Mbɔtwɛlɔ

Ombadi wa ngandji,

Onde wɛ ndjaokaka suke la Nzambi? Anto efula fɔnyaka ɔnɛ ɔsɔ ekɔ dui diahakokaki salema nɛ dia vɔ mbɔsaka dia Nzambi ekɔ etale efula kana mɛnaka dia vɔ hawosungana ndjasukanya la nde. Koko, Bible tokeketshaka la ngandji tshɛ ɔnɛ: “Nyoyasukanya la Nzambi, ko nde ayoyasukanya la nyu.” (Jakɔba 4:8) Nzambi mbishaka atɛmɔdi ande daka nɛ nto ate: “Nɛ dia dimi Jehowa Nzambi kayɛ kokimɛka lo lonya layɛ l’omi, dimi kotɛka nte: ‘Tokake wɔma. Dimi layokokimanyiya.’”​—Isaya 41:13.

Ngande wakokaso nkoma lo monga la diɔtɔnganelo dia ngasɔ la Nzambi? Lɔngɛnyi tshɛ, ndjaka oma lo mbeya onto dimɛna, oma l’ɔngɛnɔngɛnɔ wokaso ndo nɛmɔ diashaso waonga ande wa laande. Diakɔ diele, mbeka waonga wa Nzambi ndo ditshelo diande oko wɛnya Bible ekɔ ohomba efula. Kana yimba lo woho wakɛnɛmɔla Jehowa ɔmɔmɔ a l’atei wa waonga ande, sɛdingola yoho ya kokele yakokoya Yeso Kristo waonga akɔ ndo shihodia woho wakokaso sho lawɔ monga la waonga asɔ ayoleka tosukanya la Nzambi. Tayɛna dia Jehowa mbele Owandji wakoka ndo wahombama l’andja w’otondo ndo Papa keso sho tshɛ l’ohomba ande. Oko wende la wolo, la losembwe, la lomba ndo woludinde la ngandji, nde hakashaki anande wele la kɔlamelo pondjo.

Tambokombola dia dibuku nɛ kokimanyiya dia wɛ nyomoleka ndjasukanya la Jehowa Nzambi, dia wɛ monga la dimama dia wolo lam’asayɛ la nde, woho wa wɛ sɛna dia mbotombolaka pondjo pondjo!