MUKANDA WA HENDE WAKAFUNDƐ PƆƆLƆ TIMƆTE

1 Dimi Pɔɔlɔ, lele ɔpɔstɔlɔ wa Kristo Yeso lo lolango la Nzambi lo ndjela daka dia lɔsɛnɔ lele lo tshimbo ya Kristo Yeso,+ 2 lambofundɛ Timɔte ɔnami la ngandji nte:+

Ɔlɔlɔ waheyama mbɛdika, kɛtshi ndo wɔladi w’oma le Nzambi Shɛso ndo w’oma le Kristo Yeso Nkumɛso wayale la yɛ!

3 Lekɔ la lowando le Nzambi, ɔnɛ lakambɛmi olimu w’ekila oko wakakambe watshɛmi, la nkum’otema ka pudipudi, diaha dimi kohɛ pondjo lo ɛsɛngɔsɛngɔ wasalami otsho la yanyi. 4 Etena kohɔmi asɔyi ayɛ, dimi lekɔ lo nomɔlomɔ dia kɛna, dia dimi ndola l’ɔngɛnɔngɛnɔ. 5 Nɛ dia dimi mbohɔka mbetawɔ kaha ka dungi pende+ kele la yɛ kaki ntondo le tshɛyɛ Lɔyisɛ ndo le Eyunikɛ wa nyɔ. Dimi lekɔ la eshikikelo dia mbetawɔ kakɔ kaamɛ kekɔ ndo le yɛ.

6 Diakɔ diakoholami dia wɛ mpɛtshahɛtsha oko dja woshasha wa Nzambi wakayalongola lam’akawakaahɛ anya.+ 7 Nɛ dia Nzambi kotosha nyuma* katetɛ ɛhɔdu,+ koko ka nkudu,+ ka ngandji ndo ka yimba y’ɔlɔlɔ. 8 Ɔnkɔnɛ, tokake nsɔnyi dia nsambisha akambo wendana la Nkumɛso+ kana wendana la mi, dimi lele ose lokanu lo dikambo diande. Koko wɛ lo wedi ayɛ, etawɔ dia nsowa+ lo dikambo dia lokumu l’ɔlɔlɔ lo ndjaɛkɛ lo wolo waki Nzambi.+ 9 Nde akatoshimbɛ ndo akatelɛ la leeta l’ekila,+ aha l’ɔtɛ w’etsha aso, koko l’ɔtɛ wa sangwelo diande hita ndo l’ɔtɛ w’ɔlɔlɔ ande waheyama mbɛdika.+ Takalongola leeta lɔsɔ lo kɛnɛ kendana la Kristo Yeso deko aha nɛ, 10 koko kakianɛ lɔ lambɛnama hwe lo tshimbo ya wɛnamelo w’Oshimbedi aso, Kristo Yeso,+ ɔnɛ lakakomiya nyɔi+ ndo lakahɛtshɛɛ lɔsɛnɔ+ ndo kɛnɛ kahahɔndɛ+ osase l’ekimanyielo ka lokumu l’ɔlɔlɔ,+ 11 lakamasɔnama osambisha, ɔpɔstɔlɔ ndo ombetsha.+

12 Diakɔ diasowami ndo dimi asui anɛ,+ koko haloke nsɔnyi.+ Nɛ dia dimi mbeyaka Ɔnɛ lakametawɔ ndo lekɔ la eshikikelo dia nde ekɔ la akoka wa nama kɛnɛ kakamombe le nde polo ndo lushi lakɔ.+ 13 Tetemala nama lokongɛ l’ɛtɛkɛta w’eshika*+ wakayoke oma le mi la mbetawɔ ndo la ngandji koye oma lo monga kaamɛ la Kristo Yeso. 14 Lama diangɔ dia nɛmɔ sɔ diakawakosha lo tshimbo ya nyuma k’ekila kele le so.+

15 Wɛ mbeyaka dia anto tshɛ wa lo prɔvɛnsɛ ka Aziya+ wakansɛkɛ, mbidja ndo Fingɛlɔ la Hɛrɛmɔngɛnɛ. 16 Nkumadiɔndjɔ oke ase luudu laki Ɔnɛsifɔrɔ+ kɛtshi, nɛ dia mbala efula nde akankeketsha ndo nde komboka nsɔnyi l’ɔtɛ wakimi lo lokanu. 17 Koko lam’akinde la Rɔmɔ, nde akanyange ahole tshɛ la etete, ko nde akamɛnyi. 18 Nkumadiɔndjɔ kawokimanyiya dia Jehowa* mbooka kɛtshi lo lushi lakɔ. Ndo wɛ mbeyaka dimɛna elimu tshɛ wakandakambe l’Ɛfɛsɔ.

2 Ɔnkɔnɛ wɛ ɔnami,+ tetemala nkondja wolo lo ɔlɔlɔ waheyama mbɛdika wele le Kristo Yeso; 2 akambo wakayoke oma le mi ndo wakashikikɛma oma le ɛmɛnyi+ efula, kimɔwɔ le apami wele la kɔlamelo, ko vɔ lawɔ wayonga l’akoka tshɛ wahombama dia mbetsha anto akina. 3 Oko weyɛ ɔsɔlayi+ w’ɔlɔlɔ wa Kristo Yeso, etawɔ soyama.+ 4 Ndooko onto lele ɔsɔlayi layasha* l’awui w’okanda* wa lo lɔsɛnɔ, dia nde mbetawɔma le ɔnɛ lakawodje l’olimu w’ɔsɔlayi. 5 Kaanga lo tɔkɛnyɔ, onto tshɛ lakɛnya halongola difuto* onyake paka nde kɔkɛnyisha lo ndjela ɛlɛmbɛ.+ 6 Okambi w’ekambɔ wakamba olimu efula kahomba nongola elowa ntondo. 7 Okanyiyake tena tshɛ kɛnɛ katami; Nkumadiɔndjɔ ayokosha shɛnɔdi lo akambo tshɛ.

8 Ohɔ dia Yeso Kristo akolɔ oma lo nyɔi,+ ndo nde aki kanula*+ ya Davidɛ, lo ndjela lokumu l’ɔlɔlɔ lasambishami+ 9 lele l’ɔtɛ alɔ mbasowami ndo mbeemi lo lokanu oko otshi wa kɔlɔ.+ Koko ɔtɛkɛta wa Nzambi hawokelekami.+ 10 L’ɔtɛ wa dikambo sɔ mbakikɛmi akambo tshɛ lo wahɔ w’asɔnami+ dia vɔ lawɔ nkondja panda k’oma lo tshimbo ya Kristo Yeso, kaamɛ la lotombo la pondjo. 11 Ɛtɛkɛta ɛnɛ wekɔ mɛtɛ: Naka lo mɛtɛ sho mvɔ kaamɛ, kete ndo tayɔsɛna kaamɛ.+ 12 Naka sho ntetemala mbikikɛ, kete ndo sho tayolɛ kaamɛ la nde oko nkumi ya dikanga.+ Naka sho mbanguna, kete nde lawɔ ayotanguna.+ 13 Oyadi kaanga sho nshisha kɔlamelo, nde tshikalaka la kɔlamelo, nɛ dia nde hakoke ndjanguna ndamɛ.

14 Tetemala mbaohola akambo asɔ, owaetshake* la ntondo ka Nzambi diaha vɔ ndɔshana lo dikambo dia tɔtɛkɛta, dui diele bu la wahɔ dikambo diɔ salɛka wanɛ wahokamɛ kɔlɔ. 15 Sala la wolo tshɛ dia mɛnama la ntondo ka Nzambi oko onto lambetawɔma, oko ose olimu waha la dikambo dia mbotshama nsɔnyi, walembetshiya ɔtɛkɛta w’akambo wa mɛtɛ dimɛna.+ 16 Koko ewɔ ɛtɛkɛta w’anyanya wɔnyɔla kɛnɛ kele ekila,+ nɛ dia ɛtɛkɛta ɛsɔ wayokonya anto dia vɔ ndeka nsala akambo wa kɔlɔ, 17 ndo ɛtɛkɛta awɔ wayodiangana oko mpota kambokunda katahɔndja emunyi. Himeneya la Filɛtɔ wekɔ l’atei awɔ.+ 18 Apami asɔ wakatakɔ mboka k’akambo wa mɛtɛ, wata dia eolwelo kamboshilaka salema,+ ndo vɔ wekɔ lo nkonya anto amɔtshi dia vɔ nshisha mbetawɔ. 19 Kaanga mbediɔ ngasɔ, etshina ka wolo kaki Nzambi tshikalaka nge, ndo kekɔ la efundelo ɛnɛ: “Jehowa* mbeyaka anto ande”+ ndo ɔnɛ: “Onto tshɛ lelɛ* lokombo la Jehowa*+ atshike akambo wa kɔlɔ.”

20 Lo luudu la woke, aha paka diangɔ dia paonyi la dia mfɛsa to mbatongaka, koko ndo diangɔ dia esongo ndo dia awomba, dimɔtshi dikambo dia okambelo wa nɛmɔ efula ndo dikina dia okambelo w’anyanya. 21 Ɔnkɔnɛ, naka onto ndjakakitola la diangɔ diele dikambo dia okambelo w’anyanya, kete nde ayonga ehomɔ* kele dikambo dia okambelo wa nɛmɔ efula, kambokidiama, kele ohomba le kangatɔ ndo kambɔlɔngɔsɔma dia nsala olimu w’ɔlɔlɔ tshɛ. 22 Diakɔ diele, lawɔ nsaki y’ɛlɔngɔlɔngɔ, koko wesa losembwe, mbetawɔ, ngandji, wɔladi kaamɛ la wanɛ welɛ* Nkumadiɔndjɔ la etema wa pudipudi.

23 Ndo nto, ewɔ taamu t’enginya+ ndo t’anyanya, eya dia tɔ tongaka ata. 24 Nɛ dia okambi wa Nkumadiɔndjɔ hahombe ndɔ ta, koko nde pombaka monga la memakana* otsha le anto tshɛ,+ monga la akoka wa mbetsha ndo monga la ndjakimɛ etena koosalɛwɔ kɔlɔ.+ 25 Nde pombaka mbetsha la memakana tshɛ wanɛ wahetawɔ+ wetshelo. Ondo Nzambi mbeyaka mbasha ndjatshumoya* kakonya lo ewo k’oshika k’akambo wa mɛtɛ,+ 26 ndo vɔ mbeyaka ndjokana yimba ndo mpandɔ oma lo djonga ya Diabolo, lo mɛna dia nde akawande wasɛna dia vɔ nsala lolango lande.+

3 Eya dia lo nshi y’ekomelo,+ tena dia paa dia wolo mbikikɛ diayoyala. 2 Nɛ dia anto wayoyalanga, wayolanga falanga, wayonga akanga w’etako, akanga wa lotamanya, atɛnganyi, wahakitanyiya awui w’ambutshi awɔ, akanga wa lɔhɛndɛ, waha la kɔlamelo, 3 waha la ngandji ka lam’asa ase nkumbo, wahalange mbokana, amamanyishi, waha la ndjakimɛ, akanga w’ekonda, waha la ngandji k’akambo w’ɛlɔlɔ, 4 afungi, akanga w’ɛtɛ wolo, akanga wa ndjadiya, anangi w’ɛngɛnɔngɛnɔ lo dihole dia monga anangi wa Nzambi, 5 wayonga la ɛnamelo k’anto wayasha l’awui wa Nzambi, koko wayanguna wolo+ ande. Omɔ l’atei w’anto asɔ. 6 Oma l’atei w’anto asɔ mbatomba wanɛ wasɔsɔmɛ lo nkumbo y’anto dia mbakesa lo woshɛshɛ ndo wanda oko mfumbe wamato wele wɔdu ndo wele la wotsho wa pɛkato, walɔmbɔma la nsaki ya weho la weho. 7 Vɔ totetemalaka mbeka, koko hawokondja ewo k’oshika k’akambo wa mɛtɛ.

8 Oko wakalɔshana Janɛsɛ la Jambrɛsɛ vɔ la Mɔsɛ, woho akɔ waamɛ mbalɔshana anto asɔ la akambo wa mɛtɛ. Timba t’anto asɔ tekɔ tshɛ kɔlɔ ndo vɔ hawetawɔma lo kɛnɛ kendana la mbetawɔ. 9 Koko vɔ hawotohama nto, nɛ dia enginya kawɔ kayɛnama le anto tshɛ, oko wakidiɔ le apami+ asɔ 2. 10 Koko, wɛ akayele dimɛna dimɛna wetshelo ami, yoho yami ya lɔsɛnɔ,+ eyango wele la mi, mbetawɔ kami, solo dia lotutsha diele la mi, ngandji kami, ekikelo kami, 11 ɛhɛnyɔhɛnyɔ ndo asui wele oko wakahomana la mi l’Atiyɔka,+ l’Ikɔniyo+ ndo la Lustɛra.+ Dimi lakakikɛ ɛhɛnyɔhɛnyɔ ɛsɔ ko Nkumadiɔndjɔ akantshungola oma lɔkɔ tshɛ.+ 12 Lo mɛtɛ, wanɛ tshɛ wakombola nsɛna la omamemelo le Nzambi kaamɛ la Kristo Yeso, vɔ lawɔ wayɔhɛnyahɛnyama.+ 13 Koko, akanga wa kɔlɔ ndo akanga wa lokeso wayoleka mpama lo kɔlɔ, wayokesana ndo wayokesama.+

14 Koko wɛ, tetemala lo akambo wakayeke ndo wakawakokimanyiya dia mbetawɔ,+ eeya oma le onto akɔna akayawaeke 15 ndo ɔnɛ oma ko kiɛndakɛnda+ yayɛ, wɛ akeye efundelo w’ekila+ wakoka kosha lomba layokokimanyiya dia nkondja panda lo tshimbo ya mbetawɔ le Kristo Yeso.+ 16 Afundelo tshɛ wakasambiyama oma le Nzambi+ ndo wekɔ ohomba dia mbetsha,+ dia mpangwɛ, dia mbidja akambo l’ɔnɔngɔ* ndo dia mpokola lo losembwe,+ 17 kele okambi wa Nzambi onge l’akoka tshɛ ndo la kɛnɛ tshɛ kahombama dia nsala olimu w’ɔlɔlɔ tshɛ.

4 Lambokodjangɛ la kiɔkɔmɛ tshɛ la ntondo ka Nzambi ndo ka Kristo Yeso ɔnɛ lahomba nombosha+ wanɛ wasɛna ndo wanɛ wakavu+ ndo oma lo wɛnamelo+ ande ndo Diolelo+ diande nte: 2 Sambishaka ɔtɛkɛta;+ salaka dui sɔ la shamanya* lo tena di’ɔlɔlɔ ndo lo tena dia paa, ngolaka,+ hangɔka ndo lakaka la solo dia lotutsha tshɛ ndo la diewo dia mbetsha.+ 3 Nɛ dia etena kɛmɔtshi kayoyala kele anto hawotosukɛ wetshelo+ w’oshika,* koko lo ndjela nsaki yawɔ hita, vɔ wayoyayangɛ embetsha dia vɔ mbatɛka kɛnɛ kangɛnyangɛnya+ atoyi awɔ.* 4 Vɔ wayodiha atoyi awɔ diaha mpokamɛ akambo wa mɛtɛ ndo wayodja yimba l’ɛkɔndɔ wa kashi. 5 Koko wɛ, tetemala monga la yimba y’ɔlɔlɔ lo akambo tshɛ, kikɛ akambo wa kɔlɔ,+ kamba olimu w’osambisha* ndo kotshaka ekambelo+ kayɛ dimɛna.

6 Nɛ dia dimi lamboshila tshulwama oko olambo wa lotɛ+ ndo etena ka dimi ntshungɔ+ kaya suke. 7 Dimi lakalɔ ta+ di’ɔlɔlɔ, lakalawɔ lowango dia lishidiya,+ lakalame mbetawɔ. 8 Ntatɛ oma ko kakianɛ, wambomombɛ dɛmbɔ diami dia nkoso dia losembwe+ diayombisha Nkumadiɔndjɔ, shushi ya losembwe+ oko difuto lushi lakɔ,+ aha dimɛ oto, koko ndo wanɛ tshɛ wakalange wɛnamelo ande.

9 Sala tshɛ dia ndja le mi yema esadi. 10 Nɛ dia Dɛmasɛ+ akantshike dikambo nde akalange dikongɛ nɛ di’akambo* ndo nde akatshu otsha la Tɛsalɔnika. Kɛrɛsɛna akatshu la Ngalatiya, Tito akatshu la Dalamatiya. 11 Paka Luka oto kele kaamɛ la mi. Koye la Makɔ, nɛ dia nde ayonkimanyiya efula l’olimu. 12 Koko lakatome Tishiko+ l’Ɛfɛsɔ. 13 Lam’ayoyoya, kombela dihɔndɔ dia nkomba tshitshi diakamatshike la Tɔrɔa laka Karapo kaamɛ ndo wɔɔmbɔ w’Afundelo, djekoleko wa dikoho diele la efundelo.*

14 Alɛksandɛrɛ, otshudi wa yaandjo akansalɛ kɔlɔ efula. Jehowa* ayowofuta lo ndjela etsha+ ande. 15 Wɛ lawɔ pombaka mbeewɔ, nɛ dia nde akalɔshana la losango laso lo yɛdikɔ y’efula.

16 Lam’akamasambe mbala ka ntondo, ndooko onto laki kaamɛ la mi, vɔ tshɛ wakansɛkɛ. Vɔ watongake l’onongo lo dikambo sɔ. 17 Koko, Nkumadiɔndjɔ akemala suke la mi ndo akambisha wolo kele lo tshimbo yami, olimu w’esambishelo wakambeme dimɛna ndo kele wedja tshɛ woke esambishelo kakɔ,+ ndo dimi lakatshungɔ oma l’onyɔ+ wa ntambwɛ. 18 Nkumadiɔndjɔ ayontshungola oma l’akambo wa kɔlɔ tshɛ ndo ayopandja ndo ayɔmbɔtshiya lo Diolelo+ diande dia l’olongo. Lotombo layale le nde pondjo pondjo! Aamɛɛ.

19 Ombishe Piriskila la Akula+ ndo ase luudu la Ɔnɛsifɔrɔ+ mɔyɔ.

20 Erasto+ akatshikala la Kɔrɛtɔ, koko dimi lakatshike Tɔrɔfimo+ la hemɔ la Milɛtɔ. 21 Sala tshɛ dia wɛ nkoma la ntondo ka nshi ya tshitshi.

Eubulu ambokotomɛ mɔyɔ ndo Pudasɛ, Lino, Klodiya ndo anangɛso tshɛ wakotomɛ mɔyɔ.

22 Nkumadiɔndjɔ asuke yimba yakɛnɛmɔlayɛ. Ɔlɔlɔ ande waheyama mbɛdika wayale la nyu!