Ambola w’oma le ambadi aso . . .

Onde Yeso mbele Mikayɛlɛ arkandjelo?

▪ Okadimwelo wa lo tshena pe wekɔ ɔnɛ eelo. Anto wele l’ahole wotshikitanyi wekɔ la mbekelo ka mbɔlɛ onto ɔtɔi nkombo efula. Ngasɔ mbediɔ ndo lo kɛnɛ kendana la nkombo ya lo Bible. Ɛnyɛlɔ, owandji a nkumbo Jakɔbɔ mbelamɛka nto ɔnɛ Isariyɛlɛ. (Etatelu 35:10) Ɔpɔstɔlɔ Petero aki la nkombo tshanu yotshikitanyi: Simɛyɔna, Simɔna, Petero, Kɛfasi ndo Simɔna Petero. (Mateu 10:2; 16:16; Joani 1:42; Etsha 15:7, 14) Kakɔna kakoka toshikikɛ dia Mikayɛlɛ ekɔ lokombo lokina laki Yeso? Ɛsɔ tɔsɛdingole tolembetelo t’oma l’Afundelo tɔnɛ.

Bible tɛkɛtaka mbala tshanu dia etongami ka lo nyuma kele la nkudu kelɛwɔ Mikayɛlɛ. Lɔ tanemaka mbala shato lo dibuku dia Danyele. Danyele 10:13, 21 mbutaka dia Mikayɛlɛ ɔnɛ lele “uwandji omotshi uma l’atei w’ewandji a waki” ndo “uwandji aye” akakimanyiya ondjelo ɔmɔtshi wakatomama dia ndjokotsha ɔkɛndɛ ɔmɔtshi. Oma lâsɔ, sho mbadiaka lo Danyele 12:1 ɔnɛ l’etena k’ekomelo, “Mikaele, uwandji a wuki, ulami w’asi wudja aye, ayunela.”

Divɛsa dikina diatɛkɛta dia Mikayɛlɛ ele Enyelo 12:7 lɛnɛ atawɔ ɔnɛ “Mikaele la andjelo andi” wakalɔsha Satana Diabolo la andjelo ande wa kɔlɔ ta ko wakawatshanya oma l’olongo.

Lembetɛ dia lo avɛsa tshɛ wa la diko ango, Mikayɛlɛ mɛnyamaka oko ondjelo walɔshana la Satana, otunyi waki Jehowa woleki woke dia nkokɛ ekambi waki Nzambi.

Jude divɛsa 9 mbelɛka Mikayɛlɛ ɔnɛ ‘arkandjelo.’ Tshɛkɛta “arkandjelo” hayofundami l’efula lo Bible. Divɛsa ɔtɔi diɔtɛkɛtshiwɔ dikambo dia arkandjelo ele lo 1 Tesalonika 4:16, lɛnɛ akatɛkɛta Paulo dia Yeso lakolwama lo mbuta ɔnɛ: “Khumadiondjo [Yeso] ndame ayuhulo uma l’ulungu, la dielu, la diui dia [arkandjelo], kame la pungi ka [Nzambi].” Ɔnkɔnɛ, Yeso Kristo mbelɛwɔ lo divɛsa nɛ ɔnɛ owandji wa andjelo.

L’akambo asɔ lo yimba, onde Yeso mbele Mikayɛlɛ arkandjelo? Eelo, Yeso Kristo mbele Mikayɛlɛ arkandjelo. Nkombo yakɔ hiende, mbuta ate Mikayɛlɛ (kitshimudi ate “Ele oko Nzambi?”) ndo Yeso (kitshimudi ate “Jehowa ekɔ panda”) kotolaka yambalo yaso l’ɔkɛndɛ wele la nde wa omamedi wa woke wa lowandji laki Nzambi. Filipi 2:9 mbutaka ɔnɛ: “[Nzambi] akawumbiya [Yeso lakatombwama] otekoya, akawole lukumbu leli ladiku dia kumbu tshe.”

Ekɔ ohomba efula sho nembetɛ dia lɔsɛnɔ laki Yeso kotatɛ lam’akandotɔ oko onto. La ntondo ka Yeso mbotɔ, ondjelo ɔmɔtshi akaye dia ndjotɛ Mariya ɔnɛ nde ayotshɔ diemi lo wolo wa nyuma k’ekila ndo nde ayɔlɛ ɔna layotɔ lokombo ɔnɛ Yeso. (Luka 1:31) L’edja kakandakambe olimu ande, Yeso akatɛkɛta mbala efula dia lɔsɛnɔ laki la nde la ntondo ka nde ndjotɔ oko onto.—Joani 3:13; 8:23, 58.

Ɔnkɔnɛ, Mikayɛlɛ arkandjelo ekɔ lokombo lakawelɛka Yeso la ntondo ka nde ndjotɔ oko onto. L’ɔkɔngɔ wa nde mbolɔ ndo nkalola otsha l’olongo, Yeso akanyomɛmba ɔkɛndɛ ande wa Mikayɛlɛ, mbuta ate Owandji wa andjelo “dia lutumbu la [Nzambi] Shi.”—Filipi 2:11.