Ngandji Koleki Ka Wâle A Womoto
WÂLE ɛmɔtshi a wamato mbikashaka anawɔ w’ashashi l’ahole wêmala waa bisi, lo waa komba, kana l’ɛsɛsɛ. Mbala efula, wanɛ watatɔngɔna mbo ya mindo lo wâla wakashola ana w’ashashi l’akɔhɔ wa mindo wambowotondola, wambokasa awui la ndela anyangɛwɔ. Lo ndjela jurunalɛ O Estado de S. Paulo, “lofulo l’ana lakalɛwɔ lekɔ lo tadɛ tsho.” Lo mɛtɛ, wâle a womoto w’osekaseka mbeyaka ndjonyanga l’ɔkɔngɔ diko l’ɔtɛ wa yɛdikɔ yakandɔshi. Koko, nde mbeyaka mbikasha ɔnande, kânga mbeyande ɔnɛ ɔnakɔ kokaka mvɔ.
Wɛ mbeyaka ndjambola ɔnɛ: ‘Ngande wakoka wâle a womoto kondja kanyi ya mbikasha ɔnande aha la mbeya kɛnɛ kayowokomɛ lo nshi yayaye na?’ Bible mbutaka dikambo diakɔ dia lonyangu sɔ dia tshikitanya ngandji ka wâle a womoto la kɛnɛ kôka Otungi anto ande: “Wali mbeyaka mbuhela ona lalomiandi? Umbutshi huki on’andi lakanduti ketshi uka? Vo mbeyaka mbuhela undu, keli dimi haleyi nkuhela.”—Isaya 49:15.
Lo mɛtɛ, oleki wâle a womoto, Nzambi tokaka ngandji k’efula ndo hanya washo l’ehomba aso. Naka wɛ ambohomana l’okakatanu a woho akɔna tshɛ, oyadi opalanga kana dikɛnda mbeyɛ, eya dia wɛ bu etshike. Otungi ayɛ nangaka kokimanyiya ndo nde ndjakiyanyaka di’ɔlɔlɔ ayɛ. Oko wata omembi w’esambu, ‘naka papa la mama sɛkami, kete Jehowa nongolami.’—Osambu 27:10.
Tshoto y’Etangelo la Réveillez-vous! tombaka l’andja w’otondo dia mbisha anto ewo ka Jehowa, ‘Nzambi ɔtɔi ka mɛtɛ,’ ndo k’Ɔnande Yeso Kristo, ewo kakoka mbisha anto wakilanga lɔsɛnɔ la pondjo.—Joani 17:3.
Kânga l’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika kasha Bible lo dikambo dia Nzambi, dia Diolelo diande, ndo dia sangwelo diande di’ɔlɔlɔ diendana l’anto. Naka wɛ nangaka mbeya awui akina kana onto ndjokêtsha Bible lakayɛ ofele, mbola Ɛmɛnyi wa Jehowa wa lo ngelo kodjashiyɛ kana tomɛ Association “Les Témoins de Jéhovah” mukanda lo B.P. 634 Limete, Kinshasa, République démocratique du Congo.
[Caption on page 32]
[Box on page 32]
Wɛ Nangaka Onto Ndjokenda?