MUKANDA WAKAFUNDƐ PƆƆLƆ ASE NGALATIYA

1 Dimi Pɔɔlɔ, lakayala ɔpɔstɔlɔ aha oma le anto kana lo tshimbo y’onto ɔmɔtshi, koko oma le Yeso Kristo+ ndo oma le Nzambi Shɛso+ lakawolola oma lo nyɔi, 2 ndo anangɛso tshɛ wekɔ kaamɛ la mi. Dimi lambofundɛ tshumanelo dia la Ngalatiya nte:

3 Ɔlɔlɔ waheyama mbɛdika ndo wɔladi w’oma le Nzambi Shɛso ndo w’oma le Nkumadiɔndjɔ Yeso Kristo wayale la nyu! 4 Nde akayakimɔ dikambo dia pɛkato yaso+ dia nde totshungola oma lo dikongɛ nɛ di’akambo dia kɔlɔ*+ lo ndjela lolango la Nzambi kaso ndo Shɛso+ 5 lahomba tombɔmaka pondjo pondjo. Aamɛɛ.

6 Lekɔ lo mamba dia esadi eto, nyu nyambokadimɔ* oma le Ɔnɛ lakanyelɛ l’ɔtɛ w’ɔlɔlɔ waheyama mbɛdika wa Kristo, ko nyambɛlɛ otsha lo woho okina wa lokumu l’ɔlɔlɔ.+ 7 Ndooko lokumu l’ɔlɔlɔ lokina, paka anto amɔtshi mbanyofukutanya+ ndo mbalanga mengesola lokumu l’ɔlɔlɔ lendana la Kristo. 8 Koko oyadi sho kana ondjelo w’oma l’olongo mbonyewoyisha dui dimɔtshi oko lokumu l’ɔlɔlɔ lotshikitanyi la lokumu l’ɔlɔlɔ lakatanyewoya, onto ɔsɔ adjame mananu. 9 Oko woditshiso ntondo, lambota nto nte: Onto tshɛ lanyewoya dui dimɔtshi oko lokumu l’ɔlɔlɔ lotshikitanyi la kɛnɛ kakanyetawɔ, onto ɔsɔ adjame mananu.

10 Onde lo mɛtɛ anto mbomolanga mbetawoya kana Nzambi? Kana onde anto mbomolanga ngɛnyangɛnya? Naka anto mbaakamangɛnyangɛnya, kete dimi keema okambi wa Kristo. 11 Nɛ dia analengo le, dimi nangaka nyu mbeya dia lokumu l’ɔlɔlɔ lakamanyewoya kondja oma le anto.+ 12 Nɛ dia dimi kolilongola oma le onto ndo kolieka, koko aki lo tshimbo ya woshwelo w’oma le Yeso Kristo.

13 Aha la taamu, nyakoke lɔkɛwɔ laki la mi ntondo lo ɔtɛmwɛlɔ w’ase Juda+ dia dimi lakatetemala mpɛnyahɛnya etshumanelo ka Nzambi la wolo tshɛ ndo lakayange dia kihandjola.+ 14 Dimi lakatatetemalaka mpama l’ɔtɛmwɛlɔ w’ase Juda oleki anto efula wa lo lɔlɔnga lami waki lo wodja aso lam’ele laki la ohetoheto wa mamba lo mbekelo ya waa papa.+ 15 Koko etena kele Nzambi lakantondja oma lo otema wa mama ndo lakambelɛ oma lo ɔlɔlɔ ande waheyama mbɛdika+ akɛnyi ɔlɔlɔ 16 dia mbeyanya Ɔnande lo tshimbo yami dia dimi mbewoya lokumu l’ɔlɔlɔ lendana la nde le ase wedja,+ dimi komimbola ndooko onto* kanyi mbala kakɔ ɔtɔi; 17 ndo dimi kotshɔ la Jɛrusalɛma le wanɛ waki apɔstɔlɔ ntondo kami, koko dimi lakatshu la Arabiya ko lakayokalola la Damasɛkɛ.+

18 Oma laasɔ, ɛnɔnyi 3 l’ɔkɔngɔ, dimi lakatshu la Jɛrusalɛma+ dia tenda Kɛfasi*+ ndo lakatshikala la nde nshi 15. 19 Koko dimi kɔmɛna ndooko ɔpɔstɔlɔ okina onyake Jakɔba+ ɔnango Nkumadiɔndjɔ. 20 Lo kɛnɛ kendana l’akambo wanyofundɛmi, dimi lambonyoshikikɛ la ntondo ka Nzambi dia aha kashi katami.

21 Oma laasɔ, dimi lakatshu l’ɛtshi ka nkɛtɛ ka Suriya ndo ka Kilikiya.+ 22 Koko, tshumanelo dia la Judeya diaki kaamɛ la Kristo kombeyakami. 23 Vɔ wakokaka tsho wata ɔnɛ: “Pami kakatɔhɛnyahɛnyaka+ ntondo ewoya kakianɛ lokumu l’ɔlɔlɔ lendana la mbetawɔ kakandahandjolaka ntondo.”+ 24 Ɔnkɔnɛ, vɔ wakatatɛ ntombola Nzambi l’ɔtɛ ami.

2 Oma laasɔ, l’ɔkɔngɔ wa ɛnɔnyi 14, dimi lakatshu nto la Jɛrusalɛma kaamɛ la Barnabasɛ,+ lakatshu ndo la+ Tito. 2 Dimi lakatshu l’ɔtɛ wa kɛnɛ kakambisholɛ Nzambi ndo lakatowaewoya lokumu l’ɔlɔlɔ lasambishami ase wedja. Dikambo sɔ diakasalema lo woshɛshɛ, koko la ntondo k’anto waki la lokumu dia nshikikɛ dia dimi kondawɔka kana haalawɔ lowango lami olawɔlawɔ. 3 Koko, kaanga Tito+ laki kaamɛ la mi kotshutshuyama dia minya mpota+ kaanga mbakinde ose Ngirika. 4 Koko, dui sɔ diakatombe l’ɔtɛ w’anangɛso wa kashi wakɔtɔ lo woshɛshɛ+ l’atei aso oko atɔpi dia menda lotshungɔ+ lele la so oma le Kristo Yeso l’oyango wa tokonya mfumbe tshɛ lo tshɛ,+ 5 sho kombetawɔ awui w’anto asɔ+ kaanga yema tshitshɛ* dia akambo wa mɛtɛ wa lokumu l’ɔlɔlɔ ntetemala monga le nyu.

6 Koko lo kɛnɛ kendana la wanɛ wɛnama oko wekɔ ohomba efula,+ oyadi woho akɔna w’anto wakiwɔ, le mi, vɔ tshɛ wekɔ woho ɔtɔi, nɛ dia Nzambi hende ɛnamelo ka l’andja k’onto, ndooko k’oyoyo kakamakondja oma le anto wɔsama la nɛmɔ di’efula asɔ. 7 Koko, lam’akawɛnyi dia wakambisha olimu wa nsambisha wanɛ waki kominya mpota+ lokumu l’ɔlɔlɔ, oko wakalongola Petero le wanɛ wakanyɛma mpota, 8 nɛ dia Ɔnɛ lakasha Petero wolo dia monga ɔpɔstɔlɔ le wanɛ wakanyɛma mpota mbakambisha ndo dimi wolo le wanɛ wele ase wedja,+ 9 ndo lam’akawashihodia ɔlɔlɔ waheyama mbɛdika wakawansalɛ,+ Jakɔba,+ Kɛfasi* la Joani wanɛ wakɔsamaka oko dikundji wakatosha dimi+ la Barnabasɛ mɔyɔ wa tɛnya dia wekɔ kaamɛ la so, dia sho ntshɔ otsha le ase wedja koko vɔ otsha le wanɛ wakanyɛma mpota. 10 Vɔ wakatɔlɔmbɛ tsho dia sho mbohɔka ase wola ndo dimi lakadjaka welo wa l’otema ɔtɔi dia nsala dui sɔ.+

11 Koko, lam’akaye Kɛfasi*+ l’Atiyɔka,+ dimi lakawaanya* lo washo ande, nɛ dia akɛnama hwe dia nde akasale kɔlɔ.* 12 Dikambo la ntondo k’anto amɔtshi waki oma le Jakɔba+ nkoma, nde akalɛka kaamɛ l’ase wedja,+ koko lam’akawakome, nde akatshike nsala dikambo sɔ ndo akangana la wɔ, lam’ele nde akokaka olui w’anto wakanyɛma mpota wɔma.+ 13 Ase Juda akina wakayele lokolo lande lo nsukɛ lokeso* lɔsɔ, diakɔ diele kaanga Barnabasɛ akayaayelaka lo lokeso* lawɔ. 14 Koko, lam’akamɛnyi dia vɔ kɔkɛndakɛndaka lo yoho yɔtɔnɛ l’akambo wa mɛtɛ wa lokumu l’ɔlɔlɔ,+ dimi lakatɛ Kɛfasi* la ntondo kawɔ vɔ tshɛ nte: “Naka wɛ lele ose Juda ekɔ lo nsala akambo oko ase wedja, koko aha oko ose Juda, ngande wakokayɛ ntshutshuya ase wedja dia vɔ nsala akambo lo yoho yɔtɔnɛ la mbekelo y’ase Juda?”+

15 Sho wanɛ wele ase Juda wa lootɔ, koko aha atshi wa pɛkato w’ase wedja, 16 sho mbeyaka dia onto mbɔsamaka oko onto ɔlɔlɔ, aha oma lo etsha w’ɛlɛmbɛ, koko paka oma lo mbetawɔ+ kele la nde le Yeso Kristo.+ Ɔnkɔnɛ, sho tekɔ la mbetawɔ le Kristo Yeso dia sho mbɔsama oko anto w’ɛlɔlɔ oma lo mbetawɔ kele la so le Kristo, koko aha oma lo etsha w’ɛlɛmbɛ, nɛ dia ndooko onto* layɔsama oko onto ɔlɔlɔ oma lo etsha w’ɛlɛmbɛ.+ 17 Naka taya atshi wa pɛkato etena kayangaso dia mbɔsama oko anto w’ɛlɔlɔ lo tshimbo ya Kristo, onde Kristo ekɔ okambi wa pɛkato? Ndooko! 18 Naka dimi loohika nto kɛnɛ kakamahandjola, kete lɛnya dia dimi lekɔ ɔmɔnyɔdi w’ɛlɛmbɛ. 19 Nɛ dia lo tshimbo y’ɛlɛmbɛ,+ dimi lambovɔ lo kɛnɛ kendana la ɛlɛmbɛ dia dimi monga la lɔsɛnɔ le Nzambi. 20 Dimi lambɔkɔkɔma nsɛti lo otamba kaamɛ la Kristo.+ Ɔnkɔnɛ, aha dimi kaakasɛnɛ,+ koko Kristo mbasɛna kaamɛ la mi. Lo mɛtɛ, lɔsɛnɔ lomɔsɛna kakianɛ lo demba, lekɔ lo nsɛna diɛsɛ la mbetawɔ kele la mi le Ɔna Nzambi+ lakamboke ngandji ndo lakayakimɔ dikambo diami.+ 21 Dimi halatone* ɔlɔlɔ waheyama mbɛdika waki Nzambi,+ nɛ dia naka onto ayɔsama oko onto ɔlɔlɔ l’ekimanyielo k’ɛlɛmbɛ, kete ovɔvɔ mbakavu Kristo.+

3 Ase Ngalatiya wa dinginya le, akɔna akanyodje lo shɛngiya ya kɔlɔ ya nganɛ,+ nyu wanɛ wakɛnyi hwe dia Yeso Kristo akɔkɔma nsɛti l’otamba?+ 2 Kɛnɛ kalangami nyombola* ele: Onde nyakalongola nyuma oma lo etsha w’ɛlɛmbɛ, kana l’ɔtɛ wa mbetawɔ kele la nyu lo kɛnɛ kakanyoke?+ 3 Tete nyekɔ dinginya nganɛ? L’ɔkɔngɔ wa nyu ntatɛ ndawɔ lowango la lo nyuma,* onde nyoyanga dia nkomiya la lowango la lo demba?*+ 4 Onde wokikɛkikɛ mbakanyakikɛ lokema l’asui lɔnɛ? Naka aki mɛtɛ wokikɛkikɛ. 5 Ko onde ɔnɛ lanyosha nyuma ndo lasala akambo wa diambo+ l’atei anyu ekɔ lo nsala awui asɔ l’ɔtɛ w’etsha anyu w’ɛlɛmbɛ, kana l’ɔtɛ wa mbetawɔ kele la nyu lo kɛnɛ kakanyoke? 6 Oko Abrahama “laki la mbetawɔ le Jehowa* ko nde akɔsama oko onto ɔlɔlɔ.”+

7 Lo mɛtɛ, nyu mbeyaka dia wanɛ wamamema mbetawɔ mbele ana wa Abrahama.+ 8 Lo mɛna la ntondo dia Nzambi akahombe mbɔsa ase wedja oko anto w’ɛlɔlɔ l’ɔtɛ wa mbetawɔ, afundelo wakatewoyisha Abrahama lokumu l’ɔlɔlɔ la ntondo ɔnɛ: “Lo tshimbo yayɛ mbayɔtshɔkwama wedja tshɛ.”+ 9 Ɔnkɔnɛ, wanɛ wamamema mbetawɔ wekɔ lo tshɔkwama kaamɛ la Abrahama, ɔnɛ laki la mbetawɔ.+

10 Wanɛ tshɛ wayaɛkɛ lo etsha w’ɛlɛmbɛ wambodjama mananu, dikambo akafundama ɔnɛ: “Mananu le onto tshɛ lahatetemala ndjela awui tshɛ wakafundama lo wɔɔmbɔ wa dibuku di’Ɛlɛmbɛ lo mbakitanyiya.”+ 11 Ndo nto, mɛnamaka hwe dia aha oma lo ɛlɛmbɛ mbɔsa Nzambi onto oko onto ɔlɔlɔ,+ nɛ dia “onto ɔlɔlɔ ayɔsɛna oma lo mbetawɔ.”+ 12 Ɛlɛmbɛ hawohikami lo mbetawɔ. Koko, “onto tshɛ lasala akambo asɔ ayonga la lɔsɛnɔ lo tshimbo yawɔ.”+ 13 Kristo akatosombe+ ndo akatotshungola+ oma lo mananu k’Ɛlɛmbɛ lo mbidjama ndamɛ mananu lo dihole diaso, nɛ dia akafundama ɔnɛ: “Mananu le onto tshɛ lahanema l’otamba.”+ 14 Dui sɔ diakayala dia, ɔtshɔkɔ wa Abrahama ndja le wedja lo tshimbo ya Kristo Yeso,+ dia sho nongola nyuma+ kakawatolake l’ekimanyielo ka mbetawɔ kaso.

15 Analengo, lambokamba la ɛnyɛlɔ ka kɛnɛ katosalaka anto: Kam’ashikikɛma sheke oyadi kaanga oma le onto ɔtɔi oto, ndooko onto lakoka ndjitola kana nkotsha dui dikina lɔkɔ. 16 Alaka wakashama le Abrahama ndo le kanula*+ yande. Hatama ɔnɛ “ndo le tokanula* tayɛ” oko tokanula tekɔ efula. Koko mbutamaka ɔnɛ “ndo le kanula* yayɛ,” lo ɔtɔi, mbuta ate Kristo.+ 17 Ndo nto, dimi lambota nte: Ɛlɛmbɛ wakadjama ambeta+ ɛnɔnyi 430 hawotola sheke yakadje Nzambi ntondo oko onto latola daka. 18 Nɛ dia naka etenyi k’okitɔ pikama lo ɛlɛmbɛ, kete tɔ kaya bu lo ndjela daka, koko Nzambi akakisha Abrahama la lolango lande lo tshimbo ya daka.+

19 Ko laasɔ lande na Ɛlɛmbɛ? Vɔ wakakotshama dia ntondja kɔlɔ sɛkɛ+ polo ndo lam’akahombe ndja+ kanula,* ɔnɛ lakawalake daka. Ndo vɔ wakakimɔma lo tshimbo ya andjelo+ l’anya w’ompakemi.+ 20 Ompakemi mongaka ohomba paka naka ekɔ anto 2 kana ndekana, koko Nzambi ekɔ paka ndamɛ. 21 Onde laasɔ Ɛlɛmbɛ ndɔshanaka la alaka waki Nzambi? Ndooko! Nɛ dia otondonga ɔlɛmbɛ ɔmɔtshi wakadjama wakakoke mbisha anto lɔsɛnɔ, tshike anto wotɔsama mɛtɛ oko anto w’ɛlɔlɔ l’ekimanyielo k’ɛlɛmbɛ. 22 Koko, Afundelo wakakimɔ diangɔ tshɛ lo lokanu la pɛkato dia daka diaya lo monga la mbetawɔ le Yeso Kristo mbishama le wanɛ wonga la mbetawɔ.

23 Koko, la ntondo ka mbetawɔ ndja, sho takalamemaka oma le ɛlɛmbɛ ndo takakimɔma lo lokanu, takonga mbetawɔ kaki suke la mbishɔma.+ 24 Ɔnkɔnɛ, Ɛlɛmbɛ wakayala olami* aso wakatɔlɔmbɔla polo le Kristo+ dia sho mbɔsama oko anto w’ɛlɔlɔ l’ɔtɛ wa mbetawɔ.+ 25 Koko, kakianɛ lam’ambokoma mbetawɔ,+ taya bu la olami.*+

26 Lo mɛtɛ, nyu tshɛ nyekɔ ana wa Nzambi+ oma lo mbetawɔ kele la nyu le Kristo Yeso.+ 27 Nɛ dia nyu tshɛ wanɛ wakabatizama lo Kristo nyambɔlɔta Kristo.+ 28 Ndooko ose Juda kana ose Ngirika,+ ndooko mfumbe kana onto lele la lotshungɔ,+ ndooko pami kana womoto,+ nɛ dia nyu tshɛ nyekɔ kaamɛ la Kristo Yeso.+ 29 Ndo nto, naka nyekɔ anto waki Kristo, kete nyu mɛtɛ nyekɔ kanula*+ ya Abrahama, ekitɔ+ lo kɛnɛ kendana la daka.+

4 Lambota dia l’edja tshɛ keke okitɔ ɔna dikɛnda, nde hatshikitanyi la mfumbe kaanga kende owandji wa diangɔ tshɛ, 2 koko nde ekɔ l’ɛse ka lowandji l’alami ndo l’anto wenda akambo ande polo lo lushi lakatashikike she la ntondo. 3 Woho akɔ waamɛ mbele, sho lawɔ lam’akiso ana w’akɛnda, taki mfumbe y’akambo w’ana w’akɛnda wa l’andja ɔnɛ.+ 4 Koko lam’akakoke etena kakashikikɛma, Nzambi akatome Ɔnande lakotɔ oma le womoto+ ndo laki l’ɛse k’ɛlɛmbɛ+ 5 dia nde ntshungola wanɛ wele l’ɛse k’ɛlɛmbɛ+ dia sho mbɔsama oko ana wa yanyi.+

6 Lam’ele nyaya ana, Nzambi akatome nyuma+ ka Ɔnande lo etema+ aso ndo tɔ mbutaka la dui dia wolo ɔnɛ: “Aba,* Papa!”+ 7 Ɔnkɔnɛ, wɛ aya bu mfumbe koko aya ɔna. Ko naka wɛ aya ɔna, kete Nzambi amboketɛ ndo okitɔ.+

8 Koko etena kakinyu kombeyaka Nzambi, nyu nyaki mfumbe ya wanɛ wele bu mɛtɛ nzambi. 9 Koko, etena kɛnɛ kambonyeya Nzambi kana kambonyeyama le Nzambi, ngande wonyokalola nto lo akambo wa wɔdu+ ndo w’anyanya w’ana w’akɛnda ndo wonyolanga monga mfumbe yawɔ nto?+ 10 Nyu tɔsɛdingolaka la yambalo tshɛ nshi, ngɔndɔ,+ deko ndo ɛnɔnyi. 11 Lekɔ la wɔma lo dikambo dianyu dia lo woho ɔmɔtshi welo wadjami lo dikambo dianyu wambɔtɔ l’ashi.

12 Analengo, dimi lambonyɔsɛngasɛnga nte, nyonge oko dimi nɛ dia dimi lawɔ tongaka oko nyu.+ Nyu kosalɛmi ndooko kɔlɔ. 13 Koko, nyu mbeyaka dia hemɔ kaki la mi lo demba kakambisha diaaso dia ntondo dia nyewoya lokumu l’ɔlɔlɔ. 14 Ndo kaanga mbele hemɔ kaki la mi lo demba kaki tshondo y’ohemba le nyu, nyu kɔmɔnyɔlami kana mbɔsami oko ɛngɔ ka nyɛtɛɛtɛ,* koko nyakanongola oko ondjelo wa Nzambi kana oko Kristo Yeso. 15 Ko lende ambotshɔ ɔngɛnɔngɛnɔ waki la nyu? Nɛ dia lekɔ l’eshikikelo dia nyotokoka nkundola washo anyu ko mbishamiwɔ+ otondonga dui sɔ kokaka salema. 16 Ko onde laasɔ dimi laya otunyi anyu, nɛ dia dimi nyotɛka mɛtɛ? 17 Vɔ wekɔ lo nyanga l’ohetoheto tshɛ dia nyokondja, aha l’oyango w’ɔlɔlɔ; vɔ nangaka nyokakitola la mi dia nyu nomɔlomɔ dia mbayela. 18 Koko, ekɔ nshi tshɛ dimɛna dia onto ɔmɔtshi nyanga l’ohetoheto tshɛ dia nyokondja l’oyango w’ɔlɔlɔ, koko aha paka etena kemi kaamɛ la nyu, 19 nyu anami wa tshitshɛ+ wanɛ watatɛmi lɔɔnɔ nto edja ndo lam’ayokengama Kristo le nyu. 20 Dimi kombolaka dia monga kaamɛ la nyu l’etena kɛnɛ ndo ntɛkɛta lo yoho kina, nɛ dia lekɔ l’okananu lo dikambo dianyu.

21 Nyombutɛ, nyu wanɛ walanga monga l’ɛse k’ɛlɛmbɛ le, onde hanyoke kɛnɛ kata Ɛlɛmbɛ? 22 Ɛnyɛlɔ, akafundama ɔnɛ: Abrahama aki l’ana w’apami 2, ɔmɔtshi nde akawote la ose olimu ande wa womoto,+ okina nde la womoto lele la lotshungɔ.+ 23 Koko ɔnɛ lakandote la ose olimu ande wa womoto, akotɔ mɛtɛ lo yoho yatotɔka anto akina tshɛ*+ ndo ɔnɛ lakandote la womoto lele la lotshungɔ, nde akawote l’ekimanyielo ka daka.+ 24 Akambo asɔ mbeyaka mbɔsama lo yoho ya didjidji; nɛ dia wamato asɔ wekɔ didjidji dia toseke 2, mɔtshi oma lo Dikona dia Sinayi+ ndo yɔ yakote ana dia monga mfumbe, ndo yɔ yekɔ Hangara. 25 Hangara ekɔ didjidji dia Sinayi,+ dikona dimɔtshi dia lo Arabiya ndo nde mbɔtɔnɛka la Jɛrusalɛma ya nshi nyɛ nɛ dia nde l’anande wekɔ lo mfumbe. 26 Koko, Jɛrusalɛma ya la diko yekɔ la lotshungɔ ndo yɔ mbele nyangɛso.

27 Nɛ dia akafundama ɔnɛ: “Wɛ womoto l’ekomba laki kombota le, ɔngɛnɛngɛnɛ. Wɛ womoto laki kotata lɔɔnɔ le, otondɔ la tɔɔla ndo l’ekoko w’ɔngɛnɔngɛnɔ, nɛ dia ana wa womoto lele okalema waya efula oleki ana wa womoto lele la omi.”+ 28 Analengo le, nyu nyaya ana wa daka woho waki Isaka.+ 29 Koko oko wakatatɛ ɔna lakotɔ lo yoho yatotɔka anto akina tshɛ* mpɛnyahɛnya ɔnɛ lakotɔ l’ekimanyielo ka nyuma,+ ngasɔ mbediɔ ndo kakianɛ.+ 30 Ko kakɔna kata afundelo? “Tshanya ose olimu wa womoto la ɔnande, nɛ dia ɔnaki ose olimu wa womoto hongaki pondjo okitɔ kaamɛ la ɔna aki womoto lele la lotshungɔ.”+ 31 Ɔnkɔnɛ analengo, sho bu ana wa ose olimu wa womoto, koko wa womoto lele la lotshungɔ.

5 Kristo akatotshungola dia sho monga la woho wa lotshungɔ la ngasɔ. Ɔnkɔnɛ, nyotshikale nge+ ndo tanyetawɔke kelekama nto lo lɔhɔmbɔ.+

2 Nyende, dimi Pɔɔlɔ lekɔ lo nyotɛ nte: Naka nyambonya mpota, kete Kristo hatonga la wahɔ le nyu.+ 3 Dimi lambohola nto onto tshɛ lanya mpota dia nde pombaka nkitanyiya Ɛlɛmbɛ tshɛ.+ 4 Nyu nyambangana la Kristo, nyu wanɛ wayanga dia mbɔsama oko anto w’ɛlɔlɔ lo tshimbo ya ɛlɛmbɛ;+ nyu nyambangana etale oma lo ɔlɔlɔ ande waheyama mbɛdika. 5 Sho lo wedi aso, l’ekimanyielo ka nyuma, tekɔ lo kongɛɛ l’asolo walomɔlomɔ dia mbɔsama oko anto w’ɛlɔlɔ oma lo mbetawɔ. 6 Nɛ dia le wanɛ wele kaamɛ la Kristo Yeso, wonyelo wa mpota kana aha minya mpota keema la nɛmɔ,+ koko mbetawɔ katshutshuyama oma lo ngandji mbele la nɛmɔ.

7 Nyu nyakalawɔka dimɛna.+ Ko onto akɔna akanyoshimbe dia ntetemala nkitanyiya akambo wa mɛtɛ? 8 Tokanyi tetawoya ta ngasɔ hatoye oma le Ɔnɛ lanyeta. 9 Yema ya wodoya tshitshɛ mbidoyaka ofushi wa lɔsɔha tshɛ.+ 10 Lekɔ la eshikikelo dia nyu wanɛ wele kaamɛ la Nkumadiɔndjɔ+ hanyotonga la ekanelo kotshikitanyi, koko onto tshɛ lanyofukutanya,+ oyadi onto akɔna eende, ayokondja dilanya diɛdimi la nde. 11 Analengo le, le mi, naka laakatetemala nsambisha dia wonyelo wa mpota, lande na katetemalami pɛnyahɛnyama? Naka ngasɔ, kete otakanya w’otamba w’asui*+ wambonyɛma. 12 Dimi kombolaka dia apami wayanga dia nyofukutanya ndjaetɛ ɛlɛnga.*

13 Analengo, nyu nyakelamɛ dia monga la lotshungɔ. Dikambo ɔtɔi ko, tanyokambake la lotshungɔ lɔsɔ oko diaaso dia ndjasha lo nsaki ya demba,+ koko nyokambane+ olimu la ngandji. 14 Nɛ dia Ɛlɛmbɛ tshɛ wambokotshama* lo ɔlɛmbɛ ɔtɔi wata ɔnɛ: “Langa wonyayɛ onto oko wayalangayɛ.”+ 15 Ko naka nyayotetemala numatana ndo ndɛɛna lam’asanyu,+ kanyewɔ nyatokoyoshilana.+

16 Koko lambota nte: Nyotetemale nkɛndakɛnda la nyuma,+ ko hanyotoyasha kaanga yema lo nsaki ya demba.+ 17 Nɛ dia demba la nsaki yadiɔ ndɔshanaka la nyuma ndo nyuma ndɔshanaka la demba. Nyuma la demba ndɔshanaka diaha nyu nsala akambo walanganyu nsala.+ 18 Ndo nto, naka nyekɔ lo nɔmbwama la nyuma, kete nyu bu l’ɛse k’ɛlɛmbɛ.

19 Etsha wa demba mɛnamaka lo sɛkɛ ndo vɔ ɛnɛ: Awui wa mindo wa dieyanelo,*+ akambo wa mindo, lɔkɛwɔ la fumbɔ nsɔnyi,*+ 20 ɔtɛmwɛlɔ wa dikishi, diɔtɔnganelo dia la ɛdiɛngɛ,*+ ɔlɔshanelo, mindjo, kandjema, nkɛlɛ ka tshambandeko, ewanu, diatɔnelo, taato t’ɛtɛmwɛlɔ, 21 ɔkɔmiya, wodjwelo wa wanu,+ fɛtɛ yele l’awui wa tshambandeko* ndo akambo wa woho ɔsɔ.+ Dia akambo asɔ mbanyewolami woho wakamanyewola ntondo nte: Wanɛ wasala akambo asɔ hawotokita Diolelo dia Nzambi.+

22 Lo wedi okina, olowa wa nyuma wekɔ ngandji, ɔngɛnɔngɛnɔ, wɔladi, solo dia lotutsha, ɔlɔlɔ w’otema, ɔlɔlɔ,+ mbetawɔ, 23 memakana ndo ndjakimɛ.+ Ndooko ɔlɛmbɛ walɔshana la akambo asɔ. 24 Ndo nto, wanɛ wele waki Kristo Yeso wambɔkɔkɔmɛ demba, nsɔngu ya demba ndo nsaki yadiɔ+ nsɛti lo otamba.

25 Naka tekɔ lo nsɛna lo ndjela nyuma, kete nyɛsɔ totetemale nkɛndakɛnda aha la ofukutanu lo ndjela nyuma.+ 26 Tatoyangake mɛnya dia sho ndeka anto akina,+ lo nsɛmanɛ+ ndo lo kɔmiyana lam’asaso.

6 Analengo, naka onto ɔmɔtshi ambotatɛ ntakɔ mboka aha la nde mbeya, nyu wanɛ wele la akoka wa lo nyuma nyoyange dia mingola onto ɔsɔ la yimba ya memakana.+ Koko, yalamaka+ diaha ndo wɛ lawɔ ndjohembama.+ 2 Nyamuyanake eshikɔ.+ Lo nsala ngasɔ mbayonyokotsha ɔlɛmbɛ wa Kristo.+ 3 Nɛ dia naka onto ɔmɔtshi ndjaɔsaka dia nde ekɔ ohomba etena kele nde ekɔ onto l’anyanya,+ kete nde ekɔ lo ndjakesa. 4 Koko, onto l’onto asɛdingole etsha ande hita,+ ko nde ayoyonga la ɔkɔkɔ wa ngɛnangɛna lo kɛnɛ kasalande ndamɛ, koko aha lo ndjaɛdika l’onto okina.+ 5 Nɛ dia onto l’onto ayɛmba wotsho* ande hita.+

6 Ndo nto, onto tshɛ letshama* ɔtɛkɛta akahanake diangɔ tshɛ di’ɛlɔlɔ la ɔnɛ lawosha wetshelo akɔ.*+

7 Tanyoyakesake, Nzambi hasɔkama. Nɛ dia onto l’onto ayona kɛnɛ konɛnde.+ 8 Dikambo onto lonɛ lo demba ayona ɛhɔndɛlɔ oma lo demba diande, koko onto lonɛ lo nyuma ayona lɔsɛnɔ la pondjo oma le nyuma.+ 9 Ɔnkɔnɛ, tatotshikake nsala kɛnɛ kele ɔlɔlɔ, nɛ dia l’etena kahombama, tayona naka hatohekwe.*+ 10 Oma lɔkɔ, lam’ekeso la diaaso,* nyɛsɔ tosalɛke anto tshɛ ɔlɔlɔ, djekoleko wanɛ wotɔ la so lo mbetawɔ.

11 Nyende woho wamomonyofundɛ la lonya lami dimɛ l’alɛta a weke.

12 Wanɛ tshɛ walanga monga la ɛnamelo ka dimɛna lo demba* mbanyotshutshuya dia nyu minya mpota, vɔ wekɔ lo nsala dui sɔ tsho dia mbewɔ pɛnyahɛnyama dikambo dia otamba w’asui* wa Kristo Yeso. 13 Nɛ dia kaanga wanɛ wanya mpota hawokitanyiya Ɛlɛmbɛ,+ koko vɔ nangaka dia nyu minya mpota dia vɔ monga la ɔkɔkɔ wa ndjafuna lo dikambo dia alemba anyu. 14 Koko dimi haakombola pondjo ndjafuna, onyake dikambo dia otamba w’asui* wa Nkumadiɔndjɔ Yeso Kristo,+ ɔnɛ lele lo tshimbo yande andja wakadiakema* l’ɔtɛ ami ndo dimi l’ɔtɛ w’andja. 15 Nɛ dia minya mpota kana aha minya mpota+ ekɔ anyanya, koko kɛnɛ kele ohomba ele monga etongelo k’oyoyo.+ 16 Wanɛ tshɛ wakɛndakɛnda dimɛna lo yoho yɔtɔnɛ la ɔlɛmbɛ ɔnɛ wendana la lɔkɛwɔ, wɔladi ndo kɛtshi kayale la wɔ, eelo, le Isariyɛlɛ wa Nzambi.+

17 Ntatɛ oma ko kakianɛ, onto atɔmɛnyake paa, nɛ dia lekɔ la tolembetelo lo demba diami tɛnya dia lekɔ mfumbe ka Yeso.+

18 Analengo, ɔlɔlɔ waheyama mbɛdika wa Nkumɛso Yeso Kristo wayale la yimba yakɛnɛmɔlanyu! Aamɛɛ.