“Ɔnɛ mɛtɛ ekɔ lokombo laki Nzambi loleki ekila ndo woke”
Nicolas de Cues akate ɛtɛkɛta ɛsɔ lo sawo dimɔtshi diakandasha lo 1430.a Nde aki onto lakayashaka lo awui efula, ɛnyɛlɔ nde akeke ɔtɛkɛta wa Grɛkɛ, wa Hɛbɛru, akeke nto filozofi, teoloji, akumi ndo awui wa tɔɔtɔ. Lam’akinde l’ɛnɔnyi 22, nde akakome dɔkɔtɛlɛ lo ɛlɛmbɛ w’aseka Mupɛ wa l’Ɔrɔma. Lo 1448, nde akasɔnama oko kardinalɛ.
Ambeta suke l’ɛnɔnyi 550, Nicolas de Cues akake luudu lakawakokɛka esombe w’anto l’osomba wa Kues, welɛwɔ ɛlɔ kɛnɛ Bernkastel-Kues, osomba wanganyi la osomba wa Bonn kilɔmɛtɛlɛ 130 lo lɛkɛ la sidɛ ka wodja wa Allemagne. Wokamba la luudu lɔsɔ ɛlɔ kɛnɛ oko luudu lombawɔ ekanda lele la efundelo wa l’anya ndekana 310. Ɔmɔtshi l’atei awɔ ekɔ Codex Cusanus 220, lɛnɛ akokaso tana sawo diakasha Cusa lo 1430. Lo sawo, In principio erat verbum (Ɔtɛkɛta waki l’etatelo), Nicolas de Cues akakambe la efundelo wa lo Latin Iehoua dia tɛkɛta dikambo dia Jehowa.b Lɛkɛ 56 lekɔ la etelo kayela kɛnɛ kendana la lokombo laki Nzambi: “Ɔsɔ ekɔ lokombo lakayasha Nzambi. Lɔ lekɔ tetragramɛ, mbuta ate lokombo lele l’alɛta anɛi. . . . Ɔnɛ mɛtɛ ekɔ lokombo laki Nzambi loleki ekila ndo woke.” Etelo kaki Nicolas de Cues mbɔtɔnɛka la woho wele lokombo laki Nzambi tanemaka lo efundelo w’edjedja wa lo Afundelo wa lo Hɛbɛru.—Etum. 6:3.
Codex kɛsɔ kakafundama lo etatelo ka ntambe 15 ekɔ ɔmɔtshi l’atei w’efundelo woleki tshɛ edja wɛnya dia Tetragramɛ kokaka mbadiema “Iehoua.” Efundelo ɛsɔ wekɔ djembetelo kina yɛnya dia woho wadiema lokombo laki Nzambi “Jehowa” ekɔ yoho yamboleka kambema l’edja ka ntambe efula.
[Nɔte ya l’ɛse ka dikatshi]
a Nicolas de Cues akeyamaka nto lo nkombo nyɛ: Nikolaus Cryfts (Krebs), Nicolaus Cusanus ndo Nikolaus von Kues. Kues aki lokombo l’osomba ɔmɔtshi wa lo wodja wa Allemagne lɛnɛ akandotɔ.
b Sawo sɔ diaki l’oyango wa sukɛ wetshelo wa Losato l’osanto.
[Osato wa lo lɛkɛ 16]
Luudu lombawɔ ekanda laki Cues