Nkumekanga Sobhuza II akangɛnangɛna

LO NGƆNDƆ K’ENANƐI 1936, dui dimɔtshi diakatombe lo mbalasa ka nkumekanga Sobhuza la Swaziland. Laasɔ ko Robert nde la George Nisbet w’oma la mbidja mishiki wa Diolelo ndo asawo wakasha ɔnangɛso Joseph Rutherford lo vɔatirɛ yakanunyaka dui. Nkumekanga Sobhuza II akangɛnangɛna. George mbutaka ate: “Kɛnɛ kakatambiya ele, nde akalange nsomba mashinyi wakasangolaka dui, awui wakadjama l’eshinga ndo haut-parleur.”

Robert akakane yimba ndo akookadimola la dilɛmiɛlɔ tshɛ ate dihomɔ nɛ bu dia nsondja. Nde akawombola ate: “Lande na?” Robert akookadimola ate: “Ekɔ diangɔ di’onto ɔmɔtshi.” Nkumekanga Sobhuza akakombola dia mbeya kanga diangɔ sɔ.

Robert akawotɛ ate: “Diangɔ nɛ tshɛ diekɔ diaki Nkumekanga kɛmɔtshi.” Oma laasɔ, nkumekanga Sobhuza akawombola ate ele Nkumekanga kɛsɔ? Robert akawotɛ ɔnɛ: “Yeso Kristo, Nkumekanga ka Diolelo dia Nzambi.”

La dilɛmiɛlɔ di’efula nkumekanga Sobhuza akate ate: “Nde mɛtɛ ekɔ Nkumekanga ka woke ndo dimi hatɔsa kaanga yangɔ yande tshɔi.”

Robert akayofunda ate: ‘Dionga dia nkumekanga kɛsɔ diakamunanda efula. Kaanga mbakandatɛkɛtaka Angɛlɛ dimɛna, nde komonga l’otako ndo akadjaka anto lo demba. Lakadjasɛ la nde suke la minitɛ 45 lo biro ande etena kakadjɛka George anto mishiki l’andja.’

Robert kotshaka ate: ‘Lushi lɔsɔ, takatenda kalasa mɔtshi ya la Swaziland ndo lɛkɔ mbakatatɛna dui diakaleke dimɛna. Takasambisha dikitɛlɛ dia kalasa shɔ ndo nde akatohokamɛ la yambalo tshɛ. Etena kakatawatɛ ɔnɛ tekɔ la mashinyi wele l’awui wakadjama l’eshinga, nde akangɛnangɛna ndo akatshumanya suke l’ambeki 100 dia vɔ mpokamɛ. Wakatotɛ dia ɔsɔ aki kalasa ya sekɔndɛrɛ yakawetshaka ana w’apami akambo wa dikambɔ, tojardɛ, w’otshudi w’abaya, wa wokelo, Angɛlɛ ndo akumi. Waketshaka ana wa wamato woho wa mbotsha, elimu wa lo luudu ndo awui akina. Tshaki nkumekanga mbakaate kalasa shɔ.’a

L’etatelo ka 1933, nkumekanga Sobhuza akahokamɛ la yambalo tshɛ ambatshi mboka wakaye ndjoosambishaka lo mbala lo mbalasa kande ka lowandji. Mbala kɛmɔtshi, nde akakome polo ndo lo ntshumanya alami ande 100 dia vɔ mpokamɛ losango la Diolelo lakadjama l’eshinga. Anto tshɛ waketawɔ dia vɔ mbaelaka periodikɛ ngɔndɔ tshɛ ndo wakalongola ekanda wakawasha anangɛso. Kombeta edja, nkumekanga akonge la lɔkɔtɔ l’ekanda aso lo luudu lande. Ndo nto, nde kombalanya etena kakashimbe ewandji wa lɛɛta wa la Grande-Bretagne otondjelo w’ekanda aso lam’akakalɔmaka Ta dia hende di’andja w’otondo.

L’edja k’ɛnɔnyi efula, nkumekanga Sobhuza II akatetemala nongola Ɛmɛnyi wa Jehowa lakande la Lobamba. Nde akelɛka ndo ewandji w’ɛtɛmwɛlɔ dia ndjohokamɛ wetshelo w’oma lo Bible wakasambishaka Ɛmɛnyi wa Jehowa. Lo diaaso dimɔtshi, etena kakalembetshiyaka Ɔmɛnyi wa Jehowa waki l’ɛtshi kande ka nkɛtɛ wakawelɛka Helvie Mashazi Mateo tshapita 23, olui w’ewandji w’ɛtɛmwɛlɔ wakonɛ mbala kakɔ ɔtɔi ko wakooshimbe. Koko nkumekanga Sobhuza akekama ndo akatɛ ɔnangɛso Mashazi dia nde ntetemala nsambisha. Oma laasɔ, nkumekanga akatɛ ampokami tshɛ dia vɔ mfunda avɛsa wa lo Bible wakashaka ɔnangɛso.

L’ɔkɔngɔ wa vɔ mpokamɛ sawo diakasha ɔnangɛso ɔmɔtshi laki ombatshi mboka lo diaaso dikina, ewandji ɛnɛi w’ɛtɛmwɛlɔ waki lawɔ wakakoola ekutu awɔ ndo wakate vate: “Sho taya bu nto ewandji w’ɛtɛmwɛlɔ, koko taya Ɛmɛnyi wa Jehowa.” Vɔ wakambola ɔnangɛso ɔsɔ dia kana nde aki l’abuku wele oko wanɛ waki la nkumekanga Sobhuza.

Ntatɛ lo 1930 polo lo nyɔi kande lo 1982, nkumekanga Sobhuza akɛnya dia nde akalɛmiyaka Ɛmɛnyi wa Jehowa ndo nde kombetawɔka di’anto akina mbasɔkisha. Ɔnkɔnɛ, Ɛmɛnyi wa Jehowa vɔ lawɔ waki l’ɛkɔkɔ w’eshika wa mbɛɛnya lowando lawɔ ndo wakoolele efula etena kakandavu.

L’etatelo ka 2013, apandjudi wa Diolelo wakakome 3 000 la Swaziland. La lofulo l’anto ndekana miliyɔ ɔtɔi la lɛkɔ, opandjudi tshɛ ekɔ l’ɔkɛndɛ wa nsambisha anto 384. Ambatshi mboka ndekana 260 wekɔ lo tshumanelo 90 ndo anto 7 496 wakɔtɔ lo Eohwelo ka nyɔi ka Yeso lo 2012. Mbokɛmaka dia ehamelo efula wekɔ lo tasalema la Swaziland. Aha la taamu, otshwelo w’anangɛso asɔ la Swaziland l’ɛnɔnyi 1930 wakonge l’etombelo w’amɛna efula.​—Awui anɛ mbɔsama oma lo Awui wambetaka w’oma lo wodja w’Afrique du Sud.