‘Oko watodjaka lowolo onyalɔ lowolo diɛsa’

OYA l’ekomelo k’eleko ka sato T.D., ɔlɔngɔlɔngɔ ɔmɔtshi wa losembwe, lokombo lande Anthony, ɔnɛ lakawelɛka ɔnɛ: “Okristo wa l’Ɔtɛmwɛlɔ wa Kɔptɛ,” akayakakitola l’andja ko aketsha ɛnɔnyi 20 ndamɛ oto l’oswe. Lande na? Nɛ dia nde akakanyiyaka ɔnɛ ɔsɔ mbaki yoho yoleki ɔlɔlɔ ya nde kambɛ Nzambi olimu. L’atei w’Ase Lokristokristo, nde mbaki onto lakayakitola l’andja lakaleke mbeyama efula.

Ɛlɔ kɛnɛ, Lokristokristo lekɔ la yema y’anto tshitshɛ wasɛna lɔsɛnɔ l’opoko kana la ndjakakitola l’anto akina. Koko, anto efula wekɔ lo nyanga dia vɔ sɛnaka vɔamɛ lo yoho kina. Vɔ hawolange sawola l’anto akina lo dikambo di’endana l’ɔtɛmwɛlɔ, nɛ dia vɔ kanyiyaka ɔnɛ asawo wa ngasɔ tondjaka ewanu la ata. Kɛnɛ keta la ntondo l’ɔtɛmwɛlɔ ele: Aha salɛ onyayɛ onto kɔlɔ.

Mɛtɛ, aha salɛ onyayɛ onto kɔlɔ ekɔ etenyi kɛmɔtshi k’ɔtɛmwɛlɔ wa mɛtɛ, koko aha kɛsɔ keto mbahombama. Yokedi mɔtshi y’edjedja mbutaka ɔnɛ: “Luwulu latudjaka luwulu diesa, osoku mbatuluwanyaka untu elundji ka unyandi.” (Tukedi 27:17) Mɛtɛ, Bible keketshaka Akristo dia vɔ sanganaka kâmɛ, koko aha sɛna lɔsɛnɔ l’opoko, mbuta ate ndjakakitola l’andja kana l’Akristo akina. (Joani 17:​14, 15) Tɔ mbutaka ɔnɛ: “[Tɔsɛdingolanake onto la onyande dia tshutshuyana, NW] lu ngandji la lu elimu w’ololo. Tatukimoki nsangana kame.” (Heberu 10:​24, 25) Ɛmɛnyi wa Jehowa wekɔ lo ndjela dako sɔ. Esangɔ efula lo lomingu, vɔ sanganaka kâmɛ dia ‘onto l’onto ndowanya elungi ka onyande,’ lo keketsha mbetawɔ y’anyawɔ ambetawudi. Vɔ mɛnaka ɔnɛ: Sawola akambo wa lo Bible la losembwe tshɛ hatondja ata. Koko, sawo diakɔ mbelaka diokanelo la wɔladi. Ɔsɔ ekɔ etenyi kɛmɔtshi k’ohomba efula k’ɔtɛmwɛlɔ wa mɛtɛ.