MUKANDA WA HENDE WAKAFUNDƐ PƆƆLƆ ASE KƆRƐTƆ

1 Dimi Pɔɔlɔ, lele ɔpɔstɔlɔ wa Kristo Yeso lo lolango la Nzambi lekɔ kaamɛ la ɔnangɛso Timɔte,+ ndo lambofundɛ etshumanelo ka Nzambi kele la Kɔrɛtɔ ndo ekilami tshɛ wele l’Akaya nte:+

2 Ɔlɔlɔ waheyama mbɛdika ndo wɔladi w’oma le Nzambi Shɛso ndo w’oma le Nkumadiɔndjɔ Yeso Kristo wayale la nyu!

3 Lotombo layale le Nzambi She Nkumɛso Yeso Kristo,+ Shɛso ka kɛtshi+ ndo Nzambi k’esambelo tshɛ,+ 4 ɔnɛ latosamba* lo asui*+ aso tshɛ dia sho monga l’akoka wa nsamba anto akina+ lo weho tshɛ w’asui* la esambelo kakatosambe Nzambi.+ 5 Nɛ dia oko wasowaso efula lo dikambo dia Kristo+ mbayotosambema efula lo tshimbo ya Kristo. 6 Ɔnkɔnɛ, naka tekɔ lo nsowa,* kete ekɔ dikambo dia esambelo kanyu ndo dia panda kanyu. Naka tekɔ lo sambema, kete ekɔ dikambo dia esambelo kanyu kanyokimanyiya dia nyu mbikikɛ weho akɔ waamɛ w’asui wasowaso. 7 Ɔnkɔnɛ, elongamelo kaso le nyu kekɔ nge, nyeya oko weyaso dia, oko wasowanyu woho wasowaso mbayonyosambema woho wasambemaso.+

8 Analengo le, sho nangaka dia nyu mbeya awui wendana la asui wakatasowe lo prɔvɛnsɛ ka Aziya.+ Asui wakahomana la so waki wolo efula, sho kokoka mbikikɛ lo shoamɛ ndo sho komonga la eshikikelo dia tayohandɔ kana bu.+ 9 Lo mɛtɛ, sho takɔsaka dia wakatofundɛ nyɔi. Dikambo sɔ diakasalema dia sho ndjaɛkɛ le Nzambi+ ɔnɛ lolola wanɛ wakavu, koko aha le so shoamɛ. 10 Nde akatohandja oma lo waale ɔsɔ wa nyɔi ndo ayotohandja, ndo tekɔ la elongamelo le nde dia nde ayotetemala tohandja nto.+ 11 Nyu lawɔ koka tokimanyiya la ɛsɛngɔsɛngɔ anyu lo dikambo diaso,+ dia anto efula mbisha Nzambi losaka lo dikambo diaso l’ɔtɛ wa ɔlɔlɔ wakandatosalɛ lo nkadimola lo alɔmbɛlɔ w’anto efula.*+

12 Nɛ dia ɔkɔkɔ wayafunaso vɔ ɔnɛ: Nkum’otema kaso kekɔ ɔmɛnyi dia sho takakɛndakɛnda lo andja ɔnɛ, ndo djekoleko otsha le nyu, lo yoho y’ekila ndo la losembwe loye oma le Nzambi, aha la lomba la lo demba,+ koko la ɔlɔlɔ waheyama mbɛdika waki Nzambi. 13 Nɛ dia lo mɛtɛ, tekɔ lo nyofundɛ paka akambo wakokanyu mbadia* ndo nshihodia, ndo dimi nongamɛka dia nyayotetemala nshihodia akambo akɔ dimɛna dimɛna,* 14 oko wakanyashihodia lo yɛdikɔ mɔtshi dia sho tekɔ ɔkɔkɔ wa nyu ndjafuna oko wayonyonga nyu lawɔ ɔkɔkɔ wa sho ndjafuna lo lushi la Nkumɛso Yeso.

15 Ɔnkɔnɛ, la eshikikelo kɛsɔ, dimi lakalange ndja ntondo le nyu dia nyu monga la diaaso dia 2 dia ngɛnangɛna.* 16 Nɛ dia dimi lakalange tanyendji lam’ayometa otsha la Makɛdɔniya, dimi layotadje le nyu lam’ayomokalola oma la Makɛdɔniya, ko nyu tshindɛmi yema otsha la Judeya.+ 17 Lam’akamasangoyaka dia nsala ngasɔ, dimi kɔmbɔsa dikambo sɔ oko dui di’anyanya, shi mɛtɛ? Kana onde dimi lakakongɛka akambo lo yoho ya lo demba woho wele dimi mbuta nte: “Eelo, eelo” ko l’ɔkɔngɔ dimi ndjota nte: “Keema, keema”? 18 Nyu kokaka ndjaɛkɛ le Nzambi dia kɛnɛ kanyotɛso hayala “eelo,” ko l’ɔkɔngɔ “keema.” 19 Nɛ dia Ɔna Nzambi, Yeso Kristo lakatanyosambisha, mbuta ate dimi la Silvano* la Timɔte,+ komonga “eelo,” ko ndjonga “keema,” koko “eelo” kakayala paka “eelo” lo dikambo diande. 20 Nɛ dia oyadi efula kakɔna kele alaka waki Nzambi, vɔ tshɛ wakayala “eelo” lo tshimbo yande.+ Ɔnkɔnɛ, paka lo tshimbo yande mbatɛso Nzambi+ shate: “Aamɛɛ” kawela lotombo lo tshimbo yaso. 21 Koko ɔnɛ latosha eshikikelo dia sho la nyu tekɔ anto wa Kristo ndo ɔnɛ lakatokite esɔ ele Nzambi.+ 22 Ndo nto, nde akatodje tshapa yande+ ndo akatosha eshikikelo ka kɛnɛ kahomba ndja,* mbuta ate nyuma,+ lo etema aso.

23 Dimi lambelɛ Nzambi ɔmɛnyi lo dikambo diami* dia naka dimi lataye la Kɔrɛtɔ, kete diaha nyosha paa kamboleka. 24 Aha ɔnɛ sho tambahemɛ mbetawɔ kanyu,+ koko sho tekɔ asekanyu ekambi wakamba dia nyu monga l’ɔngɛnɔngɛnɔ, nɛ dia oma lo mbetawɔ kanyu mbemadinyu.

2 Dimi lakɔshi yɛdikɔ diaha ndja le nyu nto la lonyangu. 2 Dikambo naka dimi nyonyangiya, akɔna nto ayombisha ɔngɛnɔngɛnɔ naka aha nyu wanɛ wakamanyangiya? 3 Dimi lambofunda kɛnɛ kakamasale kele lam’ayomoya, aha dimi ndjonga la lonyangu l’ɔtɛ wa wanɛ wahombami ngɛnangɛna lo dikambo diawɔ, nɛ dia dimi lekɔ la eshikikelo dia kɛnɛ kambisha ɔngɛnɔngɛnɔ mbanyosha ndo nyu tshɛ ɔngɛnɔngɛnɔ. 4 Nɛ dia la asui efula ndo la kandji k’efula l’otema mbakamanyofundɛ la asɔyi efula lo washo, aha dia nyu monga la lonyangu,+ koko dia nyu mbeya woke woke wa ngandji kele la mi otsha le nyu.

5 Naka onto ambonyangiya,+ kete aha dimi oto kamondonyangiya, koko lo yɛdikɔ mɔtshi, nde ambonyonyangiya ndo nyu tshɛ. Aha dia mbidja oshimu esɔ mbatami ngasɔ. 6 Lohango lakandalongola oma le efula ka l’atei anyu lambokoka le onto la ngasɔ. 7 Ɔnkɔnɛ, nyu pombaka monga suke dia mbodimanyiya ndo mbosamba+ diaha lonyangu l’efula lele la nde ndjowosalɛ kɔlɔ.*+ 8 Oma lɔkɔ, dimi lambonyokeketsha dia nyu mboshikikɛ ngandji kawokanyu.+ 9 Diakɔ dianyofundɛmi dia nshikikɛ kana nyayɛnya okitanyiya anyu lo akambo tshɛ. 10 Naka nyu dimanyiya onto kɔlɔ kɛmɔtshi, kete ndo dimi layowodimanyiya. Lo mɛtɛ, kɔlɔ tshɛ yakamadimanyiya onto, (naka lakadimanyiya onto kɔlɔ kɛmɔtshi) lakasale dui sɔ lo wahɔ anyu lo washo wa Kristo 11 diaha sho kesama oma le Satana,*+ nɛ dia sho mbeyaka toho ta mayɛlɛ* takamba la nde.+

12 Lam’akamakome la Tɔrɔa+ dia tosambisha lokumu l’ɔlɔlɔ lendana la Kristo lɛkɔ ndo lam’akandjihwɛ lokuke lo Nkumadiɔndjɔ, 13 dimi komonga l’ɔngɛnɔngɛnɔ, nɛ dia dimi kotana ɔnalengo Tito+ lɛkɔ. Ɔnkɔnɛ, lakalakana la wɔ, ko lakatshu la Makɛdɔniya.+

14 Koko losaka le Nzambi ɔnɛ latotɔlɔmbɔlaka nshi tshɛ l’ɔnɔngɔ w’ambidji w’etshumba kaamɛ la Kristo ndo ɔnɛ lahandjola* lo tshimbo yaso opumu wa ewo kande lo ahole tshɛ! 15 Nɛ dia le Nzambi, sho tekɔ malashi wa dimɛna wa Kristo l’atei wa wanɛ washimbamɛ ndo l’atei wa wanɛ walanyema. 16 Le wanɛ walanyema, nsolo* ka nyɔi kakonya lo nyɔi+ ndo le wanɛ washimbamɛ, opumu wa lɔsɛnɔ wakonya lo lɔsɛnɔ. Ko akɔna ele la akoka wahombama lo akambo asɔ? 17 Toko sho, nɛ dia sho hatonde okanda la* ɔtɛkɛta wa Nzambi+ oko wasala anto efula, koko sho tɛkɛtaka la mɛtɛ tshɛ oko wakatatomama oma le Nzambi, ɛɛ, lo washo wa Nzambi ndo kaamɛ la Kristo.

3 Onde ekɔ ohomba sho ntatɛ ndjalowola nto? Kana onde teeke l’ohomba wa mikanda w’olowelo oya le nyu kana oma le nyu, l’ɛnyɛlɔ ka anto amɔtshi? 2 Nyu nyuamɛ nyekɔ mukanda+ aso wakafundama lo etema aso, weyama ndo wadiema le anto tshɛ. 3 Nɛ dia nyekɔ lo mɛnya dia nyu mbele mukanda waki Kristo wakafundama oma le so, sho wanɛ wele ekambi.+ Vɔ wakafundama aha la ashi wa mukanda, koko la nyuma ka Nzambi kasɛna, aha lo pase di’ave,+ koko lo pase dia demba, lo etema.+

4 Tekɔ la eshikikelo ka ngasɔ le Nzambi lo tshimbo ya Kristo. 5 Aha ɔnɛ lo shoamɛ mbeso la akoka wahombama dia mbɔsa dia dui dimɔtshi ndja oma le so, koko akoka wahombama wele la so ndja oma le Nzambi+ 6 ɔnɛ latosha akoka wahombama dia monga ekambi wa sheke y’oyoyo,+ aha y’ɛlɛmbɛ wa lofunda+ koko ya nyuma, nɛ dia ɛlɛmbɛ wa lofunda konyaka lo nyɔi,+ koko nyuma mbishaka lɔsɛnɔ.+

7 Naka ɛlɛmbɛ wakonya lo nyɔi ndo wele alɛta awɔ wakafundama lo ave+ wakaye la lotombo lele ana w’ase Isariyɛlɛ kokoka menda elungi ka Mɔsɛ tɛɛ l’ɔtɛ wa lotombo laki l’elungi kande,+ lotombo lakahombe nkomɛ, 8 lande na kahahombe woshelo wa nyuma+ ndeka monga la lotombo?+ 9 Naka ɛlɛmbɛ wɛndja anto onongo+ waki la lotombo,+ kete hoke olimu wakimanyiya anto dia vɔ mbɔsama oko akanga wa losembwe!+ 10 Lo mɛtɛ, kaanga kɛnɛ kaki la lotombo ntondo kakayoshishaka lotombo latɔ l’ɔtɛ wa lotombo lolileki.+ 11 Nɛ dia naka kɛnɛ kakahombe nkomɛ kakaye la lotombo,+ kete hoke lotombo la kɛnɛ kayotshikala pondjo!+

12 Lam’ele tekɔ la elongamelo ka ngasɔ,+ sho tekɔ lo mbuta awui hwe hwe lo yɛdikɔ y’efula, 13 ndo sho hatosale kɛnɛ kakasale Mɔsɛ lam’akandafɛ dihɔndɔ di’okombɔ lo elungi+ kande diaha ana w’ase Isariyɛlɛ mbika washo lo ekomelo ka kɛnɛ kakahombe nkomɛ. 14 Koko timba tawɔ kokoka nshihodia.+ Nɛ dia polo ndo ɛlɔ, okombɔ akɔ wekekɔ etena kadiema sheke y’edjedja,+ dikambo paka lo tshimbo ya Kristo mbakoka okombɔ akɔ minyɛma.+ 15 Lo mɛtɛ, polo ndo ɛlɔ, etena tshɛ kadiema efundelo wa Mɔsɛ,+ okombɔ wekɔ lo etema awɔ.+ 16 Koko etena kakadimɔ onto otsha le Jehowa,* okombɔ ɔsɔ mimɔka.+ 17 Jehowa* ekɔ Nyuma,+ ndo lɛnɛ ele nyuma kaki Jehowa,* lotshungɔ lekɔ.+ 18 Sho tshɛ, etena keso bu la okombɔ lo dungi diaso, tekɔ lo nkɛnɛmɔla lotombo la Jehowa* oko talatala, tekɔ lo nkadimɔ dia monga lo efanelo kakɔ ɔtɔi, oma lo yɛdikɔ mɔtshi ya lotombo otsha lo yɛdikɔ kina,* paka oko woho wasalemadiɔ oma le Jehowa* lele Nyuma.*+

4 Diakɔ diele, lam’ele tekɔ la olimu ɔnɛ oma lo kɛtshi kakatokama, sho hatohekɔ. 2 Koko sho takatshike akambo wa nsɔnyi ndo woshɛmi, hatɔkɛndakɛnda la lokeso ndo hatengesola ɔtɛkɛta wa Nzambi;+ koko lo nkɛnɛmɔla akambo wa mɛtɛ, sho ndjalowolaka le nkum’otema k’onto tshɛ lo washo wa Nzambi.+ 3 Naka mɛtɛ lokumu l’ɔlɔlɔ lasambishaso lambokombama, kete lɔ lambokombama le wanɛ walanyema. 4 L’atei awɔ mbele nzambi ka dikongɛ nɛ di’akambo*+ ambetɛ wanɛ wele bu ambetawudi+ totshungu lo timba tawɔ diaha osase wa lokumu l’ɔlɔlɔ la lotombo lendana la Kristo, ɔnɛ lele efanelo ka Nzambi+ mbahɛtɛ.+ 5 Nɛ dia aha akambo aso shoamɛ mbasambishaso, koko wendana la Yeso Kristo oko wende Nkumadiɔndjɔ ndo shoamɛ oko weso ɛhɔmbɔ anyu lo dikambo dia Yeso. 6 Nɛ dia Nzambi mbakate ate: “Osase wahɛtɛ lo wodjima,”+ ko nde akahɛtshɛ etema aso osase+ la ewo ka lotombo kendana la Nzambi lo tshimbo y’elungi ka Kristo.

7 Koko, tekɔ la diangɔ dia nɛmɔ sɔ+ lo mpoke y’awomba*+ dia wolo woleki wɔnɛ wokongaka l’onto monga wolo wa Nzambi, koko aha w’oma le so.+ 8 Sho tekɔ lo pinama wolo lo toho tshɛ, koko aha woho wahatakoke nsukasuka. Tekɔ l’okandokando, koko aha woho wele hatoyeya kɛnɛ ka nsala.*+ 9 Tekɔ lo pɛnyahɛnyama, koko tatakalema.+ Tekɔ lo kɔshama la nkɛtɛ, koko tatalanyema.+ 10 Lo ahole tshɛ watshɔso, tekɔ lo mbikikɛ lo alemba aso asui wa nyɔi wakasowe Yeso,+ dia lɔsɛnɔ la Yeso mɛnama ndo lo alemba aso. 11 Nɛ dia sho wanɛ wasɛna tekɔ wonya tshɛ lo waale wa nyɔi+ l’ɔtɛ wa Yeso l’oyango wa lɔsɛnɔ la Yeso mɛnama lo alemba aso wokovɔ. 12 Ɔnkɔnɛ, nyɔi kekɔ lo nkamba olimu le so, koko lɔsɛnɔ le nyu.

13 Lam’ele tekɔ la nyuma kaamɛ ka mbetawɔ kele oko kɛnɛ kakafundama lo dikambo diatɔ ɔnɛ: “Dimi lakonge la mbetawɔ, ɔnkɔnɛ dimi lakatɛkɛta,”+ sho lawɔ tekɔ la mbetawɔ, diakɔ diatɛkɛtaso, 14 teya dia Ɔnɛ lakolola Yeso ayotolola ndo sho kaamɛ la Yeso ndo ayotɛnyanya sho la nyu.+ 15 Nɛ dia akambo asɔ tshɛ wekɔ lo wahɔ anyu, kele ohamelo w’ɔlɔlɔ waheyama mbɛdika waleke mfula, dikambo anto efula wekɔ lo nsala alɔmbɛlɔ wa eokelo ka losaka dia lotombo la Nzambi.+

16 Ɔnkɔnɛ sho hatohekɔ, koko oyadi kaanga lonto laso la l’andja lekɔ lo talana, lo mɛtɛ lonto laso la l’etei lekɔ lo tetɛma oyoyo lushi la lushi. 17 Nɛ dia kaanga mbele asui* wekɔ wa lo tshanda mɔtshi tsho ndo bu wa wolo, vɔ tokimanyiyaka dia monga la lotombo lele woke woke* alɔ talekaka mpama ndo lɔ tshikalaka pondjo,+ 18 etena kakaso washo aha lo diangɔ diɛnama, koko lo diangɔ diahɛnama.+ Nɛ dia diangɔ diɛnama diekɔ dia lo tshanda mɔtshi tsho, koko diangɔ diahɛnama tshikalaka pondjo.

5 Nɛ dia sho mbeyaka dia naka luudu laso la la nkɛtɛ, luudu la dipɛma lɔnɛ, pombaka nyukɔ,*+ kete tayonga la luudu l’oma le Nzambi, luudu laki kombikama l’anya,+ la pondjo l’olongo. 2 Dikambo lo luudu* lɔnɛ, tekɔ lo nkuma akumu, talomɔlomɔ dia ndɔta lɔnɛ lele dikambo diaso* l’oma l’olongo,*+ 3 diaha sho ndjonga etakataka lam’ayotolilɔta. 4 Lo mɛtɛ, sho wanɛ wele lo luudu la dipɛma lɔnɛ tekɔ lo nkuma akumu, tele la ekiyanu efula nɛ dia sho hatolange likolola, koko sho nangaka ndɔta lokina,+ dia lɔsɛnɔ mɛna kɛnɛ kavɔ.+ 5 Ɔnɛ lakatɔlɔngɔsɔla dikambo dia dui sɔ ele Nzambi+ lakatosha nyuma oko ɔkɔlɛ wa kɛnɛ kahomba ndja.*+

6 Ɔnkɔnɛ, sho mongaka nshi tshɛ la dihonga di’efula ndo sho mbeyaka dia etena kekeso lo demba nɛ, sho mangana etale la Nkumadiɔndjɔ,+ 7 nɛ dia sho tekɔ lo nkɛndakɛnda la mbetawɔ, koko aha la lɛɛnɔ. 8 Koko tekɔ la dihonga di’efula ndo sho ndeka nanga mangana la demba nɛ ko mbidjasɛ kaamɛ la Nkumadiɔndjɔ.+ 9 Diakɔ diele, oyadi sho monga kaamɛ la nde kana mangana la nde, tekɔ lo nsala tshɛ dia mbetawɔma le nde. 10 Nɛ dia sho tshɛ pombaka mɛnama* lo dihole dia kilombo diaki Kristo dia onto l’onto futama oko waki etsha ande, oyadi w’ɛlɔlɔ kana wa kɔlɔ+ etena kakinde lo demba nɛ.

11 Oma lɔkɔ, lam’ele sho mbeyaka wɔma wa Nkumadiɔndjɔ, sho tetemalaka mbetawoya anto, koko sho mbeyamaka dimɛna* le Nzambi. Koko lekɔ la elongamelo dia sho mbeyamaka dimɛna* ndo le nkum’etema yanyu. 12 Sho hatoyalowola nto le nyu, koko tekɔ lo nyosha ɔkɔkɔ wa ndjafuna lo dikambo diaso dia nyu monga la akoka wa nkadimola wanɛ watoyafunaka l’ɔtɛ w’ɛnamelo kawɔ,+ koko aha l’ɔtɛ wa kɛnɛ kele l’etema awɔ. 13 Nɛ dia naka sho komonga la ekanelo ka yimba ka dimɛna,+ kete aki dikambo dia Nzambi, ndo naka tekɔ la ekanelo ka yimba ka dimɛna, kete ekɔ dikambo dianyu. 14 Dikambo ngandji kele la Kristo totshutshuyaka, nɛ dia tambɛna shoate: Onto ɔtɔi akavu dikambo dia anto tshɛ,+ ɔnkɔnɛ, laasɔ anto tshɛ wakavu. 15 Nde akavwɛ anto tshɛ diaha wanɛ wasɛna ntetemala nsɛna dikambo diawɔ vɔamɛ,+ koko wasɛnɛ dikambo dia ɔnɛ lakavu dikambo diawɔ ndo lakolɔ.

16 Ɔnkɔnɛ, ntatɛ oma ko kakianɛ, sho hatoyeya ndooko onto lo yoho ya lo demba.+ Oyadi kaanga takeye Kristo lo yoho ya lo demba, lo mɛtɛ sho hatoyoweya lo yoho shɔ.+ 17 Ndo nto, naka onto aya kaamɛ la Kristo, kete nde aya etongelo k’oyoyo,+ akambo w’edjedja wambeta; ndo nyende! akambo w’eyoyo wamboyala. 18 Koko, akambo tshɛ ndja oma le Nzambi lakatookanya la nde ndamɛ lo tshimbo ya Kristo+ ndo lakatosha olimu wa diokanyelo,+ 19 mbuta ate Nzambi akayaokanyaka ndamɛ+ nto la andja lo tshimbo ya Kristo, aha la mbidja yimba lo kɔlɔ yawɔ,+ ndo nde akatosha losango la diokanyelo.+

20 Ɔnkɔnɛ, sho tekɔ atomami+ wakamba lo dihole dia Kristo,+ wate kana oko Nzambi ekɔ lo nsɛngasɛnga anto lo tshimbo yaso. Lo dihole dia Kristo, tekɔ lo nsɛngasɛnga anto shate: “Nyokane nto la Nzambi.” 21 Ɔnɛ laki kombeya pɛkato,+ nde akawetɛ pɛkato* dikambo diaso, dia lo tshimbo yande sho monga losembwe la Nzambi.+

6 Lo nkamba kaamɛ la nde,+ sho lawɔ tambonyokeketsha diaha nyu mbetawɔ ɔlɔlɔ waheyama mbɛdika waki Nzambi ko ndjoshisha oyango awɔ.+ 2 Nɛ dia nde mbutaka ate: “Lo etena ka dimɛna, dimi lakakohokamɛ ndo lo lushi la panda, dimi lakakokimanyiya.”+ Eenda, ɔnɛ ekɔ etena koleki dimɛna! Eenda, ɔnɛ ekɔ lushi la panda!

3 Sho hatokitshɛ ndooko onto otamba wa ntakanya diaha olimu aso mɔnywama,+ 4 koko lo weho tshɛ sho ndjaeyanyaka oko ekambi waki Nzambi+ lo ekikelo k’akambo efula, lo asui, lo tena dieso lo dihombo, lo ekakatanu,+ 5 lo dikɔmɔki, lo nkanu,+ lo ɔtɔmbɔkwɛlɔ w’anto dia tɔlɔsha, lo olimu wa wolo, lo engondo, lo tena dimɔtshi aha la mbo ya ndɛ,+ 6 lo pudipudi, lo ewo, lo solo dia lotutsha,+ lo ɔlɔlɔ w’otema,+ lo nyuma k’ekila, lo ngandji kaha ka dungi pende,+ 7 lo ɛtɛkɛta wa mɛtɛ, lo wolo waki Nzambi;+ oma lo dihomɔ dia ta dia losembwe+ dia lo lonya l’omi* ndo dia lo lonya la lɔmɔsɔ,* 8 oma lo lotombo ndo oma lo diɔnyɔ, oma lo akambo wa kɔlɔ ndo akambo w’ɔlɔlɔ watama lo dikambo diaso. Tekɔ lo mbɔsama oko akanga wa kashi, ko tete le mɛtɛ kataso, 9 oko anto waheyama, ko tete le sho mbeyamaka, oko anto watavu,* koko tekɔ la lɔsɛnɔ,+ oko tamboshama dilanya,* koko tatakimɔma dia ndjakema,+ 10 oko anto wele la ɔkɛyi, ko tete le tekɔ l’ɔngɛnɔngɛnɔ, oko ase wola, ko tete le tekɔ la ɔngɔnyi efula, oko anto wele ndooko la ɛngɔ, ko tete le tekɔ la diangɔ tshɛ.+

11 Ase Kɔrɛtɔ le, tambodihola onyɔ dia ntɛkɛta* la nyu ndo tambonyodihwɛ otema. 12 Sho hatosuse ngandji kahombaso nyoka,+ koko nyu mbasusa ngandji k’efula kahombanyu toka. 13 Dia nyokadimola, dimi lambonyotɛ oko onto latɛ anami nte: Nyu lawɔ nyodihole etema anyu hwe.*+

14 Tanyongake la diɔtɔnganelo dia ma ma* la wanɛ wele bu ambetawudi.+ Nɛ dia diɔtɔnganelo diakɔna diele lam’asa akambo w’ɛlɔlɔ la akambo wa kɔlɔ?+ Kana losambi lakɔna lele lam’asa osase la wodjima?+ 15 Ndo nto, diɔtɔnganelo diakɔna diele lam’asa Kristo la Beliyala?*+ Kana losambi lakɔna lele lam’asa ombetawudi* la onto lele bu ombetawudi?+ 16 Ndo diɔtɔnganelo diakɔna diele lam’asa tɛmpɛlɔ ka Nzambi la dikishi?+ Nɛ dia sho tekɔ tɛmpɛlɔ ka Nzambi kasɛna,+ oko wakate Nzambi ate: “Dimi layodjasɛ l’atei awɔ, layɔkɛndakɛndaka l’atei awɔ,+ layonga Nzambi kawɔ ndo vɔ wayoyala anto ami.”+ 17 “‘Ɔnkɔnɛ, nyotombe oma l’atei awɔ ndo nyokakitɔne la wɔ,’ mbata Jehowa,* ‘ndo nyotshike minanda ɛngɔ ka mindo,’”+ “‘ko dimi layonyolongola.’”+ 18 “‘Dimi layonga shɛnyu+ ndo nyu nyayonga anami w’apami ndo anami wa wamato,’+ mbata Jehowa* Kanga-Wolo-Tshɛ.”

7 Ɔnkɔnɛ analengo wa ngandji, lam’ele tekɔ la alaka asɔ,+ nyɛsɔ toyaɛdia oma lo mindo tshɛ ya demba ndo ya yimba+ ndo toleke monga ekila lo wɔma wa Nzambi.

2 Nyotodihole etema anyu.+ Sho kosalɛ ndooko onto kɔlɔ, sho kondanya ndooko onto ndo sho kokesa ndooko onto dia nkondja wahɔ.+ 3 Aha dia nyaanya mbatami akambo asɔ. Nɛ dia dimi lakatshi ntondo nte: Nyu nyekɔ lo etema aso dia sho mvɔ kaamɛ ndo nsɛna kaamɛ. 4 Dimi lekɔ lo nyohonwɛ akambo hwe hwe. Lekɔ lo ndjafuna efula dikambo dianyu. Dimi lambosambema efula ndo lekɔ l’ɔngɛnɔngɛnɔ w’efula lo asui aso tshɛ.+

5 Lo mɛtɛ, lam’akatakome la Makɛdɔniya,+ alemba* aso kotana momuya, koko takatetemala soyama lo toho tshɛ, ɔlɔshamelo oma l’andja ndo wɔma l’etei. 6 Koko Nzambi lakeketsha wanɛ wambɔkɔmɔ etema+ akatokeketsha oma lo woongelo wa Tito l’atei aso. 7 Aha woongelo ande oto, koko ndo oma lo esambelo kakandalongola l’ɔtɛ anyu lam’akandayototɛ dia nsaki k’efula kele la nyu ka mɛnami, ɔkɛyi w’efula wele la nyu ndo woho wayakiyanyanyu l’otema ɔtɔi* dikambo diami, ko dimi lakaleke ngɛnangɛna.

8 Nɛ dia, kaanga naka lakanyonyangiya lo mukanda ami,+ dimi haayakiyanya l’ɔtɛ wa dui sɔ. Oyadi kaanga lakayakiyanya l’etatelo, (lo mɛna dia mukanda ɔsɔ wakanyonyangiya, kaanga mbele aki paka lo tshanda ya tshitshɛ tsho,) 9 kakianɛ lekɔ l’ɔngɛnɔngɛnɔ, aha l’ɔtɛ wakinyu la lonyangu, koko nɛ dia lonyangu lanyu lakanyokonya dia nyu ndjatshumoya. Dikambo nyu nyakanyange lo yoho yangɛnyangɛnya Nzambi diaha sho nyosalɛ ndooko kɔlɔ. 10 Nɛ dia monga la lonyangu lo yoho yangɛnyangɛnya Nzambi mbelaka ndjatshumoya kakonya lo panda, hatshike la okiyanu;+ koko lonyangu la l’andja ɔnɛ mbelaka nyɔi. 11 Nyende etombelo wambonga la woho wakanyonge la lonyangu lo yoho yangɛnyangɛnya Nzambi: Ɛɛ, ande efula ka waasaso, ɛɛ, ande woho wakanyayaɛdia, ɛɛ, ande lonyangu laki la nyu, ɛɛ, ande wɔma, ɛɛ, ande nsaki ka l’otema ɔtɔi, ɛɛ, ande ohetoheto, ɛɛ, ande woho wakanyalɔngɔsɔla kɔlɔ kakasalema lee!+ Lo tshɛ, nyu nyakayaɛnya dia nyekɔ pudipudi* lo dikambo sɔ. 12 Kaanga mbakamanyofundɛ, aha onto lakasalɛ osekande kɔlɔ+ kana onto lakawasalɛ kɔlɔ kakamafundɛ, koko dia waasaso anyu le so mɛnama lo sɛkɛ l’atei anyu ndo la ntondo ka Nzambi. 13 Diakɔ diakatasambema.

Koko laadiko dia esambelo kaso, sho takangɛnangɛna efula l’ɔtɛ wa ɔngɛnɔngɛnɔ waki la Tito, nɛ dia nyu tshɛ nyakangɛnyangɛnya otema* ande. 14 Nɛ dia naka lakafune dikambo dianyu la ntondo kande, kete dimi kɔmbɔsa nsɔnyi. Koko akambo tshɛ wakamate lo dikambo dianyu waki mɛtɛ. Ɔnkɔnɛ, ndo kɛnɛ kakatafunɛka Tito kaki mɛtɛ. 15 Ndo nto, nde ndekaka nyoka ngandji k’efula etena kohɔnde okitanyiya anyu nyu tshɛ,+ woho wakanyoolongola la wɔma ndo la lokomba. 16 Lekɔ lo ngɛnangɛna lo woho wele, lo akambo tshɛ dimi kokaka monga la wɛkamu le* nyu.

8 Anangɛso, sho nangaka nyu mbeya lo dikambo di’ɔlɔlɔ waheyama mbɛdika wakasalɛ Nzambi tshumanelo dia la Makɛdɔniya.+ 2 L’atei w’ohemba wa wolo ndo lo asui, ɔngɛnɔngɛnɔ awɔ w’efula ndo wola awɔ w’efula akafudia* ɔngɔnyi wa lokaho lawɔ. 3 Nɛ dia aki lo ndjela ekondjelo kawɔ,+ ɛɛ, lamboshikikɛ dia aki oleki ndo ekondjelo kawɔ,+ 4 etena kele vɔamɛ wakatetemala tɔsɛngasɛnga la kiɔkɔmɛ tshɛ dia vɔ monga la diɛsɛ dia nkimɔ weshasha wa la lolango, dia mbisha lonya l’olimu wa nkimanyiya ekilami.+ 5 Aha tsho woho wakatalongamɛka, koko ntondotondo vɔ wakayakimɔ le Nkumadiɔndjɔ ndo le so oma lo lolango la Nzambi. 6 Ɔnkɔnɛ, takakeketsha Tito+ dia nde nshidiya nkɔngɔla weshasha anyu wa la lolango lam’ele nde kakatatɛ olimu ɔsɔ l’atei anyu. 7 Koko oko watanyahame lo akambo tshɛ, lo mbetawɔ, lo ɔtɛkɛta, lo ewo, lo waasaso tshɛ ndo lo ngandji kanyokaso, nyohame ndo lo weshasha wa la lolango.+

8 Aha oko didjango mbanyodjangɛmi, koko dia nyewoya dikambo dia waasaso wele l’anto akina ndo dia menda kana nyekɔ la ngandji ka mɛtɛ. 9 Nɛ dia nyu mbeyaka lo dikambo dia ɔlɔlɔ waheyama mbɛdika wa Nkumɛso Yeso Kristo ɔnɛ: Kaanga mbakinde ɔngɔnyi, nde akayala wola l’ɔtɛ anyu+ dia nyu monga ɛngɔnyi oma lo wola ande.

10 Lo dikambo sɔ, dimi lambosha kanyi yami+ nte: Ɔsɔ ekɔ dia wahɔ anyu, lam’ele ambeta ɔnɔnyi w’otondo wele aha tsho nyu nyakatatɛ, koko nyakɛnya ndo nsaki kanyu ka nsala dui sɔ. 11 Ɔnkɔnɛ kakianɛ, nyoshidiya kɛnɛ kakanyatatɛ nsala, dia woho wenyu suke dia nsala shidiyama lo ndjela ekondjelo kele la nyu. 12 Nɛ dia naka lolango lekɔ ntondo, dui sɔ mbetawɔmaka djekoleko lo ndjela kɛnɛ kele la onto,+ aha lo ndjela kɛnɛ kele onto bu la tɔ. 13 Nɛ dia dimi haalange mbetɛ dui sɔ wɔdu le anto akina ko dietɛ wolo le nyu, 14 koko oma lo wɛdimo, dia ekondjelo kanyu k’efula kele kakianɛ nkomba kɛnɛ kahombawɔ, dia ekondjelo kawɔ k’efula ndjokomba kɛnɛ kahombanyu, kele wɛdimo kawoyale. 15 Oko wakadiafundama ɔnɛ: “Onto laki la efula komonga la efula kamboleka ndo onto laki la yema tshitshɛ komonga la yema tshitshɛ yamboleka.”+

16 Koko losaka le Nzambi lo woho wamondokimanyiya Tito+ dia nde ndjakiyanya l’otema ɔtɔi dikambo dianyu oko wayakiyanyaso, 17 nɛ dia lo mɛtɛ, nde aketawɔ nsala kɛnɛ kakatookeketsha, ndo oko wende la osalosalo w’efula, ndamɛ ambɔsa yɛdikɔ ya ndja le nyu. 18 Koko, tambootoma kaamɛ la ɔnangɛso lele diando diande lo kɛnɛ kendana la lokumu l’ɔlɔlɔ ambohandjɔnɛ lo tshumanelo tshɛ. 19 Aha kɛsɔ keto, koko tshumanelo wakɔɔsɔnɛ dia nde totshindɛka lo nkɛndɔ yaso etena katatasha anto woshasha ɔnɛ dia lotombo la Nkumadiɔndjɔ ndo dia mɛnya ɔnɛ tekɔ suke dia nkimanyiya. 20 Lo nsala ngasɔ, tekɔ lo mbewɔ dia onto tonda l’ɛkɔmɔ lo kɛnɛ kendana la woshasha wa la lolango wakahanyaso.+ 21 Nɛ dia ‘tekɔ lo mbidja welo dia nsala akambo tshɛ la losembwe, aha tsho lo washo wa Jehowa,* koko ndo lo washo w’anto.’+

22 Ndo nto, tambotoma kaamɛ la wɔ ɔnangɛso lele mbala efula tamboohemba ndo tambɛna osalosalo ande lo akambo efula, koko kakianɛ nde amboleka monga la osalosalo woleki l’ɔtɛ wa wɛkamu w’efula wele la nde le nyu. 23 Ko naka onto ekɔ lo mvɔ Tito tshɔdia, nyowote nyate nde ekɔ osekami ndo onto lakamba la mi lo wahɔ anyu. Naka anto wekɔ lo mvɔ tshɔdia lo dikambo dia anangɛso, vɔ wekɔ apɔstɔlɔ wa lo tshumanelo ndo wekɔ lo mbisha Kristo lotombo. 24 Ɔnkɔnɛ, nyɛnya djembetelo ya ngandji kawaokanyu+ ndo nyɛnya tshumanelo lande na kakatafune lo dikambo dianyu.

9 Lo kɛnɛ kendana la olimu wele dikambo dia ekilami,+ bu mɛtɛ ohomba dia dimi nyofundɛ, 2 nɛ dia dimi mbeyaka woho wenyu suke dia nsala dui sɔ, diakɔ diafunɛmi ase Makɛdɔniya nte: Aya ɔnɔnyi w’otondo wele ase Akaya wekɔ suke dia nkimanyiya ndo ohetoheto anyu wambotshutshuya efula ka l’atei awɔ dia nsala dikambo sɔ. 3 Koko dimi lambotoma anangɛso diaha kɛnɛ kanyofunaso lo dikambo sɔ monga anyanya, ndo dia nyu monga mɛtɛ suke oko wakamate nte nyayonga suke. 4 Ko naka dimi ndja kaamɛ l’ase Makɛdɔniya ko vɔ ndjotana dia nyu bu suke, kete sho la nyu tayɔsa nsɔnyi lo woho wɛkɛso otema le nyu. 5 Ɔnkɔnɛ, lakɛnyi ohomba dia nkeketsha anangɛso dia vɔ ndja le nyu ntondo ndo dia nyu talɔngɔsɔdi la ntondo woshasha anyu wa la lokaho wakanyalake dia vɔ monga woshasha wa la lolango, koko aha oko lɔkɔsɔla.

6 Koko lo dikambo sɔ, onto tshɛ lonɛ yema tshitshɛ ayona yema tshitshɛ. Onto tshɛ lonɛ efula ayona efula.+ 7 Onto l’onto akimɔ oko wakandashikikɛ l’otema ande, aha la lonyangu* kana lotshutshuya,+ nɛ dia Nzambi nangaka onto lakimɔ l’ɔngɛnɔngɛnɔ.+

8 Ndo nto, Nzambi ekɔ la akoka wa mfudia ɔlɔlɔ ande waheyama mbɛdika le nyu dia nyu mongaka nshi tshɛ la kɛnɛ tshɛ kenyu la ohomba, nyele la diangɔ emete emete dia nkamba oseka olimu tshɛ w’ɔlɔlɔ.+ 9 (Oko wakadiafundama ɔnɛ: “Nde akakahe efula;* akasha ase wola. Losembwe lande tshikalaka pondjo.”+ 10 Ɔnɛ latoshaka omboki a woho woho efula ndo latoshaka anto mbo ya ndɛ efula ayonyosha ndo ayonyofudiyɛ woho wa nyu monɛ ndo ayofudia dinela dia losembwe lanyu.) 11 Lo tshɛ nyu nyekɔ lo ngɔnyama lo toho tshɛ ta lokaho latondja oma lo tshimbo yaso eokelo ka losaka le Nzambi; 12 nɛ dia olimu ɔnɛ wa lo sɛkɛ wakambanyu bu tsho dia nkotsha ehomba w’ekilami,+ koko ndo dia monga ɔngɔnyi efula lo eokelo ka losaka le Nzambi. 13 L’ɔtɛ wa djembetelo yasha olimu ɔnɛ wa nkimanyiya, vɔ tombolaka Nzambi, nɛ dia nyu kitanyiyaka lokumu l’ɔlɔlɔ lendana la Kristo, oko wasambishanyu lo sɛkɛ, ndo nɛ dia nyekɔ la lokaho lo weshasha wakimɔnyu dikambo diawɔ ndo dikambo dia anto tshɛ.+ 14 L’ekimanyielo k’ɛsɛngɔsɛngɔ wasalawɔ lo dikambo dianyu, vɔ kɛnɛmɔlaka ngandji kanyokawɔ l’ɔtɛ wa ɔlɔlɔ waheyama mbɛdika woleki wanyosalɛ Nzambi.

15 Losaka le Nzambi l’ɔtɛ wa losha la woshasha ande waheyama mbuta.

10 Dimi Pɔɔlɔ lambonyɔsɛngasɛnga oma lo memakana ndo ɔlɔlɔ w’otema wa Kristo,+ dimi lele tshonto y’anyanya lam’emi l’atei anyu,+ koko la dihonga otsha le nyu etena kemi bu l’atei anyu.+ 2 Lambonyɔsɛngasɛnga dia nyu nsala tshɛ diaha lam’ayomoya, dimi ndjonga la dihonga ndo ndjɔsɛ anto amɔtshi wɔsa dia tekɔ lo nkɛndakɛnda lo yoho ya lo demba tɛdikɔ ta wolo talongamɛmi. 3 Nɛ dia kaanga mbakɛndakɛndaso lo demba, sho hatɔlɔ ta lo yoho yeso lo demba. 4 Dikambo dihomɔ dialɔso la diɔ ta bu dihomɔ dia lo demba,+ koko diekɔ dihomɔ dia wolo di’oma le Nzambi+ dia sho mbitola diangɔ diohikami wolo. 5 Nɛ dia tekɔ lo mbitola tokanyi ndo oseka wekamu tshɛ walɔshana la ewo ka Nzambi,+ ndo tekɔ lo minda kanyi tshɛ lo lɔhɔmbɔ ko ndjikonya dia yɔ nkitanyiya Kristo. 6 Ndo tamboyalɔngɔsɔla dia mbisha onto tshɛ lele bu la okitanyiya+ dilanya kam’ayɛnama okitanyiya anyu tshɛ lo tshɛ.

7 Nyu mbɔsaka diangɔ la nɛmɔ lo ndjela ɛnamelo kadiɔ. Naka onto ɔmɔtshi ndjashikikɛka dia nde ekɔ laki Kristo, nde adje yimba nto lo dikambo nɛ: Oko wende laki Kristo mbeso ndo sho lawɔ. 8 Nɛ dia oyadi kaanga dimi ndjafuna efula kamboleka lo kɛnɛ kendana la lowandji lakatosha Nkumadiɔndjɔ dia nyokeketsha koko aha dia nyɔtɛwɔla,+ dimi hatoshama nsɔnyi. 9 Nɛ dia dimi haalange mɛnama oko onto layanga nyotsha wɔma lo mikanda ami. 10 Nɛ dia vɔ mbutaka vate: “Mikanda ande wekɔ la wotsho ndo wekɔ la wolo, koko lam’ende lanɛ,* ɛnamelo kande hataambiya ndo ndooko k’ɔlɔ katande.” 11 Onto ɔsɔ adje yimba lo dikambo nɛ: Kɛnɛ kataso* lo mikanda etena keso bu laawɔ mbahombaso nsala* etena keso laawɔ.+ 12 Nɛ dia sho hatosombɔ ndjadja l’ɔnɔngɔ kana ndjaɛdika l’anto amɔtshi wayafuna.+ Koko etena kayaɛdikawɔ vɔamɛ la vɔamɛ ndo kayaɛdinyawɔ vɔamɛ la vɔamɛ, vɔ bu la yimba.+

13 Koko sho hatotoyafuna lo ntamba elelo wakawatodjɛ, koko lo elelo wa ɛtshi ka nkɛtɛ kakatɛdikɛ* Nzambi, lo kikonya polo le nyu.+ 14 Lo mɛtɛ, sho hatotambe elelo lo shoamɛ, wate kana oko sho kokoma le nyu, nɛ dia sho mbaki anto wa ntondo wa nkoma polo le nyu la lokumu l’ɔlɔlɔ lendana la Kristo.+ 15 Sho hatoyafune lo ntamba elelo wakawatosha lo kɛnɛ kendana la olimu w’onto ɔmɔtshi, koko sho nongamɛka dia, oko watatetemala mbetawɔ kanyu mpama, kɛnɛ kakatasale kayohama lo ɛtshi kaso ka nkɛtɛ. Laasɔ mbayotoleka ndjasha nto, 16 dia sho mbewoya lokumu l’ɔlɔlɔ lo wedja wonyolekanyi diaha sho ndjafuna lo kɛnɛ kamboshila salema lo ɛtshi ka nkɛtɛ k’onto ɔmɔtshi. 17 “Koko ɔnɛ layafuna, ayafune le Jehowa.”*+ 18 Nɛ dia aha onto layalowola ndamɛ ketawɔma,+ koko paka ɔnɛ lalowɔma oma le Jehowa.*+

11 Dimi nongamɛka dia nyayokikɛ yema y’akambo w’enginya wasalami. Koko lo mɛtɛ, nyekɔ lo mbikikɛ. 2 Nɛ dia dimi nyokaka kandjema, la woho wa kandjema k’oma le Nzambi* dikambo dimɛ lakanyolake dia nyotshukanya la omi ɔtɔi, Kristo+ ndo dimi nangaka nyɛnyanya la nde oko osekaseka w’emuma wele pudipudi. 3 Koko lekɔ la wɔma dia lo woho ɔmɔtshi, oko wakakese oloyi Eva la lokeso lande,+ timba tanyu tatokoyangana oma lo mɛtɛ ndo pudipudi kahomba monga la nyu la ntondo ka Kristo.+ 4 Nɛ dia naka onto ɔmɔtshi amboya ndo ambonyosambisha Yeso kina laadiko dia nyɛ yakatasambisha, kana naka nyambolongola nyuma kekina laadiko dia kɛnɛ kakanyalongola, kana lokumu l’ɔlɔlɔ lokina laadiko dia lɔnɛ lakanyetawɔ,+ kete nyambetawɔ esadi eto kɛnɛ katande. 5 Nɛ dia dimi mbɔsaka dia dimi kondjaɛnya kaanga lo kiambokambo tshɔi+ dia dimi lekɔ l’ɛse k’anto anyu wayata dia vɔ ndeka apɔstɔlɔ. 6 Koko oyadi kaanga diewo dia ntɛkɛta+ mbemi bu la diɔ, lo mɛtɛ aha ɔnɛ ndo ewo mbemi bu la tɔ. Lo mɛtɛ, takanyɛnya ewo kaso hwe lo toho tshɛ ndo lo akambo tshɛ.

7 Onde laasɔ lakasale pɛkato lo woho wakamayakitshakitsha dia nyu mbidiyama, nɛ dia dimi lakanyosambisha lokumu l’ɔlɔlɔ laki Nzambi l’ɔngɛnɔngɛnɔ tshɛ aha la nyanga difuto?+ 8 Dimi laki oko onto lakahɔtɔla* tshumanelo dikina lo mbetawɔ kimanyiyama la diangɔ* diawɔ dia nyokambɛ olimu.+ 9 Koko, lam’akimi lalenyu ndo lam’akimi lo dihombo, dimi komonga wotsho le onto kaanga ɔtɔi, nɛ dia anangɛso wakaye oma la Makɛdɔniya wakakotsha ehomba ami+ lo yɛdikɔ y’efula. Eelo, lo akambo tshɛ, dimi salaka tshɛ diaha monga wotsho le nyu ndo layotetemala nsala dikambo sɔ.+ 10 Lo mɛtɛ oko wele mɛtɛ ka Kristo le mi, dimi hatotshika mfuna+ ngasɔ lo bɛtshi dia nkɛtɛ dia l’Akaya. 11 L’ɔtɛ wa na? Onde nɛ dia dimi halanyoke ngandji? Nzambi mbeyaka dia dimi nyokaka ngandji.

12 Koko dimi layotetemala nsala+ kɛnɛ kasalami dia minya tɛkɛ nɛndɛ ta wanɛ wayanga ɔkɔkɔ* wa mbɛdima la so lo akambo* wafunawɔ. 13 Nɛ dia anto wa ngasɔ wekɔ apɔstɔlɔ wa kashi, ekambi wa lokeso wamboyaetɛ oko apɔstɔlɔ wa Kristo.+ 14 Ɔsɔ bu dui dia diambo, nɛ dia Satana ndamɛ ndjaetɛka oko ondjelo w’osase.+ 15 Ɔnkɔnɛ, keema dui dia diambo naka ndo ekambi ande woyaetɛ oko ekambi w’akambo w’ɛlɔlɔ. Koko ekomelo kawɔ kayoyala lo ndjela etsha awɔ.+

16 Dimi lambota nto nte: Onto atɔfɔnyake dia dimi lekɔ enginya. Ko naka kaanga nyu mbɔsakami dia lekɔ enginya, nyombetawɔ oko kanga enginya dia dimi lawɔ ndjafuna yema. 17 Kɛnɛ katami kakianɛ, aha lo ndjela ɛnyɛlɔ ka Nkumadiɔndjɔ, koko oko wakoka mbuta kanga enginya, la eshikikelo kele la onto layafuna. 18 Lam’ele anto efula wekɔ lo ndjafuna lo ndjela akambo wa lo demba,* dimi lawɔ layoyafuna. 19 Lam’ele nyekɔ lo mbuta dia nyekɔ la ekanelo k’ɔlɔlɔ, nyu mbikikɛka l’ɔngɛnɔngɛnɔ tshɛ lɔkɛwɔ l’akanga wa dinginya. 20 Lo mɛtɛ, nyu mbikikɛka dionga dia onto tshɛ lanyonda oko mfumbe, onto tshɛ lanyomanɛ diangɔ dianyu, onto tshɛ lanyɔkɔsɔla kɛnɛ kele la nyu, onto tshɛ layadiya laadiko dianyu ndo onto tshɛ lanyɔkɔmɔla l’elungi.

21 Lekɔ lo mbuta ngasɔ dia sho mbishama nsɔnyi, lam’ele mbeyaka mɛnama oko takasale akambo oko ɛhɔdu w’anto.

Koko naka anto akina wekɔ lo nsala dikambo dimɔtshi la dihonga, (laasɔ lekɔ lo ntɛkɛta oko kanga enginya,) kete dimi lawɔ kokaka nsala dikambo diakɔ la dihonga. 22 Onde ase Hɛbɛru mbewɔ? Ndo dimi lawɔ.+ Onde ase Isariyɛlɛ mbewɔ? Ndo dimi lawɔ. Onde tokanula* ta Abrahama mbewɔ? Ndo dimi lawɔ.+ 23 Onde ekambi wa Kristo mbewɔ? Dimi lambokadimola oko kanga dadi nte: Dimi lekɔ okambi wa Kristo waaleki la fwa, nɛ dia dimi lakakambe olimu mbaleka,+ lakandama lo nkanu mbala efula mbaleka,+ lakakɔmama yoho yaheyama mbuta ndo laki mbala efula l’asa eko la nyɔi.+ 24 Mbala 5 y’etondo, ase Juda+ wakakɔmɔla mfimbɔ 40 minya ɔtɔi, 25 mbala 3 y’etondo, wakakɔmɔla eshingɔ,+ mbala kɛmɔtshi wakamboke ave,+ mbala 3 y’etondo masuwa wakiso lɔkɔ wakahandjɔka,+ laketsha otsho w’otondo la yanyi y’otondo lo ashi wa dingunda. 26 Lakandaka nkɛndɔ mbala efula, laki lo waale lo nkushi, lo waale w’oma le apɔtwanyi, lo waale w’oma le ase wodja ami,+ lo waale w’oma le ase wedja,+ lo waale wa l’osomba,+ lo waale wa l’oswe, lo waale wa lo ndjale, lo waale wa l’atei w’anangɛso wa kashi, 27 lo olimu wa wolo ndo walɛndja demba, lo ndala engondo mbala la mbala,+ lo ndjala ndo lo mposa k’ashi,+ lo mpomba mbo ya ndɛ mbala efula,+ lo tshitshi ndo lo olanda.*

28 Laadiko dia weho w’akambo w’oma l’andja asɔ, ekɔ dui dikina diantshindja wɔɔngɔ lushi la lushi:* Okiyanu lo dikambo dia tshumanelo tshɛ.+ 29 Akɔna ele wɔdu ko dimi lawɔ halonge wɔdu? Akɔna atakana aha la dimi lawɔ momala?

30 Naka dimi pombaka ndjafuna, kete layoyafuna lo akambo wɛnya wɔdu ami. 31 Nzambi lele She Nkumadiɔndjɔ Yeso, Ɔnɛ lahomba tombɔmaka pondjo pondjo mbeyaka dia aha kashi katami. 32 Lam’akimi la Damasɛkɛ, nguvɛrnɛrɛ kakakambɛka nkumekanga Arɛtasɛ akalamaka osomba w’ase Damasɛkɛ dia mindami, 33 koko wakapoloya lo kisaka* oma lo didishi dia lo ehele k’osomba,+ ko dimi lakahande oma lo anya ande.

12 Dimi pombaka mfuna. Dui sɔ bu la wahɔ, koko layanga mbeta kakianɛ lo waɛnɛlɔ+ ndo woshwelo w’oma le Nkumadiɔndjɔ.+ 2 Dimi mbeyaka pami kɛmɔtshi kele kaamɛ la Kristo, kele ambeta ɛnɔnyi 14, nde akatɔlama polo l’olongo wa 3, kana nde akatɔlama lo demba ko kana aha lo demba, dimi haleye, Nzambi keeya. 3 Eelo, dimi mbeyaka pami kɛsɔ. Nde akatɔlama lo paradiso, kana lo demba ko kana aha lo demba, dimi haleye, Nzambi keeya 4 onto lakatɔlama lo paradiso, ndo lakoke ɛtɛkɛta wahakoke tɛkɛtama ndo wahakoke onto mbuta. 5 Dimi layofuna dikambo di’onto ɔsɔ, koko hatofuna dikambo diami dimɛ onyake dia wɛɔdu ami. 6 Nɛ dia oyadi kaanga dimi lotolanga ndjafuna, totomonga enginya nɛ dia lotota mɛtɛ. Koko dimi lakatone nsala dui sɔ diaha kaanga onto ɔtɔi mbishami lotombo loleki kɛnɛ kɛnande le mi kana kɛnɛ kokande oma le mi, 7 paka l’ɔtɛ walongolami woshwelo wa diambo.

Diaha dimi ndjadiya amboleka, wakambisha tɛndɛ lo demba,+ ondjelo wa Satana dia pɛnyahɛnyakami* diaha dimi ndjadiya amboleka. 8 Dimi lakasɛngasɛnga Nkumadiɔndjɔ mbala 3 y’etondo lo dikambo sɔ dia tɛndɛ sɔ mbikɔmi. 9 Koko nde akambutɛ ate: “Ɔlɔlɔ waheyama mbɛdika wamomokosalɛ ambokoka le yɛ, nɛ dia wolo ami wekɔ lo nkoma kokele lo wɔdu.”+ Ɔnkɔnɛ, dimi layoyafuna l’ɔngɛnɔngɛnɔ woleki tshɛ dikambo dia wɛɔdu ami, dia wolo wa Kristo ntshikala la diko diami oko luudu la dipɛma. 10 Diakɔ diele dimi ngɛnangɛnaka lo wɛɔdu, lo ntɛngɔ, lo tena diongami lo dihombo, lo ɛhɛnyɔhɛnyɔ ndo lo ekakatanu lo dikambo dia Kristo. Nɛ dia etena kemi wɔdu, mbemi la wolo.+

11 Dimi laya kanga enginya. Nyu mbambokonya enginya nɛ dia nyu mbotondowola. Dikambo dimi kondjaɛnya kaanga lo kiambokambo tshɔi dia lekɔ l’ɛse k’anto anyu wayata dia vɔ ndeka apɔstɔlɔ, kaanga mbemi onto l’anyanya.+ 12 Lo mɛtɛ, tolembetelo ta woho wemi ɔpɔstɔlɔ takɛnama l’atei anyu oma lo ekikelo kami ka wolo+ ndo oma lo tolembetelo, ahindo ndo akambo wa diambo wakamasale.+ 13 Nɛ dia, lo woho akɔna wakinyu kombidjama yimba oleki tshumanelo dikina, laadiko dia woho wakimi komonga wotsho le nyu?+ Lam’alanganyu, nyodimanyiya l’ɔtɛ wa munga kɛsɔ.

14 Nyende, ɔnɛ ekɔ mbala ka 3 kamomoyalɔngɔsɔla dia ndja le nyu, ndo dimi hatonga wotsho le nyu. Nɛ dia aha diangɔ dianyu mbayangami,+ koko etondo anyu mbayangami; dikambo ana+ hawɔlɔmbama dia mombɛ ambutshi awɔ diangɔ, koko ambutshi mbombɛ anawɔ diangɔ. 15 Dimi lo wedi ami, layokimɔ kɛnɛ kele la mi l’ɔngɛnɔngɛnɔ woleki tshɛ ndo layoyakimɔ tshɛ dikambo dianyu.*+ Naka dimi nyolangaka lo yɛdikɔ y’efula ngasɔ, onde laasɔ dimi haakoke nangema efula? 16 Oyadi woho akɔna tshɛ, dimi konyɛndja wotsho.+ Koko nyu mbutaka dia dimi laki “okadi” ndo “lakanyokese.” 17 Dimi konyɔlɛ diangɔ dianyu lo tshimbo ya wanɛ wakamatome le nyu, shi mɛtɛ? 18 Dimi lakakɔkɔmiya Tito ndo lakootome kaamɛ la ɔnangɛso. Tito konyɔlɛ diangɔ dianyu, shi mɛtɛ?+ Sho taki la eyango waamɛ, shi mɛtɛ? Ndo takasale akambo yoho yaamɛ, shi mɛtɛ?

19 Onde nyu fɔnyaka dia edja kɛnɛ tshɛ tekɔ lo nsamba la ntondo kanyu? La ntondo ka Nzambi mbatɛkɛtaso oko weso kaamɛ la Kristo. Koko analengo wa ngandji le, tshɛ kasalaso ele dia nyokeketsha. 20 Dimi lekɔ la wɔma dia lo yoho mɔtshi lam’ayomoya, mbeyaka monga ko dimi hatonyotana oko wakombolami ndo mbeyaka monga ko dimi hatɛnama le nyu oko wakombolanyu, koko dimi mbeyaka ndjotana ewanu, kandjema, awui washana nkɛlɛ, diatɔnelo, lɔtɛndɔ, vate vate,* otako ndo ofukutanu. 21 Ondo lam’ayomoya nto, Nzambi kami mbeyaka mbishami nsɔnyi la ntondo kanyu ndo dimi mbeyaka ndela lo dikambo di’efula ka wanɛ wakasale pɛkato, koko hawoyatshumoya l’ɔtɛ wa mindo yawɔ ndo awui wa mindo wa dieyanelo* ndo lɔkɛwɔ la fumbɔ nsɔnyi* lele la wɔ.

13 Ɔnɛ ekɔ mbala ka 3 kayalɔngɔsɔlami dia ndja le nyu. “Lo etelo* k’ɛmɛnyi 2 kana 3 kahomba shikikɛma+ oseka dikambo tshɛ.” 2 Kaanga kemi bu kaamɛ la nyu kakianɛ, ekɔ oko dimi lekɔ kaamɛ la nyu mbala ka 2 ndo lambotahɛmɔdi wanɛ wakasale pɛkato ntondo ndo anto akina tshɛ dia naka lamboya nto, dimi hatowahandja, 3 lam’ele nyekɔ lo nyanga djembetelo yɛnya dia Kristo, ɔnɛ lele bu wɔdu otsha le nyu, koko ekɔ wolo l’atei anyu, nde ekɔ mɛtɛ lo ntɛkɛta lo tshimbo yami. 4 Nɛ dia, lo mɛtɛ nde akadiakema lo otamba l’ɔtɛ wa wɔdu, koko nde ekɔ la lɔsɛnɔ l’ɔtɛ wa wolo wa Nzambi.+ Lo mɛtɛ, sho lawɔ tekɔ wɔdu kaamɛ la nde,+ koko tayɔsɛna kaamɛ la nde, l’ɔtɛ wa wolo wa Nzambi otsha le nyu.+

5 Nyotetemale ndjasɛdingola dia mbeya kana nyekɔ lo mbetawɔ; nyotetemale mɛnya woho w’anto wenyu.+ Kana onde nyu hanyeye dia Yeso Kristo ekɔ kaamɛ la nyu? Onyake naka hanyoyetawɔma. 6 Lo mɛtɛ, lekɔ lo nongamɛ dia nyayoshihodia ɔnɛ sho bu anto wahetawɔma.

7 Tekɔ lo nɔmba Nzambi diaha nyu nsala ndooko dikambo dia kɔlɔ, aha dia sho mɛnama oko anto wambetawɔma, koko dia nyu nsala kɛnɛ kele ɔlɔlɔ, oyadi kaanga mbakokaso mɛnama dia hatetawɔma. 8 Nɛ dia sho hatokoke nsala ndooko dikambo dialɔshana la akambo wa mɛtɛ, koko paka diɔtɔnɛ la akambo wa mɛtɛ. 9 Eelo, sho ngɛnangɛnaka etena keso wɔdu, koko nyu nyekɔ wolo. Ndo tekɔ lo nsala alɔmbɛlɔ dia nyu nsala etshikitanu wahombama. 10 Diakɔ dianyofundɛmi akambo asɔ etena kemi bu kaamɛ la nyu, kele lam’ayomonga kaamɛ la nyu, aha dimi ndjokamba lo yoho ya wolo la lowandji lakambisha Nkumadiɔndjɔ+ dia nyokeketsha, koko aha dia nyɔtɛwɔla.

11 Dia nkomiya, analengo, nyotetemale ngɛnangɛna, nsala etshikitanu, sambema,+ monga la kanyi ɔtɔi+ ndo nsɛna lo wɔladi,+ ko Nzambi ka ngandji ndo ka wɔladi+ ayonga kaamɛ la nyu. 12 Nyoshane mɔyɔ wa la bizɛ k’ekila. 13 Ekilami tshɛ wanyotomɛ mɔyɔ.

14 Ɔlɔlɔ waheyama mbɛdika wa Nkumadiɔndjɔ Yeso Kristo ndo ngandji ka Nzambi ndo osanga wa lo nyuma k’ekila wayale la nyu nyu tshɛ!