Buku Di’ɛkɔndɔ Wa Lo Bible

ƆNƐ ele buku di’ɛkɔndɔ wa mɛtɛ. Vɔ wakɔsama oma lo Bible, buku dioleki woke l’abuku tshɛ wa l’andja. Ɛkɔndɔ akɔ wayokosha lokanyi l’endana l’oshimu w’andja ɔnɛ tatɛ kam’akatatɛ Nzambi la tonga polo ndo lo nshi yaso nyɛ. Mbala efula, vɔ totɛka akambo w’endana la kɛnɛ katolaka Nzambi dia ntsha lo nshi yayaye.

Buku nɛ diayokosha lokanyi lɔmɔtshi lo kɛnɛ k’endana la Bible k’otondo. Diɔ totɛka awui w’endana l’anto wa lo Bible ndo akambo wakawasale. Nto, diɔ tɛnyaka dikongelo dia woke diakakitshɛ Nzambi anto la ntondo: lɔsɛnɔ la pondjo lo paradiso ka la kɛtɛ.

Ɛkɔndɔ 116 mbele lo buku nɛ. Vɔ kahanyema lo tenyi enanɛi. Dikatshi diele l’etatelo k’etenyi l’etenyi kɔndɔlaka kɛnɛ katɛkɛtama l’etenyi kakɔ lo tshena pe. Awui akɔ kɔndɔma l’ɔnɔngɔ lo ndjela woho wakawatakotshamaka l’ɔkɔndɔ w’anto. Dikambo sɔ diayokokimanyiya dia wɛ mbeya nganɛ wɔtɔnɛ awui waketaka l’Ɔkɔndɔ w’anto.

Ɛkɔndɔ akɔ ɛnɛ fundama l’ɔtɛkɛta a wɔdu. Ana w’akɛnda efula l’atei anyu nyayokoka mbâla nyuamɛ. Ambutshi, nyayɛna dia ananyu wa totshitshɛ wayɔngɛnangɛna ɛkɔndɔ akɔ lam’ayonyowâlɛkawɔ mbala la mbala. Nyayɛna dia buku nɛ diekɔ l’awui efula wangɛnyangɛnya akɛnda kâmɛ ndo dikumanyi.

Avɛsa wa Bible shilama l’ekomelo k’ɔkɔndɔ l’ɔkɔndɔ. Tambokokeketsha dia wɛ mbala tenyi diakɔ di’afundelo wa Bible oma lɛnɛ ɔsami ɛkɔndɔ akɔ. Etena kashidiyayɛ ɔkɔndɔ ɔmɔtshi, vusola nto ambola wa wekelo wa ɔkɔndɔ akɔ watanema l’ɔkɔngɔ wa Ɔkɔndɔ 116 ndo hemba mbohɔ ekadimwelo.