Etena kayotetawɔ di’alaka wayokotshama

ƆKƆNDƆ w’anto ndola l’alaka wahakotshama. Mbala efula wedja hawɔlɛnya toseke tadjawɔ taha wodja ɔmɔtshi mbɔtwɛ wodja okina la ta, ɔnkɔnɛ vɔ tomaka anto awɔ l’ata wa wolo efula. Napoléon akate lushi lɔmɔtshi ate: “Ewandji walɔmbɔla nshi nyɛ kotshaka alaka paka naka vɔ wambotshutshuyama dia sala ngasɔ, kana naka alaka akɔ wayonga lo wahɔ awɔ.”

Ko kayotota lo dikambo di’alaka washa anto? Mongaka dikambo dia lonyangu efula, naka onto ambokosha daka ko nde hadikotshisha! Djekoleko naka ekɔ onto leyayɛ ndo lashayɛ otema. Lo mɛtɛ, anto bu l’akoka kana hawetawɔ kotsha alaka awɔ.

Ande otshikitanu wele lam’asa alaka w’anto la waki Nzambi lee! Alaka waki Nzambi sunganaka mbetawɔma ndo sho mbɛkɛ etema lɔkɔ. Daka tshɛ diasha Jehowa mbishaka mɛtɛ eshikikelo k’ɔnɛ diɔ diayokotshama. Lo dikambo di’ɔtɛkɛta waki Nzambi wahetaka pa, Isaya 55:11 mbutaka ɔnɛ: “Osoku mbatuyalaka diui diatutumbaka uma l’unyo ami: Dio hadiutukalulaka le mi ukalulakalula. Keli dio diatutshaka lulangu lami ndu diatushidiyaka kene kakamasanguya.”

Lâsɔ, ngande wahombaso mbɔsa alaka waki Nzambi wa lo Bible na? Sho kokaka mɛtɛ mbɛkɛ etema aso lɔkɔ. Oko ɛnyɛlɔ, ɔpɔstɔlɔ Joani akafunde ate: “Enda, edjaselu ka [Nzambi] keko l’atei w’antu! Ndi ayudjase la wo, ku vo wayuyala antu andi. [Nzambi] ndame ayuyala la wo, ndu ayuyala [Nzambi k]awo. Ndi ayukitula asoi tshe lu ashu awo; nyoi hayuyala ntu, delu hadiuyuyala ntu, kuyanga ndjawi, kuyanga kandji. Akambu wa ntundu wambushila.” (Enyelo 21:3, 4) Wɛ ayokoka ngɛnangɛna l’ɛtshɔkɔ ɛsɔ, naka wɛ mbɔtɔnganyiya lɔsɛnɔ layɛ l’ɛtɛkɛta waki Yeso wata ɔnɛ: ‘Lɔsɛnɔ la pondjo lɔnɛ, wêke dia nkeya wɛmɛ Nzambi ɔtɔi ka mɛtɛ la Yeso Kristo lakayatome.’​—Joani 17:3.