Osase Anyu Ahɛtɛ!

KO L’ƆKƆNGƆ diko, etena kakakoke dia onunu w’onto sɛna dia mɛna Mɛsiya wakalakema! Oma lo ɛnyɛlɔ ka Nzambi Simɛyɔna akeyaka ɔnɛ: “[nde] huvo ntundu atenyi Kristu ka [Jehowa, NW].” (Luka 2:26) Koko, ande ɔngɛnɔngɛnɔ wakikɔ lam’akɔtɔ Simɛyɔna lo tɛmpɛlɔ ko Mariya la Yɔsɛfu mbosha Yeso l’anya ande lee! Nde akatombola Nzambi ata ate: “Kumadiondjo, etawo ukambi aye atshu kakiane la ki, . . . ne dia ashu ami wambena panda kaye . . . usasi wa mpetela asi wedja, lu lutumbu la wudja aye Isariyele.”​—⁠Luka 2:​27-32; ɛdika la Isaya 42:​1-6.

Tatɛ oma lo batismu kande lam’akandakotsha ɛnɔnyi 30 polo ndo lo nyɔi kande, Yeso akɛnya ɔnɛ nde kele ‘osase’ w’andja. Lo weoho akɔna? Nde akangamula esase wa lo nyuma oma l’esambishelo k’endana la Diolelo diaki Nzambi l’eyango Ande. Nto nde akakɛnɛmɔla wetshelo wa kashi wa tɛmwɛlɔ ndo akɛnya hwe ɔnɛ wekɔ elimu wa lo odjima. (Mateu 15:​3-9; Ngalatiya 5:​19-21) Ɔsɔku, mbakakoke Yeso mbuta ate: ‘Dimi lekɔ osase w’andja.’​—⁠Joani 8:⁠12.

Yeso akavu l’ɔnɔnyi 33 T.D. Ko onde lâsɔ osase wakadimala? Ndoko kanga yema tshitshɛ! Lam’akinde eke la nkɛtɛ, Yeso akatɛ ambeki ande ate: “Usasi anyu ahete la ntundu ka antu.” (Mateu 5:16) Diɔ diakɔ diakatetemala ambeki ande mpɛtsha osase.

Lo mbokoya Yeso, Akristo wekɔ lo ngamula osase wa Jehowa nshi nyɛ oma lo ndjasha l’olimu w’esambishelo. Vɔ ‘wekɔ lo kɛndakɛnda oko ana w’osase,’ wɛnya vamɛ ɛhɛtɛlɔ kawɔ lo lɔsɛnɔ l’Akristo.​—⁠Efeso 5:⁠8.

[Caption on page 32]

[Box on page 32]

Onde Wɛ Nangaka Onto Ndja dia Ndjokenda Oka?

Kânga l’atei w’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika ka Bible k’endana la Nzambi, la Diolelo diande, ndo la sangwelo diande di’ɔlɔlɔ diakandasangoya dikambo di’anto. Naka wɛ nangaka mbeya awui akina wa lâdiko kana onto ɔmɔtshi ndja dia ndjokêtsha Bible lakayɛ aha la kɔlɔmba falanga, fundɛ Association “Les Témoins de Jéhovah” mukanda lo dihole diɛnayɛ ɔlɔlɔ lo lɛkɛ 2.