Onde Akambo Wa Nganɛ Wayoshila Lushi Lɔmɔtshi?

LO DIHOLE tshɛ diatshɔso nshi nyɛ, sho mɛnaka efukutanu wa wolo, ewanu, ndo ata. Koko, oyango wa jurunalɛ nyɛ bu wa kokotshɛ nsango kina ya kɔlɔ lâdiko wa nyɛ tshɛ yeyayɛ. Jurunalɛ nyɛ yotshikitanyi la tokina yayokɛnya akambo wa mɛtɛ ahende wayokokeketsha. Dikambo dia ntondo ele, pɔlɔfɛsi y’edjedja ya lo Bible yakatɛkɛta dikambo dia nsango efula ya nyangu yokaso nshi nyɛ; dikambo dia hende ko, dibuku diakɔ sɔ dia pɔlɔfɛsi mbutaka ɔnɛ lushi lɔmɔtshi, akambo wa kɔlɔ wele oko nɛ diɛnaso l’osato ɔnɛ wayoshila pondjo. Ata hawotonga nto pondjo. Wa bɔɔmbɛ hayotoyala nto, wanɛ wakandana ekoma oma l’ahole a woshamu hawotoyala nto, ekoma wakundɛwɔ la tshina dia nkɛtɛ hawotoyala nto, ndo awui w’epetenge kana wa bandi hawotoyala nto pondjo. Ana wa tshike wɛna shɔkɔ kana ase dawo waha la mvudu ya mbidjasɛ hawotoyala nto pondjo. Andja wayolola la wɔladi w’oshika ndo wakeketsha etema w’anto. Onde wɛ kombolaka mɛna etena ka ngasɔ? Tambokokeketsha dia wɛ menda kɛnɛ kata Bible. L’atei a Bible, wɛ mbeyaka kondja ekeketshelo k’efula kahayatakanyiyaka ndoko lushi ɔnɛ wɛ kokaka kikondja.