ONDE WƐ AKEYAKA?

Onde tɛmpɛlɔ ka la Jerusalɛma kakayokama nto l’ɔkɔngɔ w’ɔnɔnyi wa 70 T.D.?

YESO akate dia ndoko dive dia tɛmpɛlɔ ka Jehowa diayotshikala laadiko dia dive dikina. Prɔfɛsiya kɛsɔ kakayokotshamaka etena kakalanyema Jerusalɛma oma le alembe w’ase Rɔmɔ wakayalɔmbwamaka oma le Titus lo 70 T.D. (Mat. 24:2) L’ɔkɔngɔ diko, nkumekanga Julien akɔshi yɛdikɔ ya nyomohika tɛmpɛlɔ kakɔ.

Julien mbaki nkumekanga k’ekomelo k’opanganu ka la Rɔmɔ. Nde aki ɔna ɔnango la Constatin le Grand ndo nde aketshama oma le anto wakayataka ɔnɛ Akristo mbewɔ. Koko, l’ɔkɔngɔ wa nde monga nkumekanga lo 361 T.D., nde akatone wetshelo akɔ ndo akayofukutanya Lokristo la mɛtɛ la lo nshi yande lo nsɔsɔmiya wetshelo w’apanganu. Abuku w’ɛkɔndɔ mbeelɛka “ɔpɔsta” nɛ dia nde akatone wetshelo wa mɛtɛ.

Julien akahetsha wanɛ wakataka dia vɔ wekɔ Akristo. Ɔkɔkɔ ɔmɔtshi wakookonya lo nsala dui sɔ ele, ondo nɛ dia l’etena kakinde l’ɛnɔnyi esamalo, nde akɛnyi anto wakayataka ɔnɛ Akristo mbewɔ wadiaka papa kande ndo ewotɔ ande ekina. Lo ndjela ɛkɔndɔ w’ɛtɛmwɛlɔ, Julien akakeketsha ase Juda dia vɔ nyomohika tɛmpɛlɔ kawɔ nto, lo mfɔnya ɔnɛ dui sɔ diayɛnya dia Yeso aki ɔprɔfɛta wa kashi.a

Aha la taamu, Julien akalangaka nyomoka tɛmpɛlɔ. Koko ɛkɔndɔ mɛnyaka dia nde kondjoka tɛmpɛlɔ kakɔ ndo lo ndjela anto akina, naka nde akasale dikambo sɔ, kete nde kondjoshidiya olimu akɔ. Lo akambo asɔ ahende, dimɔtshi diekɔ mɛtɛ. Julien akadiakema ntondo ka nkotsha kaanga ɛnɔnyi ehende wa nde monga nkumekanga ndo tɛmpɛlɔ kondjokama nto.