Onde wɛ ekɔ oko otamba wa lagani auna?

LO NGELONGELO mɔtshi yele suke la dibongo dia Moresby lo wodja wa Papouasie-Nouvelle-Guinée, Ɛmɛnyi wa Jehowa ehende wakayakalolaka oma lo olimu w’esambishelo. Lam’akawayayaka, vɔ wakɛnyi otamba ɔmɔtshi w’olangala efula. Ɔmɛnyi wa Jehowa w’opalanga akate ate: “Aa, otamba wa lagani auna!” Lo kadimɔ le ɔlɔngɔlɔngɔ wakayayaka la nde, nde akatetemala mbuta ate: “Lokombo lɔsɔ nembetshiyaka ‘otamba watomba ɔnɔnyi tshɛ.’ Otshikitanyi la etamba ekina efula watomba lo wedja wosukanyi la ekwatɛrɛ, ɔnɔnyi tshɛ otamba ɔsɔ kɔshaka akatshi awɔ tshɛ ndo mɛnamaka oko wamboma. Koko, etena katatɛ avula ndɔ, vɔ ndjofukaka nto, ndjotondjaka alɛmbɔlɛmbɔ ndo vɔ ndjongaka nto olangala.”

Sho kokaka kondja wetshelo ɔmɔtshi oma lo otamba welɛwɔ ɔnɛ lagani auna. Lo ndjela ambewi amɔtshi, otamba ɔsɔ mbadiemaka l’atei w’etamba etanu watondja alɛmbɔlɛmbɔ woleki elangala lo andja w’otondo. Kânga mbele vɔ kɔshaka alɛmbɔlɛmbɔ ndo akatshi awɔ lo nshi y’ɔwɔ, otamba ɔsɔ mombaka ashi. Edio awɔ wekɔ wolo ndo vɔ kokaka pama l’atei w’ave wele etale efula lo nkɛtɛ. Lo yoho shɔ, otamba ɔsɔ hawonyukɔ la mpɛpɛ ya wolo. Lo tshena pe, vɔ mɔngaka kânga l’atei w’ave.

Sho kokaka monga l’ekakatanu wadja mbetawɔ kaso l’ohemba. Kakɔna kayotokimanyiya dia sho mbikikɛ? Lo ɛnyɛlɔ ka lagani auna, sho kokaka nnɔ ndo momba ashi washa lɔsɛnɔ wa lo Ɔtɛkɛta wa Nzambi. Sho pombaka mamema ‘dive diaso,’ la wolo tshɛ, mbuta ate Jehowa ndo mamema okongamelo ande. (2 Samuele 22:3) Mɛtɛ, otamba wa lagani auna toholaka dimɛna dia oyadi tekɔ lo dihole dia wolo dia ngande, sho kokaka nama wolo aso wa lo nyuma naka sho kondja wahɔ oma lo tɛdikɔ tɔsa Jehowa. Lo sala ngasɔ, ‘tayokita alaka’ wakandatolake, mbidja ndo daka dia lɔsɛnɔ la pondjo.​—Heberu 6:12; Enyelo 21:4.