Mbɔtwɛlɔ

Dauda, ose Sierra Leone kɔndɔlaka ate: “Lakole lo ngielongelo mɔtshi ya lo prɔvɛnsɛ ka lo nɔrdɛ. Lam’akimi dikɛnda, owanu waki lam’asa nkumbo kami la nkumbo kekina l’ɔtɛ w’ɛtshi ka nkɛtɛ. Nkumbo yakɔ hiende yakakisusanaka. Dia nkandola okakatanu ɔsɔ, wakelɛ wetshi. Nde akasha pami kɛmɔtshi talatala, ko nde mbokomba la dihɔndɔ dia wɛma. Kombeta edja, pami kakawakombe dihɔndɔ akatatɛ didima ndo tshutshumɔ dungu. Etena kakandende lo talatala nde akate ate: ‘Lambɛna pami kɛmɔtshi k’osombe ayaye! Nde ndɔta ahɔndɔ wa wɛma. Nde ekɔ otale, osombe la divo dia ndjwe ndo ekɔ lo ndjaye okotami.’

“Nde akataka dikambo dia tshɛmi ka pami! Ko nde akatatɛ ngayɔngayɔ ndo mbuta la dui dia wolo ate: ‘Naka hanyetawɔ kɛnɛ katami, nyoyende nyuamɛ!’ Lo mɛtɛ ndooko onto laki la dihonga dia ntshɔ tenda. Wetshi akawɔladia lo mbotɛ okanga wakandasale l’akatshi amɔtshi sanganya l’ashi, okanga waki l’ekutshu kaki la nde.

“Oma l’onyɔ wa pami kaki lo talatala, ‘tshɛmi’ akate dia ɛtshi ka nkɛtɛ kɛsɔ kaki ka nkumbo kaso. Nde akatɛ Am’opalanga dia nde kambaka ɛtshi ka nkɛtɛ kɛsɔ aha la mboka wɔma. Nkumbo kekina kaketawɔ sambo kɛsɔ. Owanu wakashile.”

Weho w’awui wa ngasɔ salemaka efula lo Afrikɛ wa lo Owɛstɛ. Lɛkɔ ndo l’ahole akina wa l’andja, miliyɔ y’anto yaheyama mbadia mbetawɔka dia wanɛ wavɔ tshɔka l’andja wa lo nyuma lɛnɛ akokawɔ nsɛdingola ndo monga la shɛngiya lo nsɛnɔ y’anto la nkɛtɛ. Onde dietawɔ sɔ diekɔ mɛtɛ? Onde wanɛ wavɔ tetemalaka mɛtɛ nsɛna? Naka bu, waa na wasɛma dia vɔ mbele nyuma ya wavɔ? Mbeya ekadimwelo w’eshika lo ambola asɔ ekɔ ohomba efula. Ɔsɔ ekɔ dikambo dia lɔsɛnɔ kana nyɔi.