Wekelo 12

Tɔsake Lɔsɛnɔ ndo Dikila la Nɛmɔ

Woho akɔna wahombaso mbɔsaka lɔsɛnɔ? (1) otondjelo wa diemi? (1)

Ngande wɛnya Akristo ɔnɛ vɔ ndjashaka dia shimbɛ wâle? (2)

Onde ekɔ kɔlɔ ndjaka nyama? (3)

Naa ditshelo dimɔtshi diɛnya ɔnɛ hatɔshi lɔsɛnɔ la nɛmɔ? (4) Ɛlɛmbɛ wa Nzambi atawɔ lo dikambo dia dikila? (5)

Onde ɛlɛmbɛ ɛsɔ mendanaka ndo l’okaloyelo wa dikila? (6)

1. Jehowa mbele kiɔkɔ ya lɔsɛnɔ. Nzambi mbakasha diangɔ tshɛ diasɛna lɔsɛnɔ. (Osambu 36:9) Lɔsɛnɔ lekɔ ekila lo asho wa Nzambi. Oyadi kânga lɔsɛnɔ l’ɔna leke l’otema a nyango lekɔ ohomba le Jehowa. Ndjaka ɔn’ashashi layahame l’otema l’ɔkɔkɔ ɔmɔtshi ekɔ kɔlɔ lo asho wa Nzambi.​—Etumbelu 21:22, 23; Osambo 127:3.

2. Akrito wa mɛtɛ ndjashaka l’akambo wa shimbɛ mpokoso. Vɔ ntshaka dia mituka awɔ la mvudu yawɔ monga aha la wâle. (Euhwelu k’Elembe 22:8) Ekambi wa Nzambi hawodje nsɛnɔ yawɔ lo wâle tshanana l’ɔkɔkɔ wa ndjangɛnyangɛnya kana ndjaokiya ɔlɔ w’efula. Omalɔkɔ, vɔ hawɔkɛnya tɔkɛnyɔ ta ngala takoka pumuya onyawɔ onto l’okonda. Vɔ mbewɔka wa filmɛ kana dienenda diakeketsha akambo wa ngala.​—Osambo 11:5; Joani 13:35.

3. Ndo nsɛnɔ ya nyama mbele ekila le Otungi. Okristo kokaka ndjaka nyama dia kondja onatshi wa ndɛ kana dihɔndɔ dia ndɔta kana ndjakokɛ oma lo hemɔ kana wâle ɔmɔtshi. (Etatelu 3:21; 9:3; Etumbelu 21:28) Koko kema dimɛna pɛnyahɛnya nyama kana ndjidiaka odiakadiaka dia ndjangɛnyangɛnya kana l’ɔkɔkɔ wa tɔkɛnyɔ toto.​—Tukedi 12:10.

4. Ɔnwɛlɔ wa fɔka, ɔnwɛlɔ wa kândji kana w’akatshi w’alowa ndo ɔnwɛlɔ wa didjoyadjoya dia ndjangɛnyangɛnya kema dikambo di’Akristo. Ditshelo sɔ tshɛ diekɔ kɔlɔ nɛ dia (1) diɔ tokonyaka ɛhɔmbɔ adiɔ, (2) diɔ nanyaka alemba aso, ndo (3) diɔ diekɔ mindo. (Romo 6:19; 12:1; 2 Koreto 7:1) Kokaka ndjâla wolo efula dia kakitɔna la mbekelo shɔ. Koko sho pombaka kakitɔna layɔ dia ngɛnyangɛnya Jehowa.

5. Ndo dikila mbele ekila lo asho wa Nzambi. Nzambi mbutaka ɔnɛ: anima, kana lɔsɛnɔ, lekɔ lo dikila. Omalɔkɔ, ekɔ kɔlɔ ndɛ dikila. Kema dimɛna nto ndɛ nyama yahawasedisha dikila lo yoho y’ɔlɔlɔ. Naka wakadiaki nyama lohina kana tɔ kakavwe lo djonga, tɔ hakoke ndɛ̂ma. Naka wambokiongola dikɔnga kana kambohɔmɔ dishashi kete tɔ pombamaka pembwama mpô esadi eto naka tɔ kayɔlɛma.​—Etatelu 9:3, 4; Akambu w’Asi Lewi 17:13, 14; Etsha 15:28, 29.

6. Onde ekɔ kɔlɔ mbetawɔ okaloyelo wa dikila? Ohɔ dia, Jehowa tɔlɔmbaka dia sho sɛka dikila. Mbuta ate: hatokoke mbɔsa dikila di’anto akina kana diakiso hita diombiso l’andja wa demba ko dikaloya nto lo demba diaso oyadi lo weoho akɔna tshɛ. (Etsha 21:25) Omalɔkɔ, Akristo wa mɛtɛ hawetawɔ okaloyelo wa dikila. Vɔ kokaka mbetawɔ weoho ekina w’osakelo, oko ekanga wadiya dikila wahasɔhanyi la dikila. Vɔ kombolaka sɛna, koko hawotoyangaka mbitsha nsɛnɔ yawɔ lo sekola ɛlɛmbɛ wa Nzambi.​—Mateu 16:25.

[Diombwɛlo di’osato wa lo lɛkɛ 25]

Dia ngɛnyangɛnya Nzambi, têwɔ okaloyelo wa dikila, mbekelo ya mindo, la dia ndjadjaka lo wâle tshanana