Ɛkɔndɔ W’apandjudi a Diolelo
Esambishelo ka lo Tena dia Wolo
ƆPƆSTƆLƆ Paulo akatatshi ate: “lu nshi y’ekumelu, tena dia wulu diayuyala.” (2 Timote 3:1) Ande mɛtɛ kɛnama ɛtɛkɛta ɛsɔ lee! Anto wa la El Salvador, wodja ɔmɔtshi wa l’Amérique centrale wokɛnaka mɛtɛ ka dikambo sɔ dia kandji efula. Oleki ɛnɔnyi dikumi w’etondo, ase wodja akɔ wakalɔshanya lam’asawɔ, dui diakela asui ndo nyɔi le nunu di’anto efula. Ɛlɔ kɛnɛ, ta diamboshila, koko, asui wekekɔ. Akambo wa ngala wa mamba wakatombe l’ɔkɔngɔ wa ta. Atayala edja, pami kɛmɔtshi kɔmbɔla akambo lo televiziɔ ka lo wodja akɔ akate ate: “Akambo wa ngala la wovi mbele awui watshama lushi la lushi.”
Ndo Ɛmɛnyi wa Jehowa mbakadiɛnɛ l’osukusuku w’akambo wa ngala wa ngasɔ. Ampɔtɔdi wakɔtɔ lo Mbalasa ya Diolelo ko wakave mbolo y’olimu wa sonorisation. Mbala efula, elui w’ɛlɔngɔlɔngɔ waki l’ekoma wakɔtɔ la wolo lo Mbalasa ya Diolelo etena kaki sanganya y’Akristo lo salema ko wakave falanga y’ampokami, tango yawɔ, ndo diangɔ dikina di’ohomba. Lam’akawatshɔkaka l’elimu awɔ wokowokambaka nshi tshɛ, Ɛmɛnyi wa Jehowa efula wakakome kânga lo diakema oma le ampɔtɔdi.
Kânga mbekama etakanya wa ngasɔ l’atei, Ɛmɛnyi wa Jehowa wa la El Salvador wekɔ lo tetemala la sambisha lokumu l’ɔlɔlɔ la wolo tshɛ. Vɔ ntshaka dui sɔ dia kitanyiya ɔlɛmbɛ wofundami l’atei w’Afundelo ɔnɛ: “Dieli la lukumu l’ololo nsambishama ntundu lu wedja tshe.” (Mako 13:10) Ekɔ anto efula wa lo wodja akɔ wâkalomɔlomɔ dia mboka elongamelo ka Diolelo kakɛnɛmɔla Bible, ndo Ɛmɛnyi watshakɔ la weolo tshɛ dia komɛ oseka onto tshɛ a l’atei awɔ. Esambishelo ka tshakitudi mɛnamaka dia tɔ mbele yoho y’ɔlɔlɔ y’esambishelo.
Etena kakinde lo sakemɛ lo lopitadi lɔmɔtshi, Ɔmɛnyi ɔmɔtshi akayakimanyiyaka la waaso tshɛ waki lande dia mbutɛ ɛkɔnyi ekina akambo w’endana l’alaka wa Nzambi wa lo nshi yayaye, oko watanemawɔ l’atei wa Bible. Ɔkɔnyi ɔmɔtshi waki k’ɛngɛnɔ akayakiyanya ate: “Laya suke la mvɔ!” Koko, etombelo wa lonyangu wakakongɛka ɔkɔnyi akɔ kɔtɛtɔla Ɔmɛnyi akɔ dia sawola lande lo dikambo dia lukumu l’ɔlɔlɔ la Diolelo diaki Nzambi. Koko, nde akadiɛ pami kakɔ la dui dia wolo awui w’oma lo dibuku Vous pouvez vivre éternellement sur une terre qui deviendra un paradis, dibuku diakatondja Ɛmɛnyi wa Jehowa. L’ɔkɔngɔ wa nshi mɔtshi tsho, Ɔmɛnyi akatombe oma lo lopitadi, akanyiya l’olengolengo ɔnɛ pami kakɔ aki ka nyɔi.
L’ɔkɔngɔ w’ɛnɔnyi ɛnɛi, Ɔmɛnyi akɔ akatshu dia tosakemɛ lo lopitadi lokina. Lam’akinde lɛkɔ, ɔkɔnyi ɔmɔtshi akasukana lande ko akawotɛ ate: “Onde wɛ akambohɔ?” Aki pami kaki lande ambeta ɛnɔnyi ɛnɛi, pami kakafɔnyamaka ɔnɛ nde honga nto la lumu! Ande woho wakandakashimɔ l’ɔngɛnɔngɛnɔ lam’akandokumbatɛ ndo mbuta ate: “Ɛlɔ kɛnɛ, ndo dimi lawɔ laya Ɔmɛnyi wa Jehowa lee!” Pami kakɔ akakondja elongamelo ka lo Bible k’endana la nshi yayaye, akeke Bible l’Ɛmɛnyi wa Jehowa, ndo akakimɔ lɔsɛnɔ lande le Jehowa. Nde kopembetɛ paka lo monga ɔmɛnyi, koko nde akayɔtɔka l’olimu wa lo tena ndo lo tena oko ombatshi mboka wa pondjo suke la yɛdikɔ y’ɛnɔnyi ehende.
Lo woho ɔsɔ mbele, lɔtɔngɔ la mɛtɛ lakonɛma lo yoho ya tshakitudi akananda otema w’ɔlɔlɔ w’onto ɔmɔtshi. Diɛsɛ sɔ dia kimanyiya anto woho wa koma lo kondja ewo ka mɛtɛ sokoyaka Akristo wa mɛtɛ dia vɔ tetemala l’olimu w’esambishelo kânga ‘mbalɔshanaso la tena dia wolo nɛ.’