Woshelo w’apɔlɔmɛ wa Kalasa ka 124 ka Ngiliyadɛ

Waa misiɔnɛrɛ wekɔ oko ɛndjɔ

L’ƆKƆNGƆ wa ngɔndɔ shamalo tshɛ, Kalasa ka Bible k’Ɛmɛnyi wa Jehowa ka Ngiliyadɛ mongaka l’ekongelo ka woshelo w’apɔlɔmɛ kelamɛ nkumbo k’otondo ka Bɛtɛlɛ ka l’États-Unis. Lo Ngɔndɔ ka sato 8, 2008, angɛndangɛnda w’oma lo wedja ndekana 30 wakasangana kâmɛ la nkumbo ka Bɛtɛlɛ lo woshelo w’apɔlɔmɛ wa Kalasa ka Ngiliyadɛ ka 124. Anto 6411 wanɛ waki lo diaaso sɔ wakangɛnangɛna kâmɛ la ambeki lo lushi lawɔ la woke lɔsɔ.

Ɔnɔmbɔdi w’ekongelo, ɔnangɛso Stephen Lett la l’Olui-walɔmbɔla akadihola ekongelo kakɔ la sawo diaki l’ɔtɛ a dui ɔnɛ: “Nyotshu otsha la ntondo kâmɛ la ɛndjɔ wa didjidji waki Jehowa.” Enyelo 9:1-4 mbɛdikaka djui ya tshitshɛ ya Akristo w’akitami wakayomɛka nto l’olimu wa lo nyuma lo 1919 la lemba la woke l’ɛndjɔ. Wakohola ambeki dia oko wewɔ l’atei wa “ekoko ekina,” vɔ wambosangana kâmɛ la lemba la woke l’ɛndjɔ wa didjidji.​—Joa. 10:16.

Lon Schilling, ɔnangɛso ɔmɔtshi la lo kɔmite ka filialɛ ka l’États-Unis akasha sawo diahɔnyi diaki l’ɔtɛ a dui ɔnɛ: “Kanyokimanyiyanake.” Diɔ diakendanaka la ɛnyɛlɔ kaki Akula la Piriskila, atshukanyi amɔtshi w’Akristo wa lo ntambe ka ntondo. (Romo 16:3, 4) Kalasa ka Ngiliyadɛ kɛsɔ kaki la atshukanyi 28. Wakawaohola ɔnɛ dia kondja etombelo w’ɔlɔlɔ l’olimu wa misiɔnɛrɛ, vɔ pombaka keketsha amama wa awala awɔ. Ndoko dihole diatɛkɛta Bible dia Akula aha la nimola wadɛnde Piriskila. Diakɔ diele ɔpɔstɔlɔ Paulo la etshumanelo wakawaɔsaka oko atshukanyi. Woho akɔ wâmɛ mbele, atshukanyi wa waa misiɔnɛrɛ wa nshi nyɛ pombaka kamba kâmɛ, tɛmɔlaka kâmɛ ndo kandolaka kâmɛ ekakatanu wa lânde wendana la kamba lo wodja okina, mbuta ate kimanyiyanaka.​—Etat. 2:18.

Ɔnangɛso Guy Pierce la l’Olui-walɔmbɔla akasha sawo diakayele diaki l’ɔtɛ a dui ɔnɛ: “Nyɛnya lowando lanyu l’ɔlɔlɔ wa Jehowa lo salaka kɛnɛ kele ɔlɔlɔ.” Ɔnangɛso Pierce akalembetshiya dia monga ɔlɔlɔ halembetshiya tsho mbewɔ dia sala kɛnɛ kele kɔlɔ. Onto ɔlɔlɔ salaka akambo w’ɔlɔlɔ dia wahɔ w’anto akina. Jehowa Nzambi ekɔ ɔlɔlɔ lo yɛdikɔ yoleki tshɛ. (Zek. 9:16, 17) Ɔlɔlɔ ndo ngandji kaki Nzambi kokaka totshutshuya dia salɛ anto akina akambo w’ɛlɔlɔ. Lo mandola ambeki, ɔnangɛso Pierce akakomiya lo mbuta ate: “Nyokotshake kɛnɛ kele ɔlɔlɔ. Ɔnkɔnɛ, tekɔ l’eshikikelo dia nyayotetemala mɛnya lowando lanyu l’ɔlɔlɔ waki Nzambi lo sala kɛnɛ kele ɔlɔlɔ lo dihole tshɛ diayonyotoma Jehowa Nzambi.”

Oma lâsɔ, ɔnangɛso Michael Burnett, laki misiɔnɛrɛ koko kakianɛ wambotoma ombetsha lo Ngiliyadɛ akasha sawo diele l’ɔtɛ a dui ɔnɛ: “Nyɔlɔtɛ wetshelo wambonyolongola oko hiɔndɔ ya eohwelo lam’asa washo anyu.” Etena kakawalɔtaka “hyondo y’euhwelu,” ase Isariyɛlɛ wakahombaka mbohɔ woho wakâtshungola Jehowa lo dihindo oma l’anya w’ase Edjibito. (Etum. 13:16) Ambeki wakakeketshama dia mbohɔka efula ka wetshelo wakawalongola lo Kalasa ka Ngiliyadɛ oko anto wambɔlɔta wetshelo akɔ oko hiɔndɔ ya eohwelo lam’asa washo awɔ. Ɔnangɛso Burnett akatɔtɔmiya ohomba wa monga la okitshakitsha, wɛdimo ndo kamba l’atɔndɔ wa lo Bible etena kakandolawɔ okakatanu wakoka tomba lam’asawɔ la asekawɔ waa misiɔnɛrɛ ndo l’anto akina.​—Mat. 5:23, 24.

Mark Noumair, ombetsha ɔmɔtshi w’edjedja wa lo Kalasa ka Ngiliyadɛ akasha sawo diaki l’ɔtɛ a dui ɔnɛ: “Osambo akɔna wayembama lo dikambo dianyu?” Lo nshi y’edjedja, anto waki la mbekelo ka membaka osambo lo afɛstɔ wa edjelo k’otshumba. Wakembɛ waoho wa Rubɛna, Danɛ ndo Ashɛrɛ osambo ɔmɔ wakɛnya dia vɔ komonga la yimba ya ndjahombia, koko wakandola dioho dia Zebuluna l’osambo akɔ l’ɔtɛ wakiwɔ la yimba ya ndjahombia. (Emb. 5:16-18) L’ɛnyɛlɔ ka ngɛngu k’osambo, ditshelo di’Okristo tshɛ ndjeyamaka l’ɔkɔngɔ le anto akina. Ohetoheto ndo kɔlamelo yele l’onto l’olimu wa Nzambi wayɔngɛnyangɛnya Jehowa ndo wayonga ɛnyɛlɔ k’ɔlɔlɔ le anango la akadiyɛnde. Etena kahokamɛ anto akina wa l’etshumanelo osambo wa didjidji wambofundama oma l’etsha aso, vɔ tshutshuyamaka dia ndjela ɛnyɛlɔ kaso k’ɔlɔlɔ kɛsɔ.

Oko etenyi kɛmɔtshi ka wetshelo awɔ lo Ngiliyadɛ, ambeki wa lo kalasa ka 124 waketsha wenya tshɛtshɛ 3000 l’esambishelo. Lo sawo diaki l’ɔtɛ a dui ɔnɛ: “Nyoyele ɛlɔmbwɛlɔ ka nyuma k’ekila,” ambeki wakakɔndɔlɛ ɔnangɛso Sam Roberson lakamba lo Departɛma diendana la kalasa ya teokrasi awui wakahomana lawɔ l’olimu w’esambishelo ndo wakasale tɔkɛnyɔ ta lo tɔjɛstɛ t’awui amɔtshi l’atei awɔ. Awui wakeketsha wakawakɔndɔla asɔ wakayelana la ɛkɔnya wakâkɔnya ɔnangɛso Patrick LaFranca la lo kɔmite ka filialɛ ka l’États-Unis. Ambeki wakangɛnangɛna alako w’eshika wakawalongola oma le anangɛso asɔ.

Anthony Morris la l’Olui-walɔmbɔla akasha sawo di’ekomelo diaki l’ɔtɛ a dui ɔnɛ: “Nyohɔ dia akambo wɛnama wekɔ wa lo tshanda mɔtshi tsho.” Afundelo tokeketshaka dia mbidja washo l’ɛtshɔkɔ wayotosha Jehowa lo nshi yayaye lo dihole dia mbika washo lo asui wa lo tshanda mɔtshi tsho wakoka pomana laso. (2 Kor. 4:16-18) Wola w’efula, wɛngiya, shɔkɔ, hemɔ ndo nyɔi ekɔ akambo wɛnaso sho tshɛ ɛlɔ kɛnɛ. Waa misiɔnɛrɛ kokaka pomana l’ekakatanu ɛmɔtshi l’atei w’ekakatanu ɛsɔ. Koko naka sho mbohɔ dia asui asɔ wekɔ wa lo tshanda mɔtshi tsho, kete dui sɔ diayotokimanyiya dia sho tetemala mbidja Jehowa lo dihole dia ntondo lo nsɛnɔ yaso ndo diaha sho shisha elongamelo.

Wakakomiya la ekongelo kɛsɔ lo mbelɛ ambeki tshɛ lo lɔyɛnga dia vɔ mpokamɛ alako w’ekomelo wakasha ɔnangɛso Lett. Nde akâkeketsha diaha vɔ mpekɔ lo mbatɛ ate: “Hatoshishaki olowanyi aso pondjo naka Jehowa ekɔ lo lokondo laso.” Nde akakeketsha waa misiɔnɛrɛ w’eyoyo asɔ dia monga oko ɛndjɔ, tetemala ntshɔ otsha la ntondo l’olimu waki Jehowa, nama ohetoheto awɔ, kɔlamelo yawɔ ndo mongaka nshi tshɛ l’okitanyiya.

[Kiombo ya lo lɛkɛ 30]

AWUI WENDANA LA AMBEKI

Wakaye oma lo wedja: 7

Wakatomama lo wedja: 16

Lofulo la ambeki tshɛtshɛ: 56

Yɛdikɔ ya l’atei atei y’ɛnɔnyi awɔ: 33,8

Yɛdikɔ ya l’atei atei y’ɛnɔnyi wambowosala l’akambo wa mɛtɛ: 18,2

Yɛdikɔ ya l’atei atei y’ɛnɔnyi wambowetsha l’olimu wa lo tena tshɛ: 13,8

[Osato wa lo lɛkɛ 31]

Kalasa ka 124 ka Ngiliyadɛ ka Bible ka Ɛmɛnyi wa Jehowa

Lo listɛ lele lanɛ l’ɛse, nkombo nɔngama oma lo lonya la wadi otsha lo lonya l’omi ndo oma la ntondo otsha l’ɔkɔngɔ.

1) Nicholson, T.; Main, H.; Senge, Y.; Snape, L.; Vanegas, C.; Pou, L. 2) Santana, S.; Oh, K.; Lemaitre, C.; Williams, N.; Alexander, L. 3) Woods, B.; Stainton, L.; Huntley, E.; Alvarez, G.; Cruz, J.; Bennett, J. 4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. 5) Lemaitre, W.; Harris, A.; Wells, C.; Rodgers, S.; Durrant, M.; Senge, J. 6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. 7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. 8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. 9) Cruz, P.; Degandt, B.; Williams, D.; Wells, S.; Alexander, D.; May, M.

[Osato wa lo lɛkɛ 32]

Kalasa ka Ngiliyadɛ salemaka lo mvudu ya Ɛmɛnyi wa Jehowa yashama wetshelo yele la Patterson