MUKANDA WA NTONDO WAKAFUNDƐ PƆƆLƆ TIMƆTE

1 Dimi Pɔɔlɔ lele ɔpɔstɔlɔ wa Kristo Yeso oma lo didjango dia Nzambi Oshimbedi aso ndo dia Kristo Yeso, elongamelo kaso,+ 2 lambofundɛ Timɔte,*+ lele ɔnami l’oshika+ la lo mbetawɔ nte:

Ɔlɔlɔ waheyama mbɛdika ndo kɛtshi ndo wɔladi w’oma le Nzambi Shɛso ndo w’oma le Kristo Yeso Nkumɛso wayale la yɛ!

3 Oko wakamakokeketsha dia ntshikala l’Ɛfɛsɔ lam’akimi suke la ntshɔ otsha la Makɛdɔniya, mbamomokokeketsha nto dia wɛ mbidjangɛ anto amɔtshi diaha vɔ mbetsha wetshelo okina, 4 ndo diaha vɔ mbidja yimba l’ɛkɔndɔ+ ndo l’ɛlɔndji wa kashi. Akambo asɔ ndooko la wahɔ,+ koko vɔ konyaka anto dia mbuta awui wahawakoke nshikikɛ lo dihole dia mbuta dui dimɔtshi di’oma le Nzambi diendana la mbetawɔ. 5 Lo mɛtɛ, oyango wa dako* nɛ ele ngandji+ k’oma k’ɛse otema ndo nkum’otema ka pudipudi ndo mbetawɔ+ kaha ka dungi pende. 6 Anto amɔtshi wakanya yimba lo akambo asɔ wamboyasha lo asawo w’anyanya.+ 7 Vɔ nangaka monga embetsha+ w’ɛlɛmbɛ, koko hawoshihodia oyadi akambo watawɔ kana akambo watshininalawɔ lɔkɔ la wolo tshɛ.

8 Sho mbeyaka dia Ɛlɛmbɛ wekɔ ɔlɔlɔ naka onto nkamba la wɔ lo yoho ya dimɛna,* 9 teya dia ɛlɛmbɛ mbidjamaka, aha dikambo di’onto ɔlɔlɔ, koko dikambo dia amɔnyɔdi w’ɛlɛmbɛ+ ndo atɔmbɔki, wanɛ wasala akambo wahetawɔ Nzambi, atshi wa pɛkato, wanɛ wele bu la kɔlamelo,* wanɛ wahɔshi kɛnɛ kele ekila la nɛmɔ, wanɛ wadiaka washɛwɔ, wanɛ wadiaka anyangɛwɔ kana anto akina, 10 anto wasala awui wa mindo wa dieyanelo,* apami wasala dieyanelo la asekawɔ apami,* wanɛ wanda anto dia ntshɔ la wɔ la wolo l’oyango w’akanga awɔ ndjatshungola la falanga, akanga wa kashi, wanɛ watotshibaka lo kashi ndo dikambo dikina tshɛ dialɔshana la wetshelo w’oshika*+ 11 lo ndjela lokumu l’ɔlɔlɔ la lotombo la Nzambi k’ɔngɛnɔngɛnɔ lakamalongola ɔkɛndɛ.+

12 Lekɔ la lowando le Kristo Yeso Nkumɛso lakambisha wolo, nɛ dia nde akambɔshi oko onto lele la kɔlamelo lo mbishami olimu,+ 13 kaanga mbakimi ntondo ɔtɛnganyi, osoyanyi ndo ɔsɛndji.+ Koko dimi lakookama kɛtshi nɛ dia lakasalaka akambo aha la mbeya ndo aha la monga la mbetawɔ. 14 Koko, ɔlɔlɔ waheyama mbɛdika wa Nkumadiɔndjɔ wakatamanya fulanɛ le mi kaamɛ ndo mbetawɔ la ngandji kele le Kristo Yeso. 15 Ɛtɛkɛta ɛnɛ sunganaka mbɛkɛ otema ndo mbetawɔma tshɛ lo tshɛ: Kristo Yeso akaye l’andja dia ndjoshimbɛ atshi wa pɛkato.+ L’atei awɔ, dimi kele pidii.+ 16 Koko lakokama kɛtshi, dia lo tshimbo yami, oko wemi otshi wa pɛkato woleki, Kristo Yeso ɛnya tshɛ lo tshɛ solo diande dia lotutsha, lo mbetɛmi ɛnyɛlɔ le wanɛ wayonga la mbetawɔ le nde dia nkondja lɔsɛnɔ la pondjo.+

17 Kɛnɛmɔ ndo lotombo layale le Nkumekanga ka pondjo,+ kahavu,+ kahɛnama,+ ɔtɔi akɔ wa Nzambi,+ pondjo pondjo! Aamɛɛ.

18 Ɔnami Timɔte le, dimi lambokosha alako* anɛ lo yoho yɔtɔnɛ la prɔfɛsiya yakatama lo dikambo diayɛ dia yɔ kokimanyiya dia wɛ ndɔ ta di’ɔlɔlɔ,+ 19 lo nkukutɛ mbetawɔ ndo monga la nkum’otema ka pudipudi+ kele anto amɔtshi wakakishisha ndo dikambo sɔ diakaakonya dia vɔ nshisha mbetawɔ oko masuwa wambohandjɔ. 20 Himeneya+ la Alɛksandɛrɛ wekɔ l’atei awɔ, ndo dimi lakaakimɔ le Satana+ dia vɔ nkondja wetshelo oma lo ohokwelo diaha vɔ ntɛnga Nzambi.

2 Ɔnkɔnɛ, ntondotondo dimi lambokeketsha anto tshɛ dia ɛsɛngɔsɛngɔ, alɔmbɛlɔ, alɔmbɛlɔ wa lo wahɔ w’anto akina ndo eokelo ka losaka wasalemake lo dikambo dia weho w’anto tshɛ, 2 lo dikambo dia nkumi ya dikanga ndo wanɛ tshɛ wele lo ahole wa la diko,*+ dia sho monga la lɔsɛnɔ la dimɛna ndo la ki, tamamema Nzambi tshɛ lo tshɛ la kɛnɛmɔ tshɛ.+ 3 Dui sɔ diekɔ ɔlɔlɔ ndo mbetawɔmaka lo washo wa Nzambi Oshimbedi aso,+ 4 ɔnɛ lalanga dia weho w’anto tshɛ shimbamɛ+ ndo nkondja ewo k’oshika k’akambo wa mɛtɛ. 5 Nɛ dia Nzambi ekɔ ɔtɔi+ ndo ompakemi ɔtɔi+ mbekɔ lam’asa Nzambi l’anto,+ onto, Kristo Yeso+ 6 ɔnɛ lakayakimɔ oko oshinga w’etshungwelo wɛdimi dikambo di’anto tshɛ.*+ Dui sɔ kahomba sambishama lo etena kahombama. 7 Nɛ dia l’oyango w’esambishelo+ kɛsɔ mbakamasɔnama dia monga osambisha ndo ɔpɔstɔlɔ,+ mɛtɛ kanyotɛmi aha kashi, ombetsha w’ase wedja+ lo akambo wendana la mbetawɔ ndo mɛtɛ.

8 Ɔnkɔnɛ, dimi kombolaka dia apami nɔmba l’oseka dihole tshɛ, wedia anya+ wa kɔlamelo l’olongo, aha la nkɛlɛ+ kana la taamu.+ 9 Woho akɔ waamɛ mbele, wamato pombaka ndjalɛnga la ɔlɔtɔ wa kɔmba,* wele la wɛdimo ndo la yimba y’ɔlɔlɔ,* aha la tosambo ta mbɛla divo, la paonyi kana la adidi kana la ahɔndɔ w’oshinga wolo efula,+ 10 koko lo yoho yasungana le wamato wata dia wekɔ lo mamema Nzambi,+ mbuta ate oma lo etsha w’ɛlɔlɔ.

11 Womoto ɔlame ki etena kekande la ndjakitshakitsha tshɛ.+ 12 Haletawɔ dia womoto mbetsha kana monga la lowandji laadiko dia pami, koko nde pombaka ntshikala ki.*+ 13 Nɛ dia Adama akatongama ntondo, ko Eva l’ɔkɔngɔ.+ 14 Ndo nto, Adama kokesama, koko womoto akakesama+ tshɛ lo tshɛ ndo akayala ɔmɔnyɔdi w’ɛlɛmbɛ. 15 Koko, womoto ayoshimbamɛ l’ɔtɛ wotande ana+ naka nde* ayotetemala ntshikala lo mbetawɔ, lo ngandji, lo akambo w’ekila kaamɛ ndo la yimba y’ɔlɔlɔ.*+

3 Ɛtɛkɛta ɛnɛ wekɔ mɛtɛ: Naka onto ekɔ lo nkombola dia monga omendji,+ nde ekɔ lo nkombola olimu w’ɔlɔlɔ. 2 Ɔnkɔnɛ, omendji pombaka monga aha l’onongo, onto lele la wadi ɔtɔi, lasala akambo la wɛdimo, lele la yimba y’ɔlɔlɔ,*+ ladja akambo l’ɔnɔngɔ, lalongola angɛndangɛnda,+ lele la akoka wa mbetsha,+ 3 aha ombidjɔki wa wanu,+ aha kanga ngala,* koko nde ayale l’ekanelo k’ɔlɔlɔ,+ aha kanga ewanu,+ aha onangi wa falanga,+ 4 nde ayale pami kalɔmbɔla ase luudu lande lo yoho ya dimɛna, lasala dia anande monga l’okitanyiya la kɛnɛmɔ tshɛ+ 5 (nɛ dia naka onto heye nɔmbɔla ase luudu lande, ngande wayondokoka nama etshumanelo kaki Nzambi?), 6 aha onto leke kakoma ombetawudi,+ diaha nde ndjonga la lotamanya ko nde ndjolomboshama woho wayolomboshama Diabolo. 7 Ndo nto, nde pombaka monga la lokumu l’ɔlɔlɔ+ ndo le anto wa l’andja,* diaha nde ndjɔnyɔma* ndo ndjotala lo djonga ya Diabolo.

8 Woho akɔ waamɛ mbele ndo ekambi wakimanyiya pombaka monga anto w’eshika, waha la nemi hiende,* wahayasha efula lo wanu, wahakombola la lokaki tshɛ dia nkondja diangɔ lo nkamba la lokeso,+ 9 walama sheke y’ekila ya mbetawɔ la nkum’otema ka pudipudi.+

10 Ndo nto, vɔ watadjami ntondo l’ohemba dia menda akoka awɔ,* oma laasɔ ko vɔ ndjokamba oko ekambi, naka vɔ keema l’onongo.+

11 Popo ndo wamato pombaka monga anto w’eshika, watoyalake amamanyishi,+ wonge anto wasala akambo la wɛdimo ndo wele la kɔlamelo lo akambo tshɛ.+

12 Ekambi wakimanyiya wonge anto wele la wadi ɔtɔi, walɔmbɔla anawɔ ndo anto wa lo mvudu yawɔ lo yoho ya dimɛna. 13 Nɛ dia apami wakamba lo yoho ya dimɛna ndjakondjɛka dihole dia kɛnɛmɔ ndo mongaka la dikoka dia mbuta awui hwe hwe lo mbetawɔ kele le Kristo Yeso.

14 Dimi lambokofundɛ akambo anɛ kaanga mbalongamɛmi dia ndja le yɛ keema edja, 15 ko naka lamboviya, lambokofundɛwɔ dia wɛ mbeya woho wahombayɛ nkɛndakɛnda lo luudu la Nzambi+ lele etshumanelo ka Nzambi kasɛna, ekundji ndo osukɔ w’akambo wa mɛtɛ. 16 Eelo, sheke y’ekila y’omamemelo le Nzambi yekɔ mɛtɛ woke: ‘Nde akɛnama lo demba,+ akɔsama oko onto ɔlɔlɔ lo nyuma,+ akɛnama le andjelo,+ akasambishama l’atei wa wedja,+ andja wakawetawɔ+ ndo akɔsama lo lotombo.’

4 Ɔtɛkɛta wakasambiyama* mbutaka hwe dia lo nshi yokoya, anto amɔtshi wayɔsɛka mbetawɔ kawɔ, ko wayodja yimba lo ɛtɛkɛta wakasambiyama wanganyiya*+ ndo lo wetshelo w’ɛdiɛngɛ, 2 lo tshimbo ya lokeso l’anto wata kashi,+ wele nkum’etema yawɔ yaya lonyu watekana oko yakatshumbama la lowolo la dja. 3 Vɔ shimbaka anto dia ntshukana+ ndo mbidjangɛka anto dia nsɛka mbo ya ndɛ+ yakatonge Nzambi dia wanɛ wele la mbetawɔ+ ndo la ewo k’oshika k’akambo wa mɛtɛ ndjilɛka+ la eokelo ka losaka. 4 Nɛ dia ɛngɔ tshɛ kakatonge Nzambi kekɔ dimɛna+ ndo ndooko ɛngɔ kahomba sɛkama+ naka sho kilɛ la eokelo ka losaka, 5 dikambo tɔ kakakidiama l’ekimanyielo k’ɔtɛkɛta wa Nzambi ndo ka dɔmbɛlɔ.

6 Lo mbisha anangɛso dako sɔ, wɛ ayoyala okambi w’ɔlɔlɔ wa Kristo Yeso waleshama la ɛtɛkɛta wa mbetawɔ ndo la wetshelo wa dimɛna wayelayɛ nna lo nna.+ 7 Koko, otone ɛkɔndɔ wa kashi+ wɔnyɔla kɛnɛ kele ekila, wele oko toshimu tatotaka esombe wa wamato. Lowedi okina oyaketembole lo ndjadjɛ oyango wa mamema Nzambi. 8 Nɛ dia osutshesutshelo wa demba keema la wahɔ efula, koko omamemelo le Nzambi ekɔ la wahɔ lo akambo tshɛ, nɛ dia vɔ wekɔ la daka dia lɔsɛnɔ la kakianɛ ndo lɔsɛnɔ la lo nshi yayaye.+ 9 Ɛtɛkɛta ɛsɔ wekɔ mɛtɛ ndo vɔ sunganaka mbetawɔma tshɛ lo tshɛ. 10 Diakɔ diakambaso olimu wa wolo ndo diayashaso tshɛ,+ nɛ dia takakitsha elongamelo kaso le Nzambi kasɛna lele Oshimbedi+ wa weho w’anto tshɛ,+ djekoleko akanga wa kɔlamelo.

11 Otetemale mbisha anto wadjango asɔ ndo mbaetsha. 12 Onto atokɔnyɔlake lo woho weyɛ dikɛnda. Koko oyale ɛnyɛlɔ le akanga wa kɔlamelo lo ɛtɛkɛta, lo lɔkɛwɔ, lo ngandji, lo mbetawɔ ndo lo pudipudi. 13 Polo lam’ayomoya, otetemale ndjasha lo wadielo wa lo sɛkɛ,+ lo olakelo* ndo lo wetshelo. 14 Tokalɛke losha lele la yɛ lakayalongola lo tshimbo ya prɔfɛsiya etena kakakahɛ olui wa dikumanyi anya.+ 15 Okanake yimba l’akambo asɔ. Oyashake tshɛ lɔkɔ dia ohamelo ayɛ mɛnama hwe le anto tshɛ. 16 Oyalamake ndo odjake yimba lo wetshelo ayɛ.+ Otetemale lo akambo asɔ nɛ dia lo nsala ngasɔ, wɛ ayoyashimbɛ ndo ayoshimbɛ wanɛ wakohokamɛ.+

5 Tohangwɛke opalanga w’onto+ la ɛtɛkɛta wamboleka wolo. Koko owolake oko shɔ, ɔsa ɛlɔngɔlɔngɔ oko ananyɔ, 2 wamato w’epalanga oko waa nyɔ, esekaseka oko akadiyɛyɛ la pudipudi tshɛ.

3 Ɔsa wadi waki edo wele mɛtɛ wadi waki edo*+ la nɛmɔ. 4 Ko naka wadi aki odo ɔmɔtshi ekɔ la ana kana ekana, vɔ weke dia mamema Nzambi ntondo lo nkumbo+ yawɔ ndo dia vɔ mfuta ambutshi awɔ la watshɛwɔ kɛnɛ kahombawɔ nongola,+ nɛ dia dui sɔ mbetawɔmaka lo washo wa Nzambi.+ 5 Womoto lele mɛtɛ wadi aki odo ndo lele bu l’ekondjelo ambokitsha elongamelo kande le Nzambi+ ndo nde tetemalaka nsala ɛsɛngɔsɛngɔ ndo alɔmbɛlɔ otsho la yanyi.+ 6 Koko ɔnɛ layasha lo ɛngɛnɔngɛnɔ wa demba ambovɔ kaanga mbaakandasɛnɛ. 7 Ɔnkɔnɛ, otetemale mbasha alako* asɔ diaha vɔ monga l’onongo. 8 Lo mɛtɛ, naka onto hakotsha ehomba w’anto ande, djekoleko w’ase luudu lande, nde ambɔsɛka mbetawɔ kande ndo amboleka onto lele bu la mbetawɔ+ kɔlɔ.

9 Wadi aki odo lakoka mbadiema ele ɔnɛ lambolekanya ɛnɔnyi 60, laki la omi ɔtɔi, 10 leyama dia nde ekɔ la etsha w’ɛlɔlɔ,+ naka nde akodia ana,+ naka nde akalongolaka angɛndangɛnda,+ naka nde akasolaka ekolo w’ekilami,+ naka nde akakimanyiyaka wanɛ wasowa+ ndo naka nde akayashaka lo oseka olimu w’ɔlɔlɔ tshɛ.

11 Lo wedi okina, todjake wadi waki edo weke esekaseka l’ɔnɔngɔ wa wadi waki edo wa ngasɔ, nɛ dia lam’ayekama nsaki yawɔ ya dieyanelo lam’asawɔ la Kristo, vɔ wayolanga ntshukama. 12 Ndo vɔ wayolomboshama lo woho wambowotshika ɛtɛkɛta awɔ wa ntondo wa mbetawɔ.* 13 L’etena kakɔ kaamɛ, vɔ mongaka la mbekelo ka ntona nkamba elimu ndo mbetetaka lo luudu la luudu, eelo, aha tsho hawokambe elimu, koko wekɔ ndo akanga wa vate vate ndo vɔ ndjatambiyaka l’akambo a kana,+ watatɛkɛta akambo wahawahombe ntɛkɛta. 14 Ɔnkɔnɛ, dimi kombolaka dia wadi waki edo w’esekaseka ntshukama,+ mbota ana,+ nɔmbɔla mvudu yawɔ diaha mbisha otunyi diaaso dia nde ntɛkɛta kɔlɔ. 15 Lo mɛtɛ, amɔtshi wamboshilaka ntakɔ mboka dia ndjela Satana. 16 Naka womoto ɔmɔtshi lele ombetawudi ekɔ la ewotɔ wele wadi waki edo, nde awakimanyiya diaha etshumanelo mɛmba wotsho. Ko etshumanelo kayokoka nkimanyiya wanɛ wele mɛtɛ wadi waki edo.*+

17 Dikumanyi dialɔmbɔla lo yoho ya dimɛna+ pombaka mbɔsama la nɛmɔ diolodiami l’ahende,+ djekoleko wanɛ wakamba olimu wolo lo ntɛkɛta ndo lo mbetsha.+ 18 Nɛ dia afundelo mbutaka ɔnɛ: “Etena kasusola ngɔmbɛ ntɔngɔ,+ tokidihake onyɔ,” ndo nto ɔnɛ: “Ose olimu la dia nongola difuto diande.”+ 19 Tetawɔke akambo wafundawɔ opalanga w’onto* onyake l’enyɔ w’ɛmɛnyi 2 kana 3.+ 20 Wanɛ wasala pɛkato,+ hangwɛkawɔ+ la ntondo k’anto tshɛ dia mpɛmɔla anto akina.* 21 Lambokodjangɛ la kiɔkɔmɛ tshɛ la ntondo ka Nzambi ndo ka Kristo Yeso ndo k’andjelo wakasɔnama dia wɛ ndjela alako anɛ aha la tongi ntondo la tokanyi ta kɔlɔ kana la shɔnɔdi.+

22 Tosasɛke dia mbahɛ onto anya*+ ndo toyatambiyake lo pɛkato y’anto akina, oyalamake pudipudi.

23 Tɔnɔke ashi nto,* nɔka yema ya wanu dia kokimanyiya lo otema ndo lo tohemɔhemɔ tayɛ.

24 Pɛkato y’anto amɔtshi tombaka sɛkɛ ndo mbakonyaka mbala kakɔ ɔtɔi lo kilombo, koko pɛkato y’anto akina ndjotombaka sɛkɛ paka l’ɔkɔngɔ.+ 25 Woho akɔ waamɛ mbele, etsha w’ɛlɔlɔ mbeyamaka lo sɛkɛ+ esadi eto ndo oyadi kaanga vɔ haweyami, vɔ hawokoke mbishɛma.+

6 Wanɛ wele l’ɛse k’osembe* wa lɔhɔmbɔ wɔsake dia nkumi yawɔ pombaka mbɔsama la nɛmɔ di’efula+ diaha anto ntɛkɛta kɔlɔ+ dia lokombo la Nzambi ndo dia wetshelo ande. 2 Ndo nto, wanɛ wele nkumi yawɔ wekɔ ambetawudi watoshishake dilɛmiɛlɔ otsha le wɔ l’ɔtɛ wewɔ anangɛso. Koko, vɔ waleke ndjala suke dia mbakambɛ, nɛ dia wanɛ wakondja wahɔ oma l’olimu awɔ wa dimɛna wekɔ ambetawudi ndo anangemi.

Otetemale mbetsha akambo asɔ ndo mbisha alako asɔ. 3 Naka onto ɔmɔtshi ambetsha wetshelo okina ndo hetawɔ alako w’eshika*+ w’oma le Nkumɛso Yeso Kristo kana wetshelo wɔtɔnɛ la omamemelo le Nzambi,+ 4 nde ekɔ la lotamanya ndo hashihodia ndooko dikambo.+ Nde ndjashaka paka l’ewanu ndo lo mbidjana taamu dikambo dia tɔtɛkɛta.+ Oma l’akambo asɔ mbatomba kandjema, ewanu, emamatanya,* kananɛ kɔlɔ, 5 esanyi wahɛnɛ pe lo kɛnɛ kendana la tokambokambo t’anyanya taya oma le anto wele la tokanyi ta kɔlɔ+ ndo wahate mɛtɛ, wafɔnya dia omamemelo le Nzambi ekɔ yoho mɔtshi ya nkondja wahɔ.+ 6 Lo mɛtɛ, mamema Nzambi+ ekɔ la wahɔ w’efula naka sho ngɛnangɛna la kɛnɛ kele la so. 7 Nɛ dia sho koondja ndooko l’ɛngɔ l’andja ɔnɛ ndo sho hatotokoka ntɔla ndooko ɛngɔ.+ 8 Ɔnkɔnɛ, naka tekɔ la yangɔ ya ndɛ* ndo dihɔndɔ dia ndɔta,* tɔngɛnɛngɛnɛ la diangɔ sɔ.+

9 Koko, wanɛ wamboyashikikɛ dia monga ɛngɔnyi kɔka l’ohemba, lo djonga+ ndo lo nsaki efula y’anyanya ndo ya kɔlɔ yakonya anto lo elanyelo ndo lo eshishwelo.+ 10 Nɛ dia ngandji ka falanga ekɔ odio wa weho tshɛ w’akambo wa kɔlɔ, ndo amɔtshi wakayala la tɔ, ko wakatakɔ mboka ka mbetawɔ ndo wakayatshatsha la lonyangu l’efula.+

11 Koko wɛ okambi wa Nzambi, lawɔ akambo asɔ. Koko wesa losembwe, omamemelo le Nzambi, mbetawɔ, ngandji, ekikelo ndo memakana.+ 12 Lɔka ta di’ɔlɔlɔ dia mbetawɔ; kukutɛ lɔsɛnɔ la pondjo lakayelamɛ dikambo dialɔ ndo lakayasale wotelo wa dimɛna wa lo sɛkɛ la ntondo k’ɛmɛnyi efula.

13 La ntondo ka Nzambi lalama diangɔ tshɛ la lɔsɛnɔ ndo ka Kristo Yeso, ɔnɛ lele oko ɔmɛnyi, akasale wotelo wa dimɛna wa lo sɛkɛ la ntondo ka Pɔsɔ Pilato,+ dimi lambokodjangɛ 14 dia wɛ nkitanyiya ɛlɛmbɛ lo yoho ya pudipudi ndo yele onto hakoke konda la ɛkɔmɔ polo ndo lo wɛnamelo wa Nkumɛso Yeso Kristo,+ 15 wayɛnya ɔtɔi akɔ wa Kumanda koleki wolo ndo k’ɔngɛnɔngɛnɔ l’etena kakashikikɛma. Nde kele Nkumekanga ka wanɛ wolɛ oko nkumi ya dikanga ndo Nkumi ka wanɛ wolɛ oko nkumi,+ 16 ɔtɔi akɔ lele la eongelo kahavu,+ ladjasɛ l’osase wele onto hakoke nsukana la wɔ,+ ɔnɛ lele ndooko onto lakawɛnyi ndo lakoka mbɛɛna.+ Lotombo ndo wolo wa pondjo wayale le nde! Aamɛɛ.

17 Tɛ* wanɛ wele ɛngɔnyi lo dikongɛ di’akambo nɛ* diaha vɔ monga etako* ndo dia vɔ nkitsha elongamelo kawɔ, aha lo efumbɔfumbɔ k’ɔngɔnyi,+ koko le Nzambi latosha la lokaho tshɛ diangɔ tshɛ diangɛnangɛnaso la diɔ.+ 18 Tɛwɔ dia vɔ nsala kɛnɛ kele ɔlɔlɔ, monga ɛngɔnyi lo etsha w’ɛlɔlɔ, dia vɔ monga la lokaho* ndo monga suke dia nkahana l’anto akina.+ 19 Lo nsala ngasɔ, vɔ wayoyaombɛ etshina k’ɔlɔlɔ ka lo nshi yayaye+ lo dihole dia dimɛna dia vɔ nkukutɛ lɔsɛnɔ l’oshika.+

20 Timɔte le, olame kɛnɛ kakawakosha,+ todjake yimba lo asawo w’anyanya wɔnyɔla kɛnɛ kele ekila ndo lo taamu tendana la kɛnɛ kelɛwɔ welelɛ ɔnɛ “ewo.”+ 21 Lo mɛnya ewo ka ngasɔ lo sɛkɛ, anto amɔtshi wakatakɔ mboka ka mbetawɔ.

Ɔlɔlɔ waheyama mbɛdika w’oma le Nzambi wayale la nyu!