EKADIMWELO WASHA BIBLE
Nzambi lokombo lande na?
Ose nkumbo kaso tshɛ ekɔ la lokombo l’oshika. Kaanga waa nyama wekɔ la nkombo. Shi laasɔ Nzambi nde lawɔ ekɔ la lokombo l’oshika? Lo Bible, Nzambi ekɔ la nkombo ya lɔtɛtɛmɔla efula, ɛnyɛlɔ Nzambi Kanga-Wolo-Tshɛ, Nkumadiɔndjɔ Nkum’Olongo kana Otungi, koko nde ekɔ la lokombo lande l’oshika.—Adia Izaya 42:8.
Dikadimwelo efula dia Bible diekɔ la nkombo yotshikitanyi yaki Nzambi, koko lo Bible—Ekadimwelo k’andja w’oyoyo ka lo Falase, Osambo 83:18 mbutaka ɔnɛ: “Wɛ lelɛwɔ Jehowa, wɛmɛ oto mbele Nkum’Olongo laadiko dia nkɛtɛ k’otondo.”
Lande na kahombaso nkamba la lokombo laki Nzambi?
Etena kasawolaso l’angɛnyi aso, sho mbaelɛka lo nkombo yawɔ y’eshika
Nzambi nangaka sho nkamba la lokombo lande l’oshika. Etena kasawolaso l’angɛnyi aso, sho mbaelɛka lo nkombo yawɔ y’eshika. Shi ngasɔ mbahombaso nsala ndo etena kasawolaso la Nzambi? Yeso Kristo nde lawɔ akatokeketsha dia sho nkamba la lokombo laki Nzambi.—Adia Mateo 6:9; Joani 17:26.
Dia monga angɛnyi wa Nzambi, hatohombe komɛ tsho lo mbeya lokombo lande. Sho pombaka mbeya awui akina wele oko: Ngande wele Nzambi? Onde sho kokaka mɛtɛ ndjasukanya la nde? Wɛ kokaka ntana ekadimwelo w’ambola asɔ lo Bible.