MUKANDA WAKAFUNDƐ PƆƆLƆ ASE KƆLƆSAYI

1 Dimi Pɔɔlɔ, ɔpɔstɔlɔ wa Kristo Yeso lo lolango la Nzambi lekɔ kaamɛ la ɔnangɛso Timɔte+ ndo 2 lambofundɛ ekilami ndo anangɛso wa kɔlamelo wele kaamɛ la Kristo wele la Kɔlɔsayi nte:

Ɔlɔlɔ waheyama mbɛdika ndo wɔladi w’oma le Nzambi Shɛso wayale la nyu!

3 Nshi tshɛ sho mbishaka Nzambi, She Nkumɛso Yeso Kristo losaka etena kalɔmbaso dikambo dianyu, 4 nɛ dia takoke dikambo dia mbetawɔ kele la nyu le Kristo Yeso ndo ngandji kokanyu ekilami tshɛ 5 l’ɔtɛ wa elongamelo kanyolamɛwɔ l’olongo.+ Nyu nyakoke dikambo dia elongamelo kɛsɔ ntondo lo tshimbo ya losango l’akambo wa mɛtɛ wa lokumu l’ɔlɔlɔ 6 lakaye le nyu. Oko watɔ lokumu l’ɔlɔlɔ elowa ndo wahamalɔ l’andja w’otondo,+ ngasɔ mbasalemadiɔ ndo l’atei anyu, oma ko lushi lakanyoke ndo lakanyeye dimɛna dimɛna ɔlɔlɔ waheyama mbɛdika waki Nzambi lo mɛtɛ. 7 Kɛsɔ mbakanyetshama oma le Epafrasɛ,+ osekaso okambi lokaso ngandji lakambɛ Kristo la kɔlamelo lo dihole diaso. 8 Laadiko dia laasɔ, nde akatewoya ngandji kanyu lo yoho ya lo nyuma.*

9 Diakɔ diele, ntatɛ lushi lakatoke dikambo sɔ, sho hatotshike nɔmba dikambo dianyu+ ndo nɔmba dia nyu ndodiama la ewo k’oshika+ ka lolango lande lo lomba tshɛ ndo lo eokelo ka lo nyuma,+ 10 dia nyu nkɛndakɛnda lo yoho yalanga Jehowa* dia mbɔngɛnyangɛnya lo akambo tshɛ etena katetemalanyu ntɔ elowa lo elimu w’ɛlɔlɔ tshɛ ndo kahamanyu lo ewo k’oshika ka Nzambi;+ 11 ndo nyokeketshame la wolo w’efula lo ndjela nkudu+ kande ka diambo dia nyu monga l’akoka wa mbikikɛ tshɛ lo tshɛ la solo dia lotutsha ndo l’ɔngɛnɔngɛnɔ, 12 etena kashanyu Shɛso losaka, Ɔnɛ lakanyosha akoka wa ndo nyu lawɔ nongola etenyi k’okitɔ kalongola ekilami+ lo osase.

13 Nde akatotsha oma lo lowandji la wodjima+ ndo akatɔtɔlɛ otsha lo diolelo dia Ɔnande la ngandji, 14 ɔnɛ lele lo tshimbo yande mbambototshungɔ oma lo lɔhɔmbɔ l’ekimanyielo ka oshinga w’etshungwelo, edimanyielo ka pɛkato yaso.+ 15 Nde ekɔ efanelo ka Nzambi kahɛnama,+ enondo wa diangɔ tshɛ diakatongama;+ 16 nɛ dia lo tshimbo yande mbakatongama diangɔ dikina tshɛ l’olongo ndo la nkɛtɛ, diangɔ diɛnama ndo diangɔ diahɛnama,+ oyadi kiti ya lowandji kana dɔmbwɛlɔ kana waolelo kana mandji. Diangɔ dikina tshɛ diakatongama lo tshimbo yande+ ndo lo dikambo diande. 17 Ndo nto, nde akikɔ la ntondo ka diangɔ dikina tshɛ+ ndo lo tshimbo yande mbakayala diangɔ dikina tshɛ, 18 ndo nde kele ɔtɛ wa demba, etshumanelo.+ Nde kele etatelo, enondo wa wanɛ wolɔ oma lo nyɔi+ dia nde monga ɔnɛ lele ntondo lo akambo tshɛ, 19 nɛ dia Nzambi akangɛnangɛna dia nkotsha akambo tshɛ le nde,+ 20 ndo dia lo tshimbo yande, dia mbokanya diangɔ dikina tshɛ la nde+ ndamɛ lo mbidja wɔladi oma lo dikila+ diakandatshola lo otamba w’asui,* oyadi diangɔ dia la nkɛtɛ kana diangɔ dia l’olongo.

21 Eelo, nyu wanɛ waki ntondo etale ndo atunyi nɛ dia timba tanyu taki lo etsha wa kɔlɔ, 22 kakianɛ nde amboyaokanya la nyu l’ekimanyielo ka demba dia l’emunyi di’onto akɔ lo tshimbo ya nyɔi kande, dia nyu mɛnama ekila, aha la ɛkɔmɔ ndo aha la onongo la ntondo kande.+— 23 Lo mɛtɛ, dui sɔ diakasalema dia nyu ntetemala lo mbetawɔ,+ nyoshikimale lo etshina katɔ+ ndo nyonge nge,+ aha la ndjɛkayɛka lo elongamelo kendana la lokumu l’ɔlɔlɔ lakanyoke ndo lakasambishama lo etongelo tshɛ kele l’ɛse olongo.+ Lo dikambo dia lokumu l’ɔlɔlɔ lɔsɔ kakamakome, dimi Pɔɔlɔ okambi.+

24 Kakianɛ, dimi lekɔ lo ngɛnangɛna kaanga mbasowami lo dikambo dianyu,+ ndo dimi pombaka ntetemala nsowa asui wa Kristo wahatonge lo demba diami lo wahɔ wa demba diande,+ mbuta ate etshumanelo.+ 25 Dimi lakayala okambi w’etshumanelo kɛnɛ lo yoho yɔtɔnɛ la ɔkɛndɛ w’olami+ wakambisha Nzambi lo wahɔ anyu dia nsambisha ɔtɛkɛta wa Nzambi dimɛna dimɛna, 26 sheke y’ekila+ yakashɛma oma ko akongɛ w’akambo wakete*+ ndo oma ko nɔnga yakete. Koko kakianɛ yɔ yamboshɔma le ekilami ande,+ 27 wanɛ wele, Nzambi akangɛnangɛna dia mbewoya ɔngɔnyi wa diambo wa sheke y’ekila+ shɔ le ase wedja, mbuta ate woho wele Kristo kaamɛ la nyu, elongamelo ka lotombo lande.+ 28 Nde mbasambishaso, mbalakaso onto tshɛ ndo mbetshaso onto tshɛ la lomba tshɛ dia sho nkimanyiya onto tshɛ dia nde mɛnama le Nzambi oko ombeki waki Kristo+ wambotshunda. 29 La oyango ɔsɔ mbakambami olimu wa wolo, layaketembola lo wolo ande wakamba la wolo tshɛ le mi.+

2 Dimi nangaka nyu nshihodia woke woke wa ta dialɔmi lo dikambo dianyu ndo lo dikambo di’ase Laodikiya+ la dia wanɛ tshɛ wahatamɛnyi.* 2 Dui sɔ diekɔ ngasɔ dia etema awɔ sambema+ ndo dia vɔ sanganyema dimɛna kaamɛ lo ngandji+ ndo dia vɔ monga la ɔngɔnyi tshɛ waya lo monga la eshikikelo k’efula lo yimba yawɔ, dia vɔ nkondja ewo k’oshika ka sheke y’ekila yaki Nzambi, mbuta ate Kristo.+ 3 Le nde mboshɛmi ɔngɔnyi tshɛ wa lomba ndo wa ewo.+ 4 Dimi lekɔ lo mbuta ngasɔ diaha onto ɔmɔtshi nyotshundja la tokanyi tetawoya. 5 Kaanga kemi bu kaamɛ la nyu lo demba, lekɔ kaamɛ la nyu lo nyuma, langɛnangɛna mɛna woho wasalema akambo dimɛna+ l’atei anyu ndo woho wele mbetawɔ kanyu le Kristo nge.+

6 Ɔnkɔnɛ, oko wakanyetawɔ Kristo Yeso Nkumadiɔndjɔ, nyotetemale nkɛndakɛnda kaamɛ la nde, 7 nyoke edio ndo nyohikame le nde+ ndo nyoshikimale lo mbetawɔ+ oko wakanyetshama ndo nyofukɔfukɔ la eokelo ka losaka.+

8 Nyoyalame diaha onto ɔmɔtshi nyonda oko mfumbe lo tshimbo y’akambo wa filozofi, ndo awui w’anyanya wa lokeso+ lo ndjela mbekelo y’anto, lo ndjela akambo w’ana w’akɛnda w’andja ɔnɛ, koko aha lo ndjela Kristo; 9 nɛ dia le nde mbodjashi lo yoho ya lo demba+ otondo tshɛ wa dionga diaki Nzambi. 10 Ɔnkɔnɛ, nyambokondja otondo tshɛ lo tshimbo yande, nde lele ɔtɛ wa lowandji tshɛ la diolelo tshɛ.+ 11 Oma lo diɔtɔnganelo diele lam’asanyu la nde mbakanyanyɛma mpota la wonyelo wa mpota waki kosalema l’anya lo mpembola etenyi ka demba+ dia l’emunyi, oma lo wonyelo wa mpota wele waki Kristo.+ 12 Nɛ dia nyu nyakakundɛma kaamɛ la nde lo batisimu kande,+ ndo lo diɔtɔnganelo diasanyu la nde mbakanyolwama+ kaamɛ l’ekimanyielo ka mbetawɔ kele la nyu lo olimu wa diambo waki Nzambi, ɔnɛ lakawolola oma lo nyɔi.+

13 Ndo nto, kaanga mbakanyavu lo pɛkato yanyu ndo lo woho wakinyu kominya mpota lo demba, Nzambi akanyolola dia monga kaamɛ la nde.+ La ɔlɔlɔ tshɛ nde akatodimanyiya pɛkato yaso tshɛ+ 14 ndo nde akadimola awui wakafundama la anya+ waki la wadjango+ ndo wakalɔshanaka la so.+ Nde akawanya lo mbakɔkɔla nsɛti lo otamba w’asui.*+ 15 Nde akanya mandji ndo waolelo oma l’ahole awɔ ndo akawaɛnya lo sɛkɛ oko anto wambodjama otshumba,+ ataalɔmbɔla l’ɔnɔngɔ w’ambidji w’otshumba lo tshimbo yawɔ.*

16 Ɔnkɔnɛ, onto atonyolomboshake lo dikambo dia kɛnɛ kalɛnyu ndo kanɔnyu,+ kana lo dikambo dia osalelo wa fɛtɛ, dia valelo ya ngɔndɔ,+ kana dia sabato.+ 17 Awui asɔ wekɔ didjidji di’akambo wokoya,+ koko etondo w’akambo wekɔ le Kristo.+ 18 Onto atonyɔkɔsɔlake difuto,+ onto langɛnangɛna okitshakitsha wa kashi ndo yoho mɔtshi y’ɔtɛmwɛlɔ w’andjelo, onto “layaɛkɛ lo”* diangɔ diamondɛna. Nde ekɔ mɛtɛ lo ndjadiya aha la ɔkɔkɔ w’oshika l’ɔtɛ wa tokanyi tande ta lo demba, 19 ndo nde hamamatana la ɔtɛ,+ ɔnɛ lalesha demba di’otondo ndo ladimamatanya kaamɛ dimɛna l’ekimanyielo ka asɔnga la eshisha adiɔ ndo lasala dia diɔ mpama la ohamelo w’oma le Nzambi.+

20 Naka nyambovɔ kaamɛ la Kristo lo kɛnɛ kendana l’akambo w’ana w’akɛnda wa l’andja ɔnɛ,+ lande na kasɛnanyu oko nyeke anto wa l’andja ɔnɛ lo ntetemala nkitanyiya wadjango+ wata ɔnɛ: 21 “Tɔsake, tɔlɛtake ndo tonandake,” 22 wendana la diangɔ diele diɔ tshɛ ndanaka etena kakambawɔ la diɔ, lo ndjela ɛlɛmbɛ ndo wetshelo w’anto?+ 23 Kaanga mbele diangɔ sɔ mɛnamaka dia diekɔ la lomba lo nshikikɛ yoho y’ɔtɛmwɛlɔ yele lo ndjela lolango l’onto ndamɛ ndo la okitshakitsha wa kashi, lo salɛ demba akambo lo yoho ya wolo wolo,+ diɔ bu ndooko la nɛmɔ lo woho walɔshanadiɔ la okotshelo wa nsaki ya demba.

3 Ko naka nyakolɔ kaamɛ la Kristo,+ kete nyotetemale nyanga diangɔ dia la diko, lɛnɛ odjashi Kristo lo lonya l’omi la Nzambi.+ 2 Nyokanyiyake nshi tshɛ akambo wa la diko,+ koko aha akambo wa la nkɛtɛ.+ 3 Nɛ dia nyu nyakavu ndo lɔsɛnɔ lanyu lakashɛma kaamɛ la Kristo lo yoho yɔtɔnɛ la lolango la Nzambi. 4 Etena kayɛnama Kristo ɔnɛ lele lɔsɛnɔ laso,+ ndo nyu lawɔ nyayɛnama kaamɛ la nde lo lotombo.+

5 Ɔnkɔnɛ, nyodiake tenyi dianyu dia demba+ dia la nkɛtɛ lo kɛnɛ kendana la awui wa mindo wa dieyanelo,* akambo wa mindo, nsɔngu ka dieyanelo kambotamba elelo,+ nsaki ka kɔlɔ ndo ɔkɔmiya wele ɔtɛmwɛlɔ wa dikishi. 6 L’ɔtɛ w’akambo asɔ mbayaye nkɛlɛ ka Nzambi. 7 Lɔkɛwɔ la ngasɔ mbaki la nyu ndo nyu lawɔ* lo yoho ya lɔsɛnɔ lanyu la ntondo.*+ 8 Koko kakianɛ, nyu pombaka minya akambo anɛ: Odudu, nkɛlɛ, akambo wa kɔlɔ,+ ntɛngɔ+ ndo ɛtɛkɛta wa nsɔnyi+ oma l’enyɔ anyu. 9 Tanyotanɛke kashi lam’asanyu.+ Nyokolole lonto* l’edjedja+ la ditshelo dialɔ, 10 ndo nyɔlɔtɛ lonto l’oyoyo+ lele oma l’ekimanyielo k’ewo k’oshika, lekɔ lo mbetɛma oyoyo lo ndjela efanelo ka Ɔnɛ lakalitonge,+ 11 lɛnɛ ele otshikitanu keema lam’asa ose Ngirika la ose Juda, minya mpota la aha minya mpota, ɔngɛndangɛnda la Skutiya,* mfumbe la onto lele la lotshungɔ, koko Kristo ekɔ akambo tshɛ lo tshɛ.+

12 Oma lɔkɔ, oko wenyu ɛsɔnami wa Nzambi,+ ekilami ndo anangemi, nyɔlɔtɛ kɛtshi k’efula,+ ɔlɔlɔ w’otema, okitshakitsha,*+ memakana+ ndo solo dia lotutsha.+ 13 Nyotetemale mbikikanɛ kɔlɔ ndo nyodimanyiyanake l’otema ɔtɔi lam’asanyu,+ oyadi kaanga onto ekɔ la dikambo dia nyangɛ osekande,+ oko wakanyodimanyiya Jehowa* l’otema ɔtɔi, nyu lawɔ pombaka nsala woho akɔ waamɛ.+ 14 Koko, laadiko dia akambo asɔ tshɛ, nyɔlɔtɛ ngandji,+ nɛ dia tɔ kele dimama dia kokele.+

15 Ndo nto, wɔladi wa Kristo walɔmbɔlɛ etema anyu,*+ nɛ dia nyu nyakelamɛ oya lo wɔladi ɔsɔ lo demba 1. Ɔnkɔnɛ, nyɛnya dia nyekɔ la lowando. 16 Ɔtɛkɛta wa Kristo wadjasɛ le nyu dimɛna la lomba tshɛ. Nyotetemale mbetshana ndo keketshana* onto la wonyande la esambo, awui watombola Nzambi ndo la nkembo+ ya lo nyuma yembama la lowando, nyembɛ Jehowa*+ lo etema anyu. 17 Ndo kɛnɛ tshɛ katanyu kana kasalanyu, nyokisale lo lokombo la Nkumadiɔndjɔ Yeso, nyasha Nzambi Shɛso losaka lo tshimbo yande.+

18 Nyu wadi, nyoyakitshakitsha l’ɛse ka waomɛnyu+ oko wahombadiɔ monga lo Nkumadiɔndjɔ. 19 Nyu waomi, nyotetemale nanga wadɛnyu+ ndo tanyowaomalɛke nkɛlɛ k’efula.*+ 20 Nyu ana, nyokitanyiya ambutshi anyu l’oseka dikambo tshɛ+ nɛ dia dui sɔ mbangɛnyangɛnya Nkumadiɔndjɔ. 21 Nyu ambutshi w’apami, tanyotshake ananyu nkɛlɛ*+ diaha vɔ ndjɔkɔmɔ.* 22 Nyu mfumbe, nyokitanyiya anto wele nkumi* yanyu l’oseka dikambo tshɛ,+ aha tsho etena kanyendawɔ, paka dia ngɛnyangɛnya anto,* koko l’otema ɔtɔi ndo la wɔma wa Jehowa.* 23 Kɛnɛ tshɛ kasalanyu, nyokisale l’otema ɔtɔi oko wanɛ wasalɛ Jehowa*+ koko aha anto, 24 nɛ dia nyu mbeyaka dia oma le Jehowa* mbayonyolongola etenyi k’okitɔ oko difuto.+ Nyokambee Kristo Nkumɛnyu olimu oko ɛhɔmbɔ. 25 Lo mɛtɛ, onto lasala kɔlɔ ayofutama lo kɔlɔ kakandasale,+ ndo shɔnɔdi keema.+

4 Nyu nkumi, nyosalɛke mfumbe yanyu akambo la losembwe ndo lo yoho ya dimɛna, nyeya dia nyu lawɔ nyekɔ la Nkumɛnyu l’olongo.+

2 Nyotetemale nɔmba,+ tanyolalake djɔ lo dikambo sɔ ndo nyokake losaka.+ 3 L’etena kakɔ kaamɛ, nyɔlɔmbake ndo lo dikambo diaso+ dia Nzambi todiholɛ lokuke dikambo dia ɔtɛkɛta dia sho monga la akoka wa mbewoya sheke y’ekila yendana la Kristo yemi lo lokanu+ dikambo diayɔ, 4 ndo dia dimi ndjiewoya hwe hwe woho wahombami ntɛkɛta.

5 Nyɔkɛndakɛndake la lomba le wanɛ wele l’andja, nyakamba la wenya anyu lo yoho yoleki dimɛna.*+ 6 Nyotondjake nshi tshɛ ɛtɛkɛta w’amɛna, wɔsɔhanyemi la lɛɛhɔ+ dia nyu mbeya woho wahombanyu nkadimola onto tshɛ.+

7 Tishiko+ ɔnalengo la ngandji ndo okambi wa kɔlamelo ndo osekami ɔhɔmbɔ lo Nkumadiɔndjɔ ayoyonyotɛ nsango tshɛ yendana la mi. 8 Dimi lambootoma le nyu dia nyu ndjeya woho weso ndo dia nde ndjokeketsha etema anyu. 9 Nde ekɔ lo ndjaye kaamɛ la Ɔnɛsimo,+ ɔnalengo la kɔlamelo ndo la ngandji lakaye oma le nyu; vɔ wayoyonyotɛ akambo tshɛ watomba lendo.

10 Aristarako,+ osekami la lo lokanu anyotomɛ mɔyɔ ndo Makɔ+ ɔnango Barnabasɛ anyotomɛ mɔyɔ, (lo dikambo diande mbakanyalongola alako dia nyu mbolongola dimɛna+ naka nde amboya le nyu,) 11 ndo Yeso lelamɛ Jusito lele l’atei wa wanɛ wakanya mpota anyotomɛ mɔyɔ. Paka vɔ ato mbakamba la mi dikambo dia Diolelo dia Nzambi ndo vɔ mbele kiɔkɔ ya esambelo k’efula* le mi. 12 Epafrasɛ,+ ɔhɔmbɔ wa Kristo Yeso wakaye oma le nyu anyotomɛ mɔyɔ. Nshi tshɛ nde ekɔ lo ndjasha tshɛ dikambo dianyu lo alɔmbɛlɔ ande dia l’ekomelo nyu monga tshɛ lo tshɛ ndo monga la eshikikelo ka wolo lo lolango tshɛ laki Nzambi. 13 Nɛ dia dimi lekɔ ɔmɛnyi lo dikambo diande dia nde ekɔ lo mbidja welo efula lo wahɔ anyu ndo lo wahɔ w’ase Laodikiya la ase Hiyerapɔli.

14 Luka,+ dɔkɔtɛlɛ diokaso ngandji anyotomɛ mɔyɔ. Dɛmasɛ+ lawɔ anyotomɛ mɔyɔ. 15 Nyombishe anangɛso wa la Laodikiya kaamɛ ndo Nɛfa la etshumanelo kasangana lo luudu lande mɔyɔ.+ 16 Lam’ayonyadia mukanda ɔnɛ, kanyosale dia vɔ mbadiema+ ndo lo etshumanelo ka la Laodikiya ndo nyu lawɔ kanyadia mukanda w’oma la Laodikiya. 17 Ndo nto, nyote Arakipo+ nyate: “Dja yimba lo olimu wakayetawɔ lo Nkumadiɔndjɔ dia mbokotsha.”

18 Dimi Pɔɔlɔ lambonyotomɛ mɔyɔ ɔnɛ wofundami la lonya lami dimɛ.+ Nyombohɔke woho wemi lo lokanu.+ Ɔlɔlɔ waheyama mbɛdika wa Nzambi wayale la nyu!