Lokristo Kimanyiyaka Ase Wola
MƐNAMAKA dia wola wa mamba wakikɔ l’atei w’ase Juda wa lo ntambe ka ntondo ka lo tena diaso nɛ. Aha la tâmu, ɛlɔmbwɛlɔ k’oma le angɛndangɛnda, mbut’ate lo nshi yaki ase Juda lo fumbe la Babilɔna vɔ kokoka kitanyiya Ɔlɛmbɛ wa Mɔsɛ wakakokɛka etenyi kawɔ k’okitɔ, mbut’ate diangɔ diakawahɛnɛ oma le watshɛwɔ. (Enda lo Nehemiya 9:36, 37.) Ewandji w’ɛtɛmwɛlɔ, djekoleko Afarisɛ, wakalekaka ndjasha lo mbekelo y’ashidi lo dihole dia mbidja l’etema w’anto ngandji ka mɛtɛ ka wanyawɔ anto ndo yoho ya dimɛna ya kimanyiya ambutshi waya esombe ndo wele lo dihombo. (Mateu 15:5, 6; 23:23; enda nto lo Luka 10:29-32.) Afarisɛ w’anangi wa falanga kondjakiyanyaka efula dikambo di’ase wola.—Luka 16:14.
Koko Kristo Yeso, ‘akoke elui w’anto kɛtshi nɛ dia vɔ wakahɛnyahɛnyamaka, ndo kondjala la ekimanyielo, vɔ waki oko ɛkɔkɔ waha l’onami.’ (Mateu 9:36) Woho wakandasambishaka ase wola ndo anto wakahɛnyahɛnyamaka lokumu l’ɔlɔlɔ akatshikitana efula la dionga diaki l’ewandji w’ɛtɛmwɛlɔ w’ase Juda. Ɔsɔ aki ɔtɔi ɔmɔtshi wa dikambo wakɛnyaka dia nde mbaki mɛtɛ Mɛsiya. (Mateu 11:5; Luka 4:18; 7:22) Anto waketawɔ lokumu l’ɔlɔlɔ lɔsɔ wakakondja diɛsɛ dia woke dia tokita Diolelo dia l’olongo.—Mateu 5:3; Luka 6:20.
Oko wakawadje sheke vɔ la Nzambi, ase Juda wakahombaka kimanyiya anangɛwɔ w’ase Isariyɛlɛ wanɛ waki lo dihombo. (Tukedi 14:21; 28:27; Isaya 58:6, 7; Ezekiyele 18:7-9) Oko wakandangɛnangɛna dikambo sɔ, l’ɔkɔngɔ wa nde mbetawɔ Yeso oko Mɛsiya, Zakɛyɔ akate ate: “Ulungi, dimi layusha akanga a weula etenyi ka hendi ka diango diami.” (Luka 19:8) L’ɔkɔkɔ akɔ wamɛ mbakakoke Yeso mbuta ate: “Keli lam’ayuyukatela antu dambu, keti akanga a weula, dikomo, tshumbi, la tutshungu. Ku we ayotshokwama, ne dia vo kema la diango dia nemanya la ye.” (Luka 14:13, 14) Mbala kekina nde akakeketsha owandji ɔmɔtshi wa dikɛnda waki kanga ɔngɔnyi ate: “Utusundja dieli laye tshe, utudikaheli akanga a weula, ku we ayuyala la diango l’ulungu. Kuyi, kundjeli.” (Luka 18:22) Woho waki pami kɛsɔ kombetawɔ dia kahana diangɔ diande l’anto akina akɛnya dia nde kondjakiyanyaka l’otema ɔtɔi dikambo di’anto wasowa ndo ɔnɛ nde bu la waonga walɔmbama dia monga ombeki wa Yeso.—Luka 18:23.
Ekeketshelo kakasha Yeso ka kimanyiya ase wola kakɔtɔnɛka la kɛnɛ kakandasale ndamɛ. Oko wakinde Ɔna Nzambi l’olongo nde aki la diangɔ tshɛ. Koko, “Kuyanga ndi aki ongonyi, ndi akayala la wula.” Kânga mbakinde ose wola lanɛ la nkɛtɛ, nde aki l’akoka wa tshungola dioho di’anto lo kitsha la ntondo kawɔ ɔngɔnyi woleki tshɛ, mbut’ate elongamelo k’ambeki ande koma ana waki Nzambi. (2 Koreto 8:9) Nde akakitsha nto ɛngɔnyi ekina wa lo nyuma la ntondo kawɔ.—Enda lo 2 Koreto 6:10; Enyelo 2:9; 3:17, 18.
Ndo nto, lam’akinde la nkɛtɛ Yeso akayakiyanyaka dikambo di’anto waki la wola wa diangɔ dia l’emunyi. Nde la apɔstɔlɔ ande waki la dihole diamɛ diakawombaka falanga ndo oma lɛsɔ mbakawɔsaka falanga dia mbisha ase Isariyɛlɛ waki lo dihombo. (Mateu 26:9-11; Mako 14:5-7; Joani 12:5-8; 13:29) L’ɛnɔnyi wakayele, Akristo wakɛnya yimba ya woho akɔ wamɛ etena kakawakimanyiyaka anangɛwɔ waki wola la diangɔ dia l’emunyi. (Romo 15:26; Ngalatiya 2:10) Koko amɔtshi wakohɛ dikambo sɔ, kɛsɔ mbakayotshutshuyaka ombeki Jakɔba dia mbahangwɛ l’ɔtɛ wa shɔnɔdi yaki lawɔ nɛ dia vɔ wakalekaka mamema akanga w’ɛngɔnyi ko wakɔnyɔlaka ase wola.—Jakoba 2:2-9.
Lo mɛtɛ, paka wanɛ waki mɛtɛ lo dihombo mbakawakimanyiyaka la diangɔ dia l’emunyi. Vɔ kokeketshaka anto kânga yema dia monga akanga wa nɛndɛ. Ɔpɔstɔlɔ Paulo akafundɛ ase Tɛsalɔnika ate: “Naka untu halangi nkamba ulimu, ndi talekaki.”—2 Tesalonika 3:10.