MUKANDA WAKAFUNDƐ PƆƆLƆ ASE FILIPƐ

1 Dimi Pɔɔlɔ la Timɔte tekɔ ekambi wa Kristo Yeso. Dimi lambofundɛ ekilami tshɛ wele kaamɛ la Kristo Yeso wele la Filipɛ+ kaamɛ ndo emendji la ekambi wakimanyiya+ nte:

2 Ɔlɔlɔ waheyama mbɛdika ndo wɔladi w’oma le Nzambi Shɛso ndo w’oma le Nkumadiɔndjɔ Yeso Kristo wayale la nyu!

3 Dimi mbishaka Nzambi kami losaka tena tshɛ dianyohɔmi 4 lo ɛsɛngɔsɛngɔ tshɛ wasalami dikambo dianyu, nyu tshɛ. Dimi tosalaka alɔmbɛlɔ tshɛ w’ɔsɛngɔsɛngɔ la ɔngɛnɔngɛnɔ,+ 5 l’ɔtɛ wa woshasha wakanyakimɔ dikambo dia* lokumu l’ɔlɔlɔ oma ko lushi la ntondo polo ndo kakianɛ. 6 Nɛ dia lekɔ l’eshikikelo lo dikambo nɛ nte ɔnɛ lakatatɛ olimu w’ɔlɔlɔ le nyu ayowoshidiya+ polo ndo lo lushi la Kristo Yeso.+ 7 Ekɔ dimɛna le mi dia monga la ekanelo ka ngasɔ lo dikambo dianyu nyu tshɛ, nɛ dia nyu nyekɔ l’otema ami, nyu wanɛ wakahana la mi ɔlɔlɔ waheyama mbɛdika, oyadi lo nkanu+ yami kana lo mamɛ ndo lo nshikikɛ lokumu l’ɔlɔlɔ laka lɛɛta.+

8 Nɛ dia Nzambi ekɔ ɔmɛnyi wa mposa k’efula kele la mi ka nyɛna nyu tshɛ la ngandji k’efula kele oko kaki la Kristo Yeso. 9 Ndo lekɔ lo ntetemala nɔmba dia ngandji kanyu katalekaka mfula tsho+ la ewo k’oshika+ ndo la shɛnɔdi tshɛ;+ 10 dia nyu nshikikɛ akambo woleki ohomba,+ dia nyu monga pudipudi ndo aha ntakanya anto akina+ polo ndo lo lushi la Kristo; 11 ndo dia nyu ndodiama la olowa wa losembwe, wele lo tshimbo ya Yeso Kristo+ dia lotombo ndo diando dia Nzambi.

12 Analengo, dimi nangaka nyu mbeya dia kɛnɛ kakankomɛ akakadimɔ lo wahɔ wa lokumu l’ɔlɔlɔ dia lɔ ntshɔ otsha la ntondo, 13 dia lokanu+ lemi l’ɔtɛ wa Kristo mbeyama+ le alami tshɛ wa nkumekanga k’ase Rɔmɔ ndo le anto akina tshɛ. 14 Kakianɛ, efula k’anangɛso wa lo Nkumadiɔndjɔ wambokeketshama l’ɔtɛ wa lokanu lami ndo vɔ tshɛ wekɔ lo mɛnya dihonga di’efula diele la wɔ dia mbewoya ɔtɛkɛta wa Nzambi aha la mboka wɔma.

15 Ekɔ mɛtɛ dia anto amɔtshi wekɔ lo nsambisha Kristo l’ɔtɛ wa kandjema ndo shɛmanedi, koko akina la eyango w’ɛlɔlɔ. 16 Vɔ wekɔ lo nsambisha Kristo l’ɔtɛ wa ngandji nɛ dia vɔ mbeyaka dia dimi lakasɔnama dia mamɛ lokumu l’ɔlɔlɔ,+ 17 koko wanɛ wasambisha Kristo l’ɔtɛ wa kandjema ndo shɛmanedi wekɔ lo nsala dui sɔ dia ndɔshana, koko aha la eyango w’ɛlɔlɔ nɛ dia vɔ nangaka dia nyomoleka kiyanyami lo nkanu yami. 18 Dia nkondja na? Paka tsho dia lo toho tshɛ, oyadi la lokeso kana lo mɛtɛ, Kristo ekɔ lo sambishama, ndo dimi lekɔ l’ɔngɛnɔngɛnɔ lo dikambo sɔ. Lo mɛtɛ, dimi lawɔ layotetemala ngɛnangɛna, 19 nɛ dia dimi mbeyaka nte dui sɔ diayokonya lo panda kami oma lo ɛsɛngɔsɛngɔ+ anyu ndo oma lo osukɔ wa nyuma ka Yeso Kristo.+ 20 Kɛsɔ mbɔtɔnɛka la kɛnɛ kakongɛɛmi la asolo walomɔlomɔ ndo la elongamelo kahamatoshama nsɔnyi kaanga yema, koko lo ntɛkɛta kakianɛ la dihonga tshɛ, Kristo ayotombɔma lo tshimbo ya demba diami, oyadi lo lɔsɛnɔ kana lo nyɔi+ lo yoho yokondotombɔmaka.

21 Nɛ dia lo dikambo diami, nsɛna kele Kristo+ ndo nyɔi kele wahɔ ami.+ 22 Naka dimi layotetemala nsɛna lo demba, kete ɔsɔ ekɔ olowa w’oma l’olimu ami, koko kɛnɛ kahombami nsɔna, dimi halakite. 23 Akambo 2 anɛ wekɔ lo mbidjami lo okandokando, nɛ dia lekɔ la nsaki ka ntshungɔ ndo monga kaamɛ la Kristo,+ ndo lo mɛtɛ, ɔsɔ kele dui dioleki tshɛ dimɛna.+ 24 Koko le mi, ndeka dimɛna ntshikala lo demba nɛ lo wahɔ anyu. 25 Oma lɔkɔ, oko wemi la eshikikelo lo dikambo sɔ, dimi mbeyaka dia layotshikala ndo layonga kaamɛ la nyu nyu tshɛ dia nyu mpama ndo monga l’ɔngɛnɔngɛnɔ lo mbetawɔ, 26 dia ɔngɛnɔngɛnɔ anyu mfula lo kɛnɛ kendana la Kristo Yeso l’ɔtɛ ami etena kayomonga nto kaamɛ la nyu.

27 Dikambo ɔtɔi ele, nyonge la dionga diɔtɔnɛ la lokumu l’ɔlɔlɔ lendana la Kristo,+ kele oyadi dimi ndja ndjonyɛna kana bu, kamboke watɛkɛta lo dikambo dianyu ɔnɛ nyekɔ lo ntetemala ntshikala nge ndo nyekɔ kaamɛ lo tokanyi, nyakamba dihɛka lo dihɛka oko anima ɔtɔi*+ dikambo dia mbetawɔ ka lokumu l’ɔlɔlɔ, 28 ndo tanyotshamake wɔma kaanga yema oma le atunyi anyu. Dui sɔ diekɔ djembetelo y’elanyelo+ le wɔ, koko ya panda le nyu;+ ndo dui sɔ ndja oma le Nzambi. 29 Nɛ dia nyu nyakalongola diɛsɛ lo wahɔ wa Kristo, aha tsho dia monga la mbetawɔ le nde, koko ndo dia nsowa lo wahɔ ande.+ 30 Dikambo nyu nyekɔ lo mpomana la ɔlɔshamelo wakanyamɛnyi lalɔshama+ ndo wokanyu dia lekɔ lo ntetemala ndɔshama.

2 Ko naka ekeketshelo kekɔ l’atei anyu lo Kristo, naka esambelo k’oma lo ngandji kekɔ, naka lɔngɛnyi la lo nyuma* lekɔ, naka ngandji k’efula ndo kɛtshi kekɔ, 2 nyofudia ɔngɛnɔngɛnɔ ami lo monga la kanyi yaamɛ ndo la ngandji ka woho waamɛ, nyele nyu tshɛ kaamɛ* ndo nyele la kanyi yaamɛ.+ 3 Tanyotshake ndooko dikambo la yimba y’ewanu+ kana la lokaki,+ koko nyosale akambo tshɛ la okitshakitsha,* nyɔshi dia anto akina nyoleka.+ 4 Tanyendake paka wahɔ anyu hita eto,+ koko nyendake ndo wahɔ w’anto akina.+

5 Nyongake la yimba nyɛ yaki ndo le Kristo Yeso,+ 6 ɔnɛ lele, kaanga mbakinde lo efanelo ka Nzambi,+ nde komonga la kanyi ya mbɛdima la Nzambi.+ 7 Koko, nde akatshike kɛnɛ tshɛ kaki la nde, ko akayaetɛ oko mfumbe+ ndo akayala onto.*+ 8 Laadiko dia laasɔ, lam’akandaye oko onto,* nde akayakitshakitsha ndo akonge la okitanyiya polo ndo lo nyɔi,+ ɛɛ, nyɔi ka l’otamba w’asui.*+ 9 Diakɔ diele Nzambi akawodiya lo dihole dia laadiko+ ndo la ngandji tshɛ nde akawosha lokombo lele laadiko dia nkombo nkina tshɛ,+ 10 kele lo lokombo la Yeso, adwe tshɛ kawokusame, wa wanɛ wele l’olongo ndo wanɛ wele la nkɛtɛ ndo wanɛ wele l’ɛse ka nkɛtɛ+ 11 ndo kele anto tshɛ* kawetawɔ lo sɛkɛ dia Yeso Kristo kele Nkumadiɔndjɔ+ dikambo dia lotombo la Nzambi She.

12 Ɔnkɔnɛ analengo wa ngandji, oko watonyongaka la okitanyiya nshi tshɛ, aha paka etena kemi laawɔ koko djekoleko etena kemi bu laawɔ, nyotetemale nkamba dikambo dia panda kanyu la wɔma ndo la lokomba. 13 Nɛ dia lo ndjela kɛnɛ kɔɔngɛnyangɛnya, Nzambi mbanyosha wolo ndo mbanyosha nsaki la wolo wa nsala akambo. 14 Nyosalake akambo tshɛ aha la engunungunu+ ndo aha la ewanu,+ 15 dia nyu monga pudipudi ndo aha l’onongo, ana wa Nzambi+ waha la vadi l’atei wa lɔlɔnga la wɛngɛngɛ ndo la kɔlɔ.+ Nyu nyekɔ lo mpɛta l’atei awɔ oko esase lo andja ɔnɛ,+ 16 nyokime ɔtɛkɛta wa lɔsɛnɔ wolo.+ Ko dimi layonga la ɔkɔkɔ wa ngɛnangɛna lo lushi la Kristo, leya dia dimi kondawɔ olawɔlawɔ kana kokamba olimu wa wolo okambakamba. 17 Koko, oyadi kaanga lekɔ lo tshulwama oko olambo wa lotɛ+ laadiko dia olambo+ ndo olimu w’ekila* wele mbetawɔ kanyu kakanyɔlɔmbɔla dia nsala, lekɔ la ɔlɔ ndo lekɔ lo ngɛnangɛna kaamɛ la nyu nyu tshɛ. 18 Woho akɔ waamɛ mbele, nyu lawɔ pombaka monga la ɔlɔ ndo ngɛnangɛna kaamɛ la mi.

19 Dimi lekɔ lo nongamɛ le Nkumadiɔndjɔ Yeso dia nyotomɛ Timɔte+ keema edja dia dimi ndjokeketshama lam’ayomolongola nsango yendana la nyu. 20 Nɛ dia dimi ndooko la onto okina lele la dionga diele oko nde layoyakiyanya l’otema ɔtɔi dikambo dianyu. 21 Dikambo anto akina tshɛ wekɔ lo nyanga wahɔ awɔ hita, koko aha wa Yeso Kristo. 22 Koko, nyu mbeyaka dia ndamɛ akɛnya dia nde kokaka ndo nde akakambe kaamɛ la mi oko ɔna+ nde la she dia ntɔla lokumu l’ɔlɔlɔ otsha la ntondo. 23 Ɔnkɔnɛ, nde kalongamɛmi dia ntoma kam’ayomɛna woho watete akambo ami. 24 Lo mɛtɛ, lekɔ la eshikikelo lo Nkumadiɔndjɔ dia dimɛ layoya keema edja.+

25 Koko l’etena kɛnɛ, lambɛna ɔlɔlɔ nyotomɛ Epafrodito lele ɔnalengo, osekami okambi ndo osekami ɔsɔlayi, otomami anyu ndo okambi ami wankimanyiya lo ehomba ami,+ 26 lam’ele nde ekɔ lo nomɔlomɔ dia nyɛna nyu tshɛ ndo lam’ele nde ambɔkɔmɔ l’ɔtɛ wakanyoke dia nde akayondama la hemɔ. 27 Lo mɛtɛ, nde akandama la hemɔ ndo aki suke la mvɔ, koko Nzambi akawoke kɛtshi, aha ndamɛ oto, koko ndo dimi, diaha dimi monga la lɔkɔnyɔ laadiko dia lɔkɔnyɔ. 28 Ɔnkɔnɛ, dimi lambootoma la shamanya y’efula kele kanyonge l’ɔngɛnɔngɛnɔ nto lam’ayonyowɛna diaha ndo dimi lawɔ monga la lɔkɔnyɔ l’efula. 29 Oma lɔkɔ, nyoolongole l’ɔngɛnɔngɛnɔ tshɛ lo Nkumadiɔndjɔ oko wokonyosalaka, ndo nyotetemale mbɔsa anto wele oko nde la nɛmɔ di’efula,+ 30 nɛ dia nde aki suke la mvɔ l’ɔtɛ w’olimu wa Kristo,* ndo nde akadje lɔsɛnɔ lande* lo waale dia kimanyiyami+ lo dihole dianyu nɛ dia nyu komonga laawɔ.

3 Analengo, dui diami dia ndjihelo nɛ nte: Nyotetemale ngɛnangɛna lo Nkumadiɔndjɔ.+ Le mi, bu dui dia kɔlɔ dia dimi nyofundɛ nto akambo akɔ waamɛ, ndo ekɔ dia nyokokɛ.

2 Nyewɔ waa mfɔ, nyewɔ wanɛ watotshaka akambo wa kɔlɔ, nyewɔ wanɛ wahembola tenyi dia demba.+ 3 Nɛ dia sho mbele la wonyelo wa mpota+ wa mɛtɛ, sho wanɛ wakamba olimu w’ekila l’ekimanyielo ka nyuma kaki Nzambi ndo wayafuna lo dikambo dia Kristo Yeso+ ndo wahayaɛkɛ lo demba, 4 kaanga mbemi la ɛkɔkɔ wa ndjaɛkɛ lo demba oleki anto akina tshɛ.

Naka onto ɔmɔtshi mbɔsaka dia nde ekɔ la ɛkɔkɔ wa ndjaɛkɛ lo demba, kete dimi mboleka: 5 Dimi lakanyɛma mpota lushi la 8,+ lekɔ ose wodja w’Isariyɛlɛ, lo dioho dia Bɛnjamina ndo ose Hɛbɛru lakotɔ oma le ase Hɛbɛru;+ lo kɛnɛ kendana la ɛlɛmbɛ, dimi laki Ofarisɛ;+ 6 lo kɛnɛ kendana la ohetoheto, dimi lakahɛnyahɛnyaka etshumanelo;+ lo kɛnɛ kendana la losembwe lohikami lo ɛlɛmbɛ, dimi kɔmbɔtɔ mɔnyɔ. 7 Koko akambo waki la wahɔ le mi, dimi lakawaɔshi oko oshishelo* l’ɔtɛ wa Kristo.+ 8 Kɛnɛ koleki ele, dimi mbɔsaka nto dia akambo tshɛ wekɔ oshishelo le mi l’ɔtɛ wa nɛmɔ di’efula diele la ewo ka Kristo Yeso Nkumɛmi. L’ɔtɛ ande kakametawɔ nshisha diangɔ tshɛ ndo dimi diɔsaka oko tota dia mindo dia dimi nkondja Kristo 9 ndo monga kaamɛ la nde, aha l’ɔtɛ wa losembwe lami lo woho wayelami Ɛlɛmbɛ, koko l’ɔtɛ wa losembwe loye oma lo mbetawɔ+ le Kristo,+ losembwe l’oma le Nzambi lohikami lo mbetawɔ.+ 10 Oyango ami ele wa mbeeya, mbeya wolo wa eolwelo+ kande ndo nsowa+ kaamɛ la nde lo mbetawɔ mvɔ nyɔi kele oko kande,+ 11 dia menda kana lo yoho mɔtshi layokoka mbolɔ lo eolwelo ka ntondo k’oma lo nyɔi.+

12 Aha ɔnɛ lamboshilaka kilongola kana lamboshilaka monga kokele, koko lekɔ lo ntetemala la lɔkɛndɔ+ dia menda kana dimi lawɔ koka nkondja kɛnɛ kele Kristo Yeso akansɔnɛ dikambo diatɔ.*+ 13 Analengo, dimi halɔshi dia lamboshila kikondja, koko kɛnɛ kasalami ele: Mbohɛ akambo wakamatshike l’ɔkɔngɔ+ ndo nsembɔ otsha lo akambo wele la ntondo,+ 14 dimi lekɔ lo tatetemala la lɔkɛndɔ lami la oyango wa nkondja difuto+ dia leeta+ la Nzambi l’otsha la diko lo tshimbo ya Kristo Yeso. 15 Ɔnkɔnɛ, sho wanɛ wambotshunda lo nyuma+ tonge la kanyi shɔ ndo naka nyekɔ la kanyi yotshikitanyi lo dikambo dimɔtshi, Nzambi ayonyosholɛ kanyi y’ɔlɔlɔ. 16 L’oseka dikambo tshɛ, oyadi lo yɛdikɔ yakɔna yambotohama, totetemale ntshɔ otsha la ntondo lo yoho ya dimɛna lo ndjela lokolo lakɔ laamɛ.

17 Analengo, nyu tshɛ nyombokoyake+ ndo nyoke washo le wanɛ wakɛndakɛnda lo yoho yɔtɔnɛ la ɛnyɛlɔ kakatanyotshikɛ. 18 Nɛ dia anto efula wekɔ lo nkɛndakɛnda oko atunyi w’otamba w’asui* wa Kristo, dimi tɔtɛkɛtaka dikambo diawɔ tena efula, koko kakianɛ dimi lambɔtɛkɛta dikambo diawɔ la asɔyi lo washo. 19 Ekomelo kawɔ ele elanyelo, dikundju kele nzambi kawɔ, vɔ ndjafunaka lo akambo wahombawɔ mbishama nsɔnyi ndo vɔ kanyiyaka paka akambo wa la nkɛtɛ.+ 20 Koko sho, l’olongo+ kele lakaso+ ndo oma lɛkɔ mbakongɛso l’asolo walomɔlomɔ tshɛ, oshimbedi, Nkumadiɔndjɔ Yeso Kristo,+ 21 ɔnɛ layokadimola alemba aso w’anyanya dia vɔ monga oko* demba+ diande dia lotombo oma lo wolo ande w’efula wa wosha akoka wa mbetɛ diangɔ tshɛ l’ɛse kande.+

4 Ɔnkɔnɛ, analengo wokami ngandji ndo wakombolami, ɔngɛnɔngɛnɔ ami ndo dɛmbɔ diami dia nkoso,+ nyoshikikale+ lo yoho shɔ lo Nkumadiɔndjɔ, nyu anangemi ami.

2 Dimi lambokeketsha Evodiya ndo lambokeketsha Sutukɛ dia vɔ monga la kanyi ɔtɔi lo Nkumadiɔndjɔ.+ 3 Eelo, lambonyɔlɔmba ndo nyu lawɔ oko wemi osekanyu okambi w’oshika,* dia nyu ntetemala nkimanyiya wamato asɔ wakakambe* la mi dihɛka lo dihɛka dikambo dia lokumu l’ɔlɔlɔ, kaamɛ ndo Kelema la asekami ekambi ekina tshɛ wele nkombo yawɔ yekɔ lo dibuku dia lɔsɛnɔ.+

4 Nyɔngɛnangɛnake nshi tshɛ lo Nkumadiɔndjɔ. Lambonyotɛ nto nte: Nyɔngɛnangɛnake!+ 5 Ekanelo kanyu k’ɔlɔlɔ+ keyame le anto tshɛ. Nkumadiɔndjɔ aya suke. 6 Lo oseka dikambo tshɛ,+ tanyoyakiyanyake, koko nyote Nzambi+ ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka, 7 ko wɔladi+ wa Nzambi woleki tokanyi tshɛ wayolama etema anyu+ la timba tanyu* lo tshimbo ya Kristo Yeso.

8 Dia nkomiya, analengo le, akambo tshɛ wele mɛtɛ, akambo tshɛ wele la kɛnɛmɔ, akambo tshɛ wosembwe, akambo tshɛ wele pudipudi, akambo tshɛ wakoka nangema, akambo tshɛ wele la lokumu l’ɔlɔlɔ, akambo tshɛ wele ɔlɔlɔ ndo akambo tshɛ wakoka mandɔma, nyotetemale nkana yimba* lo akambo asɔ.+ 9 Akambo wakanyeke ndo wakanyetawɔ ndo wakanyoke ndo wakanyɛnyi oma le mi, nyowasalake,+ ko Nzambi ka wɔladi ayoyala la nyu.

10 Dimi lekɔ l’ɔngɛnɔngɛnɔ efula lo Nkumadiɔndjɔ, nɛ dia kakianɛ nyoyakiyanya nto dikambo diami.+ Kaanga mbakanyayakiyanyaka dikambo diami, nyu komonga la diaaso dia mɛnya dui sɔ. 11 Aha ɔnɛ lekɔ lo dihombo mbatami ngasɔ, nɛ dia dimi lakeke dia ngɛnangɛna la kɛnɛ kele la mi oyadi l’etena kakɔna tshɛ.+ 12 Dimi mbeyaka woho wa nsɛna etena kemi bu la diangɔ efula+ ndo etena kemi la diangɔ efula. Lo oseka dikambo tshɛ ndo lo diaaso tshɛ, dimi lambeya sheke ya woho wa nsɛna la dota ndo la ndjala, woho wa monga la diangɔ efula ndo woho wa nsɛna lo dihombo. 13 Lo akambo tshɛ, dimi lekɔ la wolo oma le ɔnɛ lambisha lokalo.+

14 Koko, nyu nyakasale dimɛna lo woho wakanyasowe kaamɛ la mi lo asui ami. 15 Lo mɛtɛ, nyu ase Filipɛ lawɔ mbeyaka dia mbala ka ntondo kakanyoke lokumu l’ɔlɔlɔ lam’akamamɔ oma la Makɛdɔniya, ndooko etshumanelo kakakimanyiya lo kɛnɛ kendana la mbisha ndo la nongola, paka nyuamɛ ato;+ 16 nɛ dia lam’akimi la Tɛsalɔnika nyu nyakatomɛ yangɔ, aha mbala 1 keto, koko mbala 2 y’etondo dikambo dia ehomba ami. 17 Aha ɔnɛ weshasha mbayangami, koko olowa wafudia ɔngɔnyi* anyu. 18 Koko dimi lekɔ la kɛnɛ tshɛ kele la mi ohomba ndo kaanga ndekana. Ndooko ɛngɔ kahombami nto lam’ele lambolongola diangɔ diakanyatomɛ le Epafrodito+ diele oko malashi wele la opumu w’ɔlɔlɔ,+ olambo wetawɔma ndo wangɛnyangɛnya Nzambi. 19 Nzambi kami lo wedi ande ayonyokotshɛ ehomba+ tshɛ wele la nyu lo ndjela ɔngɔnyi ande lo lotombo lo tshimbo ya Kristo Yeso. 20 Ɔnkɔnɛ, lotombo layale le Nzambi kaso ndo Shɛso pondjo pondjo! Aamɛɛ.

21 Nyombishe ekilami tshɛ wele kaamɛ la Kristo Yeso mɔyɔ. Anangɛso wele kaamɛ la mi wanyotomɛ mɔyɔ. 22 Ekilami tshɛ, djekoleko ase luudu la Kayisa+ wanyotomɛ mɔyɔ.

23 Ɔlɔlɔ waheyama mbɛdika wa Nkumadiɔndjɔ Yeso Kristo wayale la yimba yakɛnɛmɔlanyu!