MUKANDA WA HENDE WAKAFUNDƐ PƆƆLƆ ASE TƐSALƆNIKA

1 Dimi Pɔɔlɔ lekɔ kaamɛ la Silvano* nde la Timɔte,+ ndo lambofundɛ etshumanelo ka la Tɛsalɔnika kele kaamɛ la Nzambi Shɛso ndo la Nkumadiɔndjɔ Yeso Kristo nte:

2 Ɔlɔlɔ waheyama mbɛdika ndo wɔladi w’oma le Nzambi Shɛso ndo w’oma le Nkumadiɔndjɔ Yeso Kristo wayale la nyu!

3 Nshi tshɛ sho tshutshuyamaka dia mbisha Nzambi losaka l’ɔtɛ anyu, anangɛso. Dui sɔ sunganaka nɛ dia mbetawɔ kanyu kekɔ lo tahame efula ndo ngandji kele la oseka onto tshɛ la l’atei anyu otsha le wonyande+ kekɔ lo tafule. 4 Diakɔ diafunaso dikambo dianyu+ lo tshumanelo diaki Nzambi l’ɔtɛ wa ekikelo kanyu ndo mbetawɔ kele la nyu lo woho wadiɛnɛnyu* la ɛhɛnyɔhɛnyɔ ndo la asui.*+ 5 Ɔsɔ ekɔ djembetelo yɛnya dia Nzambi nomboshaka la losembwe, ndo l’ɔtɛ wa dikambo sɔ mbamonyɔsama oko anto wakoka nongola Diolelo dia Nzambi, diakɔ mɛtɛ mbasowanyu+ dikambo diadiɔ.

6 Nɛ dia lo mɛtɛ, ekɔ dimɛna dia Nzambi nsoya wanɛ wanyosoya.+ 7 Koko le nyu wanɛ wasoyama, wayonyosha momuya kaamɛ la so etena kayoshɔma Nkumadiɔndjɔ Yeso+ oma l’olongo la andjelo ande wa wolo+ 8 lo loombe la dja, etena kayondɔsɔmbɔya wanɛ waheye Nzambi ndo wanɛ wahakitanyiya lokumu l’ɔlɔlɔ lendana la Nkumɛso Yeso.+ 9 Anto asɔ wayolongola dilanya dia elanyelo ka pondjo+ oma la ntondo ka Nkumadiɔndjɔ ndo oma lo lotombo la wolo ande, 10 etena kayondoya dia ndjotombɔma lo kɛnɛ kendana la ekilami ande ndo dia mendama lushi lɔsɔ la diambo l’atei wa wanɛ tshɛ waki la mbetawɔ, nɛ dia esambishelo kaso kakalongɔma la mbetawɔ l’atei anyu.

11 L’ɔtɛ wa dikambo sɔ mbatotɔlɔmbaka nshi tshɛ lo dikambo dianyu dia Nzambi kaso nyɔsa oko anto wakoka nongola leeta lande+ ndo la wolo ande nde nsala tshɛ lo tshɛ akambo w’ɛlɔlɔ walangande nsala ndo etsha tshɛ wa mbetawɔ. 12 Dui sɔ diekɔ ngasɔ dia lokombo la Nkumɛso Yeso tombɔma le nyu ndo nyu kaamɛ la nde lo ndjela ɔlɔlɔ waheyama mbɛdika wa Nzambi kaso ndo wa Nkumadiɔndjɔ Yeso Kristo.

2 Koko anangɛso le, lo kɛnɛ kendana la woongelo wa Nkumɛso Yeso Kristo+ ndo woho wasanganyemaso dia monga kaamɛ la nde,+ tambonyɔlɔmba 2 diaha nyu ndjɛkayɛka esadi eto lo ekanelo kanyu ka yimba kana ntshimba wɔɔngɔ, oyadi oma lo ɛtɛkɛta wakasambiyama*+ kana oma lo losango lɔmɔtshi la l’onyɔ kana oma lo mukanda wele oko w’oma le so wata ɔnɛ lushi la Jehowa*+ lamboya.

3 Tanyetawɔke dia onto nyonganyiya* lo yoho yakɔna tshɛ, nɛ dia lushi lakɔ halotoya paka wetshelo w’ɛtɔlɔki+ wambotaye ntondo ndo onto lɔnyɔla ɛlɛmbɛ,+ ɔna l’elanyelo+ amboshɔma. 4 Nde amboyaetɛ ɔndɔshi ndo ekɔ lo ndjadiya la diko dia ɔnɛ tshɛ lelamɛ nzambi kana ɛtɛmɔlatɛmɔla dia nde mbidjasɛ lo tɛmpɛlɔ kaki Nzambi, ɛnya lo sɛkɛ dia ndamɛ ekɔ nzambi. 5 Onde nyu hanyohɔ dia lam’akimi la nyu, dimi lakanyotɛka akambo asɔ?

6 Ndo kakianɛ nyu mbeyaka kɛnɛ kadjanɛ wekamu, diakɔ diele nde ayotomba sɛkɛ l’etena kande ndamɛ. 7 Eelo, dikambo dia ehekesa dia wɔnywɛlɔ w’ɛlɛmbɛ sɔ diamboshilaka ntatɛ,+ koko paka polo ndo etena kayonyɛma ɔnɛ ladja wekamu l’etena kɛnɛ. 8 L’etena kɛsɔ, onto lɔnyɔla ɛlɛmbɛ ayoshɔma, ndo Nkumadiɔndjɔ Yeso ayowodiaka la nyuma ka onyɔ ande+ ndo ayowolanya la wɛnamelo+ wa woongelo ande. 9 Koko, woongelo wa ɔmɔnyɔdi w’ɛlɛmbɛ wekɔ lo ndjela kɛnɛ kasala Satana+ la akambo tshɛ wa diambo ndo la tolembetelo ndo la ahindo+ wa kashi 10 ndo la lokeso+ tshɛ la kɔlɔ le wanɛ washishɔ, oko difuto diawɔ l’ɔtɛ wakiwɔ kombetawɔ ngandji k’akambo wa mɛtɛ dia vɔ shimbamɛ. 11 Diakɔ diele Nzambi akatshike dia shɛngiya yanganyiya mbatakoya mboka, dia vɔ mbetawɔ kɛnɛ kele kashi,+ 12 dia vɔ tshɛ nomboshama l’ɔtɛ wakiwɔ kombetawɔ akambo wa mɛtɛ, koko wakangɛnangɛnaka lo akambo wa kɔlɔ.

13 Koko, sho tshutshuyamaka nshi tshɛ dia mbisha Nzambi losaka lo dikambo dianyu, nyu anangɛso walangema oma le Jehowa,* nɛ dia oma ko etatelo, Nzambi akanyɔsɔnɛ+ dia nyu nkondja panda lo nyokidia+ la nyuma kande ndo oma lo mbetawɔ kanyu lo akambo wa mɛtɛ. 14 Nde akanyelɛ dia dikambo sɔ l’ekimanyielo ka lokumu l’ɔlɔlɔ lewoyaso, dia nyu nkondja lotombo la Nkumɛso Yeso Kristo.+ 15 Ɔnkɔnɛ analengo, nyotshikale nge+ ndo nyotetemale nkukutɛ akambo wakanyetshama,+ oyadi oma lo losango la l’onyɔ kana oma lo mukanda w’oma le so. 16 Ndo nto, Nkumɛso Yeso Kristo ndamɛ ndo Nzambi Shɛso lakatolange+ ndo lakatosha esambelo ka pondjo ndo elongamelo+ ka dimɛna lo tshimbo ya ɔlɔlɔ waheyama mbɛdika 17 asambe etema anyu ndo anyokeketsha dia nyu salaka ndo mbutaka nshi tshɛ kɛnɛ kele ɔlɔlɔ.

3 Dia nkomiya, analengo le, nyotetemale nɔmba dikambo diaso+ dia ɔtɛkɛta wa Jehowa* diangana esadi esadi+ ndo tombɔma oko watombɔmawɔ mɛtɛ le nyu, 2 ndo dia sho ntshungɔ oma l’anya w’anto wa ngala ndo wa kɔlɔ,+ nɛ dia aha anto tshɛ+ mbonga la mbetawɔ. 3 Koko, Nkumadiɔndjɔ ekɔ la kɔlamelo ndo nde ayonyokeketsha ndo ayonyokokɛ oma le kanga kɔlɔ. 4 Ndo nto, tekɔ la eshikikelo le Nkumadiɔndjɔ lo dikambo dianyu shate nyekɔ lo nkamba ndo nyayotetemala nkamba l’alako aso. 5 Nkumadiɔndjɔ atetemale nɔmbɔla etema anyu dimɛna lo ngandji ka Nzambi+ ndo lo ekikelo+ lo dikambo dia Kristo.

6 Analengo le, tekɔ lo nyosha alako lo lokombo la Nkumɛso Yeso Kristo dia nyu nkakitɔna la ɔnangɛso tshɛ lele la lɔsɛnɔ l’ofukutanu+ ndo lahayele mbekelo* yakanyalongola* oma le so.+ 7 Nɛ dia nyuamɛ mbeyaka woho wahombanyu tokoya,+ nɛ dia sho komonga la lɔsɛnɔ l’ofukutanu l’atei anyu 8 ndo sho kɔɔndɛ ɛngɔ k’onto ɔlɛlɛ.*+ Koko, takakambaka olimu wa wolo ndo takadiɛnɛka otsho la yanyi diaha monga wotsho wamboleka le nyu.+ 9 Aha ɔnɛ sho keema la lotshungɔ,+ koko takalange ndjakimɔ oko ɛnyɛlɔ ka nyu ndjela.+ 10 Lo mɛtɛ, lam’akiso kaamɛ la nyu, takanyotɛka ɔnɛ: “Naka onto halange nkamba, kete atɔlɛke.”+ 11 Nɛ dia takoke dia anto amɔtshi wa l’atei anyu wekɔ la lɔsɛnɔ l’ofukutanu,+ vɔ hawokambe olimu, koko wekɔ lo ndjatambiya lo akambo wahawaende.+ 12 Lo dikambo di’anto asɔ mbakatanyodjangɛ ndo mbakatanyolake lo lokombo la Nkumadiɔndjɔ Yeso Kristo dia vɔ pombaka nkamba olimu la ki ndo ndɛ diangɔ di’oma l’olimu awɔ.+

13 Koko analengo, nyu lo wedi anyu, tanyohekɔke nsala kɛnɛ kele ɔlɔlɔ. 14 Ko naka onto ɔmɔtshi hakitanyiya ɛtɛkɛta aso wele lo mukanda ɔnɛ, nyolembete onto ɔsɔ ndo nyotshike mbɔtɔnganɛ la nde+ dia nde mbotshama nsɔnyi. 15 Tanyowɔsake oko otunyi, koko nyotetemale mbolaka+ oko ɔnangɛnyu.

16 Nkumadiɔndjɔ kanga wɔladi ndamɛ atetemale nyosha wɔladi lo toho tshɛ.+ Nkumadiɔndjɔ ayale la nyu, nyu tshɛ!

17 Dimi Pɔɔlɔ lambonyotomɛ mɔyɔ ɔnɛ wofundami la lonya lami dimɛ+ wele djembetelo ya yoho yami ya mfunda lo mikanda ami tshɛ.

18 Ɔlɔlɔ waheyama mbɛdika wa Nkumɛso Yeso Kristo wayale la nyu, nyu tshɛ!