Shɛngiya yele la Yeso le anto wa l’andja w’otondo
EDGAR GOODSPEED, okadimudi ɔmɔtshi wa Bible akafunde ate: “Kɛnɛ tshɛ kakɔndɔla evanjiliyɔ lo dikambo dia awui wakate Yeso, lo woshɛshɛ kana lo sɛkɛ, nde akakoke mbata lo wenya wa tango ehende eto. Koko yema y’awui tshitshɛ shɔ yakakeketsha ndo yakonge la shɛngiya ya wolo efula lo nsɛnɔ y’anto. Diakɔ diele ndoko onto lambonga la shɛngiya le anto wa l’andja w’otondo oko Yeso.”
Etena kakashidiya Yeso Kristo olimu ande lanɛ la nkɛtɛ l’ɔnɔnyi 33 lo tena diaso (T.D.), nde aki l’ambeki w’apami ndo wa wamato oko 120. (Etsha 1:15) Ɛlɔ kɛnɛ, anto ndekana miliyara hiende mbutaka dia wekɔ Akristo. Nkama nkina ya nunu mbetawɔka Yeso oko ɔprɔfɛta. Wetshelo ande wakonge mɛtɛ la shɛngiya ya wolo efula le anto.
Shɛngiya yele la Yeso le anto wa l’andja w’otondo yaketawɔma kânga le ewandji w’ana w’anto wele kema Akristo. Ɛnyɛlɔ, ombewi w’ɛlɛmbɛ w’ose Juda welɛwɔ Hyman Enelow akafunde ate: “Yeso akakome onto lamboleka mbeyama efula, onto lambowoleka mbeka awui ande ndo onto lamboleka monga la shɛngiya l’ɔkɔndɔ w’anto wendana la ɔtɛmwɛlɔ.” Enelow akate nto ate: “Akoka mbeya kɛnɛ tshɛ kakasalɛ Yeso anto? Ngandji kakandakɛnɛmɔla, woho wakandasambaka anto, akambo w’ɛlɔlɔ wakandasalaka, woho wakandakeketsha elongamelo kaki l’anto ndo woho wakandafudia ɔngɛnɔngɛnɔ awɔ, akambo asɔ tshɛ ndeka wanɛ wakasale anto akina lo ɔkɔndɔ w’anto. L’atei w’akambo w’ɛlɔlɔ ndo wa weke wakasale anto, ndoko dikambo ɔtɔi diakonge la shɛngiya ya wolo oko nyɛ yakonge la akambo wakasale Yeso. Nde akakome onto lakaleke kotola yambalo y’anto lo ɛkɔndɔ.” Ndo Mohandas K. Gandhi, ɔnɔmbɔdi wa waa Hindu, akate ate: “Dimi mbeyaka dia ndoko onto la la nkɛtɛ lakasalɛ anto akambo w’ɔlɔlɔ efula ko mbɛdima la Yeso. Ɔnkɔnɛ, ndoko dikambo dia kɔlɔ diele l’atei a Lokristo.” Koko, nde akakotsha ate: “Nyu Akristo mbele la onongo. Nyu hanyɔsɛnɛ lo yoho yɔtɔnganɛ la wetshelo anyu.”
Aya edja efula kele Lokristokristo hayaɔtɔnganyiya la wetshelo waki Yeso. Cecil John Cadoux, ombewi w’ɛkɔndɔ wa lo Lokristo, akɛnyi dia “woho wakatatɛ ndo wakatetemala ɛtɛmwɛlɔ ndiha washo yema yema lo lɔkɛwɔ la mindo akakotola yambalo y’ewandji w’ɛtɛmwɛlɔ lo etatelo k’ɔnɔnyi 140 A.D. (Ɔnɔnyi wa Nkumɛso).” Nde akɛnyi nto dia: “Woho wakiwɔ kondjodja washo wolo lo kɛnɛ kendana la lɔkɛwɔ oko wakasalaka Lokristo la ntondo akayokonyaka dia ase ɔtɛmwɛlɔ kɛndakɛnda oko ase andja ɔnɛ.”
Olanelo ɔsɔ wa lɔkɛwɔ wakatatɛ lo ntambe ka nɛi, etena kakayokomaka Constantin, nkumekanga ka Rɔma, oseka Kristo. Cadoux akafunde ate: “Dui sɔ diakakotola yambalo y’ambewi w’ɛkɔndɔ ndo vɔ wakanyange lo yɛdikɔ mɔtshi lo menda munga ka woke kakasale Ɔtɛmwɛlɔ lo mbidja sheke la Constantin.” Ɔnkɔnɛ lo edja ka ntambe efula tatɛ oma l’etena kɛsɔ, anto wakayataka ɔnɛ Akristo mbewɔ wakayasha lo ditshelo dia kɔlɔ efula diɔnyɔla lokombo la Kristo.
Ambola wa tenda vɔ anɛ: Kakɔna mɛtɛ kaketsha Yeso? Ndo shɛngiya yakɔna yahomba wetshelo ande monga layɔ le so?
[Osato wa lo lɛkɛ 3]
“Dimi mbeyaka dia ndoko onto la la nkɛtɛ lakasalɛ anto akambo w’ɔlɔlɔ efula ko mbɛdima la Yeso.”—Mohandas K. Gandhi
[Osato wa lo lɛkɛ 3]
“Ndoko onto lambonga la shɛngiya le anto wa l’andja w’otondo oko Yeso.”—Edgar Goodspeed
[Efundelo wɛnya kanga]
Culver Pictures