Esambelo Lo Ɛnɔnyi Ɛnɛi Wa Ta

L’EDJA k’ɛnɔnyi ɛnɛi wakalɔ̂maka ta lo lɛtshi la nkɛtɛ la wodja wakawelɛka ntondo ɔnɛ Yougoslavie, anto efula wakɛnyi pâ efula ndo wakasowe la wola wa mamba. L’atei awɔ mbaki ndo nkama y’Ɛmɛnyi wa Jehowa, wanɛ wakatetemalaka tɛmɔla “Nzambi k’esambelo tshɛ” la kɔlamelo.​—⁠2 Kɔrɛtɔ 1:​3, NW.

Lo Sarajevo, anto waki la pâ kekina ka mbidjasɛ l’osomba a woke wakadingama l’edja tshɛ kakawalɔka ta. Dja y’atɔtɔ, ashi, nkonyi, la mbo ya ndɛ aki wola wa mamba. Ko ngande wakakɛndakɛndaka tshumanelo di’Ɛmɛnyi wa Jehowa wa la Sarajevo l’atei w’ekakatanu a wolo ngasɔ na? Akristo w’oma lo wedja wosukanyi la wɔ wakadje nsɛnɔ yawɔ lo wâle dia mbaela lokema la diangɔ diakoka mbakimanyiya. (Enda lo Tshoto y’Etangelo ya lo Falase ya Tshaka Fudu 1, 1994, lɛkɛ 23-27.) Ndo nto, anangɛso wa la Sarajevo wakakahanaka la anyawɔ kɛnɛ kaki lawɔ, ndo wakalekaka mbidja yimba lo kahana diangɔ dia lo nyuma. L’edja k’odingamelo w’osomba akɔ, omendji ɔmɔtshi w’Okristo w’oma lɔkɔ akasale alapɔlɔ ɔnɛ:

“Sho mbɔsaka nsanganya yaso la nɛmɔ efula. Dimi la wadiɛmi, la anto akina 30, kɛndakɛndaka kilɔmɛtɛlɛ 15 mbala tshɛ katshɔso lo nsanganya. Tena dimɔtshi, ewandji wa wodja wakataka dia mbisha anto ashi lo wenya wakatɔtɔka nsanganya. Anangɛso akawasalaka na? Onde wakadjasɛka la ngelo kana wakatshɔkaka lo nsanganya? Anangɛso wakalekaka nanga ntshɔ lo nsanganya. Anangɛso kimanyiyanaka nshi tshɛ; kɛnɛ tshɛ kele lawɔ, vɔ kikahanaka. Kadiyɛso kɛmɔtshi mbidjasɛ l’otshimba w’osomba, suke l’okonda; ɔnkɔnɛ bu wolo efula dia nde kondja nkonyi. Ndo nto, nde ekɔ lo kamba lɛnɛ akatɛwɔ mapa, ko vɔ mbofutaka nshima. L’etena kakoka, nde katɛka okama a woke wa mapa ko mbêlaka lo losanganya. L’ɔkɔngɔ wa losanganya, naka anto wotatombe, nde mbishaka onto tshɛ ɛtshi.

“Ekɔ ohomba di’aha ɔnangɛso kana kadiyɛso kɛmɔtshi ndjaoka lushi lɔmɔtshi oko onto lambokalema. Ndoko onto leya akɔna l’atei aso ayonga l’ohomba w’ekimanyielo mbala kayaye l’atei w’okakatanu. L’eleko ka tshitshi, kadiyɛso kɛmɔtshi akoke hemɔ ko anangɛso w’akɛnda ndo wa wolo wakawodje lo mashinyi wakɛndakɛnda lâdiko dia nyonge y’ekama ko wakôtshindjiya otsha lo nsanganya.

“Sho tshɛ kambaka kâmɛ l’olimu w’esambishelo, ndo Jehowa akatshɔkɔla weolo wadjaso. Nde akɛnyi pâ ka mamba kele la so la Bosnie, koko nde akatɔtshɔkɔla lo tosha ehamelo​—⁠ehamelo kakiso kɔmɛna la ntondo ka ta.”

Lo yoho yakɔ yâmɛ, lo etenyi kekina kambofukutana la ta ka lo wodja wakawelɛka ntondo ɔnɛ Yougoslavie, Ɛmɛnyi wa Jehowa wambofulanɛ kânga mbele asui a wolo. Lo dikambo dia djui mɔtshi y’Ɛmɛnyi wa Jehowa, alapɔlɔ ɔnɛ woye oma lo bilɔ k’Ɛmɛnyi wa Jehowa ka la Croatie mbutaka ɔnɛ: “Anangɛso wodjashi la Velika Kladuša wekɔ lo sɛna lo tena dia wolo efula diahombawɔ mbikikɛ. Osomba ɔsɔ akalɔshamaka tena efula. Anangɛso wakahombaka nembetshiya lomangemange lawɔ le asɔlayi a weoho la weoho w’Ase Croatie, w’Ase Serbie, ndo wele wa Mizilma. Lo mɛtɛ, vɔ wakahombaka mbikikɛ asui efula​—⁠mbɔtɔ nkanu, nkulama ndjî, ndjala, ndo wâle wa nyɔi. Koko vɔ tshɛ wakatshikala la kɔlamelo ndo wekɔ la diɛsɛ dia mamba dia mɛna woho watshɔkɔla Jehowa elimu awɔ.”

Oyadi asui asɔ tshɛ, Ɛmɛnyi wa Jehowa wa la Velika Kladuša ndo wa l’osomba wosukanyi la wɔ wa Bihać wekɔ lo tetemala fulanɛ lam’atawewoya anyawɔ anto losango l’esambelo l’oma le Nzambi. Lofulo l’apandjudi 26 lo tshɛ l’ahole asɔ ahende wekɔ lo mbeka Bible vɔ l’ambeki 39 lawakawɔ.