Asuriya,+
Etena kayondɔtwɛ wodja aso ndo kayondeteta lo ɛtshi kaso ka nkɛtɛ.
7 Atshikadi wa Jakɔbɔ wayonga l’atei w’anto efula
Oko lɔpɔpɔ l’oma le Jehowa,
Oko apɔpɔ wa mvula lo tombatomba
Diahadje elongamelo le onto
Kana mendɛ le ana w’anto.
8 Atshikadi wa Jakɔbɔ wayonga l’atei wa wedja,
L’atei w’anto efula,
Oko ntambwɛ l’atei wa nyama ya l’okonda,
Oko ɔsɔngɔ wa ntambwɛ* l’atei w’elui w’ɛkɔkɔ,
Weta ndo wafumbɔ dia minda, ko mbatshatsha;
Ndo ndooko ɔnɛ lawatsha.
9 Lonya layɛ layonyiyama laadiko dia andɔshi ayɛ,
Ndo atunyi ayɛ tshɛ wayolanyema.”
10 Jehowa kata ate: “Lushi lɔsɔ,
Dimi layonya mfalasa yayɛ oma l’atei ayɛ ndo layolanya pusupusu yayɛ.
11 Dimi layolanya esomba wa lo wedja ayɛ
Ndo layɔkɔsha ahole ayɛ tshɛ wodingami la mpele.
13 Dimi layolanya dikishi diayɛ ndo dikundji diayɛ oma l’atei ayɛ,
Ndo wɛ hatokusamɛ olimu w’anya+ ayɛ nto.
15 Dimi layɔsɔmbɔya la nkɛlɛ ndo la odudu
Le wedja waki kokitanyiya.”
6 Lam’alanganyu, nyohokame kɛnɛ kanyotɛ Jehowa.
Nyonee, nyoye la dikambo dia kilombo la ntondo k’akona,
Ndo tokonakona tooke dui+ dianyu.
2 Akona le, nyohokame dikambo dia kilombo dia Jehowa,
Nyu atshina wa wolo wa nkɛtɛ,+
Nɛ dia Jehowa ekɔ la dikambo dia kilombo l’anto ande;
Nde ayowana+ la Isariyɛlɛ ate:
3 “Wodja ami, kakɔna kakamanyosalɛ?
Lo na akamanyɔlɛndja?+
Nyombutee.
4 Nɛ dia dimi lakanyotondja oma lo wodja w’Edjibito,+
Oma lo luudu la lɔhɔmbɔ kakamanyotshungola;+
Dimi lakatome Mɔsɛ, Arɔna ndo Miriyama+ la ntondo kanyu.
5 Wodja ami, lam’alanganyu, nyohɔ kɛnɛ kakate Balaka nkumekanga ka Mɔaba,+
Ndo kɛnɛ kakookadimola+ Balama ɔna Beɔrɛ,
Kɛnɛ kakasalema oma la Shitimɛ+ polo la Ngilingalɛ,+
Dia nyu mbeya etsha wa sambo k’ɔlɔlɔ wa Jehowa.”
6 La ɛngɔ kakɔna kayomoya la ntondo ka Jehowa?
La ɛngɔ kakɔna kayomokusama la ntondo ka Nzambi kele la diko?
Onde dimi layoya la ntondo kande la elambo wa lotshumba w’etondo,
La ɛsɔngɔ wa ngɔmbɛ+ wele la ɔnɔnyi 1?
7 Onde Jehowa ayɔngɛnangɛna la nunu dia waomi w’ɛkɔkɔ,
La nunu akumi dia ɛkɛdi wa bisɔ?+
Onde dimi layokimɔ ɔnami la pami l’enondo l’ɔtɛ w’ɔtɔmbɔkwɛlɔ ami,
8 Wɛ onto, nde akakotɛ kɛnɛ kele ɔlɔlɔ.
Ko kakɔna kakɔlɔmba* Jehowa?
Paka dia monga la losembwe,*+ dia nanga kɔlamelo,*+
Ndo dia nkɛndakɛnda la okitshakitsha+ kaamɛ la Nzambi+ kayɛ!
9 Dui diaki Jehowa diekɔ lo mbelɛ lo osomba;
Wanɛ wele la lomba l’oshika wayoka lokombo layɛ wɔma.
Nyodje yimba lo okalemba ndo le ɔnɛ lakɔɔsɔnɛ.+
10 Onde diangɔ dia nɛmɔ di’akambo wa kɔlɔ diekekɔ lo luudu l’onto a kɔlɔ
Ndo yɛdikɔ ya efa* ya kɔlɔ yele bu otondo?
11 Onde dimi koka monga la lɔkɛwɔ la pudipudi* la kilɔ ya kɔlɔ,
La tapa dia lokeso dia tɛdikɔ+ ta kɔlɔ?
12 Nɛ dia apami ande w’ɛngɔnyi ndola tɔɔ l’awui wa ngala,
Ndo wanɛ wadjasɛ lɛkɔ mbutaka kashi;+
Nemi yawɔ yekɔ la lokeso lo enyɔ+ awɔ.
13 “Ɔnkɔnɛ, dimi layokohomuya lo kɔkɔmɔla,+
Layoketɛ tɔngɔ to l’ɔtɛ wa pɛkato yayɛ.
14 Wɛ ayɔlɛ, koko hatolota;
Wɛ ayonga hwe l’etei.+
Kɛnɛ kayoyonya, wɛ hatokitɔla lo dihole di’ekokelo,
Ndo kɛnɛ kayoyɔtɔla, dimi layokikimɔ lo lokuwa la ta.
15 Wɛ ayonɛ woho, koko wɛ hatona.
Wɛ ayamula elowa w’ɔlivɛ, koko wɛ hatokamba la esɔ kakɔ;
Ndo wɛ ayosala wanu w’eyoyo, koko wɛ hatɔnɔ wanu.+
16 Nɛ dia wɛ kitanyiyaka wadjango wa Omiri ndo olimu tshɛ wa lo luudu la Ahaba,+
Ndo nyu kɛndakɛndaka lo ndjela dako diawɔ.
Diakɔ diayomoketɛ ɛngɔ ka wɔnɔnyi
Wanɛ wadjasɛ lɛkɔ ɛngɔ ka mbidɛ ekoko;+
Ndo wɛ ayokikɛ lɔsɔkɔ l’oma le anto.”+
7 Mananu le mi! Dimi lekɔ oko onto lele,
L’ɔkɔngɔ wa ntshumanya elowa wa nshi y’ɔwɔ
Ndo nkɔdiakɔdia l’ɔkɔngɔ wa diɛla di’elowa,
Hakondja sandji di’elowa wa ndɛ,
Fingo ya ntondo yakombolami* bu.
Vɔ tshɛ polamaka dia ntshulola dikila.+
Onto l’onto mambaka ɔnango ɔtɛyi.
3 Anya awɔ wekɔ tomanyi lo nsala kɛnɛ kele kɔlɔ;+
Owandji nɔmbaka,
Shushi nɔmbaka difuto,+
Onto la lokumu mbeyanyaka nsaki+ yande,*
Ndo vɔ salaka dui sɔ kaamɛ.*
4 Onto awɔ loleki ɔlɔlɔ ekɔ oko atɛndɛ,
Onto awɔ loleki osembɔki, ekɔ kɔlɔ ndeka lokombo l’atɛndɛ.
Lushi la todjamu tayɛ ndo la mbikoya layɛ layoya.+
Ko vɔ wayondama la sase dia wɔma.+
5 Tongake la mbetawɔ le osekayɛ
Kana ndjaɛkɛ le ɔngɛnyi+ ayɛ wa ma ma
Lama onyɔ ayɛ otsha le ɔnɛ letami la yɛ nyokumbatane.
6 Nɛ dia ɔna pami ekɔ lo mɔnyɔla she,
Ɔna womoto ekɔ lo ndɔshana la nyango,+
Ndo womoto lotshukami ekɔ lo ndɔshana la nyango omɛnde;+
Atunyi w’onto wekɔ anto wa lo luudu+ lande.
7 Koko le mi, dimi layotetemala menda Jehowa.+
Dimi layɛnya dia lekɔ lo nkonga* Nzambi ka panda+ kami.
Nzambi kami ayomboka.+
8 Otunyi* ami le, tɔngɛnangɛnake lo dikambo diami.
Kaanga mbamomɔkɔ, dimi layemala;
Kaanga mbadjasɛmi lo wodjima, Jehowa ayonga osase ami.
9 Dimi layokikɛ odudu wa Jehowa
Nɛ dia dimi lakoosalɛ pɛkato+
Polo lam’ayondonsambɛ lo kilombo ndo salɛmi akambo la losembwe.
Nde ayontondja lo osase;
Dimi layendaka sambo kande k’ɔlɔlɔ.
10 Otunyi ami nde lawɔ ayɛna,
Ndo nsɔnyi kayokomba ɔnɛ lakambutɛ ate:
“Lende ele Jehowa Nzambi+ kayɛ?”
Washo ami wayowenda.
Ko nde ayɔhɔtshahɔtshama oko lɔtɛkɛ lo toshinga.
11 Ɔsɔ ayonga lushi la mbika mpele diayɛ di’ave;
Lushi lɔsɔ, olelo wayɔsɛkɔ.*
12 Lushi lɔsɔ, vɔ wayoya le yɛ
Lo mboka k’otondo k’oma l’Asuriya ndo esomba w’Edjibito
Oma l’Edjibito lo mboka k’otondo k’otsha lo Ɔkɛdi;*
Oma lo ndjale polo lo ndjale, ndo oma lo dikona polo lo dikona.+
13 Ndo wodja wayoyala tɔngɔ l’ɔtɛ wa wanɛ wadjasɛ lɔkɔ,
Oko etombelo wa kɛnɛ kakawasale.*
14 Lama anto ayɛ la danga diayɛ, ɛkɔkɔ wa lo etenyi kayɛ k’okitɔ,+
Ɔnɛ lakadjasɛka ndamɛ lo okonda, l’atei w’ekambɔ k’elowa.
Vɔ waleshame la Bashana ndo la Ngiliyadɛ+ oko lo nshi y’edjedja.
15 “Oko lo nshi yakanyatombe oma lo wodja w’Edjibito,
Dimi layowɛnya akambo wa diambo.+
16 Wedja wayɛna, ko wayonga la nsɔnyi kaanga mbewɔ la wolo+ awɔ tshɛ.
Vɔ wayofɛ anya awɔ lo enyɔ awɔ;
Atoyi awɔ wayolɛ.
17 Vɔ wayɔlɔmbɔla ditshu oko eloyi;+
Oko dikɛndakɛnda diayakotola la nkɛtɛ, vɔ wayotomba wayasake lokomba oma lo ahole awɔ w’eshamelo.
Vɔ wayoya le Jehowa Nzambi kaso la lokomba,
Ndo vɔ wayonga la wɔma ayɛ.”+
Nde hatotshikala la nkɛlɛ kande pondjo,
Nɛ dia nde ngɛnangɛnaka lo ngandji ka kɔlamelo.+
19 Nde ayonyomotooka kɛtshi;+ nde ayɔlɛndja* munga yaso.
Wɛ ayokasha pɛkato yawɔ tshɛ lo ɛhɔngɔ wa ndjale.+
20 Wɛ ayonga la kɔlamelo le Jakɔbɔ,
Ngandji ka kɔlamelo le Abrahama,
Oko wakayatshibɛ watshɛso oma ko nshi y’edjedja.+
Lokombo Mikayɛlɛ lo hiembola, (lalembetshiya “Akɔna ele oko Nzambi?”) Kana Mikaya, (lalembetshiya “Akɔna ele oko Jehowa?”)
Kana “ekidi w’ebamubamu.”
Kana “layohongola.”
Kana “afuto tshɛ w’oma lo kinumba katɔ.”
Kana “lo luudu la Afara.”
Tshɛk., “womoto ladjasɛ.”
Tshɛk., “womoto ladjasɛ.”
Tshɛk., “womoto ladjasɛ.”
Tshɛk., “womoto ladjasɛ.”
Tshɛk., “womoto ladjasɛ.”
Kana “ɔpɔtɔdi.”
Tshɛk., “kahanyatonya nkingo yanyu.”
Kana ondo “oma lo.”
Tshɛk., “lo ɛtɛ awɔ.”
Kana “mpoke k’onyɔ woke kakatɛwɔ.”
Kana ondo “etena kewɔ la ɛngɔ ka ntɔma.”
Kana “wakidia.”
Kana “wayokomba enyɔ awɔ.”
Tshɛk., “Ɛtɛ.”
Kana “mfɛsa.”
Kana “vɔ funaka dia vɔ ndjaɛkɛka le Jehowa.”
Kana “dikona dia tɛmpɛlɔ.”
Kana “oko dikona diele la esongo.”
Kana “Lo nshi y’ekomelo.”
Kana “wetshelo.”
Kana “ayɔlɔngɔsɔla akambo.”
Tshɛk., “nde.”
Tshɛk., “nde.”
Kana “k’edjedja.”
Kana “dako.”
Kana “waoho.”
Kana “ɛnɔmbɔdi.”
Kana “ɔsɔngɔ wa ntambwɛ wele l’alɛfulɛfu.”
Tshɛk., “oma lo lonya layɛ.”
Enda Elembetshielo.
Kana “l’ɔtɛ wa pɛkato k’anima ami?”
Kana “kalongamɛnde le yɛ?”
Kana “monga osembɔki; mbɛdima.”
Kana “monga ɔlɔlɔ ndo la kɔlamelo lo ngandji kayɛ.” Tshɛk., “nanga ngandji ka kɔlamelo.”
Enda Ap. B14.
Kana “monga aha la onongo.”
Kana “yakombola anima ami.”
Kana “amboshishɔ.”
Kana “kɛnɛ kakombola anima ande.”
Tshɛk., “vɔ kongɛka dui sɔ kaamɛ.”
Kana “Dimi layokonga la solo dia lotutsha.”
Lo Hɛbɛru, tshɛkɛta yalembetshiya “otunyi” yekɔ lo lɛkɛ la wamato.
Kana ondo “didjango diayonga etale.”
Mbuta ate Efaratɛ.
Tshɛk., “L’ɔtɛ wa elowa w’oma lo etsha awɔ.”
Kana “mpɔtshahɔtsha; mbahemɛ.”