MUKANDA WAKAFUNDƐ PƆƆLƆ ASE ƐFƐSƆ

1 Dimi Pɔɔlɔ lele ɔpɔstɔlɔ wa Kristo Yeso oma lo lolango la Nzambi, lambofundɛ ekilami wele l’Ɛfɛsɔ+ ndo wele la kɔlamelo kaamɛ la Kristo Yeso nte:

2 Ɔlɔlɔ waheyama mbɛdika ndo wɔladi w’oma le Nzambi Shɛso ndo w’oma le Nkumadiɔndjɔ Yeso Kristo wayale la nyu!

3 Lotombo layale le Nzambi She Nkumɛso Yeso Kristo, nɛ dia nde akatɔtshɔkɔla la ɛtshɔkɔ tshɛ wa lo nyuma lo ahole wa l’olongo kaamɛ la Kristo,+ 4 lam’ele nde akatɔsɔnɛ la ntondo k’andja tongama* dia sho monga kaamɛ la nde,* dia sho monga ekila ndo aha la vadi+ la ntondo kande lo ngandji. 5 Nɛ dia nde akatɔsɔnɛ la ntondo+ dia sho mbɔsama oko anande wa yanyi+ lo tshimbo ya Yeso Kristo lo ndjela kɛnɛ kɔɔngɛnyangɛnya ndo lolango lande,+ 6 dia sho mbotombola l’ɔtɛ wa ɔlɔlɔ waheyama mbɛdika+ wa diambo wakandatosalɛ la ngandji tshɛ lo tshimbo ya olangemi ande.+ 7 Lo tshimbo yande mbeso la etshungwelo diɛsɛ la oshinga w’etshungwelo oma lo dikila diande,+ ɛɛ, edimanyielo ka kɔlɔ yaso+ lo ndjela ɔngɔnyi wa ɔlɔlɔ ande waheyama mbɛdika.

8 Nde akasale dia ɔlɔlɔ waheyama mbɛdika ɔsɔ mfula le so lo lomba tshɛ ndo ekanelo k’ɔlɔlɔ* 9 lo tewoya sheke y’ekila+ ya lolango lande. Dui sɔ diakasalema lo ndjela kɛnɛ kɔɔngɛnyangɛnya ndo kakandakongɛ ndamɛ 10 dikambo dia ɛlɔmbwɛlɔ* lo ekomelo ka tena diakandashikikɛ, dia ntshumanya diangɔ tshɛ kaamɛ le Kristo, diangɔ dia l’olongo ndo diangɔ dia la nkɛtɛ.+ Eelo, le nde, 11 ɔnɛ leso kaamɛ la nde ndo lakatasɔnama la ntondo dia monga ekitɔ+ kaamɛ la nde lo ndjela sangwelo dia ɔnɛ lakotsha akambo tshɛ oko washikikɛnde lo ndjela lolango lande, 12 dia sho wanɛ wakatatɛ monga la elongamelo le Kristo nkamba dikambo dia diando dia lotombo lande. 13 Koko, nyu lawɔ nyakalongamɛ le nde l’ɔkɔngɔ wa nyu mboka ɔtɛkɛta w’akambo wa mɛtɛ, lokumu l’ɔlɔlɔ lendana la panda kanyu. L’ɔkɔngɔ wa nyu monga la mbetawɔ, nyu nyakadjama tshapa+ lo tshimbo yande la nyuma k’ekila kakalakema 14 kele ɔkɔlɛ* watoshikikɛ dia tayokondja etenyi kaso k’okitɔ,+ l’oyango wa ntshungola ekambi waki Nzambi+ l’ekimanyielo ka oshinga w’etshungwelo+ lo lotombo lande la diambo.

15 Diakɔ diele dimi lawɔ, ntatɛ lam’akamoke dikambo dia mbetawɔ kele la nyu le Nkumadiɔndjɔ Yeso ndo ngandji kɛnyanyu otsha le ekilami tshɛ, 16 dimi haahekɔ mbisha Nzambi losaka l’ɔtɛ anyu. Dimi lekɔ lo ntetemala nyodja lo alɔmbɛlɔ ami, 17 dia Nzambi kaki Nkumɛso Yeso Kristo, Shɛso ka lotombo nyosha nyuma ka lomba ndo woshwelo lo ewo kande k’oshika.+ 18 Nde akahɛtshɛ washo w’etema anyu osase dia nyu mbeya oya lo woho w’elongamelo kakɔna kakandanyelɛ, ɔngɔnyi wa diambo walamɛnde ekilami+ oko etenyi k’okitɔ, 19 ndo dia nyu mbeya woke woke wa wolo wakakambe la nde lo dikambo diaso sho ambetawudi.+ Dui sɔ diekɔ lo ndjela olimu wa nkudu ka wolo ande 20 wakandakambe la wɔ otsha le Kristo etena kakandawolola oma lo nyɔi ndo kakandawodjashiya lo lonya lande l’omi+ lo ahole wa l’olongo, 21 mangana etale efula la waolelo tshɛ, mandji tshɛ, welo tshɛ, dɔmbwɛlɔ tshɛ ndo lokombo tshɛ lakoka shilama,+ aha paka lo dikongɛ nɛ di’akambo,* koko ndo lo nɛ diayaye. 22 Ndo nto, Nzambi akalɛndja diangɔ tshɛ l’ɛse k’ekolo ande+ ndo akawetɛ ɔtɛ w’akambo tshɛ wendana la etshumanelo+ 23 kele demba diande,+ elolelo ka ɔnɛ lalodia diangɔ tshɛ lo tshɛ.

2 Ndo nto, Nzambi akanyosha lɔsɛnɔ lam’akinyu edo lo munga la lo pɛkato+ yanyu, 2 yakanyakɛndakɛndaka lɔkɔ lo etena kɛmɔtshi lo ndjela dikongɛ di’akambo dia l’andja ɔnɛ,+ lo ndjela omboledi wa lowandji la hiɛlɛlɛ,+ yimba+ yakamba olimu ɛlɔ kɛnɛ le ana wele bu l’okitanyiya. 3 Eelo, l’atei awɔ mbakatakɛndakɛndaka sho tshɛ lo etena kɛmɔtshi lo yoho yɔtɔnɛ la nsaki y’alemba aso,+ takotsha nango ya demba ndo ya tokanyi taso,+ ndo taki mɛtɛ ana wa nkɛlɛ+ oko anto akina. 4 Koko, Nzambi lele ɔngɔnyi lo kɛtshi,+ l’ɔtɛ wa ngandji k’efula kakandatolange,+ 5 akatosha lɔsɛnɔ kaamɛ la Kristo kaanga etena kakatavu lo munga yaso,+ (oma lo ɔlɔlɔ waheyama mbɛdika mbakanyashimbamɛ). 6 Ndo nto, nde akatolola kaamɛ ndo akatodjashiya kaamɛ lo ahole wa l’olongo kaamɛ la Kristo Yeso,+ 7 dia lo akongɛ w’akambo wayaye,* nde kɛnya ɔngɔnyi woleki wa ɔlɔlɔ ande waheyama mbɛdika lo kɛtshi kande otsha le so wanɛ wele kaamɛ la Kristo Yeso.

8 Oma lo ɔlɔlɔ waheyama mbɛdika ɔsɔ mbakanyashimbamɛ l’ɔtɛ wa mbetawɔ,+ koko aha l’ɔtɛ wa kɛnɛ kasalanyu. Ɔsɔ ekɔ woshasha wa Nzambi. 9 Keema, aha l’ɔtɛ w’etsha,+ diaha onto ɔmɔtshi ndjonga l’ɔkɔkɔ wa ndjafuna. 10 Sho tekɔ olimu w’anya wa Nzambi* ndo takatongama+ lo kaamɛ la Kristo Yeso+ dikambo dia elimu w’ɛlɔlɔ wele Nzambi akatashikike la ntondo dia sho nkɛndakɛnda lɔkɔ.

11 Ɔnkɔnɛ, nyohɔ dia l’etena kɛmɔtshi, nyu ase wedja wa lootɔ lo demba, nyu mbakelamɛka ɔnɛ: “Wanɛ waki kominya mpota” oma le wanɛ welamɛ ɔnɛ: “Wonyelo wa mpota” wasalema lo demba la anya w’anto. 12 L’etena kɛsɔ, nyu komonga la Kristo, nyakangana la wodja w’Isariyɛlɛ, nyaki angɛndangɛnda lo toseke ta daka;+ nyu komonga la elongamelo ndo nyaki aha la Nzambi lo andja ɔnɛ.+ 13 Koko, etena kɛnɛ kayanyu kaamɛ la Kristo Yeso, nyu wanɛ wakangana etale la Nzambi, nyaya suke la nde oma lo dikila dia Kristo. 14 Nɛ dia nde kele wɔladi aso,+ ɔnɛ lakasanganya elui akɔ 2 dia monga olui 1+ ndo lakatola+ ehele kaki lam’asawɔ. 15 L’ekimanyielo ka demba diande, nde akanya lohetsho, Ɛlɛmbɛ wa tɛdikɔ waki la wadjango, dia nkonya elui akɔ 2 onto ɔtɔi+ l’oyoyo lele kaamɛ la nde ndo dia mbidja wɔladi, 16 ndo mbokanya dimɛna dimɛna elui akɔ 2 lo demba ɔtɔi le Nzambi lo tshimbo y’otamba w’asui,*+ nɛ dia nde akadiake lohetsho+ lo tshimbo yande ndamɛ. 17 Nde akaye ndo akewoya lokumu l’ɔlɔlɔ la wɔladi le nyu wanɛ waki etale, ndo wɔladi le wanɛ waki suke, 18 nɛ dia lo tshimbo yande mbeso sho elui akɔ 2 la diaaso dia nɔmba Shɛso lo nyuma kakɔ ɔtɔi.

19 Ɔnkɔnɛ, nyu nyaya bu angɛndangɛnda ndo ambetshi a mboka,+ koko nyaya ase wodja+ kaamɛ la ekilami ndo nyaya ase luudu la Nzambi,+ 20 ndo nyu nyambohikama laadiko dia etshina ka apɔstɔlɔ ndo ka amvutshi+ etena kele Kristo Yeso ndamɛ kele dive dia tshuku+ di’etshina. 21 Kaamɛ la nde, luudu l’otondo lambonga tɛmpɛlɔ k’ekila ka Jehowa*+ kele tenyi diatɔ tshɛ kakatanyema+ kaamɛ. 22 Kaamɛ la nde mbahikamanyu ndo nyu lawɔ kaamɛ dia monga dihole dia Nzambi mbidjasɛ lo tshimbo ya nyuma.+

3 Dia dikambo sɔ, dimi Pɔɔlɔ ose lokanu+ la Kristo Yeso lo wahɔ anyu, nyu ase wedja . . . 2 lo mɛtɛ, naka nyakoke dikambo dia ɔkɛndɛ+ wa ɔlɔlɔ waheyama mbɛdika waki Nzambi wakawambisha lo wahɔ anyu, 3 dia lo tshimbo ya woshwelo mbakawambewoya sheke y’ekila, oko wakamanyofundɛ ntondo lo tshena pe. 4 Ɔnkɔnɛ, lam’adianyu mukanda ɔnɛ, nyayokoka nshihodia eokelo kele la mi ka sheke y’ekila+ ya Kristo. 5 Lo nɔnga nkina, sheke y’ekila shɔ kombeyama le ana w’anto oko wamboyoshɔma ɛlɔ kɛnɛ le apɔstɔlɔ ande w’ekila la amvutshi oma le nyuma,+ 6 mbuta ate dia ase wedja wanɛ wele kaamɛ la Kristo Yeso pombaka monga ekitɔ ndo vɔ lawɔ, monga ndo vɔ lawɔ tenyi dia demba+ ndo nkondja vɔ lawɔ kɛnɛ kakatolake Nzambi l’ekimanyielo ka lokumu l’ɔlɔlɔ. 7 Dimi lakayala okambi wa sheke y’ekila shɔ lo ndjela losha la woshasha wa ɔlɔlɔ waheyama mbɛdika waki Nzambi lakawambisha lo ndjela woho wakamba wolo ande.+

8 Dimi loleki tshitshɛ l’atei w’ekilami+ tshɛ woleki totshitshɛ, kakawasalɛ ɔlɔlɔ waheyama mbɛdika ɔsɔ+ dia dimi mbewoya ase wedja lokumu l’ɔlɔlɔ lendana la ɔngɔnyi wa Kristo waheyama mbɛdika 9 ndo dia mɛnya onto tshɛ ɛlɔmbwɛlɔ ka sheke y’ekila+ yakashɛma oma ko mɔmbɔkɔmbɔla le Nzambi lakatonge diangɔ tshɛ. 10 Dui sɔ diaki ngasɔ dia lo tshimbo y’etshumanelo,+ lomba laki Nzambi+ lɛnama lo toho efula ka mamba mbeyama l’etena kɛnɛ le mandji ndo waolelo wele lo ahole wa l’olongo. 11 Dui sɔ diekɔ lo ndjela sangwelo dia pondjo diakandakongɛ lo dikambo dia Kristo+ Yeso Nkumɛso, 12 ɔnɛ lele lo tshimbo yande mbeso l’akoka wa ntɛkɛta la dihonga ndo ndjasukanya+ la Nzambi l’eshikikelo tshɛ, nɛ dia tekɔ la mbetawɔ le nde. 13 Ɔnkɔnɛ, dimi lambonyɔlɔmba diaha nyu mpekɔ lo kɛnɛ kendana l’asui wasowami l’ɔtɛ anyu nɛ dia dui sɔ nembetshiyaka lotombo le nyu.+

14 L’ɔtɛ wa dikambo sɔ mbakɛmi Shɛso adwe. 15 Nde mbɔɔlɛ nkumbo tshɛ ka l’olongo ndo ka la nkɛtɛ lokombo latɔ. 16 Dimi lekɔ lo nɔmba dia nde nyokimanyiya dia nyu monga la wolo lo lonto lanyu la l’etei+ oma lo efula ka lotombo lande lo tshimbo ya wolo wa nyuma kande, 17 ndo dia lo tshimbo ya mbetawɔ kanyu, nyu mbidjashiya Kristo lo etema anyu la ngandji.+ Nyoke edio+ ndo nyoshikimale lo etshina,+ 18 dia nyu la ekilami tshɛ monga la akoka wa nshihodia dimɛna wekeke, otale, wemema ndo ɔhɔngɔ, 19 ndo dia nyu mbeya ngandji ka Kristo+ koleki ewo, dia nyu ndola la elolelo tshɛ kasha Nzambi.

20 Ɔnkɔnɛ, lo ndjela wolo ande wakamba le so,+ Nzambi kokaka mɛtɛ nsala akambo efula oleki kɛnɛ tshɛ kalɔmbaso kana kakanyiyaso.+ 21 Lotombo layale le nde lo tshimbo ya etshumanelo ndo lo tshimbo ya Kristo Yeso lo nɔnga tshɛ pondjo pondjo! Aamɛɛ.

4 Ɔnkɔnɛ, dimi lele ose lokanu+ lo Nkumadiɔndjɔ, lambonyɔsɛngasɛnga dia nyu nkɛndakɛnda lo yoho yasungana+ la leeta lakanyelamɛ, 2 l’okitshakitsha+ tshɛ ndo la memakana, la solo dia lotutsha,+ nyokikane onto la wonyande lo ngandji,+ 3 nyadja welo wa l’otema ɔtɔi dia nkokɛ kaamɛ ka lo nyuma lo dimama dia wɔladi.+ 4 Demba diekɔ 1+ ndo nyuma kekɔ 1+ oko wakanyelamɛ lo elongamelo 1+ ka leeta lanyu; 5 Nkumadiɔndjɔ 1,+ mbetawɔ 1, batisimu 1, 6 Nzambi 1 lele She tshɛ, nde lele laadiko dia tshɛ oma lo tshɛ ndo lo tshɛ.

7 Wakasalɛ onto tshɛ la l’atei aso ɔlɔlɔ waheyama mbɛdika lo ndjela woho wakɛdika Kristo losha la woshasha.+ 8 Nɛ dia mbutamaka ɔnɛ: “Lam’akandadɛ la diko, nde akatshu la mfumbe; nde akakimɔ apami wele oko weshasha.”+ 9 Etelo k’ɔnɛ “lam’akandadɛ” alembetshiyatɔ naka aha ɔnɛ nde akaholɔ ndo lo ahole wa l’ɛse, mbuta ate la nkɛtɛ? 10 Paka onto lakaholɔ mbakadɛ+ etale la diko dia elongo+ tshɛ, dia nde nkonya akambo tshɛ lo ekotshamelo kawɔ.

11 Nde akasha amɔtshi dia ndjala oko apɔstɔlɔ,+ amɔtshi oko amvutshi,+ amɔtshi oko esambisha,*+ amɔtshi oko alami w’ɛkɔkɔ ndo embetsha,+ 12 dia nɔngɔsɔla* ekilami, dia kambɛ anto akina, dia mbika demba dia Kristo,+ 13 edja ndo sho tshɛ tambonga kaamɛ lo mbetawɔ ndo lo ewo k’oshika ka Ɔna Nzambi, tambonga epalanga* w’anto+ wambotshunda ndo tambokoma lo yɛdikɔ ya diema di’otondo dia Kristo. 14 Ɔnkɔnɛ, hatohombe monga nto ana w’akɛnda, oko anto wɛmbama la asuku w’ashi ndo wɛmbama lɛnɛ la lɛnɛ la lɔpɛpɛ tshɛ la wetshelo+ oma lo lokeso l’anto, oma lo totshelo ta mayɛlɛ ta lokeso. 15 Koko lo mbutaka mɛtɛ, la ngandji tshɛ, nyɛsɔ tohame l’akambo tshɛ lo yoho yɔtɔnɛ la ɔnɛ lele ɔtɛ, Kristo.+ 16 Oma le nde mbokakatanyi tenyi dia demba+ tshɛ kaamɛ lo yoho ya dimɛna ndo diɔ diekɔ lo nkamba kaamɛ l’ekimanyielo k’asɔnga tshɛ wakimɔ kɛnɛ kele ohomba. Etena kakamba etenyi ka demba tshɛ olimu atɔ dimɛna, dui sɔ kimanyiyaka dia demba mbola etena kayahikadiɔ lo ngandji.+

17 Ɔnkɔnɛ, kɛnɛ katami ndo kashikikɛmi lo Nkumadiɔndjɔ ele diaha nyu nkɛndakɛnda nto oko watɔkɛndakɛndaka+ ase wedja lo ndjela enginya* ka timba tawɔ.+ 18 Lo timba tawɔ, vɔ wekɔ lo wodjima ndo vɔ mangana la lɔsɛnɔ l’oma le Nzambi l’ɔtɛ wewɔ haweye, l’ɔtɛ wa lonyu l’etema awɔ. 19 Lo minya yimba tshɛ lo ɛlɛmbɛ wendana la lɔkɛwɔ, vɔ wamboyasha lo lɔkɛwɔ la fumbɔ nsɔnyi*+ lo nsala weho tshɛ w’akambo wa mindo la lokaki tshɛ.

20 Koko nyu kombeka dia Kristo ekɔ onto la ngasɔ, 21 naka mɛtɛ nyakawoke ndo nyaketshama lo tshimbo yande, oko wele mɛtɛ le Yeso. 22 Nyu nyaketshama dia nkolola lonto l’edjedja+ lɔtɔnɛ la lɔkɛwɔ laki la nyu ntondo ndo lalanyema lo ndjela nsaki yalɔ ya lokeso.+ 23 Nyu pombaka ntetemala monga eyoyo lo wolo walɔmbɔla timba tanyu,*+ 24 ndo nyu pombaka ndɔta lonto l’oyoyo+ lakatongama lo ndjela lolango la Nzambi lo losembwe ndo lo kɔlamelo ya mɛtɛ.

25 Ɔnkɔnɛ, etena kɛnɛ kamonyotshika lokeso, onto tshɛ la l’atei anyu atɛke wonyande mɛtɛ,+ nɛ dia tekɔ tenyi dia demba dia lo demba diakɔ 1.+ 26 Nyoke nkɛlɛ, koko tanyosalake pɛkato.+ Tanyotshikalake la nkɛlɛ polo wonya mbidja;+ 27 tanyoshake Diabolo diaaso.*+ 28 Ɔnɛ latovaka atovake nto; koko nde akambe efula, akambe olimu w’ɔlɔlɔ la anya ande+ dia nde monga la yangɔ ya nkahana l’onto lele lo dihombo.+ 29 Ɛtɛkɛta wa kɔlɔ watotombake oma l’enyɔ anyu,+ paka ɛtɛkɛta wele amɛna dia nkeketsha anto akina etena kele ohomba, dia ɛtɛkɛta akɔ monga la wahɔ le wanɛ wawaoka.+ 30 Ndo nto, tanyonyangiyake* nyuma k’ekila+ kaki Nzambi kakanyadjama tshapa+ la tɔ dikambo dia lushi la etshungwelo k’oma l’oshinga w’etshungwelo.+

31 Nyonya weho tshɛ wa lotunu la wolo,+ nkɛlɛ, odudu, ehangohango, ntɛngɔ+ ndo awui tshɛ wa kɔlɔ.+ 32 Koko, nyoyale la ɔlɔlɔ w’otema lam’asanyu, nyokanake kɛtshi k’efula,+ nyodimanyiyanake l’otema ɔtɔi oko wakanyodimanyiya+ Nzambi l’otema ɔtɔi lo tshimbo ya Kristo.

5 Ɔnkɔnɛ, nyokoyake Nzambi,+ oko wenyu anande wa ngandji, 2 ndo nyotetemale nkɛndakɛnda lo ngandji+ woho wakatolange*+ Kristo ndo wakandayakimɔ dikambo diaso* oko woshasha ndo olambo, malashi wele la opumu w’ɔlɔlɔ le Nzambi.+

3 Awui wa mindo wa dieyanelo* ndo weho tshɛ wa mindo kana lokaki watodimɔmake kaanga nimɔma l’atei anyu,+ oko wahombadiɔ monga le ekilami,+ 4 oyadi lɔkɛwɔ la nsɔnyi kana ɛtɛkɛta w’enginya kana tɔsɛkɛsɛkɛ t’awui wa nsɔnyi,+ nɛ dia akambo asɔ bu dimɛna, koko lo dihole dia akambo asɔ, eokelo ka losaka.+ 5 Dikambo nyu mbeyaka dui nɛ, lo dishihodia nyuamɛ dia ndooko onto lasala awui wa mindo wa dieyanelo*+ kana onto lele mindo kana kanga lokaki+ lele ɔtɛmɔdi wa dikishi layokondja sango lo Diolelo dia Kristo ndo dia Nzambi.+

6 Onto atonyokesake la ɛtɛkɛta w’anyanya, nɛ dia l’ɔtɛ w’akambo wa ngasɔ mbayaye nkɛlɛ kaki Nzambi le ana wele bu la okitanyiya. 7 Ɔnkɔnɛ, tanyongake la diɔtɔnganelo la wɔ; 8 nɛ dia nyu nyaki ntondo wodjima, koko kakianɛ nyaya osase+ lo kɛnɛ kendana la Nkumadiɔndjɔ.+ Nyotetemale nkɛndakɛnda oko ana w’osase, 9 nɛ dia olowa w’osase wekɔ la woho w’ɔlɔlɔ tshɛ ndo la losembwe ndo la mɛtɛ.+ 10 Nyotetemale nsɛdingola dia nshikikɛ kɛnɛ ketawɔma+ le Nkumadiɔndjɔ; 11 ndo nyotshike ndjasha kaamɛ la wɔ lo etsha w’anyanya wa wodjima;+ koko nyowaɛnya lo sɛkɛ woho wewɔ. 12 Nɛ dia akambo wasalawɔ lo woshɛshɛ wekɔ nsɔnyi dia kaanga mbata. 13 Akambo tshɛ watomba sɛkɛ* mɛnamaka hwe oma l’osase, nɛ dia ɛngɔ tshɛ kɛnama hwe kekɔ osase. 14 Ɔnkɔnɛ, mbutamaka ɔnɛ: “Wɛ ondadi djɔ, emɔ ndo olɔ oma lo nyɔi+ ko Kristo ayokɔhɛtɛ.”+

15 Ɔnkɔnɛ, nyendake dimɛna woho wakɛndakɛndanyu, aha oko akanga wa dinginya, koko oko akanga wa tomba. 16 Nyokambe la wenya anyu lo yoho yoleki dimɛna,*+ nɛ dia nshi nyɛ yekɔ kɔlɔ. 17 Diakɔ diele, nyotshike monga akanga wa dinginya, koko nyotetemale nshihodia kɛnɛ kele lolango la Jehowa.*+ 18 Ndo nto, tanyodjɔke wanu,+ nɛ dia dui sɔ konyaka lo lɔkɛwɔ la mindo,* koko nyotetemale ndodiama la nyuma. 19 Nyɔtɛkɛtshanake la esambo, la awui watombola Nzambi ndo la nkembo ya lo nyuma, nyembɛ+ Jehowa*+ kaamɛ la mishiki+ lo etema anyu. 20 Nyoshake Nzambi kaso ndo Shɛso losaka+ nshi tshɛ lo akambo tshɛ lo lokombo la Nkumɛso Yeso Kristo.+

21 Nyoyakitshakitsha l’ɛse ka onto la wonyande+ lo wɔma wa Kristo. 22 Wadi, nyoyakitshakitsha l’ɛse ka waomɛnyu+ oko le Nkumadiɔndjɔ, 23 nɛ dia omi ekɔ owandji wa wadɛnde+ oko wele Kristo owandji w’etshumanelo,+ nde lele oshimbedi wa demba diakɔ. 24 Lo mɛtɛ, oko wayakitshakitsha etshumanelo l’ɛse ka Kristo, wadi lawɔ pombaka ndjakitshakitsha l’ɛse ka waomɛwɔ lo akambo tshɛ. 25 Waomi, nyotetemale nanga wadiɛnyu+ oko wakalange Kristo etshumanelo ndo wakandayakimɔ dikambo diatɔ,+ 26 dia nde kikidia, kiɛdia lo kiɔtsha la ashi lo tshimbo ya ɔtɛkɛta,+ 27 dia nde mɛnya etshumanelo le nde ndamɛ lo lotombo latɔ, aha la vadi kana enyanga enyanga kana la akambo akina wa woho ɔsɔ,+ koko ekila ndo aha la ɛkɔmɔ.+

28 Woho ɔsɔ mbele waomi pombaka nanga wadɛwɔ oko alemba awɔ hita. Pami kalanga wadɛnde ndjalangaka ndamɛ, 29 nɛ dia ndooko pami kahetsha demba* diande hita, koko nde dileshaka ndo dilɔngɔsɔlaka, oko wasalɛ Kristo etshumanelo, 30 nɛ dia sho tekɔ tenyi dia demba dia lo demba diande.+ 31 “Diakɔ diele, pami ayotshika she la nyango ndo ayomamatana* la wadɛnde, ko vɔ 2 wayoyala demba 1.”+ 32 Sheke y’ekila+ shɔ yekɔ woke. Kakianɛ, dimi lɔtɛkɛta dikambo dia Kristo ndo dia etshumanelo.+ 33 Koko, pami tshɛ l’atei anyu pombaka nanga wadɛnde+ oko wayalangande, ndo wadi lo wedi ande pombaka monga la dilɛmiɛlɔ di’efula otsha le omɛnde.+

6 Ana, nyokitanyiya ambutshi anyu+ lo woho wetawɔma le Nkumadiɔndjɔ, nɛ dia dikambo sɔ diekɔ ɔlɔlɔ. 2 “Lɛmiya shɔ la nyɔ.”+ Ɔsɔ kele ɔlɛmbɛ wa ntondo wele la daka nɛ: 3 “Dia wɛ mpomɔ lokolo l’ɔlɔ* ndo dia wɛ nsɛna edja la nkɛtɛ.” 4 Ndo nyu ambutshi w’apami, tanyotshake ananyu nkɛlɛ,+ koko nyotetemale mbaodia lo ohokwelo+ ndo lo alako* wa Jehowa.*+

5 Mfumbe, nyokitanyiya anto wele nkumi*+ yanyu la wɔma ndo la lokomba l’oma k’ɛse otema oko le Kristo, 6 aha paka dia ngɛnyangɛnya anto+ etena kanyendawɔ,* koko oko mfumbe ya Kristo yasala lolango la Nzambi l’otema ɔtɔi.*+ 7 Nyokambe nkumi yanyu olimu la lolango oko anto wakambɛ Jehowa,*+ koko aha anto, 8 nɛ dia nyu mbeyaka nyate dui tshɛ di’ɔlɔlɔ diasala onto, nde ayolongola difuto oma le Jehowa*+ l’ɔtɛ wa dikambo diakɔ, oyadi nde ekɔ mfumbe kana onto lele la lotshungɔ. 9 Ndo nyu nkumi, nyotetemale mbasalɛ akambo yoho yakɔ yaamɛ, aha la mbawanɛ nɛ dia nyu mbeyaka dia ɔnɛ lele Nkumɛnyu nyu tshɛ ekɔ l’olongo+ ndo nde bu la shɔnɔdi.

10 Dia nkomiya, nyotetemala nkondja wolo+ oma le Nkumadiɔndjɔ ndo oma lo wolo wa nkudu kande. 11 Nyɔlɔtɛ ɛlɔtɔ tshɛ wa ta+ w’oma le Nzambi dia nyu monga l’akoka wa ntshikala nge la ntondo ka totshelo* ta mayɛlɛ taki Diabolo, 12 nɛ dia tekɔ lo ndɔ ta,*+ aha la emunyi la dikila, koko la mandji, la ewandji ndo la emboledi wa lo andja wa wodjima ɔnɛ, la ɛdiɛngɛ+ wa l’ahole wa l’olongo. 13 Diakɔ diele, nyɔshi dihomɔ tshɛ dia ta di’oma le Nzambi+ dia nyu monga l’akoka wa nshika ntanga lo lushi la kɔlɔ, ndo ntshikala nge l’ɔkɔngɔ wa nyu nsala kɛnɛ tshɛ kalɔmbamanyu dia nsala.

14 Ɔnkɔnɛ, nyotshikale nge, la oya wa akambo wa mɛtɛ lo nkende yanyu,+ nyɔlɔtɛ okombɔ wa losembwe wakokɛ ntolo,+ 15 nyɔlɔtɛ osalosalo l’ekolo anyu dia mbewoya lokumu l’ɔlɔlɔ la wɔladi.+ 16 Laadiko di’akambo asɔ tshɛ, nyokimɛke engawo ka woke ka mbetawɔ+ kayonyokimanyiya dia nyima mpito tshɛ yalombalomba* ya kanga kɔlɔ.+ 17 Ndo nto, nyɔshi lofulɛ la panda+ ndo lokuwa la ta la nyuma, mbuta ate ɔtɛkɛta wa Nzambi,+ 18 etena kele, la weho tshɛ w’alɔmbɛlɔ+ ndo w’ɛsɛngɔsɛngɔ, nyekɔ lo nɔmba lo diaaso tshɛ lo nyuma.+ Ndo lo dikambo sɔ, nyɔsɛnake ndo nyɔlɔmbake l’ɔsɛngɔsɛngɔ dikambo dia ekilami tshɛ. 19 Nyɔlɔmbake ndo dikambo diami, dia dimi nkondja ɛtɛkɛta lam’adiholami onyɔ, dia dimi monga la akoka wa ntɛkɛta la dihonga etena kewoyami sheke y’ekila ya lokumu l’ɔlɔlɔ,+ 20 lakambami dikambo dialɔ oko otomami,+ lokelekami mɔlɔla, ndo dia dimi ntɛkɛta dikambo dialɔ la dihonga oko wahombami ntɛkɛta.

21 Dia nyu mbeya awui wendana la mi ndo woho wemi, Tishiko,+ ɔnangɛso la ngandji ndo okambi wa kɔlamelo lo Nkumadiɔndjɔ ayonyewoya awui tshɛ.+ 22 L’oyango ɔsɔ mbamomootoma le nyu dia nyu mbeya woho weso ndo dia nde ndjosamba etema anyu.

23 Wɔladi ndo ngandji kele kaamɛ la mbetawɔ k’oma le Nzambi Shɛso ndo Nkumadiɔndjɔ Yeso Kristo wayale la anangɛso! 24 Ɔlɔlɔ waheyama mbɛdika wayale la wanɛ tshɛ woka Nkumɛso Yeso Kristo ngandji lo yoho yahahɔndɛ!