Ntondo taki ndjaondo, koko kakianɛ taya ɛkɔkɔ!

Lam’akiso têke akɛnda dimi la Sakina, taki asukanyi. Sakina aki dikongote ndo la demba dia wolo, koko dimi laki tshitshɛ tshitshɛ ndo komonga la demba dia wolo. Takawanaka woho w’anyanya tena la tena, ndo lushi lɔmɔtshi takalɔ ta dia mamba. Tatɛ oma lo lushi lɔsɔ sho kɔtɛkɛtshanyaka kana mbishana mɔyɔ nto. Koko, l’ɔkɔngɔ sho tshɛ takonɔ ngelo, ndo ndoko onto laki la losango la wonyande.

L’ɔnɔnyi wa 1994, dimi lakatatɛ mbeka Bible dimi l’Ɛmɛnyi wa Jehowa, ndo lakamɛ tshikitanya lonto lami yema yema. Ɛnɔnyi ɛnɛi l’ɔkɔngɔ, lam’akiso lo losanganya laso la lânde la lushi ɔtɔi lakasalema la Bujumbura, lo wodja wa Burundi, dimi lakambe heyama dia mɛnana la Sakina. Dimi laki l’ɔngɛnɔngɛnɔ lo woho wakinde nde lawɔ lo losanganya lɔsɔ, koko sho kombishana mɔyɔ wa l’ɔngɛnɔngɛnɔ tshɛ. Koko l’ɔkɔngɔ diko lushi lakɔ lɔsɔ, lakambe heyama lam’akamawɛnyi l’ɔnɔngɔ w’anto waki suke la batizama! Nde lawɔ akatshikitanya lonto lande tshɛ lo tshɛ. Nde komonga nto elanga ata ɔnɛ lakawanaka lami mbala la mbala. Aki ɔngɛnɔngɛnɔ efula dia mɛna woho wakandasha djembetelo ya lo sɛkɛ ya ndjakimɔ kande le Nzambi lo batizama l’ashi!

Lam’akandatombe oma l’ashi, dimi lakalawɔ dia tokumbatɛ ndo lakawotɛ lo hiɔtɛhɔtɛ nte: “Wɛ akohɔ woho wakatalɔ?” Nde akakadimola ate: “Eelo, lekɔ lo mbohɔ, koko ɔsɔ ekɔ akambo wambetaka. Kakianɛ dimi lambɔlɔta lonto l’oyoyo.”

Dimi la nde tekɔ l’ɔngɛnɔngɛnɔ lo woho wambotoyoshola akambo wa mɛtɛ wasanganya anto kamɛ ndo woho wambotoyotshikitanya lonto laso laki oko la ndjaondo ko monga la lonto l’ɛkɔkɔ waki Jehowa Nzambi, Onami w’ɛkɔkɔ wa Woke. Lo mɛtɛ, akambo wa mɛtɛ wa lo Bible tshikitanyaka nsɛnɔ y’anto.