LOKUMU L’ƆLƆLƆ LAKAFUNDE JOANI
1 Dui+ diakikɔ l’etatelo, Dui diaki kaamɛ la Nzambi+ ndo Dui diakikɔ nzambi.*+ 2 Nde akikɔ l’etatelo kaamɛ la Nzambi. 3 Diangɔ tshɛ diakatongama lo tshimbo yande+ ndo ndooko ɛngɔ kakatongama aha l’ekimanyielo kande.
Kɛnɛ kakatongama 4 lo tshimbo yande kaki lɔsɛnɔ ndo lɔsɛnɔ laki osase w’anto.+ 5 Ndo osase wekɔ lo mpɛta lo wodjima,+ koko wodjima haleki osase wolo.
6 Onto ɔmɔtshi akatomama oko onyimpala waki Nzambi; lokombo lande Joani.+ 7 Onto ɔsɔ akaye oko ɔmɛnyi dia ndjosambisha akambo wendana l’osase+ dia weho w’anto tshɛ monga la mbetawɔ lo tshimbo yande. 8 Nde komonga osase+ ɔsɔ, koko nde akaye dia ndjosambisha akambo wendana l’osase akɔ.
9 Osase wa mɛtɛ wangamulɛ weho w’anto tshɛ osase waki suke la ndja l’andja.+ 10 Nde akikɔ l’andja+ ndo andja wakatongama lo tshimbo yande,+ koko andja kombeeya. 11 Nde akaye lo ngelo kande, koko ase ngelo kande kombeetawɔ. 12 Wanɛ tshɛ wakoolongola, nde akawasha wolo wa monga ana wa Nzambi,+ nɛ dia vɔ waki la mbetawɔ lo lokombo lande.+ 13 Ndo vɔ kombotɔ oma lo dikila kana oma lo lolango la demba kana oma lo lolango l’onto, koko oma le Nzambi.+
14 Ɔnkɔnɛ Dui diakayoyala onto,+ diakayodjasɛ l’atei aso ndo takɛnyi lotombo lande, lotombo lele oko la ɔna ɛtɔi lakotama+ oma le she ndo nde akahomɔ lokolo l’ɔlɔ* lo washo wa Nzambi ndo akalodiama la mɛtɛ. 15 (Joani akasambisha akambo wendana la nde, eelo, Joani akadaka ombeka ate: “Nde mbakate lo dikambo diande nte: ‘Ɔnɛ layaye l’ɔkɔngɔ ami aki la ntondo kami dikambo nde akasɛnaka la ntondo kami.’”)+ 16 Nɛ dia oma l’ɔlɔlɔ ande w’efula, nde ekɔ lo tosalɛ sho tshɛ ɔlɔlɔ waheyama mbɛdika laadiko di’ɔlɔlɔ waheyama mbɛdika. 17 Lam’ele Ɛlɛmbɛ wakashama lo tshimbo ya Mɔsɛ,+ ɔlɔlɔ waheyama mbɛdika+ ndo akambo wa mɛtɛ wakaye lo tshimbo ya Yeso Kristo.+ 18 Ndooko onto lakɛnyi Nzambi;+ paka nzambi ɔtɔi kakootama+ kele suke*+ la She kakatolembetshiya woho Wende.+
19 Nganɛ mbakakadimola Joani lam’akatome ase Juda ɛlɔmbɛdi ndo ase Lɛwi oma la Jɛrusalɛma dia towombola ɔnɛ: “Wɛ eeyɛ?”+ 20 Nde kotona nkadimola, koko akawatɛ hwe ate: “Dimi keema Kristo.” 21 Ko vɔ wakawombola vate: “Ko eeyɛ? Onde Elidja?”+ Nde akakadimola ate: “Dimi bu Elidja.” “Onde omvutshi+ keyɛ?” Nde akakadimola ate: “Keema!” 22 Ɔnkɔnɛ, vɔ wakawombola vate: “Wɛ na? Otote kele kateye woho wa tokadimola wanɛ wakatotome. Atayɛ, eeyɛ?” 23 Nde akate ate: “Dimi lekɔ dui di’onto ɔmɔtshi lada ombeka l’oswe ɔnɛ: ‘Nyosembole+ mboka ka Jehowa,’* oko wakate omvutshi Isaya.”+ 24 Afarisɛ mbakaatome. 25 Ko vɔ wakawombola vate: “Ko lande na kabatizayɛ anto naka wɛ bu Kristo kana Elidja kana Omvutshi?” 26 Joani akaakadimola ate: “Dimi lekɔ lo batiza anto l’ashi. Onto lahanyeye ekɔ l’atei anyu, 27 nde kayaye l’ɔkɔngɔ ami, koko dimi haasungana nkelekola+ kaanga ɛkɔdi wa sabata yande.” 28 Akambo asɔ wakasalema la Bɛtaniya, la wedi wa Jɔrdana lɛnɛ akabatizaka+ Joani anto.
29 La wedi a pindju, nde akɛnyi Yeso ayaye oya le nde ko nde akate ate: “Enda Ɔna Ɔkɔkɔ+ wa Nzambi ɔnɛ lanya pɛkato+ ya l’andja!+ 30 Lo dikambo diande kakamate nte: ‘Ɔnɛ layaye l’ɔkɔngɔ ami akete la ntondo kami, nɛ dia nde akasɛnaka la ntondo kami.’+ 31 Kaanga dimi kombeeya, koko ɔkɔkɔ wakamaye ndjobatiza anto l’ashi ele dia ndjoweyanya le ase Isariyɛlɛ.”+ 32 Joani akate nto ate: “Dimi lakɛnyi nyuma kayaholɔ oma l’olongo oko fudu k’enga ndo tɔ kakayotshikala le nde.+ 33 Kaanga dimi kombeeya, koko Ɔnɛ lakantome dia ndjobatiza anto l’ashi akambutɛ ate: ‘Onto tshɛ layoyɛna nyuma kayaholɔ ko tɔ ndjotshikala+ le nde, nde kayobatiza anto la nyuma k’ekila.’+ 34 Dimi lakakiɛnyi ndo lakasanya dia nde ekɔ Ɔna Nzambi.”+
35 La wedi a pindju nto, Joani akemala nde la ambeki ande 2, 36 ndo lam’akandɛnyi Yeso atete, nde akate ate: “Enda Ɔna Ɔkɔkɔ+ wa Nzambi!” 37 Lam’akoke ambeki ande 2 kɛnɛ kakandate, vɔ wakayele Yeso. 38 Ko Yeso akɛwɔ ndo lam’akandawaɛnyi wayawoyele, nde akawambola ate: “Ayanganyu?” Vɔ wakawotɛ vate: “Rabi, (kitshimudi ate, “Ombetsha”), lende ohangiyɛ?” 39 Nde akawatɛ ate: “Nyoye, nyoyende.” Ko vɔ wakatshu ndo wakatɛna lɛnɛ akandahange ndo wakatshikala la nde lushi lɔsɔ. Aki oya lo wonya wa 10.* 40 Andɛlɛ+ w’ɔnango Simɔna Petero aki ɔtɔi ɔmɔtshi l’atei w’ambeki 2 asɔ wakoke kɛnɛ kakate Joani ndo wakayele Yeso. 41 Nde akatshu ntondo le Simɔna ɔnango ndo akawotɛ ate: “Tambɛna Mɛsiya”+ (kitshimudi ate, “Kristo”), 42 Nde akatshu la nde le Yeso. Lam’akawɛnyi Yeso, nde akawotɛ ate: “Wɛ Simɔna+ ɔna Joani, wɛ ayelamɛka Kɛfasi” (kitshimudi ate “Petero”).+
43 La wedi a pindju, lam’akandalange ntshɔ la Ngalileya, Yeso akɛnyi Filipɛ+ ndo akawotɛ ate: “Ondjele.” 44 Filipɛ aki ose Bɛtɛsayida, osomba wa Andɛlɛ la Petero. 45 Filipɛ akɛnyi Natanayɛlɛ+ ndo akawotɛ ate: “Tambɛna ɔnɛ lele Mɔsɛ akate lo Ɛlɛmbɛ ndo amvutshi wakafunde dikambo diande, mbuta ate Yeso y’ose Nazarɛtɛ, ɔna Yɔsɛfu.”+ 46 Koko Natanayɛlɛ akawombola ate: “Onde dikambo di’ɔlɔlɔ koka ntomba oma la Nazarɛtɛ?” Filipɛ akawotɛ ate: “Yaka, yende.” 47 Yeso akɛnyi Natanayɛlɛ ayaye oya le nde ndo akate lo dikambo diande ate: “Nyende ose Isariyɛlɛ la mɛtɛ lele bu la lokeso+ kaanga yema.” 48 Natanayɛlɛ akawombola ate: “Ngande wambeyayɛ?” Yeso akookadimola ate: “La ntondo ka Filipɛ kelɛ, etena kakiyɛ l’ɛse k’osongo wa fingo, dimi lakakɛnyi.” 49 Natanayɛlɛ akookadimola ate: “Rabi, wɛ ekɔ Ɔna Nzambi, wɛ ekɔ Nkumekanga ka Isariyɛlɛ.”+ 50 Yeso akookadimola ate: “Wɛ ambetawɔ dikambo lambokotɛ nte, lakakɛnyi l’ɛse k’osongo wa fingo? Wɛ ayɛna akambo woleki wanɛ weke.” 51 Oma laasɔ nde akawotɛ ate: “Lo mɛtɛ kanyotɛmi nte, nyu nyayɛna olongo wadihɔ ndo andjelo wa Nzambi wadɛ ndo waholɔ oya le Ɔna onto.”+
2 Lushi la 3 oma laasɔ, fɛtɛ kɛmɔtshi ka diwala kakasalema la Kana ka la Ngalileya ndo nyango Yeso aki laawɔ. 2 Yeso la ambeki ande wakelamɛ lo fɛtɛ kakɔ ka diwala.
3 Lam’akashile wanu, nyango Yeso akawotɛ ate: “Vɔ bu la wanu.” 4 Koko Yeso akawotɛ ate: “Womoto, dikambo sɔ atendadiɔ dimi la yɛ?* Wonya ami watakoke.” 5 Nyango akatɛ wanɛ wakakahanyaka diangɔ ate: “Kanyosale kɛnɛ tshɛ kayondonyotɛ.” 6 Mbaka 6 y’ave yaki laawɔ oko wakalɔmbaka ɛlɛmbɛ w’ase Juda+ wendana la wɛdiamelo. Mbaka la mbaka kakɔtɔka tɛdikɔ* 2 kana 3 ta diangɔ di’ɔkɛlɛngɔ. 7 Yeso akawatɛ ate: “Nyolodia ashi lo mbaka yakɔ.” Ko vɔ wakayilodia polo l’enyɔ. 8 Ko nde akawatɛ ate: “Nyɔshi yema, nyɔtɔlɛ ɔnɔmbɔdi wa fɛtɛ.” Ko vɔ wakɔɔtɔlɛ. 9 Lam’akalonge ɔnɔmbɔdi wa fɛtɛ ashi wakakadimɔ wanu aha la nde mbeya oma lɛnɛ akawaye (kaanga mbele wanɛ wakakahanyaka diangɔ ndo wakawelawɔ wakeyaka), ɔnɔmbɔdi wa fɛtɛ akelɛ otshuki a wadi 10 ko akawotɛ ate: “Anto tshɛ toshaka anto wanu woleki amɛna ntondo, ko vɔ ndjowasha wanu wele bu amɛna naka wamboshila mbidjɔ. Wɛ akalami wanu woleki amɛna polo ndo wonya ɔnɛ.” 11 Yeso akasale dui sɔ oko djembetelo yande ya ntondo la Kana ka la Ngalileya ndo nde akatondja lotombo lande sɛkɛ,+ ko ambeki ande wakonge la mbetawɔ le nde.
12 L’ɔkɔngɔ w’akambo asɔ, nde, nyango, anango+ la ambeki ande wakaholɔ la Kapɛrnauma,+ koko vɔ kotshikala nshi efula lɛkɔ.
13 Oma laasɔ, dambo di’Elekanelo+ di’ase Juda diaki suke ndo Yeso akatshu la Jɛrusalɛma. 14 Nde akatane anto wasondja ngɔmbɛ, ɛkɔkɔ la benga+ lo tɛmpɛlɔ kaamɛ la amengodi wa falanga wodjashi l’ekala awɔ. 15 Ɔnkɔnɛ nde akasale lofimbɔ la kɔdi, ko akatshanya wanɛ tshɛ waki la ɛkɔkɔ ndo la ngɔmbɛ lo tɛmpɛlɔ, akatshola falanga y’ekenga y’amengodi wa falanga ndo akasokola mɛsa+ awɔ. 16 Ko nde akatɛ wanɛ wakasondjaka benga ate: “Nyonya diangɔ nɛ oma lanɛ! Takonyetɛ luudu la Papa luudu l’okanda!”*+ 17 Ambeki ande wakohɔ dia akafundama ɔnɛ: “Ohetoheto lo dikambo dia luudu layɛ kayɔndɛ.”+
18 Ko ase Juda wakawombola vate: “Djembetelo yakɔna yakokayɛ tɛnya+ dia wɛ ekɔ la lotshungɔ la nsala akambo anɛ?” 19 Yeso akaakadimola ate: “Nyonyukole tɛmpɛlɔ kɛnɛ, ko dimi layokika+ lo nshi 3.” 20 Ko ase Juda wakawotɛ vate: “Tɛmpɛlɔ kɛnɛ kakakama l’edja k’ɛnɔnyi 46, ko wɛ ayokika lo nshi 3?” 21 Koko nde akatɛkɛtaka dia tɛmpɛlɔ ka demba+ diande. 22 Lam’akandayolɔ oma lo nyɔi, ambeki ande wakayohɔ dia nde akawatɛka dikambo sɔ,+ ko vɔ waketawɔ afundelo ndo kɛnɛ kakate Yeso.
23 Lam’akinde la Jɛrusalɛma lo dambo di’Elekanelo, anto efula wakonge la mbetawɔ lo lokombo lande lam’akawɛnyi tolembetelo takandasalaka. 24 Koko Yeso kondjaɛkɛ le wɔ, nɛ dia nde akawaeyaka vɔ tshɛ 25 ndo nɛ dia nde komonga l’ohomba w’onto ɔmɔtshi mbotɛ akambo wendana l’anto, dikambo nde akeyaka kɛnɛ kaki l’etema w’anto.+
3 Pami kɛmɔtshi kaki Ofarisɛ, lokombo lande Nikɔdɛmɔ+ aki omboledi w’ase Juda. 2 Nde akaye le Yeso l’otsho+ ndo akawotɛ ate: “Rabi,+ sho mbeyaka dia oko weyɛ ombetsha, wɛ akaye oma le Nzambi, nɛ dia ndooko onto lakoka nsala tolembetelo+ tasalayɛ naka nde haye oma le Nzambi.”+ 3 Yeso akookadimola ate: “Lo mɛtɛ kakotɛmi nte, onto hakoke mbɔtɔ lo Diolelo dia Nzambi+ naka nde hotwe nto.”*+ 4 Nikɔdɛmɔ akawombola ate: “Ngande wakoka onto laya opalanga mbotɔ nto? Nde hakoke mbɔtɔ l’otema wa nyango mbala ka 2 ko mbotɔ nto, shi mɛtɛ?” 5 Yeso akookadimola ate: “Lo mɛtɛ kakotɛmi nte, naka onto hotwe oma le ashi+ ndo oma le nyuma,+ nde hakoke mbɔtɔ lo Diolelo dia Nzambi. 6 Kɛnɛ kotɔ oma lo demba kekɔ demba, ndo kɛnɛ kotɔ oma le nyuma kekɔ nyuma. 7 Tambake nɛ dia lambokotɛ nte: Nyu pombaka mbotɔ nto. 8 Lɔpɛpɛ tɔpɛpaka otsha lɛnɛ alangalɔ, ko wɛ tokaka lohelo lalɔ, koko wɛ heye oma lɛnɛ oyelɔ kana otsha lɛnɛ atalatshu. Ngasɔ mbele ndo onto tshɛ lootɔ oma le nyuma.”+
9 Nikɔdɛmɔ akookadimola ate: “Ngande wakoka akambo asɔ salema?” 10 Yeso akawotɛ ate: “Wɛ ekɔ ombetsha l’Isariyɛlɛ ko wɛ heye akambo asɔ? 11 Lo mɛtɛ kakotɛmi nte, sho mbutaka kɛnɛ keyaso ndo sho mbewoyaka kɛnɛ kɛnaso, koko nyu hanyetawɔ kɛnɛ kanyotɛso. 12 Naka dimi lekɔ lo nyotɛ akambo wa la nkɛtɛ ko nyu hanyetawɔ, onde nyayetawɔ naka dimi nyotɛ akambo wa l’olongo? 13 Ndo nto, ndooko onto lakadɛ l’olongo+ paka Ɔna onto lakaholɔ oma l’olongo.+ 14 Oko wakadiya Mɔsɛ oloyi l’oswe wa shɛnga+ mbayodiyama+ ndo Ɔna onto, 15 dia onto tshɛ lawetawɔ nkondja lɔsɛnɔ la pondjo.+
16 “Nɛ dia Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote,+ dia onto tshɛ longa la mbetawɔ le nde atovɔke, koko akondja lɔsɛnɔ la pondjo.+ 17 Nɛ dia Nzambi kotoma Ɔnande l’andja dia ndjolombosha andja, koko dia andja ndjoshimbamɛ lo tshimbo yande.+ 18 Onto tshɛ longa la mbetawɔ le nde hatolomboshama.+ Onto tshɛ lele bu la mbetawɔ le nde amboshila nomboshama lam’ele nde bu la mbetawɔ lo lokombo l’Ɔna ɛtɔi laki Nzambi.+ 19 Kilombo kayosalema lo ndjela dikambo nɛ: Osase wakaye l’andja,+ koko anto wakalange wodjima lo dihole di’osase dikambo etsha awɔ waki kɔlɔ. 20 Nɛ dia onto tshɛ lasala akambo wa kɔlɔ petshaka osase ndo nde haye l’osase diaha etsha ande ntomba sɛkɛ.* 21 Koko onto tshɛ lasala kɛnɛ kele mɛtɛ ndjaka l’osase+ dia etsha ande mɛnama lo sɛkɛ oko onto lasala akambo lo yoho yɔtɔnɛ la lolango laki Nzambi.”
22 L’ɔkɔngɔ wa laasɔ, Yeso la ambeki ande wakatshu otsha lo nkɛtɛ ya Judeya ndo nde akatotshikala tshanda lɛkɔ kaamɛ la wɔ ndo akabatizaka+ anto. 23 Koko Joani nde lawɔ akabatizaka anto l’Ayinɔna, suke la Salima, nɛ dia ashi waki efula lo dihole sɔ+ ndo anto wakatetemalaka ntshɔ le nde ndo wakabatizamaka.+ 24 Nɛ dia laasɔ ko Joani atadjama lo lokanu.+
25 Londjo lakatombe lam’asa ambeki wa Joani la ose Juda ɔmɔtshi lo dikambo dia wɛdiamelo. 26 Ko vɔ wakaye le Joani ndo wakawotɛ vate: “Rabi, onto laki la yɛ la wedi wa Jɔrdana lakayatɛkɛta dikambo diande+ ekɔ lo batiza anto ndo anto tshɛ wekɔ lo ntshɔ le nde.” 27 Ko Joani akate ate: “Onto hakoke nsala kaanga dikambo ɔtɔi naka nde halongodi wolo oma l’olongo. 28 Nyu nyuamɛ nyekɔ ɛmɛnyi dia dimi lakate nte: ‘Dimi keema Kristo,+ koko dimi lakatomama la ntondo kande.’+ 29 Onto tshɛ lele la wadi mbele otshuki a wadi.+ Koko etena kemala ɔngɛnyi w’otshuki a wadi laawɔ ndo kokande dui diande, nde mongaka l’ɔngɛnɔngɛnɔ w’efula l’ɔtɛ wa dui di’otshuki a wadi. Ɔnkɔnɛ, ɔngɛnɔngɛnɔ ami waya efula ka mamba. 30 Onto ɔsɔ pombaka tahamaka tsho, koko dimi layotakitakitaka tsho.”
31 Onto lakaye oma la diko+ ndeka anto akina tshɛ. Onto la la nkɛtɛ ekɔ la la nkɛtɛ ndo nde tɔtɛkɛtaka akambo wa la nkɛtɛ. Onto lakaye oma l’olongo ndeka anto akina tshɛ.+ 32 Nde mbutaka kɛnɛ kakandɛnyi ndo kakandoke,+ koko ndooko onto letawɔ kɛnɛ katande.+ 33 Onto tshɛ letawɔ kɛnɛ katande ambodja ohomɔ ande lɔkɔ* dia Nzambi ekɔ mɛtɛ.+ 34 Nɛ dia onto lakatomama oma le Nzambi tɛkɛtaka awui wa Nzambi,+ dikambo Nzambi hatɛtɔla* nyuma kande etena kakishande anto. 35 Papa nangaka Ɔna+ ndo akakimɔ diangɔ tshɛ l’anya ande.+ 36 Onto tshɛ lele la mbetawɔ le Ɔna ayokondja lɔsɛnɔ la pondjo.+ Onto tshɛ lahakitanyiya Ɔna hatɛna lɔsɛnɔ,+ koko odudu wa Nzambi wekɔ le nde.+
4 Lam’akeye Nkumadiɔndjɔ dia Afarisɛ wamboka dia Yeso aketɛka anto efula ambeki ndo akabatizaka+ ambeki oleki Joani 2 (kaanga mbele Yeso ndamɛ kobatizaka, koko ambeki ande mbakabatizaka) 3 nde akamɔ oma la Judeya ndo akatshu nto otsha la Ngalileya. 4 Koko aki ohomba dia nde mbeta oma la Samariya. 5 Ko nde akakome l’osomba ɔmɔtshi wa la Samariya wakawelɛka Sukara, suke l’ekambɔ ka Jakɔbɔ kakandasha ɔnande Yɔsɛfu.+ 6 Lo ekambɔ kakɔ mbaki+ ɛtɛkɔ k’ashi ka Jakɔbɔ. Lam’ele Yeso akalɛmbɛ la lɔkɛndɔ, nde akadjasɛ l’omamu w’ɛtɛkɔ.* Aki oya lo wonya wa 6.*
7 Womoto ɔmɔtshi l’ose Samariya akaye ndjotahola ashi. Yeso akawotɛ ate: “Ombisha yema y’ashi wa nnɔ.” 8 (Nɛ dia ambeki ande wakatshu l’osomba dia tosomba mbo ya ndɛ.) 9 Ko womoto l’ose Samariya akawotɛ ate: “Wɛ ekɔ ose Juda, lande na kanɔmbayɛ dimi womoto l’ose Samariya ashi wa nnɔ?” (Nɛ dia ase Juda l’ase Samariya kombokanaka.)+ 10 Yeso akookadimola ate: “Otoyeyaka losha la woshasha wa Nzambi+ ndo onto lakotɛ ate: ‘Ombisha yema y’ashi wa nnɔ,’ tshike wɛ otɔɔlɔmba ko nde otokoka kosha ashi wa lɔsɛnɔ.”+ 11 Womoto akɔ akawotɛ ate: “Yɔnɛ, wɛ bu kaanga l’ɛngɔ ka ntahola ashi ndo ɛtɛkɔ kekɔ ɔhɔngɔ. Ko oma lende ayoyokondja ashi wa lɔsɛnɔ asɔ? 12 Onde wɛ ndeka Jakɔbɔ ya tshɛso, ɔnɛ lakatosha ɛtɛkɔ ndo lele nde la anande ndo dongalonga diande wakanɔ ashi w’oma lɔkɔ?” 13 Yeso akookadimola ate: “Onto tshɛ lanɔ ashi oma lo ɛtɛkɔ kɛnɛ ayoka mposa nto. 14 Koko onto tshɛ lanɔ ashi wayomowosha hokaki mposa nto pondjo,+ nɛ dia ashi wayomowosha wayoyala oko kiɔkɔ y’ashi wakundɔkundɔ dia mbisha lɔsɛnɔ la pondjo.”+ 15 Womoto ɔsɔ akawotɛ ate: “Yɔnɛ, ombisha ashi asɔ diaha dimi mboka mposa nto ndo diaha dimi ntetemala ndja ndjotahola ashi lanɛ.”
16 Yeso akawotɛ ate: “Tshɔka tele omɛyɛ kele nyoye lanɛ.” 17 Womoto akɔ akookadimola ate: “Dimi bu la omi.” Yeso akawotɛ ate: “Wɛ ambota mɛtɛ lam’otshiyɛ wate, ‘dimi bu la omi.’ 18 Nɛ dia wɛ aki la waomi 5 ndo pami kodjashi la yɛ bu omɛyɛ. Lo dikambo sɔ wɛ ambota mɛtɛ.” 19 Womoto akɔ akawotɛ ate: “Yɔnɛ, dimi lambɛna dia wɛ ekɔ omvutshi.+ 20 Watshɛso wakatɛmɔlaka lo dikona nɛ, koko nyu mbutaka dia la Jɛrusalɛma kele dihole diahomba anto tɛmɔlaka.”+ 21 Yeso akawotɛ ate: “Womoto, ombetawɔ. Wonya wekɔ lo ndjaye wele nyu hanyotɔtɛmɔla Papa oyadi lo dikona nɛ kana la Jɛrusalɛma. 22 Nyu tɛmɔlaka kɛnɛ kahanyeye,+ koko sho tɛmɔlaka kɛnɛ keyaso, nɛ dia panda ntatɛ le ase Juda.+ 23 Koko wonya wekɔ lo ndjaye ndo wonya akɔ vɔ ɔnɛ wele atɛmɔdi wa mɛtɛ wayɔtɛmɔla Papa lo nyuma ndo lo mɛtɛ, nɛ dia lo mɛtɛ, Papa anto wa ngasɔ kayangande dia mbɔtɛmɔla.+ 24 Nzambi ekɔ Nyuma,+ wanɛ wɔɔtɛmɔla pombaka mbɔtɛmɔla lo nyuma ndo lo mɛtɛ.”+ 25 Womoto akɔ akawotɛ ate: “Dimi mbeyaka dia Mɛsiya lelamɛ Kristo ekɔ lo ndjaye. Lam’ayondoya, nde ayototɛ akambo tshɛ hwe hwe.” 26 Yeso akawotɛ ate: “Dimi latɛkɛta la yɛ+ kele nde.”
27 L’etena kɛsɔ ambeki ande wakakome ndo wakaambe lo woho wakandatɛkɛtaka la womoto. Koko ndooko lakakoke mbombola ɔnɛ: “Ayangayɛ?” kana ɔnɛ: “Lande na katɛkɛtayɛ la womoto ɔnɛ?” 28 Ko womoto akɔ akatshike mbaka kande, akatshu l’osomba ko akatotɛ anto ɔnɛ: 29 “Nyoye nyoyende pami kambombutɛ akambo tshɛ wakamasale. Shi ondo nde kele Kristo?” 30 Vɔ wakatombe oma l’osomba ndo wakatshu le nde.
31 L’etena kɛsɔ, ambeki ande wakootshutshuyaka, wawotɛ ɔnɛ: “Rabi,+ lɛka yangɔ.” 32 Koko nde akawatɛ ate: “Dimi lekɔ la mbo ya ndɛ yahanyeye.” 33 Ko ambeki ande wakambɔna vate: “Onde onto ɔmɔtshi akawela yangɔ ya ndɛ?” 34 Yeso akawatɛ ate: “Mbo ya ndɛ yami ele nsala lolango la Ɔnɛ lakantome+ ndo nshidiya olimu ande.+ 35 Onde hanyototaka nyate, ambotshikala ngɔndɔ 4 dia dinela nkoka? Nyolonge, dimi lambonyotɛ nte: Nyedia washo, nyende, dikambɔ diambɛla dia mina.+ 36 Amunyi wamboshila nongola difuto diawɔ ndo wekɔ lo ntshumanya elowa dikambo dia lɔsɛnɔ la pondjo, dia ɔnɛ lonɛ la ɔnɛ lana ngɛnangɛna kaamɛ.+ 37 Lo dikambo sɔ ɛtɛkɛta ɛnɛ wekɔ mɛtɛ: Onto ɔmɔtshi konɛ ndo okina kele omunyi. 38 Dimi lakanyotome dia tona kɛnɛ kakinyu kokamba. Anto akina mbakakambe ko nyambona elowa w’olimu awɔ.”
39 Ase Samariya efula wa l’osomba akɔ wakonge la mbetawɔ le nde l’ɔtɛ w’ɛtɛkɛta wakawatɛ womoto akɔ ate: “Nde akambute akambo tshɛ wakamasale.”+ 40 Lam’akaye ase Samariya le nde, vɔ wakɔɔlɔmbɛ dia nde ntshikala la wɔ, ko nde akatshikala lɛkɔ nshi 2. 41 Etombelo waki la dui sɔ ele, anto efula wakonge la mbetawɔ l’ɔtɛ wa kɛnɛ kakandate, 42 ko vɔ wakatɛ womoto akɔ vate: “Tambetawɔ aha l’ɔtɛ wa kɛnɛ kakayatshi keto, koko nɛ dia shoamɛ tamboohokamɛ ndo tambeya dia pami kɛnɛ ekɔ mɛtɛ oshimbedi w’andja.”+
43 L’ɔkɔngɔ wa nshi 2, nde akamɔ oma lɛkɔ ndo akatshu otsha la Ngalileya. 44 Koko Yeso ndamɛ akate ate: Omvutshi hɔsama la nɛmɔ lo ngelo kawɔ.+ 45 Lam’akandakome la Ngalileya, ase Ngalileya wakoolongola, nɛ dia vɔ wakɛnyi akambo tshɛ wakandasale la Jɛrusalɛma lo fɛtɛ,+ dikambo ndo vɔ mbakatshu lo fɛtɛ+ kakɔ.
46 Ko nde akatshu nto la Kana ka la Ngalileya lɛnɛ akandakadimola ashi wanu.+ Lɛkɔ kaki okambi ɔmɔtshi wa nkumekanga wele ɔnande aki la hemɔ la Kapɛrnauma. 47 Lam’akoke pami kɛsɔ dia Yeso amboya oma la Judeya oya la Ngalileya, nde akatshu le nde ndo akɔɔlɔmbɛ dia ndja ndjɔkɔnɔla ɔnande, nɛ dia ɔnakɔ aki l’asa eko la nyɔi. 48 Koko Yeso akawotɛ ate: “Naka nyu hanyɛnyi tolembetelo la akambo wa diambo, kete nyu hanyotetawɔ.”+ 49 Okambi akɔ wa nkumekanga akawotɛ ate: “Nkumadiɔndjɔ, yete totshu la ntondo ka ɔnami mvɔ.” 50 Yeso akawotɛ ate: “Tshɔka, ɔnayɛ ekɔ la lɔsɛnɔ.”+ Pami kɛsɔ aketawɔ ɛtɛkɛta wakawotɛ Yeso ko akatshu. 51 Koko, lam’akandatatshɔka, ase olimu ande wakahomana la nde ndo wakawotɛ dia ɔnande ekɔ la lɔsɛnɔ.* 52 Nde akawambola wonya wakakɔnɔ ɔna. Ko vɔ wakawotɛ vate: “Loyi oya lo wonya wa 7* mbakashile demba dja diande.” 53 Ko she ɔna akashihodia dia aki paka wonya wakawotɛ Yeso ate: “Ɔnayɛ ekɔ la lɔsɛnɔ.”+ Ko nde la ase luudu lande tshɛ wakonge la mbetawɔ. 54 Ɔsɔ aki djembetelo+ ya 2 yakasale Yeso lam’akandakalola oma la Judeya oya la Ngalileya.
5 L’ɔkɔngɔ wa laasɔ, fɛtɛ+ kɛmɔtshi k’ase Juda kaki la Jɛrusalɛma ko Yeso akatshu lɛkɔ. 2 Oduwa ɔmɔtshi wakawelɛka lo Hɛbɛru ɔnɛ Bɛtɛzata waki la Jɛrusalɛma la Soko+ di’Ɛkɔkɔ. Vɔ waki la dikundji 5. 3 Leemba l’anto waki la hemɔ, akanga wa totshungu, akanga wa tshumbe ndo akanga wa dikɔmɔ* waketamaka laawɔ. 4* —— 5 Pami kɛmɔtshi kaki la hemɔ l’edja k’ɛnɔnyi 38 aki laawɔ. 6 Lam’akandɛnyi pami kɛsɔ etami laawɔ ndo lam’akandeye dia nde ambotata l’edja k’ɛnɔnyi efula, Yeso akawotɛ ate: “Onde wɛ nangaka nkɔnɔ?”+ 7 Pami kaki la hemɔ akookadimola ate: “Yɔnɛ, dimi bu la onto lakimanyiya dia tambiyami l’oduwa etena kasukasuka ashi. Mbala tshɛ kalangami ntambɛ, onto okina ndekanakami.” 8 Yeso akawotɛ ate: “Emala, ɔsa mbeto kayɛ, kɛndakɛnda.”+ 9 Mbala kakɔ ɔtɔi, pami kakɔ akakɔnɔ ndo akɔshi mbeto kande, ko akatatɛ nkɛndakɛnda.
Dui sɔ diakasalema lushi la Sabato. 10 Ko ase Juda wakatatɛ mbutɛ pami kakakɔnɔ ɔnɛ: “Ɛlɔ ekɔ Sabato, bu dimɛna wɛ mɛmba mbeto.”+ 11 Koko nde akaakadimola ate: “Pami kakakɔnɔdi akambute ate: ‘Ɔsa mbeto kayɛ, kɛndakɛnda.’” 12 Vɔ wakawombola vate: “Pami kakɔna kakakote ate: ‘Ɔsa mbeto kayɛ, kɛndakɛnda’?” 13 Koko pami kakakɔnɔ kombeya ɔnɛ lakɔɔkɔnɔla, nɛ dia Yeso akamɔ oma laawɔ dikambo anto waki efula lo dihole diakɔ.
14 L’ɔkɔngɔ wa laasɔ, Yeso akayootana lo tɛmpɛlɔ ndo akawotɛ ate: “Hokamɛ, wɛ ambɔkɔnɔ. Tosalake pɛkato nto diaha dikambo dioleki kɔlɔ kokomɛ.” 15 Pami kɛsɔ akatshu ndo akatotɛ ase Juda dia Yeso mbakɔɔkɔnɔdi. 16 Diakɔ diele ase Juda wakahɛnyahɛnyaka Yeso, nɛ dia nde akasalaka akambo asɔ lushi la Sabato. 17 Koko nde akaakadimola ate: “Papa ekɔ lo ntetemala nkamba polo ndo kakiye ndo dimi lekɔ lo ntetemala nkamba.”+ 18 Diakɔ diele ase Juda wakatatɛ nyanga dia mbodiaka, aha tsho l’ɔtɛ wakandɔnyɔlaka Sabato, koko ndo l’ɔtɛ wakandelɛka Nzambi ate Papa kande hita,+ lo ndjaɛdinya la Nzambi.+
19 Ɔnkɔnɛ, Yeso akaakadimola ate: “Lo mɛtɛ kanyotɛmi nte, Ɔna hakoke nsala kaanga dikambo ɔtɔi oma lo lolango lande, paka kɛnɛ kɛnande She asala.+ Nɛ dia kɛnɛ tshɛ kasala She mbatosalaka ndo Ɔna. 20 Lam’ele Papa nangaka Ɔna,+ nde mbɛnyaka akambo tshɛ wasalande ndo nde ayowɛnya akambo woleki wanɛ weke dia nyu mamba.+ 21 Nɛ dia oko wolola Papa edo dia vɔ nyomonga la lɔsɛnɔ nto,+ woho akɔ waamɛ mbele ndo Ɔna mbishaka ɔnɛ tshɛ lalangande+ lɔsɛnɔ. 22 Dikambo Papa halombosha, koko akasha Ɔna+ lotshungɔ la nombosha anto lo akambo tshɛ, 23 dia anto tshɛ mbisha Ɔna kɛnɛmɔ woho washawɔ Papa. Ɔnɛ tshɛ lahalɛmiya Ɔna halɛmiya She lakootome.+ 24 Lo mɛtɛ kanyotɛmi nte, onto tshɛ lahokamɛ ɛtɛkɛta ami ndo letawɔ Ɔnɛ lakatome ayokondja lɔsɛnɔ la pondjo+ ndo nde hatolomboshama, koko nde ayeta oma lo nyɔi otsha lo lɔsɛnɔ.+
25 “Lo mɛtɛ kanyotɛmi nte, wonya wekɔ lo ndjaye ndo wonya akɔ wambokoka wele edo wayoka dui dia Ɔna Nzambi ndo wanɛ wakadje yimba wayonga la lɔsɛnɔ. 26 Nɛ dia oko wele Papa ekɔ la wolo wa mbisha lɔsɛnɔ,*+ mbakandasha ndo Ɔna wolo wa mbisha lɔsɛnɔ.+ 27 Nde akawosha lowandji la nombosha+ nɛ dia nde ekɔ Ɔna onto.+ 28 Tanyambake dia dikambo sɔ, nɛ dia wonya wekɔ lo ndjaye wele wanɛ tshɛ wele lo waombo wohɔma wayoka dui+ diande 29 ko wayotomba. Wanɛ wakasalaka akambo w’ɛlɔlɔ lo eolwelo ka lɔsɛnɔ ndo wanɛ wakasalaka akambo wa kɔlɔ lo eolwelo ka kilombo.+ 30 Dimi haakoke nsala ndooko dikambo oma lo lolango lami hita. Woho wakamoke mbalomboshami ndo dimi nomboshaka la losembwe,+ nɛ dia dimi haayange dia nsala lolango lami hita, koko lolango la Ɔnɛ lakantome.+
31 “Naka dimi dimɛ mbuta akambo wendana la mi, kete kɛnɛ katami bu mɛtɛ.+ 32 Koko onto okina ekɔ lo mbuta akambo wendana la mi ndo dimi mbeyaka dia kɛnɛ katande lo dikambo diami kekɔ mɛtɛ.+ 33 Nyu nyakatome anto le Joani ndo nde akate akambo wa mɛtɛ+ lo dikambo diami. 34 Koko dimi haletawɔ kɛnɛ kata onto, dimi lekɔ lo mbuta akambo asɔ dia nyu shimbamɛ. 35 Pami kɛsɔ aki tala dialombalomba, diasha osase ndo nyu nyaketawɔ lo tshanda mɔtshi dia ngɛnangɛna efula l’osase+ ande. 36 Koko dimi lekɔ la djembetelo nkina yoleki ya Joani, nɛ dia akambo wakambutɛ Papa dia nsala mbasalami ndo akambo akɔ shikikɛka lo dikambo diami ɔnɛ Papa kakantome.+ 37 Ndo Papa lakantome ndamɛ akewoya akambo wendana la mi.+ Nyu nyatokaka dui diande ndo nyatɛnaka woho wende,+ 38 ndo ɔtɛkɛta ande hawotshikala le nyu, nɛ dia nyu hanyetawɔ Ɔnɛ lakandatome.
39 “Nyu nyekɔ lo nyangiayangia lo Afundelo+ nɛ dia nyu mbɔsaka dia lo tshimbo yawɔ mbayonyokondja lɔsɛnɔ la pondjo, koko paka vɔ akɔ* mbata akambo wendana la mi.+ 40 Koko nyu hanyolange ndja le mi+ dia nyu nkondja lɔsɛnɔ. 41 Dimi haletawɔ lotombo l’oma le anto, 42 koko dimi mbeyaka dimɛna dia nyu bu la ngandji ka Nzambi le nyu. 43 Dimi lakaye lo lokombo la Papa, koko nyu konongolami. Onto okina otondoya lo lokombo lande ndamɛ, nyotokoka mbolongola. 44 Ngande wakokanyu monga la mbetawɔ lam’ele nyekɔ lo mbetawɔ lotombo la lam’asanyu ndo hanyoyange lotombo l’oma le Nzambi+ ɔtɔi ka mɛtɛ? 45 Tanyɔfɔnyake dia layonyɔsɔngwɛ le Papa, koko ekɔ onto ɔmɔtshi lanyɔsɔngwɛ, mbuta ate Mɔsɛ+ lakanyadje elongamelo le nde. 46 Lo mɛtɛ, otondonga nyaketawɔ Mɔsɛ, tshike nyotombetawɔ, nɛ dia nde akafunde akambo wendana la mi.+ 47 Ko naka hanyetawɔ efundelo ande, ngande wayonyetawɔ kɛnɛ katami?”
6 L’ɔkɔngɔ wa laasɔ, Yeso akatenyanya Ndjale ka Ngalileya kana Tibɛriya.+ 2 Ndo olui a woke w’anto wakatatetemalaka mboyela,+ nɛ dia vɔ wakɛnyi tolembetelo takandasalaka lo nkɔnɔla wanɛ waki la hemɔ.+ 3 Ko Yeso akadɛ lo dikona ndo nde akatodjasɛ lɛkɔ kaamɛ l’ambeki ande. 4 Dambo di’Elekanelo+ di’ase Juda diaki suke. 5 Lam’akedia Yeso washo, ndo akandɛnyi olui w’anto wakayayaka oya le nde, nde akambola Filipɛ ate: “Lende akokaso tosomba mapa wa ndesha+ anto anɛ?” 6 Koko nde akate dikambo sɔ dia mbohemba, nɛ dia nde akeyaka kɛnɛ kakinde suke la nsala. 7 Filipɛ akookadimola ate: “Kaanga mapa wa dɛnariyo* 200 hatokoka dia onto l’onto nkondja kaanga yɛtshi.” 8 Ombeki ande ɔmɔtshi, Andɛlɛ ɔnango Simɔna Petero akawotɛ ate: 9 “Ɔna dikɛnda ɔmɔtshi la pami ekɔ lanɛ la mapa 5 la tosese 2. Ko onde yema shɔ yayokoka la leemba l’anto lɔnɛ?”+
10 Yeso akate ate: “Nyodjashiya anto.” Lam’ele adiyo waki efula lo dihole sɔ, apami wakadjasɛ laawɔ waki oko nunu tanu (5 000).+ 11 Yeso akɔshi mapa akɔ ndo l’ɔkɔngɔ wa nde mboka losaka, nde akasha wanɛ wakadjasɛ laawɔ. Nde akasale woho akɔ waamɛ la tosese takɔ, ko vɔ wakale woho wakawalange. 12 Lam’akawalote, nde akatɛ ambeki ande ate: “Nyotshumanya bɛtshi diotshikadi diaha nshisha ndooko yema.” 13 Ko vɔ wakatshumanya bɛtshi diakatshikala ndo wakalodia asaka 12 tɔɔ tɔɔ oma lo mapa 5 wakale anto.
14 Lam’akɛnyi anto djembetelo yakandasale, vɔ wakate vate: “Onto ɔnɛ mɛtɛ kele Omvutshi wakahombe ndja l’andja.”+ 15 Oma laasɔ, lam’akeye Yeso dia vɔ waki suke la mbonda ko mbodja nkumekanga la wolo, nde akɔɔngɔ+ nto otsha lo dikona ndamɛ.+
16 La dikɔlɔ, ambeki ande wakaholɔ otsha lo ndjale,+ 17 ndo wakɔtɔ lo waato, ko wakatehɔ otsha la Kapɛrnauma. Polo lam’akadje wonya, Yeso kotshɔ otsha le wɔ.+ 18 Ndo nto, asuku wakayala lo ndjale, nɛ dia lɔpɛpɛ la wolo lakapɛpaka.+ 19 Koko lam’akawatshu etale kele oko milɛ 3 kana 4,* vɔ wakɛnyi Yeso ayakɛndakɛnda laadiko dia ndjale oya lɛnɛ aki waato, ko vɔ wakandama la wɔma. 20 Koko nde akawatɛ ate: “Dimi mbayaye, tanyokake wɔma!”+ 21 Ko vɔ wakalange mbɔɔtshiya lo waato koko kombeta edja, waato wakakome l’omamu lɛnɛ akawatatshɔka.+
22 La wedi a pindju, olui w’anto wakemala lo wedi okina wa ndjale wakɛnyi dia ndooko waato okina waki laawɔ paka waato wa tshitshɛ, koko Yeso kɔmbɔtɔ lo waato wakɔtɔ ambeki ande, paka ambeki ande ato mbakatshu. 23 Koko waato w’oma la Tibɛriya wakakome suke la dihole diakawale mapa l’ɔkɔngɔ wa Nkumadiɔndjɔ mboka losaka. 24 Ɔnkɔnɛ, lam’akɛnyi olui w’anto dia oyadi Yeso kana ambeki ande bu lo dihole diakɔ, vɔ wakɔshi waato awɔ ndo wakatshu la Kapɛrnauma dia toyanga Yeso.
25 Lam’akawatootana la wedi wa ndjale, vɔ wakawotɛ vate: “Rabi,+ wonya akɔna wakayakomi lanɛ?” 26 Yeso akaakadimola ate: “Lo mɛtɛ kanyotɛmi nte, nyekɔ lo nyangami, aha l’ɔtɛ wakanyɛnyi tolembetelo, koko l’ɔtɛ wakanyale mapa ndo wakanyalote.+ 27 Tanyokambake olimu dikambo dia mbo ya ndɛ yayolana, koko nyokambe dikambo dia mbo ya ndɛ yatshikala edja yasha lɔsɛnɔ la pondjo,+ mbuta ate mbo ya ndɛ yayonyosha Ɔna onto, nɛ dia Papa, eelo Nzambi akawodje ohomɔ wɛnya dia nde ambowetawɔ.”+
28 Ko vɔ wakawotɛ vate: “Ahombaso nsala dia nkotsha elimu wa Nzambi?” 29 Yeso akaakadimola ate: “Olimu wa Nzambi vɔ ɔnɛ: Dia nyu monga la mbetawɔ le ɔnɛ lakandatome.”+ 30 Ko vɔ wakawotɛ vate: “Ko djembetelo+ yakɔna yayoyosala kele toyiɛnyi ndo toketawɔ? Olimu akɔna wakambayɛ? 31 Watshɛso wakale mana l’oswe wa shɛnga+ oko wakadiafundama ɔnɛ: ‘Nde akawasha mapa w’oma l’olongo dia vɔ ndɛ.’”+ 32 Ko Yeso akawatɛ ate: “Lo mɛtɛ kanyotɛmi nte, Mɔsɛ konyosha mapa w’oma l’olongo, koko Papa mbanyosha mapa wa mɛtɛ w’oma l’olongo. 33 Nɛ dia mapa waki Nzambi ele ɔnɛ lakaye oma l’olongo ndo lasha andja lɔsɛnɔ.” 34 Ko vɔ wakawotɛ vate: “Nkumadiɔndjɔ, otoshake mapa ɔsɔ nshi tshɛ.”
35 Yeso akawatɛ ate: “Dimi kele mapa wa lɔsɛnɔ. Onto tshɛ laya le mi hatoka ndjala nto ndo onto tshɛ longa la mbetawɔ le mi hatoka mposa k’ashi nto pondjo.+ 36 Oko wakamanyote, nyekɔ lo mɛnami, koko hanyetawɔ.+ 37 Anto tshɛ wakambisha Papa wayoya le mi ndo onto tshɛ layoya le mi,+ dimi hantowotshanya; 38 nɛ dia dimi lakaye oma l’olongo+ dia ndjosala, aha lolango lami, koko lolango la Ɔnɛ lakantome.+ 39 Lolango la Ɔnɛ lakantome ele diaha dimi nshisha kaanga onto 1 l’atei wa wanɛ tshɛ wakandambisha, koko dia dimi mbaolola+ lo lushi l’ekomelo. 40 Nɛ dia lolango la Papa ele dia onto tshɛ leya Ɔna ndo longa la mbetawɔ le nde akondja lɔsɛnɔ la pondjo+ ndo dimi layowolola+ lo lushi l’ekomelo.”
41 Ko ase Juda wakatatɛ ngunanguna lo dikambo diande, nɛ dia nde akate ate: “Dimi kele mapa wakaye oma l’olongo.”+ 42 Vɔ wakate vate: “Shi ɔnɛ Yeso y’ɔna Yɔsɛfu lele sho mbeyaka+ she la nyango? Ko lande na kondota ate: ‘Dimi lakaye oma l’olongo’?” 43 Yeso akaakadimola ate: “Nyotshike ngunanguna lam’asanyu. 44 Ndooko onto lakoka ndja le mi paka Papa lakantome kookotodi,+ ndo dimi layowolola lo lushi l’ekomelo.+ 45 Akafundama lo Amvutshi ɔnɛ: ‘Vɔ tshɛ wayetshama oma le Jehowa.’*+ Onto tshɛ lambohokamɛ kɛnɛ koye oma le Papa ndo lambokieka ndjaka le mi. 46 Ndooko onto lakɛnyi Papa,+ onyake ɔnɛ loye oma le Nzambi mbakɛnyi Papa.+ 47 Lo mɛtɛ kanyotɛmi nte, onto tshɛ letawɔ ayokondja lɔsɛnɔ la pondjo.+
48 “Dimi kele mapa wa lɔsɛnɔ.+ 49 Watshɛnyu wakale mana l’oswe wa shɛnga, ko wakavu.+ 50 Ɔnɛ ekɔ mapa wakaye oma l’olongo, dia onto tshɛ mbɔlɛ ndo ahavɔ. 51 Dimi kele mapa wasɛna wakaye oma l’olongo. Onto tshɛ layɔlɛ mapa akɔ ayɔsɛna pondjo pondjo ndo lo mɛtɛ, mapa ɔsɔ ele demba diami diayomokimɔ dia anto wa l’andja nkondja lɔsɛnɔ.”+
52 Ko ase Juda wakatatɛ nkɛtshanya lam’asawɔ, wata vate: “Ngande wayokoka pami kɛnɛ tosha demba diande dia sho ndɛ?” 53 Ko Yeso akawatɛ ate: “Lo mɛtɛ kanyotɛmi nte, naka hanyole demba dia Ɔna onto ndo hanyɔnwɛ dikila diande, kete hanyotonga la lɔsɛnɔ.+ 54 Onto tshɛ lalɛ demba diami ndo lanɔ dikila diami ayokondja lɔsɛnɔ la pondjo ndo dimi layowolola+ lo lushi l’ekomelo, 55 nɛ dia demba diami diekɔ mbo ya ndɛ ya mɛtɛ ndo dikila diami diekɔ ɛnɔnɔ ka mɛtɛ. 56 Onto tshɛ lalɛ demba diami ndo lanɔ dikila diami ekɔ kaamɛ la mi ndo dimi lekɔ kaamɛ la nde.+ 57 Oko wakantome Papa lele la lɔsɛnɔ ndo oko wasɛnami lo dikambo dia Papa, onto tshɛ landɛ, ndo nde lawɔ ayɔsɛnaka lo dikambo diami.+ 58 Ɔsɔ kele mapa wakaye oma l’olongo. Vɔ keema oko wɔnɛ wakale watshɛnyu ko wakavu. Onto tshɛ lalɛ mapa akɔ ayɔsɛna pondjo pondjo.”+ 59 Nde akate akambo asɔ etena kakandetshaka lo shinangɔnga* lam’akasangana anto la Kapɛrnauma.
60 Lam’akoke ambeki ande efula akambo asɔ, vɔ wakate vate: “Ɛtɛkɛta ɛsɔ wekɔ kɔlɔ, akɔna akoka mbahokamɛ na?” 61 Koko lam’ele Yeso akeye dia ambeki ande wakangunangunaka lo dikambo sɔ, nde akawatɛ ate: “Onde dikambo sɔ diambonyotakanya? 62 Ko ayonyosala naka nyu mɛna Ɔna onto atadɛ otsha lɛnɛ akinde ntondo?+ 63 Nyuma mbasha lɔsɛnɔ,+ demba diekɔ anyanya. Awui wakamanyote wekɔ nyuma ndo wekɔ lɔsɛnɔ.+ 64 Koko amɔtshi l’atei anyu hawetawɔ.” Nɛ dia oma ko etatelo, Yeso akeyaka wanɛ waki kombetawɔka ndo ɔnɛ lakahombe ndjoofunga.+ 65 Nde akate ate: “Diakɔ diakamanyote nte, ndooko onto lakoka ndja le mi naka Papa+ hawosha diɛsɛ sɔ.”
66 L’ɔtɛ wa dikambo sɔ, ambeki ande efula wakakalola l’akambo wakawatshike l’ɔkɔngɔ+ ndo vɔ kotetemala mboyela. 67 Ko Yeso akambola apɔstɔlɔ ande 12 ate: “Ndo nyu mbalanga ntshɔ?” 68 Simɔna Petero akookadimola ate: “Nkumadiɔndjɔ, le na atshɔso?+ Wɛ kele la ɛtɛkɛta wa lɔsɛnɔ la pondjo.+ 69 Sho taketawɔ ndo takeye dia wɛ kele l’Ekila laki Nzambi.”+ 70 Yeso akawatɛ ate: “Shi dimi lakanyɔsɔnɛ 12?+ Koko ɔmɔtshi la l’atei anyu ekɔ omamanyishi.”*+ 71 Nde akatɛkɛtaka dikambo dia Judasɛ ɔna Simɔna Iskariyɔtɛ, nɛ dia nde mbakahombe mbofunga kaanga mbakinde l’atei w’apɔstɔlɔ 12.+
7 L’ɔkɔngɔ wa laasɔ, Yeso akatetemala nkindola* la Ngalileya, nɛ dia nde konanga mbeteta la Judeya dikambo ase Juda wakayangaka dia mbodiaka.+ 2 Koko, Fɛtɛ k’ase Juda ka Tabɛrnaklɛ*+ kaki suke. 3 Ko anango+ wakawotɛ vate: “Mɔ oma lanɛ, tshɔka la Judeya kele ndo ambeki ayɛ akina wɛnyi akambo wasalayɛ. 4 Nɛ dia ndooko onto lalanga mbeyama le anto tshɛ latosalaka akambo lo woshɛshɛ. Lam’ele wɛ salaka akambo asɔ, yaɛnya le andja.” 5 Lo mɛtɛ, anango komonga la mbetawɔ le nde.+ 6 Ko Yeso akawatɛ ate: “Etena kami katakoke,+ koko le nyu, etena kekɔ nshi tshɛ suke. 7 Andja ndooko l’ɔkɔkɔ wa nyohetsha, koko vɔ wekɔ lo petshami, nɛ dia dimi mbutaka lo dikambo diawɔ dia etsha awɔ wekɔ kɔlɔ.+ 8 Nyu nyotshu lo fɛtɛ, dimi hantotshɔ lo fɛtɛ kakɔ, nɛ dia etena kami katakoke tshɛ lo tshɛ.”+ 9 L’ɔkɔngɔ wa nde mbatɛ akambo asɔ, nde akatshikala la Ngalileya.
10 Koko lam’akatshu anango lo fɛtɛ, nde lawɔ akayotshɔka lo woshɛshɛ, koko aha lo sɛkɛ. 11 Ko ase Juda wakatatɛ mboyanga lo fɛtɛ, wata vate: “Lende ele pami kɛnɛ?” 12 Ndo elui w’anto wakatɛkɛtaka lo tɔhɔtɛhɔtɛ lo dikambo diande. Amɔtshi wakataka vate: “Nde ekɔ onto ɔlɔlɔ.” Akina wakataka vate: “Nde keema onto ɔlɔlɔ. Nde minganyiyaka olui w’anto.”+ 13 Koko ndooko onto lakatɛkɛtaka dikambo diande lo sɛkɛ, nɛ dia vɔ wakokaka ase Juda+ wɔma.
14 Lam’aki fɛtɛ aya l’atei atei, Yeso akatshu lo tɛmpɛlɔ ko akatatɛ mbetsha. 15 Ko ase Juda wakaambe, wata vate: “Ngande weya onto ɔnɛ mbadia Afundelo*+ lam’ele nde kɔmbɔtɔ kalasa?”*+ 16 Yeso akaakadimola ate: “Kɛnɛ ketshami haye oma le mi, koko ndja oma le Ɔnɛ lakantome.+ 17 Naka onto nangaka nsala lolango laki Nzambi, kete nde ayeya kana wetshelo akɔ ndja oma le Nzambi+ ko kana dimi lekɔ lo ntɛkɛta akambo ami hita. 18 Onto tshɛ lata akambo ande hita ekɔ lo nyanga lotombo lande ndamɛ, koko onto tshɛ layanga lotombo la ɔnɛ lakootome,+ nde kele mɛtɛ ndo dui dia kɔlɔ keema le nde. 19 Shi Mɔsɛ akanyosha Ɛlɛmbɛ?+ Koko ndooko onto l’atei anyu lakitanyiya Ɛlɛmbɛ akɔ. Lande na kayanganyu dia ndjakami?”+ 20 Olui w’anto wakookadimola vate: “Wɛ ekɔ la ɔdiɛngɛ. Onto akɔna ayanga dia kodiaka?” 21 Yeso akaakadimola ate: “Dikambo ɔtɔi to kosadimi, ko nyu tshɛ nyekɔ lo mamba. 22 Diakɔ diakanyotɛ Mɔsɛ dia wonyelo wa mpota,+ aha ɔnɛ dui sɔ diakaye oma le Mɔsɛ, koko diɔ diakaye oma le watshɛnyu+ ndo nyu minyaka anto mpota lushi la sabato. 23 Naka vɔ minya onto mpota lushi la Sabato diaha Ɛlɛmbɛ wa Mɔsɛ mɔnyɔma, ko amomalɛnyu nkɛlɛ ka wolo l’ɔtɛ wamomɔkɔnɔla onto lushi la sabato?+ 24 Nyotshike nombosha lo ndjela kɛnɛ kɛnama, koko nyolomboshake la losembwe.”+
25 Ko ase Jɛrusalɛma amɔtshi wakate vate: “Shi pami kɛnɛ kayangawɔ dia ndjaka?+ 26 Ko enda nde ɔnɛ atɛkɛta lo sɛkɛ ko vɔ hawowotɛ ndooko dikambo! Onde emboledi wamboshikikɛ mɛtɛ dia nde kele Kristo? 27 Sho mbeyaka oma lɛnɛ oye pami kɛnɛ,+ koko lam’ayoya Kristo, ndooko onto layeya oma lɛnɛ ayondoya.” 28 Ko Yeso akate la dui dia wolo etena kakandetshaka lo tɛmpɛlɔ ate: “Nyu mbeyakami ndo nyu mbeyaka oma lɛnɛ akamaye. Ndo dimi kondja lo lolango lami hita,+ koko Ɔnɛ lakantome ekɔ onto la mɛtɛ ndo nyu hanyoweye.+ 29 Dimi mbeeyaka,+ nɛ dia dimi lekɔ onyimpala w’oma le nde ndo Nde mbakantome.” 30 Ko vɔ wakayange dia mbonda,+ koko ndooko onto lakawahɛ anya, nɛ dia wonya ande waki watakoke.+ 31 Koko anto efula oma l’atei w’olui w’anto wakonge la mbetawɔ le nde+ ndo wakataka vate: “Onde lam’ayoya Kristo, nde ayosala tolembetelo toleki tɔnɛ tasala pami kɛnɛ?”
32 Afarisɛ wakoke olui w’anto wangunanguna akambo asɔ lo dikambo diande, ko ewandji w’ɛlɔmbɛdi la Afarisɛ wakatome apulushi dia towonda.* 33 Ko Yeso akate ate: “Dimi leke la nyu lo tshanda mɔtshi la ntondo ka dimi ntshɔ le Ɔnɛ lakantome.+ 34 Nyu nyayonyanga koko hanyotɔmɛna, ndo hanyotokoka nkoma+ lɛnɛ ayomonga.” 35 Ko ase Juda wakatanɛ vate: “Lende alanga pami kɛnɛ ntshɔ ahatakoke mbɛɛna? Shi aha le ase Juda wakahandjɔnɛ l’atei w’ase Ngirika mbalangande ntshɔ ndo tetsha ase Ngirika? 36 Ko alangande mbuta lam’otshinde ɔnɛ: ‘Nyu nyayonyanga koko hanyotɔmɛna, ndo hanyotokoka nkoma lɛnɛ ayomonga’?”
37 Lo lushi l’ekomelo la fɛtɛ,+ lushi lakaleke ohomba lo fɛtɛ, Yeso akemala ko akate la dui dia wolo ate: “Naka onto ekɔ la mposa k’ashi, nde aye le mi, ayɔnɔ.+ 38 Onto tshɛ lele la mbetawɔ le mi, oko wakate afundelo ɔnɛ: ‘Ɛkɛdi w’ashi wa lɔsɛnɔ wayɔkɛlaka+ oma l’otema ande.’” 39 Nde akatɛkɛtaka dia nyuma kakahombe nongola wanɛ wonga la mbetawɔ le nde, nɛ dia vɔ waki watalongola nyuma+ kakɔ dikambo l’etena kɛsɔ ko Yeso atatombɔma.+ 40 Anto amɔtshi l’atei w’olui w’anto, wanɛ wakoke ɛtɛkɛta ɛsɔ, wakate vate: “Ɔnɛ mɛtɛ ekɔ Omvutshi.”+ 41 Akina wakataka vate: “Ɔnɛ kele Kristo.”+ Koko akina nto wakataka vate: “Kristo hahombe ndja oma la Ngalileya, shi mɛtɛ?+ 42 Shi afundelo wakate dia Kristo ayoya oma le kanula ya Davidɛ+ ndo oma la Bɛtɛlɛhɛma,+ ngelo kakadjasɛka Davidɛ?”+ 43 Ko olui w’anto wakatɔna lo dikambo diande. 44 Amɔtshi l’atei awɔ wakalangaka mbonda,* koko ndooko onto lakawonde.
45 Lam’akakalola apulushi, ewandji w’ɛlɔmbɛdi la Afarisɛ wakawambola vate: “Lande na kahanyaye la nde?” 46 Apulushi wakakadimola vate: “Ndooko onto lakatɔtɛkɛta ngasɔ.”+ 47 Ko Afarisɛ wakawambola vate: “Onde ndo nyu mbambotonganyiyama? 48 Onde ekɔ omboledi kana Ofarisɛ ɔmɔtshi wambonga la mbetawɔ le nde?+ 49 Koko olui w’anto ɔnɛ waheye Ɛlɛmbɛ wambodjama mananu.” 50 Nikɔdɛmɔ lakatshu le Yeso ntondo ndo laki ɔtɔi ɔmɔtshi wa l’atei awɔ akawatɛ ate: 51 “Lo ndjela Ɛlɛmbɛ aso, hawanya onto la ntondo ka mbohokamɛ ndo mbeya kɛnɛ kosadinde, shi mɛtɛ?”+ 52 Vɔ wakookadimola vate: “Onde ndo wɛ kaya ose Ngalileya? Sala eyangelo ko wɛ ayɛna dia ndooko omvutshi wahomba ntomba oma la Ngalileya.”*
8 12 Ko Yeso akawatɛ nto ate: “Dimi lekɔ osase w’andja.+ Onto tshɛ landjela hatɔkɛndakɛnda lo wodjima, koko nde ayonga la osase+ washa lɔsɛnɔ.” 13 Ko Afarisɛ wakawotɛ vate: “Wɛ ekɔ lo ntɛkɛta dikambo diayɛ wɛmɛ, ɔnkɔnɛ kɛnɛ katayɛ bu mɛtɛ.” 14 Yeso akaakadimola ate: “Oyadi kaanga lekɔ lo ntɛkɛta dikambo diami, kɛnɛ katami kekɔ mɛtɛ, nɛ dia dimi mbeyaka oma lɛnɛ ayamaye ndo otsha lɛnɛ atamatshu.+ Koko nyu hanyeye oma lɛnɛ ayamaye ndo otsha lɛnɛ atamatshu. 15 Nyu nomboshaka lo yoho ya lo demba;*+ dimi haalombosha ndooko onto. 16 Ndo naka dimi nombosha, kete kilombo kami kekɔ ka mɛtɛ, nɛ dia dimi keema dimɛ, Papa lakantome ekɔ kaamɛ la mi.+ 17 Ndo nto, akafundama lo Ɛlɛmbɛ anyu nyuamɛ ɔnɛ: ‘Kɛnɛ kata anto 2 kekɔ mɛtɛ.’+ 18 Dimi lekɔ lo ntɛkɛta dikambo diami ndo Papa lakantome ekɔ lo ntɛkɛta dikambo diami.”+ 19 Ko vɔ wakawotɛ vate: “Lende ele Shɔ?” Yeso akaakadimola ate: “Nyu hanyombeye ndo hanyeye Papa.+ Otonyombeyaka tshike nyoteya ndo Papa.”+ 20 Nde akate akambo asɔ ele suke la tɔshɛtɛshɛtɛ ta weshasha+ etena kakandetshaka lo tɛmpɛlɔ. Koko ndooko onto lakawonde, nɛ dia wonya ande waki watakoke.+
21 Ko nde akawatɛ nto ate: “Dimi lekɔ lo tatshu. Nyu nyayonyanga, koko nyayovɔ lo pɛkato kanyu.+ Lɛnɛ atamatshu, nyu hanyokoke ntshɔ.”+ 22 Ko ase Juda wakatatɛ mbuta vate: “Onde nde ayoyadiaka? Nɛ dia nde ekɔ lo mbuta ate: ‘Lɛnɛ atamatshu, nyu hanyokoke ntshɔ.’” 23 Nde akawatɛ ate: “Nyu nyekɔ anto wa la nkɛtɛ, dimi lekɔ onto la l’olongo.+ Nyu nyekɔ ase andja ɔnɛ, koko dimi keema ose andja ɔnɛ. 24 Diakɔ diele lambonyotɛ nte: Nyayovɔ lo pɛkato yanyu. Nɛ dia naka hanyetawɔ dia dimi kele nde, kete nyayovɔ lo pɛkato yanyu.” 25 Ko vɔ wakawombola vate: “Eeyɛ?” Yeso akaakadimola ate: “Lande na katɛkɛtami la nyu? 26 Lekɔ la akambo efula wa mbuta lo dikambo dianyu ndo wa nombosha. Lo mɛtɛ, Ɔnɛ lakantome ekɔ mɛtɛ ndo akambo wakamoke oma le nde, dimi lekɔ lo mbatɛ andja.”+ 27 Vɔ koshihodia ɔnɛ dia She mbakandawatɛka. 28 Ko Yeso akate ate: “Lam’ayonyodiya Ɔna onto,+ mbayonyeya dia dimi kele nde+ ndo ɔnɛ dimi haasale ndooko dikambo la lolango lami hita,+ koko akambo wakambetsha Papa mbatɛkɛtami. 29 Ndo Ɔnɛ lakantome ekɔ kaamɛ la mi. Nde kotshikami dimɛ, nɛ dia dimi tosalaka nshi tshɛ kɛnɛ kawɔngɛnyangɛnya.”+ 30 Lam’akandataka akambo asɔ, anto efula wakonge la mbetawɔ le nde.
31 Ko Yeso akatɛ ase Juda wakawetawɔ ate: “Naka nyu ntshikala lo wetshelo ami, kete nyu nyekɔ mɛtɛ ambeki ami, 32 ndo nyayeya akambo wa mɛtɛ,+ ko akambo wa mɛtɛ wayonyotshungola.”+ 33 Vɔ wakookadimola vate: “Sho tekɔ tokanula ta Abrahama ndo ndooko lushi lakatayala mfumbe k’onto. Lande na katayɛ wate: ‘Nyayotshungɔ’?” 34 Yeso akaakadimola ate: “Lo mɛtɛ kanyotɛmi nte, onto tshɛ lasala pɛkato ekɔ mfumbe ka pɛkato.+ 35 Mfumbe hatshikala pondjo lo luudu la nkumɛnde, koko ɔna tshikalaka pondjo. 36 Ɔnkɔnɛ, naka Ɔna nyotshungola, kete mɛtɛ nyayotshungɔ. 37 Dimi mbeyaka dia nyekɔ tokanula ta Abrahama. Koko nyekɔ lo nyanga dia ndjakami, nɛ dia ɔtɛkɛta ami hawohame le nyu. 38 Akambo wakamɛnyi le Papa+ mbatami, koko nyu salaka akambo wokanyu oma le shɛnyu.” 39 Vɔ wakookadimola vate: “Abrahama kele shɛso.” Yeso akawatɛ ate: “Otondonga nyu nyekɔ ana+ wa Abrahama, tshike nyekɔ lo nsala akambo wa Abrahama. 40 Koko kakianɛ, nyu nyekɔ lo nyanga dia ndjakami, dimi onto lanyotɛ akambo wa mɛtɛ wakamoke oma le Nzambi.+ Abrahama kosala dui sɔ. 41 Nyu nyekɔ lo nsala akambo wa shɛnyu.” Vɔ wakawotɛ vate: “Sho bu ana wotwe oma lo awui wa mindo,* tekɔ la Shɛso ɔtɔi, Nzambi.”
42 Yeso akawatɛ ate: “Otondonga Nzambi kele Shɛnyu, tshike nyotomboka ngandji,+ nɛ dia oma le Nzambi mbakamaye ndo mbemi lanɛ. Aha dimɛ mbakɔshi yɛdikɔ ya ndja, koko Nde kakantome.+ 43 Lande na kahanyashihodia kɛnɛ katami? Nɛ dia nyu hanyokoke mpokamɛ ɛtɛkɛta ami. 44 Nyu ndja oma le shɛnyu Diabolo ndo nyekɔ lo nanga nsala lolango la shɛnyu.+ Nde aki ondjakanyi oma ko lam’akandatatɛ*+ ndo nde koshikikala lo mɛtɛ, nɛ dia mɛtɛ keema le nde. Etena katondotaka kashi, nde tɔtɛkɛtaka lo ndjela tokanyi tande hita, nɛ dia nde ekɔ kanga kashi ndo she kashi.+ 45 Lam’ele dimi lekɔ lo nyotɛ mɛtɛ, nyu hanyombetawɔ. 46 Akɔna l’atei anyu akoka mɛnya dia dimi lekɔ otshi wa pɛkato? Naka lekɔ lo mbuta mɛtɛ, lande na kahanyambetawɔ? 47 Onto laki Nzambi pokamɛka ɛtɛkɛta wa Nzambi.+ Diakɔ diahanyahokamɛ, nɛ dia nyu keema anto waki Nzambi.”+
48 Ase Juda wakookadimola vate: “Shi tekɔ l’ɔkɔkɔ w’oshika wa mbuta ɔnɛ: ‘Wɛ ekɔ ose Samariya+ ndo ekɔ la ɔdiɛngɛ’?”+ 49 Yeso akaakadimola ate: “Dimi bu la ɔdiɛngɛ, dimi nɛmiyaka Papa, koko nyu mbamɔnyɔla. 50 Koko dimi haayayangɛ+ lotombo. Ekɔ Onto ɔmɔtshi layanga ndo lalombosha. 51 Lo mɛtɛ kanyotɛmi nte, naka onto nkitanyiya ɛtɛkɛta ami, nde havɔki pondjo.”+ 52 Ase Juda wakawotɛ vate: “Tamboshikikɛ mɛtɛ dia wɛ ekɔ la ɔdiɛngɛ. Abrahama akavu ndo amvutshi wakavu, koko wɛ ekɔ lo mbuta ɔnɛ: ‘Naka onto nkitanyiya ɛtɛkɛta ami, nde halɛtaki nyɔi pondjo.’ 53 Onde wɛ ndeka shɛso Abrahama lakavu? Ndo amvutshi wakavu. Ko wɛ atayɛ eeyɛ?” 54 Yeso akakadimola ate: “Naka dimi ndjatombola, kete lotombo lami lekɔ anyanya. Papa, ɔnɛ latanyu dia nde kele Nzambi kanyu kantombola.+ 55 Nyu hanyoweye,+ koko dimi mbeeyaka.+ Ndo otomota nte dimi haaweye, tshike dimi laya kanga kashi oko nyu. Koko dimi mbeeyaka ndo dimi kitanyiyaka ɛtɛkɛta ande. 56 Shɛnyu Abrahama akangɛnangɛna efula lam’akandalongamɛka dia mɛna lushi lami, ko nde akaliɛnyi ndo akangɛnangɛna.”+ 57 Ko ase Juda wakawotɛ vate: “Wɛ atakotsha kaanga ɛnɔnyi 50 ko wɛ tɛna Abrahama?” 58 Yeso akawatɛ ate: “Lo mɛtɛ kanyotɛmi nte, la ntondo ka Abrahama mbotɔ, dimi lakikɔ.”+ 59 Ko vɔ wakatɔngɔna ave dia mbooka, koko Yeso akayashɛ ndo akatombe oma lo tɛmpɛlɔ.
9 Lam’akatetaka Yeso, nde akɛnyi pami kɛmɔtshi kakotɔ tshungu. 2 Ko ambeki ande wakawombola vate: “Rabi,+ akasale pɛkato dia nde mbotɔ tshungu, onde ndamɛ kana ambutshi ande?” 3 Yeso akaakadimola ate: “Aha pami kɛnɛ kana ambutshi ande mbakasale pɛkato, koko nde ekɔ tshungu dia etsha waki Nzambi mɛnama lo sɛkɛ lo dikambo diande.+ 4 Sho pombaka nkamba olimu wa Ɔnɛ lakantome etena kekeso la yanyi.+ Otsho wekɔ lo ndjaye, etena kele ndooko onto lakoka nkamba olimu. 5 Edja tshɛ kemi l’andja ɔnɛ, dimi lekɔ osase+ w’andja.” 6 L’ɔkɔngɔ wa nde mbuta akambo asɔ, nde akahɔngɔla nsɔyi la nkɛtɛ, akasɔhanya la ditshu ndo akamame lo washo wa pami kakɔ+ 7 ndo akawotɛ ate: “Tshɔka tɔkɛ l’oduwa wa Silɔama” (kitshimudi ate, “Ntomama”). Nde akatshu, akatɔka ko akakalola ɔsɛna.+
8 Ko asukanyi ande ndo anto tshɛ wakawɛnaka alɔmbana diangɔ wakate vate: “Shi ɔnɛ kele pami kakadjasɛka lanɛ ndo kakalɔmbanaka diangɔ?” 9 Anto amɔtshi wakate vate: “Nde ɔnɛ.” Akina wakate vate: “Aha nde, koko mfɔna mbafɔnawɔ.” Pami kakɔ akate ate: “Dimi ɔnɛ.” 10 Ko vɔ wakawombola vate: “Ko ngande wambodihɔ washo ayɛ?” 11 Nde akakadimola ate: “Pami kelɛwɔ Yeso akasɔhi yema ya nkɛtɛ, akayimami lo washo ami ndo akambute ate: ‘Tshɔka lo Silɔama tɔkɛ.’+ Ko dimi lakatshwe, lakatɔka ko lɛna.” 12 Ko vɔ wakawotɛ vate: “Lende ele pami kakɔ?” Nde akate ate: “Haleye.”
13 Vɔ wakatɔlɛ pami kakɔ kaki tshungu le Afarisɛ. 14 Oko ahoma, aki lushi la Sabato+ mbakasɔhɛ Yeso nkɛtɛ ndo mbakandɔɔsɛnya.+ 15 Ɔnkɔnɛ l’etena kɛsɔ, Afarisɛ vɔ lawɔ wakawombola woho wakandasɛnyi. Nde akawatɛ ate: “Nde akamami nkɛtɛ ya lɔsɔha lo washo ami ndo lakatshwe tɔka, diakɔ diomɛna.” 16 Ko Afarisɛ amɔtshi wakate vate: “Nde keema onto loye oma le Nzambi, nɛ dia nde halɛmiya Sabato.”+ Akina wakate vate: “Ngande wakoka otshi wa pɛkato nsala tolembetelo ta nganɛ?”+ Ko vɔ wakatɔna.+ 17 Vɔ wakatɛ pami kaki tshungu nto ɔnɛ: “Atayɛ lo dikambo diande, lam’ele nde mbakakodihodi washo?” Pami kakɔ akate ate: “Nde ekɔ omvutshi.”
18 Koko, ase Juda kombetawɔ dia nde aki tshungu ko ambɔsɛna polo lam’akawelɛ ambutshi ande. 19 Vɔ wakambola ambutshi ande vate: “Onde ɔnɛ kele ɔnanyu latanyu nyate akotɔ tshungu? Ko lande na kele nde ɛna?” 20 Ambutshi ande wakakadimola vate: “Sho mbeyaka dia nde ekɔ ɔnaso ndo nde akotɔ tshungu. 21 Koko, sho hateye woho wambondokoma lo mɛna kana onto lakɔɔsɛnyisha, sho hatoweye. Nyowombole, nde aya opalanga. Ndamɛ atɛkɛtɛ.” 22 Ambutshi ande wakate akambo asɔ, nɛ dia vɔ wakokaka ewandji w’ɔtɛmwɛlɔ w’ase Juda+ wɔma dikambo vɔ wakadje sheke dia onto tshɛ layota lo sɛkɛ ɔnɛ Yeso ekɔ Kristo pombaka mbitshanyema oma lo shinangɔnga.+ 23 Diakɔ diakate ambutshi ande vate: “Nde aya opalanga. Nyowombole.”
24 Ko vɔ wakelɛ pami kakɔ kaki tshungu mbala ka 2 ndo wakawotɛ vate: “Tombola Nzambi, sho mbeyaka dia pami kɛnɛ ekɔ otshi wa pɛkato.” 25 Nde akaakadimola ate: “Naka nde ekɔ otshi wa pɛkato, dimi haleye. Dui ɔtɔi dieyami ele, dimi laki tshungu, koko lɛna.” 26 Ko vɔ wakawombola vate: “Akandakosale? Ngande wakandadihodi washo ayɛ?” 27 Nde akaakadimola ate: “Dimi lakashidi nyotɛ, koko nyu hanyoke. Lande na konyomimbola nto? Onde ndo nyu mbolanga monga ambeki ande?” 28 Ko vɔ wakawotɛ la diɔnyɔ tshɛ vate: “Wɛ kele ombeki wa pami kɛsɔ, koko sho tekɔ ambeki wa Mɔsɛ. 29 Sho mbeyaka dia Nzambi akatɛkɛtaka la Mɔsɛ, koko onto ɔnɛ, sho hateye oma lɛnɛ oyende.” 30 Pami kakɔ akaakadimola ate: “Ekɔ mɛtɛ dikambo dia diambo dia nyu hanyeye oma lɛnɛ oyende, koko nde akandjihodi washo. 31 Sho mbeyaka dia Nzambi hahokamɛ alɔmbɛlɔ w’atshi wa pɛkato,+ koko onto loka Nzambi wɔma ndo lasala lolango lande, Nzambi mbohokamɛka.+ 32 Oma ko edjedja, tatokaka dia onto ɔmɔtshi akadihola washo w’onto lakotɔ tshungu. 33 Otonga pami kɛnɛ haye oma le Nzambi, tshike totondosala ndooko dikambo.”+ 34 Vɔ wakookadimola vate: “Wɛ akotɔ tshavu lo pɛkato, ko wɛ otetsha?” Ko vɔ wakosokola l’andja!+
35 Yeso akoke dia wamboosokola l’andja ndo lam’akandɛnyi pami kakɔ, nde akawombola ate: “Onde wɛ ekɔ la mbetawɔ le Ɔna onto?” 36 Pami kakɔ akakadimola ate: “Yɔnɛ, nde eende kele monge la mbetawɔ le nde?” 37 Yeso akawotɛ ate: “Wɛ akawɛnyi, ɔnɛ latɛkɛta la yɛ ɔsɔ kele nde.” 38 Nde akate ate: “Dimi lekɔ la mbetawɔ le nde, Nkumadiɔndjɔ.” Ko nde akalɛmiya* Yeso. 39 Yeso akate ate: “Dikambo dia kilombo kɛnɛ mbakamaye l’andja ɔnɛ: Dia wanɛ wahɛnyi mɛna+ ndo wanɛ wɛna monga totshungu.”+ 40 Afarisɛ waki kaamɛ la nde wakoke akambo asɔ ko wakawotɛ vate: “Onde ndo sho mbele totshungu?” 41 Yeso akawatɛ ate: “Otonyonga totshungu, tshike nyu bu la pɛkato. Koko lam’ele nyekɔ lo mbuta nyate: ‘Sho mɛnaka,’ pɛkato yanyu yekɔ lo ntshikala le nyu.”+
10 “Lo mɛtɛ kanyotɛmi nte, ɔnɛ lahɔtɔ lo soko dia lokoto l’ɛkɔkɔ, koko mbɔtɔka oma lo dihole dikina ekɔ wovi ndo ɔpɔtwanyi.+ 2 Koko olami w’ɛkɔkɔ+ mbɔtɔka oma lo soko. 3 Olami wa soko mbodiholɛka+ lokuke, ɛkɔkɔ pokamɛka dui diande.+ Nde mbelɛka ɛkɔkɔ ande hita lo nkombo yawɔ ndo mbalɔmbɔlaka otsha l’andja. 4 Lam’atotombaka ɛkɔkɔ ande tshɛ, nde mbetaka la ntondo kawɔ ndo ɛkɔkɔ mboyelaka, nɛ dia vɔ mbeyaka dui diande. 5 Lo weho akɔ tshɛ, vɔ hawotoyelaka onto okina, koko vɔ toolawɔka, nɛ dia vɔ haweye dui di’anto akina.” 6 Yeso akakambe la wɛɛla ɔsɔ dikambo diawɔ, koko vɔ koshihodia kɛnɛ kakandalangaka mbatɛ.
7 Ko Yeso akate nto ate: “Lo mɛtɛ kanyotɛmi nte, dimi kele soko diahomba ɛkɔkɔ+ mbɔtɔ. 8 Wanɛ tshɛ wakaye lo dihole diami wekɔ wevi ndo apɔtwanyi, koko ɛkɔkɔ kombahokamɛ. 9 Dimi lekɔ soko. Ɔnɛ tshɛ lɔtɔ oma le mi ayoshimbamɛ, ayɔtɔ ndo ayotomba ko ayotana adiyo wa ndɛ.+ 10 Wovi toyaka paka dia mbiva, ndjaka ndo ndanya.+ Dimi lamboya dia anto nkondja lɔsɛnɔ ndo dia vɔ monga la lɔ lo yɛdikɔ y’efula. 11 Dimi lekɔ olami w’ɔlɔlɔ w’ɛkɔkɔ.+ Olami w’ɔlɔlɔ w’ɛkɔkɔ kimɔka lɔsɛnɔ* lande lo wahɔ w’ɛkɔkɔ.+ 12 Ose olimu lele bu olami w’ɛkɔkɔ ndo lele bu kanga ɛkɔkɔ tɛnaka laondo layaye, ko nde totshikaka ɛkɔkɔ ndo tolawɔka, ko laondo towandaka ndo taahandjolaka, 13 nɛ dia nde ekɔ ose olimu ndo nde hayakiyanya dikambo di’ɛkɔkɔ. 14 Dimi lekɔ olami w’ɔlɔlɔ w’ɛkɔkɔ. Dimi mbeyaka ɛkɔkɔ ami ndo ɛkɔkɔ ami mbeyakami,+ 15 oko wambeya Papa ndo weyami Papa,+ dimi layanga nkimɔ lɔsɛnɔ* lami dikambo di’ɛkɔkɔ.+
16 “Dimi lekɔ la ɛkɔkɔ ekina waha wa lo lokoto lɔnɛ.+ Dimi layowaela ndo vɔ lɔkɔ ndo vɔ wayoka dui diami, ko wayoyala olui 1 ndo wayonga la olami 1.+ 17 Diakɔ diananga Papa,+ nɛ dia dimi layanga nkimɔ lɔsɛnɔ* lami+ dia dimi ndjolikondja nto. 18 Ndooko onto lambɔmpɔtɔlalɔ, koko dimi lambolikimɔ la lolango lami hita. Dimi lekɔ la lotshungɔ la likimɔ ndo lekɔ la lotshungɔ la likondja nto.+ Dimi lakalongola didjango dia dikambo sɔ oma le Papa.”
19 Ase Juda+ wakaatɔna nto l’ɔtɛ w’ɛtɛkɛta ɛsɔ. 20 Efula ka l’atei awɔ wakataka vate: “Nde ekɔ la ɔdiɛngɛ ndo nde ekɔ lo mɛna tɔbɛdi. Lande na koohokamɛnyu?” 21 Akina wakataka vate: “Onto lele la ɔdiɛngɛ hate awui wa ngasɔ. Ɔdiɛngɛ hakoke nsɛnya kanga tshungu, shi mɛtɛ?”
22 L’etena kɛsɔ, Fɛtɛ k’Osapwelo kakasalema la Jɛrusalɛma. Aki lo nshi ya tshitshi, 23 ndo Yeso akatakɛndakɛndaka lo tɛmpɛlɔ lo dɛfu dia Sɔlɔmɔna.+ 24 Ko ase Juda wakoodinge ndo wakawotɛ vate: “Polo ndo l’etena kakɔna kayoyotetemala totshika* l’okandokando? Naka wɛ kele Kristo, otote hwe.” 25 Yeso akaakadimola ate: “Dimi lakanyote, koko nyu hanyetawɔ. Akambo wasalami lo lokombo la Papa mɛnyaka eemi.+ 26 Koko nyu hanyetawɔ, nɛ dia nyu keema ɛkɔkɔ ami.+ 27 Ɛkɔkɔ ami pokamɛka dui diami, dimi mbaeyaka ndo vɔ ndjelakami.+ 28 Dimi mbashaka lɔsɛnɔ la pondjo,+ ndo lo weho akɔ tshɛ, vɔ hawolanyemaki pondjo ndo ndooko onto layɔmpɔtɔlawɔ oma lo lonya lami.+ 29 Kɛnɛ kakambisha Papa ndeka diangɔ dikina tshɛ ndo ndooko onto lakoka mpɔtɔla Papa+ diangɔ diakɔ oma lo lonya lande. 30 Dimi la Papa tekɔ 1.”*+
31 Mbala kekina nto, ase Juda wakatɔngɔna ave dia mbooka. 32 Yeso akawatɛ ate: “Dimi lambonyɛnya akambo efula w’ɛlɔlɔ w’oma le Papa. L’atei w’akambo asɔ, l’ɔtɛ wa dikambo diakɔna diambokanyu ave?” 33 Ase Juda wakookadimola vate: “Aha l’ɔtɛ wa dikambo di’ɔlɔlɔ mbakookaso ave, koko l’ɔtɛ wamboyɔtɛnga Nzambi+ ndo nɛ dia wɛ ekɔ onto, koko ekɔ lo ndjaɔsa oko nzambi.” 34 Yeso akaakadimola ate: “Onde hafundami lo Ɛlɛmbɛ anyu ɔnɛ ‘lakate nte: “Nyu nyekɔ tozambizambi”’?*+ 35 Naka Nzambi mbelɛka anto wele ɔtɛkɛta ande wakaye le wɔ ɔnɛ ‘tozambizambi,’+ ko afundelo hawokoke tshikitanyema, 36 onde nyombutɛ dimi onto lele Papa akakidia ndo akantome l’andja nyate: ‘Wɛ ambɔtɛnga Nzambi,’ nɛ dia lakatshi nte, ‘dimi lekɔ Ɔna Nzambi?’+ 37 Naka aha elimu wa Papa kasalami, tanyombetawɔke. 38 Ko naka elimu ande kasalami, oyadi kaanga nyu hanyombetawɔ, nyetawɔ elimu akɔ+ dia nyu mbeya ndo ntetemala mbeya dia Papa ekɔ kaamɛ la mi ndo dimi lekɔ kaamɛ la Papa.”+ 39 Ko vɔ wakayange nto dia mbonda, koko nde akanya demba.
40 Ko nde akatehɔ nto la wedi wa Jɔrdana lo dihole diakabatizaka Joani anto ntondo,+ ko nde akatotshikala lɛkɔ. 41 Anto efula wakaye le nde ndo wakatatɛ mbuta vate: “Joani kosala kaanga djembetelo 1, koko akambo tshɛ wakate Joani lo lokombo la pami kɛnɛ wekɔ mɛtɛ.”+ 42 Ko anto efula wa lɛkɔ wakonge la mbetawɔ le nde.
11 Pami kɛmɔtshi, lokombo lande Lazaro aki la hemɔ. Nde aki ose Bɛtaniya, ngelo kakadjasɛka ndo Mariya la Maata,+ akadiyɛnde. 2 Mariya ɔsɔ mbakatɛ Nkumadiɔndjɔ malashi ndo mbakakitola ekolo ande la divo+ diande. Lazaro ɔnango mbaki la hemɔ. 3 Ɔnkɔnɛ, akadiyɛnde wakatomɛ Yeso dikɛndji ɔnɛ: “Nkumadiɔndjɔ, eenda ɔnɛ lokayɛ ngandji ekɔ la hemɔ.” 4 Lam’akoke Yeso dui sɔ, nde akate ate: “Hemɔ kɛsɔ bu l’oyango wa mbokonya lo nyɔi, koko kekɔ dia lotombo la Nzambi, dia Ɔna Nzambi+ tombɔma lo tshimbo yatɔ.”
5 Yeso akokaka Maata nde la kadiyɛnde ndo Lazaro ngandji. 6 Koko lam’akoke Yeso dia Lazaro ekɔ la hemɔ, nde akatshikala nto lɛnɛ akinde nshi 2. 7 Oma laasɔ, Yeso akatɛ ambeki ande ate: “Totshu nto la Judeya.” 8 Ambeki ande wakawotɛ vate: “Rabi,+ atete edja kakayangaka ase Judeya dia kooka ave,+ ko wɛ otatshu lɛkɔ nto?” 9 Yeso akaakadimola ate: “Shi wenya 12 mbonga la yanyi?+ Naka onto nkɛndakɛnda la yanyi, nde hatotakana kaanga lo ɛngɔ 1, nɛ dia nde ekɔ lo mɛna osase w’andja ɔnɛ. 10 Koko naka onto nkɛndakɛnda l’otsho, nde ayotakana, nɛ dia osase keema le nde.”
11 L’ɔkɔngɔ wa nde mbuta akambo asɔ, nde akakotsha ate: “Ɔngɛnyi aso Lazaro ambolala djɔ,+ koko dimi layanga ntshɔ lɛkɔ dia towemula.” 12 Ko ambeki ande wakawotɛ vate: “Nkumadiɔndjɔ, naka lo djɔ kende, kete nde ayemɔ.” 13 Yeso akataka dia nde ambovɔ, koko vɔ wakafɔnyaka dia nde akatɛkɛtaka dikambo dia djɔ ya mɛtɛ. 14 Ko l’etena kɛsɔ Yeso akaahonolɛ ate: “Lazaro ambovɔ.+ 15 Ekɔ dimɛna le nyu lo woho wahamongi lɛkɔ dia nyu monga la mbetawɔ. Koko nyoyete totshu le nde.” 16 Ko Tɔma lakawelɛka ɔnɛ Diaasa akatɛ asekande ambeki ate: “Nyoyete totshu ndo sho kele totovu kaamɛ la nde.”+
17 Lam’akakome Yeso, nde akatane dia Lazaro aya nshi 4 lo diombo.* 18 Bɛtaniya akangana la Jɛrusalɛma milɛ* suke la 2. 19 Ndo ase Juda efula wakaye le Maata la Mariya dia ndjaasamba lo nyɔi k’ɔnangɛwɔ. 20 Lam’akoke Maata dia Yeso ekɔ lo ndjaye, nde akatshu dia tohomana la nde, koko Mariya+ akatshikala odjashi la ngelo. 21 Ko Maata akatɛ Yeso ate: “Nkumadiɔndjɔ, otondonga wɛ aki lanɛ, tshike ɔnalengo havwe. 22 Koko kaanga kakianɛ dimi mbeyaka dia kɛnɛ tshɛ kayoyɔlɔmba Nzambi, Nzambi ayokosha.” 23 Yeso akawotɛ ate: “Ɔnanyɔ ayolɔ.” 24 Maata akawotɛ ate: “Dimi mbeyaka dia nde ayolɔ lo eolwelo+ ka lushi l’ekomelo.” 25 Yeso akawotɛ ate: “Dimi lekɔ eolwelo ndo lɔsɛnɔ.+ Onto longa la mbetawɔ le mi, oyadi kaanga nde kovɔka, nde ayoyala la lɔsɛnɔ nto, 26 ndo onto tshɛ lasɛna ndo longa la mbetawɔ le mi havɔki pondjo.+ Onde wɛ mbetawɔka dikambo sɔ?” 27 Maata akawotɛ ate: “Eelo, Nkumadiɔndjɔ. Dimi lambetawɔ dia wɛ ekɔ Kristo Ɔna Nzambi, ɔnɛ lamboya l’andja.” 28 Lam’akandate ngasɔ, nde akatshu ndo akatelɛ Mariya wa kadiyɛnde, awotɛ lo hiɔtɛhɔtɛ ate: “Ombetsha+ amboya, nde ekɔ lo kelɛ.” 29 Lam’akoke Mariya ngasɔ, nde akemala esadi ndo akatshu otsha le nde.
30 Laasɔ ko Yeso atɔtɔ lo ngelo, eke paka lo dihole diakayohomana Maata la nde. 31 Lam’akɛnyi ase Juda waki kaamɛ la Mariya lo luudu ndo wakoosambaka dia Mariya ambonɛ esadi esadi ndo otatombe, vɔ wakooyele, wafɔnya dia nde otatshu otsha la diombo*+ dia tolela lɛkɔ. 32 Lam’akakome Mariya lɛnɛ aki Yeso ndo lam’akandawɛnyi, nde akayakɔsha l’ekolo ande ko akawotɛ ate: “Nkumadiɔndjɔ, otondonga wɛ aki lanɛ, tshike ɔnalengo havwe.” 33 Lam’akɛnyi Yeso Mariya ndo ase Juda wakaye kaamɛ la nde walela, nde akayakiyanya* efula, akatshimbe wɔɔngɔ. 34 Nde akate ate: “Lende akanyookundɛ?” Vɔ wakawotɛ vate: “Nkumadiɔndjɔ, totshu tende.” 35 Yeso akalele.+ 36 Ko ase Juda wakatatɛ mbuta vate: “Nyende, nde mɛtɛ akawokaka ngandji efula!” 37 Koko amɔtshi l’atei awɔ wakate vate: “Onde pami kakasɛnya kanga tshungu+ kɛnɛ takandakoke nsala woho waha nde mvɔ?”
38 L’ɔkɔngɔ wa Yeso ndjakiyanya efula nto, nde akatshu la diombo.* Diɔ diaki wooko wa dive ndo wakadifɛ la dive. 39 Yeso akate ate: “Nyonya dive.” Maata, kadiyɛ ɔnɛ lakavu akawotɛ ate: “Nkumadiɔndjɔ, odo waya solo, nɛ dia aya nshi 4 yambowookundɛ.” 40 Yeso akawotɛ ate: “Onde dimi hakote nte naka wɛ monga la mbetawɔ, kete wɛ ayɛna lotombo la Nzambi?”+ 41 Ko vɔ wakanya dive. Yeso akaalɛ l’olongo+ ndo akate ate: “Papa, dimi lambokosha losaka nɛ dia wɛ pokamɛkami. 42 Lo mɛtɛ, dimi mbeyaka dia wɛ topokamɛka nshi tshɛ, koko l’ɔtɛ w’olui w’anto wemadi lanɛ kakɔlɔmbami dia vɔ mbetawɔ dia wɛ mbakantome.”+ 43 Lam’akandashidiya mbuta akambo asɔ, nde akate la dui dia wolo ate: “Lazaro, tomba!”+ 44 Pami kakavu akatombe ɔmbami bɛtshi di’ahɔndɔ l’anya ndo l’ekolo, ndo elungi kande kakɔmbama la dihɔndɔ. Yeso akawatɛ ate: “Nyowɔmbɔlɛ ndo nyootshike atshu.”
45 Ɔnkɔnɛ, ase Juda efula wakaye le Mariya ndo wakɛnyi kɛnɛ kakasale Yeso kɛsɔ wakonge la mbetawɔ le nde,+ 46 koko amɔtshi l’atei awɔ wakatshu le Afarisɛ ndo wakatowatɛ akambo wakasale Yeso. 47 Ko ewandji w’ɛlɔmbɛdi la Afarisɛ wakasanganya ase tominadi ta laadiko t’ase Juda ndo wakate vate: “Ahombaso nsala lam’ele pami kɛnɛ salaka tolembetelo efula?+ 48 Naka sho mbotshika dia nde ntetemala, anto tshɛ wayonga la mbetawɔ le nde, ko ase Rɔmɔ wayoyotɔhɔtɔla dihole* diaso ndo wodja aso.” 49 Koko ɔmɔtshi la l’atei awɔ, Kayifasi+ laki ɔlɔmbɛdi a laadiko ɔnɔnyi ɔsɔ akawatɛ ate: “Nyu hanyeye ndooko dui, 50 ndo hanyɛnyi dia ekɔ dui dia dimɛna le nyu dia onto 1 mvɔ lo wahɔ w’anto lo dihole dia wodja w’otondo ndanyema.” 51 Kɛnɛ kakandate kɛsɔ kondja oma le nde ndamɛ, koko lam’ele nde aki ɔlɔmbɛdi a laadiko ɔnɔnyi ɔsɔ, nde akate prɔfɛsiya dia Yeso akahombe mvɔ dikambo dia wodja, 52 ndo aha tsho dikambo dia wodja, koko ndo dia ana wa Nzambi wakahandjɔnɛ sanganyema kaamɛ. 53 Ɔnkɔnɛ, oma ko lushi lɔsɔ vɔ wakɔtɔ sheke dia mbodiaka.
54 Diakɔ diele Yeso kombetetaka nto lo sɛkɛ l’atei w’ase Juda. Nde akamɔ oma lɛkɔ ko akatshu l’ɛtshi ka nkɛtɛ kaki suke l’oswe, l’osomba wakawelɛka Efrayimɛ+ ndo nde akatotshikala lɛkɔ nde la ambeki ande. 55 L’etena kɛsɔ, dambo di’Elekanelo+ di’ase Juda diaki suke ndo anto efula wakamɔka oma lo ngelo yawɔ ko wakatshɔka la Jɛrusalɛma la ntondo ka dambo di’Elekanelo dia vɔ toyaɛdia lo ndjela ɛlɛmbɛ. 56 Vɔ wakayangaka Yeso ndo wakatanɛka lam’asawɔ etena kakawemalaka elui elui lo tɛmpɛlɔ vate: “Afɔnyanyu? Onde nde hatoya lo fɛtɛ?” 57 Ewandji w’ɛlɔmbɛdi la Afarisɛ wakadjanga ɔnɛ naka onto ambeya lɛnɛ eende, nde pombaka mbuta dia vɔ towonda.*
12 Nshi 6 la ntondo ka dambo di’Elekanelo, Yeso akakome la Bɛtaniya, lɛnɛ aki Lazaro+ lakandolola oma lo nyɔi. 2 Ko wakɔɔlɔngɔsɔlɛ dambo lɛkɔ ndo Maata akaakitshɛka diangɔ la mɛsa.+ Lazaro aki l’atei w’anto wakalɛka* kaamɛ la nde. 3 Ko Mariya akɔshi livɛrɛ* la malashi wa nardɔ ka dimɛna ndo k’oshinga wolo efula, ko akatɛ Yeso l’ekolo ndo akakitola ekolo akɔ la divo diande. Luudu lakalole la nsolo ka malashi akɔ.+ 4 Koko Judasɛ Iskariyɔtɛ,+ ɔtɔi ɔmɔtshi l’atei w’ambeki ande laki suke la mbofunga akate ate: 5 “Lande na kahasondjami malashi ɔnɛ lo dɛnariyo* 300 ko mbisha ase wola falanga?” 6 Judasɛ akate ngasɔ, aha nɛ dia nde akayakiyanyaka dikambo dia ase wola, koko nɛ dia nde aki wovi. Nde kakombaka shɛtɛshɛtɛ ya falanga, koko nde akavaka falanga yakawadjaka lɔkɔ. 7 Ko Yeso akate ate: “Tshikande asale kɛnɛ kasalande dia nɔngɔsɔla demba diami dikambo dia lushi l’okundelo+ ami. 8 Nɛ dia nyu nyekɔ+ nshi tshɛ kaamɛ la ase wola, koko dimi+ hantongaka la nyu nshi tshɛ.”
9 Lam’akeye olui a woke w’ase Juda dia nde aki lɛkɔ, vɔ wakaye, aha tsho dia ndjenda Yeso, koko ndo dia ndjenda Lazaro, ɔnɛ lakandolola oma lo nyɔi.+ 10 Ko ewandji w’ɛlɔmbɛdi wakadje sheke dia ndjaka ndo Lazaro, 11 nɛ dia l’ɔtɛ ande ase Juda efula wakatshɔka lɛkɔ ndo wakongaka la mbetawɔ le Yeso.+
12 La wedi a pindju, olui w’anto wakaye lo fɛtɛ wakoke dia Yeso ekɔ lo ndjaye la Jɛrusalɛma. 13 Vɔ wakahembola waanga w’atoko ndo wakatshu dia toolongola. Ndo vɔ wakatatɛ mbuta la dui dia wolo vate: “Tambokɔlɔmba, oshimbee! Ɔnɛ layaye lo lokombo+ la Jehowa* atshɔkwame, Nkumekanga k’Isariyɛlɛ!”+ 14 Lam’akatane Yeso ɔsɔngɔ wa mponda, nde akadjasɛ lɔkɔ+ oko wakadiafundama ɔnɛ: 15 “Wɛ ɔna womoto la Siɔna, tokake wɔma. Eenda, nkumekanga kayɛ oyaye, ahemi laadiko dia ɔsɔngɔ wa mponda.”+ 16 L’etatelo ambeki ande koshihodia akambo asɔ, koko etena kakayotombɔma+ Yeso, vɔ wakayohɔ dia akambo asɔ wakafundama lo dikambo diande ndo wakoosalɛwɔ.+
17 Ndo olui w’anto waki kaamɛ la nde etena kakandelɛ Lazaro oma lo diombo*+ ndo kakandawolola oma lo nyɔi wakatetemala nsanya dikambo diakɔ.+ 18 Diakɔ diele elui w’anto wakaye ndo dia ndjowɛna nɛ dia vɔ wakoke djembetelo yakandasale shɔ. 19 Ko Afarisɛ wakatanɛ vate: “Nyekɔ lo mɛna? Ndooko k’ɔlɔ kasalaso. Nyende, andja w’otondo wotooyele.”+
20 Ndo ase Ngirika amɔtshi wakaye dia ndjɔtɛmɔla lo fɛtɛ. 21 Vɔ wakelɛ Filipɛ+ laki ose Bɛtɛsayida ka la Ngalileya ko wakawotɛ vate: “Yɔnɛ, tekɔ lo nanga mɛna Yeso.” 22 Filipɛ akatshu, akatotɛ Andɛlɛ, ko Andɛlɛ nde la Filipɛ wakatotɛ Yeso.
23 Yeso akaakadimola ate: “Wonya ambokoka wa Ɔna onto tombɔma.+ 24 Lo mɛtɛ kanyotɛmi nte, naka lɔsɛkɛ l’eponga halɔkwɛ lo nkɛtɛ ko lɔ mvɔ, lɔ layotshikalaka paka lɔsɛkɛ 1, ko naka lɔ mvɔ,+ kete lɔ layotondja nsɛkɛ efula. 25 Onto tshɛ lalanga lɔsɛnɔ*+ lande ayolishisha, koko onto tshɛ lahetsha lɔsɛnɔ* lande l’andja ɔnɛ ayolikokɛ dia nkondja lɔsɛnɔ la pondjo.+ 26 Naka onto alanga kambɛmi olimu, nde andjele, ndo lɛnɛ ayomonga kayonga ndo onto lankambɛ olimu.+ Naka onto alanga kambɛmi olimu, Papa ayowosha kɛnɛmɔ. 27 Dimi* lambohandjɔ wɔɔngɔ.+ Ayomota nto? Papa, onshimbe lo wonya ɔnɛ.+ Koko dia dikambo diakɔ mbakamaye la nkɛtɛ. 28 Papa, otombole lokombo layɛ.” Ko dui+ diakaye oma l’olongo ate: “Dimi lakalitombola ndo layolitombola nto.”+
29 Lam’akoke olui w’anto wakemala laawɔ dikambo sɔ, vɔ wakate ɔnɛ ɔsɔ dikungola. Akina wakate vate: “Ondjelo mbɔtɛkɛtshi la nde.” 30 Yeso akaakadimola ate: “Dui sɔ hadiokɛmi dikambo diami, koko dikambo dianyu. 31 Kilombo k’andja ɔnɛ kekɔ lo salema l’etena kɛnɛ ndo l’etena kɛnɛ owandji w’andja ɔnɛ+ ayokashema.+ 32 Koko naka dimi minyɛma oma la nkɛtɛ,+ kete dimi layokotola weho tshɛ w’anto le mi.” 33 Nde akate akambo asɔ dia mɛnya woho wa nyɔi kakinde suke la mvɔ.+ 34 Ko olui w’anto wakawombola vate: “Takoke oma l’Ɛlɛmbɛ dia Kristo tshikalaka pondjo.+ Ko woho akɔna woyota wate Ɔna onto pombaka minyɛma?+ Ele Ɔna onto latayɛ ɔsɔ?” 35 Ko Yeso akawatɛ ate: “Osase wayoyala l’atei anyu lo tshanda mɔtshi. Nyɔkɛndɛkɛndɛ etena kenyu la osase diaha wodjima nyahemɛ. Onto tshɛ lakɛndakɛnda lo wodjima heye lɛnɛ atandatshu.+ 36 Nyonge la mbetawɔ le osase etena kenyu la osase dia nyu monga ana w’osase.”+
Yeso akate akambo asɔ ko akatshu ndo akatoyashɛ. 37 Kaanga mbakandasale tolembetelo efula la ntondo kawɔ, vɔ komonga la mbetawɔ le nde, 38 dia nkotsha kɛnɛ kakate omvutshi Isaya ɔnɛ: “Jehowa* le, akɔna akonge la mbetawɔ lo kɛnɛ kakawoke oma le so?*+ Ndo le na akɛnama+ lonya la Jehowa?”* 39 Vɔ kokoka mbetawɔ, nɛ dia Isaya akate nto ate: 40 “Nde akadihe washo awɔ, aketɛ etema awɔ lonyu diaha vɔ mɛna la washo awɔ ndo nshihodia la etema awɔ ndo diaha vɔ ndjokadimɔ ko dimi mbakɔnɔla.”+ 41 Isaya akate akambo asɔ, nɛ dia nde akɛnyi lotombo lande ndo akatɛkɛta akambo wendana la nde.+ 42 Ɔnkɔnɛ, kaanga emboledi efula waki la mbetawɔ le nde,+ koko l’ɔtɛ wa Afarisɛ, vɔ kombitaka dia wekɔ la mbetawɔ le nde diaha vɔ mbitshanyema oma lo shinangɔnga;+ 43 nɛ dia vɔ wakalangaka lotombo l’anto oleki lotombo la Nzambi.+
44 Ko Yeso akate la dui dia wolo ate: “Onto tshɛ lele la mbetawɔ le mi, bu la tɔ le mi dimɛ oto, koko ndo le Ɔnɛ lakantome.+ 45 Onto tshɛ lambɔmɛna ambɛna ndo Ɔnɛ lakantome.+ 46 Dimi lakaye oko osase l’andja+ dia onto tshɛ longa la mbetawɔ le mi atotshikalake lo wodjima.+ 47 Ko naka onto ekɔ lo mboka ɛtɛkɛta ami ko hawakitanyiya, dimi haawolombosha, nɛ dia dimi kondja dia ndjolombosha andja, koko dia ndjoshimbɛ andja.+ 48 Onto tshɛ latona ndo lahetawɔ ɛtɛkɛta ami, ɔnɛ layowolombosha ekɔ. Kɛnɛ katami kayowolombosha lo lushi l’ekomelo. 49 Nɛ dia dimi haatɛkɛta lo ndjela tokanyi tami hita, koko Papa lakantome akambisha didjango dia kɛnɛ kahombami mbuta ndo ntɛkɛta.+ 50 Ndo nto, dimi mbeyaka dia didjango sɔ nembetshiyaka lɔsɛnɔ la pondjo.+ Ɔnkɔnɛ kɛnɛ tshɛ katami, lekɔ lo kita paka oko wakambutɛ Papa.”+
13 Lam’ele nde akeyaka la ntondo ka fɛtɛ k’Elekanelo dia wonya ande ambokoka+ dia nde mimɔ oma l’andja ɔnɛ ko nde ntshɔ le She,+ Yeso akalange anto ande waki l’andja ndo akaalange polo l’ekomelo.+ 2 Lam’akawalɛka mma dia dikɔlɔ, Diabolo akashile mbidja kanyi ya mbofunga+ l’otema wa Judasɛ Iskariyɔtɛ+ ɔna Simɔna. 3 Yeso akeyaka dia She akakimɔ diangɔ tshɛ l’anya ande ndo ɔnɛ nde akaye oma le Nzambi ndo aki suke la nkalola otsha le Nzambi.+ 4 Yeso akonɛɛ, akatshike ndɛ ndo akakolola ahɔndɔ ande wa laadiko. Nde akɔshi ɛsiyamɛ, akadinge lo lokende.*+ 5 Oma laasɔ, nde akadje ashi lo dɔnga, akatatɛ nsola ekolo w’ambeki ande ndo akaakitola la ɛsiyamɛ wakandadinge lo lokende.* 6 Ko nde akakome le Simɔna Petero. Simɔna akawotɛ ate: “Nkumadiɔndjɔ, onto oko wɛ ko solami ekolo?” 7 Yeso akookadimola ate: “Kɛnɛ kasalami, wɛ hakoke kishihodia wonya ɔnɛ, koko wɛ ayokishihodia l’ɔkɔngɔ w’akambo anɛ.” 8 Petero akawotɛ ate: “Wɛ hakoke solami ekolo pondjo.” Yeso akookadimola ate: “Naka hakosodi ekolo,+ kete wɛ keema kaamɛ la mi.” 9 Simɔna Petero akawotɛ ate: “Nkumadiɔndjɔ, onsole aha ekolo eto, koko ndo anya la ɔtɛ ami.” 10 Yeso akawotɛ ate: “Onto tshɛ lambɔka ekɔ l’ohomba wa nsola ekolo eto, nɛ dia demba diande diekɔ tshɛ pudipudi. Nyu nyekɔ pudipudi, koko aha nyu tshɛ.” 11 Nɛ dia nde akeyaka onto lakahombe mbofunga.+ Diakɔ diakandate ate: “Aha nyu tshɛ mbele pudipudi.”
12 Lam’akandashidiya mbasola ekolo, nde akalɔtɛ ahɔndɔ ande wa laadiko ndo akayodjasɛ nto la mɛsa ndo akawatɛ ate: “Onde nyamboshihodia kɛnɛ konyosalemi? 13 Nyu mbelɛkami ɔnɛ: ‘Ombetsha’ ndo ‘Nkumadiɔndjɔ,’ mɛtɛ katanyu nɛ dia ngasɔ mbemi.+ 14 Ko naka dimi Nkumadiɔndjɔ ndo Ombetsha, nyosolaka ekolo,+ kete nyu lawɔ pombaka* solana ekolo lam’asanyu.+ 15 Nɛ dia dimi lambonyosha ɛnyɛlɔ dia nyu lawɔ nsala woho wonyosalemi.+ 16 Lo mɛtɛ kanyotɛmi nte, ose olimu haleki owandji ande ndo ɔnɛ lakatomama haleki ɔnɛ lakootome. 17 Naka nyu mbeyaka akambo asɔ, ɔngɛnɔngɛnɔ le nyu naka nyayowasala.+ 18 Aha dikambo dianyu nyu tshɛ mbatami, dimi mbeyaka wanɛ wakamasɔnɛ. Koko ekɔ dia nkotsha+ ɛtɛkɛta wa l’afundelo wata ɔnɛ: ‘Ɔnɛ lakalɛka mapa ami ambɔmpɔta ena.’*+ 19 Dimi lambonyotɛ wonya ɔnɛ la ntondo ka dikambo sɔ salema, kele lam’ayodiosalema kanyetawɔ nyate dimi kele nde.+ 20 Lo mɛtɛ kanyotɛmi nte, onto tshɛ lalongola Ɔnɛ lakamatome, ambonongola ndo dimi.+ Ndo onto tshɛ lanongola ambolongola ndo Ɔnɛ lakantome.”+
21 L’ɔkɔngɔ wa Yeso mbuta akambo asɔ, nde akakiyana efula, ndo akate ate: “Lo mɛtɛ kanyotɛmi nte: Ɔmɔtshi l’atei anyu ayomfunga.”+ 22 Ambeki ande wakatatɛ mendana ndo wakayambolaka dia mbeya onto latande.+ 23 Etena kakawadjasɛ, ombeki ɔmɔtshi wele Yeso akawokaka ngandji+ aki suke la* Yeso. 24 Ko Simɔna Petero akamamiya onto akɔ sso ndo akawombola ate: “Ototɛ, dia onto akɔna atande akambo asɔ?” 25 Ko nde akakadimola ɔtɛ oya lo ntolo ka Yeso ndo akawotɛ ate: “Nkumadiɔndjɔ, onto akɔna ɔsɔ?”+ 26 Yeso akakadimola ate: “Ɔnɛ layomosha ɛtshi ka mapa kayangami ntshuha.”+ Ko nde akɔshi ɛtshi ka mapa kakandatshuhe, ko akasha Judasɛ ɔna Simɔna Iskariyɔtɛ. 27 L’ɔkɔngɔ wa Judasɛ mbɔsa ɛtshi ka mapa kɛsɔ, Satana akɔtɔ l’otema ande.+ Yeso akawotɛ ate: “Kɛnɛ kalangayɛ nsala, salatɔ esadi.” 28 Koko ndooko onto l’atei wa wanɛ wakadjasɛ la mɛsa lakeye lande na kakandawotɛ ngasɔ. 29 Amɔtshi wakafɔnya dia lam’ele Judasɛ mbakombaka shɛtɛshɛtɛ ya falanga,+ Yeso akawotɛka ate: “Tosombe diangɔ dieso l’ohomba lo fɛtɛ,” kana dia nde mbisha ase wola ɛngɔ kɛmɔtshi. 30 Ɔnkɔnɛ, l’ɔkɔngɔ wa nde nongola ɛtshi ka mapa, mbala kakɔ ɔtɔi nde akatombe. Laasɔ ko wonya ambodja.+
31 L’ɔkɔngɔ wa nde ntomba, Yeso akate ate: “Wonya ɔnɛ Ɔna onto ambotombɔma+ ndo Nzambi ambotombɔma lo tshimbo yande. 32 Nzambi ndamɛ ayowotombola,+ ndo nde ayanga mbotombola aha la ntshimbatshimba. 33 Ana wa tshitshɛ le, etena ka tshitshɛ keto kekemi la nyu. Nyu nyayonyanga ndo oko wakamatɛ ase Juda nte: ‘Lɛnɛ atamatshu nyu hanyokoke ntshɔ,’+ dimi lambonyotɛ ndo nyu lawɔ kakianɛ. 34 Dimi lambonyosha ɔlɛmbɛ w’oyoyo dia nyu mbokana ngandji. Nyokane ngandji lam’asanyu+ oko wakamanyoke ngandji.+ 35 Oma lo dikambo nɛ, anto tshɛ wayeya dia nyu nyekɔ ambeki ami, naka nyayokana ngandji lam’asanyu.”+
36 Simɔna Petero akawotɛ ate: “Nkumadiɔndjɔ, lende atayatshu?” Yeso akookadimola ate: “Wɛ hakoke ntshɔ lɛnɛ atamatshu wonya ɔnɛ, koko wɛ ayoyondjela l’ɔkɔngɔ.”+ 37 Petero akawotɛ ate: “Nkumadiɔndjɔ, lande na kahamakoke ntshɔ la yɛ wonya ɔnɛ? Dimi layokimɔ kaanga lɔsɛnɔ* lami l’ɔtɛ ayɛ.”+ 38 Yeso akookadimola ate: “Wɛ mɛtɛ ayokimɔ lɔsɛnɔ* layɛ l’ɔtɛ ami? Lo mɛtɛ kakotɛmi nte, la ntondo ka nkɔkɔ mbeka, wɛ ayomanguna mbala 3.”+
14 “Etema anyu tawokananake.+ Nyonge la mbetawɔ le Nzambi+ ndo nyonge la mbetawɔ le mi. 2 Lo luudu la Papa, ahole wa mbidjasɛ wekɔ efula. Otondonga aha ngasɔ, tshike lakanyotɛ, nɛ dia dimi lotatshu dia tonyɔlɔngɔsɔlɛ dihole.+ 3 Ndo nto, naka dimi ntshɔ ndo tonyɔlɔngɔsɔlɛ dihole, dimi layokalola ndo layoyonyolongola dia ndo nyu ndjala lɛnɛ ayomoyala.+ 4 Nyu mbeyaka mboka k’otsha lɛnɛ atamatshu.”
5 Tɔma+ akawotɛ ate: “Nkumadiɔndjɔ, sho hateye lɛnɛ atayatshu. Ngande wakokaso mbeya mboka?”
6 Yeso akawotɛ ate: “Dimi lekɔ mboka,+ mɛtɛ+ ndo lɔsɛnɔ.+ Ndooko onto laya le Papa paka lo tshimbo yami.+ 7 Naka nyu nyakambeye, kete nyakeye ndo Papa. Ntatɛ oma ko kakiye, nyu nyamboweya ndo nyambowɛna.”+
8 Filipɛ akawotɛ ate: “Nkumadiɔndjɔ, otɛnya Shɛso kete ambokoka le so.”
9 Yeso akawotɛ ate: “Edja kemi la nyu kɛnɛ ko wɛ atambeye, Filipɛ? Onto tshɛ lambɔmɛna ambɛna ndo Papa.+ Ngande watayɛ wate: ‘Otɛnya Shɛso’? 10 Onde nyu hanyetawɔ dia dimi lekɔ kaamɛ la Papa ndo Papa ekɔ kaamɛ la mi?+ Akambo wanyotɛmi, dimi hawate lo ndjela lolango lami hita,+ koko Papa lele kaamɛ la mi mbasala akambo ande. 11 Nyetawɔ kɛnɛ kanyotɛmi dia dimi lekɔ kaamɛ la Papa ndo Papa ekɔ kaamɛ la mi, naka aha ngasɔ, nyetawɔ kaanga l’ɔtɛ w’akambo wasalami.+ 12 Lo mɛtɛ kanyotɛmi nte, onto tshɛ longa la mbetawɔ le mi, nde ayosala akambo wasalami ndo ayosala akambo woleki wanɛ weke,+ nɛ dia dimi lekɔ lo tatshu le Papa.+ 13 Ndo nto, kɛnɛ tshɛ kayonyɔlɔmba lo lokombo lami, dimi layokisala dia Papa tombɔma lo tshimbo y’Ɔna.+ 14 Dikambo tshɛ diayonyɔlɔmba lo lokombo lami, dimi layodisala.
15 “Naka nyu mbokakami ngandji, kete nyayokitanyiya wadjango ami.+ 16 Dimi layɔlɔmba Papa, ko nde ayonyosha okimanyedi* okina wayonga la nyu pondjo,+ 17 nyuma k’akambo wa mɛtɛ+ kele andja ɔnɛ hawokoke kilongola, nɛ dia vɔ hawokiɛnyi ndo hawokieye.+ Nyu kieyaka nɛ dia tɔ kekɔ kaamɛ la nyu ndo kekɔ le nyu. 18 Dimi hatonyotshika tshike.* Lekɔ lo ndjaye oya le nyu.+ 19 Etena ka tshitshɛ keto ko andja hawotɔmɛna nto,+ koko nyu nyayɔmɛna nɛ dia dimi lekɔ la lɔsɛnɔ ndo nyu nyayonga la lɔsɛnɔ. 20 Lushi lɔsɔ, nyu nyayeya dia dimi lekɔ kaamɛ la Papa ndo nyu nyekɔ kaamɛ la mi ndo dimi lekɔ kaamɛ la nyu.+ 21 Onto tshɛ lele la wadjango ami ndo lawakitanyiya, onto ɔsɔ kamboka ngandji. Ndo onto tshɛ lamboka ngandji, Papa ayowoka ngandji, dimi layowoka ngandji ndo layoyaɛnya hwe le nde.”
22 Judasɛ,+ aha Iskariyɔtɛ akawotɛ ate: “Nkumadiɔndjɔ, ambotomba koyolanga ndjaɛnya hwe le so, koko aha le andja?”
23 Yeso akookadimola ate: “Naka onto mbokakami ngandji, kete nde ayokitanyiya ɛtɛkɛta+ ami ndo Papa ayowoka ngandji. Sho tayoya le nde ndo tayodjasɛ* la nde.+ 24 Onto tshɛ lahamboke ngandji hakitanyiya ɛtɛkɛta ami. Kɛnɛ kokanyu haye oma le mi, koko ndja oma le Papa lakantome.+
25 “Dimi lekɔ lo nyotɛ akambo asɔ etena kekemi kaamɛ la nyu. 26 Koko okimanyedi, nyuma k’ekila kayotoma Papa lo lokombo lami, tɔ kayonyetsha akambo tshɛ ndo kayonyohola akambo tshɛ wakamanyotɛ.+ 27 Dimi lambonyotshikɛ wɔladi ndo lambonyosha wɔladi ami.+ Dimi hanyoshawɔ woho washana andja ɔnɛ. Etema anyu watokananake ndo watɔkɔmɔke la wɔma. 28 Nyu nyakoke kɛnɛ kakamanyotɛ nte: ‘Dimi lotatshu ndo layokalola le nyu.’ Otondongaka nyu mbokakami ngandji, tshike nyotɔngɛnangɛna lo woho womotatshu le Papa, nɛ dia Papa ndekami.+ 29 Ɔnkɔnɛ, dimi lambonyotɛ akambo asɔ la ntondo ka vɔ salema, kele lam’ayowosalema,+ kanyonge la mbetawɔ. 30 Dimi halonyotɛ akambo efula nto, nɛ dia owandji w’andja ɔnɛ+ ekɔ lo ndjaye. Ndo nde hambaheme.*+ 31 Koko dia andja mbeya ɔnɛ dimi nangaka Papa, oko wakambidjangɛ Papa dia nsala mbasalami.+ Nyonee, nyɛsɔ tomɔ oma lanɛ.
15 “Dimi lekɔ ɔkɔdi wa vinyɔ wa mɛtɛ ndo Papa ekɔ okambi w’ekambɔ. 2 Nde pembolaka lotahe tshɛ lele le mi lahatɔ elowa, ndo nde mbɛdiaka lotahe tshɛ latɔ elowa, dia lɔ ndeka ntɔ elowa.+ 3 Nyu nyamboshila mbɛdiama l’ɔtɛ w’akambo wakamanyotɛ.+ 4 Nyotshikale kaamɛ la mi ndo dimi layotshikala kaamɛ la nyu. Oko wele lotahe halokoke ntɔ elowa lɔamɛ naka halokakatanyi l’ɔkɔdi, woho akɔ waamɛ mbele nyu hanyokoke ntɔ elowa naka hanyongi kaamɛ la mi.+ 5 Dimi lekɔ ɔkɔdi wa vinyɔ ndo nyu nyekɔ ntahe. Onto tshɛ latshikala kaamɛ la mi ndo dimi kaamɛ la nde, onto ɔsɔ tɔka elowa efula,+ nɛ dia naka nyu bu kaamɛ la mi, kete hanyokoke nsala ndooko dikambo. 6 Naka onto hatshikala kaamɛ la mi, kete nde ayokashema oko lotahe ndo lɔ layoma. Wayosanganya ntahe yakɔ ndo wayoyikasha lo dja ko yayolongola. 7 Naka nyu ntshikala kaamɛ la mi ndo ɛtɛkɛta ami ntshikala le nyu, kɛnɛ tshɛ kayonyɔlɔmba ndo kayonyolanga wayonyoshatɔ.+ 8 Lo dikambo nɛ mbatombɔma Papa: Dia nyu ntetemala ntɔ elowa efula ndo mɛnya dia nyekɔ ambeki ami.+ 9 Oko wakamboke Papa ngandji+ ndo wakamanyoke ngandji, nyotshikale lo ngandji kami. 10 Naka nyu nkitanyiya wadjango ami, kete nyayotshikala lo ngandji kami, oko wakitanyiyami wadjango wa Papa ndo watshikalami lo ngandji kande.
11 “Dimi lakanyotɛ akambo asɔ dia nyu monga l’ɔngɛnɔngɛnɔ ami ndo dia ɔngɛnɔngɛnɔ anyu monga lo yɛdikɔ y’efula.+ 12 Ɔlɛmbɛ ami ele dia nyu mbokana ngandji oko wakamanyoke+ ngandji. 13 Ndooko ngandji koleki k’onto nkimɔ lɔsɛnɔ* lande dikambo dia angɛnyi ande.+ 14 Nyu nyekɔ angɛnyi ami naka nyu nsala kɛnɛ kanyodjangɛmi.+ 15 Handjonyelɛ ase olimu, nɛ dia ose olimu heye kɛnɛ kasala owandji ande. Dimi lambonyelɛ angɛnyi, nɛ dia akambo tshɛ wakamoke le Papa, dimi lambonyewoyawɔ. 16 Nyu kɔsɔnami, koko dimi lakanyɔsɔnɛ ndo lambonyokitsha dia nyu ntshɔ ndo ntetemala ntɔ elowa ndo dia elowa anyu ntshikala edja, kele Papa kanyoshake+ kɛnɛ tshɛ kayonyɔɔlɔmbaka lo lokombo lami.
17 “Dimi lambonyodjangɛ akambo asɔ dia nyu mbokana ngandji.+ 18 Naka andja nyohetshaka, nyu mbeyaka dia vɔ wakampetsha la ntondo ka vɔ ndjonyohetsha.+ 19 Otondonga nyu nyekɔ anto wa l’andja ɔnɛ, tshike andja ɔnɛ wotolanga anto awɔ. Ko lam’ele nyu keema ase andja ɔnɛ,+ koko dimi lakanyɔsɔnɛ oma l’andja ɔnɛ, diakɔ dianyohetsha+ andja ɔnɛ. 20 Nyohɔ kɛnɛ kakamanyotɛ nte: Ose olimu haleki owandji ande. Naka vɔ wakampɛnyahɛnya, kete wayonyɔhɛnyahɛnya+ ndo nyu. Naka vɔ wakakitanyiya awui ami, kete wayokitanyiya ndo awui anyu. 21 Koko vɔ wayonyosalɛ akambo asɔ tshɛ lo lokombo lami, nɛ dia vɔ haweye Ɔnɛ lakantome.+ 22 Otondonga dimi kondja ndo kɔtɛkɛta la wɔ, tshike vɔ keema la pɛkato.+ Koko kakianɛ vɔ ndooko la yɛkɛ nɛndɛ lo dikambo dia pɛkato yawɔ.+ 23 Onto tshɛ lampetsha ekɔ lo mpetsha ndo Papa.+ 24 Otondongaka dimi kosala akambo wele ndooko onto lakaasale l’atei awɔ, tshike vɔ ndooko la pɛkato.+ Koko kakianɛ vɔ wakatɛnyi ndo wakatohetsha dimi la Papa. 25 Dui sɔ diakasalema dia nkotsha kɛnɛ kakafundama lo Ɛlɛmbɛ awɔ ɔnɛ: ‘Vɔ wakampetsha ohetshahetsha.’+ 26 Lam’ayoya okimanyedi wayomonyotomɛ oma le Papa, nyuma k’akambo wa mɛtɛ+ kayoya oma le Papa, tɔ kayɔtɛkɛta akambo wendana la mi.+ 27 Ndo nyu lawɔ pombaka nsambisha,+ nɛ dia nyu nyaki kaamɛ la mi oma l’etatelo.
16 “Dimi lakanyotɛ akambo asɔ diaha nyu ntakana. 2 Anto wayonyotshanya oma lo shinangɔnga.+ Lo mɛtɛ, wonya wekɔ lo ndjaye wele onto tshɛ lanyodiaka+ ayɔfɔnya dia nde ambokambɛ Nzambi olimu w’ekila. 3 Koko vɔ wayosala akambo asɔ, nɛ dia vɔ haweye Papa ndo hawombeye.+ 4 Dimi lambonyotɛ akambo asɔ kele wonya wayowosalema, kanyohɔ dia lakanyotɛwɔ.+
“Dimi konyotɛ akambo asɔ ntondo nɛ dia dimi laki kaamɛ la nyu. 5 Wonya ɔnɛ dimi lotatshu otsha le Ɔnɛ lakantome,+ koko ndooko ɔtɔi la l’atei anyu lamimbola ate: ‘Lende atayatshu?’ 6 Lam’ele lambonyotɛ akambo asɔ, lɔkɔnyɔ lambolola l’etema anyu.+ 7 Koko lo mɛtɛ kanyotɛmi nte, lo wahɔ anyu mbatamatshu. Nɛ dia naka dimi hatshwe, kete okimanyedi+ hatoya le nyu. Ko naka dimi ntshɔ, kete layotonyotomɛnde. 8 Ndo lam’ayoya okimanyedi ɔsɔ, nde ayosha andja ɔnɛ tolembetelo t’eshika lo kɛnɛ kendana la pɛkato, la losembwe ndo la kilombo: 9 Ntondotondo lo kɛnɛ kendana la pɛkato,+ nɛ dia vɔ bu la mbetawɔ le mi.+ 10 Oma laasɔ, lo kɛnɛ kendana la losembwe, nɛ dia dimi lotatshu otsha le Papa ndo nyu hanyotɔmɛna nto. 11 Ndo lo kɛnɛ kendana la kilombo, nɛ dia owandji w’andja ɔnɛ ambolomboshama.+
12 “Dimi lekekɔ l’akambo efula wa nyotɛ, koko nyu hanyokoke mbashihodia l’etena kɛnɛ. 13 Koko lam’ayoya onto ɔsɔ,* nyuma k’akambo wa mɛtɛ,+ nde ayonyɔlɔmbɔla lo akambo wa mɛtɛ tshɛ, nɛ dia nde hatɔtɛkɛta akambo ande hita, koko akambo wakandoke mbayondɔtɛkɛta ndo nde ayonyewoya akambo wayaye.+ 14 Nde ayontombola,+ nɛ dia nde ayolongola akambo oma le mi, ko ayonyewoyawɔ.+ 15 Diangɔ tshɛ diele la Papa diami mbediɔ.+ Diakɔ diakamatshi nte nde ayɔsaka akambo oma le mi, ko ayonyewoyakawɔ. 16 Etena ka tshitshɛ keto ko hanyotɔmɛna nto+ ndo etena ka tshitshɛ keto ko nyayɔmɛna nto.”
17 Ko ambeki ande amɔtshi wakatanɛ lam’asawɔ vate: “Kakɔna kalangande mbuta lam’ototende ate: ‘Etena ka tshitshɛ keto ko hanyotɔmɛna nto ndo etena ka tshitshɛ keto ko nyayɔmɛna nto’ ndo ɔnɛ ‘nɛ dia dimi lotatshu otsha le Papa’?” 18 Vɔ wakate nto vate: “Alangande mbuta lam’atande ate: ‘Etena ka tshitshɛ keto’? Sho hateye kɛnɛ kalangande mbuta.” 19 Yeso akeye dia vɔ wakalangaka mbooka dimbola, ɔnkɔnɛ nde akawatɛ ate: “Onde nyotambɔna lam’asanyu lo dikambo sɔ nɛ dia lakatshi nte: ‘Etena ka tshitshɛ keto ko hanyotɔmɛna nto ndo etena ka tshitshɛ keto ko nyayɔmɛna nto?’ 20 Lo mɛtɛ kanyotɛmi nte, nyu nyayolela ndo nyayoyakiyanya, koko andja ɔnɛ wayɔngɛnangɛna. Nyu nyayonga la lɔkɔnyɔ, koko lɔkɔnyɔ lanyu layokadimɔ ɔngɛnɔngɛnɔ.+ 21 Wonya wele womoto la lɔɔnɔ, nde mongaka la lɔkɔnyɔ nɛ dia wonya ande wambokoka, koko lam’otande ɔna, nde hayohɔ kandji ka lɔɔnɔ nto, nɛ dia nde aya l’ɔngɛnɔngɛnɔ l’ɔtɛ wambotɔ ɔna l’andja. 22 Ɔnkɔnɛ, nyu lawɔ nyekɔ la lɔkɔnyɔ wonya ɔnɛ, koko dimi layonyɛna nto, ko etema anyu wayolola l’ɔngɛnɔngɛnɔ+ ndo ndooko onto layonyɔhɔtɔla ɔngɛnɔngɛnɔ akɔ. 23 Lushi lɔsɔ, nyu hanyotomboka ndooko dimbola. Lo mɛtɛ kanyotɛmi nte, ɛngɔ tshɛ+ kayonyɔlɔmba Papa lo lokombo lami,+ nde ayonyoshatɔ. 24 Polo ndo kakiye nyatalɔmbɛ ndooko ɛngɔ lo lokombo lami. Nyɔlɔmbɛ ko nyayolongola, dia ɔngɛnɔngɛnɔ anyu monga efula.
25 “Dimi lambonyotɛ akambo asɔ lo wɛɛla. Wonya wekɔ lo ndjaye wele hatonyotɛ ndooko dikambo lo wɛɛla nto, koko layonyotɛ akambo wendana la Papa hwe hwe. 26 Lushi lɔsɔ, nyu nyayɔlɔmba Papa lo lokombo lami. Lo mbuta ngasɔ, haalange mɛnya dia layonyɔlɔmbɛ le Papa. 27 Nɛ dia Papa ndamɛ nyokaka ngandji dikambo nyu mbokakami+ ngandji ndo nyambetawɔ dia dimi lakaye oko onyimpala wa Nzambi.+ 28 Dimi lekɔ onyimpala waki Papa ndo lakaye lo andja. Kakianɛ, dimi lotatshike andja ndo lotatshu otsha le Papa.”+
29 Ambeki ande wakate vate: “Hoke asɔ! Kakianɛ wɛ ototɛ akambo hwe hwe, aha la nkamba la wɛɛla. 30 Kakianɛ tambeya dia wɛ mbeyaka akambo tshɛ ndo wɛ bu l’ohomba w’onto kooka dimbola. Ɔnkɔnɛ, tambetawɔ dia wɛ akaye oma le Nzambi.” 31 Yeso akaakadimola ate: “Kakianɛ kambonyetawɔ? 32 Nyolonge! Wonya wekɔ lo ndjaye ndo lo mɛtɛ wonya wambokoka wayonyohandjɔ onto l’onto otsha lo luudu lande ko nyayotshika dimɛ.+ Koko dimi keema dimɛ nɛ dia Papa ekɔ kaamɛ la mi.+ 33 Lambonyotɛ akambo asɔ dia nyu monga la wɔladi+ lo tshimbo yami. L’andja ɔnɛ nyayongaka l’asui, koko nyonge la dihonga! Dimi lambodja andja ɔnɛ otshumba.”+
17 L’ɔkɔngɔ wa Yeso mbuta akambo asɔ, nde akedia washo l’olongo ndo akate ate: “Papa, wonya wambokoka. Tombola ɔnayɛ kele ɔnayɛ akotombole,+ 2 kele, oko wakayawosha lowandji laadiko dia emunyi*+ tshɛ, nde asha anto tshɛ wakayawosha+ lɔsɛnɔ la pondjo.+ 3 Dia vɔ nkondja lɔsɛnɔ la pondjo,+ weke dia keya* wɛ Nzambi ɔtɔi ka mɛtɛ,+ la Yeso Kristo+ lakayatome. 4 Dimi lambokotombola la nkɛtɛ+ ndo lamboshidiya olimu wakayambisha dia nsala.+ 5 Ɔnkɔnɛ, kakianɛ wɛ Papa, ontombole suke la yɛ la lotombo lakimi la lɔ la suke la yɛ ntondo k’andja tongama.+
6 “Dimi lakɛnya* lokombo layɛ le anto wakayambisha oma l’andja ɔnɛ.+ Vɔ waki anto ayɛ ko wɛ akambishawɔ ndo vɔ wakakitanyiya* ɔtɛkɛta ayɛ. 7 Vɔ wambeya dia diangɔ tshɛ diakayambisha ndja oma le yɛ. 8 Nɛ dia dimi lakawatɛ kɛnɛ kakayambutɛ+ ndo vɔ wakakilongola ndo wambeya mɛtɛ dia dimi lakaye oko onyimpala+ ayɛ ndo wambetawɔ dia wɛ mbakantome.+ 9 Lambokɔlɔmba lo dikambo diawɔ. Lambokɔlɔmba aha dikambo dia andja ɔnɛ, koko dikambo dia wanɛ wakayambisha, nɛ dia vɔ wekɔ anto ayɛ; 10 kɛnɛ tshɛ kele la mi kekɔ kayɛ ndo kɛnɛ tshɛ kele la yɛ kekɔ kami+ ndo dimi lakatombɔma l’atei awɔ.
11 “Dimi laya bu l’andja ɔnɛ, koko vɔ wekɔ l’andja ɔnɛ+ ndo dimi lekɔ lo ndjaye oya le yɛ. Papa k’ekila, owakoke+ l’ɔtɛ wa lokombo layɛ lakayambisha, dia vɔ tshɛ monga 1* oko weso 1.*+ 12 Lam’akimi kaamɛ la wɔ, dimi lakaalamaka+ l’ɔtɛ wa lokombo layɛ lakayambisha ndo dimi lakaakokɛ ndo ndooko ɔmɔtshi la l’atei awɔ lakalanyema,+ onyake ɔna elanyelo,+ dia afundelo kotshama.+ 13 Koko wonya ɔnɛ dimi loyaye oya le yɛ ndo lekɔ lo mbuta akambo asɔ etena kekemi l’andja ɔnɛ dia vɔ+ monga la ɔngɛnɔngɛnɔ ami lo yɛdikɔ y’efula. 14 Dimi lakawasha ɔtɛkɛta ayɛ, koko andja wakaahetsha, nɛ dia vɔ keema ase andja ɔnɛ+ oko wemi keema ose andja ɔnɛ.
15 “Lambokɔlɔmba, aha dia wɛ mbanya oma l’andja ɔnɛ, koko dia wɛ mbakokɛ oma le kanga kɔlɔ.+ 16 Vɔ keema ase andja ɔnɛ+ oko wemi keema ose andja ɔnɛ.+ 17 Owakidia* lo mɛtɛ,+ nɛ dia ɔtɛkɛta ayɛ wekɔ mɛtɛ.+ 18 Oko wakayantome l’andja ɔnɛ mbele ndo dimi lawɔ lambaatoma l’andja ɔnɛ.+ 19 Ndo dimi lekɔ lo ndjakidia lo dikambo diawɔ dia vɔ lawɔ kidiama lo mɛtɛ.
20 “Lambokɔlɔmba, aha dikambo diawɔ vɔ ato, koko ndo dikambo dia wanɛ wonga la mbetawɔ le mi lo tshimbo y’ɔtɛkɛta awɔ, 21 dia vɔ tshɛ monga 1+ oko weyɛ wɛ Papa kaamɛ la mi ndo dimi kaamɛ la yɛ,+ dia vɔ lawɔ monga kaamɛ la so, kele andja kawetawɔ dia wɛ mbakantome. 22 Dimi lakawasha lotombo lakayambisha dia vɔ monga 1 woho weso 1.+ 23 Dia dimi monga kaamɛ la wɔ ndo wɛ monga kaamɛ la mi dia vɔ monga kokele lo 1,* kele andja weye dia wɛ mbakantome ndo wɛ akaalange oko wakayanange. 24 Papa, dimi nangaka dia ndo wanɛ wakayambisha monga la mi lɛnɛ ayomonga,+ dia vɔ mɛna lotombo lakayambisha, nɛ dia wɛ akanange la ntondo k’andja tongama.+ 25 Papa ka losembwe, lo mɛtɛ andja ɔnɛ hawokeye,+ koko dimi keyaka+ ndo wanɛ wambeya dia wɛ mbakantome. 26 Dimi lakawaewoya lokombo layɛ ndo layoliewoya,+ dia ngandji kakayamboke monga le wɔ ndo dimi monga kaamɛ la wɔ.”+
18 L’ɔkɔngɔ wa nde mbuta akambo asɔ, Yeso akatombe la ambeki ande wakatenyanya la wedi w’Okidi*+ wa Kidirɔna, lɛnɛ aki ekambɔ kɛmɔtshi ndo nde la ambeki ande wakatshu lɔkɔ.+ 2 Judasɛ, ofungi ande akeyaka dihole sɔ, nɛ dia Yeso akatshɔka la ambeki ande mbala efula lɛkɔ. 3 Ko Judasɛ akatshu la olui w’asɔlayi ndo w’apulushi w’oma le ewandji w’ɛlɔmbɛdi la Afarisɛ lɛkɔ, wele la ewa, atala ndo la dihomɔ dia ta.+ 4 Lam’akeye Yeso akambo tshɛ wakahombe mbokomɛ, nde akatshu otsha le wɔ ndo akawambola ate: “Onto akɔna ayanganyu?” 5 Vɔ wakookadimola vate: “Yeso y’ose Nazarɛtɛ.”+ Nde akawatɛ ate: “Dimi ɔnɛ.” Ndo Judasɛ ofungi ande aki kaamɛ la wɔ.+
6 Koko lam’akate Yeso ate: “Dimi ɔnɛ,” vɔ wakakalola ɛkɔngɔkɔngɔ ndo wakakɔ la nkɛtɛ.+ 7 Ko nde akawambola nto ate: “Onto akɔna ayanganyu?” Vɔ wakate vate: “Yeso y’ose Nazarɛtɛ.” 8 Yeso akaakadimola ate: “Lakanyote nte, dimi ɔnɛ. Ɔnkɔnɛ, naka dimi mbayanganyu, nyotshike anto anɛ watshu.” 9 Dui sɔ diakasalema dia nkotsha kɛnɛ kakandate ate: “Ndooko onto lakamashisha+ l’atei wa wanɛ wakayambisha.”
10 Ko Simɔna Petero laki la lokuwa la ta akalisɔmɔla ndo akakɔtɛ ose olimu wa ɔlɔmbɛdi a laadiko ndo akoohembola toyi dia lonya l’omi.+ Ose olimu akɔ lokombo lande Malakosɛ. 11 Ko Yeso akatɛ Petero ate: “Kaloya lokuwa layɛ lo dihoso dialɔ.+ Onde dimi haahombe nnɔ dikɔhɔ diakambisha Papa?”+
12 Ko asɔlayi la kɔmanda kawɔ kaamɛ la apulushi w’ase Juda wakande* Yeso ndo wakookeleka. 13 Vɔ wakɔɔtɔlɛ ntondo le Anasi, nɛ dia nde aki okilo waki Kayifasi,+ ɔnɛ laki ɔlɔmbɛdi a laadiko ɔnɔnyi ɔsɔ.+ 14 Kayifasi mbakasha ase Juda dako di’ɔnɛ ekɔ dui dia dimɛna dia onto 1 mvɔ lo wahɔ w’anto.+
15 Simɔna Petero nde la ombeki okina wakatayelaka Yeso.+ Ombeki ɔsɔ akeyamaka le ɔlɔmbɛdi a laadiko, ko nde akɔtɔ kaamɛ la Yeso lo sɛkɛ dia lokombo laki ɔlɔmbɛdi a laadiko. 16 Koko Petero akemala l’andja la soko.* Ko ombeki akɔ wakeyamaka le ɔlɔmbɛdi a laadiko akaye ndo akatɛkɛta la olami wa soko, ko wakɔtshiya Petero. 17 Oma laasɔ, ose olimu wa womoto waki olami wa soko akatɛ Petero ate: “Shi ndo wɛ kele ombeki waki pami kɛnɛ?” Nde akate ate: “Keema.”+ 18 Ase olimu ndo apulushi waki laawɔ wakɔnganya dja y’akalanga ndo wakookaka, nɛ dia tshitshi kaki efula. Ndo Petero aki kaamɛ la wɔ, oka dja.
19 Ko owandji w’ɛlɔmbɛdi akambola Yeso dikambo dia ambeki ande ndo dia wetshelo ande. 20 Yeso akookadimola ate: “Dimi lakatɛkɛtaka lo sɛkɛ. Laketshaka nshi tshɛ lo shinangɔnga ndo lo tɛmpɛlɔ,+ lɛnɛ akasanganaka ase Juda tshɛ ndo dimi kombuta ndooko dui lo woshɛshɛ. 21 Lande na koyomboka ambola? Mbola anto wakokaka kɛnɛ kakamawatɛka. Vɔ mbeyaka kɛnɛ kakamataka.” 22 L’ɔkɔngɔ wa nde mbuta akambo asɔ, pulushi kɛmɔtshi kakemala suke akakɔmɔla Yeso lowala l’elungi+ ndo akate ate: “Ngasɔ mbakadimolayɛ owandji w’ɛlɔmbɛdi?” 23 Yeso akawotɛ ate: “Naka lakatshi dui dia kɔlɔ, nta* kɔlɔ kakɔ. Ko naka kɛnɛ kotshimi kekɔ dimɛna, lande na kakɔmɔlayɛ?” 24 Oma laasɔ, Anasi akootome, okelekami otsha le Kayifasi laki ɔlɔmbɛdi a laadiko.+
25 Simɔna Petero aki laawɔ, oka dja. Ko vɔ wakawotɛ vate: “Shi ndo wɛ kele ombeki ande?” Nde akanguna ndo akate ate: “Keema.”+ 26 Ose olimu ɔmɔtshi waki ɔlɔmbɛdi a laadiko, ɔnɛ lakotɔka la onto lele Petero akohembola+ toyi akate ate: “Shi ndo wɛ mbakamɛnyi kaamɛ la nde lo ekambɔ?” 27 Koko Petero akanguna nto, ko mbala kakɔ ɔtɔi nkɔkɔ kakeke.+
28 Oma laasɔ, vɔ wakamɔ la Yeso oma le Kayifasi ndo wakatshu la nde laka nguvɛrnɛrɛ.+ Aki la pindju ka pɛɛ. Koko vɔamɛ kɔmbɔtɔ laka nguvɛrnɛrɛ diaha vɔ mbidjama mindo+ dia vɔ ndɛ dambo di’Elekanelo. 29 Ko Pilato akatombe l’andja oya le wɔ ndo akambola ate: “Dikambo diakɔna diafundanyu pami kɛnɛ?” 30 Vɔ wakookadimola vate: “Otondonga pami kɛnɛ bu otshi wa kɔlɔ, tshike hatookimwe le yɛ.” 31 Pilato akawatɛ ate: “Nyowɔshi ndo nyoolombosha nyuamɛ lo ndjela ɛlɛmbɛ anyu.”+ Ase Juda wakawotɛ vate: “Sho bu la lotshungɔ la ndjaka onto.”+ 32 Dui sɔ diakasalema dia nkotsha ɛtɛkɛta wakate Yeso dia mɛnya woho wa nyɔi kakinde suke la mvɔ.+
33 Ko Pilato akɔtɔ nto laka nguvɛrnɛrɛ, akelɛ Yeso ndo akawombola ate: “Onde wɛ kele Nkumekanga k’ase Juda?”+ 34 Yeso akookadimola ate: “Onde oma lo kanyi yayɛ wɛmɛ mbambolayɛ dikambo sɔ, kana anto akina mbakakotɛ akambo wendana la mi?” 35 Pilato akawotɛ ate: “Onde ose Juda kemi? Wodja ayɛ hita ndo ewandji w’ɛlɔmbɛdi mbambokokimɔ le mi. Akayasale?” 36 Yeso akookadimola ate:+ “Diolelo diami bu dia l’andja ɔnɛ.+ Otondonga Diolelo diami diekɔ dia l’andja ɔnɛ, tshike ekambi ami wotɔndwɛ ta diaha dimi kimɔma le ase Juda.+ Koko Diolelo diami keema dia lanɛ.” 37 Ko Pilato akawombola ate: “Laasɔ nkumekanga keyɛ?” Yeso akookadimola ate: “Wɛmɛ ɔsɔ ata dia nkumekanga kemi.+ Dia dikambo nɛ mbakamotɔ ndo dia dikambo nɛ mbakamaye l’andja, dia dimi nsambisha akambo wa mɛtɛ.+ Onto tshɛ lele lo wedi w’akambo wa mɛtɛ pokamɛka dui diami.” 38 Pilato akawombola ate: “Mɛtɛ kɛdikɛdi na?”
L’ɔkɔngɔ wa nde mbuta akambo asɔ, nde akatshu nto le ase Juda ndo akawatɛ ate: “Dimi hambotanyi ndooko la onongo.+ 39 Ndo nto, nyekɔ la mbekelo ka dimi nyotshungolɛka onto ɔmɔtshi lo dambo di’Elekanelo.+ Onde nyu nangaka dimi nyotshungolɛ Nkumekanga k’ase Juda?” 40 Ko vɔ wakahangɔhangɔ nto vate: “Aha nde, ototshungole Barabasɛ!” Barabasɛ aki ɔpɔtwanyi.+
19 Oma laasɔ, Pilato akɔshi Yeso ndo akɔɔkɔmɔla.+ 2 Ndo asɔlayi wakasale lofulɛ l’atɛndɛ, ko wakɔɔlɔtshalɔ l’ɔtɛ ndo wakɔɔlɔtsha okutu w’ebelabela.+ 3 Vɔ wakayaka le nde ndo wakataka vate: “Nkumekanga k’ase Juda, he mɔyɔ!”* Ndo nto, vɔ wakɔɔkɔmɔlaka mbala l’elungi.+ 4 Pilato akatombe nto l’andja ndo akatɛ olui w’anto ate: “Nyende, dimi lambonyelande l’andja dia nyu mbeya dia dimi hambotanyi ndooko l’onongo.”+ 5 Ko Yeso akatombe l’andja, ɔlɔtshi lofulɛ l’atɛndɛ la okutu w’ebelabela. Ko Pilato akawatɛ ate: “Onto akɔ nde ɔnɛ!” 6 Koko, lam’akawɛnyi ewandji w’ɛlɔmbɛdi la apulushi, vɔ wakahangɔhangɔ vate: “Hanɛnde l’otamba! Hanɛnde l’otamba!”*+ Pilato akawatɛ ate: “Nyowɔshi nyotoodiake* nyuamɛ, nɛ dia dimi hambotanyi ndooko l’onongo.”+ 7 Ase Juda wakookadimola vate: “Sho tekɔ la ɛlɛmbɛ ndo lo ndjela ɛlɛmbɛ akɔ, nde pombaka mvɔ,+ nɛ dia nde ekɔ lo ndjata dia nde ekɔ ɔna Nzambi.”+
8 Lam’akoke Pilato ngasɔ, nde akaleke mboka wɔma. 9 Ko nde akɔtɔ nto laka nguvɛrnɛrɛ, ko akambola Yeso ate: “Wɛ ose na?” Koko Yeso kombokadimola ndooko dui.+ 10 Ɔnkɔnɛ, Pilato akawotɛ ate: “Wɛ ekɔ lo ntona dia kadimolami? Wɛ heye dia dimi lekɔ la lowandji la kotshungola ndo lowandji la kodiaka?”* 11 Yeso akookadimola ate: “Wɛ totoyonga la lowandji le mi otondongaka vɔ kokoshalɔ oma l’olongo. Diakɔ diele onto lakakimwe le yɛ ekɔ la pɛkato koleki woke.”
12 L’ɔtɛ wa dikambo sɔ, Pilato akatetemalaka nyanga woho wa mbotshungola. Koko ase Juda wakahangɔhangɔka vate: “Naka wɛ ntshungola pami kɛnɛ, kete wɛ bu ɔngɛnyi wa Kayisa. Onto tshɛ layaetɛ nkumekanga ekɔ lo ntɛkɛta kɔlɔ dikambo* dia Kayisa.”+ 13 Ɔnkɔnɛ, l’ɔkɔngɔ wa Pilato mboka ɛtɛkɛta ɛsɔ, nde akatondja Yeso l’andja ndo nde akadjasɛ lo dihole dia kilombo diakawelɛka ɔnɛ Lɔyɛnga l’Ave, koko lo Hɛbɛru ɔnɛ Gabata. 14 Ɔsɔ aki lushi lakawasalaka Ɛlɔngɔswɛlɔ+ wa dambo di’Elekanelo ndo aki oya lo wonya wa 6.* Ko nde akatɛ ase Juda ate: “Nyende nkumekanga kanyu!” 15 Koko vɔ wakahangɔhangɔ vate: “Otonyende! Otonyende! Hanɛnde l’otamba!”* Pilato akawatɛ ate: “Ndjaka nkumekanga kanyu?” Ewandji w’ɛlɔmbɛdi wakakadimola vate: “Sho bu la nkumekanga kekina paka Kayisa.” 16 Ko nde akawashande dia vɔ toodiaka l’otamba.+
Oma laasɔ, vɔ wakɔshi Yeso. 17 Nde akɛmbɛ otamba w’asui* ndamɛ, ko akatshu lo dihole diakawelɛka ɔnɛ Dihole dia lowako,+ dielɛwɔ lo Hɛbɛru ɔnɛ Gɔlgɔta.+ 18 Lam’akawakome lɛkɔ, vɔ wakɔkɔkɔla nsɛti l’otamba+ ndo wakahanɛ apami akina 2 l’etamba suke la nde, ɔnɛ lo wedi ɔmɔtshi, okina lo wedi okina, ko Yeso l’atei.+ 19 Pilato akafunde efundelo ɛnɛ ko akahanɛ la diko di’otamba w’asui:* “Yeso y’ose Nazarɛtɛ, Nkumekanga k’ase Juda.”+ 20 Ase Juda efula wakadiaka efundelo akɔ nɛ dia dihole diakawakɔkɔla Yeso nsɛti l’otamba diaki suke l’osomba ndo efundelo akɔ waki lo Hɛbɛru, lo Latino ndo lo Grɛkɛ. 21 Koko ewandji w’ɛlɔmbɛdi w’ase Juda wakatɛ Pilato vate: “Tofundake ɔnɛ, ‘Nkumekanga k’ase Juda,’ koko funda ɔnɛ: Nde akate ate: ‘Dimi kele Nkumekanga k’ase Juda.’” 22 Pilato akaakadimola ate: “Lakafundji kɛnɛ kakamafundji.”
23 Lam’akakɔkɔla asɔlayi Yeso nsɛti l’otamba, vɔ wakɔshi ahɔndɔ ande wa laadiko ko wakakahanya lo elui 4 dia ɔsɔlayi l’ɔsɔlayi mbɔsa wande ndo vɔ wakɔshi dihɔndɔ dia l’ɛse. Koko dihɔndɔ dia l’ɛse komonga la ɔtɛlɛlɔ, diɔ diaki la nsɔsɔ oma la diko polo l’ɛse. 24 Ko vɔ wakatanɛ lam’asawɔ vate: “Tatodiatake, nyɛsɔ toke owale dia mbeya onto layodiɔsa.”+ Dui sɔ diakasalema dia nkotsha kɛnɛ kakafundama ɔnɛ: “Vɔ wakakahana ahɔndɔ ami lam’asawɔ ndo vɔ wakoke owale dia mbɔsa dihɔndɔ diami.”+ Kɛsɔ mɛtɛ mbakasale asɔlayi.
25 Nyango+ Yeso la kosɛ nyango ka womoto, Mariya wa wadi aki Klopasɛ la Mariya w’ose Mangadala+ wakemala suke l’otamba w’asui* wakawahanɛ Yeso. 26 Lam’akɛnyi Yeso nyango la ombeki wakandokaka ngandji+ wemadi suke, nde akatɛ nyango ate: “Womoto, enda ɔnayɛ!” 27 Oma laasɔ, nde akatɛ ombeki ande akɔ ate: “Eenda nyɔ!” Ndo oma ko wonya akɔ, ombeki akɔ akatshu la nde lakande.
28 L’ɔkɔngɔ w’akambo asɔ, lam’akeye Yeso dia akambo tshɛ wambokotshama, dia nkotsha afundelo, nde akate ate: “Lamboka mposa k’ashi.”+ 29 Mbaka kɛmɔtshi kaki la wanu tɔɔ w’okayi kaki laawɔ. Ɔnkɔnɛ, vɔ wakatambiya dimbo lo wanu akɔ w’okayi, wakadihakɛ lo tshenyi ya shongo ya izɔpɛ* ko wakawodje l’onyɔ.+ 30 Lam’akandalɛtɛ wanu akɔ w’okayi, Yeso akate ate: “Diambokotshama!”+ Ko nde akakɔlɛ ɔtɛ ndo akakitshiya lomu.*+
31 Lam’ele aki lushi la Ɛlɔngɔswɛlɔ,+ diaha edo ntshikala l’etamba w’asui+ lushi la Sabato (nɛ dia lushi la Sabato lɔsɔ aki lushi la woke),+ ase Juda wakalɔmbɛ Pilato dia mbɔkɔla wanɛ wakahanema l’etamba w’asui ekolo ndo minya edo awɔ. 32 Ɔnkɔnɛ, asɔlayi wakaye ndo wakɔkɔla ekolo wa pami ka ntondo ndo wa pami kekina kakahanema l’otamba suke la nde. 33 Koko lam’akawaye le Yeso, vɔ wakɛnyi dia nde akashidi mvɔ, ko vɔ kombɔɔkɔla ekolo. 34 Koko ɔsɔlayi ɔmɔtshi akawoke dikɔnga+ ndo akootondola lohandju, ko mbala kakɔ ɔtɔi dikila la ashi wakatombe. 35 Ɔnɛ lakɛnyi dikambo sɔ akadite ndo kɛnɛ kakandate kekɔ mɛtɛ ndo onto akɔ mbeyaka dia akambo watande wekɔ mɛtɛ dia nyu lawɔ mbetawɔ.+ 36 Lo mɛtɛ, akambo asɔ wakasalema dia afundelo anɛ kotshama: “Ndooko weka ande wayɔkwama.”*+ 37 Ndo afundelo akina mbutaka ɔnɛ: “Vɔ wayenda ɔnɛ lakawongola dikɔnga.”+
38 L’ɔkɔngɔ w’akambo asɔ, Yɔsɛfu y’ose Arimateya laki nde lawɔ ombeki waki Yeso lo woshɛshɛ nɛ dia nde akokaka ase Juda wɔma,+ akalɔmbɛ Pilato lotshungɔ la mbɔsa odo wa Yeso, ko Pilato aketawɔ. Ɔnkɔnɛ, nde akaye ko akɔshi odo.+ 39 Nikɔdɛmɔ,+ pami kakaye le Yeso mbala ka ntondo l’otsho, nde lawɔ akaye ndo akela mirɛ kakasanganyema* ndo aloe yɛdikɔ ya kilɔ oko 30 ya livɛrɛ.*+ 40 Ɔnkɔnɛ, vɔ wakɔshi odo wa Yeso, wakawɔmbɛ la ahɔndɔ wa linɛnɛ ndo la diangɔ di’opumu+ oko waki mbekelo k’ase Juda kendana l’ɔlɔngɔswɛlɔ w’okundelo. 41 Dihole diakawodiake* aki l’ekambɔ kɛmɔtshi ndo diombo*+ dimɔtshi di’oyoyo diele watadjaka ndooko onto diaki l’ekambɔ kakɔ. 42 L’ɔtɛ w’Ɛlɔngɔswɛlɔ+ wa fɛtɛ k’ase Juda ndo l’ɔtɛ waki diombo sɔ suke, vɔ wakakundɛ Yeso lɔkɔ.
20 Lushi la ntondo la lo lomingu, Mariya w’ose Mangadala akatshu la yosose otsha la diombo,*+ etena kaki wonya atahotɔ dimɛna, nde akɛnyi dive diakangitwe oma lo diombo.*+ 2 Ɔnkɔnɛ nde akatshu otsha le Simɔna Petero atalawɔ ndo le ombeki okina wele Yeso akawokaka ngandji efula+ ko nde akatowatɛ ate: “Wakanyisha Nkumadiɔndjɔ oma lo diombo,+ hateye lɛnɛ akawookitshisha.”
3 Ko Petero la ombeki okina ɔsɔ wakatshu otsha la diombo. 4 Vɔ akɔ 2 wakatatɛ ndawɔ, koko ombeki okina ɔsɔ akaleke Petero lowango ndo akete la ntondo kande, ko akakome ntondo la diombo. 5 Lam’akandanyama dia nengɛ, nde akɛnyi paka ahɔndɔ wa linɛnɛ,+ koko nde kɔmbɔtɔ l’etei. 6 Ko Simɔna Petero akakome nde lawɔ ndo nde akɔtɔ l’etei ka diombo, nde akatane ahɔndɔ wa linɛnɛ ato wokalemi lɔkɔ. 7 Dihɔndɔ diaki l’ɔtɛ ande diakangana la ahɔndɔ akina, diɔ diakɔmbama dɔamɛ dihole dikina. 8 Ko ombeki okina wakakome ntondo la diombo akɔtɔ nde lawɔ, akɛnyi ndo aketawɔ. 9 Nɛ dia laasɔ ko watashihodia ɛtɛkɛta wa l’afundelo wata dia nde pombaka mbolɔ oma lo nyɔi.+ 10 Ko ambeki wakakalola lawakawɔ.
11 Koko Mariya akemala l’andja suke la diombo alela. Lam’akandalelaka, nde akanyama dia nengɛ l’etei ka diombo, 12 ko nde akɛnyi andjelo 2+ wɔlɔtshi ahɔndɔ wa wɛma wodjashi lo dihole diakawakitsha odo wa Yeso, ɔnɛ l’ɔtɛ, okina l’ekolo. 13 Vɔ wakawotɛ vate: “Womoto, lande na kalelayɛ?” Nde akawatɛ ate: “Wakayonya Nkumadiɔndjɔ, handeye lɛnɛ akawatookitsha.” 14 L’ɔkɔngɔ wa nde mbuta ɛtɛkɛta ɛsɔ, nde akɛwɔ ko akɛnyi Yeso emadi, koko nde kombeya ɔnɛ Yeso.+ 15 Yeso akawotɛ ate: “Womoto, lande na kalelayɛ? Onto akɔna ayangayɛ?” Mariya akafɔnya dia okambi w’ekambɔ kawombola ndo akawotɛ ate: “Yɔnɛ, naka wɛ kakawonyisha, ombute lɛnɛ akayokitshisha kele towɔshi.” 16 Yeso akawelɛ ate: “Mariya!” Lam’akandakadimɔ, Mariya akawotɛ lo Hɛbɛru ate: “Rabɔni!” (kitshimudi ate: “Ombetsha!”) 17 Yeso akawotɛ ate: “Tokumbatɛke, nɛ dia dimi taladɛ le Papa. Koko tshɔka le analengo+ towate wate: ‘Dimi layanga mbidɛ le Papa kami ndo Papa kanyu,+ le Nzambi kami+ ndo Nzambi kanyu.’” 18 Mariya w’ose Mangadala akatshu ndo akatotɛ ambeki losango lakɔ ate: “Dimi lakɛnyi Nkumadiɔndjɔ!” ndo nde akawatɛ kɛnɛ kakawotɛ+ Yeso.
19 La dikɔlɔ dia lushi la ntondo la lo lomingu, nkuke ya lɛnɛ aki ambeki ande yakadihama, nɛ dia vɔ wakokaka ase Juda wɔma, ko Yeso akɔtɔ, akemala l’atei awɔ ndo akawatɛ ate: “Wɔladi wayale la nyu!”+ 20 L’ɔkɔngɔ wa nde mbuta ngasɔ, nde akawaɛnya anya ande ndo lohandju lande.+ Ko ambeki wakangɛnangɛna lam’akawɛnyi Nkumadiɔndjɔ.+ 21 Yeso akawatɛ nto ate: “Wɔladi wayale la nyu!+ Oko wakantome+ Papa, dimi lawɔ lambonyotoma.”+ 22 L’ɔkɔngɔ wa nde mbuta ngasɔ, nde akaafufe lomu ndo akawatɛ ate: “Nyolongole nyuma k’ekila.+ 23 Naka nyu dimanyiya onto tshɛ pɛkato, yɔ yayodimanyiyama; naka nyu hanyodimanyiyisha anto pɛkato, yɔ hayotodimanyiyama.”
24 Koko Tɔma,+ ɔmɔtshi l’atei w’apɔstɔlɔ 12 lakawelɛka Diaasa komonga kaamɛ la wɔ etena kakaye Yeso. 25 Ɔnkɔnɛ, ambeki akina wakawotɛ vate: “Takɛnyi Nkumadiɔndjɔ!” Koko nde akawatɛ ate: “Naka dimi latɛnyi wesho* wa nsɛti l’anya ande ndo latadje lohita lami lo wesho wa nsɛti yakɔ ndo latadje lonya lami lo wosho wa lo lohandju lande,+ kete dimi hambetawɔki pondjo.”
26 Nshi 8 l’ɔkɔngɔ wa laasɔ, ambeki ande waki nto lo luudu, ndo Tɔma aki kaamɛ la wɔ. Yeso akɔtɔ kaanga mbakadihama nkuke. Nde akemala l’atei awɔ ndo akawatɛ ate: “Wɔladi wayale la nyu!”+ 27 Oma laasɔ, nde akatɛ Tɔma ate: “Dja lohita layɛ lanɛ ndo enda anya ami. Dja lonya layɛ lo lohandju lami ndo tshika monga la taamu,* onga la mbetawɔ.” 28 Tɔma akate ate: “Nkumɛmi ndo Nzambi kami!” 29 Yeso akawotɛ ate: “Wɛ ambetawɔ dikambo wɛ ambɔmɛna? Diɛsɛ le wanɛ wetawɔ aha la mɛna.”
30 Lo mɛtɛ, tolembetelo tokina efula takasale Yeso lale ambeki ande hatofundami lo wɔɔmbɔ ɔnɛ.+ 31 Koko akambo anɛ wambofundama dia nyu mbetawɔ dia Yeso kele Kristo, Ɔna Nzambi ndo l’ɔtɛ wa mbetawɔ kanyu, nyu monga la lɔsɛnɔ lo tshimbo ya lokombo lande.+
21 L’ɔkɔngɔ wa laasɔ, Yeso akayaɛnya* nto le ambeki ande lo Ndjale ka Tibɛriya. Woho wakandayaɛnya vɔ ɔnɛ: 2 Simɔna Petero, Tɔma (lakawelɛka Diaasa),+ Natanayɛlɛ+ k’oma la Kana ka la Ngalileya, ana wa Zebede+ ndo ambeki akina 2. 3 Simɔna Petero akawatɛ ate: “Dimi lambotshɔ toka ɛtɛyi.” Vɔ wakawotɛ vate: “Ndo sho tayanga ntshɔ la yɛ.” Vɔ wakatombe ndo wakɔtɔ lo waato ko wakatshu, koko l’otsho ɔsɔ vɔ kominda ndooko ɛngɔ.+
4 Lam’aki wonya suke la mpotɔ, Yeso akemala l’omamu, koko ambeki ande kombeya ɔnɛ Yeso.+ 5 Ko Yeso akawatɛ ate: “Anami le, onde nyu ndooko l’ɛngɔ* ka ndɛ?” Vɔ wakookadimola vate: “Ndooko!” 6 Nde akawatɛ ate: “Nyoke ɔtɛyi lo lonya l’omi la waato ko nyayonda yema.” Ko vɔ wakoke ɔtɛyi, koko vɔ kokoka mbotondja l’ɔtɛ w’efula ka nse.+ 7 Ɔnkɔnɛ, ombeki wele Yeso akawokaka ngandji efula+ akatɛ Petero ate: “Ongo Nkumadiɔndjɔ!” Lam’akoke Simɔna Petero dia Nkumadiɔndjɔ mbaki la wɔ, nde akalɔtɛ* dihɔndɔ diande, nɛ dia nde aki otakataka,* ko akambɛ lo ndjale. 8 Koko ambeki akina wakaye lo waato wa tshitshɛ wayakotola ɔtɛyi waki tɔɔ la nse, nɛ dia vɔ komangana etale efula l’okongo, waki lo yɛdikɔ ya atako oko 300.*
9 Lam’akawatombe lo okongo, vɔ wakɛnyi dja y’akalanga yahɛta ndo nse yaki laadiko dia akalanga kaamɛ ndo mapa. 10 Yeso akawatɛ ate: “Nyela nse mɔtshi yondjinyu.” 11 Ko Simɔna Petero akɔtɔ lo waato ndo akakotola ɔtɛyi waki la nse ya weke tɔɔ lɔkɔ oya l’okongo, aki nse 153. Koko kaanga mbakiyɔ efula ngasɔ, ɔtɛyi kombatɛ. 12 Yeso akawatɛ ate: “Nyoye nyoyole.” Ndooko 1 wa l’atei w’ambeki asɔ laki la dihonga dia mbombola ɔnɛ: “Wɛ na?” Nɛ dia vɔ wakeye dia ɔsɔ aki Nkumadiɔndjɔ. 13 Yeso akasukana, akɔshi mapa ko akawasha kaamɛ la nse. 14 Ɔsɔ aki mbala ka 3+ ka Yeso mɛnama le ambeki ande l’ɔkɔngɔ wa nde mbolɔ oma lo nyɔi.
15 L’ɔkɔngɔ wa vɔ ndɛ, Yeso akambola Simɔna Petero ate: “Simɔna ɔna Joani, onde wɛ mbokakami ngandji oleki diangɔ nɛ?” Nde akookadimola ate: “Eelo Nkumadiɔndjɔ, wɛ mbeyaka dia dimi kookaka ngandji.” Yeso akawotɛ ate: “Leshaka ɛkɔkɔ ami wa totshitshɛ.”+ 16 Yeso akawombola nto mbala ka 2 ate: “Simɔna ɔna Joani, onde wɛ mbokakami ngandji?” Nde akookadimola ate: “Eelo Nkumadiɔndjɔ, wɛ mbeyaka dia dimi kookaka ngandji.” Yeso akawotɛ ate: “Lamaka ɛkɔkɔ ami wa totshitshɛ.”+ 17 Nde akawombola mbala ka 3 ate: “Simɔna ɔna Joani, onde wɛ mbokakami ngandji?” Petero akanyange lo woho wakandawombola mbala ka 3 ate: “Onde wɛ mbokakami ngandji?” Ɔnkɔnɛ, nde akawotɛ ate: “Nkumadiɔndjɔ, wɛ mbeyaka akambo tshɛ, wɛ mbeyaka dia dimi kookaka ngandji.” Yeso akawotɛ ate: “Leshaka ɛkɔkɔ ami wa totshitshɛ.+ 18 Lo mɛtɛ kakotɛmi nte, etena kakiyɛ ɔlɔngɔlɔngɔ, wɛ akalɔtaka ahɔndɔ wɛmɛ ndo wɛ aketetaka lɛnɛ akayalangaka. Koko etena kayoyonga osombe, wɛ ayosembola anya ayɛ ko onto okina ayokɔlɔtsha ahɔndɔ ndo ayokɔtɔla lɛnɛ ahayalange.” 19 Nde akate akambo asɔ dia mɛnya woho wa nyɔi kakahombe Petero mvɔ dia ntombola Nzambi. L’ɔkɔngɔ wa nde mbuta akambo asɔ, nde akawotɛ ate: “Tetemala ndjelami.”+
20 Petero akakadimɔ, ko akɛnyi ombeki wele Yeso akawokaka ngandji efula+ ayooyele, ombeki wakɛkama lo ntolo ka Yeso lam’akawalɛka mma dia dikɔlɔ ndo wakambola Yeso ate: “Nkumadiɔndjɔ, onto akɔna ayokofunga?” 21 Ɔnkɔnɛ lam’akandawɛnyi, Petero akatɛ Yeso ate: “Nkumadiɔndjɔ, ko pami kɛnɛ?” 22 Yeso akawotɛ ate: “Naka dimi nanga dia nde ntshikala polo lam’ayomoya, dikambo sɔ akendadiɔ? Wɛ, tetemala ndjelami.” 23 Ko dikambo sɔ diakadiangana l’atei w’ambeki wa Yeso ɔnɛ ombeki ɔsɔ hatovɔ. Koko Yeso kombotɛ dia nde hatovɔ. Nde akawotɛ ɔnɛ: “Naka dimi nanga dia nde ntshikala polo lam’ayomoya, dikambo sɔ akendadiɔ?”
24 Ɔsɔ ele ombeki+ wakate akambo anɛ ndo nde kakafunde akambo anɛ. Ndo nto, sho mbeyaka dia kɛnɛ kakandate kekɔ mɛtɛ.
25 Lo mɛtɛ, Yeso akasale akambo akina efula wele otondonga kiambokambo tshɛ fundama, dimi fɔnyaka dia kaanga andja w’otondo totowokoka dia mbidja wɛɔmbɔ akɔ w’afundelo.+
Kana “aki lozambi.”
Kana “ɔlɔlɔ waheyama mbɛdika.”
Kana “lo dihole dia lo ntolo kaamɛ la She.” Dui sɔ mendanaka la dihole dia laande.
Enda Ap. A5.
Mbuta ate oya lo eshidi 4 wa dikɔlɔ.
Tshɛk., “Womoto, ndo dimi ndo wɛ naa dikambo diaso?” Ɔsɔ ekɔ etelo kɛnya dia onto ambotona kanyi. Okambelo wa la tshɛkɛta “womoto” hɛnya dia dilɛmiɛlɔ bu.
Ondo yɛdikɔ ya diangɔ di’ɔkɛlɛngɔ aki bata kakɔtɔka litrɛ 22. Enda Ap. B14.
Kana “lobingu; dihole di’okanda.”
Kana ondo “mbotɔ oma la diko.”
Kana “mɛnama.”
Kana “amboshikikɛ.”
Kana “hakimɔ la yɛdikɔ.”
Kana “oshima; difuku.”
Mbuta ate oya lo eshidi 12 wa yanyi.
Kana “ambɔkɔnɔ.”
Mbuta ate oya l’oshidi 1.
Kana “wa dikuse.”
Enda Ap. A3.
Kana “ekɔ la woshasha wa lɔsɛnɔ le nde ndamɛ.”
Mbuta ate Afundelo.
Enda Ap. B14.
Kilɔmɛtrɛ oko 5 kana 6. Tshɛk., “stadia oko 25 kana 30.” Enda Ap. B14.
Enda Ap. A5.
Kana ondo “lo losanganya la lo sɛkɛ.”
Kana “diabolo.”
Kana “mbeteta.”
Kana “Totombotombo.”
Tshɛk., “efundelo.”
Mbuta ate kalasa ya ewandji w’ɔtɛmwɛlɔ.
Kana “towodja anya.”
Kana “mbodja anya.”
Oma lo divɛsa dia 53 polo tshapita 8 divɛsa 11 hatanema lo efundelo efula wa l’anya w’edjedja ndo wa mɛtɛ.
Kana “la atɔndɔ w’anto.”
Kana “awui wa mindo wa dieyanelo.” Grɛkɛ, por·neiʹa. Enda Elembetshielo.
Kana “oma k’etatelo.”
Kana “akakusamɛ.”
Kana “anima.”
Kana “anima.”
Kana “anima.”
Kana “anima aso.”
Kana “tekɔ kaamɛ.”
Kana “wanɛ wele oko tozambizambi.”
Kana “diombo diohɔma.”
Kilɔmɛtrɛ oko 3. Tshɛk., “stadia oko 15.” Enda Ap. B14.
Kana “diombo diohɔma.”
Tshɛk., “lo yimba.”
Kana “diombo diohɔma.”
Mbuta ate tɛmpɛlɔ.
Kana “towodja anya.”
Kana “wakadjasɛ la mɛsa.”
Mbuta ate livɛrɛ l’ase Rɔmɔ laki la gramɛ oko 327. Enda Ap. B14.
Enda Ap. B14.
Enda Ap. A5.
Kana “diombo diohɔma.”
Kana “anima.”
Kana “anima.”
Kana “Anima ami.”
Enda Ap. A5.
Kana “lo kɛnɛ kakatoke?”
Enda Ap. A5.
Kana “akayakeleka.”
Kana “wakandakeleka.”
Kana “nyu lawɔ la dia.”
Kana “ambonkadimwɛ.”
Tshɛk., “lo ntolo ka.”
Kana “anima.”
Kana “anima.”
Kana “osambi.”
Kana “oko ana wa tshike.”
Kana “tayoka ngelo.”
Kana “bu la wolo le mi.”
Kana “anima.”
“Onto ɔsɔ” la “nde” kele lo divɛsa 13 ndo 14 mendanaka la “okimanyedi” wɔtɛkɛtami lo divɛsa 7. Yeso akakambe la tshɛkɛta “okimanyedi” (yele lo lɛkɛ l’apami lo Grɛkɛ) lo ntɛkɛta dikambo dia nyuma k’ekila oko onto, mbuta ate wolo wele bu onto, wele bu lo lɛkɛ l’apami kana la wamato lo Grɛkɛ.
Kana “anto.”
Vɛrbɛ ya lo Grɛkɛ yokambi la wɔ lanɛ mɛnyaka dui diatatetemala.
Kana “lakeyanya.”
Kana “wakalɛmbɛɛ.”
Kana “kaamɛ.”
Kana “kaamɛ.”
Kana “Kitshawɔ laande; Etɛwɔ ekila.”
Kana “monga kaamɛ tshɛ lo tshɛ.”
Kana “ashi w’elola wa Kidirɔna.”
Kana “wakawodje anya.”
Kana “lo ɛɔtwɛlɔ.”
Kana “ɛnyadiɔ.”
Kana “akemwe.”
Kana “Diakande l’otamba! Diakande l’otamba!”
Kana “nyotoodiake l’otamba.”
Kana “kodiaka l’otamba?”
Kana “ndɔsha.”
Mbuta ate oya lo eshidi 12 wa yanyi.
Kana “Diakande l’otamba!”
Enda Elembetshielo.
Enda Elembetshielo.
Enda Elembetshielo.
Enda Elembetshielo.
Kana “akavu.”
Kana “wayɔwɛlɛ.”
Kana ondo “wɔɔmbɔ.”
Mbuta ate livɛrɛ l’ase Rɔmɔ. Enda Ap. B14.
Kana “diakawodiake l’otamba.”
Kana “diombo diohɔma.”
Kana “diombo diohɔma.”
Kana “diombo diohɔma.”
Kana “djembetelo.”
Tshɛk., “monga onto lahetawɔ.”
Kana “akɛnama.”
Kana “ndooko la lose.”
Kana “akayadinge lo lokende.”
Kana “la ahɔndɔ wa la tshina ato.”
Mɛtrɛ oko 90. Tshɛk., “kubita oko 200.” Enda Ap. B14.