NAHUMA
1 Ɔnɛ ele diewoyelo diendana la Niniva,+ lo dibuku dia ɛnɛlɔ ka Nahuma* ose Elekɔshɛ:
2 Jehowa ekɔ Nzambi kalɔmba dia mbomamema paka ndamɛ oto+ ndo kasɔmbɔya;
Jehowa sɔmbɔyaka ndo ekɔ suke dia mɛnya odudu+ ande.
Jehowa sɔmbɔyaka andɔshi ande,
Ndo nde mombɛka atunyi ande odudu.
3 Jehowa hoke nkɛlɛ esadi+ ndo ekɔ la nkudu k’efula,+
Koko weho akɔ tshɛ, Jehowa hatotshika mbisha dilanya diahombama.+
Mboka kande kekɔ lo lɔpɛpɛ lalanya ndo lɔpɛpɛ la wolo,
Ndo wange wekɔ ditshu di’ekolo+ ande.
Bashana la Karamɛlɛ wambɔlɛngɛɛ,+
Ndo alɛmbɔlɛmbɔ wa la Lɛbanɔna wambɔlɛngɛɛ.
5 Akona wekɔ lo nsukasuka l’ɔtɛ ande,
Ndo tokonakona ndɛlɔka.+
Nkɛtɛ yayodiyama l’ɔtɛ w’elungi kande,
Kaamɛ la wodja ndo wanɛ tshɛ wadjasɛ lɔkɔ.+
6 Akɔna akoka memala la ntondo ka nkɛlɛ+ kande?
Ndo akɔna akoka mbika ekolo la ntondo k’odudu wa nkɛlɛ+ kande?
Odudu ande wayohongɔ oko dja,
Ndo ave wayatatɛ l’ɔtɛ ande.
7 Jehowa ekɔ ɔlɔlɔ,+ nde ekɔ longele lo lushi la paa.+
Nde mbohɔka* wanɛ wayanga eshamelo le nde.+
8 Nde ayolanya dihole diande* tshɛ lo tshɛ la elola ka wolo,
Ndo wodjima wayoyelana l’atunyi ande.
9 Kakɔna kakokayɛ nkongɛ dia ndɔsha Jehowa?
Nde ekɔ lo ndanya tshɛ lo tshɛ.
Sui hadiotoyala mbala ka 2.+
10 Nɛ dia vɔ wambodingitana oko atɛndɛ,
Ndo vɔ wekɔ oko wanɛ wambodjɔ wanu;*
Koko vɔ wayolongola oko nsɔdu yamboma.
11 Oma le yɛ kayoya ɔnɛ lakongɛ kɛnɛ kele kɔlɔ dia ndɔsha Jehowa,
Ɔnɛ lasha dako di’anyanya.
12 Jehowa kata ate:
“Kaanga mbakiwɔ la wolo efula ndo mbakiwɔ efula,
Vɔ wayohembɔma ndo wayeta.*
Dimi lakakosoya,* koko hantokosoya nto.
13 Dimi layohembola osembe ande oma le yɛ,+
Ndo dimi layohembola ɛkɔdi ayɛ lo 2.
14 Jehowa ambodjanga lo dikambo diayɛ* ate:
‘Lokombo layɛ halototetemala monga.
Dimi layonya dikishi ndo mpingu yayɛ ya la mbolo oma lo luudu* la tozambizambi tayɛ.
Dimi layokotshimɛ diombo, nɛ dia wɛ ekɔ ɛngɔ k’anyanya.’
15 Eenda, ekolo wa ɔnɛ lɛmba lokumu l’ɔlɔlɔ wekɔ lo akona,
Ɔnɛ lewoya wɔladi.+
Juda le, sala fɛtɛ+ yayɛ, kotsha alɔkɔlɔkɔ ayɛ,
Nɛ dia onto l’anyanya hetaki l’atei ayɛ nto pondjo.
Nde ayolanyema tshɛ lo tshɛ.”
2 Ɔnɛ lahandjola amboya ndjokɔlɔsha.*+
Lama ahole wodingami la mpele.
Tetemala nama mboka.
Nyoyalɔngɔsɔlɛ* ndo nyosanganya wolo anyu tshɛ.
2 Nɛ dia Jehowa ayokaloya ofunu wa Jakɔbɔ,
Kaamɛ la ofunu w’Isariyɛlɛ,
Nɛ dia wanɛ walanya wakaalanya;+
Ndo vɔ wakalanya ntahe yawɔ.
3 Dingawo di’anto ande wa wolo diekɔ la dangi dia beela,
Andɔshi ande wa ta ndɔta ɛlɔtɔ wa beela ka telele.
Mbolo ya pusupusu yande ya ta yekɔ ngaingai oko dja
Lo lushi layalɔngɔsɔlande dikambo dia ta,
Ndo akɔnga wa dihake wambonyiyama.
4 Pusupusu ya ta yekɔ lo talawɔ lowango l’efula lo toshinga.
Yɔ yekɔ lo talawɔ lɛnɛ la lɛnɛ lo asɛkɛ.
Yɔ yekɔ lo mpɛta oko ewa walombalomba ndo ngadimaka oko angadimu.
5 Nde ayelɛ topita tande.
Vɔ wayoyatakanaka etena kayawasukana.
Vɔ samanyaka otsha lo ehele kande;
Vɔ ndjihaka mboka.
6 Asoko w’ɛkɛdi wayodihɔma,
Ndo luudu l’owandji layɔlɛlɔ.*
7 Wambodjanga* ɔnɛ: Nde ambotondjama sɛkɛ,
Nde ambonyɛma ndo mfumbe yande ya wamato yekɔ lo nkuma akumu;
Wendjo awɔ wekɔ oko wa fudu ya benga etena kayakɔmɔlawɔ lo ntolo.*
8 L’edja ka nshi yande, Niniva+ aki oko oduwa w’ashi,
Koko kakianɛ, vɔ wekɔ lo talawɔ.
“Nyemale! Nyemale!”
Koko ndooko onto lakadimɔ.+
9 Nyombe mfɛsa, nyombe paonyi!
Diangɔ dia nɛmɔ bu la ekomelo.
Diɔ mombama la weho tshɛ wa diangɔ di’oshinga wolo.
10 Osomba waya ndooko la ɛngɔ, waya tɔngɔ to, wambolanyema!+
Etema awɔ wambɔlɛlɔ la wɔma, adwe awɔ wambonama, nkende yawɔ yambosaka lokomba;
Dungi diawɔ tshɛ diambondama la wɔma.
11 Lende ele edjaselo ka waa ntambwɛ,+ lɛnɛ atɔlɛka ɛsɔngɔ wa ntambwɛ,*
Lɛnɛ atotshɔka ntambwɛ atalɔmbɔla ɔnatɔ,
Ko ndooko onto lawaotsha wɔma?
12 Ntambwɛ mbatshatshaka nyama yokoki la anatɔ
Ndo ndjakaka dikambo dia wadi wa ntambwɛ.
Tɔ kakalodiaka afuku atɔ la nyama,
Didjaselo diatɔ la nyama ya laatshatsha.
13 Jehowa kanga lolembelembe+ kata ate: “Eenda, dimi layanga kɔlɔsha,
Dimi layotshumba pusupusu yande ya ta lo edinga,+
Ndo lokuwa la ta layɔlɛ ɛsɔngɔ ayɛ wa ntambwɛ.*
Dimi layonya nyama yayɛ oma la nkɛtɛ,
Ndo dui di’akɛndji ayɛ hadiotokɛma nto.”+
3 Mananu le osomba wakɛdia dikila!
Vɔ ndola tɔ la lokeso ndo la ɔhɔtwanelo.
Vɔ hawohombe pondjo ɛngɔ kambowonda!
2 Wendjo wa lofimbɔ ndo lohelo l’etshimbi lekɔ,
Mfalasa katalawɔ ndo pusupusu katalawɔ.
3 Ombahemi wa mfalasa laadiko dia mfalasa, lokuwa la ta latondja esase ndo dikɔnga dialengalenga,
Olui w’anto wambodiakema ndo tota dia edo
Edo bu la ekomelo.
Vɔ wekɔ lo ntetemala ntakana laadiko dia edo.
4 Kɛsɔ ekɔ l’ɔtɛ w’efula k’etsha wa kinumba wa womoto la numba,
Nde lakotola yambalo ndo lele olangala, kanga awui w’alɔka,
Landa wedja lo djonga la kinumba kande ndo landa waa nkumbo l’awui ande wa dɔka.
5 Jehowa kanga lolembelembe+ kata ate: “Eenda, dimi layanga kɔlɔsha,*
Dimi layofola dihɔndɔ diayɛ polo lo elungi kayɛ;
Dimi layosala dia wedja mɛna otakataka ayɛ,
Ndo dia waolelo mɛna diɔnyɔ diayɛ.
7 Onto tshɛ lakɛna ayokolawɔ+ ndo ayota ate:
‘Niniva ambolanyema!
Akɔna ayowoka kandji?’
Lende ayomokokondjiyɛ asambi?
8 Onde wɛ ndeka No-Amɔna,*+ ɔnɛ lakadjasɛka l’omamu w’ɛkɛdi+ wa Nilɛ?
Ashi wakoodinge;
Ndjale kaki ɔngɔnyi ande ndo ndjale kaki ehele kande.
9 Etiyɔpiya kaki kiɔkɔ ya wolo ande waha la elelo, ndo Edjibito.
Puta+ ndo ase Libiya mbaki akimanyedi+ ayɛ.
10 Koko kaanga nde akonge mfumbe;
Nde akatshu lo lɔhɔmbɔ.+
Anande vɔ lawɔ wakaatshatshema bɛtshi bɛtshi lo tshuku tshɛ dia shinga.*
Vɔ wakoke anto ande wa lokumu owale,
Ndo anto ande tshɛ wa weke wakakelekama mɔlɔla.
11 Wɛ lawɔ ayodjɔ wanu;+
Wɛ ayotshɔ lo eshamelo.
Wɛ ayoyanga dihole dia ndjashɛ la ntondo k’otunyi.
12 Ahole ayɛ tshɛ wodingami la mpele wekɔ oko esongo wa fingo wele la elowa wa ntondo wambɛla;
Naka vɔ nyinginyama, fingo yayɔkɔ l’enyɔ w’andeshi.
13 Eenda, elui w’andɔshi ayɛ wekɔ oko wamato l’atei ayɛ.
Asoko wa wodja ayɛ wayodihɔ hwe dikambo di’atunyi ayɛ.
Dja yayotshumba tokengete t’asoko ayɛ.
14 Tahola ashi dikambo di’etena kayoyodingama!+
Keketsha ahole ayɛ wodingami la mpele.
Ɔtɔ lo lɔtɛkɛ ndo kamɛ diwomba;
Kimɛ ɔshɛtɛ wasalawɔ atafadi.
15 Oyadi lɛkɔ, dja yayokolongoya.
Lokuwa la ta layokohembola.+
Lɔ layokɔlɛ oko watɔlɛka+ ana w’akata w’ɛndjɔ.
Yafudia oko ana w’akata w’ɛndjɔ!
Ɛɛ, yafudia oko ana w’akata w’ɛndjɔ!
16 Wɛ akafudia amundji ayɛ w’okanda ndeka tɔɔtɔ ta l’olongo.
Dikata di’ɔndjɔ dia ɔna mbowolaka lokoho ladiɔ ndo fumbɔka.
17 Alami ayɛ wekɔ oko dikata di’ɔndjɔ,
Ɛnɛnɛ ayɛ wekɔ oko olui w’akata w’ɛndjɔ.
Vɔ pangaka lo nkoto y’ave lo lushi la tshitshi,
Koko lam’awalɛ yanyi, vɔ fumbɔka;
Ko ndooko onto leya lɛnɛ ewɔ.
18 Nkumekanga k’Asuriya le, alami ayɛ w’ɛkɔkɔ wekɔ lo nyingɔnyingɔ;
Ɛlɔhɛ ayɛ wambotshikala lo ahole wadjasɛwɔ.
Anto ayɛ wambohandjɔnɛ lo akona,
Ndo ndooko onto laatshumanya kaamɛ.+
19 Ndooko etshungwelo lo mpokoso kayɛ.
Mpota kayɛ hakoke nkɔnɔ.
Wanɛ tshɛ woka dikambo diayɛ wayoda nkambo;+
Nɛ dia, akɔna ahatasoyama l’ɔtɛ wa ngala+ kayɛ kahɛnɛ pe?”
Kitshimudi ate: “Osambi.”
Kana “kokɛka.” Tshɛk., “mbeyaka.”
Mbuta ate dia Niniva.
Kana “wanu w’eponga.”
Kana ondo “ndo nde ayeta.”
Mbuta ate Juda.
Mbuta ate Asuriya.
Kana “tɛmpɛlɔ.”
Mbuta ate “ndjɔlɔsha Niniva.”
Tshɛk., “Nyokeketsha nkende.”
Kana “layonyukɔ.”
Kana “Wamboshikikɛ.”
Tshɛk., “doyi.”
Kana “ɛsɔngɔ wa ntambwɛ wele l’alɛfulɛfu.”
Kana “ɛsɔngɔ wa ntambwɛ wele l’alɛfulɛfu.”
Mbuta ate layɔlɔsha Niniva.
Mbuta ate Tɛbɛsɛ.
Tshɛk., “lo ɛtɛ wa toshinga tshɛ.”