Wɔladi Wa L’andja W’otondo: Oma Lende Ayowoya?
ONDE woho wambodiangana waa kalasa la ɛtɛmwɛlɔ lo nkɛtɛ k’otondo ayela wɔladi l’andja w’otondo? Ɔsɔ mbele mposa ka wolo kaki Dr. Robert Muller; nde aki okimanyedi wa secrétaire général ka Nations unies ndo akalongola Difuto dia UNESCO dia l’ɔnɔnyi wa 1989 lo dikambo di’Olakanyelo wa Wɔladi. Oko wotamidiɔ lo jurunalɛ yelɛwɔ The Vancouver Sun, Dr. Muller “mbetawɔka ɔnɛ ambeki wa lo nkɛtɛ k’otondo pombaka ndakanyema akambo w’eshika lo kɛnɛ kendana l’okama wa nkɛtɛ, la lonto ndo la dionga diaha l’akambo a ngala.” Nde ekɔ lo nongamɛ lushi layowolakanya ana lo waa kalasa ya l’andja w’otondo ɔnɛ O.N.U. ekɔ elongamelo koleki ɔlɔlɔ lo dikambo dia wɔladi. Jurunalɛ Sun mbutaka dia yɔnɛ Muller mbetawɔka nto ɔnɛ “ɛtɛmwɛlɔ tshɛ wa l’andja w’otondo pombaka mbɔtɔ l’atei w’ɔlɔngɔswamelo w’oyoyo wele oko O.N.U., ɔlɔngɔswamelo welamɛ ɔnɛ Ɛtɛmwɛlɔ Wosanganyi.” L’etena kɛsɔ, “wetshelo tshɛ w’ɛtɛmwɛlɔ wayokeketshaka anto dia tshika akambo a ngala.”
Onde wɔladi wokoyala lushi lɔmɔtshi l’andja w’otondo? Eelo! Koko aha oma le anto. Aya ɛnɔnyi ndekana 2700, ofundji ɔmɔtshi wakalɔmbwama oma le Nzambi akɛnya kiɔkɔ yoleki dimɛna y’olakanyelo wa wɔladi lam’akandatatshi ɔnɛ akanga w’etema wosembwe ‘wayolakanyema oma le Jehowa’ ndo wɔladi awɔ wayoyala ‘efula.’—Isaya 54:13.
Bible mbutaka ɔnɛ Nzambi ekɔ ɔnɛ ‘lashana wɔladi.’ (Romo 16:20) Kânga nshi nyɛ, ekongelo k’olakanyelo wa mamba lo nkɛtɛ k’otondo kekɔ lo tatshu otsha la ntondo lam’atalakanya Jehowa ekambi ande dia vɔ ‘nyanga wɔladi ndo mboyela,’ dia vɔ ‘tshula tɔɔmbɔ tawɔ nkongo,’ ndo di’aha vɔ ‘mbeka akambo w’ata nto.’—1 Petero 3:11; Isaya 2:2-4.
Ɔtɛmwɛlɔ wosukame l’akambo wa mɛtɛ, waha la dungi pende ndo la lokeso, mbetawɔmaka ndo tshɔkwamaka oma le Nzambi. (Mateu 15:7-9; Joani 4:23, 24) Paka ɔtɛmwɛlɔ wa mɛtɛ oto, wayaɔtɔnganyiya tshɛ l’Ɔtɛkɛta wa Nzambi, mbakoka tondja anto wasɛna lo wɔladi ndo wele kâmɛ, anto wokana ngandji k’oshika.—Joani 13:35.
Dia wɛ mbeya awui akina efula lo kɛnɛ kata Ɔtɛkɛta wa Nzambi lo dikambo dia wɔladi wa l’andja w’otondo, tambokɔlɔmba dia wɛ mɛnana l’afundji wa jurunalɛ nyɛ kana mbafundɛ mukanda.
Kânga l’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika kasha Bible lo dikambo dia Nzambi, dia Diolelo diande, ndo dia sangwelo diande di’ɔlɔlɔ diendana l’anto. Naka wɛ nangaka mbeya awui akina kana onto ndjokêtsha Bible lakayɛ ofele, mbola Ɛmɛnyi wa Jehowa wa lo ngelo kodjashiyɛ kana tomɛ Association “Les Témoins de Jéhovah” mukanda lo B.P. 634 Limete, Kinshasa, République démocratique du Congo.
[Caption on page 32]
[Review on page 32]
WƐ NANGAKA ONTO NDJOKENDA?