LOKUMU L’ƆLƆLƆ LAKAFUNDE MAKƆ

1 Etatelo ka lokumu l’ɔlɔlɔ lendana la Yeso Kristo Ɔna Nzambi tɔ kɛnɛ: 2 Oko wakadiafundama lo dibuku dia omvutshi Isaya ɔnɛ: “(Eenda, dimi lambotoma dikɛndji diami la ntondo kayɛ,* nde ayokɔlɔngɔsɔlɛ mboka.)+ 3 Onto ɔmɔtshi ekɔ lo mbida ombeka l’oswe ɔnɛ: ‘Nyɔlɔngɔsɔlɛ mboka ka Jehowa,* nyosembole ɛsɛsɛ ande.’”+ 4 Joani Obatizanyi aki l’oswe asambisha di’anto batizama oko djembetelo ya ndjatshumoya kawɔ dia vɔ dimanyiyama pɛkato.+ 5 Ko anto w’oma l’ɛtshi ka nkɛtɛ ka Judeya ndo ase Jɛrusalɛma tshɛ wakatshɔka le nde, ko nde akaabatizaka* lo Ɔkɛdi wa Jɔrdana, washola pɛkato+ yawɔ lo sɛkɛ. 6 Joani akalɔtaka dihɔndɔ dia wɛɔsa wa kamɛlɔ la oya wa lokoho la nyama lo lokende,+ ndo nde akalɛka akata w’ɛndjɔ la osanga w’oma l’okonda.+ 7 Nde akasambishaka, ate: “Onto ɔmɔtshi londeki wolo ekɔ lo ndjaye l’ɔkɔngɔ ami, dimi haasungana nkelekola+ kaanga ɛkɔdi wa sabata yande. 8 Dimi lekɔ lo nyobatiza l’ashi, koko nde ayonyobatiza la nyuma k’ekila.”+

9 Lo nshi shɔ, Yeso akaye oma la Nazarɛtɛ ka la Ngalileya ndo akabatizama le Joani+ l’Ɔkɛdi wa Jɔrdana. 10 Mbala kakɔ ɔtɔi kam’akandayatombaka oma l’ashi, nde akɛnyi olongo wambodihɔ ndo nyuma kakaye le nde oko fudu k’enga ko kakayowahema.+ 11 Ndo dui diakaye oma l’olongo diata ate: “Wɛ ekɔ Ɔnami, ɔnɛ lokami ngandji; dimi lamboketawɔ.”+

12 Mbala kakɔ ɔtɔi, nyuma kakɔɔlɔmbɔla otsha l’oswe. 13 Ɔnkɔnɛ, nde akatshikala l’oswe nshi 40, Satana+ awohemba. Nde aki kaamɛ la nyama ya l’okonda, koko andjelo wakookimanyiya.+

14 L’ɔkɔngɔ wa Joani mindama, Yeso akatshu otsha la Ngalileya+ atasambisha lokumu l’ɔlɔlɔ laki Nzambi+ 15 ate: “Etena kakashikikɛma kambokoka, Diolelo dia Nzambi diaya suke. Nyoyatshumoya+ ndo nyonge la mbetawɔ lo lokumu l’ɔlɔlɔ.”

16 Lam’akandatetaka l’omamu wa Ndjale ka Ngalileya, nde akɛnyi Simɔna nde la Andɛlɛ+ w’ɔnango Simɔna woka ɛtɛyi lo ndjale,+ nɛ dia vɔ waki amundji wa nse.+ 17 Yeso akawatɛ ate: “Nyondjele, ko dimi layonyokonya amundji w’anto.”+ 18 Mbala kakɔ ɔtɔi, vɔ wakatshike ɛtɛyi awɔ, ko wakooyele.+ 19 Lam’akandamɔ yema oma laasɔ, nde akɛnyi Jakɔba ɔna Zebede la Joani ɔnango wele lo waato awɔ wooka ɛtɛyi.+ 20 Aha la ntshimbatshimba, nde akawaelɛ. Ko vɔ wakatshike Zebede shɛwɔ kaamɛ la ase olimu lo waato, ko wakooyele. 21 Oma laasɔ, vɔ wakatshu otsha la Kapɛrnauma.

Kam’akakoke Sabato, nde akatshu lo shinangɔnga ko akatatɛ mbetsha.+ 22 Ko vɔ wakaambe lo menda yoho yande ya mbetsha, nɛ dia lɛkɔ nde akawaetshaka oko onto lele la lowandji, koko aha oko afundji.+ 23 Ko wonya akɔ, onto ɔmɔtshi laki la ɔdiɛngɛ aki lo shinangɔnga yawɔ ndo nde akahangɔhangɔka ata ate: 24 “Kasaso la yɛ na, Yeso y’ose Nazarɛtɛ?+ Onde wɛ amboya dia ndjotolanya? Dimi mbeyaka mɛtɛ eeyɛ, wɛ l’Ekila laki Nzambi!”+ 25 Koko Yeso akoohangwɛ ate: “Ɔlama ndo tomba oma le nde!” 26 Ndo l’ɔkɔngɔ wa ɔdiɛngɛ akɔ mpahanya onto ɔsɔ oko ɔnɛ lafumboya fudu, ndo wa vɔ mpangɔhangɔ la dui dia wolo, vɔ wakatombe oma le nde. 27 Ko anto tshɛ wakaambe efula ko wakatatɛ ditɛkɛta lam’asawɔ vate: “Diakɔna nɛ? Ɔnɛ yoho y’oyoyo ya mbetsha! Nde mbidjangɛka kaanga ɛdiɛngɛ la lowandji tshɛ ko vɔ mbokitanyiyaka!” 28 Ɔnkɔnɛ, lokumu lande lakadiangana esadi eto l’ahole tshɛ wa lo ngelo yakasukana la Ngalileya.

29 Ko vɔ wakatombe oma lo shinangɔnga, wakatshu kaamɛ la Jakɔba la Joani+ otsha laka Simɔna la Andɛlɛ. 30 Vɔ wakatane nyango wadi aki+ Simɔna oshami ele la demba dja, ko vɔ wakatɛ Yeso dikambo diande mbala kakɔ ɔtɔi. 31 Nde akatshu otsha le nde, akookimɛ lo lonya, akawetola. Demba dja diande diakashile ndo nde akatatɛ mbakambɛ olimu.

32 La dikɔlɔ, lam’akadje wonya, wakawela wanɛ tshɛ waki la hemɔ ndo wanɛ waki la ɛdiɛngɛ;+ 33 ko osomba w’otondo wakatshumana la soko. 34 Nde akakɔnɔla anto efula waki la hemɔ+ ya weho la weho ndo nde akatondja ɛdiɛngɛ efula, koko nde kombisha ɛdiɛngɛ lotshungɔ la vɔ ntɛkɛta, nɛ dia vɔ wakaweyaka dia nde kele Kristo.*

35 La hiotshihotshi, wonya atahotɔ, nde akemɔ, akatombe ndo akatshu lo dihole dia diɛta, ko nde akatɔlɔmba+ lɛkɔ. 36 Ko Simɔna l’anto waki la nde wakooyange 37 ndo lam’akawootane, vɔ wakawotɛ vate: “Anto tshɛ wekɔ lo koyanga.” 38 Koko nde akawatɛ ate: “Totshu l’ahole akina, l’esomba wele suke dia dimi tosambisha ndo lɛkɔ, nɛ dia l’oyango ɔsɔ mbakamaye.”+ 39 Ko nde akatshu, atasambisha lo toshinangɔnga tawɔ lo Ngalileya k’otondo ndo atatondja ɛdiɛngɛ.+

40 Kanga sudi ɔmɔtshi akaye le nde, akookusamɛ ndo akɔɔsɛngasɛnga awotɛ ate: “Ɔnkɔnɔlɛ+ naka wɛ alanga.”* 41 Nde akawoke kɛtshi, akasembola lonya lande, akawonanda ndo akawotɛ ate: “Dimi nangaka, ɔkɔnɔ.”+ 42 Mbala kakɔ ɔtɔi, sudi kande kakashile ndo nde akakɔnɔ. 43 Ko Yeso akawotɛ dia nde ntshɔ ndo akɔɔkɔkɔmiya 44 ate: “Totɛke ndooko onto, tshɔka toyaɛnya le ɔlɔmbɛdi ndo tokimɔ woshasha wakate+ Mɔsɛ wendana la ɔkɔnwɛlɔ wa sudi kayɛ dia vɔ nshikikɛ ɔnɛ wɛ ambɔkɔnɔ.”+ 45 Koko lam’akandatshu, pami kɛsɔ akatatɛ nsanya ndo dianganya dikambo sɔ lo yɛdikɔ y’efula, diakɔ diele Yeso kokoka mbɔtɔ nto l’osomba lo washo w’anto. Koko nde akatshikalaka l’andja w’osomba l’ahole wa diɛta. Ko vɔ wakatetemala ndja le nde oma lo bɛkɛ tshɛ.+

2 L’ɔkɔngɔ wa nshi mɔtshi, nde akatshu nto la Kapɛrnauma ko lokumu lakakokanɛ dia nde ekɔ lo luudu.+ 2 Ko anto wakatshumana efula lo yɛdikɔ yele ndooko hiole yakikɔ kaanga la soko, ko nde akatatɛ mbasambisha+ ɔtɛkɛta wa Nzambi. 3 Wakawela kanga ekuse ndo anto 4 wakayawɛmbaka.+ 4 Koko lam’ele vɔ kokoka mbɔtɔ la nde le Yeso nɛ dia anto waki efula, vɔ wakaate sambe ka luudu lo dihole diakinde, ko wakaholoya pami kakɔ oshami lo mbeto kɛmbawɔ ɛkɔnyi. 5 Lam’akɛnyi Yeso mbetawɔ+ kawɔ, nde akatɛ kanga ekuse ate: “Ɔnami, pɛkato yayɛ yambodimanyiyama.”+ 6 L’etena kɛsɔ, afundji amɔtshi wakadjasɛ laawɔ ndo wakakanaka yimba l’etema+ awɔ ɔnɛ: 7 “Lande na kata pami kɛnɛ ngasɔ? Nde ambɔtɛnga Nzambi. Akoka dimanyiya onto pɛkato naka aha Nzambi+ ndamɛ?” 8 Ko mbala kakɔ ɔtɔi Yeso akeye tokanyi tawɔ, ko nde akawatɛ ate: “Lande na kenyu la tokanyi ta ngasɔ l’etema+ anyu? 9 Kakɔna koleki wɔdu mbutɛ kanga ekuse? Onde ɔnɛ: ‘Pɛkato yayɛ yambodimanyiyama’ kana ɔnɛ: ‘Emala, ɔsa mbeto kayɛ, kɛndakɛnda’? 10 Koko dia nyu mbeya dia Ɔna onto+ ekɔ la wolo la nkɛtɛ wa dimanyiya pɛkato, . . .”+ nde akatɛ kanga ekuse ate: 11 “Lambokotɛ nte: Emala, ɔsa mbeto kayɛ, tshɔka lakayɛ.” 12 Ko nde akemala, mbala kakɔ ɔtɔi akɔshi mbeto kande ndo akakɛndakɛnda lo washo w’anto tshɛ, ko anto tshɛ wakaambe woho w’anyanya ndo wakatombola Nzambi, wata vate: “Tatɛnaka woho wa dikambo dia nganɛ.”+

13 Nde akatshu nto l’omamu wa ndjale ko olui w’anto tshɛ wakooyele, ko nde akatatɛ mbaetsha. 14 Lam’akandatetaka, nde akɛnyi Lɛwi, ɔna Alafayo odjashi lo biro wakawafutshanyaka elambo ko nde akawotɛ ate: “Ondjele.” Ko nde akemala ndo akooyele.+ 15 L’ɔkɔngɔ diko lam’akandalɛka* lo luudu laki Lɛwi, afutshanyi efula w’elambo la atshi wa pɛkato wakale* kaamɛ la Yeso la ambeki ande nɛ dia anto efula l’atei awɔ wakatawoyelaka.+ 16 Koko, lam’akɛnyi afundji wa Afarisɛ Yeso alɛ la atshi wa pɛkato ndo la afutshanyi w’elambo, vɔ wakambola ambeki ande vate: “Onde nde ndɛka kaamɛ la afutshanyi w’elambo ndo la atshi wa pɛkato?” 17 Lam’akoke Yeso dikambo sɔ, nde akawatɛ ate: “Anto wele alemba ki hawotoyangaka onganga, paka anto wele la hemɔ. Dimi lakaye ndjoyanga, aha anto w’ɛlɔlɔ, koko atshi wa pɛkato.”+

18 Ambeki wa Joani ndo Afarisɛ waki la mbekelo ka kilaka mbo ya ndɛ. Ɔnkɔnɛ, vɔ wakaye, ko wakawombola vate: “Lande na kele ambeki wa Joani la ambeki wa Afarisɛ wekɔ la mbekelo ka nkila mbo ya ndɛ, koko ambeki ayɛ hawokile mbo ya ndɛ?”+ 19 Yeso akawatɛ ate: “Etena kele otshuki a wadi+ eke kaamɛ la angɛnyi ande, vɔ bu la ɔkɔkɔ wa nkila mbo ya ndɛ, shi mɛtɛ? L’edja tshɛ kele otshuki a wadi eke kaamɛ la wɔ, vɔ hawokoke nkila mbo ya ndɛ. 20 Koko nshi yayoya yele otshuki a wadi ayonyɛma oma l’atei awɔ+ ndo lushi lɔsɔ mbayowokila mbo ya ndɛ. 21 Ndooko onto latodjaka daka la ɛtshi ka dihɔndɔ di’oyoyo lo dihɔndɔ di’omusu dia laadiko. Naka onto nsala ngasɔ, kete ɛtshi ka dihɔndɔ di’oyoyo kayokotola dihɔndɔ di’omusu la wolo, ko wosho wayoleka monga woke.+ 22 Ndo ndooko onto lakoka mbidja wanu w’eyoyo lo atapa w’emusu wa dikoho dia nyama. Naka onto nsala ngasɔ, kete wanu wayata atapa akɔ wa dikoho dia nyama, ko wanu wayotshulɔ ndo atapa akɔ wayolana. Koko vɔ todjaka wanu w’eyoyo lo atapa w’eyoyo wa dikoho dia nyama.”

23 Lam’akatetaka Yeso lo dikambɔ di’asami lushi la Sabato, ambeki ande wakatatɛ mina nanula etena kakawatatshɔka.+ 24 Ɔnkɔnɛ, Afarisɛ wakawotɛ vate: “Ohenda, lande na kasalawɔ dikambo diahakoke salema lushi la Sabato?” 25 Ko nde akawatɛ ate: “Onde nyu nyatadiaka kɛnɛ kakasale Davidɛ etena kakinde lo dihombo ndo kakandoke ndjala+ nde la anto waki la nde? 26 Onde nyu nyatadiaka ɔkɔndɔ wendana la Abiyatara,+ owandji w’ɛlɔmbɛdi, nde akɔtɔ lo luudu la Nzambi ndo akale mapa wa wɛnyanyu* wele ndooko onto lakakokaka ndɛ onyake ɛlɔmbɛdi,+ ko nde akasha ndo anto waki la nde mapa ɛmɔtshi?” 27 Ɔnkɔnɛ, nde akawatɛ ate: “Sabato kakatongama dikambo di’onto,+ koko onto kotongama dikambo dia Sabato. 28 Diakɔ diele, Ɔna onto ekɔ Owandji ndo wa Sabato.”+

3 Nde akɔtɔ nto lo shinangɔnga ndo pami kɛmɔtshi kaki la lonya lamboma* aki laawɔ.+ 2 Ɔnkɔnɛ, vɔ wakawendaka la yambalo tshɛ dia menda kana nde ayɔkɔnɔla pami kɛsɔ lushi la Sabato dia vɔ mbofunda. 3 Ko nde akatɛ pami kaki la lonya lamboma* ate: “Emala, yaka lanɛ l’atei.” 4 Oma laasɔ, nde akawatɛ ate: “Onde ekɔ kɔlɔ nsala dikambo di’ɔlɔlɔ kana dia kɔlɔ lushi la Sabato, mbuta ate mbitsha lɔsɛna* kana ndjaka?”+ Koko vɔ wakatshikala ki. 5 Ndo l’ɔkɔngɔ wa nde mbaenda la nkɛlɛ, ele la lonyangu l’efula l’ɔtɛ wa lonyu l’etema+ awɔ, nde akatɛ pami kɛsɔ ate: “Sembola lonya layɛ.” Nde akalisembola, ko lonya lande lakakɔnɔ. 6 Ko Afarisɛ wakatombe ndo mbala kakɔ ɔtɔi, wakawɔtwɛ sheke kaamɛ la aseka Hɛrɔdɛ+ dia mbodiaka.

7 Koko, Yeso la ambeki ande wakatshu otsha lo ndjale ko leemba l’anto w’oma la Ngalileya ndo w’oma la Judeya wakooyele.+ 8 Lam’akoke ndo anto w’oma la Jɛrusalɛma, w’oma la Idumeya ndo w’oma la wedi wa Jɔrdana kaamɛ ndo w’oma lo ngelo yosukanyi la Tura la Sidɔna akambo efula wakandasalaka, leemba la woke l’anto wakaye le nde. 9 Nde akatɛ ambeki ande dia vɔ mbokitshɛka waato ɔmɔtshi wa tshitshɛ wonya tshɛ, diaha nde mongaka lo mpika l’ɔtɛ w’olui w’anto. 10 Lam’ele nde akakɔnɔlaka anto efula, wanɛ tshɛ waki la hemɔ ya wolo wakamɔtaka lalende dia mbonanda.+ 11 Kaanga ɛdiɛngɛ,+ etena tshɛ kakawawɛnaka, vɔ wakookusamɛka ndo wakahangɔhangɔka vate: “Wɛ ekɔ Ɔna Nzambi.”+ 12 Koko, mbala efula nde akaakɔkɔmiyaka diaha vɔ mbutɛ+ anto akina.

13 Nde akadɛ lo dikona ndo akelɛ wanɛ wakandalange+ mbelɛ, ko vɔ wakaye le nde.+ 14 Ko nde akakenge* olui w’anto 12 wakandɔlɛ apɔstɔlɔ, wanɛ wakatawoyelaka ndo wakandahombe ndjotoma dia vɔ tosambisha 15 ndo mbasha wolo wa ntondja ɛdiɛngɛ.+

16 Nkombo y’olui w’anto 12+ wakandakenge* yɔ nyɛ: Simɔna lakandɔlɛ Petero,+ 17 Jakɔba ɔna Zebede la Joani ɔnango (nde akawasha nto lokombo la Bɔanɛngɛ, kitshimudi ate: “Ana wa dikungola dia mvula”),+ 18 Andɛlɛ, Filipɛ, Bartɛlɛmi, Mateo, Tɔma, Jakɔba ɔna Alafayo, Tadɛyo, Simɔna ose Kanana,* 19 la Judasɛ Iskariyɔtɛ lakayofungaka Yeso.

Ko nde akɔtɔ lo luudu, 20 olui w’anto wakatshumana nto, woho wele Yeso la ambeki ande kokoka kaanga ndɛ yangɔ. 21 Koko lam’akoke ase nkumbo kande dikambo sɔ, vɔ wakatshu dia towɔsa, nɛ dia vɔ wakataka vate: “Nde ambodjɔ dadi.”+ 22 Ndo nto, afundji wakaye oma la Jɛrusalɛma wakataka vate: “Nde ekɔ la Bɛlɛzɛbubɛ* ndo nde ekɔ lo ntondja ɛdiɛngɛ oma lo wolo w’owandji w’ɛdiɛngɛ.”+ 23 Ɔnkɔnɛ, l’ɔkɔngɔ wa nde mbaelɛ oya le nde, nde akatatɛ mbatɛ akambo la wɛɛla ate: “Ngande wakoka Satana ntondja Satana? 24 Naka diolelo diambatɔna, kete diolelo sɔ hadiotoshikimala;+ 25 ndo naka luudu lambatɔna, kete lɔ layohandjɔ. 26 Ndo nto, naka Satana oyalɔsha ndo ambatɔna, kete nde hatolomba, koko ayanga nkomɛ. 27 Lo mɛtɛ, ndooko onto lakoka mbɔtɔ lo luudu la kanga wolo ko mbɔsa diangɔ diande naka nde hatakeleki kanga wolo ɔsɔ ntondo, oma laasɔ mbayondoyɔsa diangɔ dia lo luudu lande. 28 Lo mɛtɛ kanyotɛmi nte, anto wayodimanyiyama kɔlɔ yawɔ tshɛ, oyadi pɛkato yakɔna yasalawɔ kana ntɛngɔ yatɛngawɔ Nzambi. 29 Koko onto tshɛ latɛnga nyuma k’ekila hadimanyiyamaki pondjo+ ndo nde ekɔ l’onongo wa pɛkato ka pondjo.”+ 30 Nde akate ngasɔ nɛ dia vɔ wakataka vate: “Nde ekɔ la ɔdiɛngɛ.”+

31 Nyango la anango+ wakaye ndo wakayemala l’andja, ko wakatome onto dia towelɛ.+ 32 Olui w’anto wakoodinge, ko vɔ wakawotɛ vate: “Eenda, nyɔ la ananyɔ wemadi l’andja, vɔ wekɔ lo koyanga.”+ 33 Ko nde akaakadimola ate: “Ele mama ndo waa na wele analengo?” 34 Nde akende anto wakadjasɛ mbodinga ko akate ate: “Nyende, mama la analengo+ vɔ anɛ! 35 Onto tshɛ lasala lolango la Nzambi mbele ɔnalengo, kadiyɛmi ndo mama.”+

4 Nde akatatɛ mbetsha anto nto l’omamu wa ndjale, ko olui a woke w’anto wakatshumana suke la nde. Nde akɔtɔ lo waato waki l’omamu wa ndjale, ko akadjasɛ lɔkɔ yema lo tshalola, koko olui w’anto tshɛ wakemala l’omamu wa ndjale.+ 2 Ko nde akatatɛ mbaetsha akambo efula la wɛɛla+ ndo akawatɛ+ lam’akandetshaka ate: 3 “Nyohokɛ lotoyi ndo nyolonge. Omboki a woho akatshu dia toka woho.+ 4 Lam’akandatokaka, ntɔngɔ mɔtshi yakakɔ lo mboka, ko tofudu takaye ndo takale ntɔngɔ yakɔ. 5 Ntɔngɔ nkina yakakɔ lo ave lɛnɛ aki komonga nkɛtɛ efula ko kombeta edja, yɔ yakatombe, nɛ dia nkɛtɛ komonga efula.+ 6 Ko etena kakawalɛ yanyi, yɔ yakalongola, nɛ dia yɔ komonga la edio. 7 Ntɔngɔ nkina yakakɔ l’atɛndɛ ko atɛndɛ wakole ndo wakayisenya ko yɔ kɔtɔ elowa.+ 8 Koko ntɔngɔ nkina nto yakakɔ lo nkɛtɛ y’amɛna, yɔ yakatombe, yakole ndo yakatatɛ ntɔ elowa, mbala 30, 60 ndo 100.”+ 9 Ko nde akakomiya lo mbuta ate: “Ɔnɛ lele l’atoyi wa mboka, ooke.”+

10 Etena kakinde ndamɛ, ambeki ande mbidja ndo apɔstɔlɔ 12 wakaye le nde ko wakatatɛ mombola awui wendana la wɛɛla+ akɔ. 11 Nde akawatɛ ate: “Wakanyosha diɛsɛ dia nshihodia sheke+ y’ekila yendana la Diolelo dia Nzambi, koko anto akina, akambo tshɛ mbaetɛka lo wɛɛla,+ 12 nɛ dia kaanga mbendawɔ, vɔ wekɔ lo menda, koko hawɛnyi ndo kaanga mbahokamɛwɔ, vɔ wekɔ lo mpokamɛ, koko hawoshihodia ndooko dikambo diaha vɔ ndjoyatshumoya ko dimanyiyama+ kɔlɔ yawɔ.” 13 Ndo nto, nde akawambola ate: “Naka hanyomane wɛɛla ɔnɛ mfundo, ngande wayonyoshihodia wɛɛla ekina tshɛ?

14 “Omboki a woho akonɛ ɔtɛkɛta wa Nzambi.+ 15 Ntɔngɔ yakakɔ lo mboka ele anto wahokamɛ ɔtɛkɛta wa Nzambi, koko kam’okawɔ ɔtɛkɛta akɔ, Satana toyaka+ ko ndjonya ɔtɛkɛta wakonɛma lo etema awɔ.+ 16 Ntɔngɔ yakakɔ lo nkɛtɛ y’ave ele wanɛ wele kam’okawɔ ɔtɛkɛta wa Nzambi, vɔ mbetawɔka l’ɔngɛnɔngɛnɔ.+ 17 Koko lam’ele ɔtɛkɛta akɔ kombika edio l’etema awɔ, vɔ totshikalaka paka tshanda mɔtshi tsho, ko kam’ahomanawɔ l’asui kana la ɛhɛnyɔhɛnyɔ l’ɔtɛ w’ɔtɛkɛta wa Nzambi, vɔ totakanaka. 18 Ntɔngɔ yakakɔ l’atɛndɛ ele anto wahokamɛ ɔtɛkɛta wa Nzambi,+ 19 koko ekiyanu+ wa lo dikongɛ nɛ di’akambo* ndo lokeso lele la ɔngɔnyi+ ndo nsaki+ ka diangɔ dikina tshɛ tɔɔtɔka l’etema awɔ ndo totshidiaka ɔtɛkɛta akɔ, ko hawotɔtɔka elowa. 20 Ndo ntɔngɔ yakakɔ lo nkɛtɛ y’amɛna ele anto watokaka ɔtɛkɛta wa Nzambi ndo watolongolaka ɔtɛkɛta akɔ l’ɔngɛnɔngɛnɔ ndo watɔtɔka elowa, mbala 30, 60 ndo 100.”+

21 Nde akawatɛ nto ate: “Hawotɔhɛtshaka tala ko didja lo saka* kana didja l’ɛse ka mbeto, shi mɛtɛ? Shi vɔ todihɛtshaka ko dikitsha laadiko dia ekundji ka tala?+ 22 Nɛ dia ndooko ɛngɔ koshɛmi kahatoshɔma ndo ndooko ɛngɔ koshɛmi etale kahatotomba sɛkɛ.+ 23 Ɔnɛ lele la atoyi wa mboka, ooke.”+

24 Nde akawatɛ nto ate: “Nyodje yimba lo kɛnɛ kahokamɛnyu.+ La yɛdikɔ yɛdikɛnyu anto akina mbayowonyɛdikɛ ndo nyu, eelo, wayonyokotshɛ ndo diangɔ dikina laadiko. 25 Nɛ dia onto tshɛ lele la ɛngɔ kɛmɔtshi, wayowokotshɛ+ dikina, koko onto tshɛ laha la ɛngɔ, wayowɔhɔtɔla kaanga kɛnɛ kele la nde.”+

26 Ɔnkɔnɛ, nde akate ate: “Lo yoho shɔ mbele, Diolelo dia Nzambi diekɔ oko onto lonɛ ntɔngɔ lo nkɛtɛ, 27 nde ndalaka djɔ l’otsho ndo lam’emɔnde la pindju, ntɔngɔ totombaka ndo tolaka woho wahandeye. 28 Nkɛtɛ yɔamɛ totondjaka etombatomba yema yema, ntondotondo lɔnɔngɔ, oma laasɔ ko lɔlɛngɛsɛ ndo l’ekomelo disha dioludi la nsɛkɛ. 29 Ko kam’ɛlayɔ, nde totshɔka la lokuwa dia tona, nɛ dia nshi ya dinela yambokoka.”

30 Ko nde akate ate: “La na ayotɛdika Diolelo dia Nzambi ndo ɛnyɛlɔ kakɔna kayokamba la so dia dilembetshiya? 31 Diɔ diekɔ oko lɔtɔngɔ la mutardɛ lele l’etena kakalonɛma lo nkɛtɛ, laki lɔtɔngɔ loleki tshitshɛ l’aseka ntɔngɔ tshɛ ya la nkɛtɛ.+ 32 koko etena konɛmalɔ, lɔ tombaka ko osongo alɔ ndjolekaka weho tshɛ w’akatshikatshi otale ndo osongo alɔ mongaka la ntahe ya weke, woho wele tofudu ta l’olongo kokaka ndjodjasɛ lo dɛdi diawɔ.”

33 Nde akakambe la wɛɛla+ efula wa ngasɔ dia mbaetsha ɔtɛkɛta wa Nzambi edja tshɛ kakawakoke mbohokamɛ. 34 Lo mɛtɛ, nde kɔtɛkɛtaka la wɔ aha la wɛɛla, koko nde akalembetshiyaka ambeki+ ande akambo tshɛ lo shɔpɔ.

35 La dikɔlɔ dia lushi lɔsɔ, nde akawatɛ ate: “Nyoyete totehɔ lo wedi+ okina.” 36 Ɔnkɔnɛ, l’ɔkɔngɔ wa vɔ nkɛndja olui w’anto, ambeki ande wakɔtɔ lo waato wakinde lɔkɔ+ ndo waato ekina waki laawɔ. 37 Lɔpɛpɛ la wolo efula lakapɛpɛ, asuku wakadjaka ashi lo waato ndo waato waki suke la ndola l’ashi.+ 38 Koko nde aki la koma ya waato, akalale ɛɛkɛ ɔtɛ lo wɛkɔ* w’ɔtɛ. Ɔnkɔnɛ, vɔ wakawemula ko wakawotɛ vate: “Ombetsha, onde wɛ hɛnyi dia tayanga mvɔ?” 39 Lam’akawawotɛ ngasɔ, nde akemɔ, akahangwɛ lɔpɛpɛ ndo akatɛ ndjale ɔnɛ: “Shii!+ Lɛmbɔhala!” Ko lɔpɛpɛ lakɔlama ndo ashi wakɔlɛ yɔɔ. 40 Ko nde akawatɛ ate: “Lande na kokanyu wɔma nganɛ?* Onde nyu nyatayala la mbetawɔ?” 41 Koko vɔ wakaleke mboka wɔma ko wakatanɛ vate: “Woho akɔna w’onto ɔnɛ mɛtɛ? Ndo lɔpɛpɛ ndo ndjale mbokitanyiyaka.”+

5 Oma laasɔ, vɔ wakatehɔ lo wedi okina wa ndjale, lo ɛtshi ka nkɛtɛ ka Ngerasɛni.+ 2 Kam’akatombe Yeso oma lo waato, pami kɛmɔtshi kaki la ɔdiɛngɛ kakayayaka oma la waombo* akahomana la nde. 3 Pami kakɔ akadjasɛka la waombo ndo polo l’etena kɛsɔ, ndooko onto lakakokaka mbokeleka kaanga mɔlɔla. 4 Mbala efula, wakawodjaka lo lowete ndo wakookelekaka mɔlɔla, koko nde akahembolaka mɔlɔla akɔ ndo akolaka lowete. Ndo ndooko onto laki la wolo wa mbɔlɛndja. 5 La yanyi ndo l’otsho, nde akatetemalaka mpangɔhangɔ la waombo ndo l’akona ndo nde akayahomuyaka la ave. 6 Koko lam’akandɛnyi Yeso oma lo tshalola, nde akalawɔ ndo akookusamɛ.+ 7 Ko nde akahangɔhangɔ la dui dia wolo ate: “Kasami la yɛ na, wɛ Yeso, Ɔna Nzambi Kaheme-Tshɛ? Lambokotshibia lo lokombo la Nzambi nte, tonsoyake.”+ 8 Nɛ dia Yeso akawotɛ ate: “Wɛ ɔdiɛngɛ,+ tomba oma le pami kɛnɛ.” 9 Koko Yeso akawombola ate: “Lokombo layɛ?” Ko nde akakadimola ate: “Lokombo lami Leemba, nɛ dia tekɔ efula.” 10 Ko nde akasɛngasɛnga Yeso efula diaha nde mbitshanya ɛdiɛngɛ akɔ oma lo wodja+ ɔsɔ.

11 Leemba la nsombo+ lakalɛka lo dikona.+ 12 Ko ɛdiɛngɛ wakɔɔsɛngasɛnga vate: “Ototome le nsombo kele totɔtɔ le yɔ.” 13 Ko nde akawasha lotshungɔ. Ɔnkɔnɛ, ɛdiɛngɛ wakatombe ko wakatɔtɔ le nsombo, ko nsombo yakɔ yakakungusɔ* otsha lo ndjale, nsombo oko nunu pende (2 000) ndo yɔ tshɛ yakatambɛ lo ndjale. 14 Koko alami ayɔ wakalawɔ ko wakatɔkɔndɔla dikambo diakɔ l’osomba ndo lo tongelongelo, ko anto wakaye ndjenda kɛnɛ kakatombe.+ 15 Ɔnkɔnɛ, vɔ wakaye le Yeso ko wakɛnyi pami kaki l’ɛdiɛngɛ, ɔnɛ laki la leemba odjashi ɔlɔtshi ahɔndɔ ndo aya ki, ko vɔ wakoke wɔma efula. 16 Ndo nto, wanɛ wakɛnyi dikambo sɔ wakaakɔndɔlɛ kɛnɛ kakakomɛ pami kaki la ɔdiɛngɛ ndo kɛnɛ kakakomɛ nsombo. 17 Ko vɔ wakatatɛ nsɛngasɛnga Yeso dia nde mimɔ oma lo ɛtshi kawɔ ka nkɛtɛ.+

18 Lam’akɔtɔ Yeso lo waato, pami kakɔ kaki la ɔdiɛngɛ akɔɔsɛngasɛnga dia nde ntshɔ la nde.+ 19 Koko Yeso kombetawɔ, nde akawotɛ ate: “Tshɔka la ngelo le ewotɔ ayɛ ndo towate akambo tshɛ wambokosalɛ Jehowa* ndo woho wamondokooka kɛtshi.” 20 Pami kɛsɔ akatshu ndo akatatɛ sanyɛ ase Dekapɔli* akambo tshɛ wakoosalɛ Yeso ko anto tshɛ wakaambe.

21 L’ɔkɔngɔ wa Yeso ntehɔ nto lo waato otsha lo wedi okina, olui a woke w’anto wakatshumana lalende ndo nde aki l’omamu wa ndjale.+ 22 Owandji ɔmɔtshi wa lo shinangɔnga, lokombo lande Jayiro, akaye ndo lam’akandɛnyi Yeso, nde akakusama l’ekolo+ ande. 23 Nde akɔɔsɛngasɛnga efula ate: “Ɔnami la womoto ekɔ la hemɔ wolo efula.* Lam’alangayɛ, totshu kele towahɛ anya+ dia nde nkɔnɔ ndo ntshikala la lɔsɛnɔ.” 24 Ko Yeso akatshu kaamɛ la nde. Ndo nde akayala lo mpika, nɛ dia olui a woke w’anto wakatatshɔka kaamɛ la nde.

25 Womoto ɔmɔtshi laki la hemɔ ka ɛkɛlɛlɔ ka dikila+ ɛnɔnyi 12+ aki laawɔ. 26 Nde akadiɛnɛ efula* lo anya wa enganga efula ndo akamane diangɔ tshɛ diaki la nde le wɔ, koko hemɔ kande koshila, tɔ kakatalekaka monga wolo. 27 Lam’akandoke lokumu laki Yeso, nde akaye l’ɔkɔngɔ ande l’atei w’olui w’anto, ko akananda dihɔndɔ+ dia Yeso dia laadiko, 28 nɛ dia nde akataka ate: “Naka dimi minanda kaanga ahɔndɔ ande wa laadiko ato, kete layɔkɔnɔ.”+ 29 Ko mbala kakɔ ɔtɔi hemɔ kande ka ɛkɛlɛlɔ ka dikila kakashile, ko nde akoke lo demba diande dia nde ambɔkɔnɔ oma lo hemɔ kakawɛnyaka paa efula.

30 Mbala kakɔ ɔtɔi, Yeso akoke dia wolo+ ɔmɔtshi wambotomba oma le nde ko nde akakadimɔ le olui w’anto ndo akawambola ate: “Onandji ahɔndɔ+ ami wa laadiko?” 31 Ko ambeki ande wakawotɛ vate: “Wɛ ongo ɛna olui w’anto watasusana mboka laleyɛ, ko wɛ mimbolaka ɔnɛ: ‘Ominandji?’” 32 Koko nde akashishima dia menda onto losadi dikambo sɔ. 33 Lam’akeye womoto akɔ kɛnɛ kakatshama le nde, nde akoke wɔma, akasake lokomba ndo akaye ndjoyakɔsha la ntondo ka Yeso ko akawotɛ awui tshɛ mɛtɛ. 34 Yeso akawotɛ ate: “Ɔna womoto, mbetawɔ kayɛ kambokɔkɔnɔla. Tshɔka la ki+ ndo ɔkɔnɔ oma lo hemɔ+ kayɛ ka wolo.”

35 Lam’akandatɛkɛtaka, anto amɔtshi wakaye oma laka owandji wa shinangɔnga ko wakayowotɛ vate: “Ɔnayɛ amboshila mvɔ! Lande na kɛnyayɛ Ombetsha paa nto?”+ 36 Lam’akoke Yeso dikambo sɔ, nde akatɛ owandji wa shinangɔnga ate: “Tokake wɔma,* onga tsho la mbetawɔ.”+ 37 Oma laasɔ, Yeso kombetawɔ dia anto akina tshɛ ntshɔ la nde, onyake Petero, Jakɔba+ la Joani ɔnango.

38 Vɔ wakakome laka owandji wa shinangɔnga ko nde akatane lofunguso la mamba ndo anto walela ndo wada ekoko.+ 39 Lam’akandɔtɔ, nde akawatɛ ate: “Lande na kalelanyu ndo kadjanyu lofunguso? Ɔna havwe, lo djɔ+ kende.” 40 Ko vɔ wakatatɛ mbɔɔla la lɔsɔkɔ tshɛ. Ko nde akaatondja vɔ tshɛ l’andja, akatshikala paka la she ɔna, la nyango ɔna, la wanɛ wakaye la nde, ko nde akatshu lɛnɛ aki ɔna. 41 Ko akakimɛ ɔnakɔ lo lonya ndo akawotɛ ate: “Talita kumi,” kitshimudi ate: “Ɔna womoto, lambokotɛ nte: etɔ!”+ 42 Mbala kakɔ ɔtɔi, ɔna womoto akɔ aketɔ, ko akatatɛ nkɛndakɛnda. (Nde aki l’ɛnɔnyi 12.) Ko vɔ wakaambe efula ndo wakonge l’ɔngɛnɔngɛnɔ wa mamba. 43 Koko nde akawatɛ mbala la mbala* diaha vɔ mbutɛ+ ndooko onto dikambo sɔ ndo nde akawatɛ dia vɔ mbisha ɔnakɔ yangɔ ya ndɛ.

6 Nde akamɔ oma lɛkɔ, akaye lɛnɛ akandotɔ,+ ko ambeki ande wakooyele. 2 Lushi la Sabato, nde akatatɛ mbetsha lo shinangɔnga, ndo efula k’anto wakoohokamɛ wakaambe ndo wakate vate: “Lende ambotokondja onto ɔnɛ akambo anɛ?+ Lande na kamondokondja lomba la nganɛ, ndo kosalema akambo wa diambo anɛ lo tshimbo y’anya ande?+ 3 Shi otshudi w’abaya+ kende, ɔnaki Mariya,+ ɔnango Jakɔba,+ Yɔsɛfu, Judasɛ ndo Simɔna+ kende? Shi sho l’akadiyɛnde mbele lanɛ?” Ko vɔ wakatatɛ ntakana lo dikambo diande. 4 Koko Yeso akawatɛ ate: “Omvutshi hɔsama la nɛmɔ lo ngelo kawɔ, le ewotɔ ande ndo lo nkumbo kande.”+ 5 Ɔnkɔnɛ, nde kokoka nsala ndooko dikambo dia diambo lɛkɔ, onyake mbahɛ anto angana ato waki la hemɔ anya ko mbakɔnɔla. 6 Lo mɛtɛ, nde akaambe lo woho wakiwɔ komonga la mbetawɔ. Ko nde aketeta lo tongelongelo taki suke atetsha+ anto.

7 Oma laasɔ, nde akelɛ apɔstɔlɔ ande 12, ko akatatɛ mbatoma ahende ahende+ ndo akawasha wolo wa mbahemɛ ɛdiɛngɛ.+ 8 Ndo nto, nde akawatɛ diaha vɔ ntshɔ kaanga la ɛngɔ lo lɔkɛndɔ,+ oyadi mapa, tapa dia mbo ya ndɛ kana falanga,* onyake paka danga to, 9 diaha vɔ ntshɔ la ekolo 2 wa sabata kana ntshɔ la ahɔndɔ 2.* 10 Ndo nto, nde akawatɛ ate: “Lo luudu tshɛ layonyɔtɔ, kanyotshikale laawɔ polo ndo lam’ayonyomɔ oma lo dihole+ diakɔ. 11 Ndo dihole tshɛ diahawatonyolongola kana diahawatohokamɛ losango lanyu, lam’ayonyomɔ oma laawɔ, kanyohome ditshu dia l’ekolo anyu oko djembetelo le wɔ.”+ 12 Ɔnkɔnɛ, vɔ wakatshu ndo wakatosambisha anto dia vɔ ndjatshumoya,+ 13 ndo wakatondja ɛdiɛngɛ+ efula ndo wakakitaka anto efula waki la hemɔ esɔ, ko wakaakɔnɔla.

14 Nkumekanga Hɛrɔdɛ* akoke lokumu la Yeso, nɛ dia anto efula wakanyanyaka lokombo lande ndo wakataka vate: “Joani Obatizanyi kambolɔ oma lo nyɔi, diakɔ diasalande+ akambo wa diambo.” 15 Koko akina wakataka vate: “Nde ekɔ Elidja.” Akina nto wakataka vate: “Nde ekɔ omvutshi oko amvutshi akina wa lo nshi y’edjedja.”+ 16 Lam’akoke Hɛrɔdɛ dikambo sɔ, nde akate ate: “Joani lakamahembola ɔtɛ ɔsɔ ambolɔ.” 17 Nɛ dia Hɛrɔdɛ akatome dui dia vɔ tonda Joani ndo akawodje lo lokanu l’ɔtɛ wa Hɛrɔdiyasɛ wadi aki Filipɛ ɔnango, dikambo nde akootshuke.+ 18 Dikambo Joani akatɛka Hɛrɔdɛ ate: “Keema dimɛna wɛ mbɔsa wadi aki ɔnanyɔ oko wadɛyɛ,”+ 19 Hɛrɔdiyasɛ akawombɛ kumbɛkumbɛ ndo akalangaka mbodiaka, koko takandakoke nsala dikambo sɔ. 20 Ndo Hɛrɔdɛ akokaka Joani wɔma dikambo nde akeyaka dia Joani aki kanga losembwe ndo ekila,+ ko nde akoolamaka dimɛna. L’ɔkɔngɔ wa nde mbohokamɛ, nde kombeya kɛnɛ ka nsala, koko nde akatetemala mbohokamɛ l’ɔngɛnɔngɛnɔ.

21 Koko diaaso dia dimɛna diakatanema lam’akalɛka Hɛrɔdɛ lo fɛtɛ ka lushi la eotwelo+ kande kaamɛ la ɛnɛnɛ, la ewandji w’asɔlayi ndo tosakasaka tshɛ ta la Ngalileya.+ 22 Ko ɔnaki Hɛrɔdiyasɛ la womoto akaye ndo akanɔ lokombe, ko akangɛnyangɛnya Hɛrɔdɛ la wanɛ wakalɛka* la nde. Nkumekanga akatɛ ɔna womoto akɔ ate: “Ɔnɔmbɛ kɛnɛ tshɛ kalangayɛ, ko layokoshatɔ.” 23 Eelo, nde akootshibɛ ate: “Ɛngɔ tshɛ kayoyɔnɔmba, layokoshatɔ, kaanga k’ahende ɔtɔi ka diolelo diami.” 24 Ko nde akatshu le nyango ndo akatowombola ate: “Ahombami mbɔlɔmba?” Nyango akawotɛ ate: “Akosha ɔtɛ wa Joani Obatizanyi.” 25 Aha la ntshimbatshimba, nde akakalola le nkumekanga ko akɔɔlɔmbɛ ate: “Dimi nangaka wɛ mbishami ɔtɛ wa Joani Obatizanyi+ lo dɔnga kakiye.” 26 Kaanga mbele dikambo sɔ diakoonyangiya efula, nkumekanga konanga mbodima kɛnɛ kakandɔɔlɔmbɛ l’ɔtɛ wa ditshibelo diande ndo w’angɛndangɛnda ande.* 27 Ɔnkɔnɛ, aha la ntshimbatshimba, nkumekanga akatome olami ande ɔmɔtshi ndo akawotɛ dia nde mbela ɔtɛ wa Joani. Ko nde akatshu, akatoohembola ɔtɛ lo lokanu, 28 akela ɔtɛ ande lo dɔnga. Nde akayosha ɔna womoto akɔ, ko ɔna womoto akɔ akatosha nyango. 29 Lam’akoke ambeki ande dikambo sɔ, vɔ wakaye, wakayɔsa odo ande ko wakatokundɛ lo diombo.*

30 Apɔstɔlɔ wakatshumana lale Yeso, ko wakawotɛ akambo tshɛ wakawasale ndo wakawetsha.+ 31 Yeso akawatɛ ate: “Nyoye nyuamɛ, totshu lo dihole dia diɛta kele nyotomuya yema.”+ Nɛ dia anto efula wakayaka ndo wakatshɔka, ko vɔ kokondja kaanga etena ka ndɛ yangɔ. 32 Ɔnkɔnɛ, vɔ wakatshu vɔ la nde ato+ lo waato otsha lo dihole dia diɛta. 33 Koko lam’akɛnyi ndo lam’akeye anto efula dia vɔ wotatshu, anto w’oma l’esomba tshɛ wakalawɔ l’ekolo, ko wakataakomɛ ntondo. 34 Lam’akawatombe oma lo waato, Yeso akɛnyi olui a woke w’anto, ko nde akawaoke+ kɛtshi, nɛ dia vɔ waki oko ɛkɔkɔ waha la olami.+ Nde akatatɛ mbaetsha akambo efula.+

35 Lam’ele laasɔ ko wonya ambeta, ambeki ande wakaye le nde ko wakawotɛ vate: “Dihole nɛ diekɔ lo diɛta ndo wonya ambeta.+ 36 Kɛndjawɔ kele watshu lo tosamba ndo lo tongelongelo tele suke dia vɔ tosomba mbo ya ndɛ+ vɔamɛ.” 37 Nde akaakadimola ate: “Nyowasha yangɔ ya ndɛ.” Ko vɔ wakawotɛ vate: “Onde totshu totosombe mapa wa dɛnariyo* 200 dia ndjosha anto anɛ dia vɔ ndɛ?”+ 38 Nde akawatɛ ate: “Mapa engana wele la nyu? Nyotshu, nyotende!” L’ɔkɔngɔ wa vɔ tenda, vɔ wakayowotɛ ɔnɛ: “Mapa 5 la nse 2.”+ 39 Ko nde akatɛ anto tshɛ dia vɔ mbidjasɛ lo elui lo adiyo.+ 40 Ko vɔ wakadjasɛ lo elui w’anto 100 ndo w’anto 50. 41 Nde akɔshi mapa akɔ 5 la nse 2, akaalɛɛ l’olongo ndo akasale dɔmbɛlɔ.+ Ko nde akahembola mapa ndo akasha ambeki ande dia vɔ kahɛ anto, ko nde akakahanya ndo nse yakɔ 2 dikambo di’anto tshɛ. 42 Ko vɔ tshɛ wakale ndo wakalote, 43 ko wakatɔngɔna bɛtshi diakatshikala, asaka 12 tɔɔ tɔɔ aha la mbidja nse.+ 44 Wanɛ wakale mapa akɔ waki apami nunu tanu (5 000).

45 Aha la ntshimbatshimba, nde akatɛ ambeki ande dia vɔ mbɔtɔ lo waato ko vɔ ntshɔ la ntondo kande lo wedi okina w’otsha la Bɛtɛsayida, ko nde akatshikala dia nkɛndja+ olui w’anto. 46 L’ɔkɔngɔ wa nde ndakana la wɔ, nde akadɛ lo dikona dia tɔlɔmba.+ 47 La dikɔlɔ, waato waki l’atei wa ndjale, koko nde aki ndamɛ l’okongo.+ 48 Lam’akandawaɛnyi wele l’okakatanu dia ntshɔ la waato nɛ dia lɔpɛpɛ lakayaka oma la ntondo kawɔ, suke la wonya mpotɔ,* nde akaye oya le wɔ, ayakɛndakɛnda laadiko dia ndjale, koko nde akalange* mbalekana. 49 Lam’akawawɛnyi ayakɛndakɛnda laadiko dia ndjale, vɔ wakate vate: “Onde nsombɔ mbambotosombɔ!” Ko vɔ wakade ekoko. 50 Nɛ dia vɔ tshɛ wakawɛnyi, ko wakatshimbe wɔɔngɔ. Mbala kakɔ ɔtɔi nde akatɛkɛta la wɔ ko akawatɛ ate: “Nyonge la dihonga, dimi mbayaye, tanyokake wɔma.”+ 51 Ko nde akɔtɔ lo waato le wɔ, ko lɔpɛpɛ lakɔlama. Vɔ wakaambe efula, 52 nɛ dia vɔ koshihodia kitshimudi ya mapa, koko wakatetemala monga l’etema wa lonyu wahashihodia dikambo esadi.

53 Lam’akawatehɔ, vɔ wakakome la Ngɛnɛzarɛta ko wakemadia waato l’omamu.+ 54 Koko kam’akawatombe oma lo waato, anto wakaweye. 55 Vɔ wakalawɔ l’ɛtshi ka nkɛtɛ kɛsɔ k’otondo ndo wakatatɛ mbela wanɛ waki la hemɔ lo mbeto lɛnɛ akawoke dia nde aki lɛkɔ. 56 Ndo ahole tshɛ wakandalangaka mbɔtɔ lo tongelongelo, l’esomba kana lo tosamba, wakakitshaka ase hemɔ lo bingu ndo wakɔɔsɛngasɛngaka dia vɔ minanda kaanga ohembo wa dihɔndɔ+ diande dia laadiko. Ko wanɛ tshɛ wakadinandaka wakakɔnɔka.

7 Ko Afarisɛ la afundji amɔtshi wakaye oma la Jɛrusalɛma wakatshumana lalende.+ 2 Vɔ wakɛnyi ambeki ande amɔtshi walɛ la anya mindo, mbuta ate aha nsola.* 3 (Nɛ dia Afarisɛ ndo ase Juda tshɛ kɔndɛka aha la nsola anya polo lo wɔdu, lo ndjela mbekelo y’ashidi, 4 ndo lam’akawakalolaka oma lo lobingu, vɔ kɔndɛka paka wamboyaɔtsha. Waki la mbekelo nkina efula y’ashidi yakawaatshikɛ yakawayelaka, ɛnyɛlɔ oko ntambiya akɔhɔ, mbidika ndo mpoke ya nkonga l’ashi.)+ 5 Ɔnkɔnɛ, Afarisɛ la afundji akɔ wakawombola vate: “Lande na kahayele ambeki ayɛ mbekelo y’ashidi, koko vɔ ndɛka la anya mindo?”+ 6 Nde akawatɛ ate: “Diakɔ diakate omvutshi Isaya lo dikambo dianyu, nyu akanga wa dungi pende oko wofundamidiɔ ɔnɛ: ‘Anto anɛ watɔnɛmiyaka lo ɛlɔmɔ, koko etema awɔ mangana etale oma le mi.+ 7 Ɔtɛmɔlatɛmɔla mbatowɔntɛmɔlaka, nɛ dia vɔ mbetshaka ɛlɛmbɛ w’anto.’+ 8 Nyu tshikaka ɛlɛmbɛ waki Nzambi, ko ndjelaka mbekelo y’anto.”+

9 Nde akawatɛ nto ate: “Nyu mɔnyɔlaka la mayɛlɛ tshɛ ɛlɛmbɛ waki Nzambi dia ndjela mbekelo yanyu y’ashidi.+ 10 Ɛnyɛlɔ, Mɔsɛ akate ate: ‘Lɛmiya shɔ la nyɔ,’+ ndo ɔnɛ: ‘Onto tshɛ latɛkɛta kɔlɔ lo dikambo dia* she kana dia nyango pombaka ndjakema.’+ 11 Koko nyu mbutaka nyate: ‘Onto tshɛ latɛ she kana nyango ate: “Kɛnɛ tshɛ kele la mi kotomokosha kekɔ kɔrbana, (mbuta ate woshasha wambokimɔma le Nzambi,)”’ 12 koko nyu mbotshikaka diaha nde nkimanyiya she kana nyango.+ 13 Ɔnkɔnɛ, nyu nyekɔ lo mɔnyɔla ɔtɛkɛta wa Nzambi l’ɔtɛ wa mbekelo yanyu y’ashidi yakawanyotshikɛ.+ Ndo nyu salaka akambo efula wa ngasɔ.”+ 14 Ko nde akelɛ olui w’anto nto ndo akawatɛ ate: “Nyompokame nyu tshɛ ndo nyoshihodia.+ 15 Ndooko ɛngɔ kalɛ onto kakoka mbodja mindo, koko kɛnɛ katomba oma le onto mbawodja mindo.”+ 16* ——

17 Lam’akandamɔ oma lale olui w’anto, nde akɔtɔ lo luudu lɔmɔtshi, ambeki ande wakawombola lo kɛnɛ kendana la wɛɛla+ akɔ. 18 Ko nde akawatɛ ate: “Ndo nyu mbahatamane akambo mfundo oko vɔ? Onde nyu hanyeye dia ndooko ɛngɔ kalɛ onto kakoka mbodja mindo? 19 Nɛ dia tɔ hɔtɔ l’otema, koko tɔ mbetaka lo dikundju ndo oma laasɔ ko tɔ totomba lo nkomba.” Ɔnkɔnɛ, lo mbuta ngasɔ, nde akɛnya dia mbo ya ndɛ tshɛ yekɔ pudipudi. 20 Nde akate nto ate: “Kɛnɛ katomba oma le onto mbawodja mindo.+ 21 Nɛ dia oma l’otema w’onto+ katomba tokanyi ta kɔlɔ: awui wa mindo wa dieyanelo,* wovi, diakatanelo, 22 etsha wa loseka, lokaki, etsha wa kɔlɔ, lokeso, lɔkɛwɔ la fumbɔ nsɔnyi,* sso dia ɔkɔmiya, lɔtɛngɔ, lotamanya ndo akambo w’enginya. 23 Akambo wa kɔlɔ asɔ tshɛ ndjaka oma l’otema ndo vɔ mbidjaka onto mindo.”

24 Yeso akamɔ oma lɛkɔ ko akatshu otsha l’ɛtshi ka nkɛtɛ ka Tura la Sidɔna.+ Nde akɔtɔ lo luudu lɔmɔtshi, ndo nde konanga dia kaanga onto 1 mbeya dui sɔ, koko anto wakawɛnyi. 25 Kombeta edja, womoto ɔmɔtshi lele ɔnande la womoto aki l’ɔdiɛngɛ akoke lokumu lande, akaye ko akayokusama l’ekolo+ ande. 26 Womoto akɔ aki ose Ngirika lakadjasɛka* la Sirofinikiya. Nde akatetemala mbɔlɔmba dia nde ntondja ɔdiɛngɛ waki le ɔnande la womoto. 27 Koko nde akawotɛ ate: “Tokotshika ana watokolota, nɛ dia bu dimɛna mbɔsa mbo ya ndɛ y’ana ko mbokɛ ana wa mfɔ.”+ 28 Ko womoto akɔ akookadimola ate: “Eelo, nkumadiɔndjɔ, toko ana wa mfɔ wele l’ɛse ka mɛsa tɔlɛka mfusa yatɔkɔshaka ana!” 29 Ko nde akatɛ womoto akɔ ate: “Lam’ele wɛ ambota ngasɔ, tshɔka, ɔdiɛngɛ wambotomba oma le ɔnayɛ la womoto.”+ 30 Ko nde akatshu otsha lakande ndo akatotana ɔnande oladi lo mbeto, ɔdiɛngɛ wakashidi ntomba.+

31 Lam’akakalola Yeso oma l’ɛtshi ka nkɛtɛ ka Tura, nde akete la Sidɔna otsha lo Ndjale ka Ngalileya ndo nde akete l’atei wa ɛtshi ka nkɛtɛ ka Dekapɔli.*+ 32 Lɛkɔ, wakawela pami kɛmɔtshi kaki ehoke ndo kaki la okakatanu dia ntɛkɛta,+ ko vɔ wakɔɔsɛngasɛnga dia nde mbaahɛ lonya. 33 Ko nde akawɔshi ndo akamɔ la nde oma lale olui w’anto. Oma laasɔ, nde akawodje mpita l’atoyi ndo l’ɔkɔngɔ wa nde mpɔngɔla lɔsɔyi, nde akananda lolemi+ lande. 34 Nde akaalɛ l’olongo, akakitshakitsha lomu la wolo ko akawotɛ ate: “Effataa,” kitshimudi ate: “Dihɔ.” 35 Ɔnkɔnɛ atoyi ande wakadihɔ,+ okakatanu waki la nde dia ntɛkɛta wakashile, ko nde akatatɛ ntɛkɛta dimɛna. 36 Nde akaakɔkɔmiya diaha vɔ mbutɛ ndooko onto,+ koko lo yɛdikɔ yakandalekaka mbakɔkɔmiya mbakawalekaka nsanya dikambo diakɔ.+ 37 Lo mɛtɛ, vɔ wakaambe woho w’anyanya+ ndo wakate vate: “Nde ambosala akambo tshɛ dimɛna. Nde ambokimanyiya ndo ehoke dia nde mboka ndo lomi dia nde ntɛkɛta.”+

8 Lo nshi shɔ, olui a woke w’anto wakatshumana nto, ndo vɔ komonga la ɛngɔ ka ndɛ. Ɔnkɔnɛ nde akelɛ ambeki ande ko akawatɛ ate: 2 “Lamboka olui w’anto+ ɔnɛ kɛtshi, nɛ dia vɔ wambotshikala kaamɛ la mi nshi 3, aha la ɛngɔ ka vɔ ndɛ.+ 3 Naka dimi mbakimɔ dia vɔ ntshɔ otsha lawakawɔ la ndjala,* kete vɔ mbeyaka tɔkɔ la lohohe lo mboka, nɛ dia amɔtshi l’atei awɔ wakaye oma l’etale.” 4 Ko ambeki ande wakookadimola vate: “Lanɛ tekɔ lo diɛta, lende akoka onto nkondja mbo ya ndɛ yakoka olui w’anto ɔnɛ ndɛ ko ndota?” 5 Ko nde akawambola ate: “Mapa engana wele la nyu?” Vɔ wakakadimola vate: “Mapa 7.”+ 6 Ko nde akatɛ olui w’anto dia vɔ mbidjasɛ la nkɛtɛ. Ko nde akɔshi mapa akɔ 7, l’ɔkɔngɔ wa nde mboka losaka, nde akaahembola ndo akasha ambeki ande dia vɔ kahɛ olui w’anto,+ ko vɔ wakaakahɛ. 7 Vɔ waki nto la tosese tongana, ndo l’ɔkɔngɔ wa nde nsala dɔmbɛlɔ, nde akawatɛ dia vɔ tikahɛ anto nto. 8 Ko vɔ wakale, wakalote ndo wakatɔngɔna bɛtshi+ diakatshikala asaka* 7 wa weke tɔɔ tɔɔ. 9 Anto waki laawɔ waki apami oko nunu nɛi (4 000). Oma laasɔ nde akaakɛndja.

10 Aha la ntshimbatshimba, nde akɔtɔ lo waato nde la ambeki ande ko wakatshu otsha l’ɛtshi ka nkɛtɛ ka Dalamanuta.+ 11 Lɛkɔ, Afarisɛ wakaye ko wakatatɛ mbidjana la nde taamu, wayanga dia nde mbaɛnya djembetelo y’oma l’olongo l’oyango wa vɔ mbohemba.+ 12 Ɔnkɔnɛ, nde akakitshakitsha lomu la wolo ndo akate ate: “Lande na kayanga lɔlɔnga lɔnɛ djembetelo?+ Lo mɛtɛ kanyotɛmi nte, ndooko djembetelo yayowosha lɔlɔnga+ lɔnɛ.” 13 Ko nde akaatshike, akɔtɔ lo waato nto ndo akatehɔ otsha lo wedi okina.

14 Koko, vɔ wakohɛ ntshɔ la mapa, vɔ komonga ndooko la ɛngɔ lo waato, paka mapa 1+ oto. 15 Ko nde akaahɛmɔla hwe ate: “Nyɔsɛnɛ ndo nyewɔ wodoya w’Afarisɛ la wodoya waki Hɛrɔdɛ.”+ 16 Ko vɔ wakatatɛ nkakatana lam’asawɔ, nɛ dia vɔ komonga la mapa. 17 Lam’akeye Yeso dikambo sɔ, nde akawatɛ ate: “Lande na kakakatananyu l’ɔtɛ wenyu bu la mapa? Onde nyu nyatalembetɛ ndo nyatashihodia oto? Onde nyekɔ l’etema wa lonyu wahashihodia dikambo esadi? 18 ‘Kaanga mbenyu la washo, nyu hanyɛnyi, ndo kaanga mbenyu l’atoyi, nyu hanyoke?’ Hanyoyohɔ 19 etena kakamalesha apami nunu tanu (5 000) la mapa+ 5, asaka angana wa bɛtshi dia mapa tɔɔ tɔɔ wakanyatɔngɔna?” Vɔ wakawotɛ vate: “12.”+ 20 “Etena kakamalesha apami nunu nɛi (4 000) la mapa 7, asaka* angana wa weke wa bɛtshi dia mapa wakanyatɔngɔna?” Vɔ wakawotɛ vate: “7.”+ 21 Ko nde akawatɛ ate: “Onde nyu nyatashihodia?”

22 Oma laasɔ, vɔ wakakome la Bɛtɛsayida. Lɛkɔ, anto wakawela pami kɛmɔtshi kaki tshungu ndo wakɔɔsɛngasɛnga dia nde mbonanda.+ 23 Ko nde akakimɛ pami kakɔ ka tshungu lo lonya, akatombe la nde oma lo ngelo. L’ɔkɔngɔ wa nde mbotɛ nsɔyi lo washo,+ nde akawahɛ anya ko akawombola ate: “Onde wɛ ekɔ lo mɛna ɛngɔ kɛmɔtshi?” 24 Pami kakɔ akɛwɛwa ndo akate ate: “Lekɔ lo mɛna anto, koko vɔ wekɔ oko esongo watakɛndakɛnda.” 25 Oma laasɔ, nde akananda pami kakɔ nto lo washo ko pami kakɔ akɛnyi dimɛna. Washo ande wakadihɔ ko nde akɛnyi diangɔ tshɛ dimɛna. 26 Ko Yeso akawotɛ dia nde ntshɔ lakande, ata ate: “Tɔtɔke lo ngelo kɛnɛ.”

27 Oma laasɔ, Yeso la ambeki ande wakatshu otsha lo ngelo ya la Kayisariya Filipɛ ndo lam’akawatatshɔka, nde akambola ambeki ande ate: “Anto atawɔ eemi?”+ 28 Vɔ wakawotɛ ɔnɛ: “Amɔtshi vate Joani Obatizanyi,+ koko akina vate Elidja,+ ndo akina nto vate omvutshi ɔmɔtshi.” 29 Ko nde akawambola ate: “Ko nyu atanyu eemi?” Petero akookadimola ate: “Wɛ ekɔ Kristo.”+ 30 Ko nde akaakɔkɔmiya diaha vɔ mbutɛ ndooko onto akambo wendana la nde.+ 31 Ndo nto, nde akatatɛ mbaetsha dia Ɔna onto pombaka soyama efula ndo sɛkama oma le dikumanyi, ewandji w’ɛlɔmbɛdi, afundji ndo ndjakema,+ ko mbolɔ l’ɔkɔngɔ+ wa nshi 3. 32 Lo mɛtɛ, nde akawatɛ awui asɔ hwe hwe. Ko Petero akatshu la nde yema l’omamu ndo akatatɛ mbohangwɛ.+ 33 Nde akasha Petero ɔkɔngɔ, akakadimɔ otsha le ambeki ande ndo akahangwɛ Petero ate: “Satana, tshimba l’ɔkɔngɔ ami! Nɛ dia wɛ ekɔ la tokanyi t’anto,+ koko aha taki Nzambi.”

34 Oma laasɔ, nde akelɛ olui w’anto oya le nde kaamɛ la ambeki ande ndo akawatɛ ate: “Naka onto nangaka ndjelami, nde ayasɛkɛ, ɛmbɛ otamba ande w’asui* ndo atetemale ndjelami.+ 35 Nɛ dia onto tshɛ lalanga nkokɛ lɔsɛnɔ* lande ayolishisha, koko onto tshɛ lashisha lɔsɛnɔ* lande l’ɔtɛ ami ndo l’ɔtɛ wa lokumu l’ɔlɔlɔ ayolishimbɛ.+ 36 Wahɔ akɔna mɛtɛ wayonga l’onto naka nde nkondja andja w’otondo ko nde nshisha lɔsɛnɔ*+ lande? 37 Kakɔna mɛtɛ kayokimɔ onto dia mengɔnya la lɔsɛnɔ*+ lande? 38 Nɛ dia onto tshɛ lamboka nsɔnyi ndo loka ɛtɛkɛta ami nsɔnyi l’atei wa lɔlɔnga lɔnɛ la loseka* ndo l’atshi wa pɛkato, Ɔna onto ayowoka+ nsɔnyi nde lawɔ etena kayondoya lo lotombo la She kaamɛ la andjelo+ w’ekila.”

9 Nde akawatɛ nto ate: “Lo mɛtɛ kanyotɛmi nte, anto amɔtshi wemadi lanɛ hawotɔlɛta nyɔi paka wambotɛnyi Diolelo dia Nzambi diamboya la wolo.”+ 2 Nshi 6 l’ɔkɔngɔ wa laasɔ, Yeso akɔshi Petero, Jakɔba la Joani ko akadɛ la wɔ vɔamɛ lo dikona di’otale, ndo nde akatohilɔ la ntondo kawɔ,+ 3 ko ahɔndɔ ande wa laadiko wakayala ngaingai ndo wɛma fifɔ woho wele ndooko onto la la nkɛtɛ lakoka mbɛdia ngasɔ. 4 Elidja la Mɔsɛ wakɛnama le wɔ ndo vɔ wakasawolaka la Yeso. 5 Ko Petero akatɛ Yeso ate: “Rabi,* ekɔ dui dia dimɛna dia sho ntshikala lanɛ. Ɔnkɔnɛ toke mvudu y’apɛma 3 lanɛ, 1 lakiyɛ, 1 laki Mɔsɛ ndo 1 laki Elidja.” 6 Lo mɛtɛ, Petero kombeya kɛnɛ ka nsala nto, nɛ dia vɔ wakandama la wɔma. 7 Ko dinge diakaye, diakaakombe ndo dui+ diakaye oma lo dinge diakɔ diata ɔnɛ: “Ɔnɛ ele Ɔnami, ɔnɛ lokami ngandji.+ Nyoohokamee.”+ 8 Ko mbala kakɔ ɔtɔi vɔ wakakadimɔ, ko vɔ kɔmɛna ndooko onto nto, paka Yeso.

9 Lam’akawayaholɔka oma lo dikona, nde akaakɔkɔmiya diaha vɔ mbutɛ ndooko onto kɛnɛ kakawɛnyi,+ polo ndo Ɔna onto ambolɔ oma lo nyɔi.+ 10 Vɔ wakalame ɔtɛkɛta ɔsɔ l’etema,* koko wakakɛtshanyaka lam’asawɔ dia kɛnɛ kalembetshiya eolwelo kɛsɔ k’oma lo nyɔi. 11 Ko vɔ wakawombola vate: “Lande na kata afundji ɔnɛ Elidja+ pombaka taye ntondo?”+ 12 Nde akawatɛ ate: “Elidja pombaka ndja ntondo ndo nɔngɔsɔla akambo tshɛ,+ ko lande na kele akafundama lo dikambo dia Ɔna onto dia nde pombaka soyama+ efula ndo pɛnyahɛnyama la diɔnyɔ tshɛ?+ 13 Dimi lambonyotɛ nte, Elidja+ amboshilaka ndja, koko vɔ wakoosalɛ akambo tshɛ wakawalange, oko wakadiafundama lo dikambo diande.”+

14 Lam’akawayayaka oya le ambeki akina, vɔ wakɛnyi olui a woke w’anto suke la wɔ ndo afundji waama la wɔ.+ 15 Koko kam’akɛnyi olui w’anto ɔsɔ tshɛ Yeso, vɔ wakaambe ndo wakalawɔ otsha le nde dia towosha mɔyɔ. 16 Ko nde akawambola ate: “Awananyu la wɔ?” 17 Ko onto ɔmɔtshi la l’atei w’olui w’anto ɔsɔ akookadimola ate: “Ombetsha, dimi lakakela ɔnami nɛ dia nde ekɔ la ɔdiɛngɛ+ wa lomi. 18 Mbala tshɛ kawondawɔ, vɔ mbɔkɔshaka la nkɛtɛ ndo nde kɛlaka ndɔdu oma l’onyɔ, nde kakatanyaka wanyu ndo nɛmbaka. Dimi lakalɔmbi ambeki ayɛ dia vɔ mbotondja, koko vɔ hawokoki nsala dikambo sɔ.” 19 Yeso akaakadimola ate: “Nyu lɔlɔnga+ lele bu la mbetawɔ, polo ndo l’etena kakɔna kayomotetemala monga la nyu? Polo ndo l’etena kakɔna kayomokikɛ lɔkɛwɔ lanyu? Ombelande.”+ 20 Ko vɔ wakawela ɔna pami akɔ. Koko lam’akɛnyi ɔdiɛngɛ akɔ Yeso, mbala kakɔ ɔtɔi vɔ wakahahanya ɔnakɔ oko onto lafumboya fudu. Wakɔɔkɔsha lo nkɛtɛ ko nde akangitɔ ndo akakɛlɛ ndɔdu oma l’onyɔ. 21 Ko Yeso akambola she ɔnakɔ ate: “Oma l’etena kakɔna kakookomɛ dikambo nɛ?” Nde akawotɛ ate: “Oma ko dikɛnda diande. 22 Ndo mbala efula, vɔ mbɔkɔshaka lo dja ndo l’ashi dia mbosalɛ kɔlɔ. Ko naka wɛ kokaka nsala dikambo dimɔtshi, otoke kɛtshi ndo otokimanyiya.” 23 Yeso akawotɛ ate: “Lande na katayɛ wate: ‘Naka wɛ kokaka?’ Akambo tshɛ kokaka salema le onto lele la mbetawɔ.”+ 24 Mbala kakɔ ɔtɔi, she ɔnakɔ akate la dui dia wolo ate: “Dimi lekɔ la mbetawɔ! Okimanyiya lɛnɛ eemi l’ohomba wa mbetawɔ!”+

25 Lam’akɛnyi Yeso dia olui w’anto woyalawɔ oya le wɔ, nde akahangwɛ ɔdiɛngɛ ate: “Wɛ ɔdiɛngɛ wa lomi ndo ehoke, lambokotɛ nte, tomba oma le nde ndo tɔtɔke nto+ le nde.” 26 L’ɔkɔngɔ w’ɔdiɛngɛ mpangɔhangɔ ndo mbohahanya mbala efula oko onto lafumboya fudu, vɔ wakatombe, ko ɔnakɔ akayala oko onto lambovɔ, ndo efula k’anto waki laawɔ wakate vate: “Nde ambovɔ!” 27 Koko Yeso akookimɛ lo lonya, akawonyiya ko nde akemala. 28 L’ɔkɔngɔ wa nde mbɔtɔ lo luudu lɔmɔtshi, ambeki ande wakawombola lo shɔpɔ vate: “Lande na kahatakoki ntondja ɔdiɛngɛ akɔ?”+ 29 Nde akawatɛ ate: “Woho w’ɔdiɛngɛ ongo kokaka ntomba paka la dɔmbɛlɔ.”

30 Vɔ wakonɛɛ oma lɛkɔ, ko wakete la Ngalileya, koko nde konanga dia kaanga onto mbeya dikambo sɔ. 31 Nde aketshaka ambeki ande ndo akawatɛka ate: “Ɔna onto ayanga tokimɔma lo anya w’anto ndo vɔ wayowodiaka,+ koko kaanga mbayondodiakema, nde ayolɔ l’ɔkɔngɔ wa nshi 3.”+ 32 Vɔ koshihodia kɛnɛ kakandawatɛ, koko wakoke wɔma dia mbombola.

33 Ko vɔ wakakome la Kapɛrnauma. Lam’akinde lo luudu, nde akawambola ate: “Kakɔna kakanyayakakatanaka lo mboka?”+ 34 Vɔ wakɔlama ki nɛ dia lo mboka, vɔ wakayakakatanaka dia mbeya ɔnɛ loleki woke l’atei awɔ. 35 Ɔnkɔnɛ nde akadjasɛ, akelɛ apɔstɔlɔ ande 12 ko akawatɛ ate: “Naka onto nangaka monga lo dihole dia ntondo, nde onge l’ɔkɔngɔ w’anto tshɛ ndo onge okambi w’anto tshɛ.”+ 36 Ko nde akɔshi ɔna dikɛnda, akawemadia l’atei awɔ ndo akawahɛ anya ko akawatɛ ate: 37 “Onto tshɛ lalongola ɔtɔi ɔmɔtshi lele oko ɔna dikɛnda+ ɔnɛ lo lokombo lami, ambonongola ndo dimi; ndo onto tshɛ lanongola, aha dimɛ oto mbalongolande, koko ndo Ɔnɛ lakantome.”+

38 Joani akawotɛ ate: “Ombetsha, takɛnyi onto ɔmɔtshi atondja ɛdiɛngɛ lo nkamba la lokombo layɛ ko takahembe mboshimba, nɛ dia nde hakoyele kaamɛ la so.”+ 39 Ko Yeso akate ate: “Tanyohembake mboshimba, nɛ dia ndooko onto layosala ahindo lo lokombo lami layoyokadimɔ esadi eto ko ntɛkɛta kɔlɔ lo dikambo diami. 40 Nɛ dia onto tshɛ lahatɔlɔsha ekɔ lo wedi aso.+ 41 Onto tshɛ lanyosha dikɔhɔ di’ashi wa nnɔ l’ɔtɛ wenyu ambeki wa Kristo,+ lo mɛtɛ kanyotɛmi nte: Lo weho akɔ tshɛ nde hatoshisha difuto+ diande. 42 Koko, onto tshɛ latakanya 1 ɔmɔtshi l’atei w’anto wa totshitshɛ anɛ wele la mbetawɔ, ndeka dimɛna mbokeleka dive di’ɔhɛlɔ diatshindjama oma le mponda lo nkingo, ko mbotambiya lo ndjale.+

43 “Naka lonya layɛ kotakanyaka, kete hembolalɔ. Nɛ dia ndeka dimɛna wɛ nkondja lɔsɛnɔ la lonya 1 lo dihole dia wɛ mbikashema la anya 2 lo Ngɛhɛna,* lo dja yahakoke nimala.+ 44* —— 45 Naka lokolo layɛ kotakanyaka, kete hembolalɔ. Nɛ dia ndeka dimɛna wɛ nkondja lɔsɛnɔ la lokolo 1 lo dihole dia wɛ mbikashema la ekolo 2 lo Ngɛhɛna.*+ 46* —— 47 Ndo naka sso diayɛ kotakanyaka, kete kashadiɔ.+ Nɛ dia ndeka dimɛna wɛ mbɔtɔ la sso 1 lo Diolelo dia Nzambi lo dihole dia wɛ mbikashema la washo 2 lo Ngɛhɛna,*+ 48 lɛnɛ ahavu nkuso ndo lɛnɛ ahadimala dja.+

49 “Nɛ dia onto tshɛ pombaka mbidjama lɛɛhɔ la dja.+ 50 Lɛɛhɔ lekɔ ɛngɔ ka dimɛna, koko naka lɛɛhɔ lambosuwɔ, la na ayonyolietɛ mpɛ nto?+ Nyonge la lɛɛhɔ l’etei kanyu+ ndo nyonge la wɔladi lam’asanyu.”+

10 Yeso akamɔ oma lɛkɔ, akakome lo elelo* wa Judeya ndo akatehɔ Jɔrdana, ko elui w’anto wakatshumana nto lalende. Nde akatatɛ mbaetsha+ oko waki mbekelo kande. 2 Afarisɛ wakaye le nde dia ndjoohemba, vɔ wakawombola dia kana ekɔ kɔlɔ dia pami ndjaka diwala la wadɛnde.+ 3 Nde akaakadimola ate: “Kakɔna kakanyodjangɛ Mɔsɛ?” 4 Vɔ wakate vate: “Mɔsɛ aketawɔ dia pami fundɛ wadɛnde mukanda wa mbokimɔ ndo wa ndjaka diwala la nde.”+ 5 Koko Yeso akawatɛ ate: “L’ɔtɛ wa lonyu l’etema+ anyu mbakanyofundɛ Mɔsɛ didjango sɔ.+ 6 Koko oma l’etatelo, ‘Nzambi akaatonge pami la womoto.+ 7 Diakɔ diele, pami ayotshika she la nyango,+ 8 ko vɔ akɔ 2 wayoyala demba 1,’+ vɔ keema anto 2 nto, koko waya demba 1. 9 Ɔnkɔnɛ, onto atokakitolake+ kɛnɛ kakamamatanya Nzambi.” 10 Lam’akiwɔ lo luudu nto, ambeki ande wakatatɛ mbombola dikambo sɔ. 11 Nde akawatɛ ate: “Onto tshɛ ladiaka diwala la wadɛnde ko nde ntshuka womoto okina ambosala loseka.+ 12 Ndo naka womoto l’ɔkɔngɔ wa ndjaka diwala la omɛnde ambotshukama la pami kekina, kete womoto ɔsɔ ambosala loseka.”+

13 Oma laasɔ, anto wakatatɛ mbeela ana w’akɛnda dia nde ndjowananda, koko ambeki ande wakaahangwɛ.+ 14 Lam’akɛnyi Yeso dikambo sɔ, nde kɔngɛnangɛna ndo akawatɛ ate: “Nyotshike ana w’akɛnda waye le mi, takonyashimba, nɛ dia Diolelo dia Nzambi diekɔ di’anto oko vɔ.+ 15 Lo mɛtɛ kanyotɛmi nte, onto tshɛ lahalongola Diolelo dia Nzambi oko ɔna dikɛnda, lo weho akɔ tshɛ nde hatɔtɔ lɔkɔ.”+ 16 Ko nde akɛmbɛ ana akɔ l’anya ande, akaatshɔkɔla ndo akawawahɛ anya.+

17 Lam’akandatatshɔka, pami kɛmɔtshi akalawɔ, akayokusama la ntondo kande ko akawombola ate: “Ombetsha w’ɔlɔlɔ, ahombami nsala dia dimi nkita lɔsɛnɔ la pondjo?”+ 18 Yeso akawotɛ ate: “Lande na kambelɛyɛ ɔlɔlɔ? Ndooko onto lele ɔlɔlɔ, paka onto 1, Nzambi.+ 19 Wɛ mbeyaka dia ɛlɛmbɛ mbutaka ɔnɛ: ‘Todiakake,+ tosalake loseka,+ tovake,+ toyalake ɔmɛnyi wa kashi,+ tokesake,+ lɛmiya shɔ la nyɔ.’”+ 20 Pami kakɔ akawotɛ ate: “Ombetsha, dimi kitanyiyaka akambo asɔ tshɛ oma ko dikɛnda diami.” 21 Yeso akawende, akawoke ngandji ndo akawotɛ ate: “Dikambo ɔtɔi kambokotshikalɛ: Tshɔka tosondja diangɔ diayɛ ndo sha ase wola, ko wɛ ayonga la ɔngɔnyi l’olongo, kele yaka, ondjele.”+ 22 Koko lam’akandoke ngasɔ, nde akonge ɔkɛtshi ndo akatshu la lonyangu, nɛ dia nde aki la diangɔ efula.+

23 Yeso akɛwɛwa ko akatɛ ambeki ande ate: “Ayonga wolo dia ase falanga mbɔtɔ lo Diolelo dia Nzambi!”+ 24 Ko ambeki ande wakaambe efula lam’akawoke ɛtɛkɛta ɛsɔ. Yeso akawatɛ ate: “Anami le, ekɔ dikambo dia wolo dia mbɔtɔ lo Diolelo dia Nzambi! 25 Wɔtwɛlɔ wa kanga ɔngɔnyi lo Diolelo dia Nzambi+ ekɔ oko mponda mbɔtɔ lo wosho wa ntɛdi.” 26 Vɔ wakatetemala mamba ko wakawombola* vate: “Onto akɔna mɛtɛ ayokoka shimbamɛ+ na?” 27 Yeso akawaende tɛɛ ko akate ate: “Le anto dikambo sɔ hadiokoke salema, koko aha le Nzambi, nɛ dia le Nzambi,+ akambo tshɛ kokaka salema.” 28 Petero akawotɛ ate: “Eenda, sho takatshike diangɔ diaso tshɛ ndo takakoyele.”+ 29 Yeso akate ate: “Lo mɛtɛ kanyotɛmi nte, ndooko onto lakatshike luudu kana anango kana akadiyɛnde kana nyango kana she kana ana kana dikambɔ l’ɔtɛ ami ndo l’ɔtɛ wa lokumu l’ɔlɔlɔ,+ 30 lahatokondja mvudu, anango, akadiyɛnde, nyango, ana ndo dikambɔ mbala 100 l’etena kɛnɛ kaamɛ l’ɛhɛnyɔhɛnyɔ+ ko lo dikongɛ di’akambo* diayaye lɔsɛnɔ la pondjo. 31 Koko anto efula wele la ntondo wayonga l’ɔkɔngɔ, ndo wanɛ wele l’ɔkɔngɔ wayonga la ntondo.”+

32 Vɔ wakatatshɔka lo mboka, watadɛ otsha la Jɛrusalɛma ndo Yeso akatatshɔka la ntondo kawɔ ko vɔ wakaambe, koko anto wakatawayelaka wakatatɛ mboka wɔma. Nde akɔshi apɔstɔlɔ ande 12 nto, akatshu la wɔ l’omamu ko akawatɛ akambo wakahombe mbokomɛ+ ate: 33 “Nyolonge, sho anɛ atadɛ otsha la Jɛrusalɛma, Ɔna onto ayotokimɔma l’anya wa ewandji w’ɛlɔmbɛdi la afundji. Vɔ wayowofundɛ nyɔi ndo wayowokimɔ l’anya w’ase wedja, 34 ndo vɔ wayowɔsɔka, wayowotɛ nsɔyi, wayowɔkɔmɔla ndo wayowodiaka, koko nde ayolɔ+ l’ɔkɔngɔ wa nshi 3.”

35 Jakɔba la Joani, ana wa Zebede+ wakaye le Yeso, ko wakawotɛ vate: “Ombetsha, sho nangaka wɛ tosalɛ kɛnɛ tshɛ kakɔlɔmbaso.”+ 36 Nde akawambola ate: “Alanganyu dimi nyosalɛ?” 37 Vɔ wakawotɛ vate: “Etawɔ dia sho mbidjasɛ ɔmɔtshi lo lonya layɛ l’omi ndo okina lo lonya layɛ la lɔmɔsɔ lo lotombo+ layɛ.” 38 Ko Yeso akawatɛ ate: “Nyu hanyeye kɛnɛ kalɔmbanyu. Onde nyu kokaka nnɔ dikɔhɔ diayangami nnɔ, kana batizama batisimu kayangami batizama?”+ 39 Vɔ wakawotɛ vate: “Sho kokaka nnɔ.” Ko Yeso akawatɛ ate: “Nyayɔnɔ dikɔhɔ diayangami nnɔ ndo nyayobatizama batisimu kayangami batizama.+ 40 Koko, aha dimi mbasha onto lotshungɔ la nde mbidjasɛ lo lonya lami l’omi kana la lɔmɔsɔ, koko ahole asɔ wekɔ dikambo dia anto wakawaalɔngɔsɔlɛ.”

41 Lam’akoke ambeki akina 10 dikambo sɔ, vɔ wakomalɛ Jakɔba la Joani.+ 42 Ko Yeso akawaelɛ ko akawatɛ ate: “Nyu mbeyaka dia wanɛ wele oko* emboledi wa wedja mbahemɛka anto awɔ, ndo anto wa weke mongaka la lowandji le anto awɔ.+ 43 Atongake ngasɔ l’atei anyu. Onto tshɛ lalanga monga woke l’atei anyu, ayale okambi+ anyu, 44 ndo onto tshɛ lalanga monga lo dihole dia ntondo l’atei anyu, ayale ose olimu anyu nyu tshɛ. 45 Nɛ dia kaanga Ɔna onto akaye, aha dia anto mbokambɛ olimu,+ koko dia ndjokambɛ anto akina olimu ndo nkimɔ lɔsɛnɔ* lande oko oshinga w’etshungwelo dikambo di’anto efula.”+

46 Ko vɔ wakakome la Jeriko. Lam’akandatatombaka nde la ambeki ande la olui w’anto oma la Jeriko, Baratimayo (ɔna Timeyo), laki tshungu ndo lakalɔmbanaka diangɔ akadjasɛ l’omamu wa mboka.+ 47 Lam’akandoke dia Yeso y’ose Nazarɛtɛ mbatete, nde akatatɛ mbuta la dui dia wolo ate: “Yeso, Ɔna Davidɛ,+ omboke kɛtshi!”+ 48 Ko anto efula wakoohangwɛ dia nde mbɔlama, koko nde akaleke mbuta la dui dia wolo ate: “Ɔna Davidɛ, omboke kɛtshi!” 49 Ko Yeso akemala ndo akate ate: “Nyowele, aye.” Ko wakelɛ pami kakɔ kaki tshungu, wawotɛ vate: “Onga la dihonga, emala, nde ekɔ lo kelɛ.” 50 Nde akakasha dihɔndɔ diande dia laadiko, akemala mbala kakɔ ɔtɔi ko akatshu otsha le Yeso. 51 Ko Yeso akawotɛ ate: “Alangayɛ dimi kosalɛ?” Pami kakɔ ka tshungu akawotɛ ate: “Rabɔni,* washo ami wasɛnɛ.” 52 Ko Yeso akawotɛ ate: “Tshɔka, mbetawɔ kayɛ kambokɔkɔnɔla.”+ Ko mbala kakɔ ɔtɔi nde akasɛnɛ+ ndo akatatɛ ndjela Yeso lo mboka.

11 Oma laasɔ, lam’akiwɔ suke la nkoma la Jɛrusalɛma, la Bɛtɛfangɛ ndo la Bɛtaniya,+ lo Dikona di’esongo w’Ɔlivɛ, nde akatome ambeki+ ande 2 2 ko akawatɛ ate: “Nyotshu lo ngelo kɛnanyu la ntondo kengo, ndo kam’ayonyɔtɔ lɔkɔ, nyayotana ɔsɔngɔ wa mponda kele onto atahemaka lɔkɔ okelekami. Kanyokikelekole ko nyu ndja la tɔ lanɛ. 3 Ndo naka onto ambonyombola ate: ‘Lande na kasalanyu ngango?’ kanyowote nyate: ‘Nkumadiɔndjɔ mbele l’ohomba atɔ ndo keema edja, nde ayokikaloya.’” 4 Ɔnkɔnɛ, vɔ wakatshu ko wakatotana ɔsɔngɔ wa mponda okelekami la soko dia luudu lɔmɔtshi, l’andja suke l’otadimbo, ko vɔ wakakikelekola.+ 5 Koko anto amɔtshi l’atei wa wanɛ wakemala laawɔ wakawatɛ ɔnɛ: “Lande na kakelekolanyu ɔsɔngɔ wa mponda ɔnɛ?” 6 Ambeki wakaakadimola woho wakawatɛ Yeso, ko vɔ wakatshike dia vɔ ntshɔ.

7 Ko vɔ wakela Yeso ɔsɔngɔ+ akɔ wa mponda ndo wakahɛ ahɔndɔ awɔ wa laadiko laadiko diatɔ, ko nde akadjasɛ laadiko diatɔ.+ 8 Ndo nto, anto efula wakatalaka ahɔndɔ awɔ wa laadiko lo mboka, koko akina wakahembolaka avundja w’oma l’okonda.+ 9 Wanɛ wakatatshɔka la ntondo kande ndo wanɛ wakayayaka l’ɔkɔngɔ ande wakataka la dui dia wolo vate: “Tambokɔlɔmba, oshimbee!+ Ɔnɛ layaye lo lokombo la Jehowa* atshɔkwame!+ 10 Diolelo dia shɛso Davidɛ+ diayaye diatshɔkwame! Tambokɔlɔmba, oshimbee, wɛ lele laadiko di’elongo!” 11 Ko nde akɔtɔ la Jɛrusalɛma, akatshu lo tɛmpɛlɔ, ndo nde akende kɛnɛ tshɛ kaki lɔkɔ, koko lam’ele wonya aki suke la mbidja, nde akatshu otsha la Bɛtaniya nde la apɔstɔlɔ ande 12.+

12 La wedi a pindju, etena kakawayatombaka oma la Bɛtaniya, nde akoke ndjala.+ 13 Nde akɛnyi osongo wa fingo waki la akatshi oma lo tshalola, ko nde akatshu dia tenda kana ayotana elowa lɔkɔ. Koko lam’akandakome l’osongo akɔ, nde kotana ndooko olowa paka akatshi ato, nɛ dia ɔsɔ komonga eleko k’elowa wa fingo. 14 Ɔnkɔnɛ nde akatɛ osongo akɔ ate: “Onto halɛki elowa ayɛ nto+ pondjo.” Ko ambeki ande wakoke kɛnɛ kakandate.

15 Oma laasɔ, vɔ wakakome la Jɛrusalɛma. Lɛkɔ, nde akɔtɔ lo tɛmpɛlɔ ndo akatshanya wanɛ wakasondjaka ndo wanɛ wakasombaka diangɔ lo tɛmpɛlɔ, ndo akasokola mɛsa w’amengodi wa falanga la ekala wa wanɛ wakasondjaka benga,+ 16 ndo nde kombetawɔ dia kaanga onto latɛmbɛ ɛngɔ kɛmɔtshi tenyanya tɛmpɛlɔ. 17 Nde aketshaka, awatɛ ate: “Shi akafundama ɔnɛ: ‘Luudu lami layelamɛ luudu la dɔmbɛlɔ dikambo dia wedja+ tshɛ’? Koko nyu nyambolietɛ wooko w’apɔtwanyi.”+ 18 Ko ewandji w’ɛlɔmbɛdi la afundji wakoke dikambo sɔ ndo wakatatɛ nyanga woho wa mbodiaka,+ nɛ dia vɔ wakawokaka wɔma, dikambo olui w’anto tshɛ wakaambaka dia wetshelo+ ande.

19 La dikɔlɔ, vɔ wakatombe oma l’osomba. 20 Koko lam’akawatetaka la pindju ka pɛɛ, vɔ wakɛnyi osongo wa fingo wamboshila moma oma ko edio+ awɔ. 21 Petero akohɔ ndo akawotɛ ate: “Rabi,* ohenda, osongo wa fingo wakayadje mananu wamboma!”+ 22 Ko Yeso akaakadimola ate: “Nyonge la mbetawɔ le Nzambi. 23 Lo mɛtɛ kanyotɛmi nte, onto tshɛ layotɛ dikona nɛ ate: ‘Mɔ oma lanɛ, tootambe lo ndjale,’ ko nde bu la taamu l’otema ande koko ekɔ la mbetawɔ dia kɛnɛ katande kayosalema, dikambo diakɔ diayosalema.+ 24 Diakɔ dianyotɛmi nte, diangɔ tshɛ dialɔmbanyu, nyonge la mbetawɔ oko nyamboshila nongola, ko nyayodilongola.+ 25 Ndo etena kemalanyu dia nɔmba, nyodimanyiya onto tshɛ lakanyosalɛ kɔlɔ dia Shɛnyu lele l’olongo nyodimanyiya kɔlɔ+ yanyu.” 26* ——

27 Vɔ wakaye nto la Jɛrusalɛma. Ndo lam’akandatetetaka lo tɛmpɛlɔ, ewandji w’ɛlɔmbɛdi la afundji ndo dikumanyi wakaye 28 ko wakawombola vate: “Oma lo wolo akɔna wasalayɛ akambo anɛ? Kana akakosha wolo wa nsala akambo+ anɛ?” 29 Yeso akawatɛ ate: “Dimi lawɔ lekɔ lo nanga nyoka dimbola dimɔtshi. Naka nyu kadimolami, kete dimi layonyotɛ oma lo wolo akɔna wasalami akambo anɛ. 30 Onde batisimu ka Joani+ kakaye oma l’olongo kana oma le anto? Nyonkadimole.”+ 31 Ko vɔ wakatatɛ nkana yimba lam’asawɔ vate: “Naka sho mbuta ɔnɛ: ‘Oma l’olongo,’ kete nde ayototɛ ate: ‘Ko lande na kakinyu kombeetawɔ?’ 32 Ko onde tayosombɔ mbuta ɔnɛ: ‘Oma le anto’?” Vɔ wakokaka olui w’anto wɔma lam’ele olui w’anto akɔ wakɔsaka mɛtɛ Joani oko omvutshi.+ 33 Ɔnkɔnɛ, vɔ wakakadimola Yeso vate: “Sho hateye.” Yeso akaakadimola ate: “Dimi lawɔ haanyotɛ oma lo wolo akɔna wasalami akambo anɛ.”

12 Oma laasɔ, nde akawatɛ akambo la wɛɛla, ata ate: “Pami kɛmɔtshi akonɛ vinyɔ+ lo ekambɔ kande, akadinge lokombo, akatshime difuku dia ndjamulaka elowa wa vinyɔ, ndo akake tshoto;*+ ko nde akakitshikɛ akambi wa dikambɔ ko akatshu lo wodja okina.+ 2 Lam’akakoke eleko k’elowa mbɛla, nde akatome ose olimu ande ɔmɔtshi le akambi wa dikambɔ dia tɔsa elowa ɛmɔtshi wa vinyɔ le wɔ. 3 Koko vɔ wakawonde, wakɔɔkɔmɔla ndo wakookaloya anyanya. 4 Nde akatome ose olimu ande okina nto le wɔ, ko vɔ wakɔɔkɔmɔla l’ɔtɛ ndo wakawosha nsɔnyi.+ 5 Nde akatome okina nto, ko vɔ wakoodiake. Nde akatome akina efula, koko vɔ wakakɔmɔla amɔtshi ndo wakadiake akina. 6 Nde akatshikala paka la ɔnande+ la ngandji. Nde akayootomaka le wɔ, ata ate: ‘Vɔ wayɔlɛmiya ɔnami.’ 7 Koko akambi wa dikambɔ asɔ wakatanɛ lam’asawɔ vate: ‘Ɔnɛ mbele ɔhɛna.+ Nyoye toodiake kele sango diande kadionge diaso.’ 8 Ko vɔ wakawonde, wakoodiake ndo wakawokasha l’andja w’ekambɔ ka vinyɔ.+ 9 Kakɔna kayosala kanga ekambɔ ka vinyɔ? Nde ayoya, ayoyodiaka akambi wa dikambɔ asɔ ndo ayokimɔ ekambɔ kande le akambi wa dikambɔ akina.+ 10 Onde nyu nyatadiaka afundelo wata ɔnɛ: ‘Dive diakakasha ambiki wa luudu diaya dive dia woke dia tshuku.*+ 11 Dui sɔ ndja oma le Jehowa* ndo diɔ diekɔ dui dia diambo lo washo+ aso’?”

12 Lam’akawoke ngasɔ, vɔ wakayange mbonda, nɛ dia vɔ wakeye ɔnɛ diawɔ mbatɛkɛtande lo wɛɛla, koko vɔ wakokaka olui w’anto wɔma. Ko vɔ wakootshike, wakatshu.+

13 Oma laasɔ, vɔ wakatome Afarisɛ amɔtshi ndo aseka Hɛrɔdɛ le nde dia towonda lo lolemi.+ 14 Lam’akawakome, vɔ wakawotɛ vate: “Ombetsha, sho mbeyaka dia wɛ mbutaka nshi tshɛ mɛtɛ ndo wɛ hayange dia mbetawɔma le onto ɔmɔtshi, nɛ dia wɛ hatendaka ɛnamelo ka l’andja k’anto, koko wɛ mbetshaka mboka ka Nzambi lo mɛtɛ. Onde ekɔ dimɛna* mfuta elambo wa Kayisa w’onto l’onto kana bu? 15 Onde sho pombaka mfuta kana hatohombe mfuta?” Lam’akandeye lɔkɛwɔ lawɔ la dungi pende, nde akawatɛ ate: “Lande na kapembanyu? Nyombela dɛnariyo* dimɔtshi lanɛ kele mende.” 16 Vɔ wakawela dɛnariyo 1, ko nde akawambola ate: “Osato ndo efundelo wele lɔkɔ ɛnɛ waki na wewɔ?” Vɔ wakookadimola vate: “Waki Kayisa.” 17 Oma laasɔ Yeso akawatɛ ate: “Nyosha Kayisa diangɔ dia Kayisa+ ndo nyosha Nzambi diangɔ dia Nzambi.”+ Ko vɔ wakaambe lo dikambo diande.

18 L’etena kɛsɔ, Asadukɛ wanɛ wakataka ɔnɛ eolwelo+ hatonga, wakaye ko wakawombola+ vate: 19 “Ombetsha, Mɔsɛ akatofundɛ dia naka pami kɛmɔtshi ekɔ la ɔnango ko pami kakɔ ambovɔ ndo ambotshika wadɛnde aha la mbota, ɔnango pombaka mbɔsa wadɛnde dia mbolola lohanga la ɔnango.+ 20 Apami 7 w’otema ɔtɔi wakikɔ. Ɔnɛ l’enondo akatshuke wadi ko akavu aha la vɔ mbota. 21 La 2 akatshuke wadi aki ɔnango, koko nde la wɔ akavu aha la vɔ mbota, ndo la 3 woho akɔ waamɛ. 22 Vɔ akɔ 7 kombota la womoto akɔ. Ko l’ekomelo, womoto akɔ akayovɔka. 23 Lo eolwelo, akɔna ayonga omɛnde lam’ele vɔ akɔ 7 wakootshuke?” 24 Yeso akawatɛ ate: “Shi diakɔ dienyu lo dindja, nɛ dia hanyeye oyadi Afundelo kana wolo wa Nzambi?+ 25 Nɛ dia lam’olɔ anto oma lo nyɔi, apami hawotshuke ndo wamato hawotshukama, koko vɔ mongaka oko andjelo wa l’olongo.+ 26 Koko lo dikambo dia eolwelo ka wanɛ wambovɔ, onde nyu nyatadiaka ɔkɔndɔ wakafunde Mɔsɛ lo dikambo dia dikombokombo di’atɛndɛ ɔnɛ Nzambi akawotɛ ate: ‘Dimi kele Nzambi ka Abrahama, Nzambi ka Isaka ndo Nzambi ka Jakɔbɔ’?+ 27 Nde keema Nzambi ka wanɛ wambovɔ, koko ka wanɛ wasɛna. Nyu nyekɔ lo dindja+ di’efula.”

28 Ofundji ɔmɔtshi wakoke sawo diawɔ akaye ndo lam’akandeye dia Yeso akaakadimola dimɛna, nde akawombola ate: “Ɔlɛmbɛ akɔna wele wa ntondo* lo vɔ tshɛ?”+ 29 Yeso akakadimola ate: “Ɔlɛmbɛ wa ntondo ele: ‘Isariyɛlɛ le, ohokame, Jehowa* Nzambi kaso ekɔ ndamɛ Jehowa,* 30 ndo langa Jehowa* Nzambi kayɛ l’otema ayɛ tshɛ, la anima* ayɛ tshɛ, la yimba yayɛ tshɛ ndo la wolo+ ayɛ tshɛ.’ 31 Ɔlɛmbɛ wa 2 vɔ ɔnɛ: ‘Langa wonyayɛ onto oko wayalangayɛ.’+ Ndooko ɔlɛmbɛ woleki wɛsɔ woke.” 32 Ofundji akɔ akawotɛ ate: “Ombetsha, wɛ ambota mɛtɛ. ‘Nde ekɔ Ɔtɔi ndo ndooko okina paka Nde;’+ 33 ndo onto mbolanga la otema ande tshɛ, la yimba yande tshɛ ndo la wolo ande tshɛ ndo nanga wonyande onto oko wayalangande ndeka elambo tshɛ wa lotshumba la elambo+ ekina nɛmɔ.” 34 Lam’akoke Yeso dia nde ambokadimola dimɛna, nde akawotɛ ate: “Wɛ bu etale la Diolelo dia Nzambi.” Ko ndooko onto laki la dihonga dia mbooka dimbola nto.+

35 Koko lam’aketshaka Yeso lo tɛmpɛlɔ, nde akate ate: “Lande na kata afundji vate Kristo ekɔ ɔna Davidɛ?+ 36 L’ekimanyielo ka nyuma k’ekila,+ Davidɛ ndamɛ akate ate: ‘Jehowa* akatɛ Nkumɛmi ate: “Djasɛ lo lonya lami l’omi polo lam’ayomokitsha atunyi ayɛ oko kihona k’ekolo ayɛ.”’+ 37 Davidɛ ndamɛ akawelɛ ɔnɛ Nkumɛmi, ko woho akɔna wende ɔnande?”+

Olui a woke w’anto wakoohokamɛka l’ɔngɛnɔngɛnɔ. 38 Ndo lam’akandetshaka, nde akate ate: “Nyewɔ afundji watolangaka mbeteta l’atei w’anto wɔlɔtshi ekutu ndo watolangaka anto mbasha mɔyɔ lo bingu+ 39 ndo vɔ nangaka mbidjasɛ l’ahole wa ntondo* lo toshinangɔnga ndo l’ahole wa lokumu lo alambo.+ 40 Vɔ watɔlɛka mvudu* ya wadi waki edo ndo vɔ salaka alɔmbɛlɔ w’etale dia ndjaɛnya.* Vɔ wayolongola dilanya dioleki wolo.”*

41 Ko nde akadjasɛ mbɛlanɛ la tɔshɛtɛshɛtɛ ta eombelo*+ ndo akendaka woho wakadjaka elui w’anto falanga lo tɔshɛtɛshɛtɛ ta eombelo, ndo ase ɛngɔnyi efula wakadjaka falanga y’ekenga+ efula. 42 Ko wadi aki odo ɔmɔtshi laki ose wola akaye ko akadje ekenga 2 wa totshitshɛ wa falanga waki la nɛmɔ+ dia tshitshɛ efula.* 43 Ko nde akelɛ ambeki ande ndo akawatɛ ate: “Lo mɛtɛ kanyotɛmi nte, wadi aki odo l’ose wola ɔnɛ ambodja woshasha woleki falanga tshɛ yakadjisha anto akina lo tɔshɛtɛshɛtɛ ta eombelo.+ 44 Nɛ dia anto tshɛ wakadjisha efula oma lo ɔngɔnyi wele la wɔ, koko nde, lo wola* ande akadjisha kɛnɛ tshɛ kaki la nde dia ndjasɛnya.”+

13 Lam’akandatatombaka oma lo tɛmpɛlɔ, ombeki ande ɔmɔtshi akawotɛ ate: “Ombetsha, ohenda, ande ave ndo mvudu+ y’amɛna lee!” 2 Koko Yeso akawotɛ ate: “Onde mvudu ya weke ndjo mbendayɛ? Lo weho akɔ tshɛ, ndooko dive diayotshikala laadiko dia dive aha la kɔshama.”+

3 Lam’akandadjasɛ lo Dikona di’esongo w’Ɔlivɛ, mbɛlɛnganɛ la tɛmpɛlɔ, Petero, Jakɔba, Joani la Andɛlɛ wakawombola lo shɔpɔ vate: 4 “Ototɛ, etena kakɔna kayosalema akambo asɔ, ndo djembetelo yakɔna yayɛnya dia akambo asɔ tshɛ wayanga nkoma l’etena k’ekomelo?”+ 5 Ko Yeso akatatɛ mbatɛ ate: “Nyewɔ, onto atonyonganyiyake.+ 6 Anto efula wayoya lo lokombo lami, wayota ɔnɛ: ‘Dimi kele nde,’ ndo wayonganyiya anto efula. 7 Ndo nto, lam’ayonyoka awui w’ata ndo nkumu y’ata, tanyokake wɔma; akambo asɔ pombaka salema, koko ekomelo kataye.+

8 “Nɛ dia wodja wayɔlɔsha wodja okina ndo diolelo diayɔlɔsha diolelo+ dikina; adidimu wa nkɛtɛ wayonga lo dihole la dihole ndo ndjala ya kasha+ yayoyala. Ɔsɔ ele etatelo k’asui.+

9 “Koko nyu, nyonge la yewo. Anto wayonyokimɔ lo tominadi ta lo ngelo,+ wayonyɔkɔmɔla lo toshinangɔnga+ ndo nyayosamba la ntondo ka waa nguvɛrnɛrɛ la nkumi ya dikanga l’ɔtɛ ami, dia nyu monga ɛmɛnyi le wɔ.+ 10 Ndo nto, lokumu l’ɔlɔlɔ pombaka ntondo+ sambishama lo wedja tshɛ. 11 Ndo lam’ayowonyɔtɔla dia tonyosandja, tanyoyakiyanyake dia kɛnɛ kayonyɔtɛkɛta, koko kɛnɛ tshɛ kayowonyotɛ wonya akɔ, kanyokite, nɛ dia aha nyu mbayɔtɛkɛta, koko nyuma k’ekila.+ 12 Ndo nto, onto ayokimɔ ɔnango dia nde ndjakema, ombutshi wa pami ayokimɔ ɔnande ndo ana wayɔtɔmbɔkwɛ ambutshi awɔ ndo wayowadakisha.+ 13 Ndo anto tshɛ wayonyohetsha l’ɔtɛ wa lokombo+ lami. Koko ɔnɛ layokikɛ* polo l’ekomelo+ mbayoshimbamɛ.+

14 “Koko lam’ayonyɛna ɛngɔ ka wɔnɔnyi katonga elanyelo+ kambemala lo dihole diahakoke ɛngɔ kakɔ memala, (ɔnɛ ladia akambo anɛ onge la shɛnɔdi), l’etena kɛsɔ, wanɛ wele la Judeya kawolawɔ otsha l’akona.+ 15 Onto lele lo tshoto ya luudu atoholɔke ndo atɔtɔke lɔkɔ dia ndjɔsa ɛngɔ tshɛ kele lo luudu lande; 16 ndo onto lele lo ekambɔ atokalolake lɛnɛ ele diangɔ diakandatshike dia ndjɔsa dihɔndɔ diande dia laadiko. 17 Ayonga paa efula le wamato wayonga la waemi ndo wayɔlɔnyaka ana lo nshi shɔ.+ 18 Nyotetemale nɔmba diaha etena kɛsɔ monga lo nshi ya tshitshi; 19 nɛ dia lo nshi shɔ, mfɔnu+ kayoyala woho wahatayalaka oma ko etatelo k’etongelo kakatonge Nzambi polo l’etena kɛsɔ, ndo woho wahayalaki nto.+ 20 Lo mɛtɛ, otondonga Jehowa* kosusa nshi shɔ, tshike ndooko onto lotoshimbamɛ. Koko nde akasuse nshi+ shɔ l’ɔtɛ w’asɔnami wakandasɔnɛ.

21 “L’etena kɛsɔ nto, naka onto ambonyotɛ ate: ‘Eenda, Kristo ekɔ lanɛ,’ kana: ‘Eenda, nde ekɔ lɛnɛ,’ tanyetawɔke dui sɔ.+ 22 Nɛ dia Kristo ya kashi ndo amvutshi wa kashi wayotomba+ ndo wayosala tolembetelo ndo akambo wa diambo dia minganyiya kaanga asɔnami, naka kokaka. 23 Ɔnkɔnɛ nyu, nyɔsɛnake.+ Dimi lambotanyote akambo asɔ tshɛ la ntondo.

24 “Koko lo nshi shɔ, l’ɔkɔngɔ wa mfɔnu kɛsɔ, wonya ayokadimɔ wodjima ndo ngɔndɔ hatosha osase,+ 25 tɔɔtɔ tayɔkɔ oma l’olongo ndo diangɔ dia wolo dia l’olongo diayosutshasutshama. 26 Ko l’etena kɛsɔ, vɔ wayɛna Ɔna onto+ ayaye lo wange la wolo w’efula ndo la lotombo.+ 27 Ko nde ayotoma andjelo, ko vɔ wayotshumanya asɔnami ande kaamɛ oma lo mpɛpɛ 4, oma lo koma mɔtshi ya nkɛtɛ polo lo koma+ nkina y’olongo.

28 “Nyokondja wetshelo oma lo osongo wa fingo. Kam’atondjawɔ sɔngusɔngu yawɔ y’ashashi ndo kam’atondjawɔ akatshi, nyu teyaka nyate eleko k’ɔwɔ kaya suke.+ 29 Woho akɔ waamɛ mbele nyu la wɔ, lam’ayonyɛna akambo asɔ, kanyeye dia nde aya suke, aya ka asoko.+ 30 Lo mɛtɛ kanyotɛmi nte, lɔlɔnga lɔnɛ hateta paka akambo asɔ tshɛ wambosalema.+ 31 Olongo la nkɛtɛ wayeta,+ koko ɛtɛkɛta ami hawetaki pondjo.+

32 “Lo kɛnɛ kendana la lushi kana wonya akɔ, ndooko onto leya, kaanga andjelo wa l’olongo, kaanga Ɔna, paka Papa.+ 33 Nyendake, nyɔsɛnake,+ nɛ dia nyu hanyeye etena kakashikikɛma.+ 34 Ekɔ oko onto latatshu lo wodja okina ko nde ntshika luudu lande ndo mbisha ase olimu+ ande lowandji lo mbisha onto l’onto olimu ande ndo mbutɛ olami wa soko dia nde sungukalaka.+ 35 Ɔnkɔnɛ, nyosungukalake nɛ dia hanyeye etena kayoya+ owandji wa luudu, kana la dikɔlɔ kana l’atei wa deke kana la yosose* kana la pindju+ ka pɛɛ, 36 kele lam’ayondoya la shashimoya, nde atonyotanake nyoladi djɔ.+ 37 Koko kɛnɛ kanyotɛmi, mbatɛmi ndo anto tshɛ nte: Nyosungukalake.”+

14 Oma laasɔ, nshi 2 la ntondo+ ka dambo di’Elekanelo+ ndo ka Fɛtɛ ka mapa waha la wodoya,+ ewandji w’ɛlɔmbɛdi la afundji wakayangaka woho wa mbonda lo mayɛlɛ* ko mbodiaka;+ 2 nɛ dia vɔ wakataka ɔnɛ: “Aha lo fɛtɛ, dikambo lofunge mbeyaka monga l’atei w’anto.”

3 Lam’akalɛka* Yeso la Bɛtaniya lo luudu la Simɔna kanga sudi, womoto ɔmɔtshi akaye la ɔlɔndɔ w’alabatrɛ waki la malashi w’oshinga wolo efula, nardɔ ka dimɛna. Nde akafola ɔlɔndɔ akɔ w’alabatrɛ, ko akatatɛ mbotɛwɔ l’ɔtɛ+ ande. 4 Lam’akawɛnyi dui sɔ, amɔtshi wakatanɛ lam’asawɔ la lonyangu vate: “Lande na kalanyema malashi ɔnɛ? 5 Nɛ dia malashi ɔnɛ wotokoka sondjama lo dɛnariyo* ndekana 300 ko mbisha ase wola falanga yakɔ!” Ko vɔ wakawomalɛ efula.* 6 Koko Yeso akate ate: “Nyootshike ki. Lande na kalanganyu mbokiyanya? Nde ambonsalɛ+ dikambo dia dimɛna. 7 Nɛ dia nyu nyekɔ nshi tshɛ kaamɛ la ase wola+ ndo etena tshɛ kalanganyu, nyu kokaka mbasalɛ ɔlɔlɔ, koko dimi hantongaka la nyu nshi tshɛ.+ 8 Nde ambosala kɛnɛ kakandakoki nsala, nde ambotate demba diami malashi dia nɔngɔsɔla okundelo+ ami. 9 Lo mɛtɛ kanyotɛmi nte, l’ahole tshɛ wa l’andja+ w’otondo wayosambishama lokumu l’ɔlɔlɔ lɔnɛ, wayotaka ndo dikambo diambosala womoto ɔnɛ dia mboohɔka.”+

10 Ko Judasɛ Iskariyɔtɛ, ɔtɔi ɔmɔtshi wa l’atei w’apɔstɔlɔ 12 akatshu le ewandji w’ɛlɔmbɛdi dia tofunga Yeso le wɔ.+ 11 Lam’akawoke kɛnɛ kakandawatɛ, vɔ wakangɛnangɛna ndo wakoolake dia mbosha falanga ya mfɛsa.+ Ko nde akatatɛ nyanga diaaso dia dimɛna dia mbofunga.

12 Oma laasɔ, lushi la ntondo la Mapa waha la wodoya,+ etena kakawalambolaka olambo w’Elekanelo,+ ambeki ande wakawombola vate: “Lende alangayɛ sho tokɔlɔngɔsɔlɛ dia wɛ tɔlɛ dambo di’Elekanelo?”+ 13 Ko nde akatome ambeki ande 2 ndo akawatɛ ate: “Nyotshu l’osomba, nyayohomana la pami kɛmɔtshi ayɛmbɛ mbaka k’ashi. Kanyooyele,+ 14 ndo lo dihole tshɛ diayondɔtɔ, kanyotee kanga luudu nyate: ‘Ombetsha kata ate: “Lende ele luudu l’angɛndangɛnda lakokami ndɛ dambo di’Elekanelo la ambeki ami?”’ 15 Ko nde ayonyɛnya luudu la woke la la diko lele la diangɔ ndo lakoka. Kanyolilɔngɔsɔlɛ dikambo diaso.” 16 Ko ambeki ande wakatshu, wakɔtɔ l’osomba ndo wakatane paka oko wakandawatɛ, ko vɔ wakalɔngɔsɔla dambo di’Elekanelo.

17 La dikɔlɔ, nde akaye kaamɛ la apɔstɔlɔ ande 12.+ 18 Ndo lam’akawadjasɛ la mɛsa, Yeso akate ate: “Lo mɛtɛ kanyotɛmi nte, ɔmɔtshi l’atei anyu lalɛ kaamɛ la mi ayomfunga.”+ 19 Vɔ wakatatɛ monga la lonyangu ndo onto l’onto akawombola ɔnɛ: “Onde dimi?” 20 Nde akawatɛ ate: “Ɔmɔtshi l’atei w’apɔstɔlɔ 12, ɔnɛ ladja la mi lonya lo dɔnga.+ 21 Nɛ dia Ɔna onto ayanga minyɛma oko wakadiafundama lo dikambo diande, koko mananu le ɔnɛ layofunga+ Ɔna onto! Otoleka dimɛna aha onto ɔsɔ mbotɔ.”+

22 Lam’akawatetemalaka ndɛ, nde akɔshi mapa, akasale dɔmbɛlɔ ndo akoohembola ko akawasha, ata ate: “Nyowɔshi. Mapa ɔnɛ wekɔ didjidji dia demba+ diami.” 23 Ndo nde akɔshi dikɔhɔ, akoke losaka ndo akawasha ko vɔ tshɛ wakanɔ.+ 24 Ko nde akawatɛ ate: “Diɔ diekɔ didjidji dia ‘dikila+ dia sheke’+ diami diayotshulɔma lo wahɔ w’anto efula.+ 25 Lo mɛtɛ dimi lambonyotɛ nte hanɔki vinyɔ nyɛ nto polo lushi layomɔnɔ vinyɔ y’oyoyo lo Diolelo dia Nzambi.” 26 L’ekomelo, l’ɔkɔngɔ wa vɔ memba esambo wa lotombo, vɔ wakatshu otsha lo Dikona di’esongo w’Ɔlivɛ.+

27 Ko Yeso akawatɛ ate: “Nyu tshɛ nyayotakana, nɛ dia akafundama ate: ‘Dimi layodiaka olami w’ɛkɔkɔ+ ko ɛkɔkɔ wayodiangana.’+ 28 Koko l’ɔkɔngɔ wa dimi mbolɔ, layotshɔ la ntondo kanyu la Ngalileya.”+ 29 Ko Petero akawotɛ ate: “Oyadi kaanga anto akina tshɛ wayotakana, dimi hantotakana.”+ 30 Ko Yeso akawotɛ ate: “Lo mɛtɛ kakotɛmi nte: Ɛlɔ, eelo, l’otsho ɔnɛ, la ntondo ka nkɔkɔ mbeka mbala 2, wɛ ayomanguna mbala 3.”+ 31 Koko Petero akate l’eshikikelo tshɛ ate: “Oyadi kaanga ɔnɛ dimi pombaka mvɔ la yɛ, dimi hakangunaki pondjo.” Ambeki akina tshɛ vɔ lawɔ wakate woho akɔ waamɛ.+

32 Oma laasɔ, vɔ wakakome lo dihole dielɛwɔ Ngɛtɛsɛmanɛ ko nde akatɛ ambeki ande ate: “Nyodjasɛ lanɛ, dimi tokotɔlɔmba.”+ 33 Ko nde akɔshi Petero, Jakɔba la Joani ko wakatshu.+ Oma laasɔ, nde akatatɛ monga la lonyangu l’efula* ndo nkiyana efula. 34 Nde akawatɛ ate: “Dimi* lekɔ la lonyangu l’efula+ polo lo nyɔi. Nyotshikale lanɛ ndo nyɔsɛnake.”+ 35 Ko nde akatshu yema tshalola, akayakɔsha la nkɛtɛ ndo akatatɛ nɔmba dia naka kokaka etenyi ka wonya kɛsɔ mbaanganɛ. 36 Ko nde akate ate: “Aba,* Papa,+ lam’ele wɛ kokaka nsala akambo tshɛ, ominye dikɔhɔ nɛ. Kele aha oko walangami, koko oko walangayɛ.”+ 37 Nde akakalola ko akaatane walala djɔ, ko nde akatɛ Petero ate: “Simɔna, wɛ ekɔ lo ndala djɔ? Wɛ hongi la wolo wa nsungukala la mi kaanga wonya wa ntango ɔtɔi?+ 38 Nyosungukale ndo nyotetemale nɔmba diaha nyu nkɔ l’ehemba.+ Otema nangaka,* koko demba mbele wɔdu.”+ 39 Ko nde akatshu nto ndo akatɔlɔmba, ata awui akɔ waamɛ.+ 40 Nde akakalola nto ko akayatana walala djɔ nɛ dia washo awɔ waki wotsho, ko vɔ kombeya kɛnɛ ka mbokadimola. 41 Nde akakalola mbala ka 3 ndo akawatɛ ate: “L’etena ka nganɛ, ko nyekɔ lo ndala ndo nyekɔ lo momuya! Ambokoka, wonya ambokoka!+ Nyolonge, Ɔna onto ayanga kimɔma l’anya w’atshi wa pɛkato. 42 Nyonee, nyoyete totshu. Ofungi ami aya suke la nkoma.”+

43 Oshimu kele edja, kam’akandatɛkɛtaka, Judasɛ, ɔmɔtshi l’atei w’apɔstɔlɔ 12 akaye kaamɛ l’olui w’anto, wanɛ la tokuwa ta ta, akina la tokalemba wakatomama oma le ewandji w’ɛlɔmbɛdi, afundji ndo dikumanyi.+ 44 Ofungi ande akawasha djembetelo ate: “Onto layoshana la mi bizɛ, kete nde; kanyowonde ndo kanyoolame dimɛna.” 45 Ko Judasɛ akatshu otsha le Yeso ndo akate ate: “Rabi!” ko nde akawosha bizɛ la wɔlamu. 46 Ɔnkɔnɛ, vɔ wakawokimɛ ndo wakawonde. 47 Koko, ɔmɔtshi l’atei w’anto wakemala laawɔ akasɔmɔla lokuwa lande, akakɔtɛ ose olimu wa ɔlɔmbɛdi a laadiko ndo akoohembola toyi.+ 48 Ko Yeso akawatɛ ate: “Onde nyu nyamboya dia ndjominda la tokuwa ta ta ndo la tokalemba oko anto walanga minda ɔpɔtwanyi?+ 49 Lushi la lushi, dimi laki kaamɛ la nyu letsha+ lo tɛmpɛlɔ, koko nyu komindami. Ɔnkɔnɛ, akambo anɛ tshɛ wambosalema dia Afundelo+ kotshama.”

50 Ko ambeki tshɛ wakootshike ndo wakalawɔ.+ 51 Koko, ɔlɔngɔ a pami ɔmɔtshi wakalɔtɛ paka dihɔndɔ dia linɛnɛ la dimɛna akayawoyelaka oma lo tshalola ko wakalange mbonda, 52 koko nde akatshike dihɔndɔ diande dia linɛnɛ, ko akalawɔ otakataka.*

53 Vɔ wakatshu la Yeso le ɔlɔmbɛdi a laadiko,+ ko ewandji w’ɛlɔmbɛdi tshɛ la dikumanyi ndo afundji wakasangana.+ 54 Koko Petero akayawoyelaka lo tshalola polo lo sɛkɛ dia ɔlɔmbɛdi a laadiko; ndo nde akadjasɛ kaamɛ l’ase olimu, ooka dja.+ 55 L’etena kɛsɔ, ewandji w’ɛlɔmbɛdi la ase tominadi ta laadiko t’ase Juda tshɛ wakayangaka anto wakakoke nsɔngwɛ Yeso dia vɔ mbodiaka, koko vɔ kotana ndooko onto.+ 56 Lo mɛtɛ, anto efula wakɔɔsɔngwɛka+ akambo wa kashi, koko vɔ kosanga lolemi lo kɛnɛ kakawofundaka. 57 Ndo nto, anto amɔtshi wakemala ndo wakɔɔsɔngwɛ akambo wa kashi, wata vate: 58 “Takawoke ata ate: ‘Layonyukola tɛmpɛlɔ kakakama l’anya kɛnɛ, ko lo nshi 3 dimi layoka tɛmpɛlɔ kekina kahatokama l’anya.’”+ 59 Koko kaanga anto wakɔɔsɔngwɛ akambo asɔ kosanga lolemi.

60 Oma laasɔ, ɔlɔmbɛdi a laadiko akemala ndo akambola Yeso ate: “Onde wɛ hakadimola ndooko dui? Kɛnɛ kata anto anɛ lo dikambo diayɛ+ kɛsɔ, ngande wetɔ?” 61 Koko nde akatshikala ki, kokadimola ndooko dui.+ Ko ɔlɔmbɛdi a laadiko akawombola nto ate: “Onde wɛ mbele Kristo, Ɔna Ɔtshɔkwami?” 62 Oma laasɔ Yeso akate ate: “Eelo, ndo nyu nyayɛna Ɔna onto+ odjashi lo lonya l’omi+ la wolo ndo ayaye la wange wa l’olongo.”+ 63 Ko ɔlɔmbɛdi a laadiko akatshatsha ahɔndɔ ande ndo akate ate: “Ɛmɛnyi akɔna waakatayange nto?+ 64 Nyamboka woho watɛngande Nzambi. Atanyu?”* Vɔ tshɛ wakate dia nde pombaka ndjakema.+ 65 Ndo amɔtshi wakatatɛ mbotɛ+ nsɔyi, wakookombe elungi, wakɔɔkɔmɔla akɔfi ndo wakawotɛ vate: “Naka wɛ ekɔ omvutshi, otote ɔnɛ lokɔkɔmɔdi!” Ndo l’ɔkɔngɔ wa vɔ mbɔkɔmɔla mbala l’elungi, alami wakatshu la nde.+

66 Lam’aki Petero l’ɛse lo sɛkɛ dia lokombo, womoto ɔmɔtshi laki ose olimu waki ɔlɔmbɛdi a laadiko akaye.+ 67 Lam’akandɛnyi Petero ooka dja, nde akawende tɛɛ ko akate ate: “Ndo wɛ mbaki la Yeso nyɛ y’ose Nazarɛtɛ.” 68 Koko nde akanguna, ata ate: “Dimi haaweye ndo haloke kɛnɛ katayɛ kɛsɔ.” Ko nde akatombe otsha lo ɛɔtwɛlɔ.* 69 Lam’akawɛnyi ose olimu akɔ wa womoto lɛkɔ, nde akatɛ anto wakemala laawɔ nto ate: “Ɔnɛ ekɔ ɔmɔtshi la l’atei awɔ.” 70 Ko nde akanguna nto. Ndo mbala kekina nto, l’ɔkɔngɔ wa tshanda mɔtshi, wanɛ wakemala laawɔ wakatɛ Petero vate: “Lo mɛtɛ, wɛ ekɔ ɔmɔtshi la l’atei awɔ, nɛ dia wɛ ekɔ ose Ngalileya.” 71 Koko nde akatatɛ ndjadja mananu ndo akatshibe ate: “Dimi handeye onto latanyu ɔsɔ!” 72 Mbala kakɔ ɔtɔi nkɔkɔ kakeke mbala ka 2,+ ko Petero akohɔ kɛnɛ kakawotɛ Yeso ate: “La ntondo ka nkɔkɔ mbeka mbala 2, wɛ ayomanguna mbala 3.”+ Ko nde akasongotɔ ndo akatatɛ ndela.

15 Mbala kakɔ ɔtɔi la yosose, ewandji w’ɛlɔmbɛdi la dikumanyi ndo afundji kaamɛ la ase tominadi ta laadiko t’ase Juda wakɔtwɛ Yeso sheke, wakookeleka ko wakookimɔ le Pilato.+ 2 Ko Pilato akawombola ate: “Onde wɛ kele Nkumekanga k’ase Juda?”+ Ko nde akakadimola ate: “Wɛmɛ ɔsɔ adita.”+ 3 Koko ewandji w’ɛlɔmbɛdi wakɔɔsɔngwɛ akambo efula. 4 Ɔnkɔnɛ, Pilato akatatɛ mbombola nto ate: “Wɛ hakadimola ndooko dui?+ Oholonga efula k’akambo wakɔsɔngwɛwɔ.”+ 5 Koko Yeso kokadimola ndooko dui, ko Pilato akaambe.+

6 Lo fɛtɛ la fɛtɛ, nde aki la mbekelo ka mbatshungolɛ ose lokanu ɔmɔtshi lakawalɔmbaka.+ 7 L’etena kɛsɔ, onto ɔmɔtshi lakawelɛka Barabasɛ aki lo lokanu nde l’asekande w’atɔmbɔki wele oma l’ɔtɔmbɔkwɛlɔ awɔ, vɔ wakadiake onto. 8 Ɔnkɔnɛ, olui w’anto wakaye ko wakatatɛ nɔmba dia Pilato mbasalɛ oko wakandaasalɛka. 9 Pilato akawatɛ ate: “Onde nyu nangaka dimi nyotshungolɛ Nkumekanga k’ase Juda?”+ 10 Nɛ dia nde akeyaka dia ewandji w’ɛlɔmbɛdi wakakimɔ+ Yeso l’ɔtɛ wa kandjema. 11 Koko ewandji w’ɛlɔmbɛdi wakatshutshuya olui w’anto dia vɔ nɔmba dia nde mbatshungolɛ paka+ Barabasɛ. 12 Ko Pilato akawambola nto ate: “Ko ayomosala la ɔnɛ lelɛnyu ɔnɛ Nkumekanga k’ase Juda?”+ 13 Vɔ wakate nto la dui dia wolo vate: “Hanɛnde l’otamba!”*+ 14 Ko Pilato akawambola ate: “Lande na? Kɔlɔ kakɔna kosadinde?” Koko vɔ wakatetemala mpangɔhangɔ vate: “Hanɛnde l’otamba!”*+ 15 Dia ngɛnyangɛnya olui w’anto, Pilato akaatshungolɛ Barabasɛ ndo l’ɔkɔngɔ wa nde nkɔmamisha+ Yeso, nde akawashande dia vɔ toodiaka l’otamba.+

16 Ɔnkɔnɛ, asɔlayi wakatshu la nde lo sɛkɛ, mbuta ate laka nguvɛrnɛrɛ, ko vɔ wakelɛ olui tshɛ w’asɔlayi dia vɔ nsangana.+ 17 Ko vɔ wakɔɔlɔtsha dihɔndɔ di’ebelabela ndo wakasale lofulɛ l’atɛndɛ, ko wakɔɔlɔtshalɔ; 18 ko vɔ wakatatɛ mbosha mɔyɔ vate: “Nkumekanga k’ase Juda, he mɔyɔ!”*+ 19 Ndo nto, vɔ wakɔɔkɔmɔla etenyi k’osongo l’ɔtɛ, wakawotɛ nsɔyi ndo wakake adwe ndo wakookusamɛ.* 20 L’ekomelo, l’ɔkɔngɔ wa vɔ mbɔsɔka, vɔ wakookolola dihɔndɔ diakɔ di’ebelabela ndo wakɔɔlɔtsha ahɔndɔ ande wa laadiko. Ko wakatshu la nde dia tɔɔkɔkɔla nsɛti l’otamba.+ 21 Ndo nto, vɔ wakɔshi la wolo pami kɛmɔtshi kelɛwɔ Simɔna, ose Kurɛnɛ she Alɛksandɛrɛ nde la Rufusɛ lakayetaka oma lo ekambɔ dia nde mbokimanyiya la mɛmba otamba ande w’asui.*+

22 Ɔnkɔnɛ, vɔ wakatshu la nde lo dihole dielɛwɔ ɔnɛ Gɔlgɔta, kitshimudi ate: “Dihole dia Lowako.”+ 23 Lɛkɔ, vɔ wakawosha wanu wakawasanganya la edjoyadjoya kelɛwɔ mirɛ,+ koko nde kɔnɔ. 24 Ko vɔ wakɔɔkɔkɔla nsɛti l’otamba ndo wakoke owale dia nkahana+ ahɔndɔ ande wa laadiko. 25 Lo wonya wa 3* mbakawɔɔkɔkɔla nsɛti l’otamba. 26 Ko wakahanɛ la diko diande efundelo wa kɛnɛ kakawofunde ɔnɛ: “Nkumekanga k’ase Juda.”+ 27 Ndo nto, vɔ wakahanɛ apɔtwanyi 2 l’etamba kaamɛ la nde, ɔmɔtshi lo lonya lande l’omi ndo okina lo lonya lande la lɔmɔsɔ.+ 28 *—— 29 Ko ambetshetshi wakatɛkɛta kɔlɔ lo dikambo diande, wanyinginya ɛtɛ+ ndo wata vate: “Wɛ lakalangaka mbitola tɛmpɛlɔ ko kika lo nshi 3+ le, 30 oyashimbɛka wɛmɛ lo mpolɔ oma l’otamba w’asui!”* 31 Woho akɔ waamɛ mbele, ewandji w’ɛlɔmbɛdi kaamɛ la afundji wakɔɔsɔkaka lam’asawɔ, wata vate: “Nde akashimbɛka anto akina, ko nde hakoke ndjashimbɛ ndamɛ!+ 32 Kristo, Nkumekanga k’Isariyɛlɛ aholɔke wonya ɔnɛ oma l’otamba w’asui* kele tɛnyi ndo towetawɔ.”+ Ndo wanɛ wakahanema suke la nde l’etamba wakɔɔtɛngaka.+

33 Lam’akakoke wonya wa 6,* wodjima wakayala polo lo wonya wa 9*+ lo wodja w’otondo. 34 Ndo lam’akakoke wonya wa 9, Yeso akate la dui dia wolo ate: “Eli, Eli, lama sabakatani?” kitshimudi ate: “Nzambi kami le, Nzambi kami le, lande na kamboyɔnsɛka?”+ 35 Lam’akoke anto amɔtshi wakemala suke la laawɔ dui sɔ, vɔ wakate vate: “Ohonyolonga, nde ekɔ lo mbelɛ Elidja!” 36 Ko onto ɔmɔtshi akalawɔ, akɔshi dimbo, akatambiya lo wanu w’okayi, akadihakɛ lo lɔsɔlɔ ndo akawosha dia nde nnɔ,+ ata ate: “Nyootshike mɛ! Nyotshike tende kana Elidja ayoya dia ndjooholoya.” 37 Ko Yeso akade kioko ndo akakitshiya lomu.*+ 38 Dihɔndɔ di’okombɔ diaki lo tɛmpɛlɔ k’ekila+ diakatɛ lo 2, oma la diko polo l’ɛse.+ 39 Lam’akɛnyi owandji w’asɔlayi wakemala laawɔ akambo wakatombe lam’akakitshiya Yeso lomu, nde akate ate: “Pami kɛnɛ mɛtɛ aki Ɔna Nzambi.”+

40 Ndo wamato amɔtshi wakendaka oma lo tshalola. L’atei awɔ mbaki ndo Mariya w’ose Mangadala, Mariya wa nyango Jakɔba ya dikɛnda la Jɔsɛ ndo Salɔme.+ 41 Vɔ mbakatawotshindɛka ndo mbakatawokimanyiyaka+ lam’akinde la Ngalileya ndo wamato akina efula wakaye kaamɛ la nde oma la Jɛrusalɛma.

42 Lam’ele laasɔ ko wonya aya otsha lo dikɔlɔ, ndo lushi lakawasalaka Ɛlɔngɔswɛlɔ, mbuta ate lushi 1 la ntondo ka lushi la Sabato, 43 Yɔsɛfu y’ose Arimateya laki ose tominadi ta laadiko t’ase Juda lakeyamaka efula akaye. Nde lawɔ akakongaka Diolelo dia Nzambi. Nde akatshu le Pilato la dihonga tshɛ ko akɔɔlɔmbɛ odo wa Yeso.+ 44 Koko Pilato akayambolaka dia kana nde amboshila mvɔ, ko Pilato akelɛ owandji w’asɔlayi ndo akawombola dia kana Yeso amboshila mvɔ. 45 Ɔnkɔnɛ, l’ɔkɔngɔ w’owandji w’asɔlayi akɔ mboshikikɛ, nde akasha Yɔsɛfu odo. 46 Ko Yɔsɛfu akasombe ahɔndɔ wa linɛnɛ la dimɛna, akaholoya odo wa Yeso, akawɔmbɛ la ahɔndɔ wa linɛnɛ la dimɛna ndo akatowodja lo diombo*+ diakatshimama lo wooko wa dive; ko nde akangitola dive polo la soko dia diombo.+ 47 Koko Mariya w’ose Mangadala ndo Mariya wa nyango Jɔsɛ wakatetemalaka menda dihole diakawokitsha.+

16 L’ɔkɔngɔ wa Sabato,+ Mariya w’ose Mangadala, Mariya+ wa nyango Jakɔba la Salɔme wakasombe diangɔ di’opumu dia totɛ odo+ wa Yeso. 2 Ko pindju ka lushi la ntondo la lo lomingu, etena kakatombe wonya, vɔ wakatshu otsha la diombo.*+ 3 Vɔ wakatambɔnaka vate: “Onto akɔna ayototongitolɛ dive oma lo soko dia diombo?” 4 Koko, lam’akawende la ntondo, vɔ wakɛnyi dia dive diakangitwe kaanga mbakidiɔ woke efula.+ 5 Lam’akawɔtɔ lo diombo, vɔ wakɛnyi ɔlɔngɔ a pami ɔmɔtshi odjashi lo lonya l’omi, ɔlɔtshi okutu wa wɛma, ko vɔ wakaambe efula. 6 Ɔlɔngɔ a pami akɔ akawatɛ ate: “Tanyambake.+ Nyekɔ lo nyanga Yeso y’ose Nazarɛtɛ lakawadiake l’otamba. Nde akolwe.+ Nde bu lanɛ. Nyende dihole diakawokitsha+ diɔ nɛ. 7 Nyotshu, nyotote ambeki ande ndo Petero nyate: ‘Nde ambeta la ntondo kanyu otsha la Ngalileya.+ Nyu nyayotowɛna lɛkɔ oko wakandanyotɛ.’”+ 8 Ɔnkɔnɛ lam’akawatombe, vɔ wakalawɔ oma la diombo, wayasake lokomba ndo wele l’ɔngɛnɔngɛnɔ w’efula. Vɔ kombutɛ ndooko onto dikambo sɔ, nɛ dia vɔ wakokaka wɔma.*+